Yoma News, ပြည်ဝောာ်သာ, Magway (2025)

Q: What is the address?

ပြည်ဝောာ်သာ

14/12/2023

ဂန့်ဂေါမြို့မရဲစခန်းက ရဲတစ်ဦး ABSDF ထံ ယနေ့အလင်းဝင်

ရိုးမ
ဒီဇင်ဘာ (၁၄) ၊ ၂၀၂၃။

ဂန့်ဂေါမြို့မရဲစခန်းမှ ရဲတပ်သားတစ်ဦး ယနေ့နံနက်က အလင်းဝင်လာကြောင်း မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) က ထုတ်ပြန်ထားသည်။

အဆိုပါရဲတပ်သားသည် ABSDF ယောဒေသစခန်းသို့ အလင်းဝင်လာခြင်းဖြစ်ပြီး ၇.၆၂ မီလီမီတာ ကျည်အတောင့် ၅၀ ယူဆောင်လာကြောင်း သိရသည်။

လက်ရှိအချိန်၌ စစ်ဆေးမေးမြန်းမှုများပြုလုပ်လျှက်ရှိပြီး လုံခြုံသည့်နေရာသို့ ပို့ဆောင်ထားကြောင်းသိရသည်။

09/12/2023

ဟင်းရှာထွက်သည့်ရဲ ၂ ဦးကို ကင်းလှည့်နေသည့် ပကဖ များ ဖမ်းဆီးနိုင်ခဲ့

ရိုးမ
ဒီဇင်ဘာ (၉) ၊၂၀၂၃။

မကွေးတိုင်း၊ ပေါက်မြို့နယ်နှင့် ပခုက္ကူနယ်အကြား စစ်ကောင်စီတပ်အထိုင်ချသည့် သာကြီးတောင် ရေနံမြေစခန်းမှ ရဲတပ်သား ၂ ဦးကို လက်နက်များနှင့်အတူ ဖမ်းဆီးရမိသည်ဟု ပေါက်မြို့နယ် ပြည်သူ့ကာကွယ်ရေးတပ်ဖွဲ့မှ ထုတ်ပြန်သည်။

ဒီဇင်ဘာ ၈ ရက် နံနက်ပိုင်းက အသက် ၃၀ ကျော်အရွယ် ရဲတပ်သား၂ ဦး ဟင်းရှာထွက်ချိန် ကင်းလှည့်သည့် ပြည်သူ့ကာကွယ်ရေးတပ်ဖွဲ့များနှင့် တွေ့ပြီး ဖမ်းမိခဲ့ခြင်းဖြစ်သည်ဟု ဆိုသည်။

၎င်းရဲတပ်သား ၂ ဦးနှင့်အတူ G3 - ၂ လက်၊ ကျည်ဘောက် - ၄ခု၊ ကျည် -၃၀၀ တောင့်၊ ဓား -၂ ချောင်း၊ လက်ထိပ် -၁ ခု၊ ဖုန်း -၂ လုံး သိမ်းမိခဲ့ကြောင်း သိရသည်။

ဖမ်းဆီးရမိသော ရဲတပ်သား ၂ ဦး ကိုစစ်သုံ့ပန်း ဥပဒေနှင့်အညီ ထိန်းသိမ်းထားသည်ဟု ဆိုသည်။

05/12/2023

ဆိပ်ဖြူရှိ ကန်ဇွန်းမရဲစခန်းကို တော်လှန်ရေးတပ်ဖွဲများ ဝင်ရောက်စီးနင်း၊ နယ်ထိန်းအိမ်ကို မီးရှို့နိုင်ခဲ့ပြီး စစ်ကောင်စီဘက်က (၂၀) ခန့်သေဆုံးထိခိုက်

ရိုးမ
ဒီဇင်ဘာ (၅) ၊ ၂၀၂၃။

မကွေးတိုင်း၊ ဆိပ်ဖြူမြို့နယ် ကန်ဇွန်းမ ရဲစခန်းအား ပြည်သူ့ကာကွယ်ရေးတပ်ဖွဲ့များက ဒီဇင်ဘာ (၄) ရက်နေ့ မနက်တွင် ဝင်ရောက်စီးနင်း တိုက်ခိုက်ခဲ့ကြောင်း တိုက်ခိုက်ခဲ့သည့်အဖွဲ့များထံက သိရသည်။

၎င်းတိုက်ခိုက်မှုတွင် တိုက်ပွဲကြာချိန် ၁ နာရီကျော်ကြာမြင့်ခဲ့ပြီး စစ်သား (၅) ဦး၊ ရဲ (၂) ဦး သေဆုံးပြီး (၁၅) ဦးခန့် ထိခိုက်ဒဏ်ရာရရှိကြောင်း ဆိုသည်။

"အရာရှိ ပါမပါ အတည်မပြုနိုင်သေးပါ။အလောင်းရော ပစ္စည်းပါ မကောက်နိူင်ခဲ့ပါ။ နယ်ထိန်းအိမ်ကို တစ်အိမ်လုံးကိုတော့ မီးရှို့နိူင်ခဲ့ပါတယ်။ အပျက်အစီး စုံစမ်းဆဲပဲ" ဟု အမှတ် ၁ စစ်ဒေသ မကွေးတိုင်း ကွပ်ကဲရေးမှ တာဝန်ရှိသူက ရိုးမသတင်းဌာနကို ပြောသည်။

စစ်ကောင်စီ၏ စစ်ကူအင်အား ၁၀၀ ကျော် ရောက်လာသဖြင့် အထိအခိုက်မရှိ ပြန်လည် ဆုတ်ခွာခဲ့သည်ဟု ဆိုသည်။

၎င်းတိုက်ခိုက်မှုကို ပခုက္ကူခရိုင်အမှတ် (၄၊၁၁၊၁၉) တပ်ရင်းများ၊ မင်းဘူးခရိုင်အမှတ် (၁၊၂၊၄၊၅၊၆၊၇) တပ်ရင်းများ၊ Myanmar Defence Force (MDF)၊ ချောက် PDF သခင်ဖိုးလှကြီး တပ်ခွဲ ပူးပေါင်းအင်အားများမှ စခန်းတွင်း ဝင်ရောက် စီးနင်း တိုက်ခိုက်ခဲ့ခြင်းဖြစ်သည်။

လက်ရှိအချိန်၌ စစ်ကောင်စီက စစ်ကြောင်းထိုးရန် ကန်စွန်းမရဲစခန်းတွင် ပြင်ဆင်မှုများ ရှိနေကြောင်းသိရသည်။

ဓာတ်ပုံ - ပြည်သူ့ကာကွယ်ရေး တပ်ဖွဲ့ဝင်များ

05/12/2023

လောင်းကစားဝိုင်းများအနီးမနေကြရန် မင်းဘူး တပ်ရင်း (၇) ယနေ့သတိပေး၊ ပွင့်ဖြူ-ရှောက်တောတံတားဂိတ်ရှိ ယာဉ်ထိန်းရဲများ မိုင်းဆွဲခံရ

ရိုးမ
ဒီဇင်ဘာ (၅) ၊ ၂၀၂၃။

ပြည်သူလူထုအနေဖြင့် စစ်ကောင်စီလက်အောက်ခံများ၊ ဒလန်ဟုသတ်မှတ်ထားသည့် အုပ်ချုပ်ရေးမှူးများနှင့် သတင်းပေးများအနီး မနေထိုင်ကြရန် မင်းဘူးခရိုင် အမှတ်-၇ တပ်ရင်း ယနေ့သတိပေးလိုက်သည်။

ထို့ပြင် လောင်းကစားဝိုင်းများအနီး မနေထိုင်ကြရန်လည်း ထိုတပ်ရင်းက ထုတ်ပြန်ထားသည်။

ယမန်နေ့ ဒီဇင်ဘာ (၄) ရက်နေ့၊ မနက် (၉) နာရီကလည်း ပွင့်ဖြူ-စလင်းလမ်းပိုင်း၊ ပွင့်ဖြူ - ရှောက်တောတံတားဂိတ်ရှိ ယာဥ်ထိန်းရဲများကို ထိုတပ်ရင်းက အချိန်ကိုက် မိုင်းဆွဲ တိုက်ခိုက်ခဲ့ကြောင်း သိရသည်။

"ဒီနေ့တော့ သူတို့မလာတော့ဘူးခင်ဗျ။ထိခိုက်မှုရှိနိုင်ပါတယ်ခင်ဗျ။ စုံစမ်းနေဆဲပါခင်ဗျ" ဟု မင်းဘူးခရိုင် အမှတ်-၇ တပ်ရင်းမှ ပြန်ကြားရေး တာဝန်ခံက ရိုးမ သတင်းဌာနကို ပြောသည်။

၎င်းတိုက်ခိုက်မှုအပြီး ပြည်သူ့ရဲဘော်များ အထိအခိုက်မရှိ ပြန်လည်ဆုတ်ခွာနိုင်ကြောင်းသိရသည်။

05/12/2023

ကန်ရွာရဲစခန်းမှ ထွက်ပြေးသွားသည့် စစ်ကောင်စီ၏ ရဲနှင့်စစ်သားများ လှေစီးလုံးမှောက်ခြင်းကြောင့် သေဆုံးသူ ၅ ဦးထိရှိလာ

ရိုးမ
ဒီဇင်ဘာ ၅ ၊ ၂၀၂၃။

မကွေးတိုင်း၊ ဂန့်ဂေါမြို့နယ်အတွင်းရှိ ကန်ရွာရဲစခန်းမှထွက်ပြေးသည့် ရဲနှင့်စစ်သားများမှာ လှေစီးလုံးမှောက်၍ သေဆုံးသွားခြင်းဖြစ်ကြောင်း ဒေသခံများထံမှ သိရသည်။

အဆိုပါရဲနှင့် စစ်သားများမှာ နိုဝင်ဘာ (၂၇) ရက်နေ့က စခန်းစွန့်၍ထွက်ပြေးသွားခြင်းဖြစ်ပြီး ကနဦးသတင်းများအရ မြစ်သားမြစ်ကို ဖြတ်ကူးခြင်းကြောင့် ရဲ ၂ ဦးသေဆုံးခဲ့သည်ဟု သတင်းများထွက်ပေါ်ခဲ့သည်။

သို့သော် နောက်ဆုံးသိရသည့် သတင်းများအရ လှေနှင့်ဖြတ်ကူးချိန် လှေမှောက်သွားခြင်းကြောင့် နှစ်ပွင့်နှင့် ရဲအရာရှိတစ်ဦးအပါအဝင် ၅ ဦးအထိ သေဆုံးခဲ့ခြင်း ဖြစ်ကြောင်း သိရသည်။

"နောက်ဆုံး အတည်ပြုတာတော့ ၅ လောင်းရတယ်။ ၃ လောင်းကတော့ သေချာတယ်။ ၃ လောင်းကတော့ ရဲပဲ။ ၂ လောင်းကတော့ ရဲလား ဘာလားမသိဘူးဗျ"ဟု ဒေသတွင်းသတင်းများကို ဖော်ပြနေသည့် မင်းဒဿအကောင့်ပိုင်ရှင်က ရိုးမသို့ ပြောသည်။

စခန်းကို စွန့်ခွာချိန်၌လည်း နေမကောင်းသူများကို စခန်းတွင် တစ်ယောက်နှင့် လမ်းတွင်တစ်ယောက် စွန့်ပစ်ထားခဲ့ကြောင်းသိရသည်။

လက်ရှိအချိန်၌ ကန်ရွာရဲစခန်းမှထွက်ပြေးသွားသည့် စစ်ကောင်စီတပ်သားနှင့် ရဲများမှာ ဂန့်ဂေါမြို့နယ်အတွင်းရှိ ခလရ ၅၀ အတွင်းသို့ ဒီဇင်ဘာ ၄ ရက်နေ့ ညနေပိုင်းတွင် ဝင်ရောက်သွားကြောင်းလည်း သိရသည်။

အဆိုပါရဲစခန်းကို ဒေသခံတွင်းတော်လှန်ရေးအဖွဲ့များက မတ်လ ၃၁ ရက်နေ့တွင် တိုက်ခိုက်ခဲ့ပြီး အဆိုပါစခန်းမှ စစ်ကောင်စီတပ်သား ၄၀ ခန့်သေဆုံးခဲ့ဖူးသည်။

ပြီးခဲ့သည့် နိုဝင်ဘာ ၃ ရက်နေ့ကလည်း ဂန့်ဂေါမြို့နယ်တောင်ပိုင်းရှိ မင်းရွာရဲစခန်းကို တော်လှန်ရေးအဖွဲ့များက တိုက်ခိုက် သိမ်းပိုက်ခဲ့သေးသည်။

ထို့ပြင် ဂန့်ဂေါမြို့နယ်အတွင်းရှိ တောင်ခင်ရန်းရဲစခန်းမှ စစ်ကောင်စီတပ်သားများသည်လည်း စခန်းကိုစွန့်ပြီး မြောက်ခင်ရန်းရဲစခန်း၌ ပူးပေါင်းတပ်စွဲထားကြသည်။

ဓာတ်ပုံ - စစ်ကောင်စီတပ်သားများ စွန့်ခွာသွားသည့် ကန်ရွာရဲစခန်း

01/12/2023

ပခုက္ကူခရိုင်၌ ရေခပ်ဆင်းလာသည့် ရဲနှင့်စစ်သားများကိုတိုက်ခိုက်ပြီး သေနတ် ၁ လက်ကို တော်လှန်ရေးအဖွဲ့များ သိမ်းဆည်းနိုင်ခဲ့

ရိုးမ
ဒီဇင်ဘာ( ၁) ၊ ၂၀၂၃။

မကွေးတိုင်း၊ ပခုက္ကူခရိုင် မြစ်ခြေ-စီကောင်း စစ်ကောင်စီ အထိုင်စခန်းမှ ရေခပ်ဆင်းလာသည့် ရဲနှင့် စစ်သားများ တိုက်ခိုက်ခံရပြီး ၂ ဦး သေဆုံးကြောင်း အမှတ်(၁)စစ်ဒေသ၊ မကွေးတိုင်းကွပ်ကဲရေးရုံးမှ သိရသည်။

ယနေ့ နံနက် ၈ နာရီခန့်က အင်အား ၅၀ ခန့်ရှိ မြစ်ခြေ-စီကောင်းအထိုင်စခန်းမှ ရဲနှင့် စစ်သားအချို့ ရေခပ်ဆင်းလာချိန် တိုက်ခိုက်ခဲ့ခြင်း ဖြစ်သည်ဟု ဆိုသည်။

တိုက်ခိုကိမှုအပြီး G3 (၁)လက်၊
ကျည်ဘောက်၂ ခု၊ ကျည် (၈၁) တောင့်၊လက်ပစ်ဗုံး (၁) လုံးနှင့် ဖုန်း (၁) လုံး သိမ်းဆည်းရမိခဲ့ကြောင်းသိရသည်။

"လက်နက်ကောက်ပြီး အလောင်းကို ထားခဲ့ရပါတယ်။ အခုအခြေအနေတော့ အသေးစိတ်မသိရသေးပါဘူး" ဟု မကွေးတိုင်းကွပ်ကဲရေးရုံးမှ တာဝန်ရှိသူ တစ်ဦးက ရိုးမကို ပြောသည်။

အဆိုပါတိုက်ခိုက်မှုကို ပခုက္ကူခရိုင်၊ အမှတ် (၈) တပ်ရင်းမှ တပ်ခွဲမှူး ဦးဆောင်သော အင်အား (၇) ဦး ခန့်မှ ပစ်ခတ် တိုက်ခိုက်ခဲ့ခြင်းဖြစ်ပြီး အထိအခိုက်မရှိ ပြန်လည်ဆုတ်ခွာလာနိုင်ခဲ့ကြောင်း သိရသည်။

01/12/2023

စေတုတ္တရာရှိ စစ်ကောင်စီ၏ လက်နက်စက်ရုံ Rocket များဖြင့်အပစ်ခံရပြီး ယမ်းသိုလှောင်ရုံမီးလောင်

ရိုးမ
ဒီဇင်ဘာ (၁)၊ ၂၀၂၃။

မကွေးတိုင်း၊ စေတုတ္တရာမြို့နယ်အတွင်းရှိ စစ်တပ်၏ ကပစ (၂၀) လက်နက်စက်ရုံကို Rocket အလုံး (၂၀) ဖြင့် ပစ်ခတ်တိုက်ခိုက်မှုတွင် ယမ်းသိုလှောင်ရုံမီးလောင်သွားကြောင်း PRA (Magway) က ယနေ့ထုတ်ပြန်လိုက်သည်။

ယမန်နေ့ နိုဝင်ဘာ (၃၀) ရက်နေ့ ညပိုင်းက MH-60R Rocket အလုံး (၂၀) ဖြင့် ပစ်ခတ်တိုက်ခိုက်ခဲ့ခြင်းဖြစ်ပြီး ထိခိုက်ပျက်စီးမှုများကို စုံစမ်းနေဆဲဖြစ်သည်ဟု ဆိုသည်။

"အဓိကကဝောာ့ ကပစ စက်ရုံတွေက ရန်သူ့လက်နက်ခဲယမ်းရဲ့ ပင်မအရင်းအမြစ်တွေဖြစ်ပါတယ်။အထူးသဖြင့် ကျ‌နော်တို လှုပ်ရှားနေတဲ့ ဒေသမှာ ကပစစက်ရုံတွေအများဆုံးရှိနေတယ်။ ကျည်ဆန်ကနေ စပြီး 122 မစ်ဆိုင်း တွေထိ ထုတ်တဲ့စက်ရုံတွေပေါ့ ။ အဲတော့ မဟာဗျူဟာ ပစ်မှတ်များချေမှုန်းတိုက်ခိုက်ခြင်းဆိုတဲ့ ခေါင်းစဉ်နဲ့ ရန်သူရဲ့ ပင်မအရင်းအမြစ်တွေ၊ ထောက်ပိုယန္တရားတွေ ကို ချေမှုန်းတိုက်ခိုက်ခြင်းဖြစ်ပါတယ်" ဟု PRA (Magway) ၏ စစ်ဦးစီးချုပ် နောင်သူရိန်က ရိုးမသို့ ပြောသည်။

ထိုတိုက်ခိုက်မှုတွင် စက်ရုံဝန်းနှင့် စက်ရုံအဆောက်အဦးများအတွင်း ကျရောက်ပေါက်ကွဲခဲ့ပြီး ယနေ့ နေ့ခင်းပိုင်းအထိ ယမ်းသိုလှောင်ရုံမီးလောင်နေသည်ဟုလည်း မြေပြင်အတည်ပြုချက်များအရ သိရကြောင်း PRA က ဆိုသည်။

ထိုတိုက်ခိုက်မှုကို လူထုတော်လှန်ရေးမဟာမိတ်အင်အားစု PRA(Magway) နှင့် Z-Fighter ပြောက်ကျားတပ်ဖွဲ့တို့ပူးပေါင်းပြုလုပ်ခဲ့ခြင်းဖြစ်ကြောင်း ထုတ်ပြန်ထားသည်။

ယခင်ကလည်း PRA အနေဖြင့် မကွေးတိုင်းအတွင်းရှိ ကပစ ၁၀ နှင့် ကပစ ၁၄ ကို တိုက်ခိုက်ခဲ့ပြီး အတွင်းသတင်းများအရ ပွဲချင်းပြီးသေဆုံးသူများနှင့် ဆေးရုံးရောက်ပြီးနောက်သေဆုံးသူ ဒါဇင်နှင့်ချီ ရှိခဲ့ကြောင်းလည်း သိရသည်။

30/11/2023

သရက်ခရိုင်၌ စစ်တပ်ယာဉ်တန်းမိုင်းဆွဲခံရပြီး စစ်သား (၈) ဦးသေ

ရိုးမ
နိုဝင်ဘာ (၃၀) ၊၂၀၂၃။

မကွေးတိုင်း၊ သရက်ခရိုင်၌ စစ်ကောင်စီကား (၇) စီးပါ ယာဥ်တန်းကို မိုင်းဆွဲတိုက်ခိုက်မှု၌ စစ်သား (၈) ဦး သေဆုံးသွားသည်ဟု အမှတ်(၁)စစ်ဒေသ မကွေးတိုင်းကွပ်ကဲရေးက ယနေ့ ထုတ်ပြန်လိုက်သည်။

နိုဝင်ဘာ (၂၆) ရက်နေ့ နေ့လယ်တွင်
ဧကရာဇ်ကျေးရွာနှင့် ဂွေးချိုကျေးရွာ အကြား မိုင်းဆွဲ တိုက်ခိုက်ခဲ့ခြင်း ဖြစ်သည်ဟု ဆိုသည်။

"သေတာက မျက်မြင်ပါ။ အင်အားတော့ မသိရသေးပါဘူး။ ဒဏ်ရာရတာကိုတော့ မရေတွက်နိူင်ခဲ့ပါဘူး။ လုံခြုံရေးအရ ပြန်လည်ဆုတ်ခွါလာရလို့ပါ" ဟု မကွေးတိုင်းကွပ်ကဲရေးရုံးမှ တာဝန်ရှိသူ တစ်ဦးက ရိုးမသို့ ပြောသည်။

ထို တိုက်ခိုက်မှု၌ စစ်သား ၈ ဦး သေဆုံးသည့်အပြင် အမြောက်အများ ဒဏ်ရာရရှိသည်ဟု ဆိုသော်လည်း ရိုးမသတင်းဌာနအနေဖြင့် သီးခြား အတည်မပြုနိုင်သေးပေ။

၎င်းမိုင်းဆွဲတိုက်ခိုက်မှုကို သရက်ခရိုင် တပ်ရင်း(၅) နှင့် ဆင်ပေါင်ဝဲ (ပကဖ) တို့မှ ပူးပေါင်းဆောင်ရွက်ခဲ့ခြင်းဖြစ်ပြီး ပြည်သူ့ကာကွယ်ရေး ရဲဘော်များအားလုံး အထိအခိုက်မရှိဆုတ်ခွာနိုင်ခဲ့ကြောင်း သိရသည်။

ဓာတ်ပုံ - မကွေးတိုင်းအတွင်းမှ တော်လှန်ရေးအဖွဲ့ဝင်များ၏ လေ့ကျင့်မှု/ပုံပုံဟောင်း

29/11/2023

တော်လှန်ရေးအင်အားစုများသိမ်းပိုက်ထားသည့် မြို့ပေါင်း (၁၃) မြို့အထိရှိလာ

ရိုးမ
နိုဝင်ဘာ (၂၉)၊ ၂၀၂၃။

နိုင်ငံတဝန်းရှိ မြို့ပေါင်း (၁၃) မြို့ကို နိုဝင်ဘာလ ၂၉ ရက်နေ့အထိ တော်လှန်ရေးအင်အားစုများက စစ်ကောင်စီထံမှ သိမ်းယူထားနိုင်ခဲ့သည်။

သိမ်းယူထားသည့်မြို့များမှာ ရှမ်းပြည်နယ်မြောက်ပိုင်းမှ ချင်းရွှေဟော်၊ ကွမ်းလုံ၊ ဖောင်းဆိုင်၊ ကြူကုတ် (ပန်ဆိုင်း)၊ မုံးကိုး၊ နမ့်ခမ်း၊ စစ်ကိုင်းတိုင်းအတွင်းမှ ကောလင်း၊ ခန်းပတ်၊ ရွှေပြည်အေး၊ ချင်းပြည်နယ်အတွင်းမှ ရိဒ်ခေါဒါရ်၊ ရေဇွာ၊ လိုင်လင်းပီ နှင့် ကရင်နီပြည်နယ်အတွင်းမှ မယ်စဲ့မြို့တို့ဖြစ်သည်။

လက်ရှိအချိန်၌လည်း အခြားမြို့များကို အလုံးစုံထိန်းချုပ်နိုင်ရန် တော်လှန်ရေးအင်အားစုများက ကြိုးပမ်းနေပြီး မြို့သိမ်းတိုက်ပွဲအချို့လည်း ဖြစ်ပေါ်နေသည်။

29/11/2023

ချင်းတော်လှန်ရေးအဖွဲ့များက ရေဇွာမြို့ကို ယနေ့သိမ်းပိုက်၊ ချင်းပြည်နယ်အတွင်း စစ်ကောင်စီလက်လွှတ်ရသည့် တတိယမြို့ဖြစ်လာ

ရိုးမ
နိုဝင်ဘာ (၂၉)၊ ၂၀၂၃။

ချင်းပြည်နယ်၊ မတူပီခရိုင်အတွင်းရှိ ရေဇွာမြို့ကို ယနေ့နံနက်တွင် တော်လှန်ရေးအင်အားစုများက အလုံးစုံသိမ်းပိုက်နိုင်ခဲ့ကြောင်း CDF-Zotang က ထုတ်ပြန်လိုက်သည်။

ချင်းပြည်နယ်၊ ဇိုတုန်ဒေသရှိ ရေဇွာမြို့ကို နိုဝင်ဘာလ ၂၆ ရက်နေ့တွင် စတင်တိုက်ခိုက်ခဲ့ခြင်းဖြစ်ပြီး ယနေ့နံနက် ၁၀ နာရီတွင် သိမ်းပိုက်နိုင်ခဲ့ခြင်းဖြစ်ကြောင်း သိရသည်။

သို့သော် အသေးစိတ်အချက်အလက်များကို မထုတ်ပြန်သေးပေ။

ပြီးခဲ့သည့် နိုဝင်ဘာ ၂၄ ရက်နေ့တွင်လည်း မတူပီခရိုင်အတွင်းရှိ လိုင်းလင်းပီမြို့နှင့် နိုဝင်ဘာ ၁၃ ရက်နေ့တွင် ချင်းပြည်နယ်၊ မြန်မာ-အိန္ဒိယနယ်စပ်ရှိ ရိဒ်ခေါဒါရ်မြို့ကို ချင်းတော်လှန်ရေးအဖွဲ့များက သိမ်းပိုက်ခဲ့သေးသည်။

27/11/2023

စစ်တပ်၏တပ်ကြပ်ကြီးတစ်ဦး ကျည်ဆန်ရာချီနှင့်အတူ သေနတ်ပါယူဆောင်ပြီး ပေါက် ပကဖ ထံအလင်းဝင်

ရိုးမ
နိုဝင်ဘာလ (၂၇) ၊ ၂၀၂၃။

ပေါက်-ပကဖအဖွဲ့သို့ နိုဝင်ဘာ၂၆ ရက်နေ့တွင် မကွေးတိုင်း၊ ပခုက္ကူခရိုင်၊ ပေါက်မြို့နယ် ကပစ (၂၄) မှ တပ်ကြပ်ကြီး ထွန်းထွန်း လက်နက်ခဲယမ်းနှင့် ခိုလှုံလာသည်။

လက်နက်ခဲယမ်းများနှင့် အလင်းဝင်လာခြင်းဖြစ်သည့်အတွက် ပေါက် - ပကဖမှ ကျပ်သိန်းတစ်ရာဖြင့် ဂုဏ်ပြုချီးမြင့်ခဲ့သည်ဟု ပေါက်- ပကဖ မှ နိုဝင်ဘာ (၂၆) တွင် ထုတ်ပြန်ထားသည်။

၎င်းနှင့်အတူ MA-3 မောင်းပြန် တစ်လက်၊ ကျည်အတောင့် (၃၀၀) ၊ ကျည်ဘောက် (၃)ဘောက် ၊ လက်ပစ်ဗုံး တစ်လုံးတို့ကို ပါလာသည်ဟု ဆိုသည်။

ကျန်ရှိနေသေးသည့် စစ်သားနှင့် ရဲတပ်ဖွဲ့ဝင်များအနေဖြင့်လည်း အချိန်မီ ပြည်သူ့ရင်ခွင်ခိုလှုံရန် ပေါက် ပကဖ က တိုက်တွန်းထားသည်။

လက်ရှိအချိန်၌လည်း စစ်ကောင်စီ၏ တပ်ရင်းလိုက် အလင်းဝင်မှုများ၊ တစ်ဦးချင်း အလင်းဝင်မှုများမှာ မြန်မာနိုင်ငံအနှံ့တွင် နေစဉ်နီးပါးဖြစ်ပေါ်နေသည်။

27/11/2023

စစ်ကောင်စီဟာ ရှမ်းမြောက်နဲ့ ရှမ်းရှေ့ကို အဆုံးရှုံးခံပြီး မန္တလေးကို ခံစစ်တည်တော့မလား

လှဆောင်

ညီနောင်မဟာမိတ် ၃ ဖွဲ့ရဲ့ ပြောင်မြောက်တဲ့ဗျူဟာကြောင့် ဗိုလ်မင်းအောင်လှိုင်တို့တစ်သိုက် နေပြည်တော်မှာ ခေါင်းမီးတောက်နေမယ်ဆိုတာ ပြေးကြည့်စရာမလိုပါဘူး။ ရုပ်ရှင်ကားတွေထဲကလို မြေပုံကြီးတွေ၊ ပုံစံငယ်အရုပ်လေးတွေနဲ့ ဟိုထောက်ဒီထောက်လုပ်ရင်း အလုပ်လည်းရှုပ်နေမယ်ဆိုတာလည်း အသေအချာပါ။

ညီနောင် ၃ ဖွဲ့ဘက်ကလည်း ၁၀၂၇ စစ်ဆင်ရေး တစ်လပြည့်တဲ့အချိန် တစ်နိုင်ငံလုံးအတိုင်းအတာနဲ့ စစ်ရေးအရှိန်မြှင့်မယ်လို့ ပေါ်တင်ကြေညာထားပြီးသားပါ။ အခုတောင် တစ်နိုင်လုံးနီးနီး တိုက်ပွဲတွေက အရှိန်မြင့်နေတာဖြစ်ပါတယ်။

တကယ်ဆို မင်းအောင်လှိုင်ရဲ့ တပ်ရင်းမှူးတွေ၊ တပ်မမှူးတွေဟာ ၁၀၂၇ စစ်ဆင်ရေး စတင်ပြီး သိပ်မကြာခင်မှာပဲ အခြေအနေအမှန်ကို ရိပ်စားသင့်ခဲ့ပါတယ်။ ဒါပေမဲ့ အသက်တွေသာကြီးလာပြီး ပညာကောင်းကောင်းမတက်တာကြောင့် လာဘ်စားဖို့ပဲသိတဲ့ အဲဒီအောက်ခြေအရာရှိတွေဟာ အသိ သတိ မဆင်ခြင်နိုင်ခဲ့ပါဘူး။ မုံးကိုးမှာ တပ်မမှူးတစ်ယောက် သေဆုံးခဲ့တာကို ကြည့်ရင် အထင်းသားမြင်နိုင်ပါတယ်။

ပြီးခဲ့တဲ့ ရက်ပိုင်းမှာဆိုလည်း ခွန်ဆာလက်နက်ချတုန်းက စစ်တပ်ကမောင်ပိုင်စီးခဲ့တဲ့ မိုင်းကျက်စခန်းကို တော်လှန်ရေးအင်အားစုတွေက သိမ်းနိုင်ခဲ့ပါတယ်။ အဲဒီစခန်းဟာ စစ်တပ်အတွက်တော့ "ဝ" ဘက်ကလာမယ့် ထိုးစစ်ကို ခုခံဖို့ပြင်ထားတဲ့ ရှေ့တန်းခံစစ်စခန်းဖြစ်ပါတယ်။ အဲဒီစခန်းဟာ လားရှိုးမြို့ကို ခြိမ်းခြောက်လာနိုင်တဲ့အတွက် အဓိကအရေးပါတဲ့ နေရာပါ။

အဲဒီစခန်းမကျရေးအတွက် မင်းအောင်လှိုင်ဟာ လေကြောင်းနဲ့လက်နက်ကြီးပစ်ကူ အကြိမ် ၁၀၀ ကျော် ကူညီခဲ့ပေမဲ့ နောက်ဆုံးတော့ TNLA လက်ထဲ ကျရောက်ခဲ့ပါတယ်။ အဲဒီစခန်းမှာရှိတဲ့ တပ်ရင်းမှူးကို TNLA က လက်နက်ချဖို့ အကြိမ်ကြိမ်သတိပေးခဲ့ပေမဲ့ စစ်ကူတောင်းထားတာကြောင့် ခေါင်းမာတဲ့တပ်ရင်းမှူးဟာ တစ်လနီးပါးကြာ ခုခံခဲ့ပါတယ်။

အဲဒီစခန်းဟာ ကုန်းတွင်းပိတ်စခန်းတစ်ခုဖြစ်ပြီး လားရှိုးမြို့နယ်ရဲ့ အရှေ့မြောက်ဘက်၊ သန္နီမြို့နယ်ရဲ့ ရှေ့တောင်ဘက်နဲ့ကွမ်းလုံမြို့နယ်ရဲ့ အနောက်တောင်ဘက်မှာ ရှိပါတယ်။ ဒါပေမဲ့ အဲဒီစခန်းကို စစ်ကူလာနိုင်မယ့်လမ်းကြောင်းတွေဟာ ဖြတ်တောက်ခံထားရပါတယ်။

ဒါကြောင့် လေကြောင်းနဲ့ လက်နက်ကြီးပစ်ကူသာပေးနိုင်ခဲ့ပြီး လက်နက်ခဲယမ်းနဲ့ ရိက္ခာတွေကိုလည်း လေကြောင်းကနေသာ ချပေးနိုင်ခဲ့ပါတယ်။ နောက်ဆုံး TNLA က အဲဒီစခန်းကို သိမ်းမိချိန် မြေမြှုပ်ထားတဲ့ အလောင်း ၅၀ ကျော်တွေ့ရပြီး သိမ်းမိတဲ့လက်နက်တွေဆိုတာ တပ်ရင်းတစ်ရင်းစာမကပါဘူး။

အခုတော့ စစ်ကောင်စီဟာ စစ်တပ်မြို့ဖြစ်တဲ့ ပြင်ဦးလွင်ကတစ်ဆင့် တက်လာတဲ့ စစ်ကြောင်းတွေဟာလည်း သန္နီမြို့ကို ကျော်ဖို့ဆိုတာ မဖြစ်နိုင်သေးပါဘူး။

ဒီအခြေအနေတွေကို သုံးသပ်ကြည့်မယ်ဆိုရင် ဗိုလ်မင်းအောင်လှိုင်တို့တစ်စုဟာ ရှမ်းမြောက်ကို ဘယ်လိုမှ မထိန်းထားနိုင်ဘူးဆိုတာ ပေါ်လွင်နေပေမဲ့ အောက်ခြေက အရာရှိတွေကတော့ ခေါင်းမာနေတုန်းပါ။ ဥပမာပြရရင် နမ့်ခမ်းမြို့နယ်ရဲ့ တောင်ဘက်မှာရှိတဲ့ စခန်းသစ်ကုန်းကို TNLA က အခုထိ မသိမ်းနိုင်သေးပါဘူး။ ဒါပေမဲ့ အနှေးနဲ့အမြန်သိမ်းနိုင်မယ်ဆိုတာကိုတော့ ရဲရဲကြီးပြောရဲပါတယ်။

ဒါ့အပြင် ကိုးကန့်ဒေသက လောက်ကိုင်မြို့ဟာလည်း သိပ်မကြာခင် တော်လှန်ရေးအင်အားစုတွေလက်ထဲ ရောက်မယ်ဆိုတာ သေချာသလောက်ရှိနေပါပြီ။ ဒါဆို စစ်တပ်ဟာ ရှမ်းမြောက်ကို လက်လွှတ်တော့မှာလားဆိုတဲ့ တွေးဆမှုတွေရှိလာပါတယ်။

အာဖဂန်နစ္စတန်၊ ကမ္ဘောဒီးယား စတဲ့ စစ်ပွဲတွေကို ၂၀၀၀ ပြည့်နှစ်မတိုင်ခင်ကတည်းက လေ့လာနေတဲ့ သတင်းထောက် အင်တိုနီ ‌ဒေးဗစ်ကတော့ စစ်ကောင်စီမှာ ရွေးချယ်စရာ ၃ ခုရှိတယ်လို့ ဆိုပါတယ်။

အဲဒါကတော့ (၁) ရှမ်းမြောက်ကို တန်ပြန်စစ်ထိုးဖို့ (၂) လားရှိုးကိုခံစစ်အခိုင်အမာလုပ်ပြီး ပြန်တိုက်ယူဖို့နဲ့ (၃) ရှမ်းပြည်မြောက်ပိုင်းနဲ့ ရှမ်းပြည်အရှေ့ပိုင်းက တပ်တွေကို ရုပ်သိမ်းပြီး မန္တလေးမှာ ခံစစ်အခိုင်အမာ တည်ဆောက်ဖို့ ဖြစ်ပါတယ်။

ဒါပေမဲ့ နံပါတ် (၁) အချက်ဟာ လုံးဝမဖြစ်နိုင်တဲ့အချက်ဆိုတာကို တွေ့ရမှာဖြစ်ပါတယ်။ ဘာကြောင့်လည်း ဆိုတော့ စစ်တပ်ဟာ နိုင်ငံတဝန်း စစ်မျက်နှာအများအပြားကိုး ရင်ဆိုင်နေရပြီး ရခိုင်ပြည်နယ်လို နေရာမျိုးမှာပါ အသေအလဲခုခံကာကွယ်နေရတာကြောင့် အင်အားတွေထုတ်နှုတ်ဖို့ မဖြစ်နိုင်ပါဘူး။ အခုတောင် အင်အား ၁၅၀၀၀ လောက် နေပြည်တော်ကို ပို့ထားပြီး ခုခံစစ်အတွက် စစ်ကောင်စီက ပြင်ထားပါပြီ။

ဒါ့အပြင် တန်ပြန်ထိုးစစ်အတွက် လမ်းကြောင်းဟာ မူဆယ်-မန္တလေး လမ်းကြောင်းတစ်ခုထဲရှိပြီး မြေပြန့်ကနေလာတဲ့ စစ်ကောင်စီစစ်ကြောင်းတွေဟာလည်း အခုထိ သိန္နီမြို့ကို မကျော်နိုင်သေးပါဘူး။ လေကြောင်းကနေ အင်အားတွေ စစ်ကူပေးနိုင်ဖို့ဆိုတာကတော့ စစ်ကောင်စီအတွက် အကန့်အသတ်လုံးဝရှိနေပါတယ်။

ဒုတိယအချက်ဖြစ်တဲ့ လားရှိုးမြို့ကနေ အပီအပြင်ခံစစ်တည်ပြီး ခုခံမှာလားဆိုတာကလည်း ဗိုလ်မင်းအောင်လှိုင်တို့အတွက် တော်တော်အန္တရာယ်များတဲ့ လုပ်ရပ်ဖြစ်ပါတယ်။ အခုအချိန်ထိ မြို့ပေါ်ကို စစ်မီးမကူးသေးတဲ့ မူဆယ်ကို တော်လှန်ရေးအင်အားစုတွေက သိမ်းပိုက်ပြီး အောက်ဆင်းလာမယ်ဆိုရင်တော့ လားရှိုးဟာ သန္နီနဲ့ မူဆယ်ကြားမှာ ပိတ်မိတဲ့အနေအထားဖြစ်သွားမှာပါ။

မှတ်ချက်။ ။ယခုအတွေးအမြင်ဆောင်းပါးသည် အလွတ်တန်းစာရေးသူ ကလောင်ရှင်လှဆောင်၏ အာဘော်သာဖြစ်သည်။

Yoma News

14/12/2023

09/12/2023

05/12/2023

05/12/2023

05/12/2023

01/12/2023

01/12/2023

30/11/2023

29/11/2023

29/11/2023

27/11/2023

27/11/2023

Address

Website

Alerts

Shortcuts

Share

Category