សារព័ត៌មាន ខេមបូឌា ណាវ - The Cambodia Now News-CNN, ផ្ទះលេខ 3 ផ្លូវលេខ 4K ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ (2025)

08/08/2025

សាកលវិទ្យាល័យថៃមួយ បានបោះឆ្នោតដកហូតសញ្ញាបត្រពីលោក ហ៊ុន សែន ដែលធ្វើឱ្យលោកអស់សំណើច ហើយថា សញ្ញាបត្រនោះលោកបានបោះចូលក្នុងបង្គន់តាំងពីឆ្នាំ២០០៨

ផ្សាយថ្ងៃទី៨ ខែសីហា ឆ្នាំ២០២៥✍️

ប្រធានព្រឹទ្ធសភាកម្ពុជា លោក ហ៊ុន សែន បានសម្តែងនូវការអស់សំណើចចំពោះសាកលវិទ្យាល័យថៃមួយ ដែលលោកថា មិនចាំឈ្មោះបានបោះឆ្នោតដកហូតសញ្ញាបត្រពីលោក ដែលសញ្ញាបត្រនោះលោកថាបានបោះចូលក្នុងបង្គន់តាំងពីឆ្នាំ២០០៨ នៅពេលថៃ បានលើកកងទ័ពចូលឈ្លានពានប្រាសាទព្រះវិហាររបស់ខ្មែរមកម្ល៉េះ។

តាមរយៈសំណេរលើហ្វេសប៊ុករបស់លោក នាយប់ថ្ងៃទី៨ សីហា ឆ្នាំ២០២៥ លោក ហ៊ុន សែន លើកឡើងថា៖«គួរអស់សំណើចណាស់ ថ្ងៃនេះខ្ញុំលឺថា សាកលវិទ្យាល័យថៃមួយនោះ ដែលខ្ញុំមិនចាំឈ្មោះផង បានបោះឆ្នោតដកហូតសញ្ញាបត្រពីខ្ញុំ! ខ្ញុំសូមបញ្ជាក់ប្រាប់អ្នកវិញថា អ្នកមិនបាច់ដកចេញសញ្ញាបត្រពីខ្ញុំនោះទេ ព្រោះខ្ញុំបានបោះវាចោលចូលក្នុងបង្គន់តាំងពីឆ្នាំ២០០៨នៅពេលដែលថៃលើកកងទ័ពចូលឈ្លានពានប្រាសាទព្រះវិហាររបស់ខ្មែរមកម៉្លេះ!សញ្ញាបត្ររបស់អ្នកគ្មានតម្លៃណាមួយសម្រាប់ខ្ញុំរក្សាទុកនោះទេ»។

មេដឹកនាំកម្ពុជាដ៏មានអំណាចខ្លាំងរូបនេះបញ្ជាក់ថា៖«ខ្ញុំមិនមានមោទនភាពណាមួយចំពោះក្រដាសសញ្ញាបត្រមួយសន្លឹករបស់អ្នកនោះឡើយ។ ខួរក្បាលរបស់ ហ៊ុន សែន មិនមែនកើតចេញពីសាលារបស់អ្នកឯងនោះទេ ខួរក្បាលរបស់ ហ៊ុនសែន គឺកើតចេញពីការបង្រៀនរបស់ប្រជាជនខែ្មរ និងសាលារៀនរបស់កម្ពុជា"៕

08/08/2025

មេកងរាជអាវុធហត្ថខេត្តសៀមរាប កំពុងពិនិត្យនីតិវិធី សុំគោលការណ៍ចាត់វិធានការលើមេបញ្ជាការរងអាវុធហត្ថខេត្តសៀមរាប ឈ្មោះ ចាន់ ឃុង ដែលបានប្រើហិង្សាលើស្ត្រីនៅខារ៉ាអូខេ

ផ្សាយថ្ងៃទី៨ ខែសីហា ឆ្នាំ២០២៥✍️

អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានបញ្ជាក់នៅថ្ងៃទី៨ សីហា ថា ករណីមេបញ្ជាការរងកងរាជអាវុធហត្ថខេត្តសៀមរាប ឈ្មោះ ចាន់ ឃុង ដែលប្រើហិង្សាលើស្ត្រីនៅខារ៉ាអូខេ នៅយប់ថ្ងៃទី៧ សីហា មេបញ្ជាការកងរាជអាវុធហត្ថខេត្តសៀមរាប បាននិងកំពុងធ្វើការត្រួតពិនិត្យ ដើម្បីសុំគោលការណ៍ចាត់វិធានការ។

តាមសេចក្តីរាយការណ៍ កាលពីវេលាយប់ថ្ងៃទី៧ ខែ សីហា ឆ្នាំ២០២៥ វេលាម៉ោង ២១:៣៥ នាទី មានភ្ញៀវបុរសមួយក្រុមជិះរថយន្ត Lexus 570 ពណ៌ខ្មៅ ស្លាកលេខ AN-1211 ភ្នំពេញ និង រថយន្ដ Range Rover ពណ៌ខ្មៅ១គ្រឿងស្លាកលេខ 2BH-1211 ភ្នំពេញ ចូលទៅផឹកស៊ីច្រៀងខារ៉ាអូខេនៅបន្ទប់លេខ ៦៦៦៦ ។ បន្ទាប់ពីផឹកស៊ីស្រវឹង ភ្ញៀវទាំងនោះបានអុកកែវខ្លាំងបណ្ដាលឱ្យបែកកញ្ចក់តុកអស់ ៣ ។ រហូតដល់ម៉ោងជាង១រំលងអាធ្រាត្រឈានចូលថ្ងៃទី៨ សីហា ក្រុមភ្ញៀវទាំងនោះហៅគិតលុយ មេការក៏បានគិតលុយទាំងថ្លៃបែកកញ្ចក់៣ ជាង ១០០០ ដុល្លារ ។ ដោយឃើញមេការគិតលុយទាំងថ្លៃបែកកញ្ចក់តុក៣ ភ្ញៀវម្នាក់ដែលទំនងជាមេគេ បានទះកំផ្លៀងមេការជាច្រើនដៃ ហើយនាំគ្នាដើរចេញទៅ៕

07/08/2025

លទ្ធផលនៃកិច្ចប្រជុំ GBC កម្ពុជា-ថៃ មិនបានកំណត់ច្បាស់លាស់ ដែលតម្រូវឱ្យភាគីថៃ ត្រូវតែដោះលែងទាហាន១៨រូបរបស់កម្ពុជាដែលត្រូវបានចាប់ខ្លួននោះ ត្រឡប់មកវិញនៅថ្ងៃណាទេ

ផ្សាយថ្ងៃទី៧ ខែសីហា ឆ្នាំ២០២៥✍️

បើតាមអ្នកនាំពាក្យក្រសួងការពារជាតិ លោកស្រី ម៉ាលី សុជាតា បញ្ជាក់ក្នុងសន្និសីទសារព័ត៌មាន នៅរសៀលថ្ងៃទី៧ សីហា លទ្ធផលនៃកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ បានចែងថា ទាហានដែលត្រូវបានចាប់ខ្លួនត្រូវតែដោះលែង និងបញ្ជូនភ្លាមៗឱ្យត្រឡប់មកប្រទេសខ្លួនវិញ បន្ទាប់ពីការបញ្ចប់បទឈប់បាញ់គ្នាយ៉ាងសកម្ម ដោយយោងតាមមាត្រា ១១៨ នៃអនុសញ្ញាទី៣ ក្រុងហ្សឺណែវ ឆ្នាំ១៩៤៩ និងបទបញ្ជា ១២៨ក នៃច្បាប់មនុស្សធម៌អន្តរជាតិ។

ទោះយ៉ាងណា ក្នុងន័យនេះ លទ្ធផលដែលបានមកពីកិច្ចប្រជុំ កម្ពុជា-ថៃ នៅទីក្រុងកូឡាឡាំពួរ នាថ្ងៃទី៧ខែសីហានេះ មិនបានបញ្ជាក់ច្បាស់លាស់ទៅលើចំណុច ដែលតម្រូវឱ្យភាគីថៃ ត្រូវតែដោះលែងទាហានខ្មែរ១៨រូប ដែលត្រូវបានទាហានថៃចាប់ខ្លួន កាលពីថ្ងៃទី២៩ កក្កដា មកឱ្យកម្ពុជាវិញនៅថ្ងៃណានោះទេ៕

07/08/2025

លទ្ធផលនៃកិច្ចប្រជុំ(GBC)កម្ពុជា-ថៃ ព្រមព្រៀងគ្នាលើបទឈប់បាញ់១៣ចំណុច និងឯកភាពគ្នាឱ្យមានអ្នកសង្កេតការណ៍តាមដានលើបទឈប់បាញ់ កម្ពុជាក៏ស្នើឱ្យថៃដោះលែងទាហានខ្លួនផងដែរ

ផ្សាយថ្ងៃទី៧ ខែសីហា ឆ្នាំ២០២៥✍️

នាយករដ្ឋមន្ត្រីកម្ពុជា លោក ហ៊ុន ម៉ាណែត សាទរចំពោះលទ្ធផលនៃកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ(GBC) រវាងគណៈប្រតិភូកម្ពុជាដឹកនាំដោយប្រមុខការពារជាតិ លោកឧបនាយករដ្ឋមន្ត្រី ទៀ សីហា និងគណៈប្រតិភូថៃ ដឹកនាំដោយរដ្ឋមន្ត្រីការពារជាតិថៃស្តីទី លោក Nattaphon Narkphanit ដែលបានប្រព្រឹត្តទៅនៅទីក្រុងកូឡាឡំាពួ ប្រទេសម៉ាឡេស៊ី ដោយភាគីទាំងពីរបានព្រមព្រៀងគ្នា១៣ចំណុច លើបទឈប់បាញ់។ លោក ហ៊ុន ម៉ាណែត ចាត់ទុកលទ្ធផលនេះ ជាជោគជ័យ ដែលបានអនុវត្តលើចំណុច ដែលបានឯកភាពគ្នា រវាងលោក និងលោក Phumtham Wechayachai នាយរដ្ឋមន្ត្រីស្តីទីថៃ ក្នុងកិច្ចប្រជុំនៅប្រទេសម៉ាឡេស៊ី កាលពីថ្ងៃទី២៨ កក្កដា ដែលរៀបចំដោយម៉ាឡេស៊ី សហរដ្ឋអាមេរិក និងក៏មានការចូលរួមពីចិនផងដែរ។

លោក ហ៊ុន ម៉ាណែត បញ្ជាក់លើទំព័រហ្វេសប៊ុក នារសៀលថ្ងៃទី៧ សីហា ថា កម្ពុជា-ថៃ បានពិភាក្សា ឯកភាពគ្នាលើលក្ខខណ្ឌ នៃការអនុវត្តបទឈប់បាញ់ និងការបង្កើនការប្រាស្រ័យទាក់ទងគ្នារវាងកងទ័ពទាំងពីរ។ ភាគីទាំងពីរ ក៏បានយល់ព្រមជំរុញការរៀបចំលក្ខខណ្ឌប្រតិបត្តិនៃយន្តការតាមដានត្រួតពិនិត្យការអនុវត្តបទឈប់បាញ់ របស់ក្រុមអ្នកសង្កេតការណ៍អាស៊ាន (ASEAN Observer Team) និងឯកភាពឱ្យមានក្រុមអ្នកសង្កេតការណ៍បណ្តោះអាសន្ន (Interim Observer Team) ដឹកនាំដោយអនុព័ន្ធយោធាម៉ាឡេស៊ី ដើម្បីសង្កេតការណ៍ភ្លាមៗ និងបន្តរៀបចំក្រុមអ្នកសង្កេតការណ៍អាស៊ាន (ASEAN Observer Team)។

ភាគីទាំងពីរក៏បានឯកភាពរៀបចំកិច្ចប្រជុំរួម នៃគណៈកម្មាធិការព្រំដែនថ្នាក់ភូមិភាគ (RBC) ក្នុងរង្វង់ពីរសប្តាហ៍ និងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ(GBC)ក្នុងរង្វង់១ខែក្រោយកិច្ចប្រជុំវិសាមញ្ញ GBCនេះ។ ក្នុងករណីចាំបាច់ភាគីទាំងពីរអាចកោះប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (Extraordinary GBC Meeting) ក្នុងទម្រង់ដូចលើកនេះ។

កម្ពុជាក៏បានស្នើសុំឱ្យមានការដោះលែងយោធិនកម្ពុជាទាំង ១៨រូប ដែលស្ថិតក្នុងការឃុំគ្រងរបស់កងទ័ពថៃឱ្យបានឆាប់រហ័សផងដែរ"។

07/08/2025

មុនកិច្ចប្រជុំ GBC នៅរសៀលថ្ងៃនេះ ប្រមុខការពារជាតិកម្ពុជា និងរដ្ឋមន្ត្រីការពារជាតិស្តីទីថៃ ជួបសម្តែងការគួរសមចំពោះលោក Anwar Ibrahim នាយករដ្ឋមន្ត្រីម៉ាឡេស៊ី

ផ្សាយថ្ងៃទី៧ ខែសីហា ឆ្នាំ២០២៥✍️

កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ(GBC) នឹងចាប់ផ្តើមនារសៀលថ្ងៃទី៧ សីហា ឆ្នាំ២០២៥ នៅទីក្រុងកូឡាឡាំពួ ប្រទេសម៉ាឡេស៊ី។ មុនកិច្ចប្រជុំ គណៈប្រតិភូកម្ពុជា ដឹកនាំដោយប្រមុខការពារជាតិ ឧបនាយករដ្ឋមន្ត្រី ទៀ សីហា ចំណែកគណៈប្រតិភូថៃ ដឹកនាំដោយរដ្ឋមន្ត្រីការពារជាតិស្តីទី លោក Nattaphon Narkphanit បានជួបសម្តែងការគួរសមចំពោះនាយករដ្ឋមន្ត្រីម៉ាឡេស៊ី លោក Dato' Seri Anwar Ibrahim។ កិច្ចប្រជុំនេះក៏មានការចូលរួមសង្កេតកាណ៍ ពីតំណាងមកពីសហរដ្ឋអាមេរិក ប្រទេសម៉ាឡេស៊ី និងប្រទេសចិន៕

07/08/2025

ភាគីសហរដ្ឋអាមេរិក បញ្ជាក់ជំហរនៅតាមដានបទឈប់បាញ់ រវាងកងទ័កម្ពុជា និងកងទ័ពថៃ ព្រមទាំងគាំទ្រផ្នែកភស្តុភារ បច្ចេកទេស និងប្រព័ន្ធឃ្លាំមើលតាមអាកាស

ផ្សាយថ្ងៃទី៧ ខែសីហា ឆ្នាំ២០២៥✍️

ប្រមុខការពារជាតិកម្ពុជា លោក ទៀ សីហា ជួបជាមួយនាយឧត្តមនាវី លោក Samuel Paparo មេបញ្ជាការ បញ្ជាការដ្ឋានឥណ្ឌូប៉ាស៊ីហ្វិក សហរដ្ឋអាមេរិក(USINDOPACOM) និងលោក Edgard Kagan ឯកអគ្គរដ្ឋទូតសហរដ្ឋអាមេរិក ប្រចាំនៅប្រទេសម៉ាឡេស៊ី នៅថ្ងៃទី៦ សីហា ដោយក្នុងជំនួបនោះ លោកបានបញ្ជាក់ពីជំហររបស់សហរដ្ឋអាមេរិក ក្នុងការគាំទ្របទឈប់បាញ់ ដែលលោកប្រធានាធិបតី Donald Trump (ដូណាល់ ត្រាំ) បានផ្តួចផ្តើម ដែលដឹកនាំដោយភាគីម៉ាឡេស៊ី ជាប្រធានអាស៊ានប្តូរវេណ ក្នុងការអនុវត្តបទឈប់បាញ់ និងបន្តតាមដានការអនុវត្តនេះ ឱ្យមានប្រសិទ្ធភាព។

ទាំងលោកមេបញ្ជាការ និងលោកឯកអគ្គរដ្ឋទូត ក៏បានបញ្ជាក់ដែរថា នឹងតាមដានឱ្យការអនុវត្តនេះ ប្រកបដោយភាពជោគជ័យ និងមានប្រសិទ្ធភាព។ លោកនឹងចូលរួមគាំទ្រ ផ្នែកភស្តុភារ និងបច្ចេកទេសសំខាន់ៗ ដើម្បីបង្កើតក្រុមការងារអ្នកសង្កេតការណ៍អាស៊ាន(AMT) ឱ្យបានលឿនបំផុត ថែមទាំងបានបង្ហាញពីអ្វី ដែលជាការអនុវត្តបន្តរបស់សហរដ្ឋអាមេរិក រួមមាន ការធ្វើផែនការយោធា គ្រឿងបរិក្ខារ ប្រព័ន្ធបញ្ជូនកម្លាំង ប្រព័ន្ធឃ្លាំមើលតាមអាកាស និងសម្ភារបច្ចេកទេសទំនើបជាច្រើនទៀត។ ទាំងនេះបង្ហាញពីការត្រៀមខ្លួនរបស់ពួកគាត់ក្នុងការចូលរួមជួយឱ្យមានសន្តិភាពពិតប្រាកដ៕

07/08/2025

ក្នុងជំនួបជាមួយប្រមុខការពារជាតិកម្ពុជា ភាគីម៉ាឡេស៊ីបង្ហាញឆន្ទៈ ជួយសម្របសម្រួល ក្នុងការអនុវត្តបទឈប់បាញ់កម្ពុជា-ថៃ ដោយជំរុញឱ្យបង្កើតក្រុមសង្កេតការណ៍អាស៊ានតាមដានបទឈប់បាញ់

ផ្សាយថ្ងៃទី៧ ខែសីហា ឆ្នាំ២០២៥✍️

ភាគីម៉ាឡេស៊ី បានបង្ហាញឆន្ទៈក្នុងការជួយសម្របសម្រួល ដើម្បីអនុវត្តបទឈប់បាញ់ រវាងកម្ពុជា និងថៃ ដោយជំរុញឱ្យមានការបង្កើតឯកសារក្រមប្រតិបត្តិ(TOR )និងឈានដល់ការបង្កើតក្រុមអ្នកសង្កេតការណ៍អាស៊ាន(AMT) ដែលនឹងក្លាយទៅជាយន្តការតាមដាន និងការអនុវត្តបទឈប់បាញ់ ដោយប្រសិទ្ធភាពខ្ពស់ ឱ្យបានត្រឡប់មកវិញនូវសន្តិភាពឆាប់រហ័សជាទីបំផុត។ នេះបើតាមទំព័រហ្វេសប៊ុករបស់លោក ទៀ សីហា រដ្ឋមន្ត្រីការពារជាតិ ដែលបង្ហាញពីជំនួបជាមួយអគ្គមេបញ្ជាការកងទ័ពម៉ាឡេស៊ី លោក Mahamed Nizam នៅប្រទេសម៉ាឡេស៊ី កាលពី១១ម៉ោងមុន នាសប្តាហ៍នេះ។

ជាងនេះទៀត ក្នុងជំនួបជាមួយនាយឧត្តមសេនីយ៍ Mohamed Nizam និងសហការី លោក Nizam បានបញ្ជាក់ឃ្លាមួយដ៏មានអត្ថន័យ "Peace is expensive." (សន្តិភាពមិនអាចកាត់ថ្លៃបាន) "Life is precious," (ជីវិតពិតជាមានតម្លៃ) "Time is of the Essence," (ពេលវេលាពិតជាសំខាន់)។

លោក ទៀ សីហា ចាត់ទុកការលើកឡើងរបស់លោក Nizam ស្របតាមអនុសាសន៍របស់លោកនាយករដ្ឋមន្ត្រី ហ៊ុន ម៉ាណែត ដែលបានលើកឡើងថា "មួយថ្ងៃ មួយម៉ោង មួយនាទី ដែលយើងកំពុងចរចា គឺអាចជួយសង្គ្រោះដល់ជីវិតរបស់កងកម្លាំងយើង និងប្រជាជនយើងបាន។ កាន់តែឆាប់ កាន់តែល្អ"

បើតាមលោក ទៀ សីហា កិច្ចប្រជុំ ៣ថ្ងៃកន្លងមកនេះ ក្រុមការងារលេខាធិការដ្ឋានរបស់ គណៈកម្មាធិការព្រំដែនទូទៅ (GBC) នៃប្រទេសទាំងពីរ បានផ្លាស់ប្ដូរចំណុចសំខាន់ៗជាច្រើនប្រកបដោយភាពវិជ្ជមាន។ធាតុចូលជាច្រើនរបស់កម្ពុជា ក៏ត្រូវបានភាគីថៃយល់ស្របនិងទទួលយក ដោយឡែកភាគីថៃក៏មានចំណុចល្អខ្លះៗ ដែលកម្ពុជាទទួលយកបានដូចគ្នា៕

06/08/2025

លោក ហ៊ុន សែន ថា ពិបាកនឹងជឿ រឿងមេដឹកនាំថៃ រៀបគម្រោងប៉ុនប៉ងសម្លាប់គាត់ និងលោកនាយករដ្ឋមន្ត្រី ហ៊ុន ម៉ាណែត បើទោះបីជាមេដឹកនាំថៃ ស្អប់ ឬមិនចូលចិត្តគាត់ និងកូនក៏ដោយ

ផ្សាយថ្ងៃទី៦ ខែសីហា ឆ្នាំ២០២៥✍️

ប្រធានព្រឹទ្ធសភាកម្ពុជា លោក ហ៊ុន សែន ដែលជាមេដឹកនាំដ៏មានអំណាចខ្លាំង ហាក់ដូចជាមិនជឿទៅលើព័ត៌មាន ដែលផ្សព្វផ្សាយថា មេដឹកនាំថៃ ឈានដល់ថ្នាក់រៀបគម្រោង ដើម្បីសម្លាប់រូបលោក និងនាយករដ្ឋមន្ត្រី ហ៊ុន ម៉ាណែត នោះទេ ទោះបីមេដឹកនាំថៃ ស្អប់លោកក៏ដោយ ដោយថា រឿងនេះពិបាកនឹងជឿ។ នេះបើតាមសំណេរលើហ្វេសប៊ុករបស់លោក នៅយប់ថ្ងៃទី៦ សីហា នេះ។

លោក ហ៊ុន សែន បញ្ជាក់ថា៖«រឿងផែនការធ្វើឃាតរបស់មេដឹកនាំថៃមកលើរូបខ្ញុំ និងនាយករដ្ឋមន្ត្រី ហ៊ុន ម៉ាណែត រឿងនេះពិបាកនឹងជឿណាស់ បើទោះបីជាមេដឹកនាំថៃស្អប់ ឬមិនចូលចិត្តខ្ញុំ និង ហ៊ុន ម៉ាណែត ក៏ដោយ ក៏មេដឹកនាំថៃមិនទាន់ឈានដល់កំរិតអគុណធម៌មករៀបចំផែនការសម្លាប់ខ្ញុំ និង ហ៊ុន ម៉ាណែត នោះដែរ។ ក្នុងប្រវត្តិសាស្ត្រ គេតែងតែរកវិធីសម្លាប់មេទ័ព ដែលពូកែ ដើម្បីងាយយកឈ្នះលើសង្រ្គាម តែសម័យនេះមិនដូចសម័យមុនទេ គេត្រូវការមនុស្ស ដែលអាចនិយាយគ្នាបាន ដើម្បីកសាងសន្តិភាព»។

លោក ហ៊ុន សែន លើកឡើងថា កម្ពុជាក៏ត្រូវការមេដឹកនាំថៃរូបណា ដែលមានអំណាចខ្លាំង ដើម្បីចរចារកសន្តិភាពបាន។ ឯថៃក៏ត្រូវការមេដឹកនាំកម្ពុជាណា ដែលមានអំណាចខ្លាំង ដែលពេលនេះគឺមានតែហ៊ុន សែន និងហ៊ុន ម៉ាណែត ប៉ុណ្ណោះ ដើម្បីចរចាដែលហ៊ុន ម៉ាណែត ចេញមុខចរចាដោយផ្ទាល់។ យោងលើហេតុផលនេះ គឺគ្មានមូលហេតុណាមួយ ដែលមេដឹកនាំថៃ មានគម្រោងសម្លាប់ ហ៊ុន សែន និង ហ៊ុន ម៉ាណែត នោះឡើយ។

សំណេរដដែល បន្តថា៖«ប្រសិនបើ ហ៊ុន សែន ឬ ហ៊ុន ម៉ាណែត ស្លាប់ ដោយស្នាដៃមេដឹកនាំថៃមែន វាច្បាស់ជានឹងកើតមាន ហ៊ុន សែន ឬ ហ៊ុន ម៉ាណែត រាប់ម៉ឺន រាប់សែន រាប់លាននាក់ នៅលើទឹកដីកម្ពុជាភ្លាម ដែលវានឹងក្លាយជាសត្រូវសួរពូជពិបាករំលត់។ សម្រាប់ខ្ញុំក្តី ហ៊ុន ម៉ាណែតក្តី ក៏មិនមែនជាកូនសត្វកង្កែបដែលគេងាយនឹងសម្លាប់នោះដែរ។ ទាំងនេះក៏ជាការពន្យល់បន្ថែមថា មេដឹកនាំថៃមិនរៀបចំផែនការដើម្បីសម្លាប់ ហ៊ុន សែន និង ហ៊ុន ម៉ាណែត នោះទេ»។

បើតាមសំណេរដដែល នៅក្នុងផែនការសម្លាប់ ហ៊ុន សែន និង ហ៊ុន ម៉ាណែត ដោយមេដឹកនាំថៃ គេលើកថា និងប្រើយន្តហោះ។ ចំណុចនេះគួរតែប្រទេស ដែលលក់យន្តហោះ ចម្បាំងឱ្យថៃ ត្រូវរឹតបន្តឹងលើកិច្ចសន្យាប្រើប្រាស់យន្តហោះ ព្រោះកន្លងទៅនេះ ថៃបានប្រើយន្តហោះ ដែលទិញពីអាមេរិក និងស៊ុយអែត វាយចូលជ្រៅក្នុងទឹកដីកម្ពុជា។ កម្ពុជាមិនជំទាស់នឹងការលក់យន្តហោះចម្បាំងឱ្យថៃទេ តែសូមកុំឱ្យថៃប្រើប្រាស់យន្តហោះវាយប្រហារចូលទឹកដីកម្ពុជា ឬទឹកដីឡាវ ឬម៉ាឡេស៊ី ឬមីយ៉ាន់ម៉ា ដែលជាប្រទេសជាប់ព្រំដែនជាមួយថៃ៕

06/08/2025

ឪពុករបស់លោក ស៊ន តារា អ្នកអត្ថាធិប្បាយនយោបាយដ៏ល្បីល្បាញ គឺលោក សុខ ស៊ុនណារ៉េត ត្រូវបានតុលាការផ្តន្ទាទោសដាក់ពន្ធនាគារ ៤ឆ្នាំ ក្នុងសំណុំរឿងចោទប្រកាន់ពាក់ព័ន្ធនឹងគ្រឿងញៀន

ផ្សាយថ្ងៃទី៦ ខែសីហា ឆ្នាំ២០២៥✍️

សាលាដំបូងខេត្តកំពង់ស្ពឺ បានប្រកាសសាលក្រមនៅថ្ងៃទី៦ ខែសីហា នេះ ដោយបានសម្រេចផ្តន្ទាទោស លោកសុខ ស៊ុនណារ៉េត ដាក់ពន្ធនាគារ រយៈពេល ៤ឆ្នាំ ក្នុងសំណុំរឿងចោទប្រកាន់ពីបទរក្សាទុកនូវសារធាតុញៀនដោយខុស្បាប់ បន្ទាប់ពីបើកសវនាការកាលពីថ្ងៃទី៩ កក្កដា ឆ្នាំ២០២៥។ លោក សុខ ស៊ុនណារ៉េត អាយុ៦៦ឆ្នាំ ជាមន្ត្រីយោធានៅបញ្ជាការដ្ឋានភូមិភាគ៣ នៅខេត្តកំពង់ស្ពឺ លោកត្រូវជាឪពុករបស់លោក ស៊ន តារា អ្នកធ្វើអត្ថាធិប្បាយនយោបាយដ៏ល្បីល្បាញ ដែលកំពុងរស់នៅប្រទេសបារាំង។

បើតាមរបាយការណ៍ លោក សុខ ស៊ុនណារ៉េត ត្រូវបានចាប់ខ្លួន ដោយកម្លាំងកងរាជអាវុធហត្ថខេត្តកំពង់ស្ពឺ នៅភូមិដកពរ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ នៅខាងមុខសឹករងខេត្តកំពង់ស្ពឺ កាលពីថ្ងៃទី១៣ ខែវិច្ឆិកា ឆ្នាំ២០២៤ ខណៈដែលលោកបានបើករថយន្តទៅជួបមេបញ្ជាការរងយោធភូមិភាគ៣តាមការណាត់។

លោក ស៊ន តារា បានសរសេរលើទំព័រហ្វេសប៊ុករបស់លោកនៅថ្ងៃទី៦ សីហា នេះ ថា ឪពុករបស់លោកជាជនស្លូតត្រង់ គ្មានកំហុស និងបម្រើជាតិត្រូវជាប់គុក៤ឆ្នាំជាចំណាប់ខ្មាំង ជាការបំបាក់ទឹកចិត្តកងទ័ព។

លោកអំពាវនាវថា៖«សូមជាតិ និងអន្តរជាតិអន្តរាគមន៍ ដើម្បីដោះលែងទាហានខ្មែរ១៨នាក់ ដែលថៃចាប់ និងឪពុករបស់ខ្ញុំ»។

លោក ស៊ន សារ៉ាត កូនប្រុសរបស់លោក សុខ ស៊ុនណារ៉េត ដែលជាប្អូនលោក ស៊ន តារា បានប្រាប់អ្នកកាសែតថា តុលាការសម្រេចផ្តន្ទាទោសឪពុករបស់លោកដាក់ពន្ធនាគាររយៈពេល៤ឆ្នាំ គឺជារឿងអយុត្តិធម៌បំផុត ដោយសារថា ឪពុករបស់លោកមិនបានប្រព្រឹត្តដូចការចោទប្រកាន់ឡើយ។

លោក ស៊ន សារ៉ាត ថ្លែងថា៖«អយុត្តិធម៌ ដូចយើងបានដឹងហើយ រឿងហ្នឹងមហាជនបានដឹង [មិន]គួរណាធ្វើរឿងនេះមកលើមនុស្ស ដែលអត់ដឹងអី មនុស្សដែលស្លូតត្រង់ យកគាត់មកធ្វើទារុណកម្មបែបនេះ»។

លោក ស៊ន សារ៉ាត ប្រាប់អ្នកកាសែតថា ក្នុងសំណុំរឿងចោទប្រកាន់ និងផ្តន្ទាទោសឪពុកលោកបែបនេះ លោកនឹងប្តឹងរកយុត្តិធម៌ បន្តទៀតទៅសាលាឧទ្ធរណ៍៕

06/08/2025

កម្ពុជាច្រានចោលការផ្សាយរបស់សារព័ត៌មានថៃ ដែលថា ទាហានខ្មែរម្នាក់មកពីបញ្ជាការដ្ឋានអង្គរក្សដែលជាអ្នកស៊ើបការណ៍ត្រូវបានចាប់ខ្លួន ដោយថា នេះជាចេតនាមួលបង្កាច់មកលើកម្ពុជា

ផ្សាយថ្ងៃទី៦ ខែសីហា ឆ្នាំ២០២៥✍️

តាមរយៈអ្នកនាំពាក្យក្រសួងការពារជាតិកម្ពុជា លោកស្រី ម៉ាលី សុជាតា កម្ពុជាសូមច្រានចោលទាំងស្រុងចំពោះការផ្សាយ ដោយគ្មានមូលដ្ឋាន បង្កើតសាច់រឿង គ្មានភស្តុតាង ដែលមិនទាន់មានការស៊ើបអង្កេតច្បាស់លាស់ បង្កើតរឿងផ្ទុយពីការពិត ក្នុងចេតនាមួលបង្កាច់មលើកម្ពុជា របស់សារព័ត៌មានថៃមួយចំនួន។

ក្នុងសន្និសីទ្ធសារព័ត៌មាននារសៀលថ្ងៃទី៦ សីហា លោកស្រី ម៉ាលី សុជាតា ថ្លែងថា៖«នៅព្រឹកថ្ងៃទី២៦ ខែសីហា ឆ្នាំ២០២៥នេះ ថៃបានផ្សាយព័ត៌មានមិនពិត ដោយប្រឌិតលើកឡើងថា ប៉ូលិសខេត្តបុរីរ់ាំ បានចាប់ខ្លួនទានហានខ្មែរម្នាក់មកពីបញ្ជាការដ្ឋានអង្គរក្ស នឹងត្រូវបានសង្ស័យថា លាក់ខ្លួននៅទីនោះ ដើម្បីបញ្ជូនចលនាយោធាថៃមកម្ពុជា»។

លោកស្រីបញ្ជាក់ថា៖«សូមគូសបញ្ជាក់ថា ក្រសួងការពារជាតិ និងកងយោធពលខេមរភូមិន្ទ មិនអនុញ្ញាតឱ្យយោធិនគ្រប់រូប ដែលមានស្នាមសាក់លើដងខ្លួនបែបក្នុងរូប ដែលខាងភាគីថៃបានបង្ហាញ ចូលបម្រើការងារក្នុងក្របខ័ណ្ឌណាមួយរបស់កងកម្លាំងរបស់យើងជាដាច់ខាត។ ភាគីថៃ សូមបញ្ឈប់ជាបន្ទាន់នូវការផ្សាយព័ត៌មានមិនពិត ប្រឌិត និងគ្មានមូលដ្ឋានច្បាស់លាស់ ដែលនេះបង្ហាញពីភាពគ្មានវិជ្ជាជីវៈក្នុងស្ថាប័នសារព័ត៌មាន»៕

06/08/2025

ជនភៀសសឹក ដែលត្រូវបានជម្លៀសចេញពីខេត្តចំនួន ៥ គិតត្រឹមថ្ងៃទី៤ ខែសីហា ឆ្នាំ២០២៥ សរុបមានចំនួន១២៤ ៩៤០នាក់។ នេះបើតាមរបាយការណ៍របស់អ្នកនាំពាក្យក្រសួងការពារជាតិ នៅរសៀលថ្ងៃទី៦ សីហា។

ផ្សាយថ្ងៃទី៦ ខែសីហា ឆ្នាំ២០២៥✍️

06/08/2025

ពលករកម្ពុជារាប់ពាន់នាក់នៅតែសម្រុកចេញពីប្រទេសថៃចូលមកប្រទេសកម្ពុជាតាមច្រកទ្វារអន្តរជាតិដូង និងច្រកទ្វារអន្តរជាតិព្រំ ក្នុងមួយថ្ងៃ ខណៈជម្លោះកម្ពុជា-ថៃ នៅតានតឹង

ផ្សាយថ្ងៃទី៦ ខែសីហា ឆ្នាំ២០២៥✍️

ពលករកម្ពុជារាប់ពាន់នាក់ បានសម្រុកចេញពីប្រទេសថៃ ចូលមកក្នុងប្រទេសកម្ពុជាវិញ នៅតាមច្រកទ្វារអន្តរជាតិដូង នៃខេត្តបាត់ដំបង និងតាមច្រកទ្វារអន្តរជាតិព្រំ នៃខេត្តប៉ៃលិន នាថ្ងៃទី៦ សីហា ឆ្នាំ២០២៥ នេះ ខណៈបញ្ហាជម្លោះព្រំដែនកម្ពុជា-ថៃ នៅតែស្ថិតក្នុងស្ថានការណ៍ប្រុងប្រយ័ត្ន។ ប្រភពពីមន្ត្រីច្រកទ្វារ បានឱ្យដឹងនៅថ្ងៃទី៦ សីហា ថា ពលករជាង ១០ម៉ឺននាក់បានសម្រុកចូលកម្ពុជាតាមច្រកទ្វារអន្តរជាតិដូង កាលពីថ្ងៃទី៥ សីហា និងនៅថ្ងៃទី៦ សីហា នេះ ក៏មានខ្ទង់រាប់ម៉ឺននាក់ផងដែរ។ ចំណែកនៅច្រកទ្វារអន្តរជាតិព្រំ នៅថ្ងៃទី៦ សីហា នេះ ពលករជាង ២ ០០០នាក់ បានចាកចេញពីប្រទេសថៃ ចូលមកកម្ពុជា៕

សារព័ត៌មាន ខេមបូឌា ណាវ - The Cambodia Now News-CNN

08/08/2025

08/08/2025

07/08/2025

07/08/2025

07/08/2025

07/08/2025

07/08/2025

06/08/2025

06/08/2025

06/08/2025

06/08/2025

06/08/2025

Address

Telephone

Website

Alerts

Contact The Business

Shortcuts

Share