02/08/2026
တစ်ရက်အတွင်း လူ ၅ သောင်းနီးပါးနယ်စပ်ကို အစုလိုက်အပြုံလိုက် ဖြတ်ကျော်စဉ် လူ ၅၀ ကျော် သေဆုံးခဲ့ရပြီးနောက် စပိန်နှင့် မော်ရိုကိုကို အာဏာပိုင်များ အခြေအနေကို ပြန်လည်ထိန်းချုပ်
EPN
နိုင်ငံတကာ၊ ဩဂုတ်-၂ (၂၀၂၆)
စပိန်နိုင်ငံ၏ မြောက်အာဖရိကနယ်မြေတစ်ခုဖြစ်သည့် မယ်လီလာ (Melilla) သို့ မော်ရိုကိုနိုင်ငံဘက်မှ ရွှေ့ပြောင်းအခြေချသူ ၄၉,၀၀၀ ကျော်သည် တစ်ရက်တည်းဖြင့် အစုလိုက်အပြုံလိုက် အတင်းအဓမ္မ တိုးဝှေ့ဝင်ရောက်ရန် ကြိုးပမ်းခဲ့ရာ လူ ၅၀ ကျော် သေဆုံးခဲ့ရပြီးနောက် စပိန်နှင့် မော်ရောကို လုံခြုံရေးတပ်ဖွဲ့များက အခြေအနေကို ပူးပေါင်းထိန်းချုပ်လိုက်ပြီဖြစ်ကြောင်း ရိုက်တာသတင်းတွင် ဖော်ပြထားသည်။
အဆိုပါ ဖြစ်စဉ်သည် အာဖရိကတိုက်မှ ဥရောပသမဂ္ဂ (EU) နယ်မြေအတွင်းသို့ တရားမဝင် ဝင်ရောက်ရန် ကြိုးပမ်းကြသည့် ဖြစ်စဉ်များအနက် သမိုင်းတွင် အကြီးမားဆုံးနှင့် စိုးရိမ်စရာ အကောင်းဆုံး ဖြစ်စဉ်တစ်ခု ဖြစ်လာခဲ့သည်။
နယ်စပ်စည်းရိုးများကို အတင်းအဓမ္မ ကျော်လွှားရန် ကြိုးပမ်းစဉ် ဖြစ်ပေါ်ခဲ့သည့် ရုတ်ရုတ်သဲသဲ တိုးဝှေ့မှုများနှင့် လုံခြုံရေးတပ်ဖွဲ့များနှင့် ထိတွေ့မှုများကြောင့် ထိခိုက်သေဆုံးသူ များပြားခဲ့ရခြင်း ဖြစ်သည်။
ဒေသတွင်း သတင်းဖော်ပြချက်များအရ ရွှေ့ပြောင်းနေထိုင်ရန် ကြိုးပမ်းသူ အများအပြားသည် Facebook ၊ WhatsApp နှင့် TikTok စသည့် လူမှုကွန်ရက် အုပ်စုများတွင် ဖုန်းနံပါတ်များ၊ နယ်စပ်ဖြတ်ကျော်ရေး မြေပုံများနှင့် ခြံစည်းရိုး ကျော်တက်နည်း လမ်းညွှန်ချက်များကို လျှို့ဝှက် မျှဝေခဲ့ကြခြင်းဖြစ်သည်။
အစော်ပိုင်းက မော်ရိုကိုနိုင်ငံ၏ ဖနီးဒက်ခ် (Fnideq) မြို့အနီးတွင် လူအများအပြား စုဝေးခဲ့ကြပြီး အုပ်စုလိုက် စပိန်ပိုင်နက်သို့ ဝင်ရောက်ရန်နှင့် ပင်မစပိန်မြေပြင်သို့ တိုက်ရိုက်သွားရောက်ကာ ခိုလှုံခွင့် (Asylum) တောင်းခံရန် ရည်ရွယ်ခဲ့ကြသည်။
စပိန် အတိုက်အခံ ကွန်ဆာဗေးတစ် ပါတီများဖြစ်သည့် People's Party (PP) နှင့် လက်ယာစွန်း Vox ပါတီ၊ ထို့ပြင် ဒေသခံ ပြည်သူအများအပြားက ယခုဖြစ်စဉ်သည် ဝန်ကြီးချုပ် ပက်ဒရို ဆန်းချက်ဇ်၏ တရားမဝင် ရွှေ့ပြောင်းနေထိုင်သူများအပေါ် လျှော့ပေါ့ပေးလွန်းသည့် မူဝါဒများကြောင့်ဟု စွပ်စွဲပြစ်တင်နေကြသည်။
ဆန်းချက်ဇ် အစိုးရသည် မကြာသေးမီက စပိန်အတွင်း ရောက်ရှိနေသည့် အထောက်အထားမဲ့ ရွှေ့ပြောင်းနေထိုင်သူ ၅ သိန်းနီးပါးအား တရားဝင် နေထိုင်ခွင့် (Amnesty Program/Legalization) ခွင့်ပြုပေးခဲ့ရာ အဆိုပါ မူဝါဒက အာဖရိကဘက်မှ ရွှေ့ပြောင်းနေထိုင်သူများအား စပိန်သို့ ပိုမို ဆွဲဆောင်သကဲ့သို့ ဖြစ်စေခဲ့သည်ဟု အတိုက်အခံ ခေါင်းဆောင် Alberto Núñez Feijóo က ဝေဖန်ခဲ့သည်။
လက်ရှိတွင်စပိန်နှင့် မော်ရိုကို အစိုးရ နှစ်ဘက်စလုံးမှ တာဝန်ရှိသူများ အရေးပေါ် ဆွေးနွေးမှုများ ပြုလုပ်ခဲ့ကြပြီး နယ်စပ်လုံခြုံရေးကို တင်းကျပ်စွာ ပြန်လည်မြှင့်တင်ရန်နှင့် ဖြစ်စဉ်ဖြစ်ပွားရသည့် အကြောင်းရင်းကို ပူးတွဲစုံစမ်းစစ်ဆေးရန် သဘောတူညီခဲ့ကြသည်။
လက်ရှိတွင် နယ်စပ်ဖြတ်ကျော်ရေး စခန်းများကို ယာယီပိတ်ပင်ထားပြီး အခြေအနေများကို ပြန်လည်ထိန်းချုပ်ထားနိုင်ပြီဖြစ်ကြောင်း စပိန် ပြည်ထဲရေးဝန်ကြီးဌာနက ထုတ်ပြန်ထားသည်။
ကိုးကား- Reuters
