04/05/2023
වෙසක් පොහෝ දින වැදගත්කම
1. බෝධිසත්වයන් වහන්සේ මතු බුදුබව පතා ප්රථම වරට නියත විවරණ ලැබීම.
2. සිද්ධාර්ථ බෝසත් කුමරු ඉපදීම.
3. සිදුහත් කුමරුන් බුදු වීම.
4. බුදුරජාණන් වහන්සේ පිරිනිවන් පෑම.
5. බුද්ධත්වයෙන් පසුව කිඹුල්වත් පුරට වැඩමවීම සහ යමා මහ පෙළහර පෑම.
6. බුදුරජාණන් වහන්සේගේ තුන් වන ලංකාගමනය වූ කැළණියට වැඩම කිරීම සහ එදිනම සමනල කන්දේ සිරිපා සටහන තැබීම.
7. විජය කුමරු ලක්දිවට පැමිණීම සහ සිංහල ජාතියේ ආරම්භය සිදු වීම.
8. ධර්මාශෝක අධිරාජයාගේ නියමයෙන් දෙවන පෑතිස් රජු දෙවෙනි වර අභිෂේක කිරීම.
9. දුටුගැමුණු රජු රුවන් වැලි මහ සෑ රජුන්ගේ වැඩ ඇරැඹීම.
10. ධර්ම භාණ්ඩාගාරික ආනන්ද තෙරුන් පිරිනිවන් පෑම.
ලෝ වැසි සියලු බෞද්ධයින්ට වෙසක් පුර පසලොස්වක පොහෝ දිනය තරම් වැදගත් වන වෙනත් දිනයක් නැත. මේ පින්බර දිනයේ දී සිදුවුණු සුවිශේෂී සිදුවීම් කිහිපයක් පහත සඳහන් වේ.
1. මීට සාරාසංඛ්‍ය කල්ප ලක්ෂයකට පෙර අනියත විවරණ සම්පූර්ණ කර සිටි අප මහ බෝසතාණන් වහන්සේ, සුමේධ තාපසතුමා ලෙස පංච අභිඥාලාභී ඍර්ධිමත් තවුසෙක්ව උපන්නේය. මේ සුමේධ තාපසතුමා දීපංකර බුදු පියාණන් වහන්සේගේ පාද මූලයේදී, මතු බුදුබව පතා ප්රථම වරට නියත විවරණ ලැබීම.
2. කපිලවස්තුපුර ශාක්‍ය වංශික සුද්ධෝදන මහ රජතුමා ගේ සහ මහාමායා දේවියගේ පින්බර පුත්‍ර රත්නය ලෙස සිද්ධාර්ථ බෝධිසත්වයන් වහන්සේ ලුම්බිණි සල් උයනේ දී උපත ලැබීම.
මෙදිනම යසෝදරා දේවිය, ඡන්න ඇමතිතුමා, කාලුදායි ඇමතිතුමා, කන්ථක අශ්වයා, ජය ශ්‍රී මහා බෝධීන් වහන්සේ, සතර මහ නිධානය පහළ විය.
3. “අග්ගෝ හමස්මි ලෝකස්ස......” ආදී ලෙස අභීත සිංහනාදය පැවැත්වීම.
4. සසරේ අවසන් ආත්ම භාවය වන මේ භවයේ, විසිනව වන වියට එළැඹුණු සිදුහත් කුමරු, උයන් කෙළියට පැමිණෙද්දී, ජීවිතයේ අනියත වටහා දුන් සතර පෙර නිමිතිවල ව්‍යාධි රූපය දැකීම.
5. සිදුහත් තාපසතුමන් ගයාවේ ජය ශ්‍රී මහා බෝධීන් වහන්සේගේ පාමුල දී ලොව්තුරා සම්බුද්ධත්වයට පත්වීම.
6. බුද්ධත්වයෙන් දස මසකින් කිඹුල්වත්පුර තම උපන් ගමට වැඩම කළ බුදු පියාණන් වහන්සේ ඥාතීන්ගේ අතිමානය දුරැලීමට යමා මහා පෙළහර පෑම.
7. බුදුරජාණන් වහන්සේ අසූ වැනි වියේදී කුසිනාරා නුවර මල්ල රජ දරුවන්ගේ උපවත්තන නම් සල් උයනේ දී ස්කන්ධයන්ගේ අනියත බව පසක් කරමින් පිරිනිවන් පෑම.
8. බුදුරජාණන් වහන්සේ මණි අක්ඛිත නා රජුගේ ආරාධනාවෙන් තෙවන වර ලංකාවේ කැලණියට වැඩම කොට චූලෝදර, මහෝදර නා රජුන් ප්‍රමුඛ බොදු මහ ජනතාවගේ දානය වළඳා, ඔවුනට ධර්ම දේශනා කළ සේක. එහිදී සුමන සමන් දෙවියන්ගේ ආරාධනාවෙන් සමනළ කදු සිරසෙහි ශ්‍රී පාද පද්මය පිහිටුවාලූහ. ඉන්පසුව සොළොස්මස්ථානයන්ට වැඩම කර ශ්‍රී ලංකා භූමිය සම්බුද්ධ පාදස්පර්ශයෙන් පාරිශුද්ධ භූමියක් බවට පත් කළ සේක.
9. විජය කුමරු ඇතුලු සත්සියයක් පිරිස ලංකාවට පැමිණීම සහ සිංහල ජාතියේ ආරම්භය ඇතිවීම. (බුදුරජාණන් වහන්සේගේ පිරිනිවන් පෑමද, විජයාගමනයද එකම වෙසක් පුර පසළොස්වක පොහොය දිනයක සිදුවිය.)
10.බුදුපියාණන් වහන්සේ පිරිනිවන් මංචකයේ වැඩ හිඳිමින් සක්‍ර දිව්‍ය රාජයාට
“පතිට්ඨිස්සති දේවින්ද ලංකායං මම සාසනං
තස්මා සපරිවාරන්තං රක්ඛ ලංකඤ්ච සාධුකං”
(මහාවංශය)
“දේවේන්ද්‍රය, මාගේ සසුන ලංකාද්වීපයෙහි පිහිටන්නේ ය. එනිසා පිරිවර ද සමගින් ඒ ලක්දිව මනාව රැකිය යුත්තාහ.” යැයි පැවරීම.
10. ප්රථම ධර්ම සංගායනාවෙන් පසු තවත් හතළිස් වසරක් ම ධර්ම භාණ්ඩාගාරික ආනන්ද මහ රහතන් වහන්සේ වැඩ සිටි සේක. උපතින් වයස එකසිය විස්සක් ගෙවුනු තැන ආනන්ද මහ රහතන් වහන්සේ වෙසක් පොහෝ දිනක රෝහිණී නදිය ඉහළ අහසේ වැඩහිඳ, පෙළහර පා, දහම් දෙසා, “සිරුරේ ධාතු දෙකොටසකට සමව බෙදේවා” යි අදිටන් කොට, තේජෝ සමාපත්තියෙන් පිරිනිවන් පෑම.
11. ක්‍රි.පූ තෙවන සියවසේදී භාරතයේ රාජාභිෂේක ලත් ධර්මාශෝක රජතුමා සමඟ පැවැති මිත්‍ර සබඳතාව තවත් වර්ධනය කර ගැනීමට, ලක්දිව රාජාභිෂේක ලත් දේවානම් පියතිස්ස රජතුමා, තුටු පඬුරු රැගත් රාජ දූතයන් පිරිසක් ධර්මාශෝක රජු වෙත පිටත් කර යැවීය. මේ කලණ මිතු දමට ප්‍රතිචාර වශයෙන් රාජාභිෂේකයට අවශ්‍ය පංච කකුධ භාණ්ඩ ,ද දහම් පණිවුඩයක්ද, ධර්මාශෝක රජතුමා විසින් එවන ලදී. ඒ අනුව දේවානම් පියතිස්ස රජතුමා දෙවන වරට රාජාභිෂේක ලැබුවේ ද වෙසක් පුර පසළොස්වක පොහොය දිනකදී ය.
12. අසහාය බෞද්ධ රජු වූ දුටුගැමුණු මහ රජතුමා රුවන්වැලි මහ සෑයෙහි වැඩ, විසා නැකතින් ඇරඹුවේ ද වෙසක් පුර පසළොස්වක පොහොය දිනක ය.
13. මහා විහාර භික්ෂූන් වහන්සේ වසරක් පුරා උපසම්පදා මහෝත්සවය පවත්වන්නේ ද වෙසක් පුර පසළොස්වක පොහොය දිනකදී ය.
14. සිරිපා වන්දනාවේ යෙදෙන අවසන් පොහොය දිනයද වෙසක් පොහෝ දිනය වේ.
දුටුගැමුණු රජතුමා වෙසක් උළෙල සූවිස්සක් ද , භාතිය රජතුමා වෙසක් උළෙල විසි අටක් ද, වසභ රජතුමා වෙසක් උළෙල හතළිස් හතරක් ද, පැවැත්වූ බව මහා වංශයෙහි සඳහන් වේ. ප්‍රදර්ශන හා පෙරහර රැසකින් වෙසක් පුර පසළොස්වක පොහෝ දිනය අසිරිමත් වූ බව අශෝක චක්‍රවර්තීන් සිව්වන සෙල් ලිපියෙහි සඳහන් කරයි.
මේ පින්බර වෙසක් පුර පසළොස්වක පොහෝ දිනය පින්වත් ඔබ සැමත්, ආර්ය අෂ්ටාංගික මාර්ගයම අනුගමනය කර, චතුරාර්ය සත්‍යාවබෝධ ඤාණයෙන් කෙලෙසුන් නසා නිවන් දකින්නට හේතු සම්පත් සම්පූර්ණව වන පින්බර දිනයක් බවට පත් කරගන්න.
තෙරුවන් සරණයි!
සාදු..... සාදු..... සාදු.....
පූජනීය, තපෝවනයේ රතන ස්වාමීන් වහන්සේ
මිණිපුර අමා ශාන්ති තපෝවනය
පැල්වාඩිය - රත්නපුරය.
උපුටා ගැනීමකි
උතුම් වූ ධර්ම දානයක්ම වේවා🙏🙏🙏
තෙරුවන් සරණයි 🙏🙏🙏
