09/09/2025
📌 របាយការណ៍ព័ត៌មាន
ព្រឹកថ្ងៃទី ០៩ ខែកញ្ញា ឆ្នាំ២០២៥ ក្រោមអធិបតីភាព ឯកឧត្តម ម៉ាង ស៊ីណេត អភិបាលខេត្តព្រះសីហនុ បានប្រព្រឹត្តទៅ ពិធីប្រកាសចូលកាន់មុខតំណែងអភិបាល និងអភិបាលរង នៃគណៈអភិបាលក្រុងកោះរ៉ុង។
តាមប្រកាសលេខ ៦៧៥ អនក្រ.តត ចុះថ្ងៃទី ១១ សីហា ២០២៥ របស់រាជរដ្ឋាភិបាល បានតែងតាំង
លោក រាជ សុវណ្ណ ជា អភិបាលក្រុងកោះរ៉ុង
លោក ណាំ វិសាល ជា អភិបាលរងក្រុងកោះរ៉ុង។
ក្នុងឱកាសនេះ លោក រាជ សុវណ្ណ បានប្រកាសប្តេជ្ញាចិត្ត ៧ ចំណុច រួមមាន៖
1. គោរពអនុវត្តតាមរដ្ឋធម្មនុញ្ញ និងច្បាប់ ដើម្បីធានាគុណភាពសេវាសាធារណៈ និងអភិវឌ្ឍមូលដ្ឋាន។
2. អនុវត្តភារកិច្ចដោយមានគណនេយ្យភាព ឆ្លើយតបចំពោះរាជរដ្ឋាភិបាល និងប្រជាពលរដ្ឋ។
3. ចូលរួមអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» និងថែរក្សាសន្តិសុខ សណ្តាប់ធ្នាប់ក្នុងក្រុង។
4. ពង្រឹងសាមគ្គីភាព និងការសហការជាមួយថ្នាក់ដឹកនាំគ្រប់លំដាប់ និងអង្គភាពពាក់ព័ន្ធ។
5. ផ្តល់សេវាសាធារណៈប្រកបដោយតម្លាភាព ឆ្លើយតបតម្រូវការប្រជាជន និងអនុវត្តផែនការអភិវឌ្ឍ៥ឆ្នាំ។
6. រក្សាស្ថេរភាពនយោបាយ សន្តិសុខ និងសមិទ្ធផលដែលបានសម្រេច។
7. គាំទ្ររាជរដ្ឋាភិបាល និងកងកម្លាំងប្រដាប់អាវុធ ដើម្បីការពារបូរណភាពទឹកដី និងជួយដល់ប្រជាពលរដ្ឋ។
ឯកឧត្តម ម៉ាង ស៊ីណេត បានផ្តាំផ្ញើឲ្យអភិបាល និងអភិបាលរងថ្មី បន្តដឹកនាំអនុវត្តភារកិច្ចឱ្យទទួលបានជោគជ័យ ដោយប្រើប្រាស់ជំនាញបច្ចេកទេស ក្នុងការការពារសន្តិសុខ សណ្តាប់ធ្នាប់សង្គម និងជំរុញអភិវឌ្ឍមូលដ្ឋាន។
គាត់ក៏បានណែនាំឲ្យ គណៈបញ្ជាការឯកភាពក្រុង សហការជាមួយក្រសួង ស្ថាប័ន និងដៃគូអភិវឌ្ឍន៍ ដើម្បីទប់ស្កាត់ការកាប់បំផ្លាញព្រៃឈើ ការចូលរួមកាន់កាប់ដីខុសច្បាប់ និងគ្រប់គ្រងដីឆ្នេរតាមប្លង់គោល។ ព្រមទាំងពង្រឹងអនាម័យ សោភ័ណភាពបរិស្ថាន និងការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ដែលផ្តោតលើសេវារដ្ឋបាលមានគុណភាព គ្មានបទល្មើស គ្មានគ្រោះថ្នាក់ចរាចរណ៍ គ្មានអំពើអនាចារ និងមានបរិស្ថានល្អ។
📢 សារសំខាន់
ពិធីនេះជាជំហានសំខាន់ក្នុងការផ្លាស់ប្តូរនិងពង្រឹងសមត្ថភាពរដ្ឋបាលក្រុងកោះរ៉ុង ដើម្បីអភិវឌ្ឍជាគោលដៅទេសចរណ៍ និងលើកកម្ពស់ជីវភាពប្រជាពលរដ្ឋ។
