ຂ່າວເສດຖະກິດ-ສັງຄົມ (2025)

20/07/2025

ເຮືອຫລົ້ມ ຢູ່ ສສ ຫວຽດນາມ ເສຍຊີວິດ 28 ຄົນ, ສາມາດຊ່ວຍເຫຼືອໄດ້ 10 ຄົນ ແລະ ເສຍຊີວິດຢູ່ໂຮງໝໍ 1 ຄົນ
ຂ່າວຈາກຫວຽດນາມລາຍງານວ່າ: ໃນເວ ລາປະມານ 15:30 ຂອງວັນ ທີ 19 ກໍລະກົດ 2025 ເຮືອທ່ອງທ່ຽວ Vịnh Xanh 58 ເລກທະບຽນ QN-7105 ໄດ້ພິກຂວ້າມກະທັນ ຫັນຈາກພາຍຸ ໃນຂະນະທີ່ກຳລັງເດີນທາງຜ່ານເສັ້ນທາງໝາຍເລກ2 ໃນອ່າວທ່ອງ ທ່ຽວຮາລອງເບ ແຂວງກວາງນິງ ຂອງຫວຽດ ນາມ ເຊິ່ງເຮືອລຳດັ່ງກ່າວ ບັນທຸກນັກທ່ອງ ທ່ຽວ 48 ຄົນ ແລະລູກເຮືອອີກ 5 ຄົນ ລວມ 53 ຄົນ, ມີລາຍງານວ່າ ສັນຍານ GPS ຂອງເຮືອຖືກຕັດຂາດໃນເວລາ14:05 ໂມງ.
ພາຍຫຼັງເກີດເຫດເຈົ້າໜ້າທີ່ ໄດ້ລະ ດົມກຳລັງເຂົ້າຊ່ວຍເຫຼືອຢ່າງຮີບດ່ວນ; ມາຮອດເວລາ 23:30 ໂມງ ສາມາດຊ່ວຍເຫຼືອໄດ້ 10 ຄົນ; ຄົ້ນ ພົບຜູ້ເສຍຊີວິດ 28 ຄົນ ແລະເສຍຊີວິດຢູ່ໂຮງໝໍ 1 ຄົນ.
ແຂວງກວາງນິງ ໄດ້ໃຫ້ການຊ່ວຍ ເຫຼືອເບື້ອງຕົ້ນເປັນເງິນ 25 ລ້ານດົງ (ເກືອບ 1,000 ໂດລາສະຫະ ລັດ) ຕໍ່ຜູ້ເສຍຊີວິດ 1 ຄົນ ແລະ 8 ລ້ານດົງ (300 ໂດລາສະຫະລັດ) ຕໍ່ຜູ້ບາດເຈັບ 1 ຄົນ.
ນອກນີ້, ອົງການປົກຄອງທ້ອງຖິ່ນຍັງໄດ້ຈັດຫາທີ່ພັກ ແລະຄ່າຄອງຊີບທັງໝົດ ໃຫ້ແກ່ຄອບຄົວຜູ້ເສຍຊີວິດ ໃນໄລຍະທີ່ພວກເຂົາພັກເຊົາຢູ່ໃນແຂວງກວາງນິງ; ຂະນະນີ້ເຈົ້າ ໜ້າທີ່ ທີ່ກ່ຽວຂ້ອງໄດ້ເຮັດວຽກຕະຫຼອດຄືນ.
ອ່າວ ຮາລອງເບ ແຂວງກວາງນິງ ເປັນໝູ່ເກາະນ້ອຍໆນັບຮ້ອຍແຫ່ງ, ດຶງດູດນັກທ່ອງທ່ຽວ 4 ລ້ານຄົນໃນປີ 2019 ແລະໄດ້ຂຶ້ນເປັນມໍລະ ດົກໂລກຂອງອົງການ Unesco.
ທີ່ມາ: vietnamnews.
- ໜັງສືພິມເສດຖະກິດ-ສັງຄົມ
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

20/07/2025

ທ່ານນາງ ສ້ອຍສຸດາ ອິນເມືອງໄຊ ນັກທຸລະກິດຍິງຫົວໃຈເພັດ ມັກພັດທະນາແຫຼງທ່ອງທ່ຽວ

(ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ 20 ກໍລະກົດ 1955-20 ກໍລະກົດ 2025ຄົບຮອບ 70 ປີ)
ປະຈຸບັນ, ບົດບາດຂອງແມ່ຍິງລາວ ນັບມື້ສູງເດັ່ນໄປຄຽງຄູ່ກັບເພດຊາຍ ໃນທຸກຂົງເຂດວຽກງານ ທັງເວທີພາຍໃນ, ພາກພື້ນ ແລະ ສາກົນ, ແມ່ຍິງ ຫລາຍທ່ານ ໄດ້ພັດທະນາຕົນເອງໃຫ້ມີຄວາມຮູ້ຄວາມສາມາດໃນຫລາຍດ້ານ.

ເນື່ອງໃນໂອກາດວັນສ້າງຕັ້ງສະຫະພັນແມ່ຍິງ ທີມຂ່າວພວກເຮົາສະເຫນີ ນັກທຸລະກິດຍິງ ທີ່ເພິ່ນມີຄວາມຮູ້ຄວາມສາມາດບໍລິຫານຊຶ່ງເປັນທີ່ຮູ້ຈັກກັນດີໃນວົງການນັກທຸລະກິດຫນຸ່ມ. ທ່ານ ນາງ ສ້ອຍສຸດາ ອິນເມືອງໄຊ ປະທານບໍລິສັດທ່ອງທ່ຽວ ແລະ ການລົງທຶນຈຳກັດ ຖືເປັນອີກໜຶ່ງນັກທຸລະກິດແມ່ຍິງລາວທີ່ເອີນໄດ້ວ່າເປັນນັກທຸລະກິດຫົວໃຈເພັດ ທີ່ເພິ່ນມີນ້ຳໃຈໃນການຊ່ວຍເຫຼືອສັງຄົມ ແລະ ພັດທະນາປະເທດຊາດ ໂດຍສະເພາະສ້າງພັດທະນາແຫຼງທ່ອງທ່ຽວ.

ເພື່ອລະນຶກເຖິງວັນສ້າງຕັ້ງສະຫະພັນແມ່ຍິງລາວ ວັນທີ 20 ກໍລະກົດ 1955 - 20 ກໍລະກົດ 2025ຄົບຮອບ 70 ປີ ເປັນວັນທີ່ມີຄວາມໝາຍສໍາຄັນທາງປະຫວັດສາດຂອງພັກ-ຂອງຊາດ ແລະມູນເຊື້ອຂອງແມ່ຍິງລາວໃນທົ່ວປະເທດ. ຜ່ານມາບໍ່ວ່າຈະເປັນໄລຍະຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານກໍຄືໃນໄລຍະສ້າງສາພັດທະນາປະເທດຊາດ, ແມ່ຍິງລາວບັນດາເຜົ່າໃນທົ່ວປະເທດ ຍາມໃດກໍໄດ້ຄຽງບ່າຄຽງໄຫຼ່ຮ່ວມກັບອ້າຍນ້ອງຊາຍໃນການປະຕິບັດວຽກງານທີ່ຕົນເອງຮັບຜິດຊອບດ້ວຍນໍ້າໃຈຮັກຊາດອັນສູງສົ່ງຊຶ່ງເຫັນໄດ້ຜົນງານອັນໂດດເດັ່ນໃຫຍ່ຫຼວງຫຼາຍທ່ານໄດ້ກາຍເປັນວິລະຊົນແຫ່ງຊາດ.

ຂໍສະແດງຄວາມຮູ້ບຸນຄຸນທຸກພາກສ່ວນ ແລະຂໍອວຍໄຊໃຫ້ພອນອັນປະເສີດມາຍັງການນໍາພັກ-ລັດທຸກຂັ້ນຈົ່ງມີສຸຂະພາບເຂັ້ມແຂງ, ມີຄວາມຜາສຸກທັງຊີວິດສ່ວນຕົວ ແລະຄອບຄົວ; ສືບຕໍ່ຊີ້ນໍາໆພາປະຊາຊົນລາວພັດທະນາປະເທດຊາດໃຫ້ຈະເລີນກ້າວໜ້າ; ອວຍພອນແດ່ພະນັກງານ, ຜູ້ໃຊ້ແຮງງານກໍຄືປະຊາຊົນລາວທົ່ວໜ້າຈົ່ງມີຄວາມສຸກຄວາມຈະເລີນ, ມີເຫື່ອແຮງປະກອບສ່ວນໃນພາລະກິດສ້າງສາພັດທະນາປະເທດຊາດເພີ່ມຕື່ມ ແລະຍິ່ງໃຫຍ່ກວ່າເກົ່າ.
- ໜັງສືພິມເສດຖະກິດ-ສັງຄົມ
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

19/07/2025

ພະແນກສະຫະພັນແມ່ຍິງທະຫານນະຄອນຫຼວງວຽງຈັນມອບໃບກຽດຕິຄຸນໃຫ້ຜູ້ທີ່ມີຜົນງານ
ພະແນກສະຫະພັນແມ່ຍິງກອງບັນຊາການທະຫານນະຄອນຫຼວງວຽງຈັນໄດ້ມອບໃບກຽດຕິຄຸນໃຫ້ແກ່ນັກທຸລະກິດທີ່ມີຜົນງານ, ຄຸນງາມຄວາມດີປະກອບສ່ວນໃນການສະໜັບສະໜູນ ໃຫ້ແກ່ພະແນກສະຫະພັນແມ່ຍິງທະຫານນະຄອນຫຼວງວຽງຈັນໃນຕອນບ່າຍຂອງວັນທີ 17 ກໍລະກົດ 2025 ໂດຍໃຫ້ກຽດຕາງໜ້າ ໃນການມອບໂດຍສະຫາຍພັນໂທ ເຂັມເພັດ ຫັນທະວົງ ຄະນະພັກກອງບັນຊາການຮອງຫົວໜ້າຫ້ອງການເມືອງກອງບັນຊາການທະຫານນະຄອນຫຼວງວຽງຈັນ, ມີພາກສ່ວນທີ່ໄດ້ຮັບໃບກຽດຕິຄຸນຄື: ບໍລິສັດ TD ຈໍາກັດ, ສວນວັດທະນະທໍາຊຽງຄວນ ແລະ ບໍລິສັດລາວອິນເຕີເທຣດລາວຈໍາກັດ. ທີ່ອຸປະຖໍາວັດຖຸຈໍານວນໜຶ່ງໃຫ້ພະແນກສະຫະພັນແມ່ຍິງໄປມອບໃຫ້ອ້າຍນ້ອງທີ່ຝຶກແອບຢູ່ສະໜາມເວີນກະເບົາໃນໄລຍະທີ່ຜ່ານມາ.
ຂ່າວຍັງໃຫ້ຮູ້ອີກວ່າ:
ໃນຕອນບ່າຍຂອງວັນດຽວກັນພະແນກຊາວໜຸ່ມທະຫານ ນວ ນໍາພາໂດຍສະຫາຍພັນໂທ ທອງຈັນ ແກ້ວບຸນແທນ ຫົວໜ້າພະແນກຊາວໜຸ່ມ ພ້ອມຄະນະເຂົ້າອວຍພອນພະແນກສະຫະພັນແມ່ຍິງກອງບັນຊາການທະຫານນະຄອນຫຼວງວຽງຈັນ ໂດຍການຕ້ອນຮັບຂອງສະຫາຍພັນໂທນາງ ມະນີວັນ ວິບຸນມີ ຫົວໜ້າພະແນກສະຫະພັນແມ່ຍິງ ເນື່ອງໃນໂອກາດ ສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບ 70 ປີ ,ສະຫາຍ ພັນໂທ ນາງ ມະນີວັນ ວິບຸນມີ ຫົວໜ້າພະແນກສະຫະພັນແມ່ຍິງ ໄດ້ຕາງໜ້າໃຫ້ພະແນກສະຫະພັນແມ່ຍິງ ກ່າວສະແດງຄວາມຂອບໃຈຕໍ່ ພະແນກຊາວໜຸ່ມ, ໜ່ວຍຊາວໝຸ່ມທີ່ຂຶ້ນກັບ ທີ່ເຂົ້າມາອວຍພອນໃນຄັ້ງນີ້ ແລະ ເຫັນໄດ້ຄວາມໝາຍຄວາມສໍາຄັນ ຂອງວັນສ້າງຕັ້ງສະຫະພັນແມ່ຍິງລາວຄົບຮອບ 70 ປີ, ພ້ອມທັງອວຍພອນໃຫ້ຄະນະທີ່ມາອວຍພອນຈົ່ງມີສຸຂະພາບເຂັ້ມແຂງ, ເຮັດສຳເລັດໃນໜ້າທີ່ວຽກງານອັນມີກຽດ, ສືບຕໍ່ນໍາພາ-ຊີ້ນຳ ແລະ ເສີມຂະຫຍາຍມູນເຊື້ອອັນດີງາມຂອງຊາວໜຸ່ມກອງບັນຊານການທະຫານນະຄອນຫຼວງວຽງຈັນໃຫ້ ເຕີບໃຫຍ່ຂະຫຍາຍຕົວກ້າວຂຶ້ນເລື້່ອຍໆ.
ໂດຍ: ສິບຕີ ທະນັນເສນ ນັກຂ່າວ ກບຊ ນວ.
- ໜັງສືພິມເສດຖະກິດ-ສັງຄົມ
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

19/07/2025

ລາວໂທລະຄົມຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 70 ປີ ເນັ້ນວິໄສທັດແມ່ຍິງລາວໃນຍຸກໃໝ່

ບໍລິສັດ ລາວໂທລະຄົມມະນາຄົມ ມະຫາຊົນ ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 70 ປີ (20 ກໍລະກົດ 1955-20 ກໍລະກົດ 2025) ເພື່ອສົ່ງເສີມບົດບາດແມ່ຍິງທີ່ມີຄວາມກ້າຫານ, ມີຫົວຄິດປະດິດສ້າງ ແລະ ສົ່ງເສີມແມ່ຍິງລາວຍຸກໃໝ່ ຢູ່ທີ່ສຳນັກງານໃຫຍ່ລາວໂທລະຄົມໃນວັນທີ 17ກໍລະກົດ 2025 ດ້ວຍການສະແດງ-ແຂ່ງຂັນສິລະປະວັດທະນະທຳລາວ ແລະ ການແຂ່ງຂັນຕອບຄຳຖາມເພື່ອສະແດງໃຫ້ເຫັນວິໄສທັດຂອງແມ່ຍິງລາວໃນຍຸກ Digital.
ພາຍໃນງານມີກິດຈະກຳຢູ່ຫຼາກຫຼາຍ ບໍ່ວ່າຈະເປັນການແຂ່ງຂັນ LTC SMART WOMEN ເຊິ່ງເປັນການແຂ່ງຂັນຕອບຄຳຖາມກ່ຽວກັບຄວາມຮູ້ຄວາມເຂົ້າໃຈກ່ຽວກັບວັດທະນະທຳອົງກອນ ສິນຄ້າ ບໍລິການຂອງບໍລິສັດ ແລະ ຄວາມຮູ້ດ້ານ AI ແລະ Digital ລວມເຖິງວິໄສທັດໃນການຫັນເປັນ ດິຈິຕອນຂອງແມ່ຍິງລາວຍຸກໃໝ່, ການແຂ່ງຂັນຟ້ອນລຳວົງລວມໝູ່ ຍິງ-ຊາຍ ແລະ ຍັງມີກິດຈະກຳຕະຫຼາດນັດວັນແມ່ຍິງສາກົນ ທີ່ມີຂອງມາຈຳໜ່າຍຫຼາກຫຼາຍ ທັງອາຫານ ແລະ ເຄື່ອງອຸປະໂພກ-ບໍລິໂພກ. ເຊິ່ງໃຫ້ກຽດເຂົ້າຮ່ວມໂດຍ ທ່ານ ສຸພົນ ຈັນທະວີໄຊ ຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານ ເລຂາຄະນະພັກຮາກຖານ ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ, ພ້ອມດ້ວຍຄະນະຜູ້ອຳນວຍການ ແລະ ຍັງມີບໍລິສັດ T Plus ຈຳກັດ, ບໍລິສັດລາວໂມບາຍມັນນີ້ ຈຳກັດ ພ້ອມດ້ວຍ ຕ່າງໜ້າຈາກ3 ອົງການຈັດຕັ້ງມະຫາຊົນ, ຄະນະຜູ້ບໍລິຫານ,ຄະນະພະແນກ ແລະ ພະນັກງານລາວໂທລະຄົມຈຳນວນໜຶ່ງ ຈຸດປະສົງຂອງການຈັດງານກໍເພື່ອລະນຶກເຖິງບົດບາດວັນສ້າງຕັ້ງສະຫະພັນແມ່ຍິງລາວທີ່ມີຄວາມໝາຍສະເໝີມາ ແລະ ສົ່ງເສີມຄວາມສາມັກຄີພາຍໃນ, ສະທ້ອນໃຫ້ເຫັນເຖິງວິໄສທັດແມ່ຍິງລາວໃນຍຸກໃໝ່ໃນການພັດທະນາອົງກອນ ແລະ ປະເທດຊາດ.
ຕອນທ້າຍນີ້ ໃນນາມຕາງໜ້າຄະນະປະທານຄະນະບໍລິຫານງານສະຫະພັນແມ່ຍິງຮາກຖານ ລາວ ໂທລະຄົມ ຂໍອວຍພອນໄຊອັນປະເສີດໃຫ້ການນຳພັກ-ລັດ ເເລະ ພະນັກງານທຸກທ່ານ ໂດຍສະເພາະເອື້ອຍນ້ອງເເມ່ຍິງ ຈົ່ງມີສຸຂະພາບແຂງແຮງ, ມີຄວາມສຸກ ເເລະ ມີຄວາມສໍາເລັດໃນໜ້າທີ່ວຽກງານ.

#ລາວໂທລະຄົມໂທລະຄົມຂອງຄົນລາວເພື່ອສັງຄົມລາວ

19/07/2025

ຫາລືການປັບປຸງດ້ານເນື້ອໃນຮ່າງບົດລາຍງານການເມືອງ ແລະແຜນພັດທະນາເສດຖະກິດ-ສັງຄົມ
ໃນວັນທີ 17 ກໍລະກົດ 2025 ນີ້, ຢູ່ທີ່ຫ້ອງປະຊຸມຊັ້ນສາມ ຫ້ອງວ່າການແຂວງເຊກອງ ໄດ້ມີກອງປະຊຸມຫາລື ເພື່ອປັບປຸງເນື້ອໃນ ຮ່າງບົດລາຍງານການເມືອງ ແລະແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X ທີ່ກະກຽມລາຍງານຕໍ່ກອງປະຊຸມໃຫຍ່ ຄັ້ງທີ XI ອົງຄະນະພັກແຂວງເຊກອງ ໂດຍການຫາລືປັບປຸງຄັ້ງນີ້ ມີຄະນະຮັບຜິດຊອບລົງຊ່ວຍວຽກກະກຽມເນື້ອໃນກອງປະຊຸມໃຫຍ່ ຂອງອົງຄະນະພັກແຂວງ ຂັ້ນສູນກາງ ເຊິ່ງມີທ່ານ ມີໄຊ ພົມເຂ ກຳມະການປະຈຳພັກ, ຮອງຫົວໜ້າຫ້ອງວ່າການສູນກາງພັກ ແລະ ມີບັນດາການນໍາແຂວງເຊກອງ ໂດຍມີທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ເຂົ້າຮ່ວມ.
ທ່ານ ດົງເພັດ ພະຍົນ ກ່າວວ່າ: ໃນກອງປະຊຸມຄັ້ງນີ້ ຈະໄດ້ພ້ອມກັນລົງເລິກຄົ້ນຄວ້າ, ປຶກສາຫາລືການປັບປຸງດ້ານເນື້ອໃນຮ່າງລາຍງານການເມືອງ ແລະ ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X ຂອງແຂວງເຊກອງ ທີ່ຈະນຳໄປລາຍງານຕໍ່ກອງປະຊຸມໃຫຍ່ ຄັ້ງທີ Xl ຂອງອົງຄະນະພັກແຂວງເຊກອງ ທີ່ຈະມີຂຶ້ນໃນມໍ່ໆນີ້ ເຊິ່ງຈະໄດ້ມີການຄົ້ນຄວ້າ ປັບປຸງຄືນ ໃຫ້ມີຄວາມສົມບູນ ໂດຍສະເພາະ ໂຄງຮ່າງ, ເນື້ອໃນ ຈະໄດ້ປັບປຸງຕື່ມ ຕາມຄຳຄິດເຫັນຂອງບັນດາການນໍາ ທີ່ມີຄໍາເຫັນ ໃນກອງປະຊຸມຄະນະປະຈຳພັກແຂວງ, ກອງປະຊຸມຄົບຄະນະບໍລິຫານງານພັກແຂວງ ໃນ 2 ຄັ້ງຜ່ານມາ, ກອງປະຊຸມລະດົມແນວຄວາມຄິດເຫັນ ຢູ່ຂັ້ນເມືອງ, ກອງປະຊຸມລະດົມຄວາມຄິດເຫັນ ຈາກຄະນະພັກ-ຄະນະນຳ-ພະນັກງານຫຼັກແຫຼ່ງໃນແຕ່ລະຂົງເຂດຄື: ຂົງເຂດການເມືອງ-ແນວຄິດ, ພັກ-ພະນັກງານ, ແນວລາວສ້າງຊາດ, ອົງການຈັດຕັ້ງມະຫາຊົນ, ຂົງເຂດປົກປ້ອງກົດໝາຍ, ຂົງເຂດເສດຖະກິດ, ຂົງເຂດວັດທະນະທຳ-ສັງຄົມ, ຂົງເຂດ ປກຊ-ປກສ; ທັງນີ້ ກໍເພື່ອປະຕິບັດຕາມຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023 ວ່າດ້ວຍກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ, ບົດແນະນຳ ສະບັບເລກທີ 05/ຫສພ, ລົງວັນທີ 31 ຕຸລາ 2024 ກ່ຽວກັບການກະກຽມຮ່າງເນື້ອໃນລາຍງານການເມືອງ ຂອງອົງຄະນະພັກແຕ່ລະຂັ້ນ ເພື່ອເຮັດໃນເນື້ອໃນ ຖືກຕ້ອງສອດຄ່ອງຕາມຄວາມເປັນຈິງ.
ໂອກາດນີ້, ທ່ານ ມີໄຊ ພົມເຂ ໄດ້ເວົ້າເຖິງບັນຫາ ແລະຂອດທີ່ຈະປັບແກ້ໄຂ ເປັນຕົ້ນ: ບາງເນື້ອໃນ, ປະໂຫຍກ, ຄໍາສັບ, ຄຳເວົ້າຕ່າງໆລະຫວ່າງ ວຽກພັກ ແລະວຽກລັດ; ພ້ອມນີ້ ກໍຕ້ອງໄດ້ມີການປັບປຸງຄືນ ທາງດ້ານເນື້ອໃນການຈັດຕັ້ງປະຕິບັດໜ້າທີ່ວຽກງານ ຂອງຂະ ແໜງການ ທີ່ມີແຜນໂຮມເຂົ້າກັນ ເພື່ອໃຫ້ຖືກຕ້ອງສອດຄ່ອງຕາມແນວທາງຂອງພັກວາງໄວ້.
ຂ່າວ: ອັດສະວິນ

18/07/2025

ຫົງສາ ເຜີຍແຜ່ຜົນສຳເລັດກອງປະຊຸມຄົບຄະນະບໍລິຫານສູນກາງພັກ ແລະ ຜົນກອງປະຊຸມຄົບຄະນະບໍລິຫານງານພັກແຂວງໄຊຍະບູລີ
……………………
ໃນຕອນເຊົ້າ ຂອງວັນທີ 18 ກໍລະກົດ 2025 ຢູ່ທີ່ສະໂມສອນຂອງເມືອງຫົງສາ ໄດ້ຈັດກອງປະຊຸມເຜີຍແຜ່ເຊື່ອມຊຶມຜົນສໍາເລັດກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI ແລະ ຜົນສໍາເລັດກອງປະຊຸມຄົບຄະນະບໍລິຫານງານພັກແຂວງໄຊຍະບູລີ ຄັ້ງທີ 14 ສະໄໝທີ Vll ຂຶ້ນ, ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ພອນສະຫວັນ ໄຊສົມພັນ ກຳມະການພັກແຂວງ ເລຂາຄະນະບໍລິຫານງານພັກເມືອງ, ມີກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ -ຮອງຫົວຫນ້າຫ້ອງການ, ກົມກອງ, ລັດວິສາຫະກິດສູນບໍລິການປະຈຳເມືອງ, ນາຍບ້ານ, ພະນັກງານ, ທະຫານ, ຕຳຫຼວດເຂົ້າຮ່ວມ.
ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI ໄດ້ຕີລາຄາຢ່າງພາວະວິໄສ ຕໍ່ກັບບັນດາຜົນສຳເລັດພື້ນຖານ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປະຈຳ 06 ເດືອນ ຕົ້ນປີ 2025, ຊຶ່ງເຫັນວ່າ ລັດຖະບານ ແລະ ອົງການປົກຄອງທ້ອງຖິ່ນທຸກຂັ້ນ ໄດ້ມີຄວາມພະຍາຍາມສູງ ໃນການແກ້ໄຂບັນຫາເຄັ່ງຮ້ອນໃຫ້ຜ່ອນຄາຍລົງ, ເຮັດໃຫ້ປະເທດເຮົາສາມາດຜ່ານຜ່າ ແລະ ແກ້ໄຂບັນຫາໄດ້ໂດຍພື້ນຖານ, ການພັດທະນາເສດຖະກິດ-ສັງຄົມ ຍັງຮັກສາໄດ້ຈັງຫວະການຂະຫຍາຍຕົວຢ່າງຕໍ່ເນື່ອງ ເປັນຕົ້ນ ການຜະລິດສິນຄ້າ, ການຈັດເກັບລາຍຮັບງົບປະມານ ປະຕິບັດໄດ້ຕາມຄາດໝາຍ; ຍັງຮັກສາໄດ້ສະຖຽນລະພາບທາງການເມືອງ ແລະ ສັງຄົມມີຄວາມສະຫງົບ-ປອດໄພ ໂດຍພື້ນຖານ. ກອງປະຊຸມ ໄດ້ຕີລາຄາຢ່າງກົງໄປກົງມາ ຕໍ່ຂໍ້ຄົງຄ້າງ ແລະ ສາເຫດ ທີ່ເຮັດໃຫ້ເກີດມີຂໍ້ຄົງຄ້າງ ເປັນຕົ້ນ ແມ່ນກົນໄກ, ຂອດຂັ້ນໃນການນຳພາ ຂອງເລຂາຄະນະພັກ, ຄະນະພັກ ແລະ ການບໍລິຫານ-ຄຸ້ມຄອງ ຂອງບັນດາກະຊວງ-ອົງການ ແລະ ອົງການປົກຄອງແຕ່ລະຂັ້ນ ກໍຄືການປະຕິບັດກົດໝາຍ, ລະບຽບການຕ່າງໆ ຍັງບໍ່ທັນເຂັ້ມງວດເທົ່າທີ່ຄວນ, ການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ, ອັດຕາແລກປ່ຽນ, ອັດຕາເງິນເຟີ້, ຄ່າຄອງຊີບສູງ ແລະ ປະກົດການຫຍໍ້ທໍ້ຕ່າງໆ ໃນສັງຄົມ ເປັນຕົ້ນ ບັນຫາຢາເສບຕິດ, ການຄ້າມະນຸດ, ບັນຫາອຸບັດຕິເຫດຕາມທ້ອງຖະໜົນ, ການປະລະການຮຽນ-ການສອນ ແລະ ບັນຫາແຮງງານ ທີ່ຫຼັ່ງໄຫຼໄປຕ່າງປະເທດ ຍັງບໍ່ທັນໄດ້ດີເທົ່າທີ່ຄວນ ຕໍ່ກັບບັນຫາດັ່ງກ່າວ, ກອງປະຊຸມ ໄດ້ຊີ້ນຳໃຫ້ລັດຖະບານ ສືບຕໍ່ສູ້ຊົນຈັດຕັ້ງປະຕິບັດທິດທາງ, ແຜນວຽກຈຸດສຸມ 6 ເດືອນທ້າຍປີ 2025 ໂດຍສຸມໃສ່ແກ້ໄຂບັນຫາເຄັ່ງຮ້ອນ ແລະ ບັນຫາຄວາມຫຍຸ້ງຍາກດ້ານເສດຖະກິດ-ການເງິນ, ກ່ຽວກັບການກະກຽມບັນດາເອກະສານ ກອງປະຊຸມໃຫຍ່ ຄັ້ງທີ XII ຂອງພັກ, ການດຳເນີນກອງປະຊຸມໃຫຍ່ ອົງຄະນະພັກເມືອງ-ນະຄອນ, ຮາກຖານພັກ ອ້ອມຂ້າງກະຊວງ-ອົງການ, ຮາກຖານພັກອ້ອມຂ້າງນະຄອນຫຼວງວຽງຈັນ, ແຂວງ ແລະ ຄາດຄະເນແຜນການກະກຽມດໍາເນີນກອງປະຊຸມໃຫຍ່ ອົງຄະນະພັກກະຊວງ-ອົງການ, ນະຄອນຫຼວງວຽງຈັນ ແລະ ແຂວງ.
ຫຼັງຈາກນັ້ນ ສະຫາຍ ແຫຼ້ ອອ່ນສົມບູນ ຮອງເລຂາພັກເມືອງ ຮັກສາການເຈົ້າເມືອງ ໄດ້ເຜີຍແຜ່ມະຕິກອງປະຊຸມຄົບຄະນະຄັ້ງທີ 14 ຂອງຄະນະບໍລິຫານງານພັກແຂວງ ສະໄໝທີ VII, ຕີລາຄາການນຳພາ-ຊີ້ນຳຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນ ທ້າຍປີ 2025 ຕິດພັນກັບການປະຕິບັດ 2 ວາລະແຫ່ງຊາດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການຄົ້ນຄວ້າປັບປຸງບັນດາເອກະສານ ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ກອງປະຊຸມໄດ້ຮັບຟັງແຜນການປັບປຸງກົງຈັກການຈັດຕັ້ງ ແລະ ແຜນການກະກຽມດຳເນີນກອງປະຊຸມ 3 ຂັ້ນຂອງພັກ ເພື່ອກະກຽມດຳເນີນກອງປະຊຸມໃຫຍ່ສະໄໝທີ VIII ຂອງອົງຄະນະພັກແຂວງ, ກອງປະຊຸມ ໄດ້ເປັນເອກະພາບ ແລະ ກຳນົດທິດທາງແຜນວຽກງານຈຸດສຸມ ແຕ່ນີ້ຮອດກອງປະຊຸມທ້າຍສະໄໝຂອງກອງປະຊຸມໃຫຍ່ອົງຄະນະພັກແຂວງສະໄໝທີ VII ຫຼາຍບັນຫາ, ນອກຈາກນີ້ຍັງໄດ້ຮັບຟັງ ເອກະສານປັບປຸງກົງຈັກການຈັດຕັ້ງຢູ່ຂັ້ນທ້ອງຖິ່ນ, ຜ່ານຂໍ້ຕົກລົງຂອງທ່ານເຈົ້າແຂວງໄຊຍະບູລີວ່າດ້ວຍການແຕ່ງຕັ້ງຜູ້ຊົງຄຸນວຸດທິຕາງໜ້າປະຊາຊົນບັນດາເຜົ່າທົ່ວແຂວງໄຊຍະບູລີ ຕື່ມອີກ.
ພາບ-ຂ່າວ: ຖວທຫົງສາ
#ຂ່າວເສດຖະກິດສັງຄົມ
#ເມືອງຫົງສາ

18/07/2025

ຄະນະຄອບຄົວການນໍາ ໃຫ້ການຊ່ວຍເຫຼືອສັງຄົມລວມມູນຄ່າທັງໝົດ 29,77 ຕື້ກີບ

ຄະນະຄອບຄົວການນໍາ ແຫ່ງ ສປປ ລາວ ໄດ້ສະຫຼຸບການເຄື່ອນໄຫວໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ໃນໂອກາດສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 70 ປີ (ວັນທີ 20 ກໍລະກົດ 1955-ວັນທີ 20 ກໍລະກົດ 2025), ຊຶ່ງພິທີໄດ້ຈັດຂຶ້ນທີ່ນະຄອນຫຼວງວຽງຈັນ ໃນວັນທີ 18 ກໍລະກົດ 2025 ນີ້, ໂດຍໃຫ້ກຽດເຂົ້າຮ່ວມມີ ທ່ານນາງ ປານີ ຢາທໍ່ຕູ້ ຮອງປະທານປະເທດແຫຼ່ງ ສປປ ລາວ, ທ່ານ ສອນໄຊສີພັນດອນ ນາຍົກລັດຖະມົນຕີ, ທ່ານນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີບັນດາທ່ານຄອບຄົວການນໍາ, ແມ້່ປ້າອາວຸໂສ, ນັກທຸລະກິດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ລາຍລະອຽດເພິ່ມເຕີມທີ່ລິງ: 👇🏻👇🏻
http://www.sethakit-psx.la/detail13981.html
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

18/07/2025

ລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ ຕ້ອນຮັບ ທູດ ອົດສະຕາລີ

ເພື່ອສືບຕໍ່ຮັດແໜ້ນສາຍພົວພັນການຮ່ວມມື ສອງຝ່າຍ ໃຫ້ມີຄວາມແໜ້ນແຟນ ໃນຕອນເຊົ້າວັນທີ 17 ກໍລະກົດ 2025 ຢູ່ທີ່ຫ້ອງຮັບແຂກກະຊວງ ທ່ານ ປອ. ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ສິ່ງແວດລ້ອມ ໄດ້ໃຫ້ກຽດຕ້ອນຮັບ ການເຂົ້າຢ້ຽມຢາມພົບປະ ຂອງ ທ່ານ ນາງ. ເມເກັນ ໂຈເນສ (Megan Jones) ເອກອັກຄະລັດຖະທູດ ອົດສະຕາລີ ປະຈໍາ ສປປ ລາວ. ພ້ອມນີ້ ມີບັນດາຜູ້ແທນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ຈຸດປະສົງການເຂົ້າຢ້ຽມຢາມພົບປະ ໃນຄັ້ງນີ້ ແມ່ນເພື່ອລາຍງານຄວາມຄືບໜ້າ ກ່ຽວກັບ ໂຄງການ ກະສິກຳທີ່ມີຄວາມທົນທານຕໍ່ສະພາບດິນຟ້າອາກາດ (LAARI) ແລະ ໂຄງການ ສູນຄົ້ນຄວ້າກະສິກຳສາກົນຂອງອົດສະຕາລີ (ACIAR), ລວມທັງໂຄງການ ສ້າງຄວາມເຂັ້ມແຂງໃນການຄົ້ນຄວ້າ ດ້ານນະໂຍບາຍ (Nexus) ແລະ ຄວາມຄືບໜ້າ ກ່ຽວກັບ ກາລະໂອກາດດ້ານການຄ້າ ແລະ ການລົງທຶນ ໃນຂະແໜງກະສິກໍາ ທີ່ທາງລັດຖະບານ ອົດສະຕາລີ ໃຫ້ໄດ້ການຊ່ວຍເຫຼືອ ແລະ ສະໜັບສະໜູນ ໃນໄລຍະຜ່ານມາ. ໂອກາດນີ້, ສອງຝ່າຍ ຍັງໄດ້ປຶກສາຫາລື ກ່ຽວກັບ ວຽກງານການຮ່ວມມືຫຼາຍດ້ານເຊັ້ນ: ບັນຫາດ້ານການຄຸ້ມຄອງຊັບພະຍາກອນນໍາ, ດ້ານສິ່ງແວດລ້ອມ, ວຽກງານການປ້ອງກັນ ແລະ ຮັບມືຕໍ່ກັບກັບການປ່ຽນແປງດິນຟ້າອາກາດ. ເນື່ອງໃນໂອກາດພົບປະຄັ້ງນີ້ ທ່ານ ລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ ໄດ້ລາຍງານກ່ຽວກັບ ບັນດາແຜນງານ ທີ່ກະຊວງ ໄດ້ຈັດຕັ້ງປະຕິບັດໂດຍສະເພາະແມ່ນ 4 ແຜນງານໃຫຍ່ຄື: ແຜນການຄໍ້າປະກັນທາງດ້ານສະບຽງອາຫານ, ແຜນງານຜະລິດກະສິກໍາເປັນສິນຄ້າ, ແຜນງານປົກປັກຮັກສາປ່າໄມ້ ແລະ ແຜນງານແກ້ໄຂຄວາມທຸກຍາກໃນເຂດຊົນນະບົດ. ຊຶ່ງນອກຈາກ 4 ແຜນງານນີ້ແລ້ວ ພາຍຫຼັງກະຊວງໄດ້ໂຮມເຂົ້າກັນ ເຮັດໃຫ້ບັນດາແຜນງານຂອງກະຊວງເພີ່ມຂຶ້ນອີກ ໂດຍສະເພາະແມ່ນ ແຜນງານ ແຜນງານພັດທະນາທີ່ດິນ, ສິ່ງແວດລ້ອມ, ຊັບພະຍາກອນນໍ້າ ແລະ ແຜນງານຮັບມືຕໍ່ກັບການປ່ຽນແປງດິນຟ້າອາກາດ.
ໃນຕອນທ້າຍ ທ່ານ ລັດຖະມົນຕີ ໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ກັບການເຂົ້າຢ້ຽມຢາມພົບປະ ພ້ອມທັງສະເໜີ ໃຫ້ ທ່ານ ເອກອັກຄະລັດຖະທູດ ເວົ້າລວມ, ເວົ້າສະເພາະແມ່ນ ລັດຖະບານອົດສະຕາລີ ສືບຕໍ່ໃຫ້ການຊ່ວຍເຫຼືອໃຫ້ສະໜັບສະໜູນ ໃນວຽກງານຂະແໜ້ງການກະສິກໍາ ແລະ ສິ່ງແວດລ້ອມ ໃຫ້ມີບາດກ້າວໃໝ່ໃນຕໍ່ໜ້າ.
ຂ່າວ: ສອນເພັດ ສຸລິພອນ
#ຂ່າເສດຖະກິດສັງຄົມ
#ຂ່າວສານກະສິກຳແລະສິ່ງແວດລ້ອມ

18/07/2025

ສາທາລະນະສຸກແຂວງເຊກອງ ເອົາໃຈໃສ່ປະຕິບັດຄາດໝາຍຕົວຊີ້ວັດຕ້ານພະຍາດຕາມລະດູການ
ທ່ານ ບົວໄລ ເກດຈັນ ຫົວໜ້າພະແນກສາທາລະນະສຸກແຂວງເຊກອງ ໄດ້ໃຫ້ສຳພາດ ເມື່ອບໍ່ດົນນີ້ວ່າ: ໄລຍະຜ່ານມາ, ພະແນກສາທາລະນະສຸກແຂວງເຊກອງ ໄດ້ຈັດຕັ້ງປະຕິບັດຕາມພາລະບົດບາດໜ້າທີ່ຄວາມຮັບຜິດຊອບຂອງຕົນຢ່າງເປັນເຈົ້າການ ໂດຍໄດ້ສຸມໃສ່ປະຕິບັດບັນດາຄາດໝາຍ ບວກກັບການປະຕິບັດ 4 ວຽກງານໃຫຍ່ ທີ່ເປັນບູລິມາສິດ ແລະ 1 ວຽກງານປິ່ນອ້ອມ; ພ້ອມນັ້ນ ກໍປະ ຕິບັດຍຸດທະສາດ ຂອງກະຊວງສາທາລະນະສຸກ ໃນ 8 ແຜນງານ, 49 ແຜນງານຍ່ອຍ ແລະ 133 ໂຄງການ, 5 ວຽກບູລິມະສິດ ປະຕິຮູບສາທາລະນະສຸກ ແລະ 11 ຕົວຊີ້ວັດ ຕິດພັນກັບການປະຕິບັດຫຼັກການ 5 ດີ 1 ພໍໃຈ ໃຫ້ເປັນຈິງ.
ໂດຍໃນ 6 ເດືອນ ຕົ້ນປີ 2025 ເຫັນວ່າ: ການປະຕິບັດ ມີຫຼາຍອັນທີ່ມີຄວາມຄືບໜ້າ; ໃນນັ້ນ, ການຈັດຕັ້ງປະຕິບັດ 11 ຕົວຊີ້ວັດ ຕ້ານພະຍາດຕາມລະດູການ ສາມາດບັນລຸໄດ້ຕາມຄາດໝາຍ ຄຽງຄູກັນນີ້ ກໍໄດ້ເອົາໃຈໃສ່ 5 ວຽກຫຼັກ ຄື: ການເຝົ້າລະວັງການລາຍງານນັບແຕ່ຂັ້ນບ້ານຂຶ້ນມາຢ່າງເປັນປົກກະຕິ ແລະສາມາດເຊື່ອຖືໄດ້, ການເຝົ້າລະວັງການຕອບໂຕ້ ຕິດຕາມຢ່າງໃກ້ຊິດ ເພື່ອຕອບໂຕ້ໃຫ້ທັນການ, ຈັດກອງປະຊຸມຄະນະກຳມະການຂັ້ນຕ່າງໆ ເພື່ອວາງແຜນກວດກາ ຊຸກຍູ້ໃຫ້ປະຊາຊົນ ມີສ່ວນຮ່ວມ, ສ້າງເງື່ອນໄຂອຳນວຍຄວາມສະດວກ ເພື່ອສະໜອງຢາ ແລະອຸປະກອນການແພດ ໃຫ້ບັນດາສະຖານທີ່ບໍລິການ 4 ເມືອງ, 1 ໂຮງໝໍ ລວມທັງຕິດຕາມກວດກາຄຸນນະພາບເຄື່ອງດື່ມ-ສະບຽງອາຫານ ເພື່ຮັບປະກັນຄວາມປອດໄພໃຫ້ແກ່ຜູ້ບໍລິໂພກ.
ທ່ານ ບົວໄລ ເກດຈັນ ຫົວໜ້າພະແນກສາທາລະນະສຸກແຂວງ ໃຫ້ຮູ້ຕື່ມວ່າ: ນອກຈາກການຈັດຕັ້ງປະຕິບັດທີ່ກ່າວມານັ້ນ, ຍັງໄດ້ຖືສໍາຄັນ ຕໍ່ການປະຕິບັດຫຼັກການ 5 ດີ 1 ພໍໃຈ ທີ່ເປັນສ່ວນສໍາຄັນໃນການຍົກສູງຄຸນນະພາບການບໍລິການ ໄປຄຽງຄູ່ກັບການສຶກສາດ້ານການເມືອງແນວຄິດ, ຈັນຍາບັນ, ຈັນຍາທຳຂອງແພດ, ພະຍາບານ ທີ່ໃຫ້ບໍລິການດ້ານສຸຂະພາບຂອງປະຊາຊົນ ໂດຍຢຶດໝັ້ນຕໍ່ວິຊາຊີບຕົນເອງ ກໍຄືຢຶດໝັ້ນໃນຫຼັກຂອງວິຊາການ; ເຖິງຢ່າງໃດກໍຕາມ, ຕະຫຼອດໄລຍະຜ່ານມາ, ແພດ-ໝໍ ກໍໄດ້ເຮັດໜ້າທີ່ຢ່າງເຕັມກຳລັງໃນການຮັກສາສຸຂະພາບໃຫ້ແກ່ປະຊາຊົນແລ້ວ ແຕ່ກໍຂໍໃຫ້ປະຊາຊົນບັນດາເຜົ່າ ຈົ່ງເອົາໃຈໃສ່ຮັກສາສຸຂະພາບຂອງຕົນຕື່ມອີກ ເພາະໃນຊ່ວງລະດູການນີ້ ເປັນລະດູຝົນ ແລະ ມີຄວາມສ່ຽງຕໍ່ການເກີດການລະບາດຂອງພະຍາດຕາມລະດູການ ໂດຍສະເພາະ ພະຍາດໄຂ້ເລືອດອອກ ຫຼື ພະຍາດໄຂ້ຍູງລາຍ ແລະ ພະຍາດອື່ນໆ ໂດຍໃຫ້ພ້ອມກັນເປັນເຈົ້າການປະຕິບັດຫຼັກການ 5 ປ ວາງອອກຢ່າງເຂັ້ມງວດ, ເປັນເຈົ້າການຮັກສາອະນາໄມ, ຮັກສາຄວາມສະອາດທີ່ຢູ່ອາໄສ ການກິນ-ການຢູ່ ເພື່ອຫຼີກລຽງຈາກການເກີດພະຍາດ ທີ່ຈະນຳໄປສູ່ຜົນເສຍຫາຍທາງດ້ານຊັບສິນ ແລະ ຊີວິດຂອງປະຊາຊົນ.

ຂ່າວ: ອັດສະວິນ
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

18/07/2025

ເຈົ້າແຂວງສະຫວັນນະເຂດ ໂອ້ລົມການນໍາເມືອງໄຊບູລີ ກ່ຽວກັບການຜັນຂະຫຍາຍມະຕິກອງປະຊຸມໃຫຍ່
ໃນວັນທີ 16 ກໍລະກົດ 2025, ທ່ານ ບຸນໂຈມ ອຸບົນປະເສີດ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ, ມີ ທ່ານ ໂພໄຊ ໄຂຄຳພິທູນ ຮອງເຈົ້າແຂວງສະຫວັນນະເຂດ, ຫົວໜ້າ-ຮອງຫົວໜ້າພະແນກການ ກົມກອງອ້ອມຂ້າງແຂວງ ໄດ້ໄປພົບປະໂອ້ລົມພະນັກງານການນຳເມືອງໄຊບູລີ ເພື່ອຮັບຟັງການລາຍງານກ່ຽວກັບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ອົງຄະນະພັກເມືອງ, ໂດຍມີທ່ານ ຄາລາໂຊ ຫຼຸຍບົວທອງ ເລຂາຄະນະບໍລິຫານງານພັກເມືອງໄຊບູລີ ພ້ອມຄະນະ ເຂົ້າຮ່ວມ.......
ລາຍລະອຽດເພິ່ມເຕີມທີ່ລິງ: 👇🏻👇🏻
http://www.sethakit-psx.la/detail13980.html
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

18/07/2025

ເມືອງຄອບ ໄດ້ຮັບຜົນກະທົບຈາກໄພພິບັດນໍ້າຖ້ວມໃນເບື້ອງຕົ້ນຈໍານວນ 2 ຕື້ກວ່າກີບ
ໃນວັນທີ 16-17 ກໍລະກົດຜ່ານມານີ້ ນໍ້າໄດ້ຖ້ວມຊຸຢ່າງກະທັນຫັນ ຢູ່ຫຼາຍບ້ານພາຍໃນເມືອງຄອບ ແຂວງໄຊຍະບູລີ ເນື່ອງຈາກມີຝົນຕົກໜັກຕິດຕໍ່ກັນເປັນເວລາຫຼາຍວັນ ຈົນເກີດມີນໍ້າໄຫຼຊຸ ເຮືອນຊານ ບ້ານຊ່ອງຂອງປະຊາຊົນ ໄດ້ຮັບຄວາມເສຍຫາຍຢ່າງໜັກໜວງ. ອີ່ງຕາມການລາຍງານຜົນເສຍຫາຍໃນເບື້ອງຕົ້ນ ຈາກໄພພິບັດນໍ້າຖ້ວມໃນຄັ້ງນີ້ ຂອງຄະນະກໍາມະການຕ້ານໄພພິບັດຂັ້ນເມືອງໃຫ້ຮູ້ວ່າ: ໃນທົ່ວເມືອງຖືກຜົນກະທົບທັງໝົດຈໍານວນ 6 ບ້ານຄື: ບ້ານຜາບ່ອງ, ມ່ວງດອນມູນ, ເຄິ່ງຫຼັກຄໍາ, ປາງໄຮ, ປ່າຄາ ແລະ ບ້ານນໍ້າພ້າວ ປະກອບມີ 258 ຄອບຄອບ, ມີ 1,336 ຄົນ ຍິງ 628 ຄົນ ຊຶ່ງຄິດເປັນມູນຄ່າເສຍຫາຍທັງໝົດ 2,486,200,000 ກີບ
ປັດຈຸບັນ, ຄະນະນໍາຂອງເມືອງພ້ອມດ້ວຍເຈົ້າໜ້າທີ ທີ່ກ້ຽວຂ້ອງພວມເລັງ ໃຫ້ການຊ່ວຍເຫຼືອບັນເທົ່າທຸກໃນເບື້ອງຕົ້ນ ໃຫ້ບັນດາຜູ້ໄດ້ຮັບຜົນກະທົບໃນຄັ້ງນີ້.
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

18/07/2025

ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນວ່າ: ພະຍາກອນອາກາດ ປະຈໍາວັນທີ 18 ກໍລະກົດ 2025, ຄວາມກົດດັນອາກາດຕໍ່າ ຍັງປົກຄຸມຢູ່ທົ່ວທຸກພາກປະເທດລາວດ້ວຍກໍາລັງ ປານກາງ ຫາ ແຮງ, ສົມທົບກັບລົມມໍ ລະສຸມຕາເວັນຕົກສຽງໃຕ້ພັດປົກຄຸມ, ຊຶ່ງຈະເຮັດໃຫ້ມີຝົນຕົກຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ທົ່ວ ແລະ ຕົກປານກາງ ຢູ່ ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ.
ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນ ແລະ ອົງການປົກຄອງທ້ອງຖິ່ນແຕ່ລະພາກສ່ວນ ຜູ້ທີ່ອາໄສຢູ່ໃກ້ລຽບຕາມ ແມ່ນໍ້າ ແລະ ເຂດພື້ນທີ່ຕໍ່າ ເຊັ່ນ: ຕາມລໍານໍ້າ ແລະ ແຄມແມ່ນໍ້າ, ແຂວງຜົ້ງສາລີ, ບໍ່ແກ້ວ, ຫລວງນໍ້າທາ, ອຸດົມໄຊ, ໄຊຍະບູລີ, ໄຊສົມບູນ ຈົ່ງມີສະຕິລະມັດລະວັງ ແລະ ກຽມພ້ອມຮັບມືກັບສະພາບຝົນຍັງຕົກຕິດຕໍ່ກັນຫລາຍວັນ ທີ່ຈະເຮັດໃຫ້ເກີດດິນເຈື່ອນ, ນໍ້າຖ້ວມຊຸ ແລະ ນໍ້າຖ້ວມຍື່ງ ທີ່ຈະສົ່ງຜົນເສຍຫາຍແກ່ຊີວິດ ແລະ ຊັບສິນອັນມີຄ່າ, ສຳລັບຜູ້ທີ່ຈະເດີນທາງຜ່ານພູສູງ ຕ້ອງໄດ້ກວດສອບສະພາບອາກາດ, ສະພາບຫົນທາງ ແລະ ສະພາບຍານພາຫະນະ ກ່ອນອອກເດີນທາງ. ພ້ອມນີ້ ຂໍໃຫ້ ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ກະຊວງກະສິກຳ ແລະ ສິ່ງແວດລ້ອມ ຢ່າງເປັນປະຈໍາ.
ພາກເໜືອດ້ານຕາເວັນອອກ: (ຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍຢູ່ທົ່ວໄປ ແລະ ຕົກປານກາງ ຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50% ຂອງພາກ. ອຸນຫະພູມໃນລະຫວ່າງ 19 – 28 ອົງສາ.
ພາກເໜືອດ້ານຕາເວັນຕົກ (ແຂວງ ຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ຈະມີຝົນຕົກຟ້າຮ້ອງຟ້າເຫລື້ອມ ໃນລະດັບຄ່ອຍ ຫາ ປານກາງຢູ່ທົ່ວໄປ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60% ຂອງພາກ. ອຸນຫະພູມ ໃນລະຫວ່າງ 21 – 28 ອົງສາ.
ນະຄອນຫລວງວຽງຈັນ: ຈະມີຝົນຕົກໃນລະດັບຄ່ອຍຢູ່ເກືອບທົ່ວໄປ ແລະ ຕົກປານກາງ ຢູ່ບາງບໍລິເວນ ພ້ອມມີລົມພັດແຮງເປັນ ບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50% ອຸນຫະພູມໃນລະຫວ່າງ 25 - 28 ອົງສາ.
ພາກກາງ (ແຂວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ): ຈະມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍ ຫາ ປານກາງ ຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50% ຂອງພາກ. ອຸນຫະພູມໃນລະຫວ່າງ 24 - 39 ອົງສາ.
ແຂວງໄຊສົມບູນ: ຈະມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍ ຫາ ປານກາງ ຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນເທົ່າ ກັບ 60% ອຸນຫະພູມໃນລະຫວ່າງ 19 - 27 ອົງສາ.
ພາກໃຕ້ (ແຂວງ ສາລະວັນ, ຈຳປາສັກ, ເຊກອງ ແລະ ອັດຕະປື): ຈະມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍ ຫາ ປານກາງ ຢູ່ບາງທ້ອງຖິ່ນພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50% ຂອງພາກ. ອຸນຫະພູມໃນ ລະຫວາງ 24-30 ອົງສາ.
ສໍາລັບເຂດພູພຽງບໍລະເວນ: ອາກາດເຢັນ, ພ້ອມຈະມີຝົນຕົກຟ້າຮ້ອງຟ້າເຫລື້ອມໃນລະດັບຄ່ອຍ ຫາ ປານກາງ ຢູ່ບາງບໍລິເວນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50%. ອຸນຫະພູມໃນລະຫວ່າງ 25 – 28 ອົງສາ.
ອ່ານຂ່າວອື່ນໆ ຫຼືຍ້ອນຫຼັງໄດ້ທີ່: www.sethakit-psx.la
#ຂ່າວເສດຖະກິດສັງຄົມ #ໜັງສືພິມເສດຖະກິດສັງຄົມ

ຂ່າວເສດຖະກິດ-ສັງຄົມ

20/07/2025

20/07/2025

19/07/2025

19/07/2025

19/07/2025

18/07/2025

18/07/2025

18/07/2025

18/07/2025

18/07/2025

18/07/2025

18/07/2025

Address

Telephone

Website

Alerts

Contact The Business

Shortcuts

Share