02/12/2022
အောက်တိုဘာလ သဘာဝဓာတ်ငွေ့ရောင်းချမှုမှ ဒေါ်လာသန်း ၂၄၀ ကျော် ဝင်ငွေရ
ရန်ကုန်၊ ဒီဇင်ဘာ ၂
၂၀၂၂-၂၀၂၃ ဘဏ္ဍာရေးနှစ်ရဲ့ အောက်တိုဘာ တစ်လတည်းမှာပင် သဘာဝဓာတ်ငွေ့ တင်ပို့ရောင်းချမှုကနေ အမေရိကန်ဒေါ်လာ (၂၄၇.၆၁၃) သန်း ရရှိခဲ့တယ်လို့ မြန်မာ့ကုန်သွယ်မှုမြှင့်တင်ရေးအဖွဲ့က ထုတ်ပြန်ထားပါတယ်။
နိုင်ငံခြားငွေအများဆုံး ရရှိခဲ့တဲ့ ပို့ကုန်အမယ် (၃) မျိုးထဲမှာ ရေနံနှင့် သဘာဝဓာတ်ငွေ့က တစ်ခုအပါအဝင်ဖြစ်ပြီး အခြားအမယ်တွေဖြစ်ကြတဲ့ အထည်ချုပ်တင်ပို့မှုကနေ ကန်ဒေါ်လာ (၃၆၄) သန်းကျော်နဲ့ ပြောင်းတင်ပို့မှုကနေ ဒေါ်လာ (၅၆) သန်းကျော် ရရှိခဲ့ပါတယ်။
MyanTrade ရဲ့ ဖော်ပြချက်အရ ပို့ကုန်ဝင်ငွေအများဆုံးရရှိတဲ့ အမယ် (၁၀) မျိုးခန့်ရှိပြီး အဲ့ဒီအထဲမှာ အထည်ချုပ်၊ သဘာဝဓာတ်ငွေ့၊ ပြောင်း၊ မတ်ပဲ၊ ဆန်၊ ငါး၊ ဆန်ကွဲ၊ ရာဘာ၊ ပဲတီစိမ်းနဲ့ ပုစွန် ဖြစ်တယ်လို့ ဆိုပါတယ်။
အဲ့ဒီအထဲမှာ ဆန်တင်ပို့မှုက ဒေါ်လာ (၅၂) သန်း၊ မတ်ပဲတင်ပို့မှုက ဒေါ်လာ (၅၁) သန်း၊ ရေထွက်ကုန်(ငါး)တင်ပို့မှုက ဒေါ်လာ သန်း (၃၀)၊ ဆန်ကွဲတင်ပို့မှုက ဒေါ်လာ (၂၁) သန်း၊ ရာဘာတင်ပို့မှုက ဒေါ်လာ (၁၈)သန်း၊ ပဲတီစိမ်းတင်ပို့မှုက ဒေါ်လာ (၁၈) သန်း၊ ပုစွန်တင်ပို့ရောင်းချမှုကနေ ဒေါ်လာ (၈) သန်းခန့် ပို့ကုန်ဝင်ငွေ ရရှိထားပါတယ်။
တစ်ချိန်တည်းမှာပဲ ပြည်ပက စက်သုံးဆီ၊ အထည်အလိပ်၊ ဆေးဝါး၊ ဓာတ်မြေသြဇာ၊ ပလတ်စတစ်ကုန်ကြမ်း၊ စားအုန်းဆီ၊ လျှပ်စစ်အပိုပစ္စည်း၊ သံ/သံမဏိ၊ ဆောက်လုပ်ရေးလုပ်ငန်းသုံး ကုန်ကြမ်းတွေ ပြန်လည်တင်သွင်းခဲ့တယ်လို့ MyanTrade က ပြောပါတယ်။
အောက်တိုဘာလအတွင်း စက်သုံးဆီတင်သွင်းမှုအတွက် အမေရိကန်ဒေါ်လာသန်း (၄၂၀) ခန့်အထိ နိုင်ငံခြားငွေအများဆုံး သုံးစွဲထားရပြီး အထည်အလိပ်အတွက် ဒေါ်လာ (၉၅) သန်းနဲ့ ဆေးဝါးပစ္စည်းများအတွက် ဒေါ်လာသန်း (၆၀) ဖိုးခန့် တင်သွင်းထားပါတယ်။
