21/03/2025
Araka ny efa fantatra dia ho avy hanatanteraka fitsidihana amin’ny fomba ofisialy eto amintsika ny Filoha Frantsay Emmanuel Macron manomboka ny 23 avrily izao.
Tafiditra indrindra amin’ny fandraisany anjara amin’ny fihaonana an-tampony faha-5 ny Vaomieran’ny Ranomasimbe Indiana, na COI, izay hatao eto Antananarivo izany.
Tsara ny manamarika fa izy izany izao no Filoham-pirenena Frantsay faha-5 handalo eto Madagasikara. Raha tsiahivina, Filoha Frantsay voalohany tonga teto ny Jeneraly Charles De Gaule, tamin’ny volana aogositra 1958.
Antondiany tamin’izany ny fanomanana ny fanomezana ny fahaleovantena ho antsika sy ireo firenena Afrikana vitsivitsy.
Nanaraka azy avy eo ny Filoha François Mitterrand izay tonga teto tamin’ny volana jona 1990 fony mbola ny fitondrana Sosialista notarihan’ny Amiraly Didier Ratsiraka no teo amin’ny fitondrana. Heritaona taorian’io moa dia nipoaka ny krizy politika tamin’ny 1991.
Tamin’ny fitondran’ny Filoha Marc Ravalomanana ny Filoha Jacques Chirac no nanao fitsidihana ofisialy teto Madagasikara tamin’ny volana jolay 2005. Tany Mahajanga ity Filoha Frantsay ity no nigadona voalohany.
Ny fandraisana anjara tamin’ny fivoriana an-tampon’ireo firenena miteny sy mampiasa ny teny frantsay kosa no nahatongavan’ny Filoha Frantsay François Hollande teto tamin’ny volana novambra 20216, ka Atoa Hery Rajaonarimampianina no teo amin’ny fitondrana tamin’izany.
Atoa Nicolas Sarkozy no Filoha Frantsay tsy nanao fitsidihana ofisialy teto amintsika. Tonga teo ihany anefa izy nandritra ny fianianana nataon’ny Atoa Andry Rajoelina tetsy Mahamasina tamin’ny volana janoary 2019, saingy efa tsy teo amin’ny fitondrana intsony.
Marihina fotsiny fa saika misy fiovana ara-politika goavana hatrany eto amin’ny firenena taorian’ny fandalovan’ny Filoha Frantsay eto amintsika
Amin’izao fe-potoana faharoan’ny Filoha Andry Rajoelina izao indray vao misy filoha Frantsay mandalo manao fitsidihana amin’ny fomba ofisialy eto amintsika. Maro moa no mametra-panontaniana mikasika ity fahatongavan’Atoa Emmanuel Macron eto ity. Tafiditra ao anatin’izany ny hoe : hitondra inona ho an’i Madagasikara ny fahatongavany manoloana ny rivo-baovao mitsoka ankehitriny ?
Eo ihany koa ny hoe ny inona no andrasan’ny rehetra amin’ny fahatongavany ? Hisy ve ny fihaonany amin’ny mpanohitra ? Ho voaresaka miaraka amin’ny mpitondra malagasy ve ny mahakasika ireo nosy manodidina na « Iles Eparses » ?
Marihina moa fa i Emmanuel Macron no Filoha Frantsay nanohitra ampahibemaso ny famerenana ny « Iles Eparses » amintsika tamin’ny alalan’ilay fitenenena hoe : «ici c’est la France ! ». Ireo fanontanina rehetra ireo dia ho fantatra ihany ny valiny manomboka ny volana avrily ho avy io.
