12/11/2023
မင်္ဂလာရှိသော နေ့လေးပါခင်ဗျ 😊
ဒီတစ်ခေါက် စိုက်ပျိုး ဗဟုသုတ မှာတော့ ပိုးသတ်ဆေးအညွှန်းတွေအကြောင်းဖြစ်ပြီးတော့ ဘယ်အချက်တွေကို သတိထားဖတ်ကြရမလဲ ဆိုတာကို ဝေမျှပေးမှာပါခင်ဗျာ
🐛ပိုးသတ်ဆေး(Pesticides) လို့ ဆိုလိုက်ရင်တော့ အင်းဆက်ဆေး၊ ကြွက်ဆေး၊ ခရု၊ စတဲ့ ဖျက်ပိုးတွေအပါအဝင်ကိုမှ ပေါင်းသတ်ဆေးလည်း ပိုးသတ်ဆေးဆိုတဲ့ အထဲမှာထည့်ထားတာဖြစ်ပါတယ်။
ဆေးဝယ်လာပြီဆိုရင် အညွှန်းကို မဖြစ်မနေဖတ်ရပါမယ်။
အညွှန်းမှာ -
▪️ဆေးအမည်
ဆေးအမည်က တော့ ထုတ်လုပ်သူကဖြစ်ဖြစ် တင်သွင်းရောင်းချတဲ့သူကဖြစ်ဖြစ် ပေးထားတဲ့ စီးပွားရေးအရ မှတ်ပုံတင်ပြီး ရောင်းချနိုင်ဖို့အတွက် နာမည်ဖြစ်ပါတယ်။
▪️အစွမ်းရှိပစ္စည်း (AI)
အစွမ်းရှိပစ္စည်း (AI) ဆိုတာကတော့ ဆေးမှာ ပါဝင်တဲ့ အစွမ်းအာနိသင်ရှိတဲ့ ဓာတုဓာတ်ပေါင်းရဲ့နာမည်ဖြစ်ပါတယ်။ ဒါကတော့ တစ်ကမ္ဘာလုံးမှာပဲဖြစ်ဖြစ် တူညီတဲ့ နာမည်ဖြစ်ပါတယ်။ အအေးဝယ်သောက်သလိုပါပဲ၊ အရသာကတော့ အစွမ်းရှိပစ္စည်းဖြစ်ပြီး အကုန်လုံးမှာ နာနတ်ဆို နာနတ်ဖြစ်ပါတယ်။ ဒါပေမဲ့ အအေးအမည်ကတော့ ပြောင်းသွားပါတယ်။ ဒါလေးကတော့ ဆေးကို ဝယ်တတ်ဖို့ဖြစ်ပါတယ်၊ အစွမ်းရှိပစ္စည်း AI ကို ကြည့်ဝယ်ဖို့ အရေးကြီးပါတယ်ခင်ဗျာ။
▪️ဆေးအမျိုးအစား
ရေဖျော်ဆေးရည်လား ဆေးမှုန့်လား၊ အခဲလား ဆိုတာကို ဖော်ပြထားပါတယ်။
▪️အသုံးပြုရမည့်ပုံစံ
ရွက်ဖျန်း၊ မြေအောင်းဆေးမှုန့်လား၊ အစာနဲ့ ရောနယ်ကျွေးရမှာလားဆိုတာ ပါဝင်ပါတယ်။
▪️သုံးစွဲနိုင်သော သီးနှံ
သက်ဆိုင်ရာသီးနှံတွေကို ဖော်ပြထားတဲ့ အပိုင်းလေးပါဝင်လို့ မိမိသီးနှံနဲ့ ကိုက်မကိုက် သေချာစွာဖတ်ပေးရပါမယ်။
▪️နှိမ်နင်းနိုင်သော ရောဂါ/ပိုးမွှား/ပေါင်း
မှိုရောဂါ၊ ဗိုင်းရပ်ရောဂါ၊ ဂျပိုး၊ ခရု၊ ဆင်ငိုမြက်၊ ကြွက်၊ မွှား စသဖြင့် မိမိနဲ့ ကိုက်ညီတဲ့ ပိုးမွှားရောဂါ တစ်ခုခုပါဝင်မှ ဝယ်ပါခင်ဗျာ။
▪️ဆေးနှုန်းထား
ဆေးဖျန်းပုံးတစ်ပုံးကို ဘယ်လောက်နဲ့ ရောစပ်ရမယ်။ တစ်ဘူးကို အစာဘယ်လောက်နဲ့ နယ်ရမယ် ဆိုတာလိုမျိုး နှုန်းထားတွေ ပါဝင်တာမို့ သေချာဖတ်ပြီး ရောစပ်ရပါမယ်။ ဆေးနှုန်းထားများရင် လောင်တတ်သလို၊ နည်းရင်လည်း ထိရောက်မှုနည်းနိုင်တာကြောင့် တိတိကျကျရောစပ်ဖို့ လိုတာမို့ ဖတ်ရပါမယ်ခင်ဗျာ။
▪️သုံးစွဲရမည့်အချိန်
ရောဂါမကျမှီကာကွယ်ဆေးအနေနဲ့ ကြိုတင်သုံးရမဲ့ဆေးလား၊ မနက်ပိုင်း ဖျန်းသင့်တာလာ၊ နေအေးချိန်လား စသဖြင့် ပါဝင်ပါတယ်။ အချိန်ကာလ နဲ့ကိုယ့်စိုက်ခင်းအခြေအနေ ကို ချိန်ဆပြီး ဝယ်နိုင်ဖို့ ဖတ်ရပါမယ်။
▪️ဆေးဖျန်းပြီး စိုက်ခင်းအတွင်း ဝင်ရောက်ရမည့် အချိန်
တစ်ချို့ပိုးသတ်ဆေးနဲ့ ဂိုဒေါင်တွေမှာ သုံးကြတဲ့ အဆိပ်ငွေ့မှိုင်းတိုက်တဲ့ ပစ္စည်းတွေလိုမျိုးမှာ ဆေးကို အသုံးပြုပြီး အနည်းဆုံး ဘယ်လောက်ကြာမှ ပြန်လည်ဝင်ရောက်ပါဆိုတာ ပါဝင်ပါတယ်။ ကျန်းမာရေးအရ စံနှုန်းတွက်ချက်ပေးထားတာဖြစ်တာကြောင့် အတိအကျလိုက်နာနိုင်ဖို့အတွက် ဒီအချက်ကိုလည်း ဖတ်ကိုဖတ်ရပါမယ်ခင်ဗျာ။
▪️သီးနှံမရိတ်သိမ်းမှီစောင့်ဆိုင်းရမည့်ကာလ (PHI)
စိမ့်ဝင်မှု အလိုက် ဆေးဖျန်းပြီးတော့ အနည်းဆုံး ဘယ်အချိန်ကျမှ သီးနှံကိုခူးပါဆိုတဲ့ သတိပေးချက်လေးပါ။ စောင့်ရမဲ့ကာလအထိ မစောင့်ပဲ ခူးဆွတ်စားသုံးလိုက်ရင်တော့ ပိုးသတ်ဆေး ဓာတ်ကြွင်းနဲ့အတူ လူ့ခန္ဓာကိုယ်ထဲ ရောက်သွားမှာကို သတိပြုဖို့ ဖော်ပြချက်ဖြစ်တာမို့ ဂရုတစိုက်ဖတ်ပေးဖို့ လိုပါမယ်ခင်ဗျာ။
▪️မှတ်ပုံတင်နံပါတ်
ကြော်ငြာအားကောင်းကောင်းနဲ့ကြော်ငြာနေပေမဲ့ မှတ်ပုံတင် မလုပ်ရသေးဘူးဆိုရင် ယုံကြည်လို့မရပါဘူးခင်ဗျာ။ မှတ်ပုံတင်နံပါတ်က A (သို့) F (သို့) P နဲ့စပါတယ်ခင်ဗျ၊ ဥပမာ တစ်ခု ဆိုရင် P2021-5355 ဖြစ်ပါတယ်၊ မှတ်ပုံတင်နံပါတ်နဲ့အပေါ်က အညွှန်းစာအပြည့်အစုံပါဝင်မှ အရည်အသွေးစိတ်ချလက်ချနဲ့ သုံးကြပါခင်ဗျာ။
သတိပြုရန်အချက်များနှင့် ရှေးဦးလူနာပြုစုနည်းနဲ့ အခြားအချက်အလက်များ ပါဝင်ပါတယ်။
❗️နောက်ဆုံးအနေနဲ့ ပိုးသတ်ဆေးဖျန်းဖို့ လိုလာပြီဆို နှာခေါင်းစည်း၊ လက်အိတ်၊ ဖိနပ်နဲ့ ကိုယ်ခန္ဓာနဲ့ မျက်လုံးကို ဆေးတိုက်ရိုက်မထိအောင် အကာအကွယ်များဝတ်ဆင်ပြီးမှ ဖျန်းပါ။လေလာရာလမ်းကြောင်းအတိုင်းဖျန်းဖို့၊ ဆေးဖျန်းနေတုန်း အစားအစာမစားဖို့နဲ့ ဆေးဖျန်းပြီးရင် ဆေးပုံးရော ဆေးဖျန်းသူနဲ့တကွ ဆေးဖျန်းတုန်းက အဝတ်အစားတွေပါ သေချာပြန်ဆေးကြောဖို့လည်း မမေ့ကြပါနဲ့ခင်ဗျာ😊
