AZ RADIO 109

15/08/2026

KAOMININA AMBODIRIANA : FIKAMBANANA RAY NIARA-NIENTANA TAMIN’NY FANAMBOARANA TETEZANA

Androany, Sabotsy 15 Aogositra 2026, tonga tao amin’ny Kaominina Ambodiriana, Fokontany Ambodiriana, ny Fikambanana Ray dia tarihin'ny Solombavambahoaka Narson RAFIDIMANANA, niara-nientana tamin’ny vahoaka tamin’ny fanamboarana ny tetezana. Anisan’ny nampijaly ny mponina nandritra ny taona maro ity tetezana ity, nefa ifamezivezen’ny fiara, sarety ary mpandeha an-tongotra maro.

Nanohana ny fanamboarana izany, ho setrin’ny fangatahan’ny mponina, ny Solombavambahoaka tamin’ny alalan’ny fanomezana simenitra sy vy. Ny vahoaka kosa nandray anjara tamin’ny fanangonana fasika sy vato izay akora misy any an-toerana ary nanao ny asa.

“Tsy misy miasa irery, fa ny fiaraha-mientana no antoky ny fahombiazana,” hoy ny Assistant parlementaireny Andriamirija RAKOTOARIMANANA, izay nisaotra ny vahoaka tamin’ny fandraisana andraikitra sy ny fiaraha-miasa.

Nambaran’i Rakotoarisoa Herinirina, KM Fokontany Ambodiriana, fa mitondra fifaliana ho an’ny mponina ny fahavitan’ny fotodrafitrasa, satria mampitohy Fokontany maro. Nisedra olana noho ny rano nanimba fambolena sy fefiloha ny mponina teo aloha, ka antenaina fa hihatsara ny fikorianan’ny rano sy ny fivezivezena manomboka izao.

15/08/2026

‎VAK'RANTY ANDIANY VOALOHANY:
‎
‎ Nandray anjara fampiratiana ireo vokatra samihafa ny Distrikan'Antanifotsy. Tranoheva miisa 10 no nanehoana izany. Nitarika ny ekipa tany an-toerana ny Lehiben'ny distrika RASOANIRINA Hanitriniaina.

14/08/2026

Miarahaba anareo zandry,zanaka,tanora afa-panadinana rehetra,mankahery anareo izay tsy nahomby

13/08/2026

12/08/2026

FAHADIOVANA SY FILAMINANA ETO ANTANIFOTSY : MITOHY NY ANTSO HO AN’NY TANÀNA Madio sy Milamina

Niteraka resabe teo amin’ireo mpampiasa tambajotran-tserasera ny resaka fahadiovana sy ny fitantanana ny fako eto Antanifotsy, ka nanehoan’izy ireo ny faniriana hahita tanàna madio, voalamina ary milamina kokoa.

👉 Niantso ny tompon’andraikitra ao amin’ny Kaominina ireo mpikirakira tambajotran-tserasera mba hijery akaiky ny olana mahakasika ny fahadiovan’ny tanàna, indrindra ny fiparitahan’ny fako amin’ireo toerana samihafa.

👉 Anisan’ny soso-kevitra naroso ny hamerenana ireo daba-pako izay efa nisy teo aloha, ary ny fametrahana lamina mazava sy maharitra amin’ny fanangonana sy fitantanana ny fako, mba hahafahana mandrindra tsara ny fahadiovan’ny tanàna.

👉 Nohamafisina ihany koa ny maha-zava-dehibe ny fanentanana sy fanaraha-maso eny ifotony, anisan’izany ny fampiasana ireo Polisy Kaominaly amin’ny fanaraha-maso sy fanentanana ny mponina mba tsy hanary fako eny rehetra eny ary samy handray andraikitra amin’ny fitandroana ny fahadiovan’ny manodidina.

FAHADIOVANA: ANDRAIKITRA IARAHANA

Vao tsy ela ihany koa no namoahan’ny Ben’ny Tanàna ny fanambarana fa anisan’ireo Kaominina tsara tantana i Antanifotsy. Na izany aza, mbola mampametra-panontaniana sy miteraka adihevitra eo amin’ny mponina ny olan’ny fako sy ny fahadiovan’ny tanàna.

Tsy vitan’ny tompon’andraikitra irery anefa ny fanatsarana izany. Mila fiaraha-mientan’ny Kaominina sy ny mponina ny fananana tanàna madio sy voalamina: fanangonana ara-potoana, toerana fanariana fako voafaritra, fanaraha-maso ary indrindra ny fandraisan’andraikitra avy amin’ny tsirairay.

Antanifotsy : tanàna madio, tanàna milamina, andraikitsika rehetra.

12/08/2026

‎𝐅𝐢𝐭𝐚𝐭𝐞𝐫𝐚𝐧𝐚 Antanifotsy : 𝐬𝐚𝐯𝐨𝐫𝐨𝐯𝐨𝐫𝐨 𝐯𝐨𝐤𝐚𝐭𝐫𝐲 𝐧𝐲 𝐟𝐚𝐦𝐩𝐢𝐚𝐤𝐚𝐫𝐚𝐧𝐚 𝐬𝐚𝐫𝐚𝐧-𝐝𝐚𝐥𝐚𝐧𝐚.
‎
Nitrangana savorovoro teo amin’ny tobim-piantsonan’ny fiara mampitohy an’Antanifotsy- Antananarivo , omaly folakandro.

Vokatry ny fampiakarana saran-dalàna nataon’irony antsoina hoe mpanera no nahatonga ny korontana, ny fiara raha teo tsy nisy kanefa samy te hamonjy fodiana avokoa. 15.000 ar no saran-dalàna voasoratra sy tokony haloan’ny mpandeha , kanefa ireo mpanera mampiakatra izany ho 20.000ar, teo no nitranga ny fifamaliana sy ny ady teo amin’ny mpandeha sy ny mpanera.
‎
‎ Mpamily iray no naratra vokatry ny fikasihin-tanana nandritry ny korontana.
‎
‎ Tonga nandamina teny an-toerana moa ny avyeo anivon’ny polisim-pirenena ary efa nirosoana avy hatrany fanadihadiana. Raha tsy misy ny lamina azo atao dia atolotra ny fitsarana ny raharaha.
‎Handrasana ihany koa ny hambaran’ny ATT mikasika ity saran-dalàna ity.

10/08/2026

CEG ANDRIANTSILAHY : FANAMPIM-BOKY, ILAINA HANATSARANA NY FIANARAN’NY MPIANATRA

Ao amin’ny CEG Andriantsilahy, Kaominina Antanifotsy, distrikan'Antanifotsy,olana sedrain’ny sekoly ny tsy fahampian’ny boky . Araka ny nambaran’i Raheriniaina Jeanne Dina, filoha lefitry ny FRAM ao an-toerana dia liana amin’ny fanitaran-tsaina sy fampitomboana fahalalana ireo mpianatra. Voafetra anefa izany noho ny tsy fahampian’ny boky.

Manoloana izany, dia maniry sy mangataka fanampiana amin’ny fahazoana boky isan-karazany sy étagères handaminana sy hitehirizana azy ireo ny eo anivon'ny sekoly.

Naneho fankasitrahana ny Fikambanana Ray dia tarihin'ny Solombavambahoaka Narson RAFIDIMANANA ihany koa ny tenany tamin’ny fanohanana izay efa natao ho an'ny CEG Andriantsilahy.

Ny fahazoana boky sy fitaovana ampy dia heverina hanampy amin’ny fanatsarana sy hampiroborobo ny tontolon'ny fampianarana .

10/08/2026

𝐀𝐌𝐁𝐎𝐇𝐈𝐓𝐎𝐌𝐏𝐎𝐈𝐍𝐀 – 𝐀𝐍𝐓𝐀𝐍𝐈𝐅𝐎𝐓𝐒𝐘 | 𝐙𝐚𝐢𝐤𝐚 𝐟𝐚𝐡𝐞𝐧𝐢𝐧𝐚 𝐒𝐀.𝐋𝐎.𝐌𝐀 𝐬𝐲 𝐅𝐒 𝐅𝐋𝐌 𝐒𝐏 𝐎𝐧𝐢𝐯𝐞

Tontosa ny 04–09 Aogositra tao Ambohitompoina ny Zaika fahenina nokarakarain’ny SA.LO.MA sy ny FS FLM SP Onive, izay nampivondrona ny Sekoly Alahady sy ny Skoto FLM SP Onive nandritra ny enina andro.

Nisokatra tamin’ny fiofanana ho an’ireo mpampianatra Sekoly Alahady sy mpiandraikitra Skoto ny hetsika, narahin’ny Zaika.

Nanatrika ny fotoam-pamaranana ny Solombavambahoaka RAFIDIMANANA sy ireo mpiara-dia aminy. Notsindriany nandritra izany fa "ny fanabeazana ny ankizy no fototry ny fanorenana ny fahitsiana, ny fifanajana, ny fitiavana ary ny fandraisana andraikitra, satria izy ireo no ho olom-pirenena sy mpitarika amin’ny ho avy."

Nanohana ny hetsika tamin’ny alalan’ny fanampiana ara-bola ihany koa ny Solombavambahoaka, ka nanolotra 300.000 ar ho an'ny Fileovana nandray vahiny , 150 000 Ariary ho an’ny SA.LO.MA sy ho an’ny FS FLM, ary 350 000 Ariary ho an’ireo Pastora.

Nohamafisiny tamin’izany fa manohana hatrany ny asa fanabeazana sy ny fiainan’ny fiangonana izy.

09/08/2026

Anisan'ny niady mafy ho an'ny tetikasa Sahofika ny solombavambahoaka voafidy tao amin'ny distrikan'Antanifotsy, Narson Rafidimanana.

10 taona aty aorina nanalorana ity tetikasa ity ho vahaolana amin'ny delestazy vao nisy nihaino ny antso nataon'ity olom-boafidy ity.

"Ny tsy fijeren'ireo mpitondra tany aloha ny tombontsoan'ny vahoaka no tsy nanatanterahana ny tetikasa Sahofika.

Raha natao laharam-pahamehana manko dia azo antoka fa nahazo tombony ny orinasa Jirama ary tsy maty antoka intsony.

Ity tetikasa ity dia fotodrafitrasa fototra, izay hahafahana manome asa ny vahoaka sy mampidina ny vidin'ny herinaratra ary miala amin'ny fanohanana ara-bola ny Jirama efa mahatratra 700 ka 1 000 miliara Ariary isan-taona, izay tokony hitsinjovana ny vahoaka, ny tantsaha ary ny tanora.", hoy ity depiote ity.

Tsiahivina fa afaka mamokatra herinaratra 205 ka hatramin'ny 300 MW (Mégawatts) ny tetikasa Sahofika hotanterahina ao amin'i Onive, ary mbola afaka hitarina hatrany amin'ny 400 MW noho ity renirano ity tsy mety ritra mandavan-taona.

Vao tamin'ny faran'ny zoma lasa teo no nitsidika ny toerana hananganana ny tobim-pamokarana ao an-toerana ny solontena avy ao amin'ny "Fonds Souverain Malagasy" notarihin'ny filohany, ary notronin'Atoa Narson Rafidimanana.

Ny vola ao amin'ny ity rafitra ity manko no heverina hahetsika hampiodinana ny tetikasa. Resy lahatra amin'izany ny solombavambahoaka noho ny filazany fa volam-bahoaka no miasa ao, ary izany indrindra hoy izy no tokony ilana azy.

Tsy adinony ny nisaotra ny Filohan'ny fanavaozana ny Repoblikan'i Madagasikara amin'ny fanetsehana ity tetikasa ity.

Na dia mbola tsy manomboka moa ny famokarana herinaratra dia efa mahazo tombony sahady ny ao Antanifotsy noho ny fanamboaran-dalana efa mandeha any an-toerana, izay manamora ny famoaham-bokatra andaniny, ary misoroka ny fikaram-bidy mihoam-pampana noho ny faharatsian'ny lalana teo aloha ankilany.

Tanora manodidina ny 10 000 koa no hahazo asa amin'ny fanatanterahana ny tetikasa.