16/10/2026
කෝටි හතරකට ආසන්න රත්‍රං සඟවා ගෙනා ඉන්දීය ජාතිකයන් තිදෙනෙක් අත්අඩංගුවට
රුපියල් කෝටි හතරකට ආසන්න වටිනාකමකින් යුත් රත්‍රං ග්‍රෑම් 790ක් ගුද මාර්ගයේ සඟවාගෙන මෙරටට පැමිණි බව කියන ඉන්දීය ජාතිකයන් තිදෙනකු අද (16) අත්අඩංගුවට ගත් බව ආමර්වීදිය පොලිසිය පවසයි.
අත්අඩංගුවට ගෙන ඇත්තේ ඉන්දියාවේ කේරළ ප්‍රාන්තයේ පදිංචි, වයස අවුරුදු 28ත් 36ත් අතර පසුවන පුද්ගලයන් තිදෙනෙකි. ඔවුන් මැලේසියාවේ සිට කටුනායක ගුවන්තොටුපොළ ඔස්සේ මෙරටට පැමිණ ඇති බව පොලිස් විමර්ශනවලදී අනාවරණය වී තිබේ.
බස්නාහිර පළාත් බුද්ධි නිලධාරීන්ගෙන් ලද තොරතුරකට අනුව, ආමර්වීදිය පොලිසියේ ස්ථානාධිපති පොලිස් පරීක්ෂක කේ. ඒ. එස්. නිශාන්ත මහතා ඇතුළු නිලධාරීන් කණ්ඩායමක් ආමර්වීදිය ප්‍රදේශයේ හෝටලයකදී සැකකරුවන් අත්අඩංගුවට ගෙන ඇත.
ගුවන්තොටුපොළ ස්කෑන් පරීක්ෂාවලදී රත්‍රං හඳුනාගැනීම වැළැක්වීමේ අරමුණින් ඒවායේ රසායනික ද්‍රව්‍යයක් ආලේප කර තිබූ බවටද විමර්ශනවලදී තොරතුරු අනාවරණය වූ බව පොලිසිය සඳහන් කරයි.
ඩුබායිහි සිටින පුද්ගලයකු විසින් දුරකතනයට එවනු ලබන ස්ථානයකට එම රත්‍රං රැගෙන ගොස් අලෙවි කිරීමට සැකකරුවන් සූදානමින් සිට ඇති බව ප්‍රශ්න කිරීම්වලදී අනාවරණය වූ බවද පොලිසිය පවසයි.
සැකකරුවන් තිදෙනා මාලිගාකන්ද මහේස්ත්‍රාත් අධිකරණයට ඉදිරිපත් කිරීමට නියමිතය.
කොළඹ උතුර කොට්ඨාස භාර ජ්‍යෙෂ්ඨ පොලිස් අධිකාරී එරික් පෙරේරා මහතාගේ උපදෙස් මත, ආමර්වීදිය පොලිසියේ ස්ථානාධිපති පොලිස් පරීක්ෂක කේ. ඒ. එස්. නිශාන්ත මහතාගේ ප්‍රධානත්වයෙන් පොලිස් කොස්තාපල්වරුන් වන සේනාධීර (4010), පැතුම් (102607) සහ අභිලාෂ් (103848) යන නිලධාරීහු වැඩිදුර විමර්ශන සිදු කරති.
