16/08/2025
💘الجزء الرابع والعشرون💘
ليلى غي طلعات لدار حلات لباب دخلات نيشان للبيت تلاحت فوق النموسية ونعسات كتحس براسها كيضرها دغيى داتها عنيها
عماد وصل للاوطيل دخل ونيشان طلع للمكتب لقاهم مجمعين جالسين
عماد جلس :ديما كنجي انا هو تالي
أمين:مشيتي كطير لقيتي طليفونك حيت عيطتي منو قبيلة
عماد بتاسم وهو كيسترجع مع راسو الاحدات:اه
لارا:واش ليقتي لي شفرو ليك
شاف فيها:مازال ماخلاق هذا لي يشفرني راه غير كنت ناسيه فلحمام
امين:سبحان الله ديما دماغك طاير
عماد ناض كب ليه كاس ورجع لبلاصتو:سلات الحفلة باربي مبروك شتك غي نتي لي فرحانة وباينة على وجهك لخطوبة
لارا شافت فناصر لي شاد سيجار فيديه وكيكمي بهدوء وهو ساكت:وي داكشي لي كنقول مع راسي ولكن ماشي مشكل دازت الخطوبة على خير وكلشي عرفني وليت خاطبة ناصر الزعيم
قالتها وجلسات على جناب دلفوطوي لي جالس فيه ناصر وحطات يديها على كتافو وهي مبتاسمة
عماد:ايوا الله يكمل على خير وعقبا ليا بشي فولة ههههه
كلشي كيشوف فيه كان غي هو لي كيضحك:ضحكو مالكم
هز كتافو وهو كيشرب من كاسو
احمد:لعامليات جاين خاص يتأجلو
ناصر شاف فيه:وعلاش
احمد وقف وهو خاشي يديه فجيابو:لحملة دابة نايضة خليو تا تبرد الاوضاع ونكملو داك سعات
ناصر:هضرو على راسكم انا شغالي قاد بيه
امين وقف:ناصر راه عندو الحق مابغيتش يوقع لينا بحال كي وقع ل كريم وولدو عمر فوقت الحملة هوما عاد جاهم ينفدو العملية تا جابوها فراسهم
ناصر:انا ماشي هو كريم ولا ولدو
احمد:حنا دابة كنتناقشو ماشي كندابزو
امين تنهد:ناصر خلي تسالا الحملة المخابارت غا كيدورو ومامخلين تاقنت خاص نجمعو راسنا ونديوها فخدمتنا العادية علامن تستاقر الاوضاع من دابة شهراين يكون كلشي هو هذاك
ناصر هبط على لكاس فدقة وشاف فيه:شهراين قلتي
امين :اه
ناصر:نصبرو شهراين ماشي مشكل
احمد رتاح وجلس :جاتني اخبار من مصادري الخاصة ان عمران منتصر قدم الاستقالة ديالو هدي اعوام
امين:وحاولو معاه يرجع ومابغاش من بعد داكشي لي وقع هدي اعوام قرر يعيش حياتو عادي مع عائلتو
عماد:ماساهلش داك عمران ولكن لقضية ديال كريم وعمر كانت شخصية
احمد:اه المهيم داكشي حنا ماكيهمناش
عماد:هههه كنتي اتمشي فيها تانت داك نهار كريم كان غيزطمك معاه كوراك تعرفتي
احمد شاف فناصر:الحمد الله دايرين بيا ولادي ماعندي مناش نخاف عندك لحق كوما دخلش ناصر وحدرني بأن كريم كيراقبوه الشرطة كون تكشفت دابة نساحبت فالوقت المناسب
ناصر كان غير كيتصنت وساكت
لارا:بابي بقات فيا غير منار كانت صاحبتي
أحمد:فهاد الدنيا ابنتي ماكاينش الصحاب عندك حنا بربعة هوما صحابك سمعتيني
هزات راسها باه
لارا:سمحولي قنطت هنا نهبط لتحت نشم شوية دلهوة
أحمد:ماتعطليش حيت انمشيو
شافت فناصر:ناصر نمشي ولا لا
شاف فيها:لاش كتسوليني
لارا :حيت انولي مراتك خاصك تحكم فيا ولي قلتيها انديرها
ناصر كيشوف فيها :شغلك هذاك سيري ولا جلسي وحياتك ماغندخلكش فيها وتانتي حياتي ماغدخليش فيها
كلشي كان كيشوف فيهم عارفين ان الزعيم ماكيبغيش لارا غير فوق طاقتو داير هاد الخطوبة وعارفين شحال لارا كتبغيه وهدشي ماشي فصاليحها حيت غتعدب معاه بزااف هو طبعو صعيب
بلعات ريقها وشافت فباها وهضرات بحاليلا ما قمعهاش الزعيم او لا غير كتحاول ماتبينش عكس داكشي لي كتحس بيه فلداخل ديالها:بابي هاني مشيت
شافت فناصر لي كيسوط دخان ببرودة وماشافش حتى فيها
خرجات وهبطات لتحت
أحمد تنهد ماعندو مايدير من لول وضح ليه الزعيم هدشي وفهمو ان بنتو ماعمرو يبغيها ووللاسف ماعندو مايدير هو لي دار هدشي كلو وبنتو لي غلطات وختارت الشخص لغلط وبغاتو
كملو هضرتهم فجميع المواضيع اغلبهم كيتعلقو بالخدمة
نهبطو لتحت
لارا جلسات فلكافي لي لتحت وهي كتغلي وكتهضر غي بوحدها معصبة:عارفاه ماكيبغينيش عارفة غير بزز باش دار هاد لخطوبة عارفاه ماكيحسش بيا ولكن بسيييف عليه يبغيني حيت انا لارا بنت احمد مازال ماخلاق هدا لي يرفضني غنتزوجو وغيبغيني اه غيبغيني بالسيف عليه حيت انا زوينة اه زوينة بزاف
كانو الناس جالسين وكيشوفو فيها وفحالتها كي دايرة
طاهرة دخلات للكافي عيات وبغات شي حاجة تشربها تبرد عليها دازت من حداها وهي تشوفها كدوي بوحدها
مشات طلبات عصير ودارت كتشوف فيها مستغربة من حالتها
بلسان طاهرة:بالعكس خاص تكون فرحانة ماشي راه دات ناصر الزعيم الف وحدة تمناه اااح بنادم ما كيعرفش قيمة لي عندو
لارا عيطات لسرباي وكتهضر معاه بطريقة مازويناش:جيب قرعة دلويسكي وماتعطلش
مسكين مشى طاير باش يجيبو
طاهرة:مالها
السرباي:ماعرفتش بانت ليا معصبة
طاهرة شافت فيها:شي حاجة
دا ليها لقرعة كب ليها كاس ورجع وقف حدا طاهرة وهوما حاضينها
لارا كتشرب كاس مور كاس:ناصر الزعيم نت ديالي فهمتي بسيف عليك تبغيني
💘الجزء الخامس والعشرون💘
عنيها حمارو ودمعو هي من النوع لي مفشة بزاف عاشت فاجواء كلها رفاهية وفخامة ديما لي بغاتها كتحضر واخة تكون بالدهب ولالماس كتحضر باها فششها ووحل فيها تا ولات انانية لدرجة كبيرة ولات كتشوف راسها حسن من كلشي وكلشي ديالها عاشت وسط ربعة درجال من بعد موت مها وهي كتولدها تربات معاهم تاكبرات وكلما كتكبر كتزيد تعلق بناصر الزعيم تا عشقاتو وولات باغاه ليها ف15 لعام بدات كتقرب منو وبدا يدخلها لهوس بيه ولات كتشوفو غير هو حاضياه ومتبعاه كتشعل فيها لعافية ملي كتشوفو مع شي وحدة واخة عارفاها غي ديال ليلة لغد ليه غيلوحها هي بغات تكون فلاصت هادوك لي كيدوزو معاه داك الليلة باغت تكون ليه كلشي غير مايشوفش فوحدا خرا
طاهرة فنفسها:هذا شتو ايخليني كنتسنا قالك نتشاوفو ومزال ماعيط
ماجات فين تكمل هضرتها حتى كيوصلها مساج قراتو دغيا بتاسمات كان كاتب ليها:عنداك تمشي راه نخرجك من قلب داركم نسالي شي حاجة وهنا معاك
لارا هزات راسها وهي تشوف طاهرة واقفة ماحملاتهاش ملي شافتو كيشوف فيها كرهاتها واخة غير شوفة عادية خالية من اي تعبير المهيم طول الشوفة فيها وخصوصا وانها زوينة وعاد معصبة خاصها غي معامن تنوض الصداع رفعات صوتها:هيي نتي
طاهرة شافت فيها وكتشوف مع جنابها واش معاها:معايا
لارا :اه نتي اجي
طاهرة مشات عندها:شنو بغيتي
لارا خنزرات فيها:سكتي انا لي كنهضر هنا سمعتيني
طاهرة عرفاتها سكرانة ماجاوبتهاش
لارا:زيديني قرعة اخرى
طاهرة:راه كاين السيرفور أ أنسة
لارا ضربات يديها مع الطبلة بالجهد:كييفاش كتردي عليا الهضرة
طاهرة بهدوء:لا أ أنسة انا ماخداماش هنا سرباية نعيط ليك لسيرفور يجيب ليك شنو بغيتي
لارا هرسات لكاس لي كان فيديها:لا نتي لي اتجيبي لي شنو بغيت سمعتيني يلاه تحركي دااابة
جات سعاد مديرة الفندق ووقفات حداهم:ياك لاباس الالة لارا
لارا:شي وحدين كيبانولي باغين يخسرو بلاصتهم
سعاد خنزات فطاهرة:شنو درتي ليها باش تقلقات
طاهرة:انا مادرت والو انا ماخداماش هنا سرباية باش نجيب ليها قرعة دلويسكي
لارا:براكة من تقحبين شكا يحساب ليك راسك راكي غي خدامة هنا بكلمة مني تلاحي لزنقة سمعتيني اتزيدي.كلمة وحدة انعرف شغالي
سعاد:طاهرة جيبي للانسة شنو بغات سمعتيني تحركي
طاهرة مابغاتهاش دير ليها هكاك ولكن راه خاص تصبر هي بصاح تقدر تخرجها من الخدمة مشات وجابت ليها داكشي لي بغات
لارا جلسات:فيين التلج واش مكلخة
طاهرة صبرات راسها مابغاتش تغلط:واخة
مشات وجابت ليها التلج وحطاتو حداها يلاه بغات تمشي وهي توقفها:ماقلتش سيري خليك حدا راسي تانقولها ليك
بقات واقفة ولارا كتخنزر فيها شربات جوج كيسان وناضت باش تمشي
لارا قربات تا لوجها:لمرا جاية غندمك سمعتيني
وحطات يديها على وجها وطبطبات ليها على حناكها بطريقة كتستافز بحاليلا كتهينها
طاهرة نترات ليها يديها:ماتوليش ديريها سمعتيني
لارا دفعاتها:شغا ديري اضربيني ولا شنو
بقات كدفعها وناس كيوشوفو :نتي غي حشرة قدامي ندير فيك لي بغيت هذاك شغلي انا لارا
طاهرة ماتحملاتش تصرفها شداتها من يديها وزيرات عليها:تكوني شكون مابغيتي تكوني ماكيهمنيش ماسوقيش لا كنتي قليلة ترابي وهماجية فتصرفك هدشي خاص بيك انا لي كيهمني ماتقسنيش حتارميني سمعتي
لارا شعلات فيها لعافية هزات يديها تا لسما وصقلاتها وبدات تغوت :انااا مامربيااش يالمسخة بزااف عليك هنا غنوريك لارا شكا تسوى
طاهرة شداتها فاش شافتها بغات تولي ضربها دفعاتها تا طاحت الارض
لارا شهقات وبدات كترجف وشياطين سكنوها فديك اللحضة مخرجة عنيها لي ولاو حومر وكتغوت :انا ضربيني نتي عمر شي حد تجرأ ودارها
طاهرة واقفة وكتشوف فيها ولات بحال شي حمقة كتغوت عكس كي كانت فلحفلة ماتنكرش دخلها لخوف وخافت ملي جاي حيت هدي ماشي اي وحدة هدي بنت احمد المعروف وخاطبت ناصر الزعيم يقدرو ينحيوها من هاد الدنيا
جاو السيرفورا وشي حراس هزوها من الارض وهي كتغوت باغة ضرب طاهرة :رخيييو مني كلكم مطرودين سمعتوني
طاهرة مزال واقفة وكتشوف فيها قلبها كيدردك كون حساب ليها هدشي ايوصل لهنا كون من لول جابت ليها الويسكي بلا عكس
أحمد كان هابط كيقلب على بنتو باش يمشي وهو يسمعها كتغوت مشى كيطير عندها غوت:رخيييو منها
طارت عليه عنقاتو وهي كتبكي:بابي بنتك كتضرب عمر شي حد.دارها ولا تجرأ يديرها نت وعمرك ضربتيني تجي مسخة ضربني
أحمد:شكون هادي لي تجرأت تمد.يديها عليك
لارا شافت فطاهرة:هااد المسخة ابابي
أحمد شعلات فيه لعافية قرب لطاهرة هز يديه وصقلها تاشافت النجوم كيدورو حداها
أحمد:مازال ماخلاقش هدا لي يضرب بنتي عتادري منها
طاهرة شادة حنكها ومصدومة كلشي كان كيشوف فيها تمنات الارض تنشق وتبلعها نزلو دموعها حارين على خدودها
أحمد:عتااااذري
سعاد. قربات لطاهرة:عتادري الموصيبة كديريها قد راسك وتجلسي تبكي
طاهرة غير ساكتة ماكتجاوبش مصدومة
جات صاحبتها غيتة كتجري:طااهرة مالك شنو واقع شافتها كتبكي وكلشي داير بيها
أحمد:عندك فرصة باش تبقاي فخدمتك عتادري داابة
