25/09/2024
ගරු ජනාධිපතිතුමනි....
මම ඔබට චන්දය නොදුන් හා චන්ද ව්‍යාපාරය අතරතුර ඔබ හා ඔබගේ පක්ශය තදින් විවේචනය කල කෙනෙක්මි.
එහෙත් දැන් ඔබ මේ රටේ ජනාධිපතිවරයාය. එබැවින් මේ රටේ ජනාධිපතිවරයෙකු රටේ නීතිගරුක හා සාමකාමී පුරවැසියෙකු වෙතින් බලාපොරොත්තු වන මෙහෙය නොපිරිහෙලා මා අතින් තවදුරටත් ඉටුවනු ඇත.
ජනාධිපතිතුමණි.
අපේ රට බෞද්ධ රටකි. මේ බුදුන් තෙවරක් වැඩි පන්දහසක් කල් සසුන රැකෙන එකම දේශයයි. මේ රටේ සියල්ලන්ටම උඩින් ක්‍රියාත්මක වන්නේ කර්මය හා කර්ම ඵලය යන උතුම් ධර්ම නියමයයි.
ඒ අනුව ඉතා දෛවෝපගත ලෙස කර්මය හා කර්ම ඵලය අනුව ඔබ මේ රටේ ජනාධිපති ලෙස පත් වී ඇත.
ඔබ නියෝජනය කරන පක්ශය 1971 පටන් මේ රටේ දියුණුවට අකුල් හෙලූ, කැරළි ගැසූ, ත්‍රස්තවාදී ක්‍රියා සිදුකිරීමට කුප්‍රකට පක්ශයකි. උතුරේ ත්‍රස්තවාදයට සමගාමීව දකුණේ සිට රට අරාජික කිරීමේ අප්‍රසන්න ඉතිහාසයක් ඔබ පක්ශයට ඇත.
එහෙත්
කාලය විසින් ඔබගේ පක්ශය ප්‍රජාතන්ත්‍රවාදී ප්‍රවාහයට ඇදගෙනවිත් අද ඔබ එහි ප්‍රතිඵලයක් ලෙස රටේ ජනාධිපති ලෙස පත්වී ඇත. එය ඔබට හා ඔබේ පක්ශයට දිට්ඨධම්මවේදනීය කර්මය පලිසන් දීමකි.
දැන් ඔබ විසින්ම ආපස්සට අදින ලද රට ඔබ විසින්ම ඉදිරියට ගෙන යා යුතුය.
ඔබ විසින් අකුල් හෙළන ලද සංවර්ධන ව්‍යාපෘති ඔබ විසින්ම තවදුරටත් ක්‍රියාත්මක කල යුතුය.
මේ රටේ සිදුවුනායැයි ඔබ කියන මහා වංචා හා දූෂණ ඔබ විසින්ම ඔප්පු කර වරදකරුවන්ට දඬුවම් ලබා දිය යුතුය.
ඔබගේ පැරණි ඩබල් කැබ් රථයේ මෙතෙක් පුස් කෑ ෆයිල් වලට ඔබම සාධාරණයක් ඉටු කල යුතුය.
මේ රටේ ධනය මංකොල්ල කෑ හොරුන් මේ රටෙන් පිටකලා යැයි ඔබ කියූ මහා ධනස්කන්ධය නැවත ඔබ විසින්ම මෙරටට ගෙන ආ යුතුය
මේ රටේ මිනිස්සුන්ට යහපත් ජීවිතයක් අහිමි කලා යැයි ඔබ කියන චෞර වළල්ල ඔබ විසින්ම බිඳ දැමිය යුතුය
ඔබ විසින් විටින් විට වැඩ වර්ජන හා විරෝධතා සඳහා එළියට බස්සා රට පීඩාවට පත් කල රටේ රාජ්‍ය සේවය ඔබ විසින්ම විනයවත් හා කාර්‍යක්ශම කල යුතුය.
මේ ආකාරයෙන් ඔබ විසින් විටින් විට ආ ආණ්ඩු පෙරළා දැමීමට ගෙනා සියලු චෝදනා ඔප්පු කිරීමේ වගකීම හා ඒවා යතාවත් කිරීම, කර්මය හා කර්ම ඵලය විසින් ඔබ වෙත පවරා ඇත.
ඒ කර්මය මේ ධූර කාලයේදීම ගෙවා දමා නිදහස් මිනිසෙක් ලෙස බලයෙන් නික්මීමට අවශ්‍ය සියලු ශක්තිය හා දිරිය ඔබට වෙත පතමි.
ඔබට උතුම් දළදා හිමිගේ ආශිර්වාදය ලැබේවා
තෙරුවන් සරණයි.
