17/08/2026
✍🏿 ILAY SONIANY 👩❤️👨
fiz0️⃣2️⃣
Dia natolotry ny fiainana tsikelikely teo aminay sy Harena ilay ampitso ankamantatra nahiana hanimba na hanamafy ilay fitiavana nifanolorana. Atreto aloha dia miha- mahery setra sy tsy hay tohaina izy, ka na ny ora hisarahana aza dia zary rafetin' ny baraingo maro loko; Tsy hay noferena mantsy ny fanahiana hoe 'ndrao mitopy amin' olon- kafa ny masony ka hiova hevitra izy...'ndrao tantanan' olon- tsy fantatra ny tananany ka hanadino ahy ilay anton' ny hahavelomako....'ndrao horaviravizana harena sy hatsarana any ambadika any izy ka hamela ho irery ity olona nanankim- po taminy...
Amiko mantsy, ny fijaliana faran' izay feno fatra dia ny fialan' iny malalako iny ato anatin' ny foko...
Tsy dia afa- namatra loatra ny fitiavana tao am- pon' i Harena aho fa raha ny teny naloaky ny vavany dia mitovy ihany izahay. Fatratra ery ny fanadihadiana atao amiko rehefa ilay mihaona iny, eny hatramin' ny fotoana bitika indrindra aza dia iandrasany valiny amiko ny fomba nandaniako azy. Tsy fantany fa ny vavako tsy miloaka fotsiny...fa raha ny tena ao am- poko no amparina dia angamba nafatotro teo an- tongo- pandrianako izy ka ho hitan' ny masoko foana amin' ny fifandimbiasan' ny minitra.
Dia niha- nahazo vahana teny ny hasarotam- piaro nifamaly teo aminay roa. Tsy misy afa- tsy fifamandripandriana aman- dresaka ny androatokom- pihaonana, hany ka vao tsy mifanaraka amin' ny eritreriny zavatra natako dia tsy ety lalana ny vongan- dranomaso vavolombelon' ny ao am- po tsy miloaka...vao tsy mazavazava amiko ny fihetsiny amin' olona dia maso vontirika sy feo ambonimbony no asetriko azy...Saingy tsy nampihontsona ny fifankatiavana ireny fa mainka zezika nampamokatra azy handrobona ka nampilenodenoka faniry azy.
Voninkazo tonga lafatra raha i Harena ka notsiriritin' ny lolo maro mba hobaboina saingy naleony nanaiky ilay lolo kely iray izay fantany fa efa tapaka elatra ka ho tapitra aina eo aminy...Maro ihany koa ny voninkazo naniry hitoetra tamin' ity vazy azo lazaina ho tsara tefy...saingy niantefa tamin' ilay voninkazo dia iray ny safidiny ary hoazy irery ihany...
Mahery ilay fitiavana e!! Resy lahatra aho fa sarotra ny toerana misy ireo diso fanantenana tamin' ity lafiny ity ka tonga hatramin' ny famonoan- tena. Tsy mba takatry ny saina loatra mantsy ny fatra ananan' ny fitiavana ao amin' ny olona iray ka miteraka tsy fahaiza- mandanjalanja intsony ny fihetsika hataon' ilay vatana malia....
Zoma tamin' izay. Tonga indray ilay fotoana sarobidy hihaonan' ny tia sy ny tiana. Vontoatin- dresakay tamin' ity indray mitoraka ity ny fanofinofisana ilay fotoana hanaovana sonia sy fifanekenaeo anatrehan' olona maro, dia ny fampakaram- bady izany. Na teo aza anefa izato nofinofin- jaza dia samy nahafantatra izahay fa zavatra tsy azo hiazakazahana loatra izany fa tsy mandeha araka ny fotoanany avy...saingy toa tsy andry ny fotoana hahatongavany. Teo no teraka ny fanehoam- pitiavana miendrika kilalao ka nanaovanay sonia nosokirina tamina vato iray efa voaisy soratra mivandravandra hoe " tiako ianao". Fahafinaretana ho anay ery ny nanao ity endri- panehoana fitiavana ity na dia tsapa izao aza fa fisainan- jaza raha atao indray milaza. Tsy nionona tamin' ny sonia voakaly izahay fa narahin- teny voafantina avy amin' ny andaniny sy ny ankilany fa samy tsy hivadika mandrakizay....
Nifantsika tao an- tsaiko nanomboka teo ilay sonia kelin' ilay malalako: Toa miendrika antsasa- paribolana miankavanana nampiarahana tamin' ny anarany somary nosoratana mitankosina. Na dia teo amin' ny vato aza no nanoritany azy dia reko toa nosoratana tao am- poko ilay soniany, ka voatahirin' ny fitadidiako sy tsy nety afaka tao ilay teniny malefaka nanambara hoe:"Fanamby, tiako ianao ary tsy hivadika aminao mandrakizay aho."...
Nanjary fanafody nanasitrana ilay hasarotam- piaro kely mandratra mazàna ny zava- bita tamin' iny indray mitoraka iny. Nanomboka teo mantsy dia nanjary natoky tena aho fa efa ahy samirery, ary ahy mandrakizay Harena. Zary havitrihana entiko miasa ny tamberin' ilay soniany ao an- tsaiko...nanjary solon- tenany tamin' izy toerana rehetra nalehako ny fisaintsainana ilay sonia voasokitra teo ambony vato sy voasoratra tao am- poko. Indraindray aho toa mihevi- tena ho adala kanefa raha ny soniany moa no fanafody hitsabo ny aretiko, sakafo hamelona ny aiko, ary rano haha- afa- diana ahy amin' ny hetahetako, inona no azoko hambara!!?? Toa tsinjoko sahady ny ho hasambarana hifanoloranay amin' ny fotoanan' ny tena sonia raha tsy hanova zavatra ny fivadibadiky ny fotoana.
mbola hitohy
