28/04/2026
នេះជាចេតិយរបស់លោក កៅ តក់ មានទីតាំងស្ថិតនៅវត្តភ្នំទ្រង់បាត្រ ឃុំកំពង់ថ្កូវ ស្រុកក្រឡាញ់ ខេត្តសៀមរាប។ លោក កៅ តក់ គឺជាខ្មែរឥស្សរៈមួយដ៏ល្បីល្បាញនៅជំនាន់អាណានិគមបារាំង ហើយលោកត្រូវបានស្គាល់ថាជាឪពុកក្មេករបស់លោក ហង្ស ធុនហាក់។
ពិស្ដារអំពីលោក កៅ តក់ ប្រិយមិត្តមុខជាអាចដឹងបានតាមរយៈសៀវភៅ ចរិតខ្មែរ ដែលនិពន្ធដោយលោក បុណ្ណច័ន្ទ ម៉ុល ជាក់ជាមិនខាន។
ខ្ញុំសូមដកស្រង់នូវចំណុចមួយត្រង់ទំព័រ ៨៩ - ៩០ នៃសៀវភៅ ចរិតខ្មែរ ច្បាប់បោះពុម្ពឆ្នាំ១៩៧៣៖
[….] លោក កៅ តក់ ជាមេឥស្សរៈខ្មែរសេរីដ៏សំខាន់នៅតំបន់សៀមរាប។ គាត់ជាអ្នកប្រឆាំងនឹងពួកអាណានិគមយ៉ាងល្បីល្បាញ។ នៅក្នុងឆ្នាំ១៩៥៤ ក្នុងពេលដែលសន្និសីទហ្សឺណែវ តម្រូវឱ្យខ្មែរគ្រប់និន្នាការទាំងអស់នៅក្នុងព្រៃ ទម្លាក់អាវុធរួបរួមនឹងរដ្ឋាភិបាល, ពេលដែលលោក សឹង ង៉ុក ថាញ់ ដាក់អាវុធដែរ តាមសេចក្ដីសម្រេចនោះ លោក កៅ តក់ ក៏បានដាក់អាវុធចុះ សុខចិត្តរួបរួមនឹងរដ្ឋាភិបាល។
ឯលោក កៅ តក់ ពេលដែលគាត់មករួបរួមក្នុងសង្គមជាតិវិញនោះ គ្មានអ្វីនឹងប្រកបរបរចិញ្ចឹមជីវិត ក៏ស្នើសុំខ្ចីប្រាក់របស់ដាប ឈួន ជាដើមទុនខ្លះនឹងប្រកបរបរ ព្រោះអាងថា ដាប ឈួន ជាមិត្តចិត្តមួយ។ ដាប ឈួន ក៏ផ្ដាំថាឱ្យមកយកចុះ គាត់ទុកឱ្យនៅម្ដុំពួក ទើបគាត់ចាត់គ្នាជាស្រេចឱ្យចាំចាប់លោក កៅ តក់។ លោក កៅ តក់ មិនបានដឹងខ្លួន ក៏មក។ ប្រហែល ១០ គ.ម នឹងដល់ស្រុកពួក ក៏ស្រាប់តែពួក ដាប ឈួន ស្ទុះទៅឱបចងមួយរំពេច។ យល់ថាចាញ់កល់ ដាប ឈួន លោក កៅ តក់ ក៏ខំរើបម្រះ ទាត់ធាក់ ខាំកកេរពួកអ្នកចងយ៉ាងពេញទំហឹង។ ប្រសិនបើមានកាំភ្លើងខ្លី ឬកាំបិតស្នៀតមួយដើម ប្រហែលជាគ្មានធ្វើអ្វីគាត់បានទេ តែគាត់គ្មានហកអាវុធអីមកកំដរខ្លួនសោះ ដោយអាងថា ដាប ឈួន ជាមិត្ត តែមិនដឹងថាមិត្តសម្លាប់មិត្តអី… ក៏ត្រូវពួកត្មាតរបស់ដាប ឈួន អូសទាញគាត់យកទៅបាញ់ចោលទៅ… គួរឱ្យឈឺចាប់ ! [….]
+ ផ្សព្វផ្សាយដោយ៖ ចៅកម្ពុជា
