https://www.facebook.com/864564883403946/

Ink by Iran U, Colombo (2026)

02/12/2025

පුදුම රටක නේද අපි ඉපදුනේ..? ජාතිවාදී දේශපාලනේට බෑ මේ හිත් වල තියෙන හැඟීම් දිය කරන්න...✌️

10/11/2025

- විකිණෙන ප්‍රේමය -

සද්ද නැති කණිසමට හුස්ම උඹෙ සද්ද
වද්දගෙන යහන මත අදින ගොර නින්ද
පැද්ද උන් ඇස් වහන් යන්නෙ බලු හින්ද
මන්ද උඹ නොදොඩන්නෙ මමයි අරවින්ද

කුළුදුලේ උඹ ලගට මම ආපු හින්දා
උඹ උනත් මගෙ පහස රහසින්ම වින්දා
තැළුනු පෙති මත කඳුළු ගලා ගිය හින්දා
අන්තිමට උඹ එදා මගේ පාද වැන්දා

දන්නෙ නෑ උඹ කාගෙ කවුරුදැයි කියලා
ලොල් උනා උඹ වෙතට මුදු පහස විඳලා
රෑ මැද්දෙ ඇහැරුණත් උඹෙ කෙඳිරි ඇහිලා
සත්තකින් උඹ කිව්වෙ, මයෙ දරුවා කියලා

දෙන්න හැකි හැමදේම උඹ මෙමට දුන්නූ
අල්ලන්න හදන විට ළැම උඹේ පිරුණූ
නවත්තපු කාරණා දැණුනි හිත ඉරුණූ
හැඟීමක් මට දැනුණි බිඳු කඳුළු හෙලුණූ

මොණර කොළ දකින විට උඹෙ දෑස තෙමුණී
විට්ටමට හිස තියා ඇස් පියා ගැණුනී
යන්තමට අඩ දෑසෙ කවුළුපත් ඇරුණී
උඹෙ පපුවෙ නවතින්න මටත් ඉඩ තිබුණී

- ඉරාන් යූ කුමාරගේ -

10/11/2025

අලුතෙන් ඩ්‍රයිවින් ලයිසන් එකක් ගන්න එකයි තියෙන ඩ්‍රයිවින් ලයිසන් එක අලුත් කරගන්නවයි කියන්නෙ ඉතින් ලංකාව ඇතුලෙ ගොඩක් වෙලාවට මහ වාත වැඩක් කියල ගොඩක් අය කියන කාරණයක්නෙ. ඉතිං මගෙ ලයිසන් එකත් කල්ඉකුත් වීමේ දිනය ලඟටම ඇවිල්ල කියල දැකපු නිසා මාත් රෙද්ද ගිනි අරන් වගේ මුලින්ම කලේ මේක අලුත් කරගන්නෙ කොහොමද කියල යාලුවොන්ට කෝල් කර කර අහපු එකයි අන්තර්ජාලය පීර පීර බලපු එකයි.

ගොඩක් අය කරන්නෙ මෙඩිකල් එක ගන්න එක දවසකුයි ලයිසන් එක ගන්න තවත් දවසකුයි කැප කරන එක. හැබැයි හරියට ප්ලෑන් කරල ගියොත් ලේසියෙන්ම එක දවසකින් වැඩ දෙකම කරගන්න පුලුවන්.

මේකෙ ලියන්නම් මං ලයිසන් එක අලුත් කරගන්න කරපු දේවල් පියවරෙන් පියවර අලුත් ගාස්තුත් එක්කම. කාටහරි ප්‍රයෝජනවත් වෙයි.

ලයිසන් එක අලුත් කරගන්න ඔයාට ඕන වෙනවා,
ජාතික ප්‍රවාහන වෛද්‍යාතනයේ වෛද්‍ය වාර්තාව ජාතික හැඳුනුම්පත පැරණි රියදුරු බලපත්‍රය

- වෛද්‍ය වාර්තාව ලබාගැනීම -

මේක ඔය ආවට ගියාට දොස්තරලගෙන් ගන්න මෙඩිකල් එකක් නෙමේ. මේක ගන්න ඕන ජාතික ප්‍රවාහන වෛද්‍යාතනයෙන්. ප්‍රධාන ශාඛාව තියෙන්නෙ නුගේගොඩ. තව ශාඛා ප්‍රාදේශීයව තියෙනව. මට ලඟ නිසා මං ගියේ නුගේගොඩට. යන්න කලින් 225 ට කෝල් එකක් දීලා හරි echanneling.lk වලින් හරි තමන් යන ශාඛාවෙන් වෙලාවක් වෙන් කරගන්න පුලුවන්. E- channeling හරහා කරගන්නවනං ඔයාට රු.1700ක් ගෙවන්න වෙනවා. නැත්තං රු. 1500යි ගාස්තුව වෙන්නෙ.

ඔයාට වෙලාවක් වෙන් කරගන්න බැරි උනානං ප්‍රශ්නයක් නෑ ඔයාගෙ ෆොටෝ එක ගහපු ටෝකන් එකක් ඔයාට කවුන්ටරෙන් දෙනවා. ඔයා ඒකත් අරං 02 ශාලාවට ගියාම ඔයාව ආපු පිලිවෙලට ඇතුලට ගන්නවා. එක පාර ලොකු පිරිසක් ඇතුලට ගන්න නිසා ප්‍රශ්නෙකුත් නෑ.

ඇතුලට යද්දි එහෙන් දුන්නු ටෝකන් එකේ ඔයාගෙ ෆෝන් නම්බරය ලියල අත්සන් කරගෙන යන්න. ඇතුලට ගියාම මුලින්ම කරන්නෙ ඔයාගෙ උස මනින එක. ඔයා සෙරප්පු දෙකක් දාගෙන යන එක තමා ගොඩක්ම පහසු. මොකද සැරෙන් සැරේ ගලවන්න වෙනවා.

ඊට පස්සෙ ඔයාව යවනව 04 කවුන්ටරේට. එතනින් ඔයාව රෙජිස්ටර් කරගන්නව. ඔයා එතනට ඔයාගෙ ජාතික හැඳුනුම්පතයි පරණ ලයිසන් එකයි ඔයාට දුන්නු ටෝකන් එකයි ඉදිරිපත් කරන්න ඕන. ඔයා ඔන්ලයින් ඇපොයිමන්ට් එක දාලා මුදල් ගෙවල තියෙන කෙනෙක් නම් ඒක මෙතනදි කියන්න ඕන අනිවාර්‍යෙන්ම. එතනින් ඔයාගෙ තොරතුරු රෙජිස්ටර් කරල ඔයාගෙ ෆොටෝ එකකුත් ගන්නවා. ඊට පස්සෙ ඔයාව යවනවා 05 කවුන්ටරේට.

ඒ තමා කැෂියර් එක. ඔයා රු. 1500 ගෙව්වම ඔයාට දෙන රිසිට් එකත් අරං ඔයා යන්න ඕන ඒ ලඟම තියෙන රසායනාගාරෙට. එතන්ටත් ආපු පිලිවෙලට ලොකු පිරිසක් ඇතුලට ගන්නවා. එතනට ඔයාගෙ ජාතික හැඳුනුම්පත, පරණ ලයිසන් එක, රිසිට් එක ඔක්කොම පෙන්නන්න ඕන ඒ නිසා අතේම තියාගන්න. ඔයාගෙ ලේ වර්ගය සහ සීනි මට්ටම එතනින් චෙක් කරල ඔයාව යවනවා පළවෙනි මහලට.

පළවෙනි මහලෙ තමා වෛද්‍ය පරීක්ෂණය කරන්නෙ. උඩ ගියාම ඔයා දකියි සෑහෙන්න පිරිසක් ඉන්නව. ඒත් බය වෙන්න එපා. එතන තියෙන ඩිජිටල් තිරයෙ පෙන්නන අංක පිලිවෙලට අදාල කාමරයට යන්නයි තියෙන්නෙ. ඒ කාමර ඇතුලටත් එක වර දහයක් විතර ගන්නවා. එතනදිත් සෙරප්පු සපත්තු ගලවලා ෂූ රැක් එකෙන් තියල ඇතුලට යන්නොනෙ.

ඔයා ඇතුලට යද්දිම ඔයාගෙ අසම්පූර්ණ වෛද්‍ය වාර්තාව ඩොක්ටර් ලගට ඇවිල්ලත් ඉවරයි. ඔයාගෙ අත්සන වාර්තාවට අරං ඔයාව ඩොක්ටර් පරීක්ෂා කරන්න පටන් ගන්නව. ඔයා විශේෂ රෝග වලට බෙහෙත් ගන්නවනං හංගන්නැතුව කියන්න. රුධිර පීඩනය, ඔයාට අත් කකුල් වල ඇඟිලි, හන්දි දිග අරින්න පුලුවන්ද, ඇස් පෙනීම කොහොමද ඔය ඔක්කොම එතනදි චෙක් කරනවා. අමතක නොකර දණහිස් වැලමිට පේන්න නවාගන්න පුලුවන් ඇඳුමක් ඇඳගෙන යන්න.

සියල්ල අවසාන උනාට පස්සෙ ඔයාගෙ සෞඛ්‍ය තත්වය, රියදුරු බලපත්‍රය ලබාගැනීමට තරම් සුදුසු නම් ඔයාට සම්පූර්ණ වෛද්‍ය වාර්තාව ලැබෙනවා. ඒක ඔයාගෙ නම කතා කරාම ගිහින් අත්සන් කරල ගන්න පුලුවන්.

ඇත්තටම ජාතික ප්‍රවාහන වෛද්‍ය ආයතනයෙ නුගේගොඩ ශාඛාව හරිම කාර්‍යක්ෂමයි. මට මේ ඔක්කොම කරගෙන මෙඩිකල් එක අතටගන්න ගියේ පැයක් වගේ කාලයක්.

- රියදුරු බලපත්‍රය අලුත් කරගැනීම -

මේක ප්‍රාදේශීය වශයෙන් කරගන්නත් පුලුවන්. හැබැයි one day service එක තියෙන්නෙ වේරහැර විතරයි මං හිතන්නෙ. මේක තමා ඉතිං වාත වෙන වැඩේ. හැබැයි ඔයාගෙ දක්ෂතාවය මත වැඩේ ඉක්මන් කරගන්න බැරිකමක් නෑ. තමන්ගෙ වැඩේ ඉක්මන් කරගන්න චුට්ටක් කට්ට උනා කියල අවුලක් වෙන්නෙත් නෑනෙ. මේ මං මේක කරගත්තු විදිය.

වේරහැර කාර්‍යාලය ඇතුලට යන්න අනිවාර්යයෙන්ම ඔයා ඔන්ලයින් ඇපොයිමන්ට් එකක් දාගන්නම ඕනෙ. මේකට කිසිම ගෙවීමක් යන්නෙ නෑ. දෙපාර්තමේන්තු වෙබ් සයිට් එකට ගියාම ඔයාට ලේසියෙන්ම ඇපොයිමන්ට් එකක් දාගන්න පුලුවන්. ඔයාට එනවා SMS එකක්. මොකද එතන සිකුරිටිගෙ ඉඳන්ම ඔය මැසේජ් එක පෙන්නන්න කියනව. ලොකු දෙයක් ඕකෙන් වෙන්නෙ නෑ. හැබැයි මැසේජ් එක ලග තිබීම විතරක් ප්‍රමාණවත්.

මම මෙඩිකල් එක ගත්තු දවසෙ දවල් 12 ටයි පහුවෙනිදා උදේටයි ඇපොයිමන්ට් දෙකක් දාගත්තා. මෙඩිකල් එක ඉක්මනට ලැබුනොත් ඒ ගමන්ම ගිහින් ලයිසන් එකත් ගන්නයි එහෙම බැරිඋනොත් පහුවදා උදෙන්ම යන්නයි තමයි ඇපොයිමන්ට් දෙකක් දාගත්තෙ. කාලය වටිනවනෙ නේද..? ඉතිං මට මෙඩිකල් එක පැයකට අඩු කාලෙකින් ලැබුණු නිසා මං එහෙම්ම ගියා වේරහැරට.

වේරහැර කාර්‍යාලයෙ ඇතුලට වාහන ගන්න දෙන්නෑ එහා පැත්තෙ තියෙන පාර්ක් එකට තමා වාහන දාන්න ඕනෙ. පැයට රු.100යි. ශුද්ධ භූමියට අඩිය තිබ්බ ගමන්ම කාක්කෙක් ඇවිල්ල කිව්වෙ මල්ලි ඔයා ආවා දවල් වැඩියි ඇතුලෙ හෙන කට්ටක් කන්න වෙනවා. මට රු.8500ක් දෙන්න මං පැයෙන් අරං දෙන්නම් ඔයාට තියෙන්නෙ බලන් ඉන්න විතරයි කියල. මං එපා කියල ඇතුලට යද්දි මට ඇහුණා එහෙනම් ගිහිං කරගන්නකො බලන්න වගේ හින්ට් එකකුත්. ඔය තැන් වල ඔහොම කාක්කො රංචු පිටින් ඉන්නව. ඔයා අහුවෙන්න එපා. ඔයාට ඔය වැඩෙත් ලේසියෙන්ම කරගන්න පුලුවන්. ටිකක් මහන්සි උනා කියල අත පය ගෙවෙන්නෙ නෑනෙ.

ඇපොයිමන්ට් එක ආපු මැසේජ් එක සිකුරිටි මහත්තයට පෙන්නුවම ප්‍රධාන ගේට්ටුවෙන් ඇතුලට යන්න දෙනවා. එතකොටයි දැක්කෙ ඇතුලෙ වාහන පාක් කරන්න ලොකු ඉඩක් තියෙනවනෙ කියල. මට නම් හිතුණෙ එච්චර ලොකු ඉඩක් ඇතුලෙ තියාගෙන එලියෙ පුද්ගලික ඉඩමකට පාකින් අයිතිය දීලාදෝ කියල. මං වැරදිනම් නිවැරදි කරන්න. කාර්‍යාලයට යන්න මීටර දෙසීයක් විතර තියෙනවා. ඒ යද්දිත් ඔයා දිහා අමුතුවට බලන කාක්කො ඉඳියි සමහරවිට. ගණන් ගන්නැතුව යන්න.

කාර්‍යාල පරිශ්‍රය ඇතුලට ගන්නෙ ආපු ඇපොයින්මන්ට් මැසේජ් එක බලල අදාල පුද්ගලයව විතරයි. ගෙදර කෙනෙක් එක්ක ගියානම් එයාට පුලුවන් කැන්ටින් ඒරියා එකේ ඉන්න. ඇතුලට ගියාම ඔයාව මුලින්ම යවනව කවුන්ටර් එකකට. ඒකෙන් ඔයාගෙ ඇපොයිමන්ට් මැසේජ් එකයි ජාතික හැඳුනුම්පතයි ඉල්ලල බලල ඔයාට දෙනවා ටෝකන් එකක්. ඔයා oneday service එකක්ද ගන්නෙ normal service එකක්ද ගන්නෙ කියල ඒකෙ සීල් එකක් ගහල දෙනවා.

හො.ම.ත.ග.යු.. oneday service එක අරං එදාම අලුත් ලයිසන් එක අරන් එන්න පුලුවන් උදෙන්ම එන සීමාසහිත පිරිසකට විතරයි. ඒ ලිමිට් එක ඉවර උනාම ඔයාට ගන්න පුලුවන් normal service එක විතරයි. normal service එකට රු. 3025.00 යි oneday service එකට රු.1000 ක් අමතරව අය කරනවා. මං දවල් වෙලා ගිය නිසා මට ගන්න පුලුවන් normal service එක විතරයි. ඒ කියන්නෙ මට ටෙම්පරි ලයිසන් එකක් දීලා පස්සෙ තැපෑලෙන් ගෙදරටම එනවා අලුත් ලයිසන් එක. ඕක පරක්කු වෙන නිසා තමා ගොඩක් අය oneday service එකට පොරකන්නෙ. ඉස්සර ටෙම්පරිය දෙන්නෙ අවුරුද්දකට උනත් දැන් අවුරුදු දෙකකට දෙනවා. ඉතිං ඔයාට අවුරුදු දෙකක්ම තියෙනව බලන් ඉන්න.

හරි ආපහු කතාවට එමු.. කවුන්ටරෙන් දෙන ටෝකන් එකේ තියෙන නොම්මරයට අදාල පරාසය සිකුරිටි කෙනෙක් කතා කරාම ඔයාට ඇතුලට යන්න පුලුවන්.. සෙනග වැඩි නිසා ඔයාට ඔයාගෙ නොම්මරය මගහැරෙන්න පුලුවන්. ඇලර්ට් එකේ ඉන්න.

ඔන්න මෙතන ඉඳන් තමා ඔයා දක්ෂ වෙන්න ඕන.

ඇතුලට ගිහින් පෙන්නපු පුටුවෙ ඉඳගෙන ඔහේ බලාගෙන හිටියොත් ඔයාට වැඩේ කරගන්න ඉක්මනට කරගන්න වෙන්නෙ නෑ. කවුන්ටර් ගණනාවක් තියෙනවා. පෝලිම අඩු කවුන්ටරේ මොකක්ද කියල හෙමිහිට ඇහැ දාලා බලල ඒ කවුන්ටරේට යන්න.. ඒකෙන් ඔයාගෙ ටෝකන් එක අරං මෙඩිකල් එක, පරණ ලයිසන් එක, හැඳුනුම්පත චෙක් කරල බලල ඔයාගෙ ෆොටෝ එක, ඇඟිලි සලකුණු ගන්නවා. ඊට පස්සෙ එතනින් ලියවිල්ලක් දීලා ඔයාට කියනවා අංක 17 ඉඳන් 29 වෙනකන් තියෙන කවුන්ටරේකට යන්න කියල. ඔයා එතනට දීපු ලියකියවිලි ආපහු ඉල්ලගන්න අමතක කරන්න එපා.

17-29 අතර කවුන්ටර් වලින් බලන්න පෝලිම අඩුම කවුන්ටර් එක. මං දැක්කා මිනිස්සු අඩු පෝලිම් තියෙද්දි සමහර පෝලිම් දිගට තිබ්බා. කැෂියර් එකෙත් එහෙමයි. ඔයාගෙ වැඩේ ඉක්මනට කරගන්න ඔයා වග බලාගන්න.

17-29 කවුන්ටර් එකකින් ඔයාගෙ ලියකියවිලි චෙක් කරල ඔයාව යවනව කැෂියර් එකට. සෙනග අඩු කැෂියර් එකක් බලල ගිහින් ඔයාට අදාල ගාස්තුව ගෙවන්න. ඔයාට ඔයාගෙ ලයිසන් එක දෙනවා. ටෙම්පරියක් නම් ඔයාට තියෙන්නෙ ඒක අත්සන් කරල අලුත් ලයිසන් එක එනකන් පාවිච්චි කරන්න. ඔයා එතනින් එලියට එද්දි ගෙනියපු ලියවිලි ආපහු ගත්තද කියල පොඩ්ඩක් බලන්න.

පැය ගණන් ගත වෙනවා කියන සම්පූර්න වැඩේට මට යන එන ගමන් කාලය එක්ක ගත උනේ පැය හතරක් විතරයි. උදේ 9 ට මෙඩිකල් එක ගන්න ගියා නුගේගොඩට. දවල් 1 වෙද්දි ලයිසන් එකත් අරං එලියට ආවා. එද්දි පාකින් එකේ කාක්කා අයියට ලයිසන් එකත් ගැම්මට පෙන්නං ආවෙ. ඌ කියපු විදියට එකඟ උනානං මං නිකරුණේ රු.5000ක් වැඩිපුර ගෙවනවා.

අමතරව කියන්නම් මේ කරුණු ටික..

සඳුදා, සිකුරාදා දිනවල නැතුව මැද දවසක යන්න බලන්න. යද්දි පහසු ඇඳුමක් අරං යන්න.. වතුර බෝතලයක් බිස්කට් පැකට් එකක් අරගෙන ගියාට පාඩුවක් වෙන්නෙ නෑ. මුදල් ගෙවද්දි කැෂියර් එකට හැර වෙන කිසිම කෙනෙක්ට සත පහක් දෙන්නෙපා.

මේ හෑල්ල ලිව්වෙ කාටහරි ප්‍රයෝජනයක් වෙයි කියල. ඒ නිසා අවශ්‍ය කාටහරි පේන්න කියල share කරාට කමක් නෑ...

- ඉරාන් යූ කුමාරගේ -

#විත්ති

10/11/2025

ලේසියෙන්ම දිනන්න පුලුවන් සමහර තැන් වලදී අඩියක් පස්සට අරන් නිහඬව ඉන්නෝනෙ ඇයි දන්නවද.. ? අනිත් එකාගෙ කුණේ බර කාලයක් යනකන් උහුලන් ඉන්න වෙන නිසා...

- ඉරාන් යූ කුමාරගේ -

10/11/2025

එදා මෙන් නෑ ඔබේ තරවටු
සොයයි උණුසුම ගතේ නිරතුරු
අම්මෙ, මම නුඹෙ පුතු ය තනිවුණු
බලා ඉන්නෙමි නැවත එනතුරු...

- ඉරාන් යූ කුමාරගේ -

08/11/2025

මේක ලියන්නෙ ඔයාට කියවන්නමයි...

සමහර දේවල් තියෙනවා අපි සෑහෙන්න විඳින, විඳවන, සතුටු වෙන, දුක් වෙන, කලකිරෙන ; නමුත් කතා නොකළ යුතු..

ඒක තමන්ගෙ හීනයක් හෝ වේවා ප්‍රේමයක් හෝ වේවා ඕනෑම යමක් හෝ වේවා ළඟා කරන්න කලින් නිශ්ශබ්දව ඉන්න. ඒ වගේම දුරස් වෙනවනං නිශ්ෂබ්දව ඉන්න.

පුද්ගලිකවම මගෙ ඉන්බොක්ස් එක පිරිලා ඇති,

" අයියෙ/මල්ලි මං ඉන්නෙ අවුලෙන් මගෙ කොල්ලා මෙහෙම කලා, මගෙ කෙල්ල මට මෙහෙම කලා, මං මෙච්චර විශ්වාස කරපු කෙනා මට මෙහෙම කලා, අම්මල තාත්තල සහෝදර සහෝදරියො මට සලකන්නෙ මෙහෙමයි මට තේරෙන්නෙ නෑ මොකද කරන්න ඕනා කියල.. , මට මෙහෙම ප්‍රශ්නයක්.. මං තනිවෙලා වගේ.. හිත හැදෙන්න දෙයක් ලියන්න.."

මේ වගේ මැසේජ් බර ගානකින්.

ඔය ප්‍රශ්නවලට ඔය විදියටම ගෙඩි පිටින් මමත් මූණ දීලා තියෙනවා ඔය වගේ දෙගුණ තෙගුණයක බල වලින්. මමත් ඔය වගේම දණිස් කටු බිම ඇනෙන්නම වැටිලා තියෙනවා. සමහර වෙලාවට කරන්න ඕන මොකක්ද කියල හිතාගන්න බැරුව මනෝ පාරවල් ගගහ ඉඳලා තියෙනවා. ඒක එදත් උනා, අදත් දෙනව, හෙටත් වෙයි. ඒත් අපි ජීවත් වෙන්නම ඕනෙ.

මට මතකයි පොඩි කාලේ තාත්තා මගෙ ජීවිතේ වගේ වෙලා හිටිය කාලෙ එයා මගෙන් ඈත් වෙනව.

මට මතකයි යාලුවොන්ගෙ තාත්තල ඉස්කෝලේ රැස්වීම් වලට එද්දි මං මගේ තාත්තා නෑ කියල දුක් වෙලා තියෙනවා.

මට මතකයි පොඩි කාලෙ යාලුවො කම්පියුටර් ගේම් ගහද්දි මට දුන්නැති උනාම අඩාගෙන අම්ම ලගට ඇවිල්ල, අම්මෙ මටත් කම්පියුටරයක් ඕනෙ කියපු හැටි.

මට මතකයි ප්‍රථම ප්‍රේමය පටන් ගන්නත් කලින් හරිම වේදනාබර ඉදියට නැතිවෙලා ගිය හැටි.

මට මතකයි කොච්චර මට්ටු වෙලා තිබ්බත් ආදරේ කියල ලං උනු මිනිස්සු නිසා හිත රිද්ද ගත්තු හැටි.

මට මතකයි ප්‍රශ්න නිසා ඔලුව අවුල් කරගෙන පළමුවතාවෙ උසස් පෙල විභාගෙ අතෑරපු හැටි.

මට මතකයි ජොබ් ඉන්ටර්වීව් වලට ගිහින් ප්‍රතික්ෂේප වෙලා හිස් අතින් ගෙදර ආපු හැටි.

මට මතකයි වියදම් කරන්න සල්ලි නැති නිසා යාලුවො එක්ක ට්‍රිප් යන්න, පාර්ටි වලට යන්නෙ නැතුව බොරු හේතු හදන් උන්ට චාටර් උනු හැටි.

මට මතකයි රස්සාවෙ වගකීම් දරාගන්න බැරුව ලොක්කන්ගෙන් පලු යන්න බැනුම් අහල හැමදේම දමල ගහල පැත්තකට වෙන්න හිතුනු හැටි.

මට මතකයි සමහර අවස්ථාවලදි පවුලේ අය එක්ක පවා තරහ වෙලා මට කවුරුත් නෑ මං තනි වෙලා කියල හිතල හිටපු හැටි. මේ මම අම්ම එක්ක තරහ වෙලා මාස හයක් ගෙදරින් පිට ගිහින් ඉඳල තියෙනව.

මේ හැම එපා වීමකට පස්සෙත් හැබැයි මම තාම ජීවත් වෙනව. කට පුරා හිනාවෙන ගමන් අනිත් අයවත් හිනස්සගෙනම. මේ ලියන මොහොතෙත් මම ඉන්නෙ කායික වගේම මානසිකවත් වේදනා දෙන ප්‍රශ්න වැලක ගැටගැහිලා.

ඒත් මම එක දෙයක් දන්නව. මම ජීවත් වෙන්න ඕන කියල. ඔයත් දැනගන්න ඕනෙ හැමදේකටම පස්සෙත් ඔයත් තව ජීවත් වෙන්න ඕන කියල. කවුරුහරි ඉන්නවනම් සියලු ආශාවන් දමනය කරල නිවන් මග ලබපු කෙනෙක්.. අන්න දිවිනහගත්තට කමක් නෑ. නැතුව අනාගතේ නොදැක කවදාවත් තමන් ජීවත් වෙනව සහ වෙන්න ඕනා කියල අමතක කරන්න එපා.

ඉඩමක් ගන්න, ගෙයක් හදන්න, වාහනයක් ගන්න, කසාදයක් බැඳල දරුවො හදාගෙන ලස්සනට ජීවත් වෙන්න වගේ හීන මහ මෙරකට දරාගෙන සමහර අය ජීවත් වෙනව. අතීත දුක් මතක ඔලුවෙ තියාගෙන අපි ඒවට මූණ දුන්නොත් අපිට කවදාවත් ජීවත් වෙනව කියල දැනෙන විදියට ජීවත් වෙන්න බෑ.

අපි කොච්චර පරිස්සම් උනත් අපිට හිත් රිද්දන මිනිස්සු හම්බෙනව, පපුව පුච්චන ප්‍රේමයන් හම්බෙනව, ලඟා කරගන්න බැරි හීන අපේ මනසෙ ඇති වෙනව.

ඒත් අමතක කරන්න එපා අපි ගැන බලාපොරොත්තු තියන් ඉන්න.මිනිස්සු වෙනුවෙන් අප ජීවත් වෙන්න ඕන කියල. තමන් වෙනුවෙන් ජීවත් වෙන්න ඕන කියල.

බුකිය ඇතුලෙ හරි ලස්සන වදනක් දැක්ක. ඒක පහලින් අමුණන්නම්. ප්‍රශ්න අහපු හැමෝටම පොදු උත්තරයක් වෙයි ඒක.

හිත රිද්දන දේවල් ගැන හිතුවට කමක් නෑ, ඒ ගැන කතා කරාට කමක් නෑ, ඒවා ලගා කරගන්න හීන මැව්වට කමක් නෑ. නමුත්... ඔයාගෙ දරාගැනීමේ සීමාවෙන් ඒ දේවල් පිට පනිනවනම් කවදාවත් පහන් දැල්ලට පැනල පිච්චිලා යන පළගැටියෙක් වෙන්න එපා..

නිශ්ශබ්ද වෙන්න... අන්ධ නොවන්න...

🖋️ ඉරාන් යූ කුමාරගේ

08/11/2025

" ඇය " කෙටිකතාවට පණ දෙමුද..?

08/11/2025

ඇය...

" මට කාමරයක් ගන්න පුලුවන්ද ? "
" පුලුවන් මහත්තයා. දවස් කියකටද ? "
"හෙට උදෙන්ම මම යනවා. ආ මෙන්න අයි ඩී එක. "
" අතනින් හැරුණම තියෙන තුන්වෙනි කාමරේට යන්න. ආ යතුර. "
" හරි. ස්තූතියි ! හහ්.. මේ... මට එකක් කෑම එකක් ගෙන්න ගන්න පුලුවන්ද ? "
" අද ගෙස්ට් හවුසියටම මහත්තයා විතරයි. පවුල රෑ කෑම හදල ඇති. මහත්තයත් එන්න අපිත් එක්ක කෑම ගන්න. "
" අනේ එහෙම හරි නෑනෙ. මං සල්ලි දෙන්නම්. "
" ඕක මොකක්ද මහත්තයා. කාමර ගාස්තුව විතරක් ඇති. මනුස්සයෙක්ට කෑම ටිකක් දෙන්න බැරි කමක් නෑ අපිට. "
***************************************
" ආ මහත්තයා එන්න.. එන්න.. මේ මගේ පවුල, නර්මදා. ඉඳගන්න මහත්තයා. "
" නෝනගේ නම කිව්වට අයියගෙ නම කිව්වෙ නෑනෙ මට. "
" අහ්.. ඔව්මයි. මට ඒකත් අමතක උනා. මං පාලිත. මහත්තයා ? "
" මං නිලූප. අයියයි අක්කයි මෙහෙමද ඉන්නෙ ? "
" ඔව් මහත්තයා. අපිට ළමයි නෑ. තිබුන දේවල් විකුණලා මේ ගෙස්ට් හවුස් එක හැදුවා. මේකෙ කාමර හතරයි. එකක් අපි දෙන්නට. මහත්තය කොයි පළාතෙද ? "
" මගෙ ගෙවල් රාජගිරියෙ. ජයවර්ධනපුර කැම්පස් එකේ ඉගෙනගන්නවා. ක්ෂේත්‍ර වැඩසටහනක් තිබ්බා එහායින් තියෙන ගමේ. මට අනිත් අයව මග ඇරුනා අයියෙ. මේ වැස්සෙ බයික් එක අරං යන්න අමාරු හින්දා නවත්තන් ඉද්දි අහම්බෙන් බෝර්ඩ් එක දැක්කෙ. මෙච්චර දුරකට ආවත් ළඟ පාතක එක ගෙයක්වත් තිබ්බෙ නෑනෙ. "
" ඔව් මහත්තයො. මේ අහලක මිනිස් වාසයක් නෑ. බෝර්ඩ් එකත් හොඳටම දිරලා. අලුත් එකක් එල්ලන්න කියල ඉන්නෙ. "
" ඉතිං මේ ගෙස්ට් හවුස් එකක් දාන් ඉන්නෙ ? බිස්නස් තියෙනවද ? "
" අපි මේ ගෙස්ට් හවුස් එක දාලා නොතිබ්බනම් මහත්තයා අද බඩගින්නෙ පාරෙ නේද ? ඒ වගේ තමා මහත්තයො. අපි දෙන්නට මේ එන අය හොඳටම ඇති. "
" ඒකත් ඇත්ත තමයි නේද අයියෙ. අක්කගෙ කෑම රහයි. මොනාද මේ මස් ජාතිය ? "
" ඒයි ඇහුනද ? කෑම රසයිලු. එයාගේ කෑම කොහොමත් රසයි මහත්තයො. ආහ්.. මේ දඩ මස්. මේ පළාතෙ හිඟයක් නෑනෙ ඕවා. තුන් වේලටම වරදින්නෙ නෑ ඉතිං"
" ම්ම්ම් හරිම රසයි. මගේ කාමර ගාස්තුවටම කෑම බිලත් එකතු කරන්න. "
" මොනාද කියවන්නෙ මහත්තයා. අද රෑ කෑම මේසෙ කම්මැලිකමක් නෑ මහත්තයත් ඉන්න නිසා. අපෙන් නොමිලේ රෑ කෑම. "
" බොහොම ස්තූතියි අයියෙ. ඇයි අක්කා කතා කරන්නෙ නැත්තෙ ? "
" ඒ එයාගෙ හැටි, නැතුව හිත නොහොඳකින් නෙමේ. එයාගෙ හිත වැඩට විතරයි. කතාවට තිත. "
" හහ් හහ් හා. අයියත් හරි විහිලුකාරයෙක් වගේ. මේ වැස්සයි හුළඟයි එන්න එන්නම වැඩි වෙනවා. "
" මෙහෙ ඔහොම තමයි. පායන කාලෙට පායනවා ඉරි තලන්නම. වහිද්දි වහිනවා දිය වෙලා යන්නම. එහෙනම් මහත්තයා ගිහින් බුදියගන්න. අපි මේ ටික අස් කරල දාන්නම්. "
***************************************
" අක්කෙ... ඇයි ඔයා මේ මහ රෑ මෙහෙ ආවෙ ? කෝ අයියා ? "
" එයා ගොරෝ ගොරෝ බුදි මහත්තයා. කෝ ඉඩ දෙන්නකො ඇතුලට එන්න ? "
" අක්කෙ හදිස්සියක්ද ? "
" ඔයාගෙ ඇස් දෙකෙන් කියවුනු දේ මං දැක්කා මහත්තයා. "
" අක්කා මොනාද කියවන්නෙ කියල මට තේරෙන්නෙ නෑ. "
" මේ මහා වරුසාව තරම් හිරිගඩු පිපෙන වෙලාවක් තියෙනවද මහත්තයා ? "
" නර්මදා අක්කෙ ? "
" එන්න මං ලඟට. "
" අක්කෙ, අයියා ? "
" එයා හෙණ ගැහුවත් ඇහැරෙන්නෙ නෑ මහත්තයා.. "
***************************************
( සති දෙකකට පසු )
***************************************
" මට කාමරයක් ඕනෙ සතියකට විතර. "
" මහත්තයගෙ අයිඩෙන්ටිය ? "
" ආ මෙන්න. "
" මාලක.. කළුතර... අහ් හරි, අතනින් හැරුණම තියෙන තුන්වෙනි කාමරේට යන්න. ආ යතුර. මහත්තයට කෑම ? "
" ඔව් කෑමටත් එක්කම මං ගෙවන්නම්. ඒක ප්‍රශ්නයක් නෑ. "
" මහත්තයා මේ ගොම්මන් වෙලාවෙ කොහෙද ? "
" මං ෆොටෝග්‍රැෆර් කෙනෙක්. කැලේ ඇතුළෙ ෆොටෝ වගයක් ගන්න ආවා. ඒ නිසා මේ සතියෙම මෙහෙ ඉන්නවා. "
" ආ.. ෆොටෝ ගන්න නියම පැත්තක් මහත්තයා තෝරගෙන තියෙන්නෙ. "
" ඒකනෙ මං ආවෙ. මේ.. මේ... බෝතලයක් එහෙම ගන්න පුලුවන්ද මෙහෙන් ? "
" හහ්.. හහ්.. හා.. ඒවා හරි මහත්තයා. ඕන දෙයක් කියන්න. "
" ෂාහ්.. නියම තැනකටනෙ මං ඇවිල්ලා ඉන්නෙ."
***************************************
" මහත්තයා දැන් ඇවිල්ලා දවස් දෙක තුනක් විතර වෙනවනෙ. කොහොමද අර ෆොටෝ ගන්න වැඩේ එහෙම ? "
" වරදක් නෑ පාලිත අයියෙ. හවස් වෙද්දි වැස්ස පටන් ගන්නෙක තමා අවුලකට තියෙන්නෙ. "
" මාලක මහත්තයා ඔය ෆොටෝ ගන්නෙ මොකටද ? "
" මේ තරඟයකට ඉදිරිපත් කරන්න අයියෙ. කෝ නර්මදා අක්කා ? "
" එයා ඇතුළෙ වැඩක් මහත්තයා. ම්ම්ම් අද ටිකක් සප්පායම් වෙමුද ? හොඳ ජාතියක් හම්බ වුණා. "
" ෂා. නියමයිනෙ. මහන්සිය යන්නත් එක්ක ටිකක් ගමු එහෙනම්.. බිලට දාන්නකො එහෙනම්. "
" පිස්සුද මාලක මහත්තයා. ඒවා මං ගානෙ."
***************************************
" මස් ටික නම් මරු. අක්කගෙ අත් ගුණේ තමා. "
" හහ්.. මෙහෙට එන ඕනම කෙනෙක් කියන කතාවක්. ඕනම දේකට හපනි. "
" ම්හ්ම්.. පාලිත අයියා මාර ලකී. "
" ඔව් මහත්තයා, මටම කැපෙන ගෑනි. තව ටිකක් දාගන්න මහත්තයා. නර්මදා... නර්මදා... අපිට තව මස් ටිකක් ගේන්න. "
" පාලිත අයියේ දැන්නම් මට ඇති වගේ... ඔලුවත් කැරකෙනවා. "
" ඔහෙ පලයන්.. බෝතලේ ඉවරත් නෑනෙ.. "
" අනේ මේ ඒයි. ඔය ළමයට ඇති නම් ඉන්න දෙන්න. බලෙන් පොවන්නෙ ඇයි. මාලක මහත්තයා යන්න ඇතුලට."
" හරි හරි අක්කා. මං ටිකක් ඉඳලා යන්නම්කො. "
" හහ්.. මහත්තයගේ ඇස් දෙක මගෙ ගෑනිව කන්න වගේ.."
" මො.. මොකක්ද කිව්වෙ ? පිස්සුද අයියෙ ඔයාට ? එහෙම අදහසකින් මං අක්කා දිහා බැලුවෙ නෑ. "
" හංගන්නෙ මොකටද මහත්තයෝ ?. ඕවා හංගන්න ඕනා කාරණා නෙමේ. මහත්තයත් ඇට, මස්, ලේ නහර වලින් හැදුණු කෙනෙක්නෙ. ඉතිං කැමතිද ? "
" මොකක් ? අයියට හොඳටම වැඩියි වගේ. මං යනවා කාමරේට. "
***************************************
" මහත්තයා මට එන්න කිව්වා කියල පාලිත කිව්වා. "
" අහ්.. මේ.. මෙහ්.. මං එන්ම කිව්වෙ නෑ අක්කෙ. අයියා එහෙම කිව්වද ? "
" ඔව්නෙ. මහත්තයා කාමරේට වෙලා බලන් ඉන්නවා කිව්වෙ අර. ගිහින් හොඳට සලකන්න කිව්වෙ. මං ගැන ගොඩක් දේවල් කතා කරාලු නේද ? "
" අනෙ එහෙම වැරදි දෙයක් කතා කළේ නෑ නර්මදා අක්කෙ. අයියට ටිකක් වැඩි වෙලා වගේ. විකාර කියවනවා. "
" වැරදි දෙයක් කිව්ව කිව්වා කියල මං කිව්වෙ නෑනෙ මහත්තයා. කෝ දොර වහන්න... "
" අ..අක්කෙ... ? "
" බිව්වම තමා පිරිමි ඇත්ත කියන්නෙ.. "
***************************************
මසකට පසු
***************************************
" දවස් කීයකටද ඕනෙ ? "
" දවස් තුන හතරකට වගේ.. "
" අතනින් හැරිලා තුන්වෙනි කාමරේට යන්න. ආ යතුරු. කෑම එහෙම ? "
" කෑම ඕන නෑ. "
" කෑම ඕනා නෑ ? දවස් දෙකක් බඩගින්නෙද ඉන්නෙ ? හැබැයි මහත්තයො කාමර ඇතුළෙ ලිප් බඳින්න නම් බෑ ඕං. "
" හහ් හහ් හා.. කෑම උයාගන්න කතාවක් නෙමේ මං කිව්වෙ මිස්ටර්. මට පිට කෑම අල්ලන්නෙ නෑ. කෑම ගැන මං බලාගන්නම්. අහ් හරි, තුන්වෙනි කාමරේ නේද ? මං යන්නම්. "
" කවුද පාලිත ඒ ? "
" වෙනදට එන අයට වඩා වෙනස් මනුස්සයෙක් වගේ..? "
" මගේ කෑම එපා කිව්ව මුල්ම කෙනා. "
" ඔයා දුක් වෙන්න එපා නර්මදා. ඔයාව එපා කියන එකක් නෑ. "
***************************************
" මහත්තයා ආපු ගමන්ම එළියට යන්නද ? මං පාලිත. මහත්තයා රජිව් නේද ? "
" කොහොමද මගෙ නම දන්නෙ ? "
" ඇයි අයිඩෙන්ටියෙ තිබුණෙ ? "
" අහ්.. ඔව්මනෙ. ඔව් පාලිත මං ටිකක් එළියට යන්න කියල. කරුවල වැටෙන්න කලියෙන් මං එනවා. "
" මහත්තයා ඇවිදින්න වගෙයි ඇවිල්ලා තියෙන්නෙ.. "
" නැත්තෙමත් නෑ. ඇවිදින එක ඇඟටත් හොඳයිනෙ."
" ඇත්තටම මහත්තයා ඇයි මෙහෙ ආවෙ ? "
" පාලිතට සැකයි වගේද මං ගැන ? ඇත්තටම මං ආවේ පොතක් ලියන්න කරුණු හොයාගන්න. මේ පරිසරය ඒකට හොඳටම ගැලපෙනවා. "
" මහත්තයා ලේඛකයෙක්ද ? ඉතින් පොතක් ලියත හැකිද දවස් තුන හතරෙන් ? "
" නෑ පාලිත. ටිකක් ඇවිදලා බලල ආයෙ එනවා සතියකට දෙකකට නවතින්නම. "
" ආහ්.. මට තේරුණා. අපි ගැනත් ඔය පොතේ ලියන්න. හහ්.. හහ්.. හා "
" හහ්.. අනිවාර්‍යෙන්ම ලියනවා. එහෙනම් මං ටිකක් ඇවිදලා එන්නම්. "
" කළුවර වැටෙන්න කලියෙන් එන්න බලන්න. අතරමං උනොත් හරි අවදානම්. වැව් තාවුල්ලෙ මේ කාලෙ සතා සරුපයා රංචු පිටින් ඉන්නෙ. "
" හරි පාලිත. එහෙනම් මං ගිහින් එන්නම්. "
***************************************
" නර්මදා... අද ආපු මනුස්සයව මට එච්චර අල්ලන්නෙ නෑ. මහ අමුතු ජාතියෙ මිනිහෙක්. "
" ඔව්. මගෙ කෑමත් එපා කිව්වා. "
" ඔයාට ඉතින් කෑම එපා කිව්ව එක තමා මතක. මිනිහා මොකක්ද මන්දා ලියනවයි කිව්වෙ. අන්න ඇවිදින්න කියල ගියා. "
" ඔහෙ ගිහින් ආපුදෙන්. වැව පැත්තට යන්න එපා කිව්ව නේද. ? "
" ඔව්.. ඔව්.. සියලූම අවවාද දුන්නා. නාහෙට අහන්නැතුව ගිහින් ආන්තරාවක් කරගත්තොත් ඕං අපි නම් නෑ. "
" ඔව්. ඇහැට කනට පේන මනුස්සයා. "
" ඔව් ඉතින් උඹට ඒක තියෙනව නම් වෙන මුකුත් ඕනා නෑ. උඹෙ ගින්න ලොකුයි ඔක්කොටම වඩා. "
" ආඩපාලි නොකියා ඉන්න පාලිත. මං යනවා උයන්න. මස් ටිකක් එළාගන්න වෙයි වගේ. ඉවර වේගෙන යන්නෙ. "
" එහෙනම් දඩයමක් කරගමු . "
***************************************
" හෙලෝ... හෙලෝ... මේ කොහේටවත් සිග්නල් නෑනෙ. කොච්චර වෙලාවක ඉඳන් ට්‍රයි කරනවද. අහ්.. හෙලෝ.. ඇහෙනවද ? "
" ඔව් රජිව්. අපි ඔයාව සම්බන්ධ කරගන්න සෑහෙන්න උත්සහ කළා. හෙලෝ.. හෙලෝ.. "
" මෙහෙට සිග්නල් නෑ. මං කැලේ ඇතුළේ ඉන්නෙ. හවස් වෙද්දි වැව පැත්තට යන්න හිතන් ඉන්නෙ. "
" වැඩේ සාර්තකද ? "
" තවම කියන්න බෑ. වෙනසක් පෙනුනෙ නෑ. "
" ඉස්සරහටත් රජිව්ව සම්බන්ධ කරගන්න පුලුවන් වෙයිද අපිට ? "
" සිග්නල් ප්‍රශ්නෙ තියෙනවා. උත්සහ කරන්නම්. කෝකටත් දවස් තුනකින් මෙහෙට එන්න. එතකන් මං මෙහෙ දේවල් බලාගන්නම්."
" හරි. එහෙනම් දවස් හතරකින් කළුවර වැටෙන පැයේදි අපි එනවා.. "
***************************************
" මහත්තයට අද දවස හොඳයි වගේ ? "
" නරකමත් නෑ. ටිකක් මහන්සියි. ඉක්මනට නිදාගන්න ඕනෙ. "
" මොනාහරි කනවද ? "
" නෑ එපා. බොහොම ස්තූතියි පාලිත.. "
" හ්ම්ම්.. හරි මහත්තයා.. "
***************************************
" ඔයා මොකද මේ රෑ මෙතන කරන්නෙ ? "
" මහත්තයා සෑහෙන්න මහන්සි උනාලු අද නේද ? "
" නෑ එහෙම මහන්සියක් නෑ. මං නිදාගන්නවා. "
" ඔහොම ඉන්න පොඩ්ඩක්. පාලිතත් හොඳටම නිදි. එයා ඇහැරෙන්නෙ නෑ ආයෙ හෙට දවල් වෙනකන්වත්. මහත්තයට මුකුත්... ? "
" නෑ නෑ මට මුකුත් වෙන්න ඕනා නෑ. ඔයා දැන් මෙතනින් යන්න. "
***************************************
" ඒ මිනිහ හැඟීම් නැති එකෙක්.. "
" ඒ කියන්නෙ උඹවත් ඒකා එපා කිව්වා එහෙනම්.. ? "
" ඔව්. මාවයි මගෙ කෑමයි එපා කිව්ව එකම මිනිහා. ඕකට මම... "
" හා.. හා.. කටවහන් හිටපන්. මං බලාගන්නම් ඒක. "
" හ්ම්ම්... පාලිත... "
" මොකද හුරතල් වෙන්නෙ.. ? "
" මට ඌව ඕනෙමයි.. "
" උඹ නාඬා ඉඳින් නර්මදෝ. ඉක්මනටම ඌ උඹේ වෙයි. "
***************************************
" මහත්තයා ලියනවයි කිව්ව පොත මොකක්ද ? "
" මං පාලිතට මුකුත් කිව්වෙ නෑනෙ. අහ්.. ඒකට කමක් නෑ. මං ලියන්නෙ, අඳුරු වනාන්තරය තුළ සිදුවෙන අත්භූත ක්‍රියාදාමයන් ගැන පොතක්. "
" අප්පට බොල... ඇවිද්දම ඕකට විස්තර හම්බුණාද ඉතින් ? "
" විස්තර කියන්නෙ ඉතින්, මට ඕනේ මේ වගේ පරිසරයකදි දැනෙන හැඟීම විඳගන්න. ඊට පස්සෙ බැරියෑ පොතක් නෙමේ පොත් සීයක් උනත් ලියන්න. "
" ම්ම්ම්.. අපිට ඔව්වා තේරෙන්නෙ නෑ මහත්තයා. හැබැයි මට පුලුවන් මහත්තයට හොඳ තැන් කීපයක් පෙන්නන්න. මේ මූකලානෙ අඩවි දන්නෙ අපි මිස වෙන කව්ද මහත්තයා.. ? "
" හහ්.. ඒක හොඳ අදහසක් හැබැයි. "
" ඒකනේ. අපි දැන්ම උනත් යමු. "
" නෑ. අපි හෙට දවල් වෙන්න වගේ යමු. එතකොට හවස් වෙන්න එන්න පුළුවන්.. "
" හා මහත්තයගෙ කැමැත්තක්.. හෙට දවල් වෙන්න යමු එහෙනම්.. "
***************************************
" මහත්තයා... මහත්තයා... දොර අරින්න. "
" ඇයි නර්මදා ? "
" මහත්තයා හරි මුරණ්ඩුයි නේද ? "
" ඇයි එහෙම කියන්නෙ.. ? "
" මාව මඟාරින්නෙ මං හැඩ නැද්ද ? "
" හහ්.. නර්මදා කොයිතරම් හැඩ ද . එහෙම මඟාරින්නෙ නෑ මං. "
" මං ඇතුළට එන්නද මහත්තයා ? "
" නෑ නෑ එපා. මං මේ දේවල් වලට කැමති නෑ. ඔයා දැන් යන්න මෙතනින්. "
***************************************
" ඌ අහුවෙන්නෙම නෑ පාලිත. "
" තමුසේ ඊයෙ රෑත් ගියාද ? මං කිව්වනෙ මං බලාගන්නම් කියල. "
" මං කොහොමද ඉවසන් ඉන්නෙ ඌව දකිද්දි. ඇරත් ඌ කොහොමද මාව එපා කියන්නෙ.. ඔයා මට ආදරේ නෑ පාලිත. "
" මං කොයිතරම් ආදරෙයිද ඔයාට. ඉවසන්න නර්මදා. හෙට වෙද්දි හැමදේම හරියයි. "
***************************************
" මහත්තයා එහෙනම් අපි යමුද ? "
" හරි මාත් ලෑස්තියි. අහ් නර්මදත් එනවද අපි එක්ක ? "
" අනේ ඔව් මහත්තයා. මෙයාට කම්මැලියි කියන්නෙ තනියම ඉන්න අද. නර්මදාටත් ඕනලු මහත්තයගෙ වැඩ බලන්න. "
" ආහ්.. තුන්දෙනාම යන එක තවත් හොඳයි. මඟ දන්න අය වැඩි උනා කියල පාඩුවක් වෙන්නෙ නෑනෙ. "
" නර්මදා ඔය අඩුම කුඩුම ටික මල්ලට පටවගන්න එහෙනම්.. "
" මොනාද පාලිත අඩුම කුඩුම.. ? "
" නෑ මහත්තයා මේ කෑම බීම ටිකකුයි ආයුධ ටිකකුයි. කැලේ යද්දි ආයුධයක් ඔනෑමයි. "
***************************************
" මේ පරිසරය හරි ගුප්තයි නේද පාලිත. ? මේ පැත්තට වැඩිය මිනිස්සු යන්නෙ එන්නෙ නැද්ද ? "
" වැඩිය නෙමේ කොහොමටවත් යන්නෙ එන්නෙ නෑ. අපි කලින් ගිය පැත්තට නම් ඔය කාලෙකට එක එක කාණ්ඩ එනවා කෑම්ප් ගහන්නයි ගිනිමැල ගහන්නයි කියල. ඒත් මේ යන පැත්තට කවුරුත්ම එන්නෙ නෑ. "
" ඇයි ඒ ? ඒ තරම් භයානක පැත්තකටද අපි මේ යන්නෙ ? ඇත්තටම අපි මේ කොහෙද යන්නෙ ? "
" කවුරුත්ම නොගිය ඉසව්වකට මහත්තයා. ඉස්සරහින් වැව් තාවුල්ල. එතනින් එහාට තියෙන රූස්ස කැලේට මහත්තයා ආස වෙයි. "
" පාලිත මට කිව්වනෙ වැව් තාවුල්ල පැත්තට යන්න එපා කියල. "
" මං කිව්වෙ තනියම යන්න එපා කියල. දැන් අපි තුන්දෙනෙක්ම ඉන්නවනෙ. "
***************************************
" මගෙ දෙවියනේ. මේ මහ කැලේ අස්සෙ මොනවද මේ තියෙන්නෙ ? පාලිත... මේ කැලේට කොහොමද වාහන ආවෙ ? "
" ඕවා මේ පරණ වාහන මහත්තයො. කාලෙකට කලින් ඉඳන් ඕවා මෙතන තියෙනවා. "
" මොකක් ? කාලෙකට කලින් ඉඳන් ? ඔන පරණ වාහනද, අර බලන්න අලුත්ම කාර් එකක්.. අතන අලුත් බයික් එකක්. මේ වාහන කොහොමද මෙතනට ආවෙ ? මොකක්ද මෙතන වෙන්නෙ. ? "
" අනේ මන්දා මහත්තයො. අපිටත් ඕවා ගැන වැඩි දැනීමක් නෑ. "
" බොරු කියන්නෙපා පාලිත. මාසයක් හමාරක් ඇතුළත මේ පැත්තට ඇවිත් දෙන්නෙක් අතුරුදහන් වෙලා තියෙනවා. ඒ දෙන්නව හොයන්නයි මං ආවෙ. මං රහස් පොලිසියෙන්. මේ අහළකටම.ඉන්නෙ ඔය දෙන්නා විතරයි. මට ඇත්ත.... අම්මෝ... මගෙ ඔළුව.."
***************************************
" මං.. මං මේ කො.. කොහෙද ඉන්නෙ ? "
" මහත්තයා... අපි දෙන්නා මේ ඉන්නෙ අපේ මාළිගාවෙ. ඔළුව හොලවන්නෙපා වැඩිය. පාලිතගේ පහර ටිකක් සැර වැඩි උනානෙ. "
" නර්මදා.. මාව ලෙහනවා. මොකද මේ ? "
" මේ වෑන් එකත් මහත්තයා වගේම මෙහෙට ආපු කෙනෙක්ගෙම තමයි. බලන්න, එයා මේක මෙහෙ දාලා ගිහිල්ලා අපි දෙන්නට කොච්චර උදව්වක් කරලද කියල. අපිට සතුටු වෙන්න මේකත් හොඳටම ඇති.. "
" නර්මදා තමුන් විකාර දොඩෝනවද ? කෝ පාලිත ? තමුන්ලා මොනාද මෙහෙ කරන්නෙ ? කෝ කලින් මෙහෙට ආපු අය ? "
" හහ්.. හහ්.. හා.. එයාලා ගොඩාක් සතුටු උනා. ඔයා තමයි මගෙ කෑමයි මාවයි එපා කියපු එකම කෙනා. ඔයා එහෙම කළේ නැත්තම් මෙච්චර මේක අමාරු වෙන්නෙ නෑනෙ මහත්තයෝ.. එහෙනම් අපි පටන්ගමුද ? "
" මොනාද පටන් ගන්නෙ ? මාව මෙතනින් ලෙහනවා ගෑණියෙ.. "
" මේ මොහොත එනකන් මං දවස් දෙකක් තිස්සෙ බලන් හිටියෙ.. "
***************************************
" ස්වාමීනී... පොලිස් කණ්ඩායම් එම ස්ථානයට යන විටත් පොලිස් පරීක්ෂක රජිව් වික්‍රමසිංහ මියගොස් තිබුණා. මියයෑමට පෙර ඔහු ලිංගිකව සක්‍රීය වී තිබුණා මේ විත්තිකාරිය සමග."
" මරණයට හේතුව ? "
" ඉතාමත් අමානුෂික විදියට ඔහුගේ හදවත, අක්මාව ආදී කොටස් අමු අමුවේම ඉවතට ගෙන තිබුණා. එහිදී ඇති වූ රුධිර වහනය සහ කම්පනය ඔහුගේ මරණයට හේතු උනා. "
" ඔහ්... කවුද එලෙස සිදුකර තියෙන්නෙ ? කුමන හේතුවක් මතද ? "
" ඒ අන් කවරෙකුත් නොවෙයි ස්වාමීනි, මෙම විත්තිකාරිය වන නර්මදා පුස්සැල්ලයි. ඇය තියුණු ආයුධ භාවිතා කොට ඔහුගේ අභ්‍යන්තර අවයව පිටතට ගෙන තිබෙනවා. එයත් ඔහු පියවි සිහිගෙන් සිටියදීම. "
" දෙවියනේ ! එතරම් අමානුෂික ක්‍රියාවක් කිරීමට තරම් හේතුව.. ? "
" ස්වාමිනී.. මෙම විත්තිකාරිය ඉතාමත් දරුණු මානසික ආබාධයකින් පෙළෙනවා. එය මෙතෙක් කල් හඳුනාගෙන තිබුනේ ඉතාමත් සුළුතර සත්ත්ව කොට්ඨාස කිහිපයක් අතරේ පමණයි. එයත් කෘමීන් අතර සහ මකුළු විශේෂ අතර. මෙවැන්නක් මනුෂයින් අතර වාර්තා වුණු ප්‍රථම අවස්තාව මේ. "
" කුමක්ද එය ? "
" hyper sexual disorder and sexual cannibalism එහෙමත් නැත්නම්, ලිංගිකත්වයට ඇති අසීමිත ආශාව සහ සංසර්ගයෙන් පසුව සහකරුව ආහාරයට ගැනීම. අදහගන්නත් බෑ නේද ස්වාමිනී නමුත් එයයි සත්‍යය.. "
" ඉතාමත් අමානුෂිකයි. "
" එහෙමයි ස්වාමිනී. මා කලිනුත් පැවසුවා වගේ එය හඳුනාගෙන තිබුනේ සතුන් අතර පමණයි. නමුත් මෙම විත්තිකාරිය තමන් සමග ලිංගිකව හැසිරුණු පිරිමින්ගේ අභ්‍යන්තර අවයව ආහාරයට ගැනීමට පෙළඹී තිබෙනවා. මොවුන්ගේ නවාතැන්පොළ පරීක්ෂා කිරීමේදී මිනිස් ශරීර කොටස් සහ ඇට කැබලි රාශියක්ද හමු වී තිබෙනවා. එපමණක් නොවෙයි මැය මිනිස් කොටස් නවාතැන්පොළට පැමිණි අයට ආහාර වශයෙන් සපයා තිබෙනවා."
" මැය තනිවද මේ සියල්ල සිදු කර තිබෙන්නෙ ? "
" නැත ස්වාමිනි.. මැය සමඟ තවත් අයෙකු මෙයට සම්බන්ධයි. ඔහු මැයගේ ස්වාමි පුරුෂයා බවටයි තොරතුරු වාර්තා වෙන්නෙ. නමුත් පොලිස් කණ්ඩායම් එම ස්ථානයට යන විට එහි හිඳ ඇත්තෙ මැය පමණයි. පාලිත නැමැති අනික් විත්තිකරු මේ වන විටත් අතුරුදහන්. ඔහුව සොයාගැනීමට පරීක්ෂණ මේ වන විටත් සිදුකෙරෙම්න් පවතිනවා. "
" ඇත්තෙන්ම මෙවැනි අමානුෂික ක්‍රියාවක් කිරීමට තරම් මැයට ඇති වී තිබෙන මානසික ආබාධ තත්ත්වය පිළිබඳව මම සෑහෙන්න කනගාටු වෙනවා. මේ පිළිබඳව විමර්ශණයට ගොස් ජීවිතයෙන් පවා වන්දිගෙවන්නට උනු රජිව් වික්‍රමසිංහ පොලිස් පරීක්ෂකවරයා ගැනත් මා ඉතා සංවේගයට පත් උනා. මෙවැනි ක්‍රියාවන් නැවතත් සිදුනොවීමට අදාළ අංශ වගබලාගත යුතුයි. ඉදිරි විමර්ෂණ කටයුතු වෙනුවෙන් මා නඩුව කල් තබනවා. එතකන් මෙම විත්තිකාරියව දැඩි රැකවල් මධ්‍යයයේ අවශ්‍ය මානසික ප්‍රතිකාර සඳහා යොමුකරවන මෙන් නියෝග කර සිටිනවා. "
***************************************
අවුරුදු තුනකට පසු
***************************************
" සර්.. සර්... ලොකු විනාශයක් වෙලා තියෙන්නෙ. "
" මොකක්ද සාජන්.. මොකද බෙරිහන් දෙන්නෙ.. ? "
" අ.. අර.. අර අවුරුදු තුනකට කලින් උනු මිනීමැරුම් සිද්ධියෙ ගෑණි.. අර නර්මදා.. "
" ඔව්.. ඉතින්.. ඒකි මැරිලද ? "
" මැරිලනම් මොකෝ සර්, ඒකි පැනලා ගිහින්.. "
" මොනවා.. !!! "
***************************************
" ඔව්.. කියන්න. "
" අපි දෙන්නා ආවේ අර කුලියට දෙනවයි කියල තිබ්බ කාමරේ බලන්න."
" අහ්.. මාත් කාමරේ දෙන්න හිටියේ ජෝඩුවකට තමයි. ගේ ඇතුලෙමයි කුලියට දෙන කාමරේ තියෙන්නෙ. දෙන්නට නිදහසේ ඉන්න පුලුවන්. මං විතරයි ගෙදර ඉන්නෙත්."
" අහ්.. එහෙනම් තවත් හොඳයි. අපි අදම කාමරේ ගන්නම්. මං පාලිත, මේ මගේ නෝනා නර්මදා. මහත්තයගෙ නම... ? "

නිමි.

- ඉරාන් යූ කුමාරගේ -

07/11/2025

මං හීන් ඇච්චා කාලෙ ලෝක ළමා දිනයට අම්මා මාව ගෙනියනවා BMICH එකේ තියෙන ළමා වැඩසටහන්, කානිවල් එහෙම තියෙන පොඩි මෙව්වා එකකට. ඒ කාලෙ ඒකට යන්න තියෙන ආසාවටම මම ඔක්තෝබර් වෙනකන් ඉන්නෙ ඇඟිලි ගැන ගැන.

ඕකේ තිබුනා සෙල්ලම් කෝච්චි, සෙල්ලම් ප්ලේන්, සෙල්ලම් කාර් වගේම ගේම් ගහන ප්ලේස් එකකුත්. ඒකට ගියාම එක ළමයෙක්ට විනාඩි පහක් විතර තමන් කැමති ගේම් එකක් ගහන්න දෙනවා. ඔක්කොම ෆ්‍රී. මං හැමපාරම යන්නෙ බයික් රේස් ගේම් එක තියෙන තැනට. අවුලක් නෑ ඉතින් තත්පර අරික්කාලෙන් බයික් එක හප්පන් කුඩු කරගන්න නිසා එතන හිටපු කෙනා මාව ඉක්මනට නැගිට්ටුවා.

ඕකේ තිබුනා ලොකු ඉස්ටේජ් එකක් එහෙම ගහල ප්‍රසංගයක්. ඒකෙ මැජික් පෙන්නුවා, ජෝකර්ලා නැටුවා, ළමයි සිංදු කිව්වා. එතකොට නතාශා පෙරේරා, අභිෂේකා, තව හපන් පැදුරෙ සෙට් එක එහෙමත් ඒකෙ සිංදු කිව්වා නිවේදනය කළා. එයාලා හරි පුංචියි එතකොට. හැබැයි නතාශා අක්කි ඒ කාලේ දැන් තරම් සුදු නෑ කියලනං හොඳටම මතකයි.

මං ඕකේ ආසම කලේ කතුරු ඔංචිල්ලා, මෙරිගො රවුන්ඩ්, සෙල්ලම් ගෙවල් තිබ්බ කෑල්ලට. මාරක ලිඳ තිබ්බට මං ඒක බලන්න වැඩිය ආස උනේ නෑ. මොකද එක පාරක් ඕක බලන්න ගිහිල්ල දන්නෙම නැතුව චූ ගිහිල්ල තිබ්බ නිසා. මට නං නෙමේ අපේ මල්ලිට.

එක පාරක් අම්මා මාවත් දැම්මා අර සෙල්ලම් ගෙවල් වගේ තියෙන එකක් ඇතුලට,බොට හොඳටම විසේ.. හිටපන් ඕකෙ ඇතුලට වෙලා ටිකක් කියල. ඒකෙ පොඩි පොඩී උමං වගේ රබර් බට අස්සෙන් ගිහින් අන්තිමට වැටෙන්නෙ බැලුම් පුරෝපු ලොකු වළක් වගේ එකකට. හප්පේ... ඕකට පනින්න බයේ පොඩී උන් වළ ගැට්ටෙ ඒ දිහා බලන් ඉන්නව. සමහරු හූ තියනවා. මං ගිහින් මට මොකෝ කියල පැන්න බැලුම් ගොඩටම.. ඒ එක්කම තව උන් දෙතුන් දෙනෙක් පැන්නා වගෙත් මතකයි. උන් මගෙ ඇඟ උඩ. උන් කෙල්ලොද කොල්ලොද කියලනම් මතකයක් නෑ හැබැයි. උන් මගේ ඇඟ උඩ වැටිලා.. මං බැලුම් ගොඩ අස්සෙ ගිලිල හිර වෙලා හිටපු හැටි තාම මතකයි. හුස්ම ගන්න බැරුව ඇඬුවදත් මන්දා එදානම්..

බලන්න මං වගේ බැලුම් ගොඩක් අස්සෙ හිර වෙලා ඉන්න ළමයෙක් මේ ඉන්නෙ. අර කතාව මට මතක් උනේ මේක දැකලා. එයත් කෑ ගහනවා නේද.. අනේ මන්ද සමහරු මේ ෆොටෝ එකට මට තේරුම්ගන්න බැරි දේවලුත් කියල තිබ්බා.

- ඉරාන් යූ කුමාරගේ -

06/11/2025

දැනෙන තැන ආදරෙන් නවතින්න...

05/11/2025

ඔයාව දරාගන්න කෙනෙක් ඔයා ලඟ ඉන්නවනම්, ඔයා හරි වාසනාවන්තයි...

සැඩ සුළං හමාවි
අනෝරා වැසි වසීවි
අකුණු එළියට,
ඇස් බොඳ කරාවි
කන් අගුල් වැටේවි
ලොවම කම්පා වෙන වෙලාවල්
අහස උසටම තිබේවි..

' ඒ හැම වෙලාවකම නුඹ මා ලඟින් ඉඳීවි.. '

- ඉරාන් යූ කුමාරගේ -

Ink by Iran U

02/12/2025

10/11/2025

10/11/2025

10/11/2025

10/11/2025

08/11/2025

08/11/2025

08/11/2025

07/11/2025

06/11/2025

05/11/2025

Address

Website

Alerts

Shortcuts

Share

Category