30/01/2026
လောကမှာ ဘာမှအလကားမရဘူး
တစ်နေ့မှာ ဘုရင်ကြီးတစ်ပါးက သူ့ရဲ့ ပညာရှိအမတ်တွေကို စုပေါင်းတိုင်ပင်ကြပြီး စာတမ်းတစ်စောင်ကို ရေးသားပြုစုခိုင်းလိုက်တယ်။ နောက်လာနောက်သားတွေအတွက် ဘဝမှာ အကျိုးရှိစေမယ့် အကြောင်းအရာတွေကို ရေးပေးဖို့ပါ။
သီတင်းပတ်အနည်းငယ်အကြာမှာ အမတ်တွေက သူတို့ စုပေါင်းရေးထားတဲ့ စာမျက်နှာ ၅၀ ရှိတဲ့ စာတမ်းကို ဘုရင်ကို ပြတယ်။ ဘုရင်က ဖတ်ကြည့်ပြီး စာဟာ ရှည်လွန်းလို့ လူတွေ ဖတ်ကြည့်မှာ မဟုတ်ဘူး၊ ဒါကြောင့် အတိုချုံးရေးပြီး ပြန်တင်ဖို့ ပြောတယ်။
အမတ်တွေလည်း တစ်ပတ်အကြာမှာ စာမျက်နှာ ၁၀ မျက်နှာ ရှိတဲ့ စာတမ်းကို ပြန်ပြတယ်။ ဘုရင်က ရှည်သေးတယ်၊ ထပ်ပြီး အတိုချုံးဆုံးလို့ ပြောတယ်။
နောက်တစ်ပတ်ကြာတော့ အမတ်တွေက စာတစ်မျက်နှာတည်း ပါတဲ့ စာတမ်းကို ပြန်တင်တယ်။ ဘုရင်က ဒါလည်း ရှည်သေးတယ်၊ စာတစ်ကြောင်းတည်းနဲ့ ရေးပြဖို့ ပြောလိုက်ပြန်တယ်။
နောက်ဆုံးမှာ အမတ်တွေက စာတစ်ကြောင်းတည်းပါတဲ့ စာတမ်းကို တင်ပြလို့ ဘုရင်က အရမ်းသဘောကျသွားပြီး ဆုလာဘ်တွေ ချီးမြှင့်လိုက်တယ်။
သူတို့ရဲ့ စာတမ်းမှာပါတဲ့ တစ်ခုတည်းသော စာကြောင်းက “လောကမှာ ဘယ်ဟာမှ အလကား မရဘူး” ဆိုတာပါပဲ။ အဲဒါကို အင်္ဂလိပ်လို "There is no such thing as free lunch" လို့ ခေါ်ပါတယ်။ အဲဒါဟာ လူငယ်တွေအတွက် အင်မတန် တန်ဖိုးရှိတဲ့စကားပါ။
• ပညာတတ်ချင်သလား။ ပညာကြိုးစားပါ။ မကြိုးစားဘဲ စာမေးပွဲမှာ ခိုးချပြီး ဘွဲ့ရနိုင်ပါတယ်။ ဒါပေမဲ့ ပညာတတ်တစ်ယောက်တော့ ဖြစ်လာမှာ မဟုတ်ဘူး။
• အောင်မြင်တဲ့ ဘောလုံးသမားတစ်ယောက် ဖြစ်ချင်သလား။ မနက် အိပ်ရာစောစောထ လေ့ကျင့်ခန်းဆင်းရမှာ ပျင်းနေတယ်၊ ညနက်အထိ သူငယ်ချင်းတွေနဲ့ ဟေးလားဝါးလား လုပ်နေသူဟာ ဘယ်လိုမှ အောင်မြင်တဲ့ ဘောလုံးသမား ဖြစ်လာမှာ မဟုတ်ပါဘူး။
• ကြီးပွားချမ်းသာချင်သလား။ ကြီးပွားအောင်မြင်ရေး နည်းလမ်းတွေကို သေချာလေ့လာပါ။ ကျင့်သုံးလိုက်နာပါ။ မစွန့်စားရဲဘဲ သူများပေးတဲ့ လစာလေးနဲ့ ကျေနပ်နေရင် တစ်သက်လုံး မကြီးပွားနိုင်ပါဘူး။
• မိဘချမ်းသာမှ၊ ဆွေမျိုးအသိုင်းအဝန်းကောင်းမှ၊ လူကြီးဆိုသူတွေကို ပေးကျွေးမှ၊ အမွေရမှ၊ ထီပေါက်မှ ချမ်းသာမယ် ဆိုသူတွေဟာ ဘယ်တော့မှ မချမ်းသာနိုင်ကြပါဘူး။ ဘာကြောင့်လဲဆိုတော့ လောကရဲ့ အမှန်တရားတစ်ခုဖြစ်တဲ့ ဘယ်ဟာမှ အလကား၊ အချောင်မရဘူးဆိုတဲ့ အချက်နဲ့ မကိုက်ညီလို့ပါ။
ဗန်းမော်သိန်းဖေ မျှဝေလိုသော အတွေးများ စာအုပ်မှ
#စာအုပ် #ကဗျာ
