03/10/2026
විදේශීය කාන්තාවක🔴 ගෙනැවිත් ගණිකා වෘත්තියේ යෙදවූ ත්‍රිරෝද රථ රියදුරාට වසර 10ක බරපතළ වැඩ සහිත සිරදඬුවම්!
රැකියා ලබාදෙන බවට පොරොන්දු වී උස්බෙකිස්ථාන ජාතික කාන්තාවක ශ්‍රී ලංකාවට ගෙන්වා, ඇයගේ ගමන් බලපත්‍රය අත්අඩංගුවට ගනිමින් බලහත්කාරයෙන් ගණිකා වෘත්තියේ යෙදවීමේ චෝදනාවට වරදකරු වූ ත්‍රිරෝද රථ රියදුරෙකුට වසර 10ක බරපතළ වැඩ සහිත සිරදඬුවමක් සහ රුපියල් 10,000ක දඩයක් නියම කිරීමට කොළඹ මහාධිකරණ විනිසුරු ලංකා ජයරත්න මෙනවිය ඊයේ (02) නියෝග කළාය. 2021 ජනවාරි මස කොළඹ පිහිටි ප්‍රධාන පෙළේ හෝටලයකදී අදාළ කාන්තාව මෙලෙස ජාවාරම සඳහා යොදාගැනීම සම්බන්ධයෙන් දණ්ඩ නීති සංග්‍රහයේ 360 අ (1) වගන්තිය යටතේ නීතිපතිවරයා විසින් මෙම විත්තිකරුට එරෙහිව නඩුව පවරා තිබිණි.
නඩු විභාගයේදී තහවුරු වූ පරිදි, විත්තිකරු සහ ඔහුගේ උස්බෙකිස්ථාන ජාතික බිරිඳ එකතුව මසකට ඩොලර් 1,500ක වැටුපක් හෝ ළමා සුරැකුම් රැකියාවක් ලබාදෙන බවට පවසා මෙම කාන්තාව මෙරටට ගෙන්නාගෙන ඇත. පසුව ඇය තර්ජනයට ලක්කරමින් කොළඹ සහ මීගමුව ප්‍රදේශවල හෝටල් වෙත යවා ලිංගික සේවයේ යොදවා ඇති අතර, ලබාගත් සියලු මුදල් විත්තිකරු විසින් පාලනය කර තිබේ. පාරිභෝගිකයෙකු විසින් අදාළ සේවාව වෙනුවෙන් ගෙවූ මුදල් කෙළින්ම විත්තිකරුගේ පෞද්ගලික බැංකු ගිණුමට ලබාගෙන ඇති බව බැංකු වාර්තා මගින්ද තහවුරු වූ අතර, ඉදිරිපත් වූ සාක්ෂි සලකා බැලූ මහාධිකරණය විත්තිකරුට මෙම බරපතළ සිරදඬුවම නියම කළේය.
News source : DasathaLanka! Some visual elements were created with AI. This is an original editorial AI illustration, not an actual photograph.
