16/12/2025
Во просториите на Музеј и завод за заштита на спомениците од културата – Струмица, успешно ја реализиравме стручната посета и практичната настава со студентите кои го слушаат предметот „Заштита и реставрација 3“ при Факултетот за ликовни уметности – Скопје (УКИМ), предводени од доц. м-р Марија Сотировска Богдановска.
Оваа посета ја организиравме како дел од практичниот сегмент на проектот за конзервација и реставрација на фрагментиран живопис од локалитетот Мал Кајаси, с. Банско. Заедно со студентите поминавме низ теоретските основи, а потоа и низ конкретните работни процеси и постапки што ги применуваме при заштита и третман на ваков тип културно наследство.
Теоретскиот и практичниот дел го презентираше д-р Душко Цветанов, виш кустос-археолог, и Томе Филов, виш конзерватор-реставратор. Преку стручни објаснувања, демонстрации и практични примери, ги претставивме клучните фази на конзерваторско-реставраторската работа и им овозможивме на студентите директен увид во методологијата и секојдневната практика.
Им упатуваме искрена благодарност на Факултетот за ликовни уметности – Скопје, на доц. м-р Марија Сотировска Богдановска и на студентите за посетата, интересот и активното учество. Веруваме дека ваквите стручни средби и соработки ќе продолжат и во иднина, во насока на едукација, размена на знаења и унапредување на практиките за заштита на културното наследство.
