23/07/2026
இஸ்லாம் வாழ்வின் சகல துறைகளுக்கும் வழிகாட்டியுள்ளது.
இஸ்லாமிய வழிகாட்டலில் பிறந்த தினம் கொண்டாடுதல் என்றொரு அம்சம் பற்றி எங்குமே பேசப்பட்டதில்லை. நபி(ஸல்) அவர்கள் தனக்காகவோ, தனது குடும்பத்தினர், தனக்கு முன் வாழ்ந்த நபிமார்களுக்காகவோ பிறந்த தினம் கொண்டாடியதில்லை.
சத்திய வழிநடந்த நான்கு கலீபாக்கள் கூட நபி (ஸல்) அவர்களுக்காகப் பிறந்த தினம் கொண்டாடியதில்லை. நபித்தோழர்களும் கொண்டாடியதில்லை.
அப்படியென்றால், சுவனம் செல்லும் ஸுன்னத் வல் ஜமாஅத் - நபிவழியிலும் நபித்தோழர்கள் மரபிலும் இல்லாத இந்த மீலாது, மவ்லிது என்பது சுன்னத் வல்ஜமாஅத்தின் வழிகாட்டலுக்கு மாற்றமான நடைமுறை என்பது உறுதியாகின்றது.
ஷீஆக்களான பாத்திமிய்யாக்களில் ஒரு பிரிவினரால் ஆரம்பிக்கப்பட்டதே இந்த மீலாது, மவ்லிது விழாக்களாகும். இதை அறியாத சுன்னத் வல் ஜமாஅத் மக்களும் ஷீஆக்களின் இந்த வழிமுறையைப் பின்பற்றி வருகின்றனர்.
“மவ்லூத்" என்றால் குழந்தை என்பது அர்த்தமாகும். “மவ்லித்" என்றால் பிறந்த இடம், பிறந்த நாள், காலம் என்று அர்த்தப்படும். நபியவர்களதும் வலிமார்களினதும் பிறந்த தினத்தை முன்னிட்டு அரபியில் இயற்றப்பட்ட பாடல்களை மக்கள் பாடி வருகின்றனர். அந்தப் பாடல்கள் ஷிர்க்கான அம்சங்களை உள்ளடக்கியுள்ளன. வலிமார்கள் பெயரில் உருவாக்கப்பட்ட பாடல் சொல்லும் அற்புத “கிஸ்ஸா" - கதைகள் - அவர்களை அல்லாஹ்வைப் போன்ற ஆற்றல்கள் உள்ளவர்களாக உருவகிக்கின்றன.
எனவே, ஷிர்க்கான அர்த்தங்களை உடைய மவ்லிதுகளைப் பற்றி மக்களுக்கு எச்சரிக்க வேண்டியது காலத்தின் கட்டாயமாகும்.
ஒரு வேளை அந்தப் பாடல்கள் சரியாக இருந்தால்கூட, மார்க்கத்தில் இல்லாத ஒரு வணக்கத்தை உருவாக்கும் அதிகாரம் யாருக்கும் இல்லை. அப்படி உருவாக்கப்பட்ட அனைத்தும் நிராகரிக்கப்பட வேண்டிய பித்அத்துக்களாகும்.
இச்சிறிய நூல் இந்த உண்மையை உறுதியாகவும், தெளிவாகவும், சுருக்கமாகவும் தொட்டுக் காட்டுகின்றது. அத்துடன் அண்ணல் நபி மீது நாம் கொண்ட அன்பையும் நேசத்தையும் நாம் எப்படி வெளிப்படுத்தலாம் என்ற தெளிவை “உத்தம நபியை உரிய முறையில் நேசிப்போம்" என்ற இறுதிப் பகுதி தெளிவுபடுத்துகின்றது. இவ்வகையில் தமிழ் பேசும் மக்களுக்கு ஒரு கொள்கைத் தெளிவை வழங்கும் முகமாக இந்நூலை வெளியிடுவதில் தாருஸ் ஸுன்னா மகிழ்வடைகின்றது.
எமது சகோதரர்கள் இந்நூலை வாங்கி வாசிப்பதுடன் பிற சகோதரர்களுக்கும் அன்பளிப்புச் செய்து அவர்களும் சத்தியத்தை உணர உதவ வேண்டும் என்று அன்புடன் வேண்டிக் கொள்கின்றேன்.
எல்லாம் வல்ல அல்லாஹ் எமது பணிகளை அங்கீகரிப்பானாக!
இவண்
பணிப்பாளர்,
தாருஸ் ஸுன்னா பதிப்பகம்,
பறகஹதெனிய.
