13/05/2025
ဒီကနေ့ အင်တာနက် အသုံးပြုတဲ့ အခါမှာ မိမိရဲ့ ဝက်ဘ်ဆိုဒ်၊ မိမိရဲ့ ဝက်ဘ် စာမျက်နှာတွေကို အင်တာနက်ကနေ အချက်အလက်ရှာသူတွေ က မြန်မြန်ဆန်ဆန် မြင်တွေ့ အောင် ဝင်ရောက်ကြည်ရှု့အောင် SEO ကို အသုံးပြုကြရပါတယ်။ အခု AI ကို သုံးလာတဲ့အခါမှာတော့ AEO က မိမိပြောပြချင်တဲ့ Content တွေကို မေးမြန်းသူကို မြန်မြန် တုန့်ပြန်ပေးပါတယ်။
AEO (Answer Engine Optimization) နဲ့ SEO (Search Engine Optimization) နှစ်ခုစလုံးဟာ အွန်လိုင်းမှာ မိမိရဲ့ ဝက်ဘ်စာမျက်နှာကို လူတွေ မြန်မြန်နဲ့ များများ မြင်နိုင်ဖို့ ရည်ရွယ်တဲ့ နည်းပညာများ ဖြစ်ပါတယ်။ SEO နဲ့ AEO တို့ရဲ့ focus ကတော့ မတူပါဘူး။
AEO က အသုံးပြုသူရဲ့ မေးမြန်းချက်တွေအတွက် တိကျတဲ့အဖြေတွေ တိုက်ရိုက်ပေးနိုင်ဖို့ပါ။ အထူးသဖြင့် AI-powered platforms တွေက voice assistant နဲ့ chatbots တွေလိုမျိုး သုံးစွဲသူကို တုန့်ပြန်ဖြေကြားပေးဖို့ပါ။ SEO က သမားရိုးကျရှာဖွေရေးအင်ဂျင် Google လိုမျိုး ရဲ့ရလဒ်စာမျက်နှာတွေ (SERPs) မှာ ဝဘ်ဆိုဒ်တစ်ခုရဲ့ အလုံးစုံအဆင့်သတ်မှတ်မှု နဲ့ လူတွေရဲ့ မြင်နိုင်စွမ်း ပိုကောင်းလာအောင် အထူးပြုလုပ်ပေးပါတယ်။
SEO က ရှာဖွေရေးအင်ဂျင် Google, bing အသုံးပြုသူတွေ က ရိုက်ထည့်လိုက်တဲ့ စာကို အာရုံစိုက်ပြီး AEO က AI နဲ့ လူသားနဲ့ စကားပြောစဉ်မှာ သုံးစွဲတဲ့ စကားစုတွေကို အာရုံစိုက်ပါတယ်။ SEO နဲ့ AEO နှစ်ခုလုံးမှာ keyword ဖွဲ့စည်းပုံကို နားလည်ဖို့ အရေးကြီးပါတယ်။
SEO နဲ့ AEO တွေရဲ့ အဓိက ဦးတည်ချက်နဲ့ လက်ရှိ အရေးပါတာကို နှိုင်းပြပြောရရင်။
SEO (Search Engine Optimization) ကို အဓိက အသုံးပြုတာကတော့ ဝက်ဘ်ဆိုက် (Website) တွေ၊ ဝက်ဘ်စာမျက်နှာ (Webpage) တွေကို Google, Bing စတဲ့ Search Engine တွေနဲ့ ရှာဖွေတဲ့အခါမှာ ရှာဖွေဖေါ်ပြတဲ့ ရလဒ်တွေမှာ ထိပ်ဆုံးမှာ (သို့) ထိပ်ဆုံးနီးပါး မှာ ပေါ်လာအောင် လုပ်ဆောင်ဖို့ပဲ ဖြစ်ပါတယ်။ အင်တာနက်မှာ သုံးစွဲသူတွေက မိမိသိလိုရာအကြောင်းအရာတစ်ခုကို ရှာဖွေတဲ့အခါမှာ အဲ့ဒီအကြောင်းအရာနဲ့ ဆိုင်တဲ့ ဝက်ဘ်ဆိုဒ်တွေထဲက နေ မိမိရဲ့ Website ကို ရှာဖွေသူတွေ အလွယ်တကူ မြင်တွေ့ပြီး ဝင်ရောက်ကြည့်ရှုလာအောင် ဆွဲဆောင်နိုင်ဖို့ အတွက် ဝက်ဘ်ဆိုဒ် ထူထောင်ထားသူတွေက SEO ကို သုံးကြရပါတယ်။
SEO မှာ အဓိက လုပ်ဆောင်ချက်တွေကတော့ "Keyword Research"ပါပဲ၊ လူတွေက ဘယ်စကားလုံးတွေ၊ စကားစုတွေနဲ့ ရှာဖွေတတ်သလဲ ဆိုတာကို ရှာဖွေတာ ဖြစ်ပါတယ်။
"On-Page SEO" မှာ Website စာမျက်နှာတွေရဲ့ ခေါင်းစဉ် (Title)၊ ဖော်ပြချက် (Description)၊ စာသား (Content)၊ ရုပ်ပုံ (Image) တွေမှာ သက်ဆိုင်ရာ Keyword တွေ ထည့်သွင်းတာ၊ Website ရဲ့ တည်ဆောက်ပုံ (Structure) ကို ကောင်းမွန်အောင် ပြုပြင်တာ ၊
"Off-Page SEO" က တခြား Website တွေကနေ ကိုယ့် Website ကို Link ချိတ်တာမျိုး (Backlinks)၊ Social Media တွေမှာ မျှဝေတာမျိုး လုပ်ဆောင်တာ
"Technical SEO" က Website ရဲ့ မြန်နှုန်း (Loading Speed)၊ မိုဘိုင်းဖုန်းနဲ့ ကြည့်ရှုနိုင်မှု (Mobile-friendliness)၊ လုံခြုံရေး (Security) စတာတွေကို ပြုပြင်ပေးတာ ဖြစ်ပါတယ်။
အခု AI ခေတ်မှာ လူသိများလာတဲ့ AEO (Answer Engine Optimization) ရဲ့ အဓိက focus ကတော့ သုံးစွဲသူတွေ မေးခွန်းတွေ မေးတဲ့အခါ သက်ဆိုင်တဲ့အဖြေကို တိုက်ရိုက်ပေးနိုင်ဖို့ပဲ ဖြစ်ပါတယ်။ Search Engine တွေဟာ အခုနောက်ပိုင်းမှာ မေးခွန်းတွေကို ပိုပြီး နားလည်လာပြီး တိုက်ရိုက်အဖြေ (Direct Answer)၊ အထူးပြု ရလဒ် (Featured Snippet)၊ Knowledge Panel စတာတွေနဲ့ ပြန်လည် ဖြေကြားပေးတတ်ပါတယ်။ AEO က ဒီလို တိုက်ရိုက်အဖြေတွေမှာ မိမိရဲ့ Content ပေါ်လာအောင် လုပ်ဆောင်ပါတယ်။ အထူးသဖြင့် ဖုန်းတွေမှာ Voice Search (အသံနဲ့ ရှာဖွေမှု) တွေ ပိုများလာတာနဲ့အမျှ AEO က ပိုပြီး အရေးပါလာပါတယ်။
AEO မှာ လုပ်ဆောင်ရတဲ့ အဓိက အချက်တွေကတော့ "Understanding User Intent" သုံးစွဲသူတွေ ဘာကို သိချင်လို့ ရှာဖွေနေတာလဲဆိုတဲ့ အချက်ကို နားလည်ဖို့ ဖြစ်ပါတယ်။
"Providing Direct Answers" မေးခွန်းတွေအတွက် တိကျပြတ်သားတဲ့ အဖြေတွေကို Content ထဲမှာ ထည့်သွင်းရေးသားတာ။
"Structuring Content" Content တွေကို မေးခွန်းနဲ့အဖြေ ပုံစံ၊ စာရင်း (List) ပုံစံ၊ ဇယား (Table) ပုံစံ စသည်ဖြင့် Search Engine က အလွယ်တကူ နားလည်နိုင်မယ့် ပုံစံမျိုး တည်ဆောက်တာ။
"Using Schema Markup" Search Engine တွေက Content ရဲ့ အဓိပ္ပာယ်ကို ပိုနားလည်စေဖို့ Structured Data (Schema Markup) တွေကို အသုံးပြုတာ။
"Focusing on Conversational Language" လူတွေ အမှန်တကယ် မေးမြန်းပြောဆိုတဲ့ ဘာသာစကားပုံစံမျိုးကို အသုံးပြုတာ ဖြစ်ပါတယ်။
လက်ရှိအချိန်မှာ SEO ထက် AEO ရဲ့ အရေးပါမှုကတော့ သိသိသာသာ မြင့်တက်လာနေပါတယ်။
ဘာကြောင့်လည်း ဆိုရင် "Voice Search"တွေ ၊ Smart Speaker တွေ၊ မိုဘိုင်းဖုန်းတွေကနေ အသံနဲ့ ရှာဖွေသူတွေ များလာပါတယ်။ Voice Search တွေဟာ မေးခွန်းပုံစံနဲ့ ရှာဖွေကြပြီး တိကျတဲ့ အဖြေကို လိုချင်ကြပါတယ်။
"Featured Snippet" တွေရဲ့ လွှမ်းမိုးမှုက အရေးပါပါတယ်။ Google ရဲ့ ရှာဖွေမှုရလဒ်တွေမှာ Featured Snippet တွေက ထိပ်ဆုံးမှာ ပေါ်လာပြီး သုံးစွဲသူတွေ Website ကို ဝင်စရာမလိုဘဲ အဖြေကို တိုက်ရိုက် ရရှိနိုင်ပါတယ်။ ဒါက Website ကို Traffic ရဖို့ SEO လုပ်ဆောင်ချက်ထက် အချက်အလက်ကို တိုက်ရိုက်ပေးနိုင်တဲ့ AEO က ပိုအရေးကြီးလာတာကို ဖေါ်ပြနေပါတယ်။
"User Behavior" ပြောင်းလဲလာကြောင့်လည်း ဖြစ်ပါတယ်။ ဒီကနေ့မှာ သုံးစွဲသူတွေဟာ ရှုပ်ထွေးတဲ့ Website တွေထဲမှာ အဖြေကို လိုက်ရှာနေမယ့်အစား မြန်မြန်ဆန်ဆန်နဲ့ တိကျတဲ့ အဖြေကို လိုချင်လာကြပါတယ်။ ဒီလိုပြောလို့ SEO က လုံးဝ အရေးမပါတော့ဘူးလို့ မဆိုချင်ပါဘူ။ AEO ဟာ SEO ရဲ့ အစိတ်အပိုင်းတစ်ခုလို ဖြစ်လာနေတာပါ။ ကောင်းမွန်တဲ့ AEO ကို လုပ်ဆောင်ဖို့အတွက် အခြေခံ SEO ကောင်းမွန်ဖို့ လိုအပ်ပါတယ်။ သင့် Website က Search Engine က ရှာမတွေ့သေးရင်၊ Website က နှေးနေရင်၊ Mobile နဲ့ ကြည့်လို့ အဆင်မပြေရင် သင့်ရဲ့ Content က ဘယ်လောက်ကောင်းကောင်း Featured Snippet မှာ ပါဖို့ ခက်ခဲပါလိမ့်မယ်။ SEO ကောင်းမှ AEO က ထိရောက်မှာပါ။
SEO ကို ဥပမာပြရရင် "ရန်ကုန်ရဲ့ အကောင်းဆုံး ကော်ဖီဆိုင်များ" လို့ Google မှာ ရိုက်ရှာတဲ့အခါ သင့် Website ထဲမှာ သင် ဖေါ်ပြထားခဲ့တဲ့ ရန်ကုန်မြို့ရဲ့ ကော်ဖီဆိုင်နဲ့ ပတ်သက်တဲ့ Content ကြောင့်သာ Google ရဲ့ ပထမစာမျက်နှာမှာ ပေါ်လာတာပါ၊ ဒါက SEO လုပ်ဆောင်ချက်ပါ။ သုံးစွဲသူက သင့် Website ကို ဝင်ရောက်ကြည့်ရှုပြီးမှ သူလိုချင်တဲ့ ကော်ဖီဆိုင်ကို ရွေးချယ်နိုင်ပါလိမ့်မယ်။
AEO ကို ဥပမာပြရရင် "ကော်ဖီဘယ်လိုဖျော်ရလဲ" လို့ လူတွေ မေးတဲ့အခါ Google က သင့် Website က ကော်ဖီဖျော်နည်းအဆင့်ဆင့်ကို Featured Snippet အနေနဲ့ တိုက်ရိုက် ဖော်ပြပေးတာဟာ AEO လုပ်ဆောင်ချက် ဖြစ်ပါတယ်။ AEO ကြောင့် သုံးစွဲသူက သင့် Website ထဲကို ဝင်စရာမလိုဘဲ Google ရဲ့ ရလဒ်စာမျက်နှာမှာတင် လိုချင်တဲ့ အဖြေကို ရသွားပါလိမ့်မယ်။
AEO နဲ့ SEO ပေါင်းစပ်လုပ်တဲ့ ဥပမာကိုပြရရင် "အဆီကျအောင် ဘယ်လိုလုပ်ရမလဲ" လို့ မေးတဲ့အခါ သင့် Website မှာ အဆီချနည်း အဆင့်ဆင့်ကို အကောင်းဆုံးရေးထားပြီး ဆိုင်ရာ Schema Markup တွေ ထည့်သွင်းပေးထားရင် Google က သင့် Content ကို Featured Snippet အဖြစ်နဲ့ ပြသနိုင်ချေ ပိုများသွားပါတယ်။ ဒါဟာ SEO ရဲ့ အခြေခံကောင်းမှု (Website က ရှာတွေ့ရလွယ်ခြင်း) နဲ့ AEO ရဲ့ တိုက်ရိုက်အဖြေပေးနိုင်မှု (မေးခွန်းရဲ့ အဖြေကို ရှင်းလင်းစွာ ပေးနိုင်ခြင်း) နှစ်ခု ပေါင်းစပ်သွားတဲ့ ရလာဒ် ဖြစ်ပါတယ်။
ဒါကြောင့် ဒီနေ့ Digital ခေတ်မှာ SEO နဲ့ AEO နှစ်ခုစလုံးက အရေးပါ ပါတယ်။ SEO က သင့် Website ကို ရှာဖွေသူတွေဆီ ရောက်အောင် လုပ်ဆောင်ပေးပြီး AEO ကတော့ ရှာဖွေသူတွေရဲ့ မေးခွန်းတွေအတွက် တိကျ မြန်ဆန်တဲ့ အဖြေကို ပေးပါတယ်။ AEO က ပိုအရေးပါလပေမယ့် အခြေခံကောင်းတဲ့ SEO မရှိဘဲ AEO က ရလာဒ်ကောင်းပေးဖို့ ခက်ပါတယ်။ ဒါကြောင့် နှစ်ခုလုံးကို တွဲဖက်ပြီး အကောင်းဆုံး လုပ်ဆောင်သွားဖို့ လိုအပ်ပါတယ်။ ဒီကနေ့ Digital Marketing, Social Media Marketing, Facebook Marketing, TikTok Marketing တွေ လုပ်နေတဲ့သူတွေ၊ လုပ်ကြမယ့်သူတွေက တော့ AEO နဲ့ SEO ကို အကောင်းဆုံး ပေါင်းစပ်နိုင်မှ မိမိလိုချင်တဲ့ ရလာဒ်ကောင်းတွေ ရမှာမို့ လေ့လာအသုံးပြုကြဖို့ တိုက်တွန်းလိုက်ပါတယ်။
U Maung Maung Oo
President, AIBI Myanmar & AIStars Digital Solutions
AI Myanmar Society
