13/07/2026
🚨 إذا كتشري من AliExpress، خصك تقرا هاد المنشور حتى للآخر!
السلام عليكم.
بغيت نشارك معاكم تجربة شخصية عشتها مع AliExpress، وكنتمنا تفيد أي واحد كيشري من الإنترنت.
أنا كنشري من AliExpress منذ 2018، وعندي أكثر من 200 طلب، وعمرني ما واجهت مشكل بحال هادا.
آخر مرة طلبت 3 منتجات، ولكن ملي وصلني الطرد، لقيت فيه غير جوج منتجات، أما الثالث (شاحن Essager 65W بقيمة حوالي 10€) ما كانش داخل الشحنة.
الحمد لله، قبل ما نفتح الطرد، كنت صورت فيديو Unboxing كامل من لحظة استلام الشحنة حتى ساليت من تفقد جميع المحتويات، وكان واضح بالفيديو أن الشاحن ما كاينش.
ومن هنا بدات رحلة طويلة...
فتحت نزاع مع AliExpress، وصيفطت ليهم:
✅ فيديو الـ Unboxing كامل.
✅ صور الطرد والملصق.
✅ صور المحتويات.
✅ فيديو إضافي كيوري المنتوجات اللي توصلت بها مع الوزن.
ورغم هاد الشي كامل، طلبو مني وثيقة من شركة الشحن تثبت وزن الطرد.
قلت ماشي مشكل...
ومن نهار 17 يونيو وأنا كنحاول نجيبها.
تواصلت مع حوالي 6 أرقام مختلفة ديال شركة الشحن، داخل المغرب وحتى خارج المغرب.
كل واحد كيحولني لواحد آخر، وحتى واحد ما قدر يعطيني الوثيقة اللي طلبات AliExpress.
وفي الأخير، تسد الملف بدعوى انتهاء مدة الحماية.
بصراحة، قلت خلاص... سالات القصة.
ولكن قررت نكتب تجربتي كاملة فـ Trustpilot بطريقة محترمة، وبالأدلة، بلا سبان ولا اتهامات.
بعدها تواصل معايا فريق AliExpress من جديد، وعاودو فتح الملف، وطلبو مني أدلة إضافية.
صيفطت ليهم كلشي طلبوه، وحتى لقطات الشاشة ديال محاولاتي مع شركة الشحن.
واليوم...
🎉 الحمد لله رجعولي المبلغ كامل.
شنو تعلمت من هاد التجربة؟ (هاد النصائح مهمة بزاف)
📌 1. ما تفتحش الطرد مباشرة.
أول حاجة ديرها هي:
✅ حط الطرد فوق ميزان إلكتروني وصور وزن الشحنة وهي مازالت مسدودة.
📌 2. ورّي اللابل ديال الشحن بوضوح.
خلي رقم التتبع والبيانات باينين فالفيديو.
📌 3. ورّي أن الطرد مازال مسدود.
صور الكيس أو الكارتونة من جميع الجهات باش يبان أنها مازال ما تحلاتش.
📌 4. متوقفش التصوير.
كمل فيديو واحد متواصل من بداية التصوير حتى تسالي من فتح الطرد.
📌 5. أثناء الـUnboxing
خرج جميع المنتوجات وحدة بوحدة.
إذا كان الطلب فيه أكثر من منتوج، وريهم كاملين.
وفالأخير ورّي أن الكيس ولا الكارتونة ولات خاوية.
📌 6. احتافظ بكلشي.
الطرد.
اللابل.
الفيديو.
الصور.
حتى تتأكد أن الطلب كامل وما كاين حتى مشكل.
رأيي الشخصي بعد هاد التجربة
بصراحة، من بعد هاد التجربة غادي نحاول ديما نلقى المنتوج أولًا فـ مرجان أو جوميا.
إلى ما لقيتوش، ممكن نشوف Temu، ولكن خاص غير تنتبه للأسعار، حيث بعض المرات كيكون الثمن ديالو أغلى من المغرب أو حتى من AliExpress.
أما AliExpress، إلا اضطرّيت نشري منو مرة أخرى، فأول حاجة غادي نديرها هي تصوير فيديو كامل بالطريقة اللي شرحت فوق، لأن هاد التجربة علماتني أن الدليل القوي هو اللي كيحميك إذا وقع أي مشكل.
وأخيرًا...
صدقوني...
دقيقة ولا جوج ديال التصوير قبل فتح الطرد، تقدر توفر عليكم أسابيع ديال النزاعات والمراسلات.
هاد التجربة علماتني أن الاحتفاظ بالأدلة مهم بزاف، وحتى إلا كانت عندك الحق، خاصك تكون قادر تثبتو بطريقة واضحة.
أتمنى تكون تجربتي فادتكم.
وإلى عندكم أي سؤال على طريقة فتح النزاع أو نوع الأدلة اللي ساعدتني نسترجع المبلغ، مرحبا، غادي نجاوبكم حسب التجربة ديالي.
💡 نصيحة أخيرة لكل واحد كيشري من الإنترنت
اعتبر تصوير وزن الشحنة وهي مازال مسدودة + اللابل ديال الشحن + فيديو Unboxing كامل، جزء من عملية الشراء، ماشي حاجة اختيارية.
أنا كنت كنصور غير الـUnboxing، ولكن من بعد هاد التجربة، أي شحنة غادي توصلني، أول حاجة غادي ندير هي:
⚖️ تصوير وزن الشحنة وهي مسدودة.
🏷️ تصوير اللابل ديال الشحن بوضوح.
📦 تصوير الطرد من جميع الجهات.
🎥 تصوير الـUnboxing كامل بلا توقيف.
هاد الأربع خطوات ما كيضيعوش منك حتى دقيقتين، ولكن يقدرو ينقذوك من أسابيع ديال المشاكل إذا وقع أي نقص أو خطأ فالشحنة.
هذا هو أكبر درس خرجت به من هاد التجربة، وحبيت نشاركوه معاكم باش تستافدو منو. 🙏
منقول للفائدة
