03/10/2025
عارف راسي غادي نسبح ضد التيار ولكن ايلا زعزعت الشك غير عند واحد من اصل 100 عندي فهاد لكونط هذا رباح:
المطالب الشعبية و الإجتماعية مشروعة و عليها اتفاق ولكن جوهر قيادة جيل زاد خطير و خاص بنادم يرد منو البال
اغلب الناس لي كاتخرج لشارع ماعارفين لا ديسكورد لا النقاشات لي كايدوزو تما هادشي إيجابي و سلبي فنفس الوقت
الإيجابي ان تأثير قيادة جيل زاد محدود و الحراك دخل فمرحلة الإرتجال البارح مثلا كانت مظاهرة فزيرو كاط اكبر من المظاهرة لي دعات ليها قيادة جيل زاد فساحة مارشال هذا ماهو إيجابي بخصوص ماهو سلبي المؤسسات فالأول و الأخير نجح هادشي غايتفاوضو مع قادة هاد الحراك ماشي نتا ولا أنا تخيل نتا تكون وقود باش الملاحدة يوصلو لمرحلة يفرضو افكارهم و ايديولوجياتهم على الدولة من موقف قوة
الأكيد ان بزاف غايقول ليا لا حنا هامنا الصحة و التعليم و و إلى آخره. نعم الصحة و التعليم هوما لغلاف و هوما باش شحموك نتا و أنا و باقي الشعب للتعاطف معاهم لكن الواقع شيء آخر و خطير غير باش تعرف ان نوستيك واحد من القادة ديال هاد الحراك خاصك تخلع وتراجع موقفك من شنو طاري
شخصيا ماشي ضد المطالب ماشي ضد الشعب يهضر على حقو و لكن ضد بنادم يعطي لهادوك ولاد القاف الشرعية يهضرو فبلاصتو
مؤشرات كاتجيب الريبة و الشك و كتأكيد ان نواة هاد الحراك فاسدة و ركز على النواة ماشي شكون خارج للزنقة من الشعب المقهور :
-نوستيك قبل هاد الحراك بأسابيع ظهر فجأة بعد غياب طويل و كان غايدوز مع تاويل طالكس فالبودكاست ديالو من بعد الحلقة تلغات و السبب غير معروف
-نوستيك قبل يتفرگع هادشي كان أدمين فديسكورد ديال جيل زاد و من بعد رجع مومبر عادي باش مايشكش بنادم فيه و هاد المومبر العادي كايتعطاه الوقت يعبر بالدقائق فالوقت لي الأعضاء العاديين ايلا عندهم الزهر ماكيفوتوش 30 ثانية
-ادمين آخر نكر المعرفة ديالو بنوستيك بعد ما قال واحد الزلة لسان بلي فايت هضر معاه كيفاش ماكتعرفوش وهو كان أدمين بالدليل
-الضيوف لي كايجيبو ملاحدة و عندهم فكر مضاد للإسلام
-المواضيع لي كاتناقش داخل ديسكورد كايرشو فيها السم لبنادم و كايدخلو ليه ان من بين أسباب مشاكل الدولة هو الدين
-فالبلاغات الأولى دارو خطأ فادح و كتبو "بسم الوطن " فبلاصة بإسم الله دابا را داركوا الخطأ حيت خافو بنادم يعيق بيهم بكري
-دراري لي خرجو فلول أغلبية شياطة البولفار و لبس لهارد روك و الكحل و ليزبيانات غير رجعو الفيديوات لولين باش تعرفوا الدائرة الصغيرة لي بدا منها هادشي قبل يتبناه الشعب طبعا بحسن نية
كخلاصة لهاد الهضرة كاملة لي بغا يخرج لشارع يهضر على حقو يضبر راسو لمهم مايفوضش اي واحد يتكلم بلسانو من بعد و مايعطيهش الشرعية
ماتكونش وقود يتحرق من أجل فكر غايضر عقيدتك و اسلامك من بعد راهم كايتمسكنو باش يتمكنو و يخرجوا نيبابهم
حذاري ⚠️
منقول
