11/06/2025
Little Women (පුංචි යුවතියෝ) අමෙරිකානු ලේඛිකා ලුයිසා මේ ඇල්කොට් :1832–1888) විසින් 1868දී ලියන ලද හා දැනට සම්භාව්‍ය ගණයේ ලා සැලකෙන නවකථාවකි.
‘පුංචි යුවතියෝ’ කඩිනමින්ම පාඨක මෙන්ම විචාරකයන්ගේ ද ඇගයීම්වලට ලක්වූ යොවුන් නව කතාවකි. එයින් මෙග්, ජෝ, බෙත් සහ ඇමී යන මාච් පවුලේ යුවතියන් හතරදෙනෙකුඝේ ළමා වියේ සිට තරුණ කාන්තාවන් බවට පත්වීම දක්වා කාල පරාසය තුළ ඔවුන් මුහුණ දුන් විවිධ අත්දැකීම් නිරූපණය වෙයි.
එය මොන තරම් ජනප්‍රියත්වයට පත්වූවේද කිවහොත් එම චරිත ගැන තවත් තොරතුරු අවශ්‍ය යයි පාඨකයන්ගෙන් කෙරුණ බලකිරීම මත Good Wives නමින් එහි දෙවැනි කොටසක් ද ලිවීමට ඇල්කොට්ට සිදුවිය. එය ද අතිශයින්ම සාර්ථක පොතක් විය.
පුංචි යුවතියෝ විශේෂයෙන් ගැහැනු ළමයින් ඉලක්ක කර ගත් නවකතාවක් වුවත් එය සාමාන්‍ය ළමා කථාවලට වඩා හාත්පසින්ම වෙනස් ය. එය තේමා තුනකට- එනම් ගෙදරදොර පරිසරය, වැඩපළවල යෙදීම සහ සත්‍ය ප්‍රේමය පාදක කරගෙන ලියැවුනකි. ඒවා එකක් අනෙකක් හා බැඳූන සහ ඒ ඒ චරිතයේ අනන්‍යතාවය හඳුනා ගැනීමට ඉවහල්වෙන ඒවාය.
‘පුංචි යුවතියෝ’ ආදර කතාවක් මෙන්ම ගවේෂණාත්මක එකක් ලෙස ද සැලකිය හැකිය. එය ධනයට වඩා ගුණය තහවුරු කෙරෙන එකකි. එතුළින් සියළුම අමෙරිකානු දැරියන් සතු බහුවිධ පැතිකඩ හෙලිවෙන අතර විශේෂයෙන්ම මාච් සහෝදරියන් වෙතින් දැරියක අන්‍යයන් කෙරෙහි දයාවන් හා කරුණාව යොමුකළ යුතු ආකාරය පැහැදිලි කෙරෙයි.
‘පුංචි යුවතියෝ’ මීරිගම ආකර්ෂා ප්රකාශනයකි. එයහි මිල රු. 500ක් පමණය. 033 22 75611. වට්ස්ඇප් මැසේජ. 0752122220 යන අංකයක් ඔස්සේ ඇමතීමෙන් ඔවුන්ගෙන්ම ඍජුවම එය ඇනවුම් කළ හැකිය.
