21/08/2025
ජාතික මාධ්‍ය සංකථන ශාස්ත්‍රීය ග්‍රන්ථය - 4 වෙළුම - ජනගත කිරීමේ උත්සවය
BBCMirror.lk .
CNN-Mirror.com ' asianewsplusone.com sfmnewslk.com
ශ්‍රී ලාංකේය නූතන ජනමාධ්‍ය භාවිතය නිවැරදි දිශානිතියකට ගෙන යමින් ජනමාධ්‍ය සමාජ වගකීම ගුණාත්මකව ඉටු කිරීම උදෙසා උසස් වෘත්තීය ජනමාධ්‍ය කලාවක් මෙන්ම පුළුල් ජනමාධ්‍ය සාක්ෂරතාවයක් ගොඩනැගීමේ අරමුණින් ජනමාධ්‍ය අමාත්‍යංශයේ දැක්ම හා මෙහෙවර අනුව යමින්, රජයේ ප්‍රවෘත්ති දෙපාර්තමේන්තුව, විශ්වවිද්‍යාල ජනමාධ්‍ය අධ්‍යයන අංශ සමඟ ඒකාබද්ධවල විශ්වවිද්‍යාල ආචාර්ය, මහාචාර්ය සහ ප්‍රවීන වෘත්තීය ජනමාධ්‍යවේදීන්ගේ බුද්ධිමය දායකත්වයෙන් එළිදක්වන ජාතික මාධ්‍ය සංකථන ශාස්ත්‍රීය ග්‍රන්ථය වසරකට එක ග්‍රන්ථයක් වශයෙන් මුද්‍රණය කිරීමට දෙපාර්තමේන්තු ක්‍රියාකාරී සැලැස්ම මඟින් අනුමත කර තිබේ.
ජනමාධ්‍ය අමාත්‍යංශයේ හා රජයේ ප්‍රවෘත්ති දෙපාර්තමේන්තුවේ දැක්ම සහ මෙහෙවර අනුව රාජ්‍ය ප්‍රතිපත්තියක් ලෙස ගුණාත්මක හා වෘත්තීය ජනමාධ්‍ය කලාවක් සහ දියුණු මාධ්‍ය සාක්ෂරතාවයක් බිහි කිරීම රාජ්‍ය අරමුණ වේ.එකී වගකීම කාර්යක්ෂම හා ඵලදායි ලෙස ඉටු කිරීම සඳහා ජනමාධ්‍ය අමාත්‍යංශය, මාධ්‍ය හිමිකරුවන්, වෘත්තීය මාධ්‍යවේදීන්, ප්‍රාදේශීය මාධ්‍යවේදීන් , ජනමාධ්‍ය විද්‍යාර්ථයින්, ජනමාධ්‍ය පර්යේෂකයින්, විශ්වවිද්‍යාල ආචාර්යවරුන් ඇතුළු මෙරට මාධ්‍ය ක්‍රියාකරුවන්ගේ අදහස් හා මතවාද අනුව යමින් ජාතික මාධ්‍ය ප්‍රතිපත්තියක් ගෙන ඒමට මේ වනවිට කටයුතු කරමින් තිබේ.
දශක ගණනාවක් මුළුල්ලේ මෙරට ජනමාධ්‍ය ගමන් මගෙහි ඇති වූ විෂමතාවයන් හේතුවෙන් සමස්ථ ජනමාධ්‍යකරණයෙහි ඇති වූ බිඳ වැටීම සැළකිල්ලට ගෙන ජනමාධ්‍ය විෂයෙහි ගුණාත්මක වර්ධනයක් සඳහා රාජ්‍ය දායකත්වය ප්‍රශස්ත මට්ටමකින් ලබාදීම වැදගත් වේ. එහි අරමුණුල පරමාර්ථ මුල්කරගෙන රජයේ ප්‍රවෘත්ති දෙපාර්තමේන්තුව ශාස්ත්‍රීය හා වෘත්තීමය කතිකාවක් වෙනුවෙන් මුද්‍රණය කරන ජාතික මාධ්‍ය සංකථන ශාස්ත්‍රීය ග්‍රන්ථය මෙරට ජනමාධ්‍යවේදීන්, ජනමාධ්‍ය විද්‍යාර්ථයින්, සිවිල් සංවිධාන ඇතුළු ජනමාධ්‍ය වෘත්තිකයින්ගේ පැසසුමට ලක් වී තිබේ.
ජාතික මාධ්‍ය සංකථන ශාස්ත්‍රීය ග්‍රන්ථයේ 4 වෙළුමෙහි ප්‍රධාන අධීක්ෂණ නිලධාරී වශයෙන් රජයේ ප්‍රවෘත්ති දෙපාර්තමේන්තුවේ පර්යේෂණ අංශයේ සහකාර ප්‍රවෘත්ති අධ්‍යක්ෂ හර්ෂ .බී අබේකෝන් මහතා කටයුතු කරන අතර, ප්‍රධාන සංස්කාරක ලෙස කොළඹ විශ්වවිද්‍යාලයේ , ශ්‍රී පාලි මණ්ඩපයේ , ජනමාධ්‍ය අධ්‍යයන අංශයේ හිටපු අංශාධිපති මහාචාර්ය ධර්මකීර්ති ශ්‍රී රන්ජන් මහතා සහ ශ්‍රී පාලි මණ්ඩපයේ, ජනමාධ්‍ය අධ්‍යයන අංශයේ මහාචාර්ය ටියුඩර් වීරසිංහ මහතා කටයුතු කරන අතර සංස්කරණ මණ්ඩලයේ සෙසු සාමාජිකයන් ලෙස කොළඹ විශ්වවිද්‍යාලයේ ජනසන්නිවේදන අධ්‍යයන අංශයේ හිටපු මහාචාර්ය කමල් වලේබොඩ මහතා, යාපනය විශ්වවිද්‍යාලයේ ජනසන්නිවේදන අධ්‍යයන අංශයේ මහාචාර්ය එස්.රගුරාම් මහතා, රජරට විශ්වවිද්‍යාලයේ ජනසන්නිවේදන අධ්‍යයන අංශයේ මහාචාර්ය සේන නානායක්කාර මහතා ශ්‍රී ජයවර්ධනපුර විශ්වවිද්‍යාලයේ ජනසන්නිවේදන අධ්‍යයන අංශයේ ජ්‍යෙෂ්ඨ කථිකාචාර්ය ආචාර්ය සෙනේෂ් බණ්ඩාර දිසානායක මහතා, කැලණිය විශ්වවිද්‍යාලයේ ජන සන්නිවේදන අධ්‍යයන අංශයේ ජ්‍යෙෂ්ඨ කථිකාචාර්ය ආචාර්ය අරුණ ලොකුලියන මහතා, ශ්‍රී ජයවර්ධනපුර විශ්වවිද්‍යාලයේ ජන සන්නිවේදන අධ්‍යයන අංශයේ ජ්‍යෙෂ්ඨ කථිකාචාර්ය ආචාර්ය සේනානි හරිස්චන්ද්‍ර මහතා, කොළඹ විශ්වවිද්‍යාලයේ, ශ්‍රී පාලි මණ්ඩපයේ, ජනමාධ්‍ය අධ්‍යයන අංශයේ ජ්‍යෙෂ්ඨ කථිකාචාර්ය කලණි ඉරෝෂා ධර්මසිරි යන මහත්ම මහත්මීන් සංස්කරණ මණ්ඩලයේ සෙසු සාමාජිකයන් ලෙස කටයුතු කළහ.
මෙම ජාතික මාධ්‍ය සංකථන ශාස්ත්‍රීය ග්‍රන්ථයේ මුඛ්‍ය අරමුණ හා තේමාව ලෙස ගෝලීය මාධ්‍ය ප්‍රවණතා සැලකිල්ලට ගනිමින් '' ජනමාධ්‍යකරණය , කෘතීම බුද්ධිය සහ ගෝලීය අභියෝග'' යන මාතෘකාව යටතේ ජනමාධ්‍ය වෘත්තිකයන් විශ්ව විද්‍යාල ආචාර්යවරුන් , ජනමාධ්‍ය විද්‍යාර්ථයින්, ජනමාධ්‍ය පර්යේෂකයින් , ජනමාධ්‍ය කළමනාකරුවන් සහ ජනමාධ්‍ය පරිපාලකයින් ලිපි සම්පාදනය කර තිබේ.
ජාතික මාධ්‍ය සංකථන ශාස්ත්‍රීය ග්‍රන්ථය පළමු වෙළුම 2020 වසරේදී ජනමාධ්‍ය පර්යේෂණ අංශය විසින් සම්පාදනය කළ අතර එහි තේමාව වුයේ '' මාධ්‍යහි න්‍යායික පදනම නව මාධ්‍ය භාවිතය'' මෙම වෙළුම සඳහා විශ්වවිද්‍යාලීය ජනමාධ්‍ය අධ්‍යයන අංශවල ආචාර්යවරුන් සහ ජාතික මාධ්‍ය ආයතන වල ජ්‍යෙෂ්ඨ මාධ්‍යවේදීන් ලිපි සම්පාදනය කර තිබේ.
ජාතික මාධ්‍ය සංකථන ශාස්ත්‍රීය ග්‍රන්ථයේ දෙවන වෙළුම '' මාධ්‍ය විචාර ය සහ සංස්කෘතිය'' වෙනුවෙන් වෙන් කල අතර මේ සඳහා ද විශ්ව විද්‍යාල ආචාරයවරුන් සහ ප්‍රවීණ මාධ්‍යවේදීන්ගේ පර්යේෂණ විචාර සහ මාධ්‍ය විශ්ලේෂණයක් ඇතුලත් ලිපි 35ක් පළ කර තිබේ . මෙම ග්‍රන්ථයේ 3 වෙළුම '' සංඛ්‍යාත සංස්කෘතිය , මාධ්‍ය ආචාර්ය ධර්ම සහ නියාමනය'' වෙන්වූ අතර මෙම ග්‍රන්ථය සඳහා ද ශාස්ත්‍රීය ලිපි විශ්ව විද්‍යාලීය ජනමධ්‍ය අධ්‍යයන අංශ වල ආචාර්යවරුන් සහ ජාතික මාධ්‍ය ආයතන වල ජ්‍යෙෂ්ඨ මාධ්‍යවේදීන් ලිපි සම්පාදනය කර තිබේ.
මෙම ග්‍රන්ථයේ 4 වෙළුම ''කෘතීම බුද්ධිය හා ජනමාධ්‍යකරණය'' විෂය වෙනුවෙන් වෙන් වූ අතර මේ සඳහාද දිවයිනේ ජාතික විශ්වවිද්‍යාලවල ජනමාධ්‍ය අධ්‍යයන අංශ ආචාර්යවරුන් සහ ප්‍රවීන මාධ්‍යවේදීන්ගේ පර්යේෂණාත්මක සහ ගවේෂණාත්මක ලිපි මෙම කෘතිය හරහා පල කර තිබේ.
මෙම උත්සය 2025.08.21 දින රජයේ ප්‍රවෘත්ති දෙපාර්තමේන්තුවේ නව ශ්‍රවනාගාරයේදී සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතාගේ ප්‍රධානත්වයෙන් පැවැත්විය. මෙම උත්සව අවස්ථාවේ
මුඛ්‍ය දේශනය _ ''කෘත්‍රිම බුද්ධිය හා ජනමාධ්‍යකරණය සහ ශ්‍රී ලංකාවේ මාධ්‍ය කේෂ්ත්‍රයේ දිශානතිය’’ යන මාතෘකාව යටතේ කැලණිය විශ්වවිද්‍යාලයේ ජනසන්නිවේදන අධ්‍යයන අංශයේ අංශාධිපති ජ්‍යෙෂ්ඨ කථිකාචාර්ය ආචාර්ය මනෝජ් ජිනදාස මහතා විසින් පැවැත්වූ අතර වෘත්තීය දේශනය කොළඹ විශ්වවිද්‍යාලයේ, ශ්‍රී පාලි මණ්ඩපයේ, ජනමාධ්‍ය අධ්‍යයන අංශයේ හිටපු අංශාධිපති මහාචාර්ය ධර්මකීර්ති ශ්‍රී රන්ජන් මහතා විසින් පැවැත්විය.
මෙතෙක් නිකුත් වී ඇති ජාතික මාධ්‍ය සංකථන ශාස්ත්‍රීය ග්‍රන්ථ සියල්ලෙහි වෙළුම් රජයේ ප්‍රවෘත්ති දෙපාර්තමේන්තුවේ වෙබ් අඩවිය වන https://dgi.gov.lk ට යොමු කර ඇත. ග්‍රන්ථය සම්පාදනයට ලිපි සැපයූ මහත්ම මහත්මීන්ට ග්‍රන්ථය පිරිනැමීමක් ද උත්සව අවස්ථාවේදී සිදුවිය.
