Quel est le site Web ?

RTL - Afterwork

Radio Emissioun

13/07/2026

De Fluchkapitän Goy Feltes ass e leidenschaftleche Pilot, deen virun 10 Joer no 25.000 Fluchstonnen bei eiser nationaler Fluggesellschaft a Pensioun goung.

Am 'Café des artistes' zielt hien dem Dan Spogen, Raoul Roos a Mike Fandel, dass hien um Findel grouss ginn ass. Hien verréit wat hien un de Waarmloftballonen schätzt, firwat hien gär op d'Juegd geet, bei wéi engen Oldtimer säin Häerz méi séier schléit a firwat hien 2025 zu Dikrech Weltmeeschter am 'Konter a Matt' gouf. Et geet ëm Pünktlechkeet, ze vill Béier, den Hexemeeschter, déi richteg Sonnebrëller, en ausgefalene Motto, eng droleg Aarbechtsmoral an Ägypten an déi grouss Léift, eng Stewardess. Piano: Marc Schmidt

06/07/2026

d'Nora Back ass zanter Niklosdag 2019 d'Präsidentin vum OGBL. Manner bekannt ass hir Karriär als 'Reine des bleus' zu Bréissel oder dass si nuets e Schwan an engem Fräizäitpark geklaut huet.

Beim Dan Spogen, Raoul Roos a Mike Fandel geet et am 'Café des artistes' ëm hire Sënn fir eppes géint all Zort vun Ongerechtegkeeten ze maachen, Tripartite ass en Thema a wéi déi eenzel Acteuren sech hannert de Kulissen verstinn. 3 wäiss Kanéngercher, en Horrorspidol zu Bratislava, déi horrend Pai awer och de Passage am Centre de formation zu Colmar Bierg fir Punkten ze sammelen, de Jojo-Effekt oder eng net geplangte Rees am Policeauto no enger laanger Nuecht kommen op d'Tapéit. Piano: Marc Schmidt

29/06/2026

De Carlo Schneider ass Karikaturist a Cartoonzeechner, deen mat sengem Heidi am Emmental an der Schwäiz lieft. Am 'Café des artistes' erënnert hien beim Dan Spogen, Raoul Roos a Mike Fandel un déi Zäit, wou hien op der Telé all Sonndeg live an der Sendung den Invité vun der Woch gezeechent huet, wat net ëmmer bei deene Betraffenen sou gutt ukoum. Hien verréit, dass vill Leit zu Lëtzebuerg gären am Präis handelen wa se eng Zeechnung vun him ofkafe wëllen. Mir ginn gewuer, dass hien Lénkshänner ass, wat an der Schoul vir vill Problemer gesuergt huet an verzielt dass et fir hien bei den Zeechnungen keng Limitten gëtt, wat him och schonn Problemer an Droungen abruecht huet. Et geet ëm Romantik, speziell Réng, Spullkëschten bei Toilette, Hiewanen an de KARIKATOUR 2026. Piano: Marc Schmidt

15/06/2026

Viru 25 Joer huet Jérôme Beck Telés-Geschicht geschriwwen. Am 'Café des artistes' verréit de Journalist dem Dan Spogen, Raoul Roos a Mike Fandel, firwat aus den zwee Uleef beim Radio näischt ginn ass a wéi de Casting bei Planet RTL verlaf ass. Mir héieren firwat hien haut op déi obligat Kippchen verzicht, firwat hien bei Coco a Co als Crocodile Dundee duerch d'Bild lafe sollt a firwat hien zu Paräis vun der Police ugehale gouf wéi hien mam Ricky Martin sengem Flocki Richtung Hotel gefuer ass.
D'Dorothée, Boney M, den Dr Sommer an den DJ Firtz sinn en Thema, awer och d'Zäit zu Paräis, d'Schietsäiten vun der Popularitéit an d'Virbildroll an der Communautéit ginn ugeschwat mat der Kult-Figur vun der Kanner- a Jugendsendung.

08/06/2026

De Mierscher Buergermeeschter behaapt, dass hien e 'Péggi' ass, an seet dass dat munches erkläert. Am 'Café des artistes' am Gronn verréit hien dem Dan Spogen, Raoul Roos a Mike Fandel, dass hien als Kand op enger Kou geridden ass. Hien war siwefache Landesmeeschter am Judo an ass een vun de Kadette vun der Sprëtz. Och Fussball huet hien gespillt, awer ouni Chancen op en Transfert. Seng Fra huet hien kennegeléiert duerch e Mëssgeschéck an ass frou an der Belsch d'Arméi als Fallschiermjeeër matgemaach ze hunn, wou en och e puer Kilo verluer huet. Seng Hënn heeschen alleguerten Sheila wéinst senger Liblingssängerin. Hien fillt sech wuel um Héichsëtz, fiert leidenschaftlech gär mam Trakter a freet sech firwat Miersch nach ëmmer net als Stad unerkannt gëtt. Piano: Marc Schmidt

01/06/2026

De Charel Margue war laang Joren de Chef-Meenungsfuerscher vun der ILRES, bis hien de Bord gewiesselt huet, a fir de Gréng an d'Chamber koum. Vu sengem Papp a sengem Grousspapp hat hien d'Politik an d'Wéi geluecht krut, just waren déi stack-konservativ. Am 'Café des artistes' zielt hien dem Dan Spogen, Raoul Roos a Mike Fandel wéi e mat der Mamm bei d'Leit heem d'Elektresch opschreiwe gefuer ass, an Krankekommioun mat ausgefouert huet. Hien beschreift wéi hien zu Paräis op der Uni mam Laurent Mosar, Fränz Biltgen, Michel Wolter a Pierre Gramegna eens ginn ass, oder och net. Et geet ëm eng Ruge an der Chamber, dem JCJ seng Relatioun zu Sondagen an e Fussballmatch wou hien am Benin dem Arbitter seng Duechter als Fra ugebuede krut well hien 'Man of the Match' war. Piano: Marc Schmidt

18/05/2026

De Laurent Mosar ass Deputéierten a fréiere Chamberpresident. Am 'Café des artistes' am Gronn beim Dan Spogen, Raoul Roos a Mike Fandel gëtt een gewuer, dass hien duerch säin Papp bei d'Politik koum. De bekennenden Influencer zielt wéi hien zu där Leidenschaft koum. Hien verréit, dass Piano näischt fir hien war, awer dofir léiwer dem Fussball nogelaf ass. Den Ex-President vun der Aris beschreift wéi hien de Klitschko an der Sauna begéint huet an gëtt zou dass hien dem Schlager verfall ass. Et geet ëm e Paltong deen ze kleng war, Tuten déi hien dem Astrid Lulling an de Fliger geschleeft huet, an en Hond deen ze liddereg ass fir spadséieren ze goen a léiwer de Markus Lanz kuckt. Piano: Marc Schmidt

11/05/2026

De Jeff Oberweis, huet sech e Numm als Patissier-Confiseur gemaach. Am 'Café des artistes' zielt hien dem Dan Spogen, Raoul Roos a Mike Fandel, dass hien als Kand aus Plazgrënn net mat sengem Brudder an engem Haus gewunnt huet. Hien verzielt wéi säin Papp a seng Mamm de Betrib opgebaut hunn, an op villes hu missten verzichten. Hien verréit wéi him d'Knippercher um roude Pëtz aus der Camionnette gefall sinn, wéi seng Mamm de Maître Vogel mam Fausti verwiesselt hat, a wéi de fréieren Direkter vun der Arbed Petit-fouren un den Hond verfiddert huet.
Den unerkannten Glacemeeschter schwätzt vun der éischter Commande fir den Haff, iwwer de President Macron an de Bamkuch an e Kuch bei enger 100 Joerfeier, deen net do war.
Piano: Marc Schmidt

04/05/2026

Den Ali Kaes, de fréieren Député-Maire aus der Gemeng Tandel ass net just duerch de Fussball bekannt mee och duerch seng gewerkschaftlech Aktivitéiten.
Am 'Café des artistes' am Gronn zielt de 'Kéis' dem Dan Spogen, Raoul Roos a Mike Fandel dass hien mam Marc Spautz um Päerd ausgeridden ass, an och alt emol fir d'Kanner um Fuesbal de Clown gespillt huet.

De geléierten Dréier erënnert sech, wéi en am Schwäistall entschlof war, an enger Nonn gehollef huet e Källefchen op d'Welt ze bréngen. Mir héieren, wéi e sech géint de Minister aus senger eegener Partei fir en Eenheetswaasserpräis agesat huet a mat der Police de Spunnes gemaach hat, an hien gëtt zou senge Chamberskolleegen reegelméisseg Eeër an Zoossissen mat op de Krautmaart bruecht ze hunn. Piano: Marc Schmidt

27/04/2026

De Carlo Cravat, de Chef vum legendären Hotel an der Stad.

Am 'Café des artistes' am Gronn geet et beim Dan Spogen, Raoul Roos a Mike Fandel ëm seng aussergewéinlech Kandheet am Hotel, säin Horror virun der Schoul, seng Leidenschaft fir d'schéissen a seng Léier an Asien wou och emol Gehier vu jonken Afen um Menü stoung. Et gëtt een gewuer dass hien wierklech net kache kann, mat 25 schonn e Rolls-Royce virun der Dier hat a firwat, dass den Hotel, en face vun der Gëlle Fra, säin Styl behale soll an hien un där 'aler Këscht' hänkt.

Piano: Marc Schmidt

Adresse

Luxembourg

Site Web

https://www.rtl.lu/radio/afterwork

Notifications

Soyez le premier à savoir et laissez-nous vous envoyer un courriel lorsque RTL - Afterwork publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.