04/09/2025
Вчера ве прашавме дали знаете што значи "Толе леге"
Денеска ќе ви го дадеме одговорот за значењето но и приказната како го избравме ова име за нашата иницијатива.
Св. Августин, еден од најголемите умови што некогаш живееле, во својата книга "Исповеди" раскажува за моментот на предавање на неговиот живот на Христос. Тој долго време бил жесток противник на Христијанството и дел од Манихејската секта.
Со својот брилијантен ум, тој ги побивал и исмевал христијаните.
Августин бил добро запознаен со писмото и со аргументите на христијаните, но ништо од тоа не го убедило дека Христос е Патот.
Но, иако однадвор изгледал сигурно и стабилно, тој во себе чуствувал дека се наоѓа во духовен гнилеж.
Еден ден размислувајќи за својата очајна состојба, тој слуша глас кој како песна ги повторува зборовите "Земи и читај, Земи и читај" (Tolle Lege, Tolle Lege) Зачудено се запрашувал од каде доаѓа овој детски (или ангелски?) глас, решава да ја отвори Книгата и чита краток дел од писмото на Апостол Павле до Римјаните.
Еве краток извадок од неговата книга:
„Бев во таа состојба на силно внатрешно вознемирување, кога Ти, Господи, тајно ме влечеше кон Себе. Јас се колебав дали да се предадам целосно на Тебе, или уште да одолговлекувам...
Седнав под една смоква и почнав да ридам со најгорки солзи, извикнувајќи:
‘До кога, Господи? До кога ќе велам утре, утре? Зошто не сега? Зошто да не ставам крај на мојата нечистотија уште овој час?’
И зборувајќи така, плачев со душевна болка и скрушено срце. И тогаш, ете, од соседната куќа слушнав глас – глас на момче или девојче, не знам – кој непрестајно повторуваше, како во игра или песна:
‘Земи и читај, земи и читај!’ (tolle, lege; tolle, lege).
Веднаш престанав да плачам, и почнав сериозно да размислувам: дали тоа е божествена заповед, да ја отворам Светата книга и да го прочитам она што прво ќе ми падне пред очи?
Трчав назад таму каде што беше оставено посланието на апостол Павле, ја зедов книгата, ја отворив и првото што ми падна пред очите беше ова:
„Да живееме чесно, како во ден, не во гозби и пијанства, не во блуд и распуштеност, не во кавги и зависти; туку облечете се во Господ Исус Христос, и не грижете се за телото за да ги задоволувате неговите похоти.“ (Римјаните 13:13–14)
Не посакав да читам понатаму, ниту ми требаше. Зашто, веднаш по крајот на тие зборови, како светлина на сигурност што навлезе во моето срце, целата темнина на сомнежите исчезна."
Нашата надеж е дека оваа иницијатива ќе биде еден таков поттик и охрабрување и за вас. Дека ќе бидеме еден таков глас кој ќе ве поттикнува да "земете и читате". И дека токму тие моменти на отвореност кон Бог ке станат ваши значајни средби кои ќе донесат светлина во вашиот живот и сигурност во вашите срца.
