Shan State Channel, Lashio (2026)

05/01/2026

လားရှိုးမှ တောင်ကြီးသို့ ဖယောင်းတိုင်တင်ဆောင်လာသော Toyota Wish တစ်စီး လဲချားမြို့နယ်တွင် တိမ်းမှောက်၊ ယာဉ်မောင်း စိုးရိမ်ရ

Shan State Channel
ဇန်နဝါရီ ၅ ရက်၊ ၂၀၂၆ ခုနှစ်။

ရှမ်းပြည်နယ်မြောက်ပိုင်း လားရှိုးမြို့မှ ရှမ်းပြည်နယ်တောင်ပိုင်း တောင်ကြီးမြို့သို့ ဖယောင်းတိုင်များ တင်ဆောင်လာသည့် Toyota Wish ကားတစ်စီးသည် ယမန်နေ့ ဇန်နဝါရီ ၄ ရက်၊ ညနေ ၂ နာရီကျော်အချိန်တွင် ယာဉ်မတော်တဆ တိမ်းမှောက်မှု ဖြစ်ပွားခဲ့ကြောင်း သိရသည်။

ဖြစ်စဉ်မှာ လဲချားမြို့နယ်၊ ပင်လုံရွာသစ်အနီးတွင် အဆိုပါ Toyota Wish ကားသည် အခြားကားတစ်စီးကို ကျော်တက်ရန် ကြိုးပမ်းရာမှ အရှိန်မထိန်းနိုင်ဘဲ လမ်းဘေးသို့ တိမ်းမှောက်သွားခဲ့ခြင်း ဖြစ်သည်။

ယာဉ်တိမ်းမှောက်မှုကြောင့် ယာဉ်မောင်းဖြစ်သူမှာ သတိမေ့မြောသွားခဲ့သဖြင့် "နှလုံးသား" လူမှုကူညီရေးအသင်းက ပင်လုံဆေးရုံသို့ အမြန်ဆုံး ပို့ဆောင်ပေးခဲ့သည်။ သို့သော် ပင်လုံဆေးရုံတွင် သတိပြန်မရလာသေးသဖြင့် "ဖြူစင်မေတ္တာ" လူမှုကူညီရေးအသင်းက လွိုင်လင်ဆေးရုံကြီးသို့ ထပ်မံလွှဲပြောင်း ကူညီပို့ဆောင်ပေးခဲ့ရပြီး လက်ရှိတွင် ဆေးကုသမှု ခံယူနေရဆဲ ဖြစ်သည်။

လမ်းပေါ်တွင် ပြန့်ကျဲနေသည့် ဖယောင်းတိုင်များကို လူမှုကူညီရေးအသင်းနှင့် ဒေသခံများက စုစည်းကာ ပင်လုံမြို့သို့ သယ်ဆောင်လာခဲ့ပြီး မူလပိုင်ရှင်ထံ စုံစမ်းကာ ပြန်လည်ပေးအပ်သွားမည်ဟု သိရသည်။

ယခုဖြစ်စဉ်နှင့် ပတ်သက်၍ ဒေသခံတစ်ဦးက "ကားဆရာတွေအနေနဲ့ ကုန်တွေအများကြီး တင်ထားရင် ပိုပြီးတော့ သတိထားမောင်းနှင်ကြဖို့ တိုက်တွန်းချင်ပါတယ်" ဟု ပြောကြားထားသည်။

#လားရှိုးမှတောင်ကြီးသို့
#ဖယောင်းတိုင်တင်ဆောင်လာသော
Wishတိမ်းမှောက်

-Photo Local

30/12/2025

ကျိုင်းတုံမြို့တွင် လုံခြုံရေးတင်းကျပ်ထားသည့်ကြားမှ ဆိုင်ကယ်လုယက်မှုများ ဆိုးရွားစွာ ရက်ဆက်ဖြစ်ပွားနေ

Shan State Channel
ဒီဇင်ဘာ ၃၀ ရက်၊ ၂၀၂၅ ခုနှစ်။

ရှမ်းပြည်နယ်အရှေ့ပိုင်း၊ ကျိုင်းတုံမြို့တွင် ယခုရက်ပိုင်းအတွင်း ဆိုင်ကယ်လုယက်မှုများ ဆိုးဆိုးရွားရွား ရက်ဆက်ဖြစ်ပွားနေသဖြင့် ဒေသခံများအကြား စိုးရိမ်ထိတ်လန့်မှုများ မြင့်တက်နေကြောင်း သတင်းရင်းမြစ်များထံမှ သိရသည်။

ယမန်နေ့ ဒီဇင်ဘာ ၂၉ ရက်၊ နံနက်ပိုင်းအချိန်တွင် ရပ်တော်မူဘုရားသို့ ဘုရားဖူးလာသည့် မိန်းကလေး ၂ ဦး၏ ဆိုင်ကယ်ကို အမည်မသိ အမျိုးသား ၂ ဦးက ပိုင်ရှင်များရှေ့တွင်ပင် သော့ဖျက်ကာ အတင်းအဓမ္မ လုယက်ယူဆောင်သွားခဲ့သည်။

ပြီးခဲ့သည့် ဒီဇင်ဘာ ၂၈ ရက်၊ ည ၈ နာရီခွဲအချိန်တွင်လည်း အလက (၃) လမ်းကြား၌ မိန်းကလေး ၂ ဦးစီးလာသည့် ဆိုင်ကယ်ကို ဆိုင်ကယ် ၂ စီးဖြင့် လူ ၄ ဦးက ပိတ်ဆို့ကာ အဓမ္မ လုယက်ခဲ့သလို၊ ယင်းနေ့ ညနေ ၅ နာရီကျော်တွင်လည်း တရုတ်ကျောင်းသွားသည့် ကုန်းဆင်းလမ်း၌ အမျိုးသမီးတစ်ဦး၏ ဆိုင်ကယ် ထပ်မံလုယက်ခံခဲ့ရသည်။ ထို့ပြင် ဒီဇင်ဘာ ၂၇ ရက်နေ့ကလည်း လွယ်မွေသွားလမ်းတွင် ဆိုင်ကယ်လုယက်မှု ထပ်မံဖြစ်ပွားခဲ့ကြောင်း ဒေသခံများက ဆိုသည်။

အထူးခြားဆုံးအချက်မှာ ယခု ဒီဇင်ဘာ ၂၇ ရက်နှင့် ၂၈ ရက်များသည် ကျိုင်းတုံမြို့၌ စစ်ကောင်စီ၏ ရွေးကောက်ပွဲ ကျင်းပနေသည့် ကာလဖြစ်ပြီး မြို့အနှံ့ လုံခြုံရေးအပြည့် ချထားသည့်ကြားမှ ယခုကဲ့သို့ လုယက်မှုများ ပေါ်ပေါ်တင်တင် ဖြစ်ပွားနေခြင်းဖြစ်သည်။ လုံခြုံရေးတပ်ဖွဲ့ဝင်များ မြို့တွင်းလှုပ်ရှားနေသော်လည်း ရာဇဝတ်မှုများကို ထိရောက်စွာ ဟန့်တားနိုင်ခြင်း မရှိသည့်အပေါ် ဒေသခံများက ဝေဖန်နေကြသည်။

စစ်အာဏာသိမ်းပြီးနောက်ပိုင်း ရှမ်းအရှေ့မြို့တော် ကျိုင်းတုံတွင် ခိုးဆိုးလုယက်မှုများ သိသိသာသာ များပြားလာပြီး ပြည်သူများအနေဖြင့် လုံခြုံမှုမရှိတော့သည့် အခြေအနေနှင့် ရင်ဆိုင်နေရသည်။ ထို့ကြောင့် သွားလာရာတွင် အထူးသတိထားကြရန်နှင့် လူသူကင်းဝေးသည့်နေရာများကို ရှောင်ရှားကြရန် ဒေသခံအချင်းချင်း လူမှုကွန်ရက်နှင့် မြေပြင်တွင် သတိပေး ပြောဆိုနေကြရကြောင်း သိရသည်။

#ကျိုင်းတုံမြို့
#ဆိုင်ကယ်လုယူမှု
#ဆိုးရွားစွာရက်စက်ဖြစ်ပွား

-Photo Local

26/12/2025

ပင်လောင်းမြို့နယ် တီကျစ်တွင် ကား ၃ စီး ဆင့်ကဲတိုက်မှုဖြစ်ပွား၊ လူ ၃ ဦး ဒဏ်ရာရရှိ

Shan State Channel
ဒီဇင်ဘာ ၂၅ ရက်၊ ၂၀၂၅ ခုနှစ်။

ရှမ်းပြည်နယ်တောင်ပိုင်း၊ ပင်လောင်းမြို့နယ်၊ တီကျစ်မြို့၊ လှည်းကြားရွာအနီးတွင် ယနေ့ ဒီဇင်ဘာ ၂၅ ရက်၊ နံနက် ၁၀ နာရီကျော်အချိန်ခန့်က ကား ၃ စီး ဆင့်ကဲတိုက်မှု ဖြစ်ပွားခဲ့ပြီး လူ ၃ ဦး ဒဏ်ရာရရှိခဲ့ကြောင်း သိရသည်။

အဆိုပါ ယာဉ်တိုက်မှုသည် တောင်ဘက်မှ မောင်းနှင်လာသော ကားတစ်စီးက အရှိန်ဖြင့် ကျော်တက်ရန် ကြိုးပမ်းရာမှ မြောက်ဘက်မှ လာသည့်ကားကို တိုက်မိခဲ့ခြင်းဖြစ်သည်။ ထို့နောက် နောက်မှလိုက်ပါလာသည့် အခြားကားတစ်စီးကလည်း အရှိန်မထိန်းနိုင်ဘဲ ထပ်မံဝင်တိုက်မိသဖြင့် ကား ၃ စီးစလုံး အများအပြား ပျက်စီးသွားခဲ့သည်။

"အဲ့ဒီဘက်က လမ်းကတော့ ကောင်းပါတယ်။ တောင်ဘက်ကလာတဲ့ ကားအချင်းချင်း ကျော်ဖို့လုပ်ရင်း မြောက်ဘက်ကလာတဲ့ကားနဲ့ တိုက်မိတာ။ နောက်ကားတစ်စီးကလည်း အရှိန်မထိန်းနိုင်ဘဲ ဝင်တိုက်တော့ ၃ စီး ဖြစ်သွားတာ။ လူ ၃ ဦး ဒဏ်ရာရတယ်၊ တစ်ဦးကတော့ ခြေထောက်ကျိုးသွားပြီး ဒဏ်ရာ တော်တော်ပြင်းတယ်" ဟု ဒေသခံတစ်ဦးက ပြောပြသည်။

ယာဉ်တိုက်မှုကြောင့် ဒဏ်ရာရရှိသူများကို ကယ်ဆယ်ရေးအဖွဲ့များက တီကျစ်ဆေးရုံသို့ အမြန်ဆုံး ပို့ဆောင်ပေးခဲ့သည်။ ၎င်းတို့အနက် ခြေထောက်ကျိုးကာ ဒဏ်ရာပြင်းထန်သူတစ်ဦးကိုမူ တောင်ကြီးမြို့ရှိ စပ်စံထွန်းဆေးရုံသို့ လွှဲပြောင်းပို့ဆောင်ပေးခဲ့ရကြောင်း သိရသည်။

ယခုနောက်ပိုင်းတွင် ရှမ်းပြည်နယ်တောင်ပိုင်း၌ ယာဉ်စည်းကမ်း၊ လမ်းစည်းကမ်း လိုက်နာမှု အားနည်းခြင်းကြောင့် ယာဉ်မတော်တဆမှုများ ပိုမိုများပြားလာကြောင်း ကြက်ခြေနီအဖွဲ့ဝင်တစ်ဦးက ဆိုသည်။

"ယာဉ်တိုက်မှုတွေကို လျှော့ချနိုင်ဖို့ဆိုရင် ကျေးရွာတွေအထိ ယာဉ်စည်းကမ်း၊ လမ်းစည်းကမ်း အသိပညာပေးတာတွေ၊ စာစောင်ဝေတာနဲ့ သတိပေးဆိုင်းဘုတ်တွေ တပ်ဆင်ပေးဖို့ အထူးလိုအပ်နေပါတယ်" ဟု ၎င်းက ဆက်လက်တိုက်တွန်းပြောကြားခဲ့သည်။

#ပင်လောင်းမြို့နယ်
#ကား၃စီးဆင်ကဲတိုက်မှုဖြစ်ပွား
#လူ ၃ဦးဒဏ်ရာရရှိ

-Photo Local

11/12/2025

မြောက်ဦးပြည်သူ့ဆေးရုံကို စစ်ကောင်စီ လေကြောင်းမှ ဗုံးကြဲတိုက်ခိုက်မှုကြောင့် အရပ်သား ၃၀ ကျော် သေဆုံး၊ ၁၀၀ နီးပါး ဒဏ်ရာရ

ဒီဇင်ဘာ ၁၁ ရက်၊ ၂၀၂၅ ခုနှစ်။

ရခိုင်ပြည်နယ်၊ အာရက္ခတပ်တော် (AA) ထိန်းချုပ်ထားသော မြောက်ဦးမြို့ရှိ ပြည်သူ့ဆေးရုံကို စစ်ကောင်စီ လေကြောင်းမှ ပေါင် ၅၀၀ ဗုံးနှစ်လုံးဖြင့် ဗုံးကြဲတိုက်ခိုက်ခဲ့ရာ အပစ်မဲ့ အရပ်သား ၃၀ ကျော် ထက်မနည်း သေဆုံးပြီး၊ ၁၀၀ နီးပါး ဒဏ်ရာရရှိခဲ့ကြောင်း စုံစမ်းသိရှိရသည်။

ဒီဇင်ဘာလ ၁၀ ရက်၊ ည ၉ နာရီ ၁၃ မိနစ်ခန့် အချိန်တွင် စစ်ကောင်စီ လေကြောင်းကနေ မြောက်ဦးဆေးရုံကို အကြောင်းမဲ့ လာရောက်ဗုံးကြဲတိုက်ခိုက်မှုကြောင့် အရပ်သား သေဆုံးသူ ၃၀ ဦးနှင့် ဒဏ်ရာရရှိသူ ၁၀၀ နီးပါးအထိ ရှိနေသည်။

အဆိုပါ ဗုံးကြဲခံရမှုကြောင့် ကျန်းမာရေးဝန်ထမ်းများလည်း ပါဝင်ပြီး လက်ရှိအချိန်အထိ သေဆုံးသူများထဲတွင် ကလေးအရေအတွက်များနှင့် အမျိုးသမီးအရေအတွက် ပိုမိုများပြားနေကြောင်း စုံစမ်းသိရှိရသည်။

အာဏာသိမ်း စစ်ကောင်စီသည် ရခိုင်ပြည်အတွင်းက ဘာသာရေးအဆောက်အအုံများ၊ စာသင်ကျောင်းများ၊ ဆေးရုံများကို နေ့စဉ်ရက်ဆက် ရည်ရွယ်ချက်ရှိရှိ ဗုံးကြဲမှုများ ရှိနေပြီး ယခုတစ်ကြိမ် ဗုံးကြဲတိုက်ခိုက်မှုသည် သေဆုံးသူ အရပ်သားအများဆုံး ဖြစ်စဉ်တစ်ခုလည်း ဖြစ်သည်။

#မြောက်ဦးပြည်သူဆေးရုံ
#စစ်ကောင်စီ
#လေကြောင်းဗုံးကြဲ
#သေဆုံးမှုရှိ

-Photo Local

10/12/2025

ထိုင်း-ကမ္ဘောဒီးယား နယ်စပ်မြေပုံ၊လေယာဉ်ဖြင့် ဗုံးကြဲတိုက်ခိုက်ခိုက်ပုံ သို့မဟုတ် ဒုံးကျည်ပစ်ခတ်နေ

#ထိုင်း-ကမ္ဘောင်္ဒးယား
#နယ်စပ်မြေပုံ
#လေယာဉ်ဖြင့်ဗုံးကြဲတိုက်ခိုက်

- Video Local

09/12/2025

ထိုင်း-ကမ္ဘောဒီးယားတင်းမာမှု အမြင့်ဆုံးသို့ ရောက်ရှိ၊ "သည်းခံနိုင်စွမ်း ကုန်ဆုံးပြီ" ဟု ထိုင်းစစ်တပ်ကြေညာ

Shan State Channel
ဒီဇင်ဘာ ၉ ရက်၊ ၂၀၂၅ ခုနှစ်။

ထိုင်းနိုင်ငံနှင့် ကမ္ဘောဒီးယားနိုင်ငံတို့အကြား နယ်စပ်ဒေသဆိုင်ရာ ပဋိပက္ခများသည် အမြင့်ဆုံး အခြေအနေသို့ ရောက်ရှိလာပြီဖြစ်ပြီး "ကမ္ဘောဒီးယားအပေါ် သည်းခံနိုင်စွမ်း ကုန်ဆုံးသွားပြီ" ဟု ထိုင်းစစ်တပ်က တရားဝင်ကြေညာလိုက်သည်။

ထို့အပြင် ထိုင်းဝန်ကြီးချုပ် Anutin Charnvirakul ကလည်း စစ်တပ်၏ စစ်ရေးဆောင်ရွက်ချက်များကို အပြည့်အ၀ ထောက်ခံပြီး ကမ္ဘောဒီးယားကို အရှိန်အဟုန်ဖြင့် စစ်တိုက်ရန် မီးစိမ်းပြ ခွင့်ပြုပေးလိုက်ပြီဖြစ်ကြောင်း တရားဝင် ထုတ်ဖော်ပြောဆိုခဲ့သည်။

ယနေ့တွင် ထိုင်းစစ်တပ်က တရားဝင် သတင်းစာရှင်းလင်းပွဲ ပြုလုပ်ကာ ကမ္ဘောဒီးယားက လက်နက်ကြီးများ အသုံးပြုတိုက်ခိုက်လာပါက ထိုင်းစစ်တပ်အနေဖြင့် အင်အားပြည့် တိုက်ခိုက်ရန် အပြည့်အဝ အသင့်ပြင်ဆင်ထားပြီဖြစ်ကြောင်း ထုတ်ပြန်ကြေညာသည်။

ထိုင်းပြည်သူလူထုနှင့် အချုပ်အခြာအာဏာအတွက် လိုအပ်သော အရေးယူဆောင်ရွက်မှုအားလုံးကို ထိုင်းစစ်တပ်က အပြည့်အဝ လုပ်ဆောင်သွားမည်ဖြစ်ကြောင်းနှင့် ထိုင်းပြည်သူများက အပြည့်အ၀ ယုံကြည်မှုထားရှိရန်လည်း တောင်းဆိုထားသည်။

ထိုင်းဝန်ကြီးချုပ် Anutin Charnvirakul ကလည်း စစ်တပ်၏ စစ်ရေးဆောင်ရွက်ချက်များကို အပြည့်အဝ ထောက်ခံကြောင်း၊ လက်ရှိ စစ်ရေးလှုပ်ရှားမှုများကို ရပ်တန့်စရာမရှိတော့ကြောင်း၊ ကမ္ဘောဒီးယား ရှုံးနိမ့်အားကုန်သွားသည်အထိ တိုက်ခိုက်သွားမည်ဖြစ်ပြီး စစ်တပ်ကို စစ်တိုက်ရန် အမိန့်ပေး ခွင့်ပြုလိုက်ပြီဖြစ်သည် ဟု ထုတ်ဖော်ပြောဆိုသည်။ ဝန်ကြီးချုပ်က ထိုင်းပြည်သူများကို ကာကွယ်ရန်ကိုသာ အဓိက အာရုံစိုက်ထားပြီး ကျန်သော အရေးကိစ္စများကို ဂရုစိုက်မည်မဟုတ်ကြောင်းလည်း ပြောဆိုခဲ့သည်။

ထိုင်းနှင့် ကမ္ဘောဒီးယား နှစ်နိုင်ငံသည် နယ်စပ်ဒေသဆိုင်ရာ အငြင်းပွားမှုများနှင့် ပတ်သက်၍ ယခင်ကလည်း လက်နက်ကိုင်ပဋိပက္ခများ ဖြစ်ပွားခဲ့ဖူးသော်လည်း လက်ရှိဖြစ်ပွားနေသော စစ်ရေးတင်းမာမှုမှာမူ အမြင့်ဆုံးသို့ ရောက်ရှိနေခြင်းဖြစ်သည်။

ကမ္ဘောဒီးယားနှင့် ထိုင်းတို့သည် ယမန်နေ့ ဒီဇင်ဘာလ ၈ ရက်နေ့မှစတင်၍ နှစ်နိုင်ငံအပြင်းအထန် တိုက်ခိုက်မှုများ စတင်ခဲ့ပြီး ယခုနှစ်အတွင်း ဒုတိယအကြိမ်မြောက် နယ်စပ်ဒေသ တိုက်ပွဲများ ဖြစ်ပေါ်လာခြင်းဖြစ်သည်။

#ထိုင်း-ကမ္ဘောဒီးယား
#တင်းမာမှုအမြင့်ဆုံးရောက်ရှိ
#ထိုင်းကြေညာ

-Photo Local

08/12/2025

ထိုင်း-ကမ္ဘောဒီးယား နယ်မြေအငြင်းပွားမှုကြောင့် စစ်ပွဲ တစ်ကျော့ပြန်ဖြစ်၊ ထိုင်းလေတပ်က ဗုံးကြဲ၊ ကမ္ဘောဒီးယားက ဒုံးကျည်ဖြင့် ပစ်ခတ်

Shan State Channel
ဒီဇင်ဘာ ၈ ရက်၊ ၂၀၂၅ ခုနှစ်။

ထိုင်းနှင့် ကမ္ဘောဒီးယား နှစ်နိုင်ငံအကြား နယ်စပ်နယ်မြေပိုင်ဆိုင်မှု အငြင်းပွားရာမှ စစ်ပွဲတစ်ကျော့ပြန် စတင်ဖြစ်ပွားခဲ့ကြောင်း ထိုင်းသတင်းဌာနများက သတင်းဖော်ပြသည်။ ထိုင်းလေတပ်က ကမ္ဘောဒီးယား စစ်စခန်းကို ဗုံးကြဲတိုက်ခိုက်ခဲ့ပြီး၊ ကမ္ဘောဒီးယားကလည်း ရုရှားထုတ် BM-21 ဒုံးကျည်များဖြင့် ထိုင်းနိုင်ငံထဲသို့ ပြန်လည်ပစ်ခတ်ခဲ့သည် ဟု သိရသည်။

ယနေ့ နံနက် ၈ နာရီဝန်းကျင်အချိန်မှစတင်၍ ထိုင်းစစ်တပ်က ကမ္ဘောဒီးယားနယ်မြေအတွင်းရှိ စစ်စခန်းအဖြစ် အသုံးပြုနေသော ကာစီနိုရုံတစ်ခုကို ဗုံးကြဲချလိုက်ပြီးနောက် ကမ္ဘောဒီးယားဘက်က ဒုံးကျည်များဖြင့် ပြန်လည်ပစ်ခတ်ခဲ့ခြင်းဖြစ်သည်။ ယမန်နေ့ကလည်း နှစ်နိုင်ငံနယ်စပ်တွင် ပစ်ခတ်မှုဖြစ်ပွားခဲ့ပြီး ထိုင်းစစ်သား ၁ ဦးသေဆုံးကာ ၂ ဦး ဒဏ်ရာရရှိခဲ့သည်။

လက်ရှိတွင် ထိုင်းဝန်ကြီးချုပ် Anutin Charnvirakul သည် အငြင်းပွားနေသည့် နယ်စပ်သို့ သွားရောက်မည့် ခရီးစဉ်ကို ဖျက်သိမ်းပြီး လုံခြုံရေးဆိုင်ရာ အရေးပေါ်အစည်းအဝေး ခေါ်ယူနေကြောင်း သိရသည်။ ထိုင်းစစ်တပ်၏ အဆိုအရ ကမ္ဘောဒီးယားက လက်နက်ကြီးများနှင့် အမြောက်များကို နယ်စပ်သို့ ရွှေ့ပြောင်းနေပြီး ထိုင်းနိုင်ငံ၏ လုံခြုံရေးကို ခြိမ်းခြောက်နေကြောင်း သတင်းများက ဆိုသည်။ ထိုင်းအစိုးရသည် ယမန်နေ့ကတည်းက နှစ်နိုင်ငံနယ်စပ်အနီး နေထိုင်သော ထိုင်းပြည်သူများကို ပြောင်းရွှေ့ခိုင်းထားပြီး နယ်စပ်တစ်လျှောက်တွင် ထိုင်းစစ်တပ်က စစ်အင်အားကို တိုးမြှင့်ချထားသည်။

ထိုင်းနှင့် ကမ္ဘောဒီးယားတို့သည် နယ်မြေအငြင်းပွားမှုများကြောင့် ယခုနှစ် မေလတွင် ပစ်ခတ်မှုများ စတင်ဖြစ်ပွားခဲ့ပြီး ဇူလိုင်လ၌ ယာယီအပစ်ရပ်စဲကာ အမေရိကန်၏ စီစဉ်မှုဖြင့် အပစ်အခတ်ရပ်စဲရေး သဘောတူညီချက်ကို လက်မှတ်ရေးထိုးခဲ့ကြသည်။ ယခု စစ်ပွဲများ ပြန်လည်စတင်ဖြစ်ပွားခြင်းမှာ နှစ်နိုင်ငံပစ်ခတ်ရပ်စဲမှုအပြီး ၅ လကျော်အကြာတွင် ဖြစ်သည်။

#ထိုင်း-ကမ္ဘောဒီးယား
#နယ်မြေငြင်းပွားမှုကြောင့်
#စစ်ပွဲတစ်ကျောပြန်ဖြစ်

-Photo Local

03/12/2025

ရွှေကုက္ကို ကျားဖြန့်အဆောက်အဦတစ်လုံးကို စစ်ကောင်စီတပ် စတင်မိုင်းခွဲဖျက်ဆီး

Shan State Channel
ဒီဇင်ဘာ ၃ ရက်၊ ၂၀၂၅ ခုနှစ်။

ကရင်ပြည်နယ်၊ မြဝတီမြို့နယ်အတွင်းမှ နိုင်ငံတကာအထိ နာမည်ဆိုးဖြင့် ကျော်ကြားနေသော ရွှေကုက္ကိုဒေသရှိ အွန်လိုင်းငွေလိမ်ဂိုဏ်း (ကျားဖြန့်) များကို စီးနင်းရှင်းလင်းနေသည့် စစ်ကောင်စီတပ်သည် ရွှေကုက္ကိုရှိ ကျားဖြန့်ဆိုက် အဆောက်အဦတစ်လုံးကို ယနေ့ နေ့လယ် ၁၂ နာရီခန့်၌ စတင်မိုင်းခွဲဖျက်ဆီးခဲ့ကြောင်း ဒေသခံများက ပြောကြားသည်။

ပြီးခဲ့သည့် ဒီဇင်ဘာ ၂ ရက်က စစ်ကောင်စီ ထုတ်ပြန်ချက်အရ ရွှေကုက္ကိုဒေသတွင် တရားမဝင် အဆောက်အဦ (၁၆၉) လုံး စစ်ဆေးတွေ့ရှိခဲ့ရာ စုစုပေါင်း ၁၆၁ လုံးကို ချိပ်ပိတ်သိမ်းဆည်းပြီးဖြစ်ကြောင်း သိရသည်။ ထို့ပြင် ရွှေကုက္ကိုနယ်မြေအတွင်း တရားမဝင် ဝင်ရောက်နေထိုင်သည့် ပြည်ပနိုင်ငံသား ၁,၉၅၄ ဦးနှင့် ကျားဖြန့်လုပ်ရာတွင် အသုံးပြုသော ကွန်ပျူတာ ၃,၃၁၀ လုံး၊ မိုဘိုင်းဖုန်း ၂၁,၈၇၀ လုံး၊ စတားလင့်ခ်ဘန်း ၁၀၂ လုံး၊ Router ၂၂ လုံးနှင့် လုပ်ငန်းသုံးပစ္စည်းအများအပြား ဖမ်းဆီးရမိခဲ့ပြီး ယင်းတို့အား ဖျက်ဆီးရှင်းလင်းခဲ့သည်ဟု ဖော်ပြထားသည်။

စစ်ကောင်စီတပ်များသည် ရွှေကုက္ကိုမတိုင်မီ မြဝတီမြို့တောင်ဘက်ရှိ KK Park ကိုလည်း ပြီးခဲ့သည့် အောက်တိုဘာ ၂၂ ရက်၌ စီးနင်းကာ အောက်တိုဘာ ၂၃ ရက်မှစ၍ မိုင်းခွဲဖျက်ဆီးခဲ့ရာ အဆောက်အဦ ၂၈၈ လုံးကို ဖြိုချဖျက်ဆီးပြီးဖြစ်သည်ဟုလည်း ဆိုထားသည်။

ကရင်နယ်ခြားစောင့်တပ် (BGF) နှင့် ပူးပေါင်း၍ စစ်ကောင်စီက ကျားဖြန့်နှိမ်နင်းရေးအဖြစ် ကျားဖြန့်ဆိုက်များအား စီးနင်းခြင်း၊ ပစ္စည်းနှင့် အဆောက်အဦတို့ကို ဖျက်ဆီးပြနေခြင်းသည် အရေးကြီးသက်သေများကို ‌ဖျောက်ဖျက်နေခြင်းဖြစ်သည်ဟု ဝေဖန်မှုများလည်း ရှိနေသည်။

#ရွှေကုက္ကို
#ကျိားဖြန့်အဆောက်အဦး
#စစ်ကောင်စီ
#မိုင်းခွဲဖျက်စီး

-Photo Local

Shan State Channel

05/01/2026

30/12/2025

26/12/2025

11/12/2025

10/12/2025

09/12/2025

08/12/2025

03/12/2025

Address

Website

Alerts

Shortcuts

Share