បច្ចុប្បន្ន ខ្ញុំជាកសិករធ្វើស្រែសម្រាប់តែមួយក្រពះ និងសល់ពេលវេលាខ្លះធ្វើការងារសហគមន៍បន្តិចបន្តួចជាមួយយុវជន។ ប៉ុន្តែបើនិយាយពីមុនវិញ គឺពីឆ្នាំ២០០៩ រហូតដល់ឆ្នាំ២០១៧ ខ្ញុំធ្លាប់បានបម្រើការងារនៅតាមអង្គការក្រៅរដ្ឋាភិបាល, សមាគម, និងគ្រឹះស្ថានឧត្តមសិក្សាឯកជនមួយ។ ទំនួលខុសត្រូវការងាររបស់ខ្ញុំភាគច្រើនពាក់ព័ន្ធនឹងការងារជាមួយយុវជន យុវវ័យ និងក្មេងៗក្រីក្រនៅតាមស
ហគមន៍តំបន់ដាច់ស្រយាល។ ពីឆ្នាំ២០១៧ រហូតដល់បច្ចុប្បន្ន ខ្ញុំប្រឡូកយ៉ាងសកម្មក្នុងវិស័យបណ្តុះវប្បធម៌អានដល់យុវជន។
មកដល់ថ្ងៃនេះ ក្រៅពីសៀវភៅ “អំណានជាអំណាច” ខ្ញុំមានស្នាដៃផ្ទាល់ខ្លួន ដូចជាសៀវភៅ “ប្រតិទិនទស្សនៈ៣៦៥ថ្ងៃ”, សៀវភៅ “ប្រតិទិនទស្សនៈ២២២ថ្ងៃ”, សៀវភៅ “ដំណើរស្វែងរកខ្លួនឯង”, សៀវភៅ “អំណាចកម្ម”, និងស្នាដៃចុងក្រោយគឺសៀវភៅ “ដួងព្រលឹងមេដឹកនាំ”។
និយាយពីសៀវភៅ “អំណានជាអំណាច” ខ្ញុំបានបោះពុម្ពសម្រាប់ចែកជូនឥតគិតថ្លៃដល់អ្នកអានចំនួន ៣ម៉ឺនច្បាប់។ លើសពីនេះ ចាប់តាំងពីឆ្នាំ២០១៩ សៀវភៅនេះបានដាក់ឱ្យអ្នកអានទាញយកអានជាទម្រង់អេឡិកត្រនិក (eBook/Digital book) ដែលមានអ្នកអានទាញយកអានប្រមាណលើសពី ១០ម៉ឺនដងឯណោះ។ ខ្ញុំសង្ឃឹមថាការចូលរួមចំណែកដ៏តូចរបស់ខ្ញុំនឹងនាំផលប្រយោជន៍ដ៏សមគួរដល់យុវជនខ្មែរគ្រប់រូប!
