09/07/2026
👑දශාවතාර ලිපි මාලාව: දසවන දිගහැරුම
කල්කි අවතාරය
හින්දු දර්ශනයට අනුව මුළු විශ්වයම පාලනය කරන ප්රධාන දෙවිවරු තුන්දෙනෙක් ඉන්නවා. ඒ තමයි විශ්වය මවන මහා බ්රහ්මයා, විශ්වය පවත්වාගෙන යන විෂ්ණු දෙවියන් සහ කාල චක්රය පාලනය කරන සහ විශ්වය විනාශ කරන (නැවත නිර්මාණය කිරීම සඳහා) ශිව දෙවියන්. මේ තුන්දෙනාගෙන් ලෝකයේ පැවැත්ම, ආරක්ෂාව සහ ධර්මය ආරක්ෂා කිරීමේ සම්පූර්ණ වගකීම පැවරිලා තියෙන්නේ විෂ්ණු දෙවියන්ටයි.
විෂ්ණු දෙවියන්ගේ තියෙන විශේෂත්වය තමයි, ලෝකයේ ධර්මය පිරිහිලා අධර්මය රජයන හැම වෙලාවකම, සාමාන්ය මිනිස්සුන්ට කිසිම පිහිටක් නැති වෙන හැම වෙලාවකම, එතුමා විවිධ වේශයන්ගෙන් මේ ලෝකෙට ඇවිත් ලෝකය බේරගන්න එක. මේ විදිහට විෂ්ණු දෙවියන් ලෝකෙට එන ස්වරූපයන් තමයි අපි "අවතාර" කියලා හදුන්වන්නේ. හින්දු ධර්මයේ සඳහන් වෙන විදිහට විෂ්ණු දෙවියන්ගේ ප්රධාන අවතාර දහයක් තියෙනවා (දස අවතාර). මේ දස අවතාර අතරින් නවයක්ම මේ වෙද්දිත් ලෝකෙට පහළ වෙලා ඉවරයි. මත්ස්ය, කූර්ම (ඉබ්බා), වරාහ (ඌරා), නරසිංහ (අඩක් මිනිස්, අඩක් සිංහ), වාමන, පරශුරාම, රාම, ක්රිෂ්ණ සහ බුද්ධ (සමහර විශ්වාස වලට අනුව බලරාම) කියන්නේ අන්න ඒ පහළ වෙලා ඉවර වුණු අවතාර නවයයි.
ඉතින් අද අපි මේ කතා කරන්න යන්නේ තවමත් පහළ වුණේ නැති, හැබැයි අනාගතයේදී අපේ ලෝකෙට පහළ වෙන්න නියමිත ඒ අන්තිම අවතාරය, ඒ කියන්නේ දසවෙනි අවතාරය ගැනයි. ඒ තමයි "කල්කි" අවතාරය.
කල්කි අවතාරය ගැන කතා කරන්න කලින් අපි තේරුම් ගන්න ඕනේ කල්කි ලෝකෙට එන්නේ ඇයි කියන එක. හින්දු කාල ගණනයට අනුව ලෝකයේ කාලය ප්රධාන යුග හතරකට බෙදෙනවා. ඒ තමයි සත්ය යුගය, ත්රේතා යුගය, ද්වාපර යුගය සහ කලියුගය. මේ යුග හතරෙන් අන්තිම යුගය වෙන 'කලියුගය' තමයි අපි මේ දැන් ගත කරමින් ඉන්නේ. කලියුගය කියන්නේ පව් වැඩ, දුෂ්ටකම්, වංචාව සහ ධර්මය පිරිහීම උපරිමයටම යන කාලයක් විදිහටයි සැලකෙන්නේ.
පුරාණ ග්රන්ථවල, විශේෂයෙන්ම 'කල්කි පුරාණයේ' සඳහන් වෙන විදිහට කලියුගයේ අවසාන කාලය වෙද්දි ලෝකයේ තත්ත්වය හරිම භයානකයි. ඒ කාලෙට ලෝකයේ දකින්න ලැබෙන දේවල් ගැන පොත්වල මෙන්න මේ විදිහට විස්තර කරලා තියෙනවා,
🔹මනුස්සකම පිරිහෙනවා: මිනිස්සුන්ගේ ගුණධර්ම සම්පූර්ණයෙන්ම නැති වෙලා යනවා. සල්ලිවලට විතරක් මුල් තැන දෙන, ආදරය, කරුණාව, දයාව කියන දේවල් හොයාගන්නවත් නැති සමාජයක් තමයි ඒ කාලේ තියෙන්නේ.
🔹පවුල් බැඳීම් විනාශ වෙනවා: අම්මා, තාත්තා, දරුවෝ කියන බැඳීම් වලට කිසිම වටිනාකමක් නැති වෙනවා. ගෞරවය කියන දේ සමාජයෙන් තුරන් වෙලා යනවා.
🔹දූෂිත පාලකයෝ බිහිවෙනවා: රටවල් පාලනය කරන පාලකයෝ ජනතාවට කිසිම සේවයක් කරන්නේ නෑ. එයාලා තමන්ගේ බලය පාවිච්චි කරලා අහිංසක මිනිස්සුන්ව හූරගෙන කනවා. බදු බර වැඩිකරලා මිනිස්සුන්ව පීඩාවට පත් කරනවා.
🔹පරිසරය විනාශ වෙනවා: ගහකොළ සම්පූර්ණයෙන්ම විනාශ වෙලා ගිහින්, වැසි රහිත නියඟයන් එනවා. අමුතු අමුතු ලෙඩ රෝග හැදිලා මිනිස්සු මැරිලා යනවා
🔹ආයු කාලය අඩු වෙලා යනවා: මිනිස්සුන්ගේ ආයු කාලය අවුරුදු විස්සක් හෝ තිහක් දක්වා අඩු වෙනවා කියලත් සමහර තැන්වල සඳහන් වෙනවා.
අන්න ඒ වගේ මුළු ලෝකයම ඝන අන්ධකාරයකට, අධර්මයකට වැටිලා තියෙන වෙලාවක, මිනිස්සුන්ට දෙවියන් වහන්සේව සම්පූර්ණයෙන්ම අමතක වෙලා තියෙන වෙලාවක තමයි ලෝකයට අලුත් බලාපොරොත්තුවක් අරගෙන දසවෙනි අවතාරය විදිහට 'කල්කි' පහළ වෙන්නේ.
පුරාණ කතාවලට අනුව කල්කි ඉපදෙන්නේ 'ශාම්බලා' කියන ගම්මානයේ.කල්කිගේ පියා වෙන්නේ 'විෂ්ණුයශා' කියන දැහැමි, ගුණවත් බ්රාහ්මණයෙක්. මවගේ නම වෙන්නේ 'සුමතී'. මුළු ලෝකයේම මිනිස්සු පව් වැඩ කරද්දි, මේ දෙන්නා විතරක් දෙවියන්ට ගොඩක් ළැදිව, ධර්මානුකූලව, නිවැරදි මාර්ගයේ ජීවත් වෙනවා. ඉතින් මේ යුවළට දාව තමයි විෂ්ණු දෙවියන් තමන්ගේ කල්කි අවතාරයෙන් කුමාරයෙක් විදිහට ඉපදෙන්නේ. එයාට උපතින්ම අසාමාන්ය ශක්තියක්, බුද්ධියක් සහ දිව්යමය බලයක් පිහිටනවා.
කල්කි කුමාරයා ටිකක් ලොකු මහත් වෙද්දි එයාට යුධ ශිල්පය උගන්වන්න ගුරුවරයෙක් එනවා. ඒ තමයි විෂ්ණු දෙවියන්ගේම හයවෙනි අවතාරය වුණු 'පරශුරාම'. හින්දු විශ්වාසයට අනුව පරශුරාම කියන්නේ අමරණීය කෙනෙක් (චිරංජීවි). ඉතින් පරශුරාම ඇවිත් කල්කිට සියලුම ආයුධ හසුරුවන විදිහ, සටන් ශිල්පය සහ වේද ග්රන්ථ ගැන සම්පූර්ණ දැනුමක් ලබා දෙනවා.
ඊටපස්සේ ශිව දෙවියන් විසින් කල්කිට සුවිශේෂී තෑගි තුනක් ලබා දෙනවා.
1.සර්වඥ (සියල්ල දන්නා) "ශුක" නම් ගිරවෙක්.
2. දේවදත්ත නම් දිව්යමය වේගයක් සහිත දිව්යමය අශ්වයෙක්.
3. ආලෝකය විහිදුවන මහා කඩුවක්
හින්දු චිත්රවල සහ මූර්තිවල කල්කිව නිරූපණය කරලා තියෙන්නේ හරිම තේජාන්විත, බය හිතෙන තරම් දැවැන්ත රණශූරයෙක් විදිහටයි. සුදුම සුදු පාට අශ්වයෙක් පිටේ නැගලා යන රණශූරයෙක් විදිහට තමයි කල්කිව පෙන්නන්නේ.
කල්කිගේ සුදු අශ්වයාට විදුලි වේගයෙන් පියාඹන්න පුලුවන්. කල්කිගේ අතේ ගිනි දැල් විහිදෙන, දිලිසෙන විශාල කඩුවක් තියෙනවා. මේ කඩුවෙන් තමයි එයා ලෝකයේ ඉන්න දුෂ්ටයන්ව, පාපතරයන්ව විනාශ කරන්නේ. මේ ස්වරූපයේ ලොකු සංකේතාත්මක තේරුමක් තියෙනවා. සුදු අශ්වයා කියන්නේ පිරිසිදුකමේ සහ වේගයේ සංකේතයක්. ගිනිගන්නා කඩුව කියන්නේ අන්ධකාරය කපාගෙන යන 'ඥානයේ සහ යුක්තියේ' සංකේතයක්. ඒ කියන්නේ ලෝකයේ තියෙන අවිද්යාව (නොදැනුවත්කම) කියන අන්ධකාරය, කල්කිගේ බුද්ධිය කියන ආලෝකයෙන් නැති කරලා දානවා කියන එකයි.
කල්කිගේ අගබිසව වෙන්නේ ලක්ෂ්මී දේවියගේම මිනිස් අවතාරයක් වුණු "පද්මාවතී" කුමරියයි. පුරාණ ග්රන්ථවල ඉතා පැහැදිලිව සඳහන් වෙන්නේ ඇය ජීවත් වෙන්නේ 'සිංහල ද්වීපයේ' කියලයි. ඇය සිංහල ද්වීපයේ බෘහද්රථ කියන රජුගේ දියණියයි.
පද්මාවතී කුමරියට පුදුමාකාර දිව්යමය බලයක් වගේම අමුතුම වරමකුත් තියෙනවා. ඒ තමයි ඇය දිහා වැරදි සිතකින් හෝ කාමුක හැඟීමකින් බලන ඕනෑම පිරිමියෙක් ක්ෂණයකින් කාන්තාවක් බවට පත්වන එක! මේ හේතුව නිසා ලෝකයේ කිසිම පිරිමියෙකුට ඇය අසලටවත් යන්න ධෛර්යමත් වෙන්නේ නැහැ.
ඉතින් මේ අතරතුරේදී තමයි ශිව දෙවියන්ගෙන් කල්කිට තෑගි ලැබුණු, සර්වඥ "ශුක" නම් දිව්යමය ගිරවා කල්කිට සහය ලබා දෙන්නේ. මේ ගිරවා කල්කිට සිංහල ද්වීපයේ ඉන්න පද්මාවතී කුමරියගේ සුන්දරත්වය සහ ඇය සතු බලය ගැන විස්තර කියනවා. පද්මාවතී කුමරියත් තමන්ගේ ස්වාමියා විදිහට පතමින් ඉන්නේ විෂ්ණු දෙවියන්වම විතරයි.
පස්සේ කල්කි කුමාරයා තමන්ගේ දේවදත්ත අශ්වයා පිටේ නැගලා, ශුක ගිරවාගේ මගපෙන්වීම ඇතුව මුහුද තරණය කරලා සිංහල ද්වීපයට පැමිණෙනවා. කල්කි කියන්නේ සාමාන්ය මිනිසෙක් නෙවෙයි, විෂ්ණු දෙවියන්ගේම අවතාරයක් නිසා පද්මාවතී කුමරියගේ අද්භූත බලපෑම ඔහුට බලපාන්නේ නැහැ. අවසානයේදී කල්කි කුමාරයා පද්මාවතී කුමරියව විවාහ කරගෙන, ඇයවත් කැටුව නැවත තමන්ගේ දේශයට බලා පිටත් වෙනවා. මේ ගැන කල්කී පුරාණයේ ඉතා විශාල ලෙස විස්තර කර තිබෙනවා.
කල්කි පුරාණයට අනුව කල්කි කුමාරයාට පද්මාවතී දේවියට අමතරව තවත් සුවිශේෂී බිරිඳක් සිටිනවා. ඇය නමින් "රමා" කුමරියයි. පද්මාවතී දේවිය වගේම ඇයත් ලක්ෂ්මී දේවියගේම තවත් දිව්යමය අංශයක් විදිහටයි සැලකෙන්නේ. රමා කුමරිය කියන්නේ 'ශෂීධ්වාජ' කියන රජතුමාගේ ආදරණීය දියණියයි.
මේ විවාහය පිටුපසත් හරිම අපූරු කතාවක් තියෙනවා. ශෂීධ්වාජ රජතුමා කියන්නේ විෂ්ණු දෙවියන්ට දැඩි ලෙස භක්තිමත්, ධාර්මික රජ කෙනෙක්. හැබැයි කලියුගයේ බලපෑම නිසා ඇතිවෙන දේශපාලන තත්ත්වයන් මත කල්කි කුමාරයා සහ මේ රජතුමා අතර විශාල යුද්ධයක් ඇති වෙනවා. රජතුමා තමන්ගේ තදබල භක්තියේ බලය නිසාම මේ සටනේදී කල්කිව පරාජය කරලා, සිරකරුවෙක් විදිහට තමන්ගේ මාලිගාවට කැටුව යනවා.
හැබැයි රජතුමා එහෙම කරන්නේ කල්කිට හානියක් කරන්න නෙවෙයි, ඔහුට අවශය වෙන්නේ තමන් වඳින දෙවියන්ගේ අවතාරය තමන්ගේ නිවසටම වඩම්මවා ගන්නයි. එතනදී කල්කි කුමාරයා කවුද කියලා පැහැදිලිව හඳුනාගන්නා රජතුමා, මහත් ගෞරවයෙන් යුතුව තමන්ගේ දියණිය වන රමා කුමරියව කල්කිට විවාහ කර දෙනවා.
මේ විදිහට පද්මාවතී සහ රමා කියන දිව්යමය දේවියන් දෙදෙනාගේම සහය ඇතුව තමයි කල්කි අවතාරය කලියුගයේ නපුර විනාශ කරන්න තමන්ගේ මහා සංග්රාමය නිල වශයෙන් ආරම්භ කරන්න ගන්නේ.
විෂ්ණු අවතාරයක් විදිහට කල්කිගේ ප්රධානම රාජකාරිය තමයි මේ ලෝකයේ පිරිහිලා තියෙන ධර්මය නැවත ස්ථාපිත කරන එක. කල්කි පුරාණයට අනුව කල්කිගේ ප්රධානම සතුරා වෙන්නේ 'කලි' කියන අසුරයා. මේ කලි කියන්නේ කලියුගය පාලනය කරන, මිනිස්සුන්ගේ හිත්වලට පාපය, වංචාව, ක්රෝධය ඇතුළු කරන අදෘශ්යමාන බලවේගයක්. කලි අසුරයාගේ පවුලේ අය තමයි කෲරකම, බොරුව, මත්ද්රව්ය සහ අකුසලය කියන දේවල්.
කල්කි තමන්ගේ දේවදත්ත අශ්වයා පිටේ නැගලා ලෝකය පුරාම ගමන් කරනවා. එයාට එකතු වෙනවා රමා කුමරියගේ පියා ඇතුළු තවත් ධාර්මික රණශූරයෝ විශාල ප්රමාණයක හමුදාවක්. මේ හමුදාව ලෝකය පුරාම ගිහින් අර කිසිම හිතක් පපුවක් නැති, නපුරු, ආත්මාර්ථකාමී පාලකයන්ව සහ පාපතර මිනිස්සුන්ව විනාශ කරලා දානවා. අවසානයේ කල්කි සහ කලි අසුරයා අතර මහා යුද්ධයක් සිද්ධ වෙනවා. මේ යුද්ධයෙන් අන්තිමට කලි අසුරයා සම්පූර්ණයෙන්ම පරාජය වෙලා ශක්තිය අහිමි වෙලා ශරීරය හැර දාලා පැනලා යනවා. (ඔහු විනාශ වෙන්නේ නැහැ. මොකද කාල චක්රයේදී ස්වභාවධර්මයේ නියමයක් ලෙස ඔහු නැවතත් කල්ප ගණනාවකට පසුව කලි යුගයක් රැගෙන පැමිණෙනවා.)
මේක හරියට විශාල 'පිරිසිදු කිරීමක්' වගේ දෙයක්. සමාජයේ මුල් බැහැගෙන තියෙන පිළිකාවක් අයින් කරනවා වගේ වැඩක්. අසාධාරණයට ලක් වෙලා හිටපු, තාමත් හිතේ පොඩි හරි ධර්මයක් ඉතුරු වෙලා තියෙන හොඳ මිනිස්සුන්ව කල්කි විසින් මේ විනාශයෙන් බේරගන්නවා. නරක ඔක්කොම විනාශ වෙලා යද්දි, හොඳ මිනිස්සු විතරක් ලෝකයේ ඉතුරු වෙනවා.
මේ මහා විනාශයෙන් පස්සේ, ඒ කියන්නේ කල්කී නපුර සම්පූර්ණයෙන්ම තුරන් කළාට පස්සේ අඳුරු කලියුගය අවසන් වෙනවා. ඊටපස්සේ ලෝකයේ නැවතත් අලුත්ම අලුත්, පිරිසිදු නව යුගයක් ආරම්භ වෙනවා. ඒකට කියන්නේ 'සත්ය යුගය' එහෙම නැත්නම් 'කෘත යුගය' කියලා.
සත්ය යුගය කියන්නේ සාමය, සතුට, ධර්මය සහ ආදරය පිරුණු ස්වර්ණමය යුගයක්. ඒ කාලෙදි සමාජයේ කිසිම හොරකමක්, බොරුවක්, වංචාවක් දකින්න ලැබෙන්නේ නෑ. මිනිස්සු අතර ජාති, ආගම්, කුල කියලා කිසිම භේදයක් නෑ, රණ්ඩු සරුවල් නෑ. හැමෝම එකිනෙකාට උදව් කරගෙන, ස්වභාවධර්මයට ගොඩක් ආදරය කරගෙන සතුටින් ජීවත් වෙනවා. මිනිස්සුන්ගේ ආයු කාලය නැවතත් වැඩි වෙනවා, රෝගාබාධ නැති වෙලා යනවා. කල්කි අවතාරයේ ප්රධානම සහ එකම අරමුණ වෙන්නේ අන්න ඒ සුන්දර සත්ය යුගය නැවතත් මේ ලෝකෙට උදා කරලා දෙන එකයි.
මූලාශ්ර: කල්කි පුරාණය ඇසුරිණි.
එසේ නම් විෂ්ණු දෙවියන්ගේ දශාවතාර ලිපි මාලාව මෙතනින් අවසානයි. තවත් මෙවැනි ලිපි මාලාවකින් ඉදිරියේදී හමුවෙමු.🙏
