06/06/2025
Nahoana no toa tsy araka ny noeritreretiko ny fiainako, ry Jesosy? 🥲
Betsaka ny Kristiana mihevitra hoe rehefa manompo an’Andriamanitra dia ho sambatra sy hahomby foana ny fiainana, ary ho tanteraka avokoa ny vavaka.
Diso izany! Rehefa tsy tanteraka izany, mora kivy sy manome tsiny an’Andriamanitra isika.
Aoka hotsaroana:
* Jaona 16:33: "Atỳ amin'izao tontolo izao no ahitanareo fahoriana; nefa matokia; Izaho (Jesosy) efa naharesy izao tontolo izao."
* Habakoka 3:17-18: "Na dia tsy mamontsina aza ny aviavy... Nefa izaho dia mbola hifaly amin'i Jehovah ihany Sy hiravoravo amin'Andriamanitry ny famonjena ahy." 🔥
Ny miaraka amin'ny Tompo dia tsy midika hoe tsy hisy olana. Na dia miasa mafy ho Azy aza ianao, mety handalo fitsapana mafy.
Jereo ireo Apostoly: nenjehina, nampidirina am-ponja, noterana vato. Maro ny olona ao amin'ny Baiboly no nijaly na dia nanompo Azy aza.
Mila miaritra isika, satria ireo fitsapana ireo dia fitaizan'Andriamanitra antsika, manefy antsika ary mitsapa ny finoantsika. Mety tsy ho takatry ny saintsika ny antony, fa inona ary no hatao?
👉🏽 Matokia ny Tompo! Na mafy aza ny lalana, Izy no mitantana ny fiainanao. Eo am-pelatanany ianao ary miasa Izy, manomana ny tsara ho anao.
👉🏽 Mangataha hery
Hahazaka izany ianao rehefa omen'i Jesosy hery. Hisolo fifaliana ny alahelo, ary ho lasa matanjaka ianao.
Koa ankehitriny, sahy milaza ve ianao hoe: "Misaotra Jesosy amin'ny fitondranao ahy na mafy aza ny ady atrehako"? Ny tànanao Jesosy no momba ahy 🕊
Izay miandry Azy dia tsy ho diso fanantenana.
