20/11/2025
المغرب كيدخل للتاريخ من أوسع الأبواب!
هاد العام، ووفق تقرير WIPO 2025، بلادنا دخلات لائحة أحسن 20 دولة فالعالم فالتصاميم الصناعية، وبـ 5.466 تصميم!
يعني قفزة صاروخية بنمو 20%… واللي كيبين أن المغاربة ولاّو كيبصمو أثرهم فالعالم بالإبداع والابتكار ماشي غير بالكلام.
المغرب اليوم كيعطي إشارة واضحة:
راه ما بقيناش غير بلاد الفلاحة والصناعة التركيبية… راه بلاد العقول، وبلاد التصميم، وبلاد المستقبل!
إقليمياً؟
المغرب جاي الثالث فشمال إفريقيا والشرق الأوسط، من بعد تركيا وإيران…
وكيْسبق إسرائيل اللي جات فالمركز 34، وكيْسبق السعودية اللي هي أول دولة عربية ولكن بعيدة بزاف فالمركز 40.
والضربة القاضية؟ 😮🔥
المغرب بوحدو، نعم بوحدو، دار أكثر من مجموع جميع الدول العربية كاملين فالتصاميم الصناعية!
هما كاملين مجموعين عندهم 4.696 تصميم…
والمغرب بوحدو عندو 5.466.
هادشي ماشي صدفة… هادشي عمل، مراكز بحث، مهندسين، مخترعين، وشباب كيخلق الفرق.
وباقي دول المنطقة جاو هكاك:
السعودية (1.424) – الإمارات (909) – تونس (710) – الجزائر (579)… والبقية أرقام صغيرة بزاف قدّام المغرب.
❣️ وهادي نقطة خاصها وقفة:
المغرب اللي كيتفوّق عليهم فالتصاميم الصناعية، هو حتى متقدم عليهم فالحريات والديمقراطية…
ومع ذلك كاين اللي مازال كيمشي يسمع لقنواتهم باش يعطيّوه دروس فالإصلاح والتنمية!
الحقيقة واضحة:
اللي بغا يتعلّم… يتعلّم من الناجحين.
من ألمانيا، من تركيا، من الدول اللي صاعدة فعلاً…
ماشي من دول اللي المؤشرات ديالها كاملة كتعطي نتائج أقلّ من المغرب، وباقية واقفة غير على البترول!
🇲🇦🔥 المغرب غادي لقدّام… وبسرعة!
والأجمل هو أن هاد الطريق غاديين فيه بعقول ولاد البلاد.
