17/04/2026
السلام عليكم ورحمه الله وبركاته
هادشي لي غانعاود طرا الأخ ديالي ولكن كنت حاضرة فيه المهم نبدا فاش كانت عندي 13 عام الأخ ديالي الصغير انا كبر منو ب 3 سنين ديك الساعة كانت اول مرة غادي يخدم فيها بابا فمدينة بعيدة علينا وكان تيبات تما يعني مكيجيش لدار المهم فأول ليلة من بعد ما سافر كنا خايفين بالاخص انو الدار فاش كنا ساكنين ديال جدي الله يرحمو كانت قديمة من داك النوع لي المراح ديالو مفيهش السقف وكنا ساكنين فيها غير انا وماما وبابا وخويا
فاش وصل ليل وجينا نعسو دخلاتنا ماما لبيت وسدات الباب ديال البيت بساروت وخباتو تحت المخدة وجرينا واحد الكوافوز ثقيل ثقلنا بيه الباب صافي فرشات لينا ونعسنا معرفتش شحال داز ديال الوقت فقنا على الدقان فالباب ديال البيت ماشي ديال برا تما قلبي حسيت بيه غايخرج من بلاصتو لحت عيني على ماما لقيتها فايقة ومخلوعة جيت نطل على خويا ملقيتوش بلاصتو ديك الساعة نضنا نقلبو عليه ماما يسحاب ليها تخلع وتخبا فالماريو ولكن ملقيناهش هادشي والدقان مكمل محبسش شوية سمعنا صوتو كيغوت من برا باش نحلو ليه تما جاتني ايرور كيفاش خرج والباب مسورت ومثقل بالكوافوز مستحيل يحيدو والا گاع حيدو شكون هاذا لي رجعو تاني وعاود سد الباب بالساروت من الداخل مشات ماما هزات الساروت من تحت المخدة لقاتو كيف خلاتو حيدنا داك الكوافوز وحلينا لباب كان مخلوع وتيبكي نعساتو ماما بزز ومبغاتش تسولو حيت كان مخلوع لغد ليه قالينا بلي كان ناعس حتى ضرباتو الفيقة وبنت ليه انا واقفة على راسو كنشوف فيه وكيف قال كانو عينيا حمرين عيط ليا جوج مرات مجاوبتوش غير كنشوف لاح عينيه على بلاصتي لقاني ناعسة يعني ماشي انا هاديك ديك الساعة خاف وجر المانطة غطا بيها راسو شوية حس بالبرد ولقا راسو برا البيت داكشي طرا فثواني قليلة مع جر المانطة لقا راسو برا ناعس قدام الباب ديال البيت تما بدا كيدق وفالاول مكانش قادر يهضر ولا يغوت تا داز شوية عاد قدر يغوت باقي لدابا منساش ديك الواقعة وديما كيعاودها وحتى انا باقا عاقلة وصراحة ملقيناش تفسير لشنو طرا
