07/06/2025
» ក្មេងនាំរឿង «
លោកស្រីសាស្ត្រាចារ្យរងថៃ ភួងថង ប៉ាវក្រាផាន់ នៃសាកលវិទ្យាល័យ ជូឡាឡុងកន បានលើកឡើងថា បើថៃមិនចង់ប្រើយន្តការតុលាការអន្តរជាតិ ថៃគួរតែផ្តោតលើការចរចា ជាជាងការប្រើប្រាស់កម្លាំងទ័ព ហើយថៃគួររៀនសូត្រពីភាពឈ្លាសវៃទាំងផ្នែកការទូត និងផ្នែកយោធារបស់កម្ពុជា។
លោកស្រីសាស្ត្រាចារ្យរងបញ្ជាក់ថា ក្នុងករណីជំលោះនេះ រដ្ឋាភិបាលកម្ពុជាពិតជាឈ្លាសវៃ ដោយអាចប្រើយន្តការសមាជរដ្ឋសភា-ព្រឹទ្ធសភាភ្លាមៗ ទទួលបានការគាំទ្រនយោបាយជាឯកច្ឆ័ន្តនាំយកបញ្ហាទៅដោះស្រាយនៅតុលាការយុត្តិធម៌អន្តរជាតិ។ នេះជាការបាញ់ព្រួញមួយបានសត្វពីរ ទី១៖ វិធានការភ្លាមៗឆ្លើយតបទៅនឹងប្រទេសថៃដែលធំជាង និងខ្លាំងជាងនេះ បញ្ជាក់ថាកម្ពុជាមិនខ្លាច មិនចុះញ៉ម ជាពិសេសលើបញ្ហាព្រំដែនដែលនាំឱ្យមានការគាំទ្រភ្លូកទឹកភ្លូកដីពីប្រជាជនខ្លួន។ ទី២៖ កម្ពុជាបង្ហាញអន្តរជាតិថា ខ្លួនគោរពច្បាប់អន្តរជាតិ និងព្យាយាមដោះស្រាយបញ្ហាតាមច្បាប់អន្តរជាតិ ខុសពីប្រទេសថៃ។ សម្រាប់ផ្នែកយោធាវិញ ថៃមិនអាចមើលងាយកម្ពុជាបាននោះទេ ដោយសារសមត្ថភាពកងទ័ពកម្ពុជាមានការកើនឡើងខ្លាំងជាបន្តបន្ទាប់ជាពិសេសមានកិច្ចសហប្រតិបត្តិការប្រទេសមិត្តធំៗជាច្រើន។
សម្រាប់ថៃវិញ លោកស្រីសាស្ត្រាចារ្យបានលើកឡើងយ៉ាងច្បាស់ថា ប្រសិនបើថៃនៅតែរឹងទទឹងលើការប្រើកម្លាំងយោធាមកដោះស្រាយបញ្ហាវិវាទព្រំដែនជាមួយខ្មែរ ថៃនឹងកាន់តែបាក់មុខក្នុងឆាកអន្តរជាតិកាន់តែខ្លាំង គឺដូចទៅនឹងករណីជម្លោះប្រាសាទព្រះវិហារកាលពីឆ្នាំ២០១១។ នាពេលនោះ រដ្ឋាភិបាលថៃរបស់អាប់ភីស៊ីតប្រើនយោបាយជាតិនិយមជ្រុល ប្រើប្រាស់កម្លាំងទ័ពចង់ឈ្លានពានកម្ពុជា តែជាលទ្ធផលត្រូវចាញ់ទាំងក្នុងសមរភូមិ ចាញ់ទាំងលើឆាកអន្តរជាតិជាពិសេសតាមរយៈការចេញសេចក្តីថ្លែងការណ៍របស់ក្រុមប្រឹក្សាសន្តិភាពអង្គការប្រជាជាតិឱ្យមានបទឈប់បាញ់ ហើយក្រោយមកទៀតចាញ់ទាំងលើសមរភូមិច្បាប់អន្តរជាតិទៀត នៅតុលាការយុត្តិធម៌អន្តរជាតិថែមទៀតផង។
លោកសាស្រ្តាចារ្យរង និយាយថាថ្មីៗនេះ ប្រទេសថៃត្រូវបានអាប់ឱនកិត្តិយសលើឆាកអន្តរជាតិលើច្រើនករណីបន្តបន្ទាប់ហើយ ចឹងប្រសិនបើករណីជម្លោះជាមួយកម្ពុជាលើកនេះ នៅតែបន្តភាពជ្រុលនិយមរបស់ខ្លួន បន្តគម្រាមប្រើប្រាស់កងទ័ព មិនប្រើច្បាប់ និងសហគមន៍អន្តរជាតិជាគោលទៀត ពិភពលោកនឹងមើលមកថៃថា «ជាក្មេងនាំរឿង!» លើឆាកអន្តរជាតិមិនខាននោះទេ។
Source: www.facebook.com/share/19zYH443vD/?mibextid=wwXIfr
#ព្រំដែនកម្ពុជាថៃ #ប្រាសាទតាមាន់ #ថៃ #ហេតុការណ៍ #សន្តិភាព
