CMG FM93, Saphanthong Neua Village, Sisattanak District, Vientiane Capital, Lao PDR (2026)

12/07/2026

ອາເມຣິກາ: ທະຫານອາເມຣິກາໄດ້ຫຼອນໂຈມຕີເປົ້າໝາຍການທະຫານຂອງອີຣານຢ່າງສຳເລັດຜົນ

ວັນທີ 11 ກໍລະກົດນີ້,ເຈົ້າໜ້າທີ່ລະດັບສູງອາເມຣິກາກ່າວວ່າ:ອາເມຣິກາໄດ້ຫຼອນໂຈມຕີລາດາຕິດຕາມທາງອາກາດ,ຖານຍິງສົ່ງລູກສອນໄຟນຳວິຖ ແລະ ຍົນບໍ່ມີຄົນຂັບ ພ້ອມດ້ວຍ ອຸປະກອນຍິງສົ່ງຂີປະນາວຸດດິນຕໍ່ຟ້າຂອງອີຣານຢ່າງສຳເລັດຜົນໃນມື້ດຽວກັນ.ນີ້ແມ່ນທະຫານອາເມຣິກາຫຼອນໂຈມຕີອີຣານຄັ້ງທີ 3 ພາຍໃນອາທິດນີ້.
ຕອນຮຸ່ງເຊົ້າວັນທີ 12 ກໍລະກົດນີ້,ທະຫານເຮືອຂອງກອງທັບປ້ອງກັນການປະຕິວັດອິສຣາມອີຣານອອກຖະແຫຼງການວ່າ ໄດ້ຕັກເຕືອນຍິງໃສ່ກຳປັ່ນລຳໜຶ່ງທີ່ຜ່ານຊ່ອງແຄບຮໍມຸສທີ່ລະເມີດຂໍ້ກຳນົດ.ເນື່ອງຈາກວ່າສະຖານະການບໍ່ໝັ້ນຄົງຄັ້ງນີ້ແມ່ນເກີດຂຶ້ນຍ້ອນ “ອິດທິກຳລັງຕ່າງປະເທດແຊກແຊງຢ່າງຜິດກົດໝາຍ”,ຊ່ອງແຄບຮໍມຸສຈຶ່ງຈະຖືກປິດເປັນການຊົ່ວຄາວ ຈົນເຖິງເວລາແຈ້ງການຕ່າງຫາກ.ກ່ອນອາເມຣິກາສິ້ນສຸດການແຊກແຊງພາກພື້ນນີ້,ກຳປັ່ນໃດໆລ້ວນແຕ່ຜ່ານບໍ່ໄດ້.ນອກຈາກນີ້,ຖ້າ “ຜູ້ຮຸກຮານ” ຖືເລື່ອງນີ້ເປັນຂໍ້ອ້າງ ເພື່ອໃຊ້ການກະທຳຜິດ ຫຼື ຫຼອນໂຈມຕີອີຣານອີກ,ອີຣານຈະຕອບໂຕ້ຄືນດ້ວຍຄວາມຮຸນແຮງກວ່າເກົ່າ ແລະ ຈະຫຼອນໂຈມຕີຖານທັບໃໝ່ຂອງສັດຕູໃນພາກພື້ນນີ້.

12/07/2026

ປະຊາຊົນຍີ່ປຸ່ນໂຮມຊຸມນຸມ ຄັດຄ້ານການດັດແກ້ລັດຖະທຳມະນູນເພື່ອຂະຫຍາຍການທະຫານ

ຕອນແລງວັນທີ 11 ກໍລະກົດນີ້, ປະຊາຊົນຍີ່ປຸ່ນໄດ້ຈັດງານໂຮມຊຸມນຸມຢູ່ເຂດໃຫ້ກັບສະຖານີລົດໄຟຊິນຈຸຄຸ ນະຄອນຫຼວງໂຕກຽວຢ່າງເປັນເຈົ້າການ,ເພື່ອສະແດງຄວາມຄັດຄ້ານລັດຖະບານຍີ່ປຸ່ນທີ່ຢາກຈະດັດແກ້ລັດຖະທຳມະນູນ ແລະ ຊຸກຍູ້ໃຫ້ “ຫັນເປັນການທະຫານອີກຄັ້ງ”.
ຜູ້ໂຮມຊຸມນຸມກ່າວວ່າ ຫວັງວ່າລັດຖະບານຍີ່ປຸ່ນສາມາດໃຊ້ການກະທຳເພື່ອສັນຕິພາບຢ່າງແທ້ຈິງ,ແຕ່ວ່າ ລັດຖະບານພັກເສລີປະຊາທິປະໄຕ ຫຼື ພັກຈິມິນຊຸດປັດຈຸບັນພັດດຳເນີນກິດຈະກຳສາກົນຕາມທິດທາງກົງກັນຂ້າມກັບສັນຕິພາບທັງໝົດ.ຕາບໃດ ຍີ່ປຸ່ນພັດທະນາອຸດສາຫະກຳການທະຫານ ໂດຍຖືເປັນອຸດສາຫະກຳອັນສຳຄັນແຫ່ງໜຶ່ງ ກໍ່ໝາຍຄວາມວ່າຈະນຳເອົາງົບປະມານແຫ່ງລັດ ແລະ ເງິນຂອງຜູ້ເສຍອາກອນໃຊ້ເຂົ້າໃນຂົງເຂດການທະຫານຢ່າງບໍ່ຢຸດຢັ້ງ,ຊີວິດການເປັນຢູ່ຂອງປະຊາຊົນກໍ່ຈະນັບມື້ນັບໄດ້ຮັບຜົນກະທົບຍ້ອນເລື່ອງນີ້.ການທີ່ຢາກຈະຂະຫຍາຍການທະຫານທີ່ບໍ່ມີປະໂຫຍດໃດໆ,ຈົນບໍ່ສົນນຳສິດຢູ່ລອດຂອງປະຊາຊົນ ນັ້ນແມ່ນເລື່ອງທີ່ອົດທົນບໍ່ໄດ້ຢ່າງເດັດຂາດ ແລະ ເຮັດໃຫ້ຄົນຄຽດແຄ້ນທີ່ສຸດ.

12/07/2026

ຈີນເປີດເຜີຍແຈ້ງການວັນເດີນທະເລແຫ່ງຊາດຈີນປີ 2026

ວັນທີ 11 ກໍລະກົດນີ້ແມ່ນວັນເດີນທະເລແຫ່ງຊາດຈີນຄັ້ງທີ 22, ໃນມື້ດຽວກັນ, ຈີນໄດ້ເປີດເຜີຍແຈ້ງວັນການເດີນທະເລແຫ່ງຊາດຈີນປີ 2026.
ເນື້ອໃນແຈ້ງການລະບຸວ່າ: ຍອດປະລິມານການຂົນສົ່ງສິນຄ້າສາກົນຜ່ານທາງທະເລຂອງຈີນກວມເອົາເກືອບ 1 ສ່ວນ 3 ຂອງຍອດປະລິມານທົ່ວໂລກ, ເສັ້ນທາງ ແລະເຄືຍຂ່າຍບໍລິການດ້ານການເດີນທະເລ ມີຢູ່ປະເທດ ແລະເຂດແຄວ້ນການຄ້າຕົ້ນຕໍທົ່ວໂລກ. 3 ຕົວຊີ້ວັດທີ່ສຳຄັນໃນດ້ານການຜະລິດກຳປັ່ນຂອງຈີນ ຄື: ຈຳນວນກຳປັ່ນທີ່ຜະລິດສຳເລັດ, ຈຳນວນໃບສັ່ງຈອງໃໝ່ ແລະຈຳນວນໃບສັ່ງຈອງທີ່ມີຢູ່ ລ້ວນແຕ່ຢູ່ລະດັບແຖວໜ້າຂອງໂລກ 16 ປີລຽນຕິດ. ລວມຍອດຜະລິດຕະພັນພາຍໃນດ້ານທະເລຂອງຈີນບັນລຸຫຼາຍກວ່າ 11.000 ຕື້ຢວນ.

12/07/2026

6 ເດືອນຕົ້ນປີນີ້ ຄວາມໜຽວແໜ້ນຂອງເສດຖະກິດຈີນຍົກສູງຂຶນຢ່າງບໍ່ຢຸດຢັ້ງ

ວັນທີ 12 ກໍລະກົດນີ້,ສູນຂໍ້ມູນຂ່າວສານແຫ່ງຊາດຈີນໄດ້ປະກາດຂໍ້ມູນສະແດງໃຫ້ເຫັນວ່າ:ໃນ 6 ເດືອນຕົ້ນປີນີ້,ຕົວຊີ້ວັດຫຼາຍຕົວທີ່ສ່ອງແສງໃຫ້ເຫັນເຖິງຂົງເຂດການຄ້າກັບຕ່າງປະເທດ ການລົງທຶນແລະ ອື່ນໆໄດ້ໝັ້ນຄົງແລະດີຂຶ້ນ.ພາຍໃຕ້ການຄ້ຳຊູຂອງນະໂຍບາຍມະຫາພາກທີ່ຕັ້ງໜ້າ,ຄວາມໜຽວແໜ້ນຂອງເສດຖະກິດຈີນໄດ້ຍົກສູງຂຶ້ນຢ່າງບໍ່ຢຸດຢັ້ງ.
ໃນ 6 ເດືອນຕົ້ນປີນີ້,ພາຍໃຕ້ເບື້ອງຫຼັງທີ່ສະພາບແວດລ້ອມເສດຖະກິດການຄ້າສາກົນປ່ຽນແປງຢ່າງວ່ອງໄວ,ການຄ້າກັບຕ່າງປະເທດຂອງຈີນໄດ້ຮັກສາທ່າອຽງທີ່ດີງາມ,ຈຳນວນຖ້ຽວບິນຂົນສົ່ງສິນຄ້າສາກົນສະເລ່ຍຕໍ່ມື້ໄດ້ເພີ່ມຂຶ້ນ 4,6% ເມື່ອທຽບໃສ່ໄລລະດຽວກັນຂອງປີກາຍ,ຄວາມຕ້ອງການສົ່ງອອກຜະລິດຕະພັນທີ່ມີມູນຄ່າເພີ່ມສູງ ທີ່ຖືຜະລິດຕະພັນເອເລັກໂຕຣນິກເປັນຕົວແທນນັ້ນ ໄດ້ຮັກສາຄວາມຟົດຟື້ນຢ່າງຕໍ່ເນື່ອງ,ຜະລິດຕະພັນທີ່ມີມູນຄ່າເພີ່ມສູງກຳລັງກາຍເປັນກຳລັງແຮງອັນເຂັ້ມແຂງແຂງທີ່ຂັບເຄື່ອນການສົ່ງອອກສິນຄ້າເພີ່ມຫຼາຍຂຶ້ນ.

12/07/2026

ຈີນເນັ້ນໜັກວ່າ: ວຽກງານດ້ານການສ້າງສາສັນຕິພາບຂອງອົງການສະຫະປະຊາຊາດຄວນຍຶດໝັ້ນການຖືເອົາການພັດທະນາເປັນບຸລິມະສິດ

ໃນເວລາສະມັດຊາໃຫຍ່ອົງການສະຫະປະຊາຊາດພິຈາລະນາຫົວຂໍ້ “ການສ້າງສາສັນຕິພາບ ແລະສັນຕິພາບຖາວອນ”ໃນຫວ່າງມໍ່ໆມານີ້, ທ່ານ ຊຸ່ນເຫຼີຍ ຮອງຜູ້ຕາງໜ້າຖາວອນຈີນປະຈໍາອົງການສະຫະປະຊາຊາດເນັ້ນໜັກວ່າ: ວຽກງານດ້ານການສ້າງສາສັນຕິພາບ ແລະສັນຕິພາບຖາວອນຂອງອົງການສະຫະປະຊາຊາດຄວນຍຶດໝັ້ນຖືເອົາການພັດທະນາເປັນບຸລິມະສິດ, ຊຸກຍູ້ໃຫ້ຊັບພະຍາກອນເຂົ້າສູ່ຂົງເຂດຊີວິດການເປັນຢູ່ຂອງປະຊາຊົນໃນດ້ານຕ່າງໆ ເຊັ່ນ: ການຫຼຸດຜ່ອນຄວາມທຸກຍາກ, ການສຶກສາ, ການປະກອບອາຊີບ, ການແພດ, ສາທາລະນະສຸກ, ການບໍລິການສາທາລະນະ ແລະອື່ນໆ, ເຮັດໃຫ້ປະຊາຊົນສາມາດສໍາຜັດກັບຄວາມລໍ້າຄ່າຂອງສັນຕິພາບ ແລະຄວາມຫວັງແຫ່ງຊີວິດຢ່າງແທ້ຈິງ.
ທ່ານ ຊຸ່ນເຫຼີຍ ກ່າວວ່າ: ປັດຈຸບັນນີ້, ສະຖານະການດ້ານຄວາມໝັ້ນຄົງສາກົນມີຄວາມສັບສົນ ແລະຂ້ຽວຂາດ, ຄວາມຂັດແຍ້ງດ້ານພູມີປະເທດນັບມື້ນັບຮຸນແຮງຂຶ້ນ, ການປະທະກັນດ້ວຍກໍາລັງອາວຸດເກີດຂຶ້ນຢູ່ຫຼາຍແຫ່ງ, ຈໍານວນການປະທະກັນດ້ວຍກໍາລັງອາວຸດໃນປີ 2025 ໄດ້ສ້າງສະຖິຕິໃໝ່ຫຼັງສົງຄາມໂລກຄັ້ງທີ 2, ໜ້າທີ່ດ້ານການສ້າງສາສັນຕິພາບມີຄວາມຫຍ້ງຍາກລໍາບາກ. ຈີນແມ່ນຜູ້ສະໜັບສະໜູນທີ່ເດັດດ່ຽວໜຽວແໜ້ນ ແລະຜູ້ປະກອບສ່ວນທີ່ຕັ້ງໜ້າຂອງວຽກງານການສ້າງສາສັນຕິພາບຂອງອົງການສະຫະປະຊາຊາດຢ່າງສະເໝີຕົ້ນສະເໝີປາຍ, ໄດ້ຕັ້ງໜ້າຊ່ວຍເຫຼືອປະເທດຫຼັງປະທະກັນທີ່ກ່ຽວຂ້ອງມາໂດຍຕະຫຼອດໃນການສ້າງສາຄືນໃໝ່ ແລະຟື້ນຟູການພັດທະນາ. ຈີນຍິນດີຮ່ວມກັບປະຊາຄົມໂລກ, ອຸທິດສະຕິປັນຍາ ແລະກໍາລັງແຮງເຂົ້າໃນວຽກງານການສ້າງສາສັນຕິພາບ.

12/07/2026

ຜູ້ນຳສູງສຸດອີຣານອອກຖະແຫຼງການວ່າຈະແກ້ແຄ້ນ

ວັນທີ 11 ກໍລະກົດນີ້, ທ່ານ ໂມຈ໌ຕາບາ ຄາເມເນ ຜູ້ນຳສູງສຸດອີຣານໄດ້ອອກຖະແຫຼງການຜ່ານສື່ສັງຄົມອອນລາຍວ່າ: ຈະແກ້ແຄ້ນເພື່ອທ່ານ ອາລີ ຄາເມເນ ອະດີດຜູ້ນຳສູງສຸດອີຣານທີ່ໄດ້ເສຍຊີວິດ ແລະຜູ້ເສຍຊີວິດໃນສົງຄາມ 2 ຄັ້ງທີ່ເກີດຂຶ້ນໃນຫວ່າງມໍ່ໆມານີ້. ສົງຄາມ 2 ຄັ້ງທີ່ລະບຸໃນຖະແຫຼງການໝາຍເຖິງສົງຄາມທີ່ອາເມຣິກາ ແລະອິດສະຣາແອນໄດ້ກໍ່ຂຶ້ນຕໍ່ອີຣານໃນເດືອນມິຖຸນາປີກາຍ ແລະເດືອນກຸມພາປີນີ້. ເນື້ອໃນຖະແຫຼງການລະບຸຕື່ມວ່າ: ການແກ້ແຄ້ນແມ່ນຄວາມມຸ່ງຫວັງ ແລະມານະຈິດຂອງປະຊາຊົນອີຣານ, ຕ້ອງປາກົດຜົນເປັນຈິງໃຫ້ໄດ້.
ມື້ດຽວກັນ, ທ່ານ ໂມຮາມມັດ ບາເກີ ກາລີບາຟ ປະທານສະພາອີຣານກ່າວວ່າ: ຝ່າຍໂຈມຕີຜືນແຜ່ນດິນອີຣານ, ສັງຫານປະຊາຊົນອີຣານ ໂດຍສະເພາະແມ່ນທ່ານ ອາລີ ຄາເມເນ ຕ້ອງໄດ້ຖືກລົງໂທດ.
ນອກຈາກນີ້, ຕາມຂ່າວອີຣານລາຍງານວ່າ: ກ່ອນອາເມຣິກາປະຖິ້ມຈຸດຢືນຂອງຕົນໃນປັດຈຸບັນ, ອີຣານຈະບໍ່ດຳເນີນການເຈລະຈາໃດໆກັບອາເມຣິກາ.

12/07/2026

ເຮືອໄວຫຼົ້ມຈົມຢູ່ເກາະຟູກວັກ, ປະເທດຫວຽດນາມ ເຮັດໃຫ້ມີຜູ້ເສຍຊີວິດ 15 ຄົນ
ອີງຕາມຝ່າຍຫວຽດນາມແຈ້ງໃຫ້ຮູ້ໃນວັນທີ 11 ນີ້ວ່າ: ເຮືອໄວລຳໜຶ່ງໄດ້ຫຼົ້ມຈົມຢູ່ເຂດທະເລໃກ້ຄຽງເກາະຟູກວັກ ທາງພາກໃຕ້ຂອງຫວຽດນາມໃນມື້ດຽວກັນ, ປັດຈຸບັນໄດ້ເຮັດໃຫ້ມີຜູ້ເສຍຊີວິດແລ້ວ 15 ຄົນ.
ເຮືອໄວທີ່ເກີດເຫດນັ້ນ ໄດ້ບັນທຸກນັກທ່ອງທ່ຽວອິນເດຍ 32 ຄົນ, ລູກເຮືອ 3 ຄົນ ແລະ ພະນັກງານ 1 ຄົນ. ໃນປະມານ 13 ໂມງຂອງວັນທີ 11 ກໍລະກົດ, ເຮືອໄວລຳນີ້ໄດ້ຕິດຂັດກະທັນຫັນ ແລະ ຫຼົ້ມຈົມລົງນ້ຳ, ເຮັດໃຫ້ຜູ້ຄົນທັງໝົດເທິງເຮືອຕົກນ້ຳ.
ຕາມຂ່າວແຈ້ງວ່າ, ພະນັກງານຊ່ວຍເຫຼືອໄດ້ຄົ້ນພົບຜູ້ຄົນທັງໝົດ 36 ຄົນເທິງເຮືອແລ້ວ, ໃນນັ້ນເສຍຊີວິດ 15 ຄົນ ແລະ ລອດຊີວິດ 21 ຄົນ. ໃນຈຳນວນຜູ້ລອດຊີວິດ, ມີ 18 ຄົນບາດເຈັບໜັກ, ໄດ້ຖືກສົ່ງໄປປິ່ນປົວຢູ່ໂຮງໝໍແລ້ວ.

12/07/2026

ນະວັດຕະກຳດ້ານເຕັກໂນໂລຊີພະລັງງານໄຟຟ້າຂອງຈີນເປັນອັນດັບໜຶ່ງຂອງໂລກ
ຫວ່າງມໍ່ໆມານີ້ ເວທີປຶກສາຫາລືການເມືອງຂັ້ນສູງກ່ຽວກັບການພັດທະນາແບບຍືນຍົງຂອງອົງການສະຫະປະຊາຊາດ ໄດ້ເຜີຍແຜ່ບົດລາຍງານຄົ້ນຄວ້າ "ຕົວຊີ້ວັດການພັດທະນາພະລັງງານໄຟຟ້າທົ່ວໂລກ (2026)".
ບົດລາຍງານດັ່ງກ່າວ ໄດ້ປະເມີນລະດັບການພັດທະນາພະລັງງານໄຟຟ້າຂອງ 100 ປະເທດໃນທົ່ວໂລກຈາກສີ່ດ້ານ ຄື: ການຮັບປະກັນການສະໜອງ, ການບໍລິການຜູ້ຊົມໃຊ້, ສີຂຽວ-ກາກບອນຕ່ຳ ແລະ ນະວັດຕະກຳດ້ານເຕັກໂນໂລຊີ. ປະເທດທີ່ຢູ່ໃນອັນດັບໜຶ່ງຫາອັນດັບທີຫ້າໃນດ້ານລະດັບການພັດທະນາໂດຍລວມ ແມ່ນ: ແຟງລັງ, ຊູແອັດ, ສະວິສ, ຈີນ ແລະ ນອກແວ; ສຳລັບປະເທດຈີນແລ້ວ, ນະວັດຕະກຳດ້ານເຕັກໂນໂລຊີພະລັງງານໄຟຟ້າຢູ່ອັນດັບໜຶ່ງຂອງໂລກ, ລວມຍອດກຳລັງຕິດຕັ້ງພະລັງງານສະອາດ ກໍເປັນອັນດັບໜຶ່ງເຊັ່ນດຽວກັນ.
ບົດລາຍງານສະແດງໃຫ້ເຫັນວ່າ, ໃນປີ 2025 ລວມຍອດກຳລັງຕິດຕັ້ງພະລັງງານໃໝ່ໃນທົ່ວໂລກ ໄດ້ລື່ນກາຍ 3,95 ຕື້ກິໂລວັດ, ກວມເກືອບ 40% ຂອງລວມຍອດກຳລັງຕິດຕັ້ງພະລັງງານໄຟຟ້າໃນທົ່ວໂລກ.
ເຈົ້າໜ້າທີ່ຮັບຜິດຊອບວຽກງານທີ່ກ່ຽວຂ້ອງຂອງອົງການສະຫະປະຊາຊາດກ່າວວ່າ, ພະລັງງານແມ່ນພື້ນຖານຂອງການພັດທະນາແບບຍືນຍົງ, ບັນດາປະເທດຄວນເລັ່ງລັດການປະດິດສ້າງໃໝ່ໃນເຕັກໂນໂລຊີພະລັງງານ ແລະ ການເຊື່ອມຈອດເຄືອຂ່າຍໄຟຟ້າ, ສະໜອງການຊ່ວຍເຫຼືອດ້ານນະໂຍບາຍ ແລະ ເຕັກໂນໂລຊີໃຫ້ແກ່ປະເທດກຳລັງພັດທະນາ, ຊຸກຍູ້ການຫັນປ່ຽນດ້ານພະລັງງານທີ່ຍຸດຕິທຳ ແລະ ກວມລວມ.

12/07/2026

ປະທານປະເທດ ເຂົ້າຮ່ວມພິທີປ່ອຍສັດນໍ້າຄືນສູ່ທໍາມະຊາດ
ເນື່ອງໃນໂອກາດວັນປ່ອຍປາ ແລະ ສັດນ້ຳ ແຫ່ງຊາດ ວັນທີ 13 ກໍລະກົດ 2026, ກະຊວງກະສິກຳ ແລະ ສິ່ງແວດລ້ອມ ຮ່ວມກັບ ອົງການປົກຄອງນະຄອນຫຼວງ
ວຽງຈັນໄດ້ຈັດພິທີສະເຫຼີມສະຫຼອງ ວັນປ່ອຍປາ ແລະ ສັດນ້ຳ ແຫ່ງຊາດ ປະຈຳປີ 2026 ຂຶ້ນຢ່າງເປັນທາງການ ໃນວັນທີ 11 ກໍລະກົດນີ້ ທີ່ໜອງໃຫຍ່ບຶງທາດຫຼວງ (ເຂດເສດຖະກິດພິເສດ) ເມືອງໄຊເສດຖາ ນະຄອນຫຼວງວຽງ
ຈັນ ໃຫ້ກຽດເຂົ້າຮ່ວມໂດຍ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ.
ໃນພິທີ, ທ່ານ ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະ ສິ່ງແວດລ້ອມ ໄດ້ຂຶ້ນລາຍງານວ່າ: ພັກ ແລະ ລັດຖະບານ ໄດ້ກຳນົດເອົາວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາ ແລະ ສັດນ້ຳແຫ່ງຊາດ ມາແຕ່ປີ 1997 ຊຶ່ງປີນີ້ຄົບຮອບ 29 ປີ. ວັນດັ່ງກ່າວ ຍັງກົງກັບວັນເກີດ ຂອງປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວ.
ສໍາລັບການຈັດກິດຈະກຳໃນປີ 2026 ນີ້, ຂະແໜງການ ກະສິກຳ ແລະ ສິ່ງແວດລ້ອມ ໄດ້ຊຸກຍູ້ໃຫ້ທຸກພາກສ່ວນ ທັງພາກລັດ ແລະ ເອກະຊົນ ໃນທົ່ວປະເທດ ຮ່ວມກັນຈັດ ກິດຈະກຳປ່ອຍປາ ແລະ ສັດນໍ້າໃຫ້ໄດ້ຫຼາຍກວ່າ 72 ລ້ານໂຕ. ພາຍໃຕ້ຄຳຂວັນ: “ຈົ່ງພ້ອມກັນປ່ອຍປາ ແລະ ສັດນໍ້າ ຄືນສູ່ທຳມະຊາດ ໃຫ້ມີຄວາມອຸດົມສົມບູນ ຕະຫຼອດໄປ” ແລະ “ການປົກປັກຮັກສາປາ ແລະ ສັດນໍ້າ ແມ່ນພັນທະ ຂອງທົ່ວປວງຊົນທັງຊາດ”.
ສະເພາະພິທີທີ່ຈັດຂຶ້ນຢູ່ໜອງໃຫຍ່ບຶງທາດຫຼວງໃນຄັ້ງນີ້, ໄດ້ມີການປ່ອຍປາຈໍານວນ 1 ລ້ານກວ່າໂຕ ຊຶ່ງປະກອບ ມີ: ປາປາກ, ປານວນຈັນ, ປາເພ້ຍ, ປາກົດ, ປາເຄິງ ແລະ ປາພື້ນເມືອງອື່ນໆ ທີ່ໄດ້ຮັບການສະໜັບສະໜູນມາຈາກ ສູນພັດທະນາການປະມົງນໍ້າຊ່ວງ, ສູນຄົ້ນຄວ້າການປະມົງ ໜອງແຕ່ງ, ສູນຫ້ວຍຊອນ-ຫ້ວຍຊົ້ວ, ສູນບໍລິການ ເຕັກນິກກະສິກຳ ລາວ-ເກົາຫຼີ ແລະ ສູນສະຖານີຕ່າງໆ.
ຂ່າວ:ປະຊາຊົນ

11/07/2026

ສາທາ ເລີ່ມຕົ້ນໂຄງການປ່ອຍຍຸງໂວບັກເຄຍ ເພື່ອຄວບຄຸມພະຍາດໄຂ້ຍຸງລາຍຢ່າງມີປະສິດທິພາບ
ວັນທີ 11 ກໍລະກົດ ກະຊວງສາທາລະນະສຸກ ຮ່ວມກັບບັນດາພາກສ່ວນກ່ຽວຂ້ອງ ໄດ້ຈັດພິທີປ່ອຍຍຸງໂວບັກເຄຍ (Wolbachia) ຢ່າງເປັນທາງການ ທີ່ນະຄອນຫຼວງພະບາງ, ເພື່ອເປັນນະວັດຕະກໍາໃໝ່ໃນການຫຼຸດຜ່ອນການແຜ່ເຊື້ອພະຍາດໄຂ້ຍຸງລາຍໃນຊຸມຊົນ. ໃຫ້ກຽດເຂົ້າຮ່ວມໃນພິທີມີ ທ່ານ ນາງ ໃບຄຳ ຂັດທິຍະ, ລັດຖະມົນຕີກະຊວງສາທາລະນະສຸກ.
ໃນປັດຈຸບັນ, ພະຍາດໄຂ້ຍຸງລາຍຍັງຄົງເປັນບັນຫາສາທາລະນະສຸກທີ່ສົ່ງຜົນກະທົບຕໍ່ຫຼາຍຄອບຄົວໃນ ສປປ ລາວ ໂດຍສະເພາະໃນລະດູຝົນ. ການນຳໃຊ້ຍຸງໂວບັກເຄຍ ແມ່ນວິທີການທີ່ໄດ້ຮັບຜົນສຳເລັດມາແລ້ວໃນຫຼາຍປະເທດ. ຍຸງໂວບັກເຄຍ ແມ່ນຍຸງທີ່ບໍ່ສາມາດແຜ່ເຊື້ອພະຍາດດັ່ງກ່າວໄດ້. ເມື່ອປ່ອຍສູ່ທຳມະຊາດ ພວກມັນຈະໄປສືບພັນກັບຍຸງລາຍບ້ານ, ເຮັດໃຫ້ປະຊາກອນຍຸງລາຍໃນອະນາຄົດບໍ່ສາມາດແຜ່ເຊື້ອໄດ້ອີກ.
ທ່ານ ນາງ ໃບຄຳ ຂັດທິຍະ ໄດ້ເນັ້ນໜັກໃນພິທີວ່າ: “ພະຍາດໄຂ້ຍຸງລາຍ ເປັນໄພຄຸກຄາມຕໍ່ຊີວິດການເປັນຢູ່ຂອງປະຊາຊົນໃນທົ່ວໂລກ. ການລິເລີ່ມໂຄງການປ່ອຍຍຸງໂວບັກເຄຍ ແມ່ນນະວັດຕະກໍາໃໝ່ທີ່ມີຜົນສຳເລັດດີໃນຫຼາຍປະເທດ ແລະ ເປັນຄວາມຫວັງໃໝ່ໃນການຄວບຄຸມພະຍາດໄຂ້ຍຸງລາຍຢ່າງມີປະສິດທິພາບຢູ່ ສປປ ລາວ”.
ພາຍຫຼັງສຳເລັດພິທີທາງການ, ບັນດາການນຳ ແລະ ຜູ້ເຂົ້າຮ່ວມໄດ້ຮ່ວມກັນປ່ອຍຍຸງໂວບັກເຄຍສູ່ພື້ນທີ່ສາທາລະນະ ເຊິ່ງຈະມີການສືບຕໍ່ຂະຫຍາຍໄປສູ່ເຂດຊຸມຊົນຕ່າງໆໃນນະຄອນຫຼວງພະບາງ ເພື່ອສ້າງຄວາມປອດໄພ ແລະ ປົກປ້ອງສຸຂະພາບຂອງປະຊາຊົນຈາກໄພພະຍາດໄຂ້ຍຸງລາຍຢ່າງຍືນຍົງ.
ຂ່າວ: ຫຼວງພະບາງ

CMG FM93

12/07/2026

12/07/2026

12/07/2026

12/07/2026

12/07/2026

12/07/2026

12/07/2026

12/07/2026

12/07/2026

11/07/2026

Address

Telephone

Website

Alerts

Shortcuts

Share

Category

Listing takedown request