11/09/2026
වසර 50කට පසු පළමු වරට ඓතිහාසික බෝවතැන්න ජලාශයේ සම්පූර්ණ නඩත්තු කටයුතු ආරම්භ කිරීමට සූදානම් කර තිබෙනවා.
කලාවැව ප්‍රදේශයේ ජනතාවට සහ ගොවිතැනට වැදගත් ජල මූලාශ්‍රයක් වන බෝවතැන්න ජලාශයේ ජලය ඉවත් කර ජලාශය පිරිසිදු කිරීම සහ අලුත්වැඩියා කිරීම මෙම ව්‍යාපෘතිය යටතේ සිදු කෙරෙනවා.
වසර ගණනාවක් පුරා ජලාශ පතුලේ එකතු වූ රොන්මඩ සහ වැලි නිසා ජලාශයේ ජලය රඳවා ගැනීමේ හැකියාව විශාල ලෙස අඩු වී තිබුණා. මුලින් ජලය ඝන මීටර් මිලියන 56ක් පමණ රඳවාගත හැකිව තිබූ අතර, එය මේ වනවිට ඝන මීටර් මිලියන 23ක් දක්වා අඩුවී තිබෙනවා.
විශේෂයෙන්ම කලාවැවට ජලය ගෙන යන උමං මාර්ගය සහ විදුලි උත්පාදන පද්ධතිය ආශ්‍රිතව රොන්මඩ තැන්පත් වීම නිසා ගැටලු ඇතිව තිබූ බව සඳහන්.
මේ සඳහා ජලාශයෙන් ඉවත් කරන ජලය කණ්ඩලම, කලාවැව සහ ඉබ්බන්කටුව ජලාශවල ආරක්ෂිතව ගබඩා කර තිබෙනවා.
ශ්‍රී ලංකා මහවැලි අධිකාරියේ අධීක්ෂණය යටතේ රුපියල් මිලියන 4ක පමණ වියදමින් සති තුනක කාලයක් මෙම නඩත්තු කටයුතු සිදු කිරීමට නියමිතයි.
නඩත්තු කටයුතු අවසන් වූ පසු කොත්මලේ ජලාශයේ ජලය භාවිත කරමින් බෝවතැන්න ජලාශය නැවත පිරවීමට සැලසුම් කර තිබෙනවා.
එමෙන්ම ඉවත් කරන වැලි රජයේ අවශ්‍යතා සඳහා ලබාදීමටද කටයුතු කරන බව සඳහන්.
ජලාශය හිස්ව පවතින කාලය තුළ පතුලේ ඇති ගැඹුරු රොන්මඩ සහිත ප්‍රදේශ අනතුරුදායක විය හැකි බැවින්, එම ප්‍රදේශ නැරඹීමට යාමෙන් හෝ ජලජ සතුන් අල්ලා ගැනීමට උත්සාහ කිරීමෙන් වළකින ලෙස ජනතාවගෙන් ඉල්ලීමක් කර තිබෙනවා.
මෙම ව්‍යාපෘතිය අවසන් වූ පසු බෝවතැන්න ජලාශයේ ජල ධාරිතාව නැවත වැඩි කර ගැනීමටත්, ගොවිබිම් සඳහා අවශ්‍ය ජලය වඩාත් හොඳින් ලබාදීමටත් හැකි වනු ඇති බව බලධාරීන් පවසනවා.
