15/08/2024
සමහරවිට යන්න වේවි,
ආයෙ එන්නත් බැරි වේවි!
සිප වැළඳගෙන කරන සමුදීම්,
යළි දිනෙක මුණගැහෙන ගිවිසීම්
ඒ කිසි දෙයක් නොමැතිව;
අඩුම තරමේ,
යන වගක් හෝ ඔබට නොකියාම
ආගිය තැනක මතකෙක
කොහේ හෝ ඔබ අතහැර
සමහරවිට යන්න වේවි!
ප්රාතිහාර්ය සිදු නොවේවි;
ඔබ බලා සිටියාට,
මා බලා සිටියාට
කිසිවක්ම කිසි දාක සිදු නොවේවි
ඇවිද ගිය මංපෙත් ද
නතර වී ගිමන් හළ තුරුගොමු ද
අතීතය නිහඬවම දරද්දී;
කුණාටුවකට හසුව මැකී ගිය
වැලි තලාවක රැඳුණු
හුදෙකලා පියවරක් පරිද්දෙන්,
අඳුරු යුගයක අහඹු යම් තැනෙක
පවන් රොදකට මුහු ව
සැඟව නොපෙනී යන්න සිදුවේවි
යම් දිනෙක,
වසංගත කාලයද වියැකේවි;
කවි, ගීත ලියැවේවි,
මල් පිපී හිනැහේවි,
උණුහුමට හිරු එළිය පැතිරේවි
නම් නොදත් බොහෝ අය පිළිබඳව
මතක සටහන් පවා නොරැඳේවි
බොහෝ හිස්තැන් අතර
ඇතැම්විට යම් දිනෙක,
අප ද යලි කොහේ හෝ හමුවේවි;
සමහරවිට නොවේවි!
