Econews Laos, Vientiane (2026)

24/08/2026

📢 ສຳເລັດຢ່າງຈົບງາມ! ຫຼັກສູດການເຝິກອົບຮົມ "Lao Youth on a Mission for Nature Conservation 2026" (Cohort 3) 🌿🐒
ໂຄງການ "ຊາວໜຸ່ມລາວ ໃນພາລະກິດປົກປັກຮັກສາທຳມະຊາດ" ຫຼື Lao Youth on a Mission for Nature Conservation (LYoM) 2026 ເຊິ່ງຈັດຂຶ້ນໂດຍການຮ່ວມມືກັນລະຫວ່າງ Association Anoulak (ສາມາຄົມອະນຸລັກ) ແລະ Econox Laos ເຊິ່ງໄດ້ຮັບການສະໜັບສະໜຸນຈາກ Wilhelma Zoologisch-Botanischer Garten Stuttgart ແລະ Denver Zoo Conservation Alliance ໄດ້ດຳເນີນການເຝິກອົບຮົມຢ່າງເຂັ້ມຂຸ້ນ ແລະ ສໍາເລັດລົງຢ່າງເປັນທາງການໃນລະຫວ່າງວັນທີ 3 ຫາ 9 ສິງຫາ 2026 ທີ່ຜ່ານມາ.

ຫຼັງຈາກນີ້, ນ້ອງໆຜູ້ເຂົ້າຮ່ວມຈະໄດ້ສືບຕໍ່ຂັ້ນຕອນການເຝິກງານ ຢູ່ບັນດາອົງການຄູ່ຮ່ວມງານ ທີ່ໄດ້ມາເປັນວິທະຍາກອນແລກປ່ຽນຄວາມຮູ້ ຕະຫຼອດໄລຍະການເຝິກອົບຮົມ 1 ອາທິດທີ່ຜ່ານມາ.

ຫຼັກສູດໃນປີທີ 3 ນີ້ ແມ່ນໄດ້ສຸມໃສ່ການເພີ່ມພູນຄວາມຮູ້, ທັກສະພາກສະໜາມ, ການເປັນຜູ້ນຳ ແລະ ການສ້າງເຄືອຂ່າຍຮ່ວມກັບອົງການອະນຸລັກຊັ້ນນຳ ເພື່ອໃຫ້ຊາວໜຸ່ມນັກອະນຸລັກຮຸ່ນໃໝ່ ໄດ້ຮຽນຮູ້ຢ່າງຮອບດ້ານ.

📖 ເນື້ອໃນຫຼັກສູດ ແລະ ກິດຈະກຳການຮຽນຮູ້ (3-9 ສິງຫາ 2026)
3 ສິງຫາ 2026:
- ຫຼັກສູດ 01: ສິ່ງທ້າທາຍ ແລະ ໂອກາດດ້ານສິ່ງແວດລ້ອມ ໃນ ສປປ ລາວ (Environmental Challenges & Opportunities in Lao PDR), ການແລກປ່ຽນຄວາມຄາດຫວັງ ແລະ ການສ້າງ Vision Board ໂດຍ Econox Laos.
- ຫຼັກສູດ 02: ການຄິດຢ່າງເປັນລະບົບ ເພື່ອແກ້ໄຂບັນຫາສິ່ງແວດລ້ອມ (Systems Thinking for Environmental Problems) ໂດຍ Katalyst Partners.

4 ສິງຫາ 2026:
- ຫຼັກສູດ 03-04: ກິດຈະກຳ ເຄື່ອງມືການຮຽນຮູ້ Climate Fresk ແລະ ການແລກປ່ຽນໃນຫົວຂໍ້ ສິ່ງແວດລ້ອມ ແລະ ພຸດທະສາສະໜາ (Environment and Buddhism talk) ໂດຍ RGEN - Lao Sustainable Futures

5 ສິງຫາ 2026:
- ຫຼັກສູດ 05: ການຄ້າຂາຍສັດປ່າຜິດກົດໝາຍ ແລະ ຜົນກະທົບຕໍ່ຊີວະນາໆພັນ ແລະ ບໍລິບົດທາງສັງຄົມ (Illegal Wildlife Trade and its impacts on Biodiversity and Society) ໂດຍ WCS Lao PDR ອົງການອະນຸລັກສັດປ່າ ປະຈຳ ສປປ ລາວ.
- ຫຼັກສູດ 06: ຈາກນໂຍບາຍສູ່ການປະຕິບັດ: ຂັ້ນຕອນການຕັດສິນໃຈດ້ານການອະນຸລັກ ໃນ ສປປ ລາວ (From Policy to Practice: How conservation decisions are made in Lao PDR) ໂດຍ ອົງການ IUCN Laos.

6 ສິງຫາ 2026:
- ຫຼັກສູດ 07: ການອະນຸລັກໝີ ໃນ ສປປ ລາວ: ອາຊະຍາກຳຕໍ່ວຽກງານສັດປ່າ, ສະຫວັດດີພາບ ແລະ ຄວາມຮັບຜິດຊອບຂອງສັງຄົມ (Bear Conservation in Laos: Wildlife Crime, welfare, and public Responsibility) ໂດຍ ອົງການ Free the Bears.
- ຫຼັກສູດ 08: ວຽກງານຊ່ວຍເຫຼືອ ແລະ ການອະນຸລັກຊ້າງ (Elephant rescue and conservation efforts) ໂດຍ ສູນອະນຸລັກຊ້າງ (Elephant Conservation Center).

7 ສິງຫາ 2026:
- ຫຼັກສູດ 09: ລະບົບນິເວດນ້ຳຈືດ ແລະ ປ່າໄມ້ ໃນ ສປປ ລາວ: ການປົກປັກຮັກສາຮາກຖານແຫ່ງຊີວິດ (Freshwater and Forest Ecosystems in Laos: Protecting the foundations of life) ໂດຍ ອົງການ WWF-Laos.
- ຫຼັກສູດ 10: ການກອບກູ້ສາຍພັນທີ່ຫາຍາກທີ່ສຸດ: ການຟື້ນຟູສາຍພັນ, ການຄົ້ນຄວ້າພາກສະໜາມ ແລະ ການອຸທິດຕົນໃນວຽກງານການອະນຸລັກ (Saving the Rarest: Species recovery, field Research, and conservation priorities) ໂດຍ ມູນນິທິ ເສົາຫຼາ ເພື່ອການອະນຸລັກ ພູຫຼວງ (Saola Foundation for Annamite Mountains Conservation).

8 ສິງຫາ 2026:
- ຫຼັກສູດ 11: ຄວາມຮູ້ດ້ານການເງິນ: ການຄຸ້ມຄອງການເງິນສ່ວນບຸກຄົນ ແລະ ໂຄງການ (Financial Literacy: personal and project finance management) ໂດຍ ທ່ານ ນາງ ດາລາເພັດ ແສງສຸລີວົງ.
- ງານພົບປະໂອ້ລົມຂອງນັກອະນຸລັກ ຄັ້ງທີ 2 ເຊິ່ງປະກອບມີ ເວທີບັນຍາຍຂອງສິດເກົ່າໂຄງການ, ເວທີເສວະນາຈາກຊ່ຽວຊານນັກອະນຸລັກ, ການສາຍຮູບເງົາສິ່ງແວດລ້ອມ, ບູດນິທັດສະການ ແລະ ການສ້າງເຄືອຂ່າຍ.

9 ສິງຫາ 2026:
ການລົງທັດສະນະສຶກສາພາກສະໜາມ ກ່ຽວກັບວຽກງານຊ່ວຍເຫຼືອສັດປ່າ, ສູນອະນຸລັກ ແລະ ການໃຫ້ຄວາມຮູ້ ຢູ່ທີ່ ມູນນິທິອະນຸລັກສັດປ່າລາວ (Lao Conservation Trust for Wildlife - LCTW).

🎯 ວິໄສທັດ ແລະ ອະນາຄົດ ໂຄງການ LYoM ມຸ່ງໝັ້ນທີ່ຈະຈັດຕັ້ງປະຕິບັດຢ່າງຕໍ່ເນື່ອງໃຫ້ໄດ້ໃນທຸກໆປີ ເພື່ອເປັນການສ້າງເຄືອຂ່າຍຊາວໜຸ່ມ ແລະ ນັກວິຊາການຮຸ່ນໃໝ່ຂອງ ສປປ ລາວ ໃຫ້ມີຄວາມເຕີບໃຫຍ່, ມີທັກສະພາກປະຕິບັດງານຕົວຈິງ ແລະ ພ້ອມທີ່ຈະກ້າວຂຶ້ນມາເປັນຜູ້ນຳໃນການປົກປັກຮັກສາມໍລະດົກທາງທຳມະຊາດຂອງຊາດຢ່າງຍືນຍົງ.

ຂໍສະແດງຄວາມຍິນດີ ແລະ ຊົມເຊີຍຜູ້ເຂົ້າຮ່ວມ ໃນປີທີ 3 ທຸກໆທ່ານ ທີ່ໄດ້ສຳເລັດຫຼັກສູດໃນຄັ້ງນີ້! 💚🌏

20/08/2026

🚨 ອັບເດດດ່ວນ! ລະດັບນ້ຳ ເຊໂດນ ແລະ ນ້ຳຂອງ ຢູ່ນະຄອນປາກເຊ ກາຍເຂດອັນຕະລາຍແລ້ວ (20 ສິງຫາ 2026).

ອ້າງອີງຈາກລາຍງານຂອງອຸຕຸນິຍົມວິທະຍາ ແຂວງຈຳປາສັກ, ປະຈຸບັນລະດັບນ້ຳຢູ່ ນະຄອນປາກເຊ ໄດ້ເພີ່ມຂຶ້ນຢ່າງໄວວາ ແລະ ໄດ້ທະລຸ ເຂດອັນຕະລາຍ (Red Danger Zone) ແລ້ວ!

⚠️ ການລາຍງານລະດັບນ້ຳ ເວລາ 07:00 ໂມງ ເຫັນວ່າ 2 ຈຸດແມ່ນ ທະລຸເຂດອັນຕະລາຍແລ້ວ ກໍຄືຈຸດຂົວປາກເຊເຊິ່ງລະດັບນ້ຳປະຈຸບັນແມ່ນ 12.11 ແມັດ ເຊິ່ງເພີ່ມຂຶ້ນ 1.59 ແມັດ ໃນ 24 ຊົ່ວໂມງ ແລະ ນ້ຳເຊໂດນ ແທກຈາກຈຸດຂົວສຸພານຸວົງ ລະດັບນ້ຳປະຈຸບັນ 11.84 ແມັດ ເຊິ່ງເພີ່ມຂຶ້ນສູງເຖິງ 3.20 ແມັດ.

💡 ຄຳແນະນຳ ແລະ ຂໍ້ຄວນປະຕິບັດ:
- ເຂດພື້ນຕ່ຳ ແລະ ແຄມຝັ່ງ: ປະຈຸບັນ ນ້ຳໄດ້ຍື່ງຂຶ້ນຖ້ວມຫຼາຍເຂດພື້ນທີ່ຕ່ຳຢູ່ ນະຄອນປາກເຊເເລ້ວ. ໃຫ້ປະຊາຊົນຢູ່ແຄມຝັ່ງນ້ຳເຊ ແລະ ນ້ຳຂອງ ຮີບຟ້າວຍ້າຍເຄື່ອງຂອງມີຄ່າ, ສັດລ້ຽງ, ແລະ ອຸປະກອນໄຟຟ້າ ຂຶ້ນບ່ອນສູງດ່ວນ!
- ຕິດຕາມຂ່າວສານ: ເຝົ້າລະວັງ ແລະ ຕິດຕາມການແຈ້ງເຕືອນຈາກທາງການຢ່າງໃກ້ຊິດ ຕະຫຼອດ 24 ຊົ່ວໂມງ.

#ແຈ້ງເຕືອນນ້ຳຖ້ວມ #ປາກເຊ #ນ້ຳເຊໂດນ #ນ້ຳຂອງ

19/08/2026

🚨 ດ່ວນ! ມີແຈ້ງເຕືອນຄວາມສ່ຽງສູງທີ່ຈະເກີດນ້ຳຖ້ວນ ແລະ ນ້ຳປ່າໄຫຼຫຼາກ ໃນ 24 ຊົ່ວໂມງຂ້າງໜ້າ ໃນປະເທດອາຊີຕາເວັນອອກສ່ຽງໃຕ້ ແລະ ຫຼາຍແຫ່ງໃນ ສປປ ລາວ.

ຄະນະກຳມາທິການແມ່ນ້ຳຂອງ (MRC) ໄດ້ອອກແຈ້ງເຕືອນຄວາມສ່ຽງສູງ (High Risk) ທີ່ຈະເກີດນ້ຳຖ້ວມ (Flash Flood) ໃນລະຫວ່າງວັນທີ 19 ຫາ 20 ສິງຫາ 2026 ເນື່ອງຈາກຝົນຕົກໜັກຢ່າງຕໍ່ເນື່ອງ ເຮັດໃຫ້ດິນຢູ່ໃນຫຼາຍເຂດອີ່ມໂຕ.

📍ເຂດ ແລະ ເມືອງທີ່ມີຄວາມສ່ຽງສູງໃນລາວ:
1. ແຂວງວຽງຈັນ: ເມືອງເຟືອງ, ກາສີ, ເມັດ, ໂພນໂຮງ, ວັງວຽງ, ນາຊາຍທອງ (ນະຄອນຫຼວງ)
2. ບໍລິຄຳໄຊ: ບໍລິຄັນ, ຄຳເກີດ, ວຽງທອງ
3. ຄຳມ່ວນ: ບົວລະພາ, ຫີນບູນ, ມະຫາໄຊ, ນາກາຍ, ຍົມມະລາດ, ໜອງບົກ, ທ່າແຂກ, ໄຊບົວທອງ
4. ສະຫວັນນະເຂດ: ຈຳພອນ, ຂັນທະບູລີ, ນອງ, ອຸທຸມພອນ, ພີນ, ເຊໂປນ, ສອງຄອນ, ທ່າປາງທອງ, ວິລະບູລີ, ໄຊບູລີ, ຊົນນະບູລີ
5. ສາລະວັນ: ຄົງເຊໂດນ, ເຫຼົ່າງາມ, ຕະໂອ້ຍ, ຕຸ້ມລານ, ວາປີ
6. ອັດຕະປື: ສະໜາມໄຊ, ຊານໄຊ
7. ຈຳປາສັກ: ບາຈຽງ, ປາກຊ່ອງ, ຊະນະສົມບູນ
8. ເຊກອງ: ດັກຈຶງ, ກະລຶມ
9. ໄຊສົມບູນ: ລ້ອງຊານ
10. ໄຊຍະບູລີ: ພຽງ
11. ຫຼວງນ້ຳທາ: ລອງ
12. ອຸດົມໄຊ: ຮຸນ
13. ບໍ່ແກ້ວ: ຫ້ວຍຊາຍ

⚠️ ຂໍ້ຄວນປະຕິບັດ:
ເຝົ້າລະວັງຢ່າງໃກ້ຊິດ ໂດຍສະເພາະເຂດຮ່ອມພູ, ໄກ້ຄຽງຫ້ວຍນ້ຳ ແລະ ເຂດທີຕ່ຳ. ກະກຽມເຄື່ອງຂອງມີຄ່າ ແລະ ອຸປະກອນສຸກເສີນໄວ້ບ່ອນປອດໄພ ພ້ອມທັງຕິດຕາມຂ່າວສານ ແລະ ປະຕິບັດຕາມຄຳແນະນຳຂອງເຈົ້າໜ້າທີ່ທ້ອງຖິ່ນຢ່າງເຂັ້ມງວດ.

#ແຈ້ງເຕືອນນ້ຳຖ້ວນ

15/07/2026

[ບົດຄວາມວິເຄາະ]
ຖອດບົດຮຽນຈາກສັງຄົມໂລກ: ຜົນສຳເລັດໃນການຕ້ານວິກິດການມົນລະພິດຂີ້ເຫຍື້ອປລາສຕິກຈາກຕ່າງປະເທດ ສູ່ແນວທາງການປ່ຽນແປງໃນລາວ.

❗️ບັນຫາຂີ້ເຫຍື້ອ ແລະ ມົນລະພິດຈາກປລາສຕິກ ບໍ່ແມ່ນພຽງແຕ່ສິ່ງທ້າທາຍທາງສິ່ງແວດລ້ອມທີ່ປະເທດລາວພວມຜະເຊີນຢູ່ ແຕ່ຫາກເປັນວິກິດການລະດັບສາກົນ ແລະ ຫຼາຍໆປະເທດທົ່ວໂລກກໍ ກຳລັງເລັ່ງຫາທາງອອກຢ່າງຮີບດ່ວນ. ໂດຍສະເພາະໃນເດືອນນີ້, ເດືອນກໍລະກົດປາສະຈາກປລາສຕິກ ຫຼື “Plastic Free July”, ຈາກກໍລະນີສຶກສາ ແລະ ຖອດຖອນບົດຮຽນທີ່ປະສົບຜົນສຳເລັດໃນຕ່າງປະເທດ ອາດຈະເປັນກະແຈສຳຄັນໃນການຊ່ວຍໃຫ້ພວກເຮົາໄດ້ຮຽນຮູ້ ແລະ ນຳມາປັບໃຊ້ເພື່ອວາງແຜນຍຸດທະສາດການຈັດການຂີ້ເຫຍື້ອປລາສຕິກໃນບ້ານເຮົາຕັ້ງແຕ່ຕົ້ນທາງເພື່ອໃຫ້ມີຄວາມຍືນຍົງ.

♻️ໃນລະດັບພາກພື້ນອາຊຽນ, ປະເທດຟິລິບປິນ ຖືເປັນກໍລະນີສຶກສາທີ່ໜ້າສົນໃຈໃນການນຳໃຊ້ກົນໄກທາງກົດໝາຍເພື່ອຄວບຄຸມຂີ້ເຫຍື້ອປລາສຕິກຈາກພາກທຸລະກິດ. ຜ່ານການປະກາດໃຊ້ກົດໝາຍວ່າດ້ວຍຄວາມຮັບຜິດຊອບທີ່ເພີ່ມຂຶ້ນຂອງຜູ້ຜະລິດ ຫຼື Extended Producer Responsibility (EPR) Act, ລັດຖະບານໄດ້ບັງຄັບໃຫ້ບໍລິສັດຂະໜາດໃຫຍ່ຕ້ອງມີຄວາມຮັບຜິດຊອບໃນການເກັບກຳ ແລະ ນຳຂີ້ເຫຍື້ອປລາສຕິກທີ່ຕົນເອງຜະລິດອອກສູ່ຕະຫຼາດກັບຄືນມາຣີໄຊໂຄ ຫຼື ຈັດການຢ່າງຖືກຕ້ອງຕາມເປົ້າໝາຍທີ່ກຳນົດໄວ້ໃນແຕ່ລະປີ. ນອກຈາກນີ້, ຍັງມີການເປີດໂຕ "ຄູ່ມືກົນລະຍຸດການສື່ສານເພື່ອການປ່ຽນແປງພຶດຕິກຳ" (Regional Behavior Change Communications ຫຼື BCC Strategy Playbook on Plastic and Plastic Waste in ASEAN) ໂດຍການຮ່ວມມືໃນພາກພື້ນ ເພື່ອປ່ຽນແນວຄິດຜູ້ບໍລິໂພກໃຫ້ຫຼຸດການໃຊ້ປລາສຕິກທີ່ໃຊ້ຄັ້ງດຽວຖິ້ມ ແລະ ຫັນມາຄັດແຍກຂີ້ເຫຍື້ອໃນລະດັບຄົວເຮືອນ ເຊິ່ງຊ່ວຍຫຼຸດຜ່ອນການຮົ່ວໄຫຼຂອງສິ່ງເສດເຫຼືອເຫຼົ່ານີ້ສູ່ລະບົບນິເວດທາງນ້ຳໄດ້ຢ່າງຫຼວງຫຼາຍ.

♻️ເມື່ອຂະຫຍາຍໄປສູ່ລະດັບສາກົນ, ປະເທດສະຫະລັດອາເມລິກາ ພວມມີການຂະຫຍາຍຕົວຢ່າງຮ່ວມສະໄໝຂອງນະວັດຕະກຳ "ເສດຖະກິດໝູນວຽນແບບລະບົບປິດ" (Closed-loop Circular Economy) ຜ່ານລະບົບ (platform) ທີ່ຊື່ວ່າ "USEFULL". ໂຄງການນີ້ໄດ້ປ່ຽນແນວຄິດການໃຊ້ກ່ອງປລາສຕິກ ຫຼື ຈອກປລາສຕິກແບບໃຊ້ຄັ້ງດຽວຖິ້ມໃນຮ້ານອາຫານ ແລະ ສະຖາບັນຕ່າງໆ ມາເປັນລະບົບ "ຢືມ-ຄືນພາຊະນະສະແຕນເລດ" ທີ່ທົນທານ. ຜູ້ບໍລິໂພກສາມາດຢືມພາຊະນະໄປໃຊ້ແລ້ວນຳມາຄືນໄວ້ຕາມຈຸດຕ່າງໆ ເພື່ອໃຫ້ນຳໄປລ້າງ ແລະ ໝູນວຽນໃຊ້ໃໝ່. ວິທີການນີ້ບໍ່ພຽງແຕ່ຊ່ວຍຫຼຸດປະລິມານຂີ້ເຫຍື້ອປລາສຕິກໄດ້ເປັນຈຳນວນມະຫາສານ, ແຕ່ຍັງຊ່ວຍຫຼຸດຕົ້ນທຶນການຈັດຊື້ບັນຈຸພັນຂອງຮ້ານຄ້າ ແລະ ປົກປ້ອງຜູ້ບໍລິໂພກຈາກການສະສົມຂອງສານເຄມີອັນຕະລາຍໃນປລາສຕິກໄດ້ອີກດ້ວຍ. ນອກຈາກການປ່ຽນແປງລະບົບການບໍລິການແລ້ວ, ກໍລະນີສຶກສາດ້ານການພັດທະນາວັດສະດຸທົດແທນຈາກ ບໍລິສັດນະວັດຕະກຳສາກົນເຊັ່ນ Sway ກໍເປັນອີກໜຶ່ງບາດກ້າວທີ່ສຳຄັນ. ພວກເຂົາປະສົບຜົນສຳເລັດໃນການພັດທະນາ "ບັນຈຸພັນຈາກສາຫຼ່າຍທະເລ" (Seaweed-based packaging) ທີ່ສາມາດນຳມາໃຊ້ທົດແທນແຜ່ນປລາສຕິກໃສ (Plastic film) ທີ່ນິຍົມໃຊ້ຫໍ່ຫຸ້ມສິນຄ້າ. ວັດສະດຸທົດແທນນີ້ມີຄວາມຍືດຫຍຸ່ນ, ປອດໄພຈາກສານພິດ, ແລະ ທີ່ສຳຄັນຄືສາມາດຍ່ອຍສະຫຼາຍໄດ້ເອງຕາມທຳມະຊາດພາຍໃນເວລາບໍ່ເທົ່າໃດອາທິດ ໂດຍບໍ່ຖິ້ມສານຕົກຄ້າງ ຫຼື ໄມໂຄຣປລາສຕິກໄວ້ໃນສິ່ງແວດລ້ອມ.

🤔ແລ້ວພວກເຮົາສາມາດຖອດຖອນບົດຮຽນ ແລະ ນຳມາປະຕິບັດໃນລາວໄດ້ແນວໃດ?

🇱🇦 ເຖິງແມ່ນວ່າປະເທດລາວເຮົາຈະບໍ່ແມ່ນປະເທດອຸດສາຫະກຳຂະໜາດໃຫຍ່ ແຕ່ປະລິມານຂີ້ເຫຍື້ອປລາສຕິກໃນຕົວເມືອງກໍພວມເພີ່ມຂຶ້ນຢ່າງໄວວາ ແລະ ຂີ້ເຫຍື້ອໃນແມ່ນ້ຳສ່ວນໃຫຍ່ກໍແມ່ນປລາສຕິກແບບໃຊ້ຄັ້ງດຽວຖິ້ມ. ຈາກການສຶກສາທົດລອງຢູ່ບັນດາປະເທດທີ່ກ່າວມາຂ້າງເທິງ ສະທ້ອນໃຫ້ເຮົາເຫັນວ່າການແກ້ໄຂບັນຫາທີ່ຍືນຍົງບໍ່ແມ່ນການໄລ່ເກັບຂີ້ເຫຍື້ອຢູ່ປາຍເຫດ, ແຕ່ຫາກແມ່ນການ "ປິດກັອກ" ຈາກຕົ້ນທາງ ໂດຍສິ່ງທີ່ພວກເຮົາສາມາດເລີ່ມປະຕິບັດໃນລາວ ມີດັ່ງນີ້:

1. ການນຳໃຊ້ລະບົບໝູນວຽນພາຊະນະ (Reuse/Refill). ຮ້ານອາຫານ ແລະ ຄາເຟ່ໃນລາວ ສາມາດນຳເອົາຮູບແບບການຢືມ-ຄືນ ຫຼື ການຊຸກຍູ້ໃຫ້ລູກຄ້ານຳພາຊະນະສ່ວນໂຕມາເອງມາປັບໃຊ້ (ຄືກັນກັບໂຄງການ "Rent Your Cup" ຫຼື ປ້າຍຢັ້ງຢືນ "Plastic Free Laos Label" ທີ່ທາງ Econox Laos ພວມຊຸກຍູ້).
2. ການຫັນມາໃຊ້ວັດສະດຸຈາກທຳມະຊາດໃນທ້ອງຖິ່ນ. ແທນທີ່ຈະລໍຖ້ານະວັດຕະກຳລາຄາແພງຈາກຕ່າງປະເທດ, ລາວເຮົາມີຕົ້ນທຶນທຳມະຊາດທີ່ອຸດົມສົມບູນ ເຊັ່ນ: ໃບຕອງ, ໄມ້ໄຜ່, ແລະ ຫວາຍ ທີ່ສາມາດນຳມາອອກແບບເປັນບັນຈຸພັນທົດແທນປລາສຕິກໄດ້ເປັນຢ່າງດີ.
3. ການຊຸກຍູ້ຄວາມຮັບຜິດຊອບຂອງພາກທຸລະກິດ. ຮ່ວມກັນສະໜັບສະໜູນແນວຄິດແຜນປະຕິບັດງານດ້ານປລາສຕິກແຫ່ງຊາດ (National Plastics Action Plan) ເພື່ອໃຫ້ຮ້ານຄ້າຂາຍຍ່ອຍ ແລະ ຜູ້ຜະລິດໃນລາວ ເລີ່ມມີສ່ວນຮັບຜິດຊອບໃນການຫຼຸດຜ່ອນການແຈກຖົງຢາງ ແລະ ຄັດແຍກຂີ້ເຫຍື້ອຢ່າງເປັນລະບົບ.

♻️ເຖິງແມ່ນວ່າການປ່ຽນແປງພຶດຕິກຳໃນເດືອນກໍລະກົດປາສະຈາກປລາສຕິກ (Plastic Free July) ນີ້ ຈະເລີ່ມຕົ້ນຈາກຈຸດນ້ອຍໆ ແຕ່ຫາກທຸກພາກສ່ວນຮ່ວມມືກັນ ການເລີ່ມຕົ້ນນ້ອຍໆນີ້ມັນຈະກາຍເປັນພະລັງອັນຍິ່ງໃຫຍ່ທີ່ຈະຊ່ວຍປົກປ້ອງສຸຂະພາບຂອງຕົວເຮົາ, ລະບົບນິເວດທາງນໍ້າ, ແລະ ປົກປ້ອງສິ່ງແວດລ້ອມຂອງໃຫ້ຂຽວງາມ ແລະ ຍືນຍົງຕະຫຼອດໄປ.

19/06/2026

[English Below]

🌱 ຮ່ວມປູກຕົ້ນໄມ້ເພື່ອອະນາຄົດຄົນຮຸ່ນລູກຫຼານໄປນຳກັນ🌱

🌱ອີໂຄນັອກສ໌ ລາວ ຮູ້ສຶກເປັນກຽດຫຼາຍທີ່ໄດ້ຖືກຊວນຮ່ວມເປັນສ່ວນນ້ອຍໆໜຶ່ງຂອງ ໂຮງຮຽນ ນາໆຊາດປັນຍາທິບ ໃນການສະເຫຼີມສະຫຼອງຄົບຮອບ 25 ປີ ຜ່ານກິດຈະກຳປູກຕົ້ນໄມ້ Seeds of Legacy ທີ່ ສາຍໃຈຟາມ.

🌱ຮ່ວມກັນກັບນັກຮຽນ, ຜູ້ປົກຄອງ, ຄູ-ອາຈານ ແລະ ຜູ້ບໍລິຫານໂຮງຮຽນ ໄດ້ມີການປູກຕົ້ນໄມ້ຈຳນວນ 58 ຕົ້ນ ເພື່ອສ້າງມໍດົກທີ່ມີຊີວິດ (ຕົ້ນໄມ້) ແລະ ຈະຢູ່ຍືນຍົງກວ່າການສະເຫຼີມສະຫຼອງຄັ້ງນີ້. ການປູກຕົ້ນໄມ້ບໍ່ແມ່ນພຽງແຕ່ການເພີ່ມພື້ນທີ່ສີຂຽວເທົ່ານັ້ນ ແຕ່ຍັງເປັນສັນຍາລັກຂອງຄວາມຮ່ວມມືໃນການອະນຸລັກສິ່ງແວດລ້ອມ, ສົ່ງເສີມຄວາມຍືນຍົງ, ລົງທຶນໃສ່ການປູກຝັງຄວາມຮັກທຳມະຊາດໃນຄົນຮຸ່ນໃຫມ່ ເພື່ອອານາຄົດສີຂຽວຂອງ ສປປ ລາວ.

🌱ພວກເຮົາພາກພູມໃຈທີ່ໄດ້ສະໜັບສະໜູນອົງກອນ ແລະ ຊຸມຊົນທີ່ເຫັນຄຸນຄ່າຂອງການລົງມືປະຕິບັດເພື່ອດູແລໂລກຂອງພວກເຮົາ. ເມື່ອຕົ້ນໄມ້ເຫຼົ່ານີ້ເຕີບໃຫຍ່, ພວກມັນຈະກາຍເປັນສັນຍາລັກອັນຍືນຍົງຂອງຄວາມຮ່ວມມື, ຄວາມຮັບຜິດຊອບ ແລະ ຄວາມຫວັງສຳລັບຄົນຮຸ່ນຕໍ່ໄປ.

🌱ຂໍສະແດງຄວາມຍິນດີກັບ ໂຮງຮຽນ ນາໆຊາດປັນຍາທິບ ໃນໂອກາດຄົບຮອບ 25 ປີ ແຫ່ງຄວາມມຸ່ງໝັ້ນສູ່ຄວາມເປັນເລີດ. ຂອບໃຈທີ່ໃຫ້ ອີໂຄນັອກສ໌ ລາວ ເປັນສ່ວນໜຶ່ງໃນງານທີ່ມີຄວາມໝາຍໃນຄັ້ງນີ້.

🌿 ສ້າງຮາກຖານດ້ວຍພະລັງຂອງຊຸມຊົນ ໃຫ້ເຂັ້ມແຂງ ເພື່ອຄົນຮຸ່ນອະນາຄົດ.
------------------------------------------------------------
🌱 Growing a Legacy Together 🌱

🌱Econox Laos is honored to have partnered with PBIS in celebrating their 25th Anniversary through the inspiring Seeds of Legacy Tree Planting Event at Sai Jai Farm.

🌱Together with students, teachers, and school leaders, 58 trees were planted to create a living legacy that extends far beyond this milestone celebration. More than just planting trees, this initiative represents a shared commitment to environmental stewardship, sustainability, and investing in a greener future for Laos.

🌱We are proud to support organizations and communities that recognize the importance of taking meaningful action for our planet. As these trees grow and thrive within a protected green space, they will stand as a lasting symbol of collaboration, responsibility, and hope for future generations.

🌱Congratulations to PBIS on 25 Years of Commitment to Excellence. Thank you for allowing Econox Laos to be part of this meaningful journey.

🌿 Rooted in community, growing for the future.

03/06/2026

🔥 ອົງການອຸຕຸນິຍົມວິທະຍາໂລກ (WMO) ແລະ ສະຫະປະຊາຊາດ (UN) ໄດ້ອອກມາຍົກລະດັບການເຕືອນໄພໃຫ້ທົ່ວໂລກກຽມພ້ອມຮັບມືກັບປາກົດການ ເອວ ນີໂຢ (El Niño) ທີ່ກໍາລັງກໍ່ຕົວຂຶ້ນຢ່າງວ່ອງໄວ ເຊິ່ງມີໂອກາດສູງເຖິງ 80-90% ທີ່ຈະແກ່ຍາວໄປຮອດທ້າຍປີນີ້. ນັກວິທະຍາສາດເຕືອນວ່າ ເອວ ນີໂຢ ໃນຮອບນີ້ອາດມີຄວາມຮຸນແຮງໃນລະດັບປານກາງຫາຮຸນແຮງຫຼາຍ (ອາດເປັນ Super El Niño) ເຊິ່ງຈະເຂົ້າມາຊໍ້າເຕີມສະພາວະໂລກຮ້ອນ ແລະ ເຮັດໃຫ້ປີຂ້າງໜ້າກາຍເປັນປີທີ່ຮ້ອນທີ່ສຸດໃນປະຫວັດສາດ.

🔥 ສໍາລັບພາກພື້ນອາຊີຕາເວັນອອກສຽງໃຕ້ ຫຼື ອາຊຽນ, ສິ່ງທີ່ຈະຕ້ອງຜະເຊີນໜ້າຢ່າງຫຼີກລ່ຽງບໍ່ໄດ້ຄື ສະພາບອາກາດທີ່ຮ້ອນຈັດ ແລະ ໄພແຫ້ງແລ້ງ ທີ່ຈະສົ່ງຜົນກະທົບໂດຍກົງຕໍ່ຄວາມໝັ້ນຄົງທາງດ້ານສະບຽງອາຫານ, ແຫຼ່ງນໍ້າ, ແລະ ພະລັງງານ.

🔥 ສູນອຸຕຸນິຍົມວິທະຍາສະເພາະກິດອາຊຽນ (ASMC) ແລະ ກົມອຸຕຸນິຍົມວິທະຍາຂອງສິງກະໂປ (MSS) ຊີ້ໃຫ້ເຫັນວ່າ ເອວ ນີໂຢ ຈະເຮັດໃຫ້ລະດູຝົນໃນພາກພື້ນນີ້ມາຊ້າ ແລະ ມີປະລິມານນໍ້າຝົນໜ້ອຍກວ່າປົກກະຕິ ໂດຍສະເພາະໃນຊ່ວງເດືອນມິຖຸນາ ຫາ ຕຸລາ. ປະເທດຜູ້ຜະລິດເຂົ້າ ແລະ ພືດເສດຖະກິດຫຼັກ ເຊັ່ນ: ອິນໂດເນເຊຍ, ມາເລເຊຍ, ຟິລິບປິນ ແລະ ໄທ ກໍາລັງກຽມຮັບມືກັບຄວາມເສຍຫາຍຂອງຜົນຜະລິດ ເນື່ອງຈາກການຂາດແຄນນໍ້າ. ນອກຈາກນີ້, ສະພາບອາກາດທີ່ແຫ້ງແລ້ງ ແລະ ຮ້ອນຈັດ ຈະເພີ່ມຄວາມສ່ຽງໃຫ້ເກີດໄພປ່າໄດ້ງ່າຍ, ໂດຍສະເພາະໃນພື້ນທີ່ປ່າ Peatlands ເຊິ່ງອາດນໍາໄປສູ່ບັນຫາໝອກຄວັນພິດຂ້າມແດນທີ່ຮຸນແຮງໃນພາກພື້ນ.

🔥 ກະຊວງກະສິກໍາ ແລະ ສິ່ງແວດລ້ອມ ຂອງ ສປປ ລາວ ໄດ້ອອກແຈ້ງການເຕືອນໄພຢ່າງເປັນທາງການ ກ່ຽວກັບຜົນກະທົບຈາກ ເອວ ນີໂຢ ຕໍ່ກັບລະດູຝົນ ໂດຍຄາດຄະເນວ່າອຸນຫະພູມໃນບາງພື້ນທີ່ອາດສູງເຖິງ 35–38 ອົງສາເຊ. ປະລິມານນໍ້າຝົນຈະຫຼຸດໜ້ອຍລົງ ແລະ ບໍ່ທົ່ວເຖິງ, ເຮັດໃຫ້ເກີດມີຝົນຖິ້ມຊ່ວງເປັນເວລາດົນ ເຊິ່ງຈະສົ່ງຜົນກະທົບຕໍ່ການເຮັດນາປີ ແລະ ການລ້ຽງສັດຂອງປະຊາຊົນ. ເຖິງວ່າ ເອວ ນີໂຢ ອາດຈະອ່ອນກໍາລັງລົງໃນຊ່ວງນີ້, ແຕ່ສະພາບອາກາດຈະຍັງຄົງມີຄວາມຜັນຜວນສູງ. ບາງພື້ນທີ່ອາດຜະເຊີນກັບພາຍຸ, ຝົນຕົກໜັກໃນໄລຍະສັ້ນ, ໄພນໍ້າຖ້ວມຊຸມ ແລະ ດິນເຈື່ອນໃນບາງແຂວງ.

🔥ເພື່ອຫຼຸດຜ່ອນຄວາມສ່ຽງ ແລະ ຄວາມເສຍຫາຍ, ພາກສ່ວນກ່ຽວຂ້ອງຕ້ອງຮ່ວມມືກັນຈັດຕັ້ງປະຕິບັດມາດຕະການດັ່ງນີ້:

- ການບໍລິຫານຈັດການນໍ້າ: ເລັ່ງກວດກາ ແລະ ກຽມພ້ອມລະບົບກັກເກັບນໍ້າ, ອ່າງເກັບນໍ້າ, ແລະ ຄອງຊົນລະປະທານ ເພື່ອສໍາຮອງນໍ້າໄວ້ໃຊ້ໃນຊ່ວງຝົນຖິ້ມຊ່ວງ.
- ການປັບຕົວດ້ານການກະສິກໍາ: ແນະນໍາໃຫ້ຊາວກະສິກອນເລືອກປູກພືດທີ່ທົນທານຕໍ່ຄວາມແຫ້ງແລ້ງ ຫຼື ພືດອາຍຸສັ້ນທີ່ໃຊ້ນໍ້າໜ້ອຍ ແທນການເຮັດນາໃນພື້ນທີ່ທີ່ຂາດແຄນນໍ້າ.
- ຕິດຕາມຂ່າວສານຢ່າງໃກ້ຊິດ: ປະຊາຊົນຄວນຕິດຕາມການລາຍງານສະພາບອາກາດຈາກ ກົມອຸຕຸນິຍົມ ແລະ ອຸທົກກະສາດ ຢ່າງເປັນປະຈໍາ ເພື່ອວາງແຜນການດໍາລົງຊີວິດ ແລະ ການຜະລິດ.
- ປະຊາຊົນທົ່ວໄປຕະຫນັກຮູ້ ແລະ ປັບຕົວ: ກຽມຮັບມືກັບອາກາດທີ່ຮ້ອນຈັດ ໂດຍສະເພາະຜູ້ບອບບາງ ເຊັ່ນ ເດັກນ້ອຍ, ຜູ້ເຖົ້າ, ຜູ້ມີພະຍາດປະຈຳຕົວ. ງົດເວັ້ນກິດຈະກຳກາງແຈ້ງໃນເວລາທີ່ອາກາດຮ້ອນ ແລະ ແດດຈັດ.

24/04/2026

[ເອລ ຄາລາຟາເຕ, ປະເທດອາຊັງຕິນ] – ຖືເປັນຂ່າວທີ່ສ້າງຄວາມຕົກຕະລຶງໃຫ້ແກ່ນັກວິທະຍາສາດ ແລະ ນັກອະນຸລັກທົ່ວໂລກ ເມື່ອມີການລາຍງານວ່າ ທານນໍ້າກ້ອນ Perito Moreno (ເປຣີໂຕ ໂມເຣໂນ) ເຊິ່ງຕັ້ງຢູ່ໃນເຂດ ປາຕາໂກເນຍ (Patagonia) ທີ່ເຄີຍໄດ້ຊື່ວ່າເປັນທານນໍ້າກ້ອນທີ່ "ໝັ້ນຄົງທີ່ສຸດ" ໃນໂລກ, ຕອນນີ້ກຳລັງປະເຊີນກັບການລະລາຍ ແລະ ການຫຼຸດຜ່ອນຂະໜາດລົງຢ່າງຮຸນແຮງໃນລະດັບທີ່ບໍ່ເຄີຍມີມາກ່ອນ.

🧊ເປັນເວລາຫຼາຍທົດສະວັດ, Perito Moreno ເປັນທານນໍ້າກ້ອນພຽງບໍ່ເທົ່າໃດແຫ່ງໃນໂລກທີ່ສາມາດຮັກສາຄວາມສົມດຸນໄດ້ ໃນຂະນະທີ່ບ່ອນອື່ນທົ່ວໂລກກຳລັງລະລາຍຍ້ອນພາວະໂລກຮ້ອນ. ແຕ່ຈາກການເກັບກຳຂໍ້ມູນດາວທຽມ ແລະ ຜົນການວິໄຈຫຼ້າສຸດໃນເດືອນ ເມສາ 2026, ພົບວ່າທານນໍ້າກ້ອນຍັກໃຫຍ່ແຫ່ງນີ້ໄດ້ ຫຼຸດອອກຈາກຖານຫີນໃຕ້ນ້ຳທີ່ເຄີຍເປັນບ່ອນຢຶດໜ່ຽວມັນໄວ້.

🧊ຕັ້ງແຕ່ປີ 2019 ເປັນຕົ້ນມາ, ປາຍຂອງທານນໍ້າກ້ອນໄດ້ຖອຍຫ່າງອອກຈາກຝັ່ງແລ້ວຫຼາຍກວ່າ 800 ແມັດ. ຈາກທີ່ເຄີຍບາງລົງພຽງ 0.3 ແມັດຕໍ່ປີ, ປັດຈຸບັນຕົວເລກດັ່ງກ່າວໄດ້ສູງຂຶ້ນເຖິງ 6 ແມັດຕໍ່ປີ. ເນື່ອງຈາກທານນໍ້າກ້ອນໄດ້ຖອຍຫ່າງອອກຈາກແຫຼມ ມາກາຍາເນສ (Magallanes), ເຮັດໃຫ້ປະກົດການ "ຂົວນ້ຳກ້ອນແຕກ" (The Rupture) ທີ່ໂດ່ງດັງ ແລະ ດຶງດູດນັກທ່ອງທ່ຽວທົ່ວໂລກນັ້ນ ອາດຈະບໍ່ເກີດຂຶ້ນອີກຕໍ່ໄປໃນອະນາຄົດອັນໃກ້ນີ້.

🧊ນັກວິທະຍາສາດລະບຸວ່າ ອຸນຫະພູມຂອງນ້ຳໃນທະເລສາບ ອາເກນຕິໂນ (Argentino) ທີ່ສູງຂຶ້ນ ແລະ ອຸນຫະພູມອາກາດທີ່ຮ້ອນຂຶ້ນຢ່າງຕໍ່ເນື່ອງ ໄດ້ສົ່ງຜົນໃຫ້ກ້ອນນ້ຳກ້ອນສູນເສຍມວນສານຢ່າງໄວວາ. ການທີ່ມັນ ລອຍຕົວ ຂຶ້ນຈາກພື້ນຫີນໃຕ້ນ້ຳ ເຮັດໃຫ້ມັນມີຄວາມບອບບາງ ແລະ ແຕກຫັກງ່າຍຂຶ້ນເມື່ອຖືກຄື້ນນ້ຳຊັດ.

🧊"ນີ້ຄືສັນຍານສຸດທ້າຍຈາກທຳມະຊາດ. ຖ້າແມ່ນແຕ່ Perito Moreno ຍັງບໍ່ສາມາດຕ້ານທານກັບການປ່ຽນແປງສະພາບພູມອາກາດໄດ້, ມັນກໍເປັນສິ່ງຢືນຢັນວ່າລະບົບນິເວດນ້ຳກ້ອນຂອງໂລກກຳລັງຢູ່ໃນຂັ້ນອັນຕະລາຍ," – ນັກວິໄຈຈາກມະຫາວິທະຍາໄລ Friedrich-Alexander ກ່າວ.

23/04/2026

[ຊຽງແສນ, ປະເທດໄທ, ເມສາ 2026] – ບົດລາຍງານຫຼ້າສຸດຈາກກົມຄວບຄຸມມົນລະພິດຂອງລັດຖະບານປະເທດໄທ ແລະ ມະຫາວິທະຍາໄລແມ່ຟ້າຫຼວງ ໄດ້ເປີດເຜີຍໃຫ້ເຫັນເຖິງສະພາວະການປົນເປື້ອນຂອງສານໜູ ຫຼື ສານອາຊີນີກ (Arsenic) ໃນແມ່ນ້ຳຂອງ ແລະ ແມ່ນ້ຳສາຂາ ເຊັ່ນ: ແມ່ນ້ຳກົກ, ແມ່ນ້ຳສາຍ ແລະ ແມ່ນ້ຳຮວກ ທີ່ເພີ່ມສູງຂຶ້ນຢ່າງໜ້າເປັນຫ່ວງ ເຊິ່ງມີລະດັບສູງກວ່າຄ່າຄວາມປອດໄພເຖິງ 10 ເທົ່າໃນບາງຈຸດ.

🧪ຈາກການເກັບຕົວຢ່າງຕະກອນໃນແມ່ນ້ຳຂອງຂອງສະຖາບັນດັ່ງກ່າວໃນ ບໍລິເວນສາມຫຼ່ຽມຄຳ ແລະ ເມືອງຊຽງແສນ ໃນໄລຍະເດືອນມີນາ ຫາ ເມສາ 2026, ພົບວ່າລະດັບສານໜູໃນຕະກອນດິນມີຄ່າສູງລະຫວ່າງ 73 ຫາ 296 ມິນລີກຣາມ/ກິໂລກຣາມ (mg/kg). ຕົວເລກນີ້ຖືວ່າເກີນຄ່າຄວາມປອດໄພ (33 mg/kg) ຫຼາຍເທົ່າ.

⛏️ ຜູ້ຊ່ຽວຊານດ້ານສິ່ງແວດລ້ອມລະບຸວ່າ ສາເຫດຫຼັກມາຈາກ ການຂະຫຍາຍຕົວຂອງການຂຸດຄົ້ນບໍ່ແຮ່ ໂດຍສະເພາະແມ່ນແຮ່ຫາຍາກ ຫຼື Rare Earth ແລະ ຄຳ ຢູ່ບໍລິເວນລັດສານ ປະເທດມຽນມາ, ເຊິ່ງມີການປ່ອຍນ້ຳເປື້ອນ ແລະ ສານເຄມີລົງສູ່ແມ່ນ້ຳສາຂາ ກ່ອນຈະໄຫຼລົງສູ່ແມ່ນ້ຳຂອງ.

💀 ຜົນກະທົບຕໍ່ສຸຂະພາບ ແລະ ລະບົບນິເວດແມ່ນເປັນສິ່ງທີ່ໜ້າເປັນຫ່ວງ. ການສຶກສາຂອງມະຫາວິທະຍາໄລແມ່ຟ້າຫຼວງ ໄດ້ຊີ້ໃຫ້ເຫັນຜົນກະທົບທີ່ຈະສົ່ງຜົນຕໍ່ມະນຸດ. ສານໜູທີ່ຕົກຄ້າງໃນຕະກອນດິນຈະເຂົ້າສູ່ລະບົບຕ່ອງໂສ້ອາຫານໂດຍຜ່ານສັດນ້ຳທີ່ຫາກິນຕາມໜ້າດິນ ເຊັ່ນ: ກຸ້ງ, ຫອຍ ແລະ ປາບາງຊະນິດ. ການເກັບຂໍ້ມູນໃນເດັກນ້ອຍເຫັນວ່າພົບປະລິມານສານໜູໃນນ້ຳຍ່ຽວຂອງເດັກນ້ອຍໃນເຂດລຸ່ມແມ່ນ້ຳກົກ ສະເລ່ຍຢູ່ທີ່ 40.24 ໄມໂຄຣກຣາມ/ລິດ (µg/L). ນອກນີ້, ການກວດເລັບຂອງປະຊາຊົນໃນພື້ນທີ່ພົບວ່າ 17.8% ມີການສະສົມສານໜູເກີນມາດຕະຖານເຝົ້າລະວັງ.

🐟ຄະນະກຳມາທິການແມ່ນ້ຳຂອງ (MRC) ໄດ້ຍົກລະດັບການຕິດຕາມຄຸນນະພາບນ້ຳເປັນ "ກໍລະນີຮີບດ່ວນ" ແລະ ຮຽກຮ້ອງໃຫ້ມີການຮ່ວມມືລະຫວ່າງປະເທດຂ້າມພົມແດນເພື່ອແກ້ໄຂບັນຫາຈາກຕົ້ນທາງ. ໃນຂະນະດຽວກັນ, ນັກວິໄຈໄດ້ແນະນຳໃຫ້ປະຊາຊົນ:

- ຫຼີກເວັ້ນການບໍລິໂພກສັດນ້ຳປະເພດທີ່ຢູ່ຕາມໜ້າດິນ (ຫອຍ, ກຸ້ງ) ໃນເຂດທີ່ມີຄວາມສ່ຽງ.
- ປຸງແຕ່ງອາຫານໃຫ້ສຸກດີ ແລະ ຫຼີກເວັ້ນການກິນເຄື່ອງໃນປາ ເຊິ່ງເປັນບ່ອນສະສົມຂອງສານພິດ.
- ນຳໃຊ້ລະບົບຕອງນ້ຳທີ່ມີປະສິດທິພາບ (ເຊັ່ນ: ການໃຊ້ຖ່ານ Biochar) ເຊິ່ງສາມາດກັ່ນກອງສານໜູອອກໄດ້ເຖິງ 96%.

22/04/2026

ເອົາບົດຄວາມພວກເຮົາໄປຜັນຂະຫຍາຍໄດ້. ແຕ່ໃຫ້ເຄຣດິດ ແລະ ບໍ່ກັອບໄປໂດຍກົງທັງຫົວຂໍ້ ແລະ ເນື້ອໃນແດ່ເຈົ້າ ປະກາດ Pakaad 🙏🏼

22/04/2026

🔥ໃນທຸກໆຕົ້ນປີ, ທ້ອງຟ້າຂອງ ສປປ ລາວ ແລະ ພາກພື້ນອາຊີຕາເວັນອອກສ່ຽງໃຕ້ ມັກຈະຖືກປົກຫຸ້ມດ້ວຍໝອກຄວັນໜາ. ພາບທີ່ພວກເຮົາຄຸ້ນເຄີຍຄືການກ່າວໂທດຊາວກະສິກອນໃນທ້ອງຖິ່ນທີ່ຖາກຖາງຈູດປ່າ. ແຕ່ຫາກພວກເຮົາເບິ່ງໃຫ້ເລິກຂຶ້ນ, ຈະພົບວ່າການຜະລິດສ່ວນໃຫຍ່ບໍ່ໄດ້ເກີດຂຶ້ນເພື່ອການກຸ້ມຕົນເອງເທົ່ານັ້ນ, ແຕ່ແມ່ນການປູກພືດອຸດສາຫະກຳ ແລະ ອາຫານສັດ ເພື່ອປ້ອນເຂົ້າສູ່ ຕ່ອງໂສ້ການຜະລິດຂອງບໍລິສັດຍັກໃຫຍ່. ດັ່ງນັ້ນ, ການແກ້ບັນຫາຝຸ່ນພຽງແຕ່ກັບຄົນທ້ອງຖິ່ນຈຶ່ງບໍ່ພຽງພໍ, ແຕ່ມັນຮຽກຮ້ອງໃຫ້ ຍັກໃຫຍ່ທາງທຸລະກິດຕ່າງໆ ຕ້ອງມີຄວາມຮັບຜິດຊອບຢ່າງຈິງຈັງ.

🔥ຈາກສະຖິຕິໃນພາກພື້ນອາຊີ, ພື້ນທີ່ສຳປະທານ ແລະ ຕ່ອງໂສ້ການຜະລິດພືດເສດຖະກິດ ເຊັ່ນ: ນ້ຳມັນປາມ, ໄມ້ເສດຖະກິດ ແລະ ສາລີທີ່ເປັນອາຫານສັດ ແມ່ນຖືກຄຸ້ມຄອງໂດຍກຸ່ມນາຍທຶນໃຫຍ່. ໃນອິນໂດເນເຊຍ, ບໍລິສັດເອກະຊົນຄອບຄອງເນື້ອທີ່ປູກນ້ຳມັນປາມຫຼາຍກວ່າ 50% ຂອງທັງປະເທດ. ສ່ວນໃນເຂດລຸ່ມນ້ຳຂອງ, ເຖິງວ່າຊາວກະສິກອນຈະເປັນຜູ້ລົງມືປູກສາລີເທິງພູ, ແຕ່ຜູ້ທີ່ກຳນົດລາຄາ, ແນວພັນ ແລະ ເປັນຜູ້ຮັບຊື້ຫຼັກ ແມ່ນບໍລິສັດອຸດສາຫະກຳອາຫານສັດ. ນີ້ຄືເຫດຜົນທີ່ວ່າເປັນຫຍັງບໍລິສັດເຫຼົ່ານີ້ຈຶ່ງຖື ກຸນແຈສຳຄັນໃນການຢຸດຢັ້ງຄວັນໄຟ.

🔥ຕົວຢ່າງທີ່ເປັນຮູບປະທຳໃນປີ 2026 ນີ້ ແມ່ນໂຄງການ "Partner to Green" ຂອງກຸ່ມບໍລິສັດ CP ໃນປະເທດໄທ ແລະ ປະເທດເພື່ອນບ້ານ. ບໍລິສັດໄດ້ນຳໃຊ້ເຕັກໂນໂລຊີດາວທຽມຕິດຕາມແປງປູກສາລີຂອງຜູ້ສະໜອງ (Suppliers) ແບບ 100%. ຫາກດາວທຽມກວດພົບການຈູດໃນພື້ນທີ່ໃດ, ບໍລິສັດຈະຢຸດຮັບຊື້ຜົນຜະລິດຈາກແປງນັ້ນທັນທີ. ນີ້ຄືການໃຊ້ ອຳນາດທາງການຄ້າເພື່ອບີບບັງຄັບໃຫ້ເກີດການປ່ຽນແປງ. ນອກຈາກນີ້, ຍັກໃຫຍ່ລະດັບໂລກຢ່າງ Nestlé ກໍໄດ້ຍົກລະດັບການເຮັດວຽກຜ່ານ ກະສິກຳຟື້ນຟູ (Regenerative Agriculture), ໂດຍການໃຫ້ເງິນອຸດໜູນ ແລະ ເຕັກນິກແກ່ຊາວກະສິກອນເພື່ອປົກຄຸມໜ້າດິນ ແລະ ຈັດການເສດພືດໂດຍບໍ່ໃຊ້ໄຟ, ເຊິ່ງຊ່ວຍຫຼຸດຜ່ອນທັງຝຸ່ນລະອອງ ແລະ ການປ່ອຍກາກບອນໄປພ້ອມໆກັນ.

🔥ການແກ້ໄຂບັນຫາໝອກຄວັນທີ່ຍືນຍົງ ຈະເກີດຂຶ້ນໄດ້ກໍຕໍ່ເມື່ອບໍລິສັດໃຫຍ່ປ່ຽນຈາກການເປັນ ຜູ້ຊື້ມາເປັນຜູ້ຮ່ວມຮັບຜິດຊອບ. ພວກເຂົາຕ້ອງລົງທຶນໃນລະບົບກວດສອບຍ້ອນກັບ (Traceability) ທີ່ໂປ່ງໃສ ແລະ ສະໜັບສະໜູນເຄື່ອງຈັກໃນການບົດເສດພືດໃຫ້ແກ່ຊຸມຊົນທີ່ຂາດເຂີນທຶນຮອນ. ຫາກບໍລິສັດຍັງຄົງຕັກຕວງເອົາຜົນກຳໄລ ແລ້ວປ່ອຍໃຫ້ຜົນກະທົບທາງສິ່ງແວດລ້ອມຕົກເປັນຂອງສັງຄົມ, ບັນຫາ PM2.5 ກໍຈະຍັງຄົງຢູ່ກັບພວກເຮົາຕະຫຼອດໄປ.

Econews Laos

24/08/2026

20/08/2026

19/08/2026

15/07/2026

19/06/2026

03/06/2026

24/04/2026

23/04/2026

22/04/2026

22/04/2026

Address

Website

Alerts

Contact The Business

Shortcuts

Share

Category

Listing takedown request