22/10/2025
"ලියුමක් ආවා..."
තාත්තගෙ යූරීන් බ්ලොක් එක ක්ලියර් කරන සර්ජරි එකට,
ලියුම එද්දි මනුස්සයගෙ යූරින් බ්ලොක් එක සනීපයි,
>ඉබේ ?...
අපෝ නෑ.. ලක්ෂ තුනක් තුනහමාරක් විතර වියදම් කරලා පෞද්ගලික රෝහලකින් අදාල සැත්කම කරගත්තට පස්සෙ,
> ඉතින් ලියුම එනකම් හිටියනම් ඉවරනෙ ,ඔච්චර වියදම් නොකර
මේ අහපන්කො, මිනිහට චු බරයි.. ඒ උනාට යන්නෙ නෑ.. උවමනා උනාට එළියට දාගන්න බෑ කිසිම විදියකින්, නිකමට හිතපන් උඹට පැය දෙක තුනක් බර අල්ලන් ඉන්න පුළුවන්ද? එකම ක්රමේ බටයක් දාලා යූරින් බෑග් එකක් එල්ලන එක,
බටේ ඔබන්නෙ ශිෂ්ණය ඇතුලෙන් මූත්රාශයට යනකම්,
එතැන් ඉඳලා කන්නෙ බොන්නෙ නාන්නෙ නිදියන්නෙ ඔක්කොම අර මල්ල එල්ලගෙන, ඇවිදින්නෙ කෙඳිරි ගගා, මුලු දවසම හිටගෙන ඉන්නවා ඉඳගද්දි බටෙ ඇදිලා එන දැවිල්ල නිසා, කන්නෙ නෑ.. බට පටලන් ටොය්ලට් යන්න කැමති නැති නිසා, නිදාගත්තත් එළිවෙනකම් හීනෙන් හරි කෙඳිරි ගානවා.
දවස් දහයෙන් දහයට බට මාරු කරන්න ඕන , නැත්තන් විෂබීජ ආසාදන වීමේ අවදානමක් තියෙනවා, මාරු කරන එකේ අමාරුව ලෙඩාට හපන් වෙන්න ලඟ ඉන්න එකාට දැනෙනවා, තියෙන බටේ ඇදලා දාලා ආයෙ අලුත් එකක් ශරීරයේ තියෙන සංවේදීම තැනකින් දානවා,
සමහර දවස්වලට දාපු බටේ එලියට අදින්න බෑ.. ඇතුලෙන් කැඩිලා නැවිලා.. අදිද්දි ඉරාගෙන තමා එන්නෙ, මිනිහා හොස්පිටල් එක දෙක වෙන්න කෑ ගහනවා, ගෙදර ආව වෙලාවෙ ඉඳන් රෑ දවල් නෑ කෙඳිරි ගානවා, ඒවා දැකලා දැකලා ගෙදර මිනිස්සු ඔක්කොටම වෙනම ඩිප්රෙශන් හැදෙනවා.
අන්තිම වතාවෙ ගිහින් බටේ ඇදලා එලියට ආවාම චූ නෙවේ ආවෙ යූරින් බෑග් එක පිරෙන්න ලේ... අන්න ඒ වෙලාවෙ තමා ගෙදර හැමෝම එක තීරනේකට ආවෙ.. දැන් ඇති... ඕන මගුලක් වෙද්දෙන් , මේ මනුස්සයා මේ දුක වින්දා ඇති, මොන විදියෙන් හරි සනීප කරවගෙ ඉවරයක් කරනවා කියලා.
>හ්ම්... ඇත්ත ඇත්ත.ඒක නම් අමාරුයි තමා, හැබැයි තව ටිකක් ඉවසුවනම් ලියුම එන්න තිබ්බා නේහ්..
Htto... යූරින් බ්ලොක් එක ආවෙ ගිය අවුරුද්දෙ සැප්තැම්බර් , ලියුම ආවෙ මේ අවුරුද්දෙ ඔක්තෝබරේ..
> crap 😑,ඉතින් දැන් කාටද උඹ බනින්නෙ ?
කාටවත් බනින්න දෙයක් නෑ. මේ තමා දැනට තියෙන තත්ත්වය, යූරින් බ්ලොක් එකක් මෙහෙම කල් යනවානම් ජීවිතේ රඳා පවතින සැත්කම් වලට ලිස්ට් එකේ ඉන්න මිනිස්සු ගැන හිතහන්කො, ලියුම එද්දි තුන්මාසෙ දානෙ දෙනවා ඇති සමහරවිට,
මේ දේවල් වල වෙනසක් වෙන්න ඕන කියලා මම විශ්වාස කරනවා, මේ දේවල් වෙනස් කරගන්න ඕන කරන සල්ලි ,ශ්රමය , බුද්ධිය තවමත් කොහෙ හරි අනවශ්ය තැන් වල ගාල් වෙලා තවමත් පල් වෙනවා ඇති කියලත් මම දන්නවා.
දැනට සිද්ධ වෙන්නෙ මෙන්න මෙහෙම -> අන්න ඒ දේවල් දැන්වත් අංශු මාත්රයකින්වත් වෙනස් වෙන්න ඕන -> ඒක වෙනස් වෙන්නෙ සමාජයට මේ ප්රශ්නය අරන් ගියොත් කියන අදහසින් මම මගෙ අත්දැකීම මේ විදියට කියලා ශෙයා කරනවා.
එච්චරයි.
Copied
