Thmey Thmey International

08/08/2025

លោកអាន់វ៉ា ចាត់ទុកបទឈប់បាញ់កម្ពុជា-ថៃ ជាភាពជោគជ័យមិនធ្លាប់មានសម្រាប់អាស៊ាន

លោក អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី និងជាប្រធានផ្លាស់វេនអាស៊ាន នៅថ្ងៃទី៨ ខែសីហា បានហៅបទឈប់បាញ់ប្រកបដោយប្រសិទ្ធភាព និងរហ័ស រវាងកម្ពុជា និងថៃ ជាភាពជោគជ័យមិនធ្លាប់មានសម្រាប់អាស៊ាន។

នៅក្នុងកម្មវិធីអបអរខួប៥៨ឆ្នាំនៃការបង្កើតអាស៊ាន លោក អាន់វ៉ា យល់ថា ភាពជោគជ័យនេះ បង្ហាញពីការប្តេជ្ញាដោះស្រាយជម្លោះរវាងមេដឹកនាំកម្ពុជា និងថៃ។

ទន្ទឹមនេះ ប្រធានផ្លាស់វេនអាស៊ាន ក៏បានអរគុណដល់ប្រមុខរដ្ឋាភិបាល, គណៈរដ្ឋមន្រ្តី និងមេបញ្ជាការរបស់កម្ពុជា និងថៃ ផងដែរ ដែលបានដើរតួនាទីដ៏សំខាន់ ក្នុងការស្វែងរកបទឈប់បាញ់៕

ដោយ៖ លោក ធៀន ភារិន្ទ

08/08/2025

រដ្ឋាភិបាលកម្ពុជា នៅថ្ងៃទី៨ ខែសីហា ចេញអនុក្រឹត្យស្ដីពីការអនុវត្តអត្រាពន្ធគយ ០% លើទំនិញនាំចូលពីអាម៉េរិក

08/08/2025

អាម៉េរិក នៅថ្ងៃទី៧ ខែសីហា បានស្វាគមន៍បទឈប់បាញ់រវាងកម្ពុជា និងថៃ ក្រោមការសម្រួបសម្រួលរបស់ម៉ាឡេស៊ី

បកប្រែដោយ៖ ធៀន ភារិន្ទ

07/08/2025

សម្តេច ហ៊ុន ម៉ាណែត ស្នើលោក ដូណាល់ ត្រាំ ប្រធានាធិបតីអាម៉េរិក ជាបេក្ខជនពានណូបែលសន្តិភាព

07/08/2025

គណៈកម្មាធិការព្រំដែនទូទៅ (GBC) នឹងរៀបចំកិច្ចប្រជុំនៅក្នុងរយៈពេល១ ខែ ក្រោយកិច្ចប្រជុំនៅថ្ងៃទី៧ ខែសីហា។ នេះបើតាមកំណត់ហេតុនៃកិច្ចប្រជុំ ចេញនៅថ្ងៃទី៧ ខែសីហា។

07/08/2025

កិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) បានប្រព្រឹត្តទៅក្នុងបរិយាកាសស្ថាបនា និងវិជ្ជមាន

តាមសេចក្តីប្រកាសរបស់ក្រសួងការពារជាតិ នៅថ្ងៃទី៧ ខែកក្កដា កិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅប្រទេសម៉ាឡេស៊ី ដែលដឹកនាំដោយរដ្ឋមន្រ្តីការពារជាតិកម្ពុជា និងថៃបានប្រព្រឹត្តទៅក្នុងបរិយាកាសស្ថាបនា និងវិជ្ជមាន ដែលនាំមកនូវលទ្ធផលប្រកបដោយផ្លែផ្កា។

មិនតែប៉ុណ្ណោះ ភាគីទាំងពីរក៏បានឯកភាពលើលក្ខខណ្ឌនៃបទឈប់បាញ់ និងការរៀបចំយន្តការសម្រាប់អនុវត្ត។

ទន្ទឹមនេះ ភាគីកម្ពុជា និងភាគីថៃបានឯកភាពអនុម័តនូវកំណត់ហេតុនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) រវាងកម្ពុជា និងថៃ និងសេចក្តីថ្លែងការណ៍រួមផងដែរ៕

ដោយ៖ លោក ធៀន ភារិន្ទ

07/08/2025

ឧបនាយករដ្ឋមន្ត្រី និងជារដ្ឋមន្រ្តី​ការពារ​ជាតិ​កម្ពុជា លោក ទៀ សីហា នៅថ្ងៃទី៧ ខែសីហា បានជួបជាមួយប្រមុខការពារជាតិស្តីទីថៃ លោក Natthaphon Narkphanit និងនាយករដ្ឋមន្រ្តីម៉ាឡេស៊ី លោក អាន់វ៉ា អុីប្រាហ៊ីម មុនពេលមានកិច្ចប្រជុំគណៈកម្មាធិការព្រំដែនទូទៅ (GBC) ពិសេស។

រូបភាព BTV Cambodia

07/08/2025

ម៉ាឡេស៊ី៖ កម្ពុជា និងថៃ ឯកភាពបទឈប់បាញ់ និងឯកសារក្រមប្រតិបត្តិ នៅថ្នាក់លេខាធិការ

នាយឧត្តមសេនីយ៍ Mohamed Nizam អគ្គមេបញ្ជាការកងទ័ពម៉ាឡេស៊ី នៅថ្ងៃទី៦ ខែសីហា បានលើកឡើងថា កិច្ចពិភាក្សារវាងកម្ពុជា និងថៃ នៅថ្នាក់លេខាធិការ បានឈានដល់បទឈប់បាញ់ និងឯកភាពលើឯកសារក្រមប្រតិបត្តិ (TOR) សម្រាប់កិច្ចអង្កេតការណ៍ តាមដានដោយក្រុមអ្នកសង្កេតការណ៍អនុព័ន្ធយោធាអាស៊ាន។

កិច្ចប្រជុំគណៈកម្មាធិការព្រំដែនទូទៅ (GBC) កម្រិតលេខាធិការ បានចាប់ផ្តើមឡើងពីថ្ងៃទី៤ ខែសីហា ហើយកិច្ចប្រជុំពិសេសមួយ ត្រូវរៀបចំនៅថ្ងៃទី៧ ខែសីហា ដោយមានវត្តមានរដ្ឋមន្រ្តីការពារជាតិកម្ពុជា និងថៃ ហើយមានប្រទេសសង្កេតការណ៍ដូចជា អាម៉េរិក, ចិន និងម៉ាឡេស៊ី។

ក្នុងរយៈពេល៣ថ្ងៃកន្លងមក នាយឧត្តមសេនីយ៍ Mohamed Nizam អគ្គមេបញ្ជាការកងទ័ពម៉ាឡេស៊ី បានបញ្ជាក់ថា កិច្ចពិភាក្សារវាងកម្ពុជា និងថៃកម្រិតលេខាធិការ បានឯកភាពលើបទឈប់បាញ់ និងឯកសារក្រមប្រតិបត្តិ (TOR)។

«ការឯកភាពជាឯកច្ឆន្ទជាមូលដ្ឋាន ត្រូវបានសម្រេច ប៉ុន្តែវានៅមានបញ្ហាមួយចំនួន ដែលត្រូវបកស្រាយ ហើយនឹងត្រូវបញ្ចប់ក្នុងអំឡុងកិច្ចប្រជុំគណៈកម្មាធិការព្រំដែនទូទៅពិសេស នៅថ្ងៃទី៧ ខែសីហា»។ នាយឧត្តមសេនីយ៍ Mohamed Nizam បានសង្កត់ធ្ងន់បែបនេះ ទៅកាន់ទីភ្នាក់ងារព័ត៌មាន Bernama នៅថ្ងៃទី៦ ខែសីហា។

កិច្ចប្រជុំរវាងកម្ពុជា និងថៃ នៅថ្នាក់លេខាធិការ ត្រូវបានរៀបចំឡើងនៅអគាររបស់កម្លាំងប្រដាប់អាវុធរបស់ម៉ាឡេស៊ី Wisma Perwira។

ទន្ទឹមនេះ ក្រុមអ្នកសង្កេតការណ៍អនុព័ន្ធយោធាអាស៊ានបណ្តោះអាសន្ន រួមមានឥណ្ឌូណេស៊ី, ហ្វីលីពីន, ឡាវ, មីយ៉ាន់ម៉ា, សិង្ហបុរី និងវៀតណាម បានចាប់ផ្តើមបេសកកម្មរបស់ខ្លួនតាំងពីថ្ងៃទី៣ ខែសីហាមក៕

ដោយ៖ លោក ធៀន ភារិន្ទ

06/08/2025

តើប្រធានាធិបតីអាម៉េរិករូបណាខ្លះទទួលពានរង្វាន់ណូបែលសន្តិភាព?

ពានរង្វាន់ណូបែលសន្តិភាពត្រូវបានផ្ដល់ឱ្យបុគ្គលដែលបំពេញកិច្ចការល្អសម្រាប់ការរួបរួមរវាងប្រទេស ការបោះបង់ឬកាត់បន្ថយសកម្មភាពយោធា និងសម្រាប់គាំទ្រសន្តិភាព។ អាម៉េរិកមានឈ្មោះប្រធានាធិបតីខ្លួន៤រូបជាប់ក្នុងបញ្ជីអ្នកទទួលពានរង្វាន់ណូបែលសន្តិភាពដែលបានឈ្នះក្នុងឆ្នាំ១៩០៦ ឆ្នាំ១៩១៩ ឆ្នាំ២០០២ និងក្នុងឆ្នាំ២០០៩។

អ្វីជាពានណូបែលសន្តិភាព?

ពានរង្វាន់ណូបែលសន្តិភាព [Nobel Peace Prize] ចាប់តាំងពីបានបង្កើតនៅឆ្នាំ១៩០១ ជាពានរង្វាន់ពិសេសសម្រាប់ផ្ដល់ឱ្យបុគ្គលឬអង្គការណាដែលមានស្នាដៃលើការគាំទ្រនិងបង្កើតសន្តិភាព ស្ថិរភាព លើកកម្ពស់មនុស្សធម៌ និងការចរចាបញ្ចប់ជម្លោះនានាជារៀងរាល់ឆ្នាំ។ គិតមកទល់បច្ចុប្បន្ន ពានរង្វាន់នេះត្រូវបានប្រគល់១០៥ដងមកហើយ។

ចាប់តាំងពីពេលបង្កើតដំបូងរហូតដល់អំឡុងសង្គ្រាមលោកទី១ ពានណូបែលសន្តិភាពផ្ដល់ឱ្យបុគ្គល ឬអ្នកនយោបាយដែលមានស្នាដៃលើការបង្កើតចលនាគាំទ្រសន្តិភាព លើកកម្ពស់សន្តិភាពសកល ស្ថិរភាពនិងយុត្តិធម៌តាមការទូត។

នៅពេលសង្គ្រាមលោកទី២បានបញ្ចប់ រង្វាន់នេះផ្ដល់ឱ្យអ្នកមានស្នាដៃលើផ្នែក៤ដូចជាការគ្រប់គ្រងអាវុធនិងនិសព្វាវុធការ ការចរចាសន្តិភាព ការលើកកម្ពស់ប្រជាធិបតេយ្យនិងសិទ្ធិមនុស្ស និងកិច្ចការគ្របគ្រងសន្តិភាពសកលឱ្យល្អជាងមុន។

ក្នុងសត្សវត្សរ៍ទី២១នេះ គណកម្មការរបស់ពានរង្វាន់បានបន្ថែមលើផ្នែកផ្សេងទៀត តួយ៉ាងដូចជាពិចារណាផ្ដល់ទៅសកម្មជនដែលមានស្នាដៃក្នុងការដោះស្រាយលើការប្រែប្រួលអាកាសធាតុ និងហានិភ័យលើបរិស្ថានដែលបង្កដោយសកម្មភាពមនុស្ស។

តើប្រធានាធិបតីអាម៉េរិករូបណាខ្លះទទួលពានរង្វាន់នេះ?
ក្នុងប្រវត្តិសាស្ត្រពានរង្វាន់ណូបែលសន្តិភាព ប្រធានាធិបតីអាម៉េរិក៤រូបបានឈ្នះដោយក្នុងនោះគឺលោក Theodore Roosevelt, លោក Woodrow Wilson, លោក Jimmy Carter និងលោក Barack Obama។ ខុសពីប្រធានាធិបតី៣រូបទៀត លោក Jimmy Carter បានឈ្នះពានណូបែលក្រោយពេលលោកបញ្ចប់តំណែងពីប្រធានាធិបតីអាម៉េរិក។

លោក Theodore Roosevelt

លោក Theodore Roosevelt គឺជាប្រធានាធិបតីអាម៉េរិកដំបូងបង្អស់ដែលបានឈ្នះពានណូបែលសន្តិភាពនៅឆ្នាំ១៩០៦។ លោក Roosevelt កើតនៅឆ្នាំ១៨៥៨ និងបានក្លាយជាប្រធានាធិបតីអាម៉េរិកទី២៦ ដោយបម្រើការក្នុងតំណែងកំពូលនេះចំនួន២អាណត្តិចាប់ពីឆ្នាំ១៩០១ដល់ឆ្នាំ១៩០៩។

លោក Theodore Roosevelt ទទួលមេដាយណូបែលសន្តិភាពដោយសារស្នាដៃដ៏ធំមួយគឺការរួមចំណែកក្នុងកិច្ចចរចាសន្តិភាពដើម្បីឈានទៅបញ្ចប់សង្គ្រាមរវាងជប៉ុននិងរុស្ស៊ីដែលបានកើតឡើងអំឡុងឆ្នាំ១៩០៤ដល់ឆ្នាំ១៩០៥។ ស្នាដៃមួយទៀតរបស់លោកគឺការដោះស្រាយជាមួយម៉ិកស៊ិកដោយប្រើការកាត់ក្ដីតាមការណែនាំរបស់ចលនាសន្តិភាព។

ក្នុងការបញ្ចប់សង្គ្រាមរវាងជប៉ុននិងរុស្ស៊ី លោកប្រធានាធិបតី Theodore Roosevelt បានដើរតួជាភាគីសម្របសម្រួលតំណាងឱ្យអាម៉េរិក ដោយលោកបានបង្កើតជាកិច្ចចរចាមួយនៅទីក្រុង Portsmouth នៃរដ្ឋ New Hampshire អាម៉េរិក កាលពីខែសីហា ឆ្នាំ១៩០៥។

កិច្ចចរចានេះ បានបង្កើតឱ្យមានកិច្ចព្រមព្រៀង Portsmouth [Treaty of Portsmouth] រវាងភាគីជម្លោះទាំងពីរ ដែលក្រោយមកបានយល់ព្រមទាំងសងខាងតាមការចុះហត្ថលេខាក្នុងខែកញ្ញា ឆ្នាំ១៩០៥។ កិច្ចព្រមព្រៀងបានសម្រេចផ្ដល់ជប៉ុននូវការគ្រប់គ្រងលើកូរ៉េទាំងមូល និងមួយផ្នែកធំនៃតំបន់ Manchuria ភាគខាងត្បូង។

លោក Woodrow Wilson

លោកប្រធានាធិបតី Woodrow Wilson ជាមេដឹកនាំអាម៉េរិកទី២ដែលបានឈ្នះពានណូបែលសន្តិភាពកាលពីឆ្នាំ១៩២០។ លោក Wilson កើតនៅឆ្នាំ១៨៥៦ និងបានកាន់តំណែងជាប្រធានាធិបតីអាម៉េរិកទី២៨ ចាប់ពីឆ្នាំ១៩១៣ដល់ឆ្នាំ១៩២១។

ហេតុផលចម្បងនៃការឈ្នះមេដាយណូបែលសន្តិភាពគឺការជ្រោមជ្រែងរបស់លោក Wilson រហូតដល់បង្កើតបានអង្គការសម្ព័ន្ធប្រជាជាតិ [League of Nations] នៅឆ្នាំ១៩២០ ស្របតាមសន្ធិសញ្ញាទីក្រុងវ៉ែសៃយ៍ [Treaty of Versailles] ដើម្បីបង្កើតសន្តិភាពជាថ្មីក្រោយសង្គ្រាមលោកទី១បានបញ្ចប់នៅឆ្នាំ១៩១៨។

ការបង្កើតអង្គការសម្ព័ន្ធប្រជាជាតិបាន ដំបូងឡើយគឺកើតចេញពីផែនការសន្តិភាពតាមរយ:កម្មវិធី១៤ចំណុច [Fourteen Points] ដែលលោក Wilson បានផ្ដួចផ្ដើមកាលពីខែមករា ឆ្នាំ១៩១៨។ កម្មវិធី១៤ចំណុចនេះហើយដែលនាំឱ្យមានការបង្កើតសន្ធិសញ្ញាទីក្រុងវ៉ែសៃយ៍នៅឆ្នាំ១៩១៩ ដែលជាមូលដ្ឋានគ្រឹះឆ្ពោះទៅការបង្កើតអង្គការសម្ព័ន្ធប្រជាជាតិ។

គួរបញ្ជាក់ថា អង្គការសម្ព័ន្ធប្រជាជាតិបានដើរតួជាវេទិកាដើម្បីដោះស្រាយជម្លោះអន្តរជាតិដោយសន្តិវិធី។ ដ្បិតអាម៉េរិកមានចំណែកធំជួយបង្កើត តែប្រទេសនេះមិនបានចូលជាសមាជិកអង្គការនេះទេ។ អង្គការសម្ព័ន្ធប្រជាជាតិត្រូវបានបញ្ឈប់ដំណើរការនៅឆ្នាំ១៩៤៦ បន្ទាប់ពីមានការបង្កើតអង្គការអន្តរជាតិថ្មីមួយមកជំនួស គឺអង្គការសហប្រជាជាតិ។

លោក Jimmy Carter

ក្រោយបញ្ចប់តំណែងពីប្រធានាធិបតី លោក Jimmy Carter បានទទួលពានរង្វាន់ណូបែលនៅឆ្នាំ២០០២។ លោក Carter កើតនៅឆ្នាំ១៩២៤ និងបានឈ្នះឆ្នោតក្លាយជាប្រធាធិបតីទី៣៩មួយអាណត្តិចាប់ពីឆ្នាំ១៩៧៧ ដល់ឆ្នាំ១៩៨១។

ស្នាដៃពីក្រោយការឈ្នះមេដាយណូបែលសន្តិភាពរបស់លោក Carter គឺកិច្ចខិតខំប្រឹងប្រែងយ៉ាងសស្រាក់សស្រាំលើយុទ្ធនាការគាំទ្រសិទ្ធិមនុស្សនិងប្រជាធិបតេយ្យ កិច្ចការគាំពារសុខមាលភាពសង្គមនិងសេដ្ឋកិច្ចសកល និងការដោះស្រាយជម្លោះអន្តរជាតិដោយសន្តិវិធីរបស់លោក ក្នុងជីវិតជាអតីតប្រធានាធិបតីអាម៉េរិក។

ក្រោយអាជីពជាប្រធានាធិបតីអាម៉េរិកបានបញ្ចប់ លោក Carter និងភរិយាបានសម្រេចបង្កើតអង្គការមួយឈ្មោះ The Carter Center នៅឆ្នាំ១៩៨២ ក្នុងគោលដៅលើកកម្ពស់សិទ្ធិមនុស្ស រួមចំណែកបង្ការនិងដោះស្រាយជម្លោះ និងកែប្រែសេរីភាព សុខភាព និងប្រជាធិបតេយ្យ។

បើយោងតាមប្រធានគណកម្មការណូបែល លោក Carter គួរតែត្រូវបានឈ្នះពាននេះតាំងពីឆ្នាំ១៩៧៨ អំឡុងនៅជាប្រធានាធិបតីអាម៉េរិកមកម្លេះ ដោយកាលនោះលោកបានសម្របសម្រួលលើកិច្ចព្រមព្រៀងសន្តិភាពដើម្បីបញ្ចប់ជម្លោះរវាងអុីស្រាអែលនិងអេហ្ស៊ីប។

លោក Barack Obama

លោក Barack Obama កាន់តំណែងជាប្រធានាធិបតីអាម៉េរិក២អាណត្តិចាប់ពីឆ្នាំ២០០៩ ដល់ឆ្នាំ២០១៧។ ក្រោយកាន់តំណែងជាប្រធានាធិបតីអាម៉េរិកទី៤៤មិនដល់៨ខែ លោក Obama បានឈ្នះពានណូបែលសន្តិភាព ពោលគឺក្នុងឆ្នាំ២០០៩។

លោកប្រធានាធិបតី Obama ទទួលមេដាយណូបែលសន្តិភាពសម្រាប់ការខិតខំដ៏ខ្លាំងក្លាដើម្បីពង្រឹងកិច្ចការទូតអន្តរជាតិនិងកិច្ចសហប្រតិបត្តិការរវាងប្រជាជន។ មុនពេលក្លាយជាមេដឹកនាំអាម៉េរិក លោក Obama បានគាំទ្រលើការប្រជុំដោះស្រាយលើការបែងចែកក្រុមសញ្ជាតិ ក្រុមជាតិសាសន៍ សាសនា និងនយោបាយ។

អំឡុងពេលកាន់តំណែង លោក Obama បានទទូចឱ្យមានការចាប់ផ្ដើមទំនាក់ទំនងរវាងភាគីសាសនាអ៊ីស្លាមនិងប្រទេសលោកខាងលិចដែលគោរពសាសនាគ្រិស្តដោយឈរលើប្រយោជន៍រួមនិងការយល់ពីគ្នានិងគោរពគ្នាទៅវិញទៅមក។ ក្រៅពីនេះ លោកគាំទ្រទៅលើសិទ្ធិមនុស្សនិប្រជាធិបតេយ្យ និងគាំពារលើកិច្ចការដោះស្រាយវិបត្តិបម្រែបម្រួលអាកាសធាតុដែលពិភពលោកកំពុងប្រឈម៕

ដោយ៖ ហៃ សុហេម

06/08/2025

ណូបែល​សន្តិភាពជូនលោកត្រាំ! សុច្ឆន្ទៈកម្ពុជាដែលទទួលបាន​ការ​ចាប់​​អារម្មណ៍ពីកាសែត​បរទេស

ប៉ារីស៖ «ពានរង្វាន់ណូបែលសន្តិភាពជូន​លោក ដូណាល់ ត្រាំ»! មិនមែនជាការសម្តែង តែជាការពិត កម្ពុជាដែល​ឆ្លងកាត់សង្គ្រាម​ជាច្រើន​ទសវត្សរ៍កាលពីអតីតកាល ​ដឹង​គុណណាស់ចំពោះអ្នក​ដែល​នាំឱ្យ​មានការបញ្ចប់​សង្គ្រាម​បង្ហូរឈាម។ អន្តរាគមន៍​របស់​ប្រធានាធិបតី​សហរដ្ឋអាម៉េរិក នាំឱ្យមាន​បទឈប់​បាញ់​នៅព្រំដែន​កម្ពុជា-ថៃ ក្រោយជម្លោះប្រដាប់អាវុធ​៥ថ្ងៃ​ដែល​ចាប់ផ្តើម​ដោយភាគីថៃ ហើយ​បាន​សម្លាប់ជីវិតមនុស្សជាច្រើននាក់។ លោកឧបនាយករដ្ឋមន្ត្រី ស៊ុន ចាន់ថុល បាន​អះអាង​ពី​សុច្ឆន្ទៈរបស់កម្ពុជា​តបទៅ​កាន់​ប្រមុខ​សេត​វិមាន ហើយ​អត្ថបទដែល​ចុះផ្សាយដោយទីភ្នាក់ងារព័ត៌មាន​រ៉យទ័រ និងកាសែត The Wall Street Journal ក៏​ទទួលបាននូវ​ការចាប់អារម្មណ៍​ពីបណ្តា​សារព័ត៌មាន ជាច្រើន​នៅ​លើពិភពលោក​ផងដែរ។

តើ​កម្ពុជាពិតជាមានគម្រោងស្នើសុំឱ្យមាន​ការផ្តល់​ពាន​រង្វាន់ណូបែល​សន្តិភាព​សម្រាប់​លោកត្រាំ មែនឬ? ចម្លើយ​របស់​លោកឧបនាយករដ្ឋមន្ត្រីទៅកាន់​ទីភ្នាក់ងារសារព័ត៌មានរ៉យទ័រ គឺ «Yes» ដោយលោក​​អះអាងថា កម្ពុជាទទួលស្គាល់​នូវ​កិច្ច​ប្រឹងប្រែង​ដ៏ខ្លាំង​ក្លារបស់​លោកប្រធានាធិបតីអាម៉េរិក។

ពីប្រទេសស្កុតឡេន លោក ត្រាំ ប្រកាសឱ្យ​កម្ពុជា និងថៃ បញ្ចប់ជម្លោះតាមព្រំដែន បើ​ចង់ចរចារឿងពន្ធ។ ដូចអ្វីដែល​បាន​លើកឡើង​ក្នុងកិច្ចសន្ទនាតាមទូរសព្ទជាមួយសម្តេចនាយករដ្ឋមន្ត្រី ហ៊ុន ម៉ាណែត ក៏ដូច ជានាយករដ្ឋមន្ត្រី​ស្តីទីថៃ កិច្ចព្រមព្រៀង​បទឈប់បាញ់ បាន​ផ្តល់​ផល​វិជ្ជមាន​ដល់​ការ​ចរចា​ពាណិជ្ជកម្ម​ជាមួយអាម៉េរិក ដោយ​រដ្ឋបាល​លោកត្រាំ បានទម្លាក់ពន្ធគយ​កម្ពុជាពី​៣៦ភាគរយ មក​នៅ​១៩ភាគរយ​។ នេះបើតាម​បញ្ជីពន្ធគយ​បដិការដែល អាម៉េរិកបាន​បញ្ចេញ​កាលពីថ្ងៃទី​៣១ ខែកក្កដា។

តាមរយៈ X អ្នក​ស្រី Karoline Leavitt អ្នកនាំពាក្យ​សេតវិមាន បាន​សរសេរថា «លោកប្រធានាធិបតីត្រាំ បានធ្វើឱ្យ​ [បទឈប់បាញ់នៅ​ព្រំដែន​កម្ពុជា-ថៃ] ចេញជារូបរាង។ សូម​ផ្តល់ពាន​ណូបែលសន្តិភាព ជូន លោក»។

អ៊ីស្រាអែល និងប៉ាគីស្ថាន ក៏មានគម្រោងបែបនេះដែរ

មិនមែន​តែកម្ពុជានោះឡើយ​ដែល​បាន​បំផុសគំនិតស្នើ​សុំពានរង្វាន់ណូបែល​សន្តិភាព​ជូន​លោកត្រាំ។ នេះ បើតាម​អ្វី​ដែល Fox News សរសេរ​បន្ថែម​ពី​លើ​របាយការណ៍របស់​រ៉យទ័រ​។ លោកនាយករដ្ឋមន្ត្រី អ៊ីស្រា អែល Benjamin Netanyahu ដែលមានទំនាស់​ជាមួយអ៊ីរ៉ង់ និងមន្ត្រីរដ្ឋាភិបាលប៉ាគីស្ថាន ក៏បាន​លើកពី សំណើរ​នេះ​ផងដែរ តាមរយៈតួនាទី​របស់​លោកក្នុងការជួយ​បញ្ចប់ជម្លោះជាមួយ​ឥណ្ឌា។

សារព័ត៌មាន Anadolu ដកស្រង់​សំដី​បន្ថែមរបស់​លោក ស៊ុន ចាន់ថុល មកអះអាង ដោយសង្កត់ធ្ងន់អំពី អន្តរាគមន៍​របស់​លោក ត្រាំ ដែល​បាន​សង្គ្រោះជីវិតមនុស្ស​រាប់ពាន់នាក់។ ដូចគ្នាផងដែរ កាសែតតួកគី មួយ​នេះ រំលឹក​ពី​​ការ​ប្រកាសរបស់រដ្ឋាភិបាល​ក្រុង Islamabad ទាក់ទងនឹងសំណើរពាន​ណូបែលសន្តិភាព​ សម្រាប់​លោកត្រាំ​ដែល​នាំឱ្យមាន​បទ​ឈប់​បាញ់ ក្រោយ​ការ​បាញ់ម៉ីស៊ីល​ឆ្លងដែនជាមួយឥណ្ឌនាអំឡុង ខែឧសភា រួម​ទាំងសំណើរបស់​នាយករដ្ឋមន្ត្រី អ៊ីស្រាអែល កាលពីខែចុងខែកក្កដា។

ក្នុងន័យដូចគ្នា ABC របស់អូស្ត្រាលី បាន​សរសេរចំណងជើងយ៉ាងលម្អិតថា «កម្ពុជាស្នើឱ្យមាន​ការ​ផ្តល់ពានណូបែលសន្តិភាពជូន​លោក ដូណាល់ ត្រាំ ​សម្រាប់​ការជួយ​បញ្ចប់​ជម្លោះព្រំដែនជាមួយថៃ»។ កាសែតបាន​សរសេរពីសារសំខាន់ក្នុងអត្ថបទនេះថា កម្ពុជាទទួលស្គាល់​តួនាទី​លោកត្រាំ ដែលបាន​ត្រួសត្រាយ​សន្តិភាព​សម្រាប់​កម្ពុជា ហើយ​កម្ពុជា ក៏ដូចជាអ៊ីស្រាអែល និងប៉ាគីស្ថាន ចង់ឃើញ​លោក​ត្រាំ ទទួលបាន​កិត្តិយសប្រកបដោយកិត្យានុភាពមួយ​នេះ។

ABC បាន​បញ្ជាក់ថា ពាន​ណូបែលសន្តិភាព គឺជាពានអន្តរជាតិដ៏ខ្ពស់​បំផុត ដែលត្រូវផ្តល់​ជូន​បុគ្គល​ឬក្រុមអង្គការ សម្រាប់​កិច្ចប្រឹងប្រែង​ដ៏ខ្លាំងក្លាក្នុងការជំរុញ​មិត្តភាព​រវាងប្រជាជាតិ​នានា។ នេះហើយ​ជាហេតុផល​ដែល​រដ្ឋាភិបាល​ក្រុងភ្នំពេញ បានស្នើ​ចំពោះ​លោកត្រាំ។

The Hill បាន​ដកស្រង់សំដី​របស់​លោក ស៊ុន ចាន់ថុល ក្នុងបទសម្ភាសជាមួយ The Wall Street Journal ដែលថា ការស្នើនេះ មិនមែន​តែ​សម្រាប់កិច្ចការលើកម្ពុជានោះឡើយ ប៉ុន្តែនៅទីកន្លែង ផ្សេងទៀត។

បន្ថែមពីលើនេះ The Hill ប្រភពព័ត៌មាន​ឈាន​មុខដែលគ្របបណ្តប់​លើនយោបាយ និងគោលនយោបាយ​អាម៉េរិក អះអាងថា សមាជិកសភាបក្សសាធារណរដ្ឋ និងអ្នក​វិភាគអភិរក្ស​​និយម​ជាច្រើន​រូបក៏បាន​លើកឡើងដូចគ្នា​ផងដែរ​ដែរ ហើយ​កាសែតបាន​ដាក់​តំណភ្ជាប់អត្ថបទទាក់ទងនឹងសាវតា កាលពី ខែ កុម្ភៈ ឆ្នាំ២០១៩ អំពីឆន្ទៈរបស់អតីតនាយករដ្ឋមន្ត្រីជប៉ុន Shinzo Abe ដែលបង្ហាញពីបំណង​គាំទ្រលោក ត្រាំ សម្រាប់ណូបែល​សន្តិភាពក្នុងការ​នាំកិច្ច​ព្រមព្រៀង​សន្តិភាព​ជាមួយ​កូរ៉េខាងជើង។

អ្វីដែលគួរឱ្យ​កត់សម្គាល់​អត្ថបទ​របស់ The Wall Street Journal ទទួលបាន​​ការដឹង​ឮពី​សំណាក់​អ្នកនាំពាក្យ​សេត​វិមាន។ អ្នក​ស្រី Karoline Leavitt បាន​ចែក​រំលែ​កនៅ​លើបណ្តាញសង្គម X របស់ខ្លួន ដោយ​​បាន​ដកយក​សំដី​របស់​លោកឧបនាយករដ្ឋមន្ត្រី ស៊ុន ចាន់ថុល ដែល​វាយតម្លៃពី​វត្តមាន​របស់​លោកត្រាំ ក្នុង​ការ​នាំឱ្យមាន​បទឈប់​បាញ់ និង​សង្គ្រោះជីវិតមនុស្ស​រាប់សិបនាក់។

ក្នុង​ប្រធានបទដូចគ្នាផងដែរ The South China Morning Post បាន​រំលេចពី​បេក្ខភាព​លោក Anwar Ibrahim សម្រាប់ពាន​រង្វាន់ណូបែលសន្តិភាព ទៅតាមអ្វីដែល​ពលរដ្ឋម៉ាឡេស៊ីចង់បាន​ ព្រោះលោក នាយករដ្ឋមន្ត្រីម៉ាឡេស៊ីរូបនេះ ជាតួអង្គ​សំខាន់​ក្នុង​ការ​រៀបចំជំនួប​មេដឹកនាំ​កម្ពុជា-ថៃ ក្រោម​ការអ​ង្កេត​របស់មន្ត្រីអាម៉េរិក និង​ចិន។ ប៉ុន្តែប្រមុខសេតវិមាន ជាអ្នកដែលទទួលបានក្រេឌីត​ខ្ពស់ទៅវិញ​​ ពោល​គឺមាន​ទឹក​មាត់​ប្រៃជាង​ ដោយកន្លងមក​ ​លោក​ត្រាំក៏បាន​ចាត់ទុក​ខ្លួនឯងថាជា «ប្រធានាធិបតីនៃ សន្តិភាព» ផងដែរ។

កាសែតបារាំងជាច្រើន មិនមានអត្ថាធិប្បាយ​អ្វីបន្ថែមឡើយ ដោយគ្រាន់តែ​ផ្សព្វផ្សាយបន្ត​នូវអ្វីដែលរ៉យទ័រ និង AFP បានផ្សព្វផ្សាយ ហើយ​កាសែត​ខ្លះ បាន​បង្ហោះវីដេអូនៃ​បទសម្ភាស​របស់​លោក ស៊ុន ចាន់​ថុល ជាមួយ​អ្នក​សារព័ត៌មាន។

France 24 ដែលពឹងតាមប្រភព​ AFP បាន​លើកឡើងថា ពានរង្វាន់​ប្រកបដោយកិត្យានុភាពមួយនេះ ក៏ជាអ្វីដែល​លោកត្រាំ ចង់បាន​ផងដែរ ដើម្បីកុំឱ្យចាញ់​លោកអូបាម៉ា។ «ជាពេល​វេលាដែល​លោក ដូណាល់ ត្រាំ ត្រូវទទួលពាន​រង្វាន់​ណូបែលសន្តិភាព»។ អត្ថបទ​បាន​ដក​ស្រង់សំដីអ្នកនាំពាក្យ​សេតវិមាន លោកស្រី Karoline Leavitt ដែល​បាន​ថ្លែងក្នុងសន្និសីទសារព័ត៌មាន​កាលពី​ថ្ងៃទី​៣១ ខែកក្កដា។

បទឈប់បាញ់ កិច្ច​ព្រម​ព្រៀង​សន្តិភាព។ នេះជា​អ្វី​ដែល​លោកត្រាំ បានចូលអន្តរាគមន៍ បើគិត​ចាប់តាំងពី​លោក​ចូល​កាន់​តំណែងសារជាថ្មី កាលពីថ្ងៃទី​២០ ខែមករា ជាក់ស្តែង​ មាន​ការសម្រប​សម្រួល​ក្នុងជម្លោះឥណ្ឌា និងប៉ាគីស្ថាន, កម្ពុជា និង​ថៃ, អេហ្ស៊ីប និងអេត្យូពី, រវ្វាន់ដា និង​សាធារណរដ្ឋប្រជាធិបតេយ្យកុងហ្គោ, ស៊ែប៊ី និងកូសូវ៉ូ ជាដើម។

ចុះការវាយ​ប្រហារទៅលើអ៊ីរ៉ង់ កាសែត បាន​ដកស្រង់សម្តីលោកស្រី Karoline Leavitt ដែលថា លោក ត្រាំ បញ្ជាកង​ទ័ពអាម៉េរិកវាយ​ទៅ​កាន់ទីតាំងនុយក្លេអ៊ែរ​ គឺ​ជាការសម្រេច​ចិត្តមួយ​ដើម្បីនាំមក​នូវសន្តិភាពជូនពិភពលោកទាំងមូល។

អាចស្នើសុំបានជាលក្ខណៈបុគ្គល

តើប្រទេសមួយអាច​ស្នើ​ឈ្មោះលោកត្រាំ​សម្រាប់ពាន​ណូបែលសន្តិភាពបានដែរឬទេ? សារព័ត៌មាន NDTV ជាភាសាអង់គ្លេស​របស់ឥណ្ឌា បកស្រាយ​ថា បុគ្គលអាទិភាពមានដូចជា អ្នកច្បាប់ សាស្ត្រាចារ្យ ម្ចាស់ពានពីមុន​ និង​សមាជិក​អង្គការ​អន្តរជាតិ អាច​ស្នើសុំ​បេក្ខភាព​សម្រាប់ពានរង្វាន់ណូបែលសន្តិភាព។

គណកម្មាធិការណូបែលន័រវេស ដែលមាន​សមាជិក​៥នាក់ជ្រើសរើស​ដោយសភាន័រវេស នឹងធ្វើ​ការវិនិច្ឆ័យ​ សម្រាប់​បញ្ជីបេក្ខភាព ក្រោយមាន​ការស្នើ​ជាលក្ខណៈបុគ្គល។ ត្រង់ន័យនេះ ទោះមិនអាច​ប្រើ​ក្នុងនាមជាឈ្មោះ​ប្រទេស ប៉ុន្តែ​ការ​ស្នើ​សុំ​ពីសំណាក់​ប្រមុខរដ្ឋ សមាជិក​រដ្ឋាភិបាល សមាជិក​សភា ជាពិសេសនាយករដ្ឋមន្ត្រី ប្រធាន ឬថ្នាក់ដឹកនាំ​ជាន់ខ្ពស់​ក្នុង​រដ្ឋាភិបាល ត្រូវបាន​ចាត់ទុកថាមាន​សុពលភាព ដោយ​លើក​លែង​តែ​ការស្នើសុំ​សម្រាប់ខ្លួនឯងប៉ុណ្ណោះ។

ប្រធានាធិបតី និងនាយករដ្ឋមន្ត្រីដែលធ្លាប់បានជ័យលាភី

ប្រធានាធិបតី និង​នាយករដ្ឋមន្ត្រីមួយចំនួន​ ​ធ្លាប់ទទួលបាន​ពានណូបែល​សន្តិភាព សម្រាប់តួនាទី​លើ​ការ​ដោះស្រាយជម្លោះ និងលើកកម្ពស់សន្តិភាព។ ​ប្រធានាធិបតីអាម៉េរិក លោក Theodore Roosevelt (ឆ្នាំ១៩០៦), លោក Woodrow Wilson (ឆ្នាំ១៩១៩) និង​លោក បារ៉ាក់ អូបាម៉ា (ឆ្នាំ២០០៩) ទទួល​បាន​សម្រាប់​កិច្ចការការទូត និង​សហប្រតិបត្តិការអន្តរជាតិ។

មេដឹកនាំសូវៀត លោក Mikhail Gorbachev បានឈ្នះនៅ​ឆ្នាំ១៩៩០ សម្រាប់​ការជួយបញ្ចប់សង្គ្រាម​ត្រជាក់។ នៅឆ្នាំ១៩៩៤ នាយករដ្ឋមន្ត្រីអ៊ីស្រាអែល លោក Yitzhak Rabin, លោក Shimon Peres និងមេដឹកនាំប៉ាឡេស្ទីន លោក Yasser Arafat ទទួលពានសម្រាប់ការជំរុញឱ្យមានសន្ធិសញ្ញាអូស្លូ។ នៅឆ្នាំ​២០១៩ លោកនាយករដ្ឋមន្ត្រីអេត្យូពី Abiy Ahmed បានឈ្នះសម្រាប់ការបញ្ចប់សង្គ្រាមជាមួយ អេរីត្រេ។

«ពេលមានសង្គ្រាម ទើបឃើញសន្តិភាពមានតម្លៃ»។ មិនខុសពី​អ្វីដែលសម្តេច ហ៊ុន សែន បាន​លើករំលឹក​ឡើង​នោះឡើយ ដោយមាន​​ធ្លាប់​រងវិនាសកម្ម​ដោយសារសង្គ្រាមជាច្រើនសម័យកាល ដូច្នេះពលរដ្ឋខ្មែរ​ មាន​ការដឹងគុណខ្លាំងណាស់​ចំពោះ​អ្នកដែលនាំមក​នូវសន្តិភាព។ ទោះបីជាបទឈប់បាញ់នៅ​តែមាន​លក្ខណៈ​ផុយស្រួយ និង​ត្រូវបាន​រំលោភជាច្រើន​ដោយ​ភាគីថៃក៏ដោយ ប៉ុន្តែ​អន្តរាគមន៍​របស់​លោកត្រាំ នៅតែជាចំណែក​ដ៏ធំធេង​ក្នុង​ការរារាំងការប្រឈមដោយ​​អាវុធនៅ​ព្រំដែន៕

ដោយ៖ លោក អុឹង ចំរើន

06/08/2025

ជម្លោះព្រំដែនជាមួយកម្ពុជា ជាឈ្នាន់ឱ្យយោធាថៃពង្រឹងអំណាចក្នុងប្រទេស?

ក្នុងអំឡុងពេលមានភាពតានតឹងជាមួយកម្ពុជាជុំវិញជម្លោះព្រំដែន យោធាថៃ បានបង្កើនឥទ្ធិពលរបស់ខ្លួនយ៉ាងខ្លាំង នៅក្នុងការធ្វើសេចក្តីសម្រេចចិត្តផ្សេងៗជាពិសេសពាក់ព័ន្ធនឹងព្រំដែន ខណៈរដ្ឋាភិបាលស៊ីវិលប្រទេសមួយនេះ បានដើរតាមក្រុមយោធាប៉ុណ្ណោះ។ តើយោធាថៃ បានពង្រឹងអំណាចរបស់ខ្លួនបែបណានៅក្នុងប្រទេស ស្របពេលមានជម្លោះព្រំដែនជាមួយកម្ពុជា?

ចាប់តាំងពីឆ្នាំ១៩៣២ ថៃមានរដ្ឋប្រហារយោធាជោគជ័យរហូតដល់ ១២លើក និងការប៉ុនប៉ងធ្វើរដ្ឋប្រហារជាច្រើនលើកផ្សេងទៀត។ តាមរបាយការណ៍របស់សភាអឺរ៉ុប ភាគច្រើនរដ្ឋប្រហារទាំងនោះ តែងត្រូវបានយោធាប្រើប្រាស់ហេតុផលស្តារសណ្តាបធ្នាប់ និងអស្ថិរភាពនៅក្នុងប្រទេសឡើងវិញ។

រដ្ឋប្រហារយោធាជាច្រើនលើកនៅថៃបែបនេះ បានបង្ហាញឱ្យឃើញថា ក្រុមយោធាមានឥទ្ធិពលដ៏ខ្លាំង ដ្បិតតែងតែធ្វើអន្តរាគមន៍ក្នុងកិច្ចការប្រទេស។

ក្នុងអំឡុងពេលជម្លោះព្រំដែនជាមួយកម្ពុជា ដែលថៃជាអ្នកឈ្លានពាន យោធាថៃ បានពង្រឹងអំណាចថែមទៀត ហើយបានដាក់ខេត្តរបស់ខ្លួនជាប់ព្រំដែនជាមួយកម្ពុជា ក្រោមច្បាប់អាជ្ញាសឹក។ ត្រង់ចំណុចនេះ យោធាថៃ អាចបិទបើកព្រំដែន និងមានអំណាចពេញទីលើការធ្វើសេចក្តីសម្រេចផ្សេងៗ ដោយមិនចាំបាច់ឆ្លងកាត់រដ្ឋាភិបាលស៊ីវិលឡើយ។

ស្របពេលជម្លោះនេះ យោធាថៃ បានព្យាយាមបង្កើនប្រជាប្រិយភាពរបស់ខ្លួនឱ្យខ្ពស់ជាងរដ្ឋាភិបាលថៃ តាមរយៈយុទ្ធនាការផ្សេងៗ ដូចជាស្រង់មតិ ឬតាមបណ្តាសង្គមជាដើម ដើម្បីយកមុខមាត់ឱ្យលើសពីរដ្ឋាភិបាលស៊ីវិល និងទទួលបានការគាំទ្រពីប្រជាជន។ សូម្បីតែសារព័ត៌មានក្នុងស្រុករបស់ថៃ ក៏បានអំពាវនាវឱ្យប្រជាជនគាំទ្រយោធារបស់ថៃផងដែរ។

ក្នុងអំឡុងខែកុម្ភៈ ឆ្នាំ២០២៥ នៅពេលប្រជាជនកម្ពុជាច្រៀងចម្រៀងជាតិនៅតំបន់ព្រំដែន យោធាថៃ មិនបានពិភាក្សាជាមួយរដ្ឋាភិបាលស៊ីវិលរបស់ខ្លួននោះទេ។ ផ្ទុយទៅវិញ លោក Boonsin Padklang មេបញ្ជាការភូមិភាគ២របស់ថៃ បានដាក់ការតវ៉ាជាផ្លូវការជាមួយកម្ពុជា ដោយមិនឆ្លងកាត់ការពិភាក្សាពីរដ្ឋាភិបាលស៊ីវិល។

លោក Boonsin Padklang ជាមេដឹកនាំយោធាដ៏មានអំណាចម្នាក់ ដ្បិតមេបញ្ជាការរូបនេះមានទំនាក់ទំនងជិតស្និទ្ធជាមួយលោក Pana Klaewblaudtuk មេបញ្ជាការកងទ័ពជើងគោក។ មេទ័ពថៃទាំងពីរសុទ្ធតែបញ្ចប់នៅសាលាយោធា Armed Forces Academies Preparatory School (AFAPS) ក្នុងជំនាន់ទី២៦ ដូចគ្នា។

ក្រោយការឈ្លានពានលើអធិបតេយ្យ និងសម្លាប់ទាហានកម្ពុជាម្នាក់ នៅថ្ងៃទី២៨ ខែឧសភា លោក Boonsin បានប្រកាសថា លោកទទួលស្គាល់តែផែនទីរបស់នាយកដ្ឋាន Royal Thai Survey Department ប៉ុណ្ណោះ ហើយមិនទទួលស្គាល់ផែនទីប្រើក្នុងកិច្ចប្រជុំគណៈកម្មការព្រំដែនចម្រុះ (JBC) រវាងកម្ពុជាថៃទេ បើទោះរដ្ឋាភិបាលថៃ អំពាវនាវឱ្យកាត់បន្ថយភាពតានតឹង។

សូម្បីទាហានថៃម្នាក់ ដែលបានជាន់មីន ក្នុងថ្ងៃទី១៦ ខែកក្កដា លោក Boonsin បានព្រមានសងសឹកកម្ពុជា ដោយមិនរង់ចាំពីរដ្ឋាភិបាលថៃ ស្របពេលមេទ័ពជើងគោក លោក Pana បានគាំទ្រលោក Boonsin ពេញទំហឹង។

ក្រោយទាហានរបស់ខ្លួនជាន់មីនជាថ្មីនៅថ្ងៃទី២៣ ខែកក្កដា យោធាថៃ បានប្រកាសបិទព្រំដែន ហើយរាយបន្លាលួសនៅប្រាសាទតាមាន់ធំ ក្រោមអំណាចរបស់ខ្លួន។ រហូតដល់ការឈ្លានពាន និងបាញ់ប្រហារលើកម្ពុជានៅថ្ងៃទី២៤ ខែកក្កដា យោធាថៃ បានដើរតួនាទី និងគ្រប់គ្រងអំណាចពេញទីលើជម្លោះព្រំដែន ខណៈរដ្ឋាភិបាលស៊ីវិល បានត្រឹមជាតួអង្គរងប៉ុណ្ណោះ។

ចាប់តាំងពីឆ្នាំ១៩៥៨ មក ក្រុមយោធា តែងពង្រឹងអំណាច តាមរយៈសាលាយោធា the Armed Forces Academies Preparatory School (AFAPS) ដែលត្រូវបែងចែកជាកម្លាំងកងទ័ពថ្មើរជើង, កងទ័ពអាកាស និងជើងទឹកជាដើម។ នៅក្នុងសាលាយោធា the Armed Forces Academies Preparatory School (AFAPS) លោក ថាក់ស៊ីន ស៊ីណាវ៉ាត់ជា សិស្សជំនាន់ទី១០ ខណៈលោក Prawit Wongsuwan ជាសិស្សជំនាន់ទី៦ ហើយលោកប្រាយុទ្ធ ចន្ទអូចា ជាសិស្សជំនាន់១២។

នៅក្នុងពេលបច្ចុប្បន្ន លោក Pana Klaewblaudtuk មេបញ្ជាការកងទ័ពជើងគោក ជាសិស្សជំនាន់ទី២៦ ហើយលោក Boonsin Padklang ក៏ជាសិស្សនៅជំនាន់ ២៦នេះ ដែរ។ លោក Boonsin ដែលជាមេបញ្ជាការភូមិភាគ២ នឹងចូលនិវត្តន៍ក្នុងខែកញ្ញានេះ ហើយបេក្ខជនដែលមានសក្ខានុពេល គឺ ឧត្តមសេនីយ៍ទោ Veerayuth Raksilp ដ្បិតលោកក៏ជាសិស្សជំនាន់ទី២៦ ដូចលោក Pana និងលោក Boonsin ដែរ។

លទ្ធភាពនៃការជ្រើសលោក Veerayuth Raksilp ជាមេបញ្ជាការភូមិភាគ២ គឺដើម្បីធ្វើឱ្យលោក Pana កាន់តែមានអំណាចនៅក្នុងជួរយោធា។

បន្ថែមពីនេះ យោធាថៃ បានពង្រឹងអំណាចតាមរយៈអង្គភាពរបស់ខ្លួន។ នៅក្នុងអត្ថបទមួយរបស់លោក Paul Chambers ដែលជាអ្នកជំនាញយោធាថៃចេញផ្សាយនៅក្នុងឆ្នាំ២០២៤ ក្រុមយោធាថៃ បែងចែកជាបក្សពួកដូចជា ក្រុមអាវកក្រហម (Kho Daeng), ក្រុម Wongthewan, ក្រុម Burapha Phayak និងក្រុម Sua Dam ឬក្រុមខ្លាខ្មៅជាដើម។

ក្រុមអាវកក្រហម (Kho Daeng) ត្រូវបានមហាក្សត្រថៃ Vajiralongkorn បង្កើតឡើងនៅក្នុងឆ្នាំ២០១៨ ដើម្បីពង្រឹងអំណាចរបស់ខ្លួន និងបង្រួបបង្រួមមេបញ្ជាការយោធាផ្សេងទៀត ដូចជា Wongthewan និង Burapha Phayak ជាដើម។ ដើម្បីចូលក្រុមអាវកក្រហម យោធាតែងទទួលបានលិខិតអញ្ជើញឱ្យចូលរួមវគ្គបណ្តុះបណ្តាល ៩០៤ រយៈពេល៣ខែ។

យោធាថៃ ដែលបញ្ចប់វគ្គបណ្តុះបណ្តាលនេះប៉ុណ្ណោះ ទើបអាចមានសិទ្ធិក្លាយជាមេបញ្ជាការ និងស្នាក់ការកណ្តាលកងភូមិន្ទថៃ។ ក្នុងពេលបច្ចុប្បន្ន លោក Pana Klaewblaudtuk មេបញ្ជាការកងទ័ពជើងគោក ក៏ជាសមាជិកក្រុមអាវកក្រហមនេះដែរ។

ក្រុម Wongthewan ចេញពីកងពលថ្មើរជើងលេខ១ ដែលស្ថិតក្រោមយោធាភូមិភាគ១របស់ថៃ និងអង្គភាពកងអង្គរក្សរបស់ស្តេចថៃ។ មហាក្សត្រថៃ Vajiralongkorn បានផ្តល់តម្លៃដល់ក្រុម Wongthewan យ៉ាងខ្លាំង ដ្បិតទ្រង់ក៏ធ្លាប់ជាសមាជិកក្រុមនេះដែរ។

ចំណែកក្រុមមួយទៀតគឺ Burapha Phayak ឬក្រុមខ្លាខាងកើត ជាយោធាចេញពីក្រុមថ្មើរជើងលេខពីរ ហើយក៏ស្ថិតនៅក្រោមយោធាភូមិភាគ១។ កងកម្លាំងមួយនេះ ជាកងអង្គរក្សរបស់មហាក្សត្រី Sirikit។ លោក ប្រាយុទ្ធ ចន្ទអូចា អតីតមេបញ្ជាការកងទ័ពជើងគោក និងជាអតីតនាយករដ្ឋមន្រ្តី, លោក Prawit Wongsuwon អតីតឧបនាយករដ្ឋមន្រ្តីថៃ ក៏ស្ថិតនៅក្នុងក្រុមនេះដែរ៕

ដោយ៖ លោក ធៀន ភារិន្ទ

05/08/2025

បច្ចុប្បន្នភាពនៅទិសអានសេះ ដែលកងទ័ពថៃបានរំលោភបំពានលើបូរណភាពទឹកដីកម្ពុជា ថ្ងៃទី៥ ខែសីហា​ ឆ្នាំ២០២៥
អ្នកនាំពាក្យក្រសួងការពារជាតិកម្ពុជា អះអាងថា នេះជាសកម្មភាពដ៏គឃ្លើនរបស់ថៃដែលរំលោភលើបទឈប់បាញ់ និងរំលោភបំពានបូរណភាពទឹកដីកម្ពុជា។ ចាប់តាំងពីព្រឹកថ្ងៃទី៥ ខែសីហានេះ កងទ័ពកម្ពុជាបានទំនាក់ទំនងជាមួយកងទ័ពថៃ ដើម្បីឱ្យកងទ័ពថៃរុះរើបន្លាលួស និងដកចេញនូវគ្រឿងចក្ររបស់ខ្លួនជាបន្ទាន់ពីដែនអធិបតេយ្យរបស់កម្ពុជា។ រហូតមកដល់ពេលនេះ មិនទាន់មានការរុះរើនៅឡើយ ហើយភាគីទាំងពីរបាននិងកំពុងពិភាក្សាគ្នា។

#អានសេះ #ព្រះវិហារ

បច្ចុប្បន្នភាពនៅទិសអានសេះ ដែលកងទ័ពថៃបានរំលោភបំពានលើបូរណភាពទឹកដីកម្ពុជា ថ្ងៃទី៥ ខែសីហា​ ឆ្នាំ២០២៥

អ្នកនាំពាក្យក្រសួងការពារជាតិកម្ពុជា អះអាងថា នេះជាសកម្មភាពដ៏គឃ្លើនរបស់ថៃដែលរំលោភលើបទឈប់បាញ់ និងរំលោភបំពានបូរណភាពទឹកដីកម្ពុជា។ ចាប់តាំងពីព្រឹកថ្ងៃទី៥ ខែសីហានេះ កងទ័ពកម្ពុជាបានទំនាក់ទំនងជាមួយកងទ័ពថៃ ដើម្បីឱ្យកងទ័ពថៃរុះរើបន្លាលួស និងដកចេញនូវគ្រឿងចក្ររបស់ខ្លួនជាបន្ទាន់ពីដែនអធិបតេយ្យរបស់កម្ពុជា។ រហូតមកដល់ពេលនេះ មិនទាន់មានការរុះរើនៅឡើយ ហើយភាគីទាំងពីរបាននិងកំពុងពិភាក្សាគ្នា។

#អានសេះ #ព្រះវិហារ