Quel est le site Web ?

RTL - Afterwork

Radio Emissioun

11/05/2026

De Jeff Oberweis, huet sech e Numm als Patissier-Confiseur gemaach. Am 'Café des artistes' zielt hien dem Dan Spogen, Raoul Roos a Mike Fandel, dass hien als Kand aus Plazgrënn net mat sengem Brudder an engem Haus gewunnt huet. Hien verzielt wéi säin Papp a seng Mamm de Betrib opgebaut hunn, an op villes hu missten verzichten. Hien verréit wéi him d'Knippercher um roude Pëtz aus der Camionnette gefall sinn, wéi seng Mamm de Maître Vogel mam Fausti verwiesselt hat, a wéi de fréieren Direkter vun der Arbed Petit-fouren un den Hond verfiddert huet.
Den unerkannten Glacemeeschter schwätzt vun der éischter Commande fir den Haff, iwwer de President Macron an de Bamkuch an e Kuch bei enger 100 Joerfeier, deen net do war.
Piano: Marc Schmidt

04/05/2026

Den Ali Kaes, de fréieren Député-Maire aus der Gemeng Tandel ass net just duerch de Fussball bekannt mee och duerch seng gewerkschaftlech Aktivitéiten.
Am 'Café des artistes' am Gronn zielt de 'Kéis' dem Dan Spogen, Raoul Roos a Mike Fandel dass hien mam Marc Spautz um Päerd ausgeridden ass, an och alt emol fir d'Kanner um Fuesbal de Clown gespillt huet.

De geléierten Dréier erënnert sech, wéi en am Schwäistall entschlof war, an enger Nonn gehollef huet e Källefchen op d'Welt ze bréngen. Mir héieren, wéi e sech géint de Minister aus senger eegener Partei fir en Eenheetswaasserpräis agesat huet a mat der Police de Spunnes gemaach hat, an hien gëtt zou senge Chamberskolleegen reegelméisseg Eeër an Zoossissen mat op de Krautmaart bruecht ze hunn. Piano: Marc Schmidt

27/04/2026

De Carlo Cravat, de Chef vum legendären Hotel an der Stad.

Am 'Café des artistes' am Gronn geet et beim Dan Spogen, Raoul Roos a Mike Fandel ëm seng aussergewéinlech Kandheet am Hotel, säin Horror virun der Schoul, seng Leidenschaft fir d'schéissen a seng Léier an Asien wou och emol Gehier vu jonken Afen um Menü stoung. Et gëtt een gewuer dass hien wierklech net kache kann, mat 25 schonn e Rolls-Royce virun der Dier hat a firwat, dass den Hotel, en face vun der Gëlle Fra, säin Styl behale soll an hien un där 'aler Këscht' hänkt.

Piano: Marc Schmidt

20/04/2026

De Marc Graas, de Fils vum Gust Graas ass Psychiater a Psychotherapeut an huet sech e Numm als Auteur vu Kriminalromaner gemaach. Am 'Café des artistes' beim Dan Spogen, Raoul Roos a Mike Fandel zielt hien iwwer seng Stagen an der Villa Louvigny, verréit dass hien als Student zu Innsbruck schonn Papp ginn ass. Een Thema sinn d'Äschen vum verstuerwenen Schwéierpapp an dass d'Airline déi net mathuele wollt. Et geet ëm déi klassesch Couche an der Praxis, droleg Fäll, L*D an dass een mat Bicher schreiwen keng Suen verdéngt. Piano: Marc Schmidt

13/04/2026

De Pol Urbany ass bekannt als Affekot a Museker. Am 'Café des artistes' am Gronn, héieren den Dan Spogen, Raoul Roos a Mike Fandel, dass de Maître als Kand gären mat Feier experimentéiert huet a seng Schwëster en dankbaart Affer war. Hien verzielt, dass hien als Museker näischt ubrenne gelooss huet an och emol moies an der Fënster vun engem Miwwelgeschäft erwächt ass. De Fils vum fréieren kommunistesche Politiker René Urbany, deen souguer an engem Film mam Maître Gaston Vogel gespillt huet, beschreift seng aussergewéinlechst Fäll a verréit firwat hien net Profimuseker ginn ass. Piano: Marc Schmidt

23/03/2026

De Marc Hobscheit ass Immobilienhändler, Gastronom an Trendsetter aus dem Nuetsliewen.
De geléierten Maschinneschlässer verzielt am 'Café des artistes' beim Dan Spogen, Raoul Roos a Mike Fandel säin Wee vun der 'Spatzer Nenn' zu Stengefort, iwwer seng éischt Immobilienagence op der Gare, säin Kleedergeschäft zu Stroossen a säin kuerzt Experiment als Designer. Hien verréit méi iwwer d'Problemer mat senge Lokaler op der Gantebeensmillen an dem Waldhaff. Mir héieren, dass de Maître Vogel bei hien ëmmer Kachkéis iesse koum a ginn gewuer firwat de jonke Bopi nach ëmmer net ënner der Hauf ass. Piano: Marc Schmidt

16/03/2026

Déi gréng Deputéiert Djuna Bernard huet keen trauregt Liewen. Am 'Café des artistes' beim Dan Spogen, Raoul Roos a Mike Fandel gëtt een gewuer wéi d'Eenzelkand bei 'Déi Jonk Gréng', a mat 26 Joer an d'Chamber koum. Mir héieren wéi si no de verluerene Walen mam Sam Tanson am Schwarzwald d'Wonne bei roudem Wäin geleckt huet. Et geet ëm en Tripp op Amsterdam mat hirer Mamm an eng Weltrees wou se zimmlech no bei engem sténkegen Elefant erwächt ass. Mat der Grande-Duchesse an der Kees vum Supermarché, vill Kiloen manner, an eng Hallefschwëster an Holland sinn weider spannend Geschichten aus hirem Liewen. Piano: Marc Schmidt

09/03/2026

Mam Deputéierten Sven Clement vun de Piraten geet et net nëmmen ëm Reesen, Suen an Affären. Am 'Café des artistes' ginn den Dan Spogen, Raoul Roos a Mike Fandel gewuer, dass hien zaubere kann wéi säin Papp, am Lycée Aline Mayrisch duerch seng Feelstonnen opgefall ass an et schonn fréi Bekanntschaft mat der russescher an der amerikanescher Ambassade gouf. Hien verréit firwat hien net bei de Jusoen bliwwen ass a wéi et zur Grënnung vun der Piratepartei koum. A verspriechen duerf ee sech och e puer Aussoen no de rezente Virwërf, déi hien an d'Partei betreffen, a wou hien sech bis elo zimmlech bedeckt gehalen huet.

02/03/2026

Den Emile Eicher ass de fréiere Buergermeeschter vu Clierf. Am 'Café des artistes' beschreift den Deputéierten an aktuelle President vum Syvicol dem Dan Spogen, Raoul Roos a Mike Fandel, wéi hien an d'Politik gerëtscht ass a verréit, dass hien seng Fra beim Après-ski kennegeléiert huet an um Ufank guer net matkritt hat, dass si aus Australien wier. Dat éischt Kand huet hien fir d'éischt an der Zeitung gesinn, ier den houfrege Papp et am Aarm hat. Et geet ëm Schlaangen, Storchen an d'Schwéiermamm. Hien zielt firwat d'Still am Cube 521 zu Maarnech sou komfortabel sinn a wat d'Fusioun vun der Nordstad mat enger Kaffismaschinn ze dinn huet. Piano: Marc Schmidt

23/02/2026

2007 krut d’Christianne Wickler de 'Woman Business Manager of the Year Award'. Déi engagéiert Geschäftsfra zielt dem Dan Spogen, Raoul Roos a Mike Fandel, dass si schonn als Kand gären Buttek gespillt huet, an hir professionell Aventure 1992 mat enger Pompelstatioun ugefaangen huet. Mir ginn gewuer firwat si net frou mam Carwash war, firwat si et just eng Schwangerschaft laang als Deputéiert an der Chamber ausgehalen huet. Mir héieren wéi gutt se mam Camille Gira zesummegeschafft huet, wéi si et bis an d'Spëtzt vun der Cargolux gepackt hat, dass si eng Shopping-Queen ass, um Beki festhält a näischt géint Männer an Uniform huet. Piano: Marc Schmidt

09/02/2026

De Michel Rodenbourg ass de fréiere President vum Stater Geschäftsverband an Epicier aus der Louvignysgaass.

Am 'Café des artistes' zielt hien dem Dan Spogen, Raoul Roos a Mike Fandel, dass hien seng bescht Frënn beim Basket fonnt huet mat deenen hien sech och eng éischt geknätzelt hat. Mir héieren, dass hien de Roger Leiner op der Uni kennegeléiert huet a net ganz onschëlleg ass, dass de Superjhemp de Kachkéis sou gär huet. Et geet ëm en alen Auto dee vill Duuscht hat an dofir 18 Stonnen vu Stroossbuerg op Lëtzebuerger gebraucht huet. Aner Themen sinn de Bommeleeër, d'Success Story vum Ginix an den Tram. An hien zielt wéi hien bei enger memorabeler Alkoholkontroll zu Bréissel vill Chance hat. Piano: Marc Schmidt

Adresse

Luxembourg

Site Web

https://www.rtl.lu/radio/afterwork

Notifications

Soyez le premier à savoir et laissez-nous vous envoyer un courriel lorsque RTL - Afterwork publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.