10/09/2025
دير فبالك ديما الدار قبل الطوموبيل مايمكنش تكون عندك طموبيلة ديالك بلا ماتكون عندك برطمة ديالك ملكك حرة فيها 54 ميترو
سكن اقتصادي ولكن بالجميع و التوفير ديالك و القفوزية ديالك رجعتيها جنة فوق الارض درتي ليها فينيسيو ديال الحماق و اثاث ديال الهبال
اللي دخل عندك يحل فمو ، برطمة بيان فيني غادي تفقص بيها العديان و اللي جا عندك باش يشرب اتاي و شوية فقاص يتحلقم و يبقا يحنزز و يدور فعينيه فالسقف وفالتجهيزات المنزلية تبارك الله
تكون داير للبرطمة ديالك شي صباغة مطردڭة ديال العنبرة ولا فيروز كاتبري مع الضو بحال الزقلي راه السطيلة الصغيرة ديالها دايرة 370 درهم عند الدروڭري
و الصالون بسدادر الشوك و البونج ديال البصمة المريح و طلامط الميبرة التركية بروميار كاليتي بالخوامي و الوسايد ديالها و المزاود
بلا ماتنسا شي طابلو فني كبير معلق فالحيط ديال التبوريدة ولا شلالات اوزود و شي زربية وزانية ب 1500 درهم
ملي تهز عينيك للسقف تلقا ترية كريستال بلار ديال سبانيا ب 900 درهم و سقف منقوش بالڭبص صايبتيه على شهوتك تقام عليك غي سلعة 800 درهم بلا يد لمعلم
و باش تصرعها نعام اسيدي شي تلفازة بلازما 50 بوس سينيما كاتخلع معلقة فالحيط كونيكطي بشي روتور ديال اينوي مليح فيبر اوبتيك ديال 20 ميڭا فين تبقا تتفرج فالافلام و السهرات الرمضانية و ماتشات المنتخب HD
اللي دخل عندك من الحباب و شاف هادشي غادي يضهشر و يضرو خاطرو و يمرض بالحسد و الغيرة اللي غادي تشعل فيه
فبيت النعاس داير ناموسيا ميديكال فين تبقا تنعس نتا و مرتك حلالك مولات السنان مستفين و اللي جالسة فالدار ماخداماش و تكون طويلة ماشي حبوسة بورتكلي تريكة 1.60 ، زوجة بكر مامطلقاش ماسبقش ليها سنات فقاعيط الزواج و مقابلاك غي نتا امولاي السلطان
و معلق شي لامبة فيها اضائة خفيفة للراحة بالليل باش ايلا قاتليك طفي الضو بعدا احبيبي قوليها واخة احبيبة طفي الضو وشعل هاد اللامبة باش تعرف راسك فين كاتحط رجليك امعلم
بلا ما تنسا الكوزينة تكون مجهزة بتلاجة سييرا بلا تلج ساوية 4500 درهم و اكثر و بفران كهربائي مول 750 درهم باش تبقا مرتك تحمر ليك فيه فخيضات الدجاج ولا تصايب ليك فيه الڭراتان البلدي و الشهيوات
بالنسبة لماكينة الصابون اطوماتيك ايلا كنتي يالاه مزوج حاول ماتشريهاش هي اللولة خلي مرتك تصبن شوية بيديها فالبانيو و الفراكة
حتا دوز شي عاماين ديال الزواج و فرحها بشي ماكينة صابون اوطوماتيك من مرجان باش ماتضسرهاش من اللول كولشي بالتدرج و كولشي مع الوقت سير الله يسر ليك قول آمين
ايلا كنتي مرتاح فدارك كون اكيد غادي تكون مرتاح فحياتك عمرك ماتحتاج ادوية نوم و لا يجيك اكتئاب و تحس بالحزن
و ماتنساش تتهلا فمرتك مرة مرة ب 200 ولا 300 درهم بدون سبب دير ليها مفاجئة كمدها ليها وبوسها و قول ليها الله يرحم ليك الوالدين كيفما مهنياني فحياتي راني راضي عليك دنيا و آخرة
هادشي اللي عايش فيه راه نعمة 70% ديال الناس محرومين منها شنو بغيتي اكثر طموبيلة ديالك داسيا موديل 2011 مڭضرة واقفة فالباركينڭ ديال الاقامة تبارك الله
برطمة ديالك 54 ميترو ملكك حرة مفينيها على شهوتك و رجعتيها قصر من قصور الجنة
مرأة ديال الزمان مجموع فيها الطول و البيوضية و الحنان و القراية على قد الحال و سميع الهضرة و شعر طويل و ديما لابسة قفطان منزلي خفيف بلا كيلوط
فالعشية قول لمرتك تصاوب ليك قهوة معشبة و تحط ليك كيكة ديالك بالشوفان و الڭرڭاع و طل من البالكون على العروسة الطوميبيلة و شوف فالسما و عرف راه رحمة ربي نازلة عليك و قول : حمدتك يا ربي و شكرتك ...
يالله براكة عليك سير اوليدي راك مرضي و الله ينقي طريقك من الشوك قول آمين .. قطع انا موظفة ضبراتني السبرديلة يالاه حيدت تقاشري بيضين قصار آه نعاون ولكن مانصرفش نتا هو الراجل صرف عندك القوامة هادشي كاين في الاسلام
منقول
