https://www.facebook.com/155534295090163/

Backpacker's Notes - ကျောပိုးအိတ်ခရီးသည်, Pazundaung (2025)

11/07/2025

အမြင့်မကြောက်ပဲ ၊ အမြင့်ကြိုက်တဲ့သူတွေရှိလား❓
ခုပုံထဲကလို အစွန်အဖျားတွေဆိုရင် အတော်များများက ကြောက်ပြီးမသွားရဲကြဘူး။ ကြည့်ရုံနဲ့တင် ဒူးတုန်တယ် ၊ ရင်တွေတုန်တယ်ပေါ့။ ဒါပေမယ့် အဲလိုအစွန်အဖျားတွေ ၊ အမြင့်တွေဆိုရင် တက်ကြည့်လိုက်ရမှ ၊ ချောင်းကြည့်လိုက်ရမှဆိုတဲ့ ကိုယ့်လိုလူတွေကသပ်သပ်ကိုရှိတယ်။

ခုဒီပုံဆိုရင် အဲဒီကျောက်အစွန်းလေးပေါ်မှာ သွားထိုင်ချင်လို့ကို ဘန်ကောက်ကနေ ဖူးခက် ၊ ဖူးခက် ကနေ Krabi ၊ Krabi ကနေမှ (၂) နာရီခွဲလောက်တောင်တက်ပြီးကိုသွားကြည့်တာ။ ဒီလိုမကြောက်တတ်တာ အန္တရာယ်တော့များပေမယ့် အဲလိုအရာသာကိုတော့တကယ်ကြိုက်တယ်။

ကျွန်တော့်လို အစွန်အဖျားတွေကို သဘောကျတဲ့သူတွေရှိလား? ရှိရင် ပုံလေးနဲ့တကွပြောသွားပါဦး

#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

Yours in Adventure
Saw Ko Oo (Backpacker’s Notes)

10/07/2025

ကျွန်တော်ကလောမှာ (၁)နှစ်သွားနေခဲ့တယ်။ ခြံအကျယ်ကြီးကိုမှ ပန်းတွေစိုက်ထားတဲ့ အဖြူရောင်သစ်သားအိမ်လေးမှာငှားနေခဲ့တာပေါ့။ မနက်မနက်ဆိုရင် အိမ်ရှေ့မှာ ငှက်တစ်အုပ်က အမြဲလာလာနှိုးတယ်။ တရုတ်ဆိုင်ကယ်လေးတစ်စီးကို အောင်ပန်းမှာသွားဝယ်ထားတယ် ပြီးရင် မြို့အနှံ့လျှောက်သွားတယ်။ မှတ်မှတ်ရရ ဆိုင်ကယ်ဝယ်တာ လေးသိန်း ၊ ပြင်ခကတော့ နှစ်သိန်းလောက်ကျသွားတယ် xDDDD။

သိပ်လှတဲ့ ကော်ဖီဆိုင်တွေဆိုတာ ကိုယ်အလုပ်လုပ်တဲ့နေရာပေါ့။ ခဏခဏသွားဖြစ်တဲ့ဆိုင်က Cafe Kalaw ပဲ . . . အမေရိကနိုတစ်ခွက်မှာ ၁၀၀၀ ပဲပေးရလို့လေ။ မနက်စောစောမထတတ်တဲ့သူက စျေးနေ့တွေဆိုရင် စောစောထပြီး တောသည်လေးတွေဆီမှာဝယ်၊ စျေးနေ့မှဖွင့်တဲ့ ဆိုင်တွေမှာ မနက်စာစားပေါ့။ ပန်းဆိုင်တွေဆိုလည်း ဝယ်ပါများတော့ မိတ်ဆွေတွေဖြစ်လို့။ ပျင်းရင် ရွာတွေဘက်ကိုသွား သူတို့ဧည့်ခံတဲ့ လဘ္ဘက်သုပ် ၊ ပဲခြမ်း နဲ့ အခါးရည်လေးသောက်ရတဲ့ အချိန်တွေက တကယ့်ဘဝအရသာပါပဲ။ သီးနှံ့ပေါ်ချိန်များဆို ရွာဘက်ကို မသွားရဲဘူး ၊ ပြန်လာရင် အိတ်ကြီးအိတ်ငယ်နဲ့ သူတို့အခင်းက ထွက်တာတွေကို လက်ဆောင်ထည့်ပေးလိုက်ကြတာ။

ခုချိန်ကလောကို အတော်လေးတော့လွမ်းမိသား။ ဘော်ဒါတွေလာတိုင်းသွားဖြစ်တဲ့ ဟိုင်းဘား ၊ ဖွင့်ချင်မှဖွင့်တဲ့ မအေးဝေတို့ဆိုင် ၊ ခွေးလေး (Sunset) ကိုခေါ်ပြီးထိုင်ဖြစ်တဲ့ Wunjo bar ၊ KBZ bank ဘေးက ပုံ့ပုံ့တို့ဆိုင် ၊ စျေးထဲက ဘေထုပ်တန်း . . . . လွမ်းမိတာလေးတွေများတော့ ပုံလေးတွေနဲ့ရေးထားတယ် . . . လိုက်လွမ်းကြည့်ပါ

#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

Yours in Adventure
Saw Ko Oo (Backpacker’s Notes)

27/06/2025

မိုးတွင်းမှာ ဇွဲကပင်ကို တောလမ်းကနေတက်ရတာ ဘာနဲ့မှမတူတဲ့အရသာပါပဲ

#ရုပ်ရှင်ဆန်ဆန်ခရီးသွားခြင်း

27/06/2025

ဖူးခက်က တောင်ပေါ်ကော်ဖီဆိုင်လေးတစ်ဆိုင်ကို အမှတ်မထင်ရောက်ဖြစ်ပါတယ်။ အကြိုက်တူတဲ့သူတွေရှိလားမသိပေမယ့် ကျွန်တော်က မြို့နဲ့ခပ်ဝေးဝေး တောထဲတောင်ထဲမှာဖွင့်ထားတဲ့ဆိုင်တွေဆိုရင် သိပ်သဘောကျတာ။ ဒီဆိုင်လေးဆိုရင် နာရီဝက်လောက်ဆိုင်ကယ်မောင်းပြီးမှသွားရတာ ၊ Kathu ဆိုတဲ့ဘက်ခြမ်းမှာရှိတယ်။ ဆိုင်နာမည်က Baanrai I Talay တဲ့။ တစ်ဆိုင်လုံးက သစ်သားတွေနဲ့ပဲဆောက် ဝါးတွေနဲ့ကာထားတာ ၊ သက်ကယ်မိုးပြီး မြန်မာပြည်မှာဆို ထင်းဖြစ်သွားမယ့် သစ်လုံးတွေနဲ့အလှဆင်ထားတယ်။

ဆိုင်ကတကယ်ကို Minimalism ဆန်ဆန်ပေါ့။ တစ်ဆိုင်လုံးကိုကြည့်လိုက်ရင်လည်း သုံးထားတဲ့အရောင်က သစ်သားရောင် နဲ့ အဖြူရောင်ပဲရှိတယ်။ ကျွန်တော်ကတော့ ဒီလိုအရောင်တွေကို စိတ်ချမ်းသာအရောင်လို့ခေါ်တယ်။ မြင်ရင် စိတ်အေးချမ်းတာကိုး။ နေရာက တောင်ပေါ်မှာဆိုပေမယ့် မြင်ရတဲ့ဗျူးက ဖူးခက်တစ်မြို့လုံးကိုလွှမ်းပြီး ပင်လယ်တစ်ခုလုံးကိုပါမြင်ရတယ်။ နေဝင်ချိန်ဆိုရင် နားကြပ်လေးတပ် Yiruma ရဲ့ River flow in you လေးဖွင့်ပြီးနားထောင်လိုက်ရင် အိမ်တောင်ပြန်ချင်မိမယ်မထင်ဘူး။

အစားအသောက်လေးတွေက သာမန်ဆိုင်တွေထက်တော့ စျေးနည်းနည်းများတယ်။ ပြန်ရတဲ့ အရသာရယ် ၊ Viber ရယ် ၊ ဝန်ဆောင်မှုတွေရယ်နဲ့ပေါင်းရင် တန်တယ်လို့ပြောရမှာပေါ့။ ကိုယ်ကသဘာဝကိုချစ်တယ် ၊ ဆိတ်ငြိမ်တာကြိုက်တယ် ၊ အေးဆေးလေးနေပြီး တောင်ပေါ် နဲ့ ပင်လယ်ရောစပ်ထားတဲ့ Vibe ကိုလိုချင်တယ်ဆိုရင်တော့ ဒီဆိုင်လေးကိုသွားကြည့်ပါလို့ညွှန်းပါရစေ။

#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

Yours in Adventure
Saw Ko Oo (Backpacker’s Notes)

20/06/2025

ဇွဲကပင်တောင်ကို မနက်စောစောတက်စေချင်တာ ဒီလိုမြင်ကွင်းလေးတွေမြင်စေချင်လို့ပါ 🌿

အကောင်းဆုံးအချိန်ကတော့ မနက် ၄ခွဲလောက် တောင်ခြေအရောက်သွားပြီးတက်တာပါပဲ

၅ နာရီလောက်ဆို မိုးစလင်းပြီမို့ စိတ်ပူစရာမလိုပါဘူး ၊ ရာသီဥတုကလည်း မနက်ပိုင်းဆို ချမ်းစိမ့်စိမ့်လေးနဲ့

တောင်ပေါ်တက်နေရင်း တောင်တွေကြားထဲက တိမ်တွေတလှိမ့်လှိမ့်တက်လာတာကိုမြင်ရတာ တကယ်မမေ့နိုင်သောပါပဲ

#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

Yours in Adventure
Saw Ko Oo (Backpacker’s Notes)

19/06/2025

🌋အင်ဒိုမှာ မီးတောင်သွားတက်မလို့ . . . ကျွန်တော်နဲ့အတူ လိုက်ချင်သူတွေရှိရင် လိုက်ခဲ့လို့ရပါတယ်။ ဘယ်သွားမလဲ ဘာညာ လိုတိုရှင်းပြောရရင် Blue Fire တွေရှိပြီး အပြာရောင်အက်ဆစ်ကန်ရှိတဲ့ မီးတောင်ဆီကို ဆာလဖာငွေ့တွေတထောင်းထောင်းကြားက Gas Mask တွေဝတ်ပြီးသွားမှာပါ။ အန္တာရယ်ရှိနိုင်တယ် အခန့်မသင့်ရင် မီးတောင်နှုတ်ခမ်းဝမှာ ဓာတ်ငွေ့တွေကြောင့် ထိုးအန်နိုင်တယ်။ ဒီလောက်တော့ အေးဆေးဆိုရင် ဆက်ဖတ်လို့ရပြီ . . .

ဒီမီးတောင်တစ်ခုတည်းတော့မဟုတ် သွားမယ့်သွား စုံသွားအောင် အငွေတလူလူအမြဲထွက်နေတဲ့ Semeru မီးတောင်အပြင် ၊ အင်ဒိုရဲ့နာမည်အကြီးဆုံး Bromo မီးတောင်ဆီကိုပါ သွားပါမယ်။ ကံကောင်းရင် မီးတောင်ထိပ်ကနေ နေထွက်လာတုန်း အောက် တိမ်ပင်လယ်ကြီးကိုပါ စောက်ရမ်းမိုက်အောင်မြင်ရမှာပါ။

အပြန်မှာတော့ ဂျစ်ကားစီးပြီး မီးတောင်ချော်တွေရှိတဲ့ အနက်ရောင် Lava Tour လုပ်ပါမယ်။ မီးတောင်တက်တဲ့ခရီးစဉ်တွေက ည (၁၂) နာရီတို့ မနက် (၂) နာရီတို့ ထတက်ရမှာမို့ သာမန်ခရီးစဉ်တွေနဲ့ လုံးဝမတူကြောင်းတော့ပြောပါရစေ။

ဒါပြီးရင် ဂူထဲကိုကြိုးတွေဆင်းရတဲ့ ရင်တလှပ်လှပ်ခံစားရစေမယ့် Activity နဲ့ ဂူထဲမှာ Tubing သွားလုပ်ပါမယ်။ ခရီးစဉ်ကို ဘာလီကနေစမယ် 🏝️ ပြီးရင် East Java နဲ့ Central Jave ကို လေယာဉ်တစ်ဆင့် ရထားတစ်ဆင့်သွားကြမယ်။ ဒီလောက်ပါပဲ စွန့်စားရသအပြည့်အဝလိုချင်ရင်လိုက်ခဲ့ပါ . . . .

ကျွန်တော့်ပုံစံအတိုင်း ပေါ့ပေါ့ပါးပါး လွတ်လွတ်လပ်လပ်ပဲသွားဖြစ်မှာပါ။ ခရီးစဉ်ကို အကုန်လုံးဖြစ်ဖြစ် တစ်ပိုင်းချင်းဖြစ်ဖြစ် Join နိုင်ပါတယ်။ Indo ရဲ့ activity တွေက စျေးတော့ အနည်းငယ်များပါလိမ့်မယ်ဗျ။

အများနဲ့သွားတာဖြစ်တဲ့အတွက် ဂဂျီဂျောင်လုပ်တတ်သူ ၊ ပွစိပွစိပြောတတ်သူနဲ့ အိညောင်အိညောင်တွေကတော့ လိုက်ဖို့အဆင်မပြေပါကြောင်းလေးတော့ စကားခံချင်ပါတယ်။

📍ခရီးစဉ်က (၂) ပိုင်းဖြစ်ပြီး တစ်ပိုင်းချင်းစီလိုက်လို့လည်းရပါတယ်။ သွားမယ့်ရက်က July 14-22 ပါ။

🌋မီးတောင်တက်ပြီး Blue fire နဲ့ ချော်ရည်ကြည့်၊ ဂျစ်ကားစီးပြီးလည်ရမှာက East Java ပါ။ 14-18 July က (Bali - East Java) လည်မယ့်ရက်ပါ။

⛰️ဂူထဲကို ကြိုးနဲ့ဆင်းတာ ၊ Tubing လုပ်တာ ၊ Hand pull cable car စီးတာ နဲ့ Borobudur လည်တာက Central Java ပါ။ 20-22 July က (Central Java) လည်မယ့်ရက်ပါ။

ကုန်ကျစရိတ်နဲ့ခရီးစဉ်အသေးစိတ်ကို cb မှာလာမေးပေးပါ။

ကိုယ်တိုင်မလိုက်ဖြစ်လည်း သူငယ်ချင်းတွေလိုက်လို့ရအောင် ဒီပိုစ့်ကိုမျှဝေလို့ရပါတယ် 😎

17/06/2025

လမ်းပြခွေးလေးနဲ့ ဇွဲကပင်တောင်တက်ကြမယ်

16/06/2025

ခရီးသွားရင်း ဒုက္ခလှလှကြုံဖူးကြလား?
ကျွန်တော်ကတော့ မှတ်မှတ်ရရတွေများပါတယ်။

(၁) ရခိုင်က ကျွန်းတစ်ကျွန်းမှာနေတုန်းက သစ်သားအိမ်ဟောင်းတစ်လုံးမှာ စုပြီးအိပ်နေကြတုန်း ကောင်မလေးက စကားမှားပြီး “ဝင်လာလေလို့” ကျွန်တော်ထင်ပြီးလှမ်းခေါ်တာ ၊ တခြားဟာဖြစ်နေပြီး သူ့ကိုဝင်ပူးဖို့ကြိုးစားတာကြုံဖူးတယ်။ အဲဒါပြီး 1/2 ရက်နေတော့ ကျွန်တော်ဖျားပြီး နတ်ဆရာမက နင့်ဂုတ်ပေါ်တက်စီးနေတာဆိုပြီးပြောတာ မှတ်မှတ်ရရပဲ။

(၂) ခရီးသွားနေတုန်း မမြင်ချင်တဲ့မြင်ကွင်းတွေထဲမှာ ကိုယ့်အရှေ့သွေးသံရဲရဲနဲ့ အသက်ဆုံးသွားတဲ့မြင်ကွင်းတွေပါတယ်။ လာအိုကို ဆိုင်ကယ်နဲ့သွားတုန်းက တောင်စောင်းလမ်းတစ်နေရာမှာ လမ်းမပေါ်သွေးတွေစီးကျနေပြီး ၊ အဖြူရောင် (ဦးနှောက်ထင်တာပဲ) ထွက်ကျပြီး သွေးအိုင်ထဲဆက်တငင်ငင်နဲ့လဲနေသူကိုမြင်ဖူးတယ်။

(၃) တစ်ယောက်တည်း ထိုင်းတောင်ပိုင်းမှာ ခရီးသွားနေတုန်း အစာမှားပြီး အထက်လှန်အောက်လျှောဖြစ်တာ တည်းတဲ့ Hostel ရှေ့မှာတောင် ဟန်မဆောင်နိုင်ပဲ လူမြင်ကွင်းမှာ ထိုးအန်ဖူးတယ်။ အဲ့တုန်းက တောင်တက်ပြီးပြန်အလာ တစ်ကိုယ်လုံးဗွက်တွေကပေ ၊ ကျောက်တွေကလည်းခြစ်ထားတော့ အားကကုန်နေပြီ အဲဒါကို တစ်ညလုံး တစ်ယောက်တည်း အန်တာ ဘယ်နှစ်ကြိမ်မှန်းတောင်မမှတ်မိတော့ဘူး။

(၄) ရှေ့အပတ် နီပေါက Tourist မရှိတဲ့မြို့ကိုသွားလည်ရင်း (၁၃) နာရီစီးရမယ့်ကားကို လက်မှတ်ဝယ်တာ အဲကွန်းမပါတဲ့ကားကြီးဖြစ်နေလို့ တစ်ညလုံး ချွေးတစ်လုံးလုံး နံစော်စော်နဲ့ အိပ်လည်းမရခဲ့ဘူး။ ဘေးကခပ်ဝဝနဲ့အနဲက ချွေးတွေရွှဲပြီး အိပ်ပျော်ရင်းနဲ့ ကိုယ့်ဘက်ကိုအိကျလာလို့ တံတောင်နဲ့တွတ်ခဲ့ရသေးတာ။ အဲ့ညက ထမင်းစားနားချိန်မှာ ထမင်းတောင်မစားနိုင်တဲ့အထိပဲ။

(၅) တစ်ခါ ညအိပ်ကားစီးပြီး ရန်ကုန်ပြန်လာတုန်း အနောက်က အမျိုးသမီးတစ်ယောက်က ကားမူးပြီးအန်ချလိုက်တာ သူ့အန်ဖတ်တွေက အရှေ့မှာထိုင်နေတဲ့ ကျွန်တော့်ဖိနပ်တွေ လွယ်အိတ်တွေအကုန်စိုကုန်လို့ တော်တော်စိတ်အနှောက်အယှက်ဖြစ်ခဲ့ဖူးတယ်။ စပယ်ယာကိုပြောပြလို့ အဆင်ပြေအောင်လာသုတ်ပေးပေမယ့် အနောက်က အမျိုးသမီးကတော့ ဆောရီးတစ်ခွန်းတောင်မဆိုခဲ့ဘူး။

(၆) တစ်ခုသော သင်္ကြန်ကာလတုန်းကပေါ့။ ရန်ကုန် ဘားအံပြန်ချင်တာ ကားလက်မှတ်တွေမရလို့ ရထားစီးပြန်မယ်ဆိုပြီး လက်မှတ်သွားဝယ်တာ။ စျေး ၃ ဆပေးရတဲ့အပြင် ရထားပေါ်လည်းရောက်ရော ခုံတွေပြည့်ရုံတင်မက ရထားကြမ်းပြင်ပေါ်မှာထိ ဖျာခင်းပြီးထိုင်နေကြတာ လူတွေကအပြည့်။ တလမ်းလုံးလည်း ပြတင်းပေါက်ဖွင့်စီးရတာဆိုတော့ မနက်သထုံလည်းရောက်ရော လူက လူရုပ်တောင်မထွက်တော့ဘူး။

(၇) ကျောင်းသားဘဝတုန်းက ကျောပိုးအိတ်တစ်လုံးနဲ့သွားခဲ့တဲ့ ပထမဆုံးခရီးဖြစ်တဲ့ ဗီယက်နမ်ခရီးစဉ်ကတော့ တစ်သက်မေ့မရပါဘူး။ မုန့်ဖိုးလေးတွေစုပြီး Budget သွားပါတယ်ဆိုမှ မနက်ဖြန်ရန်ကုန်ပြန်မှာကို ဒီလိုညမှာ ငှါးစီးထားတဲ့ဆိုင်ကယ်က ပျောက်ပါလေရော။ လျော်ဖို့ပိုက်ဆံကလည်း အတူလာတဲ့သူငယ်ချင်းနဲ့ပေါင်းရင်တောင် ဒေါ်လာက ၃၀၀ မပြည့်ဘူး။ အခုထိမှတ်မိသေးတယ်။ အဲဒီညက ထမင်းတောင်စားမဝင်ဘူး။ ဒါပေမယ့် Hostel က ဝန်ထမ်းတွေရဲ့ကူညီပေးမှုနဲ့ညတွင်းချင်းပြန်ရခဲ့တယ်။ ကိုယ်ကဆိုင်ကယ်ခိုးခံထိတယ်ထင်တာ။ တကယ်တော့ ယာဉ်မရပ်ရနေရာမှာရပ်မိလို့ ရဲကဆိုင်ကယ်သိမ်းသွားတာ။ ဘာလို့ရပ်လည်းဆိုတော့ local တွေရပ်တာတွေ့တော့ ၊ ဆိုင်ကယ် အပ်ခမပေးချင်တာနဲ့လိုက်ရပ်တာ။ ခြွေတာလွန်ပြီး မရှိရှိတဲ့ပိုက်ဆံနဲ့ ဗီယက်နမ်ဘဲဥကို လဘ္ဘက်ရည်ဖိုးတောင်ပေးခဲ့ရသေးတယ်။

(၈) အမှတ်အရဆုံးကတော့ ဒီတစ်ခေါက်နီပေါ ခရီးစဉ်ပဲ။ EBC (ဧဝရတ်တောင်ခြေ) ကို (၁၄) ရက်တောင်တက်ဖို့သွားတာ ၊ တောင်မတက်ခင်တစ်ရက်မှာ သွားဖုံးကယောင်ပါလေရော။ ပေ (၁၀၀၀၀) ကျော်အမြင့် ၊ ညညဆို အနုတ်ဒီဂရီထိအေးတဲ့နေရာ ၊ အာဟာရပြည့်အောင်အားမွေးရမယ့် တောင်တက်ခရီးမှာ (၅) ရက်လောက်ဘာမှဝါးမရပဲ ရေတောင်မနည်းမြိုချပြီး တောင်တက်ခဲ့ရတာ။ အဖွဲ့ထဲဆရာဝန်ပါလာလို့သာ တော်သေးတယ်။

ဒီစာဖတ်သူတွေကော ခရီးသွားရင်း ဒုက္ခလှလှတွေ ၊ အဖြစ်ဆိုးတွေကြုံဖူးကြလား?
ကြုံဖူးရင် မျှဝေသွားပါဦး . . . ကျွန်တော်ကတော့ ကောင်းတာ ၊ ဆိုးတာ ဘာပဲကြုံရကြုံရ အတွေ့အကြုံတစ်ခုလို့သတ်မှတ်ပြီးတော့ပဲ ခရီးတွေသွားဖြစ်ပါတယ်.

#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

Yours in Adventure
Saw Ko Oo (Backpacker’s Notes)

14/06/2025

🍀ဘားအံရောက်ရင် လူမသိတဲ့ ဒီတောင်လေးကိုသွားကြည့်စေချင်တယ်။ တောင်ဆိုပေမယ့် မိနစ် (၂၀) လောက်ပဲတက်ရတာဆိုတော့ မပင်ပန်းဘူး။ အပေါ်ကမြင်ရတဲ့မြင်ကွင်းကတော့ လှမလှပုံသာကြည့်တော့။ မြင်နေကြမဟုတ်တဲ့မြင်ကွင်းတွေလည်းမြင်ရသလို ၊ ဘားအံမြို့ထဲဘက် ၊ ဇွဲကပင်တောင်နဲ့ ရာသီဥတုကောင်းရင် မွန်ပြည်နယ်ရဲ့ ဇင်းကျိုက်တောင်တန်းပါမြင်ရသေးတယ်။

နေရာကတော့ ဘားအံရောက်သူတိုင်းရောက်ဖူးကြတဲ့ ကော့ဂွန်းဂူရဲ့အပေါ်တည့်တည့်ပါပဲ။ ဂူအဝင်က အလှူခံတဲလေးရဲ့နောက်မှာ လှေကားရှိတယ် ၊ အဲ့ဒီကနေတက်သွားရင်ရောက်ပါပြီ။ မိုးတွင်းဆို ဂူနားတစ်ဝိုက်စပါးစိုက်ခင်းတွေနဲ့အရမ်းလှတဲ့မြင်ကွင်းကိုမြင်ရမှာပါ ၊ သတိထားရမှာက မိုးတွင်းမို့ လှေကားချောမှာရယ် ၊ ပစ္စည်းတွေမျောက်လုမှာကိုပါပဲ။

လူအများစုက ကော့ဂွန်းဂူဝင်ပြီးတာနဲ့ လှည့်ပြန်ကြတာ . . . ဒီခေါက်တော့ အချိန်လေးခဏပိုပေးပြီး တောင်ပေါ်လေးတက်ကြည့်ခဲ့ကြပါ။

#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

Yours in Adventure
Saw Ko Oo (Backpacker’s Notes)

09/03/2025

ဗီယက်နမ် ဟနွိုင်းမြို့ရဲ့ နာမည်ကြီး Old Quarter မှာ လမ်းလျှောက်ရအောင်

08/03/2025

အလုပ်လုပ်ရင်း ခရီးသွားဖို့စိတ်ကူးရှိသူတွေအတွက် ဒီစာလေးကိုရေးဖြစ်ပါတယ်။ တော်တော်များများလည်း ကျွန်တော့်ကို အကိုဘာအလုပ်လုပ်လို့ ခရီးတွေတောက်လျှောက်သွားနိုင်တာလဲ ဆိုတာမျိုးလည်းအမြဲမေးကြပါတယ်။

ဒီမေးခွန်းတွေရဲ့ အဖြေကို ကျွန်တော်ကိုယ်တိုင်ရဲ့အတွေ့အကြုံရယ် ၊ ခင်ခဲ့မင်ခဲ့တဲ့ ခရီးသွားတွေရဲ့အကြောင်းကို အခြေခံပြီးတော့ လချီ ၊ နှစ်ချီ ဘာကြောင့်ခရီးသွားနိုင်တယ်ဆိုတဲ့ အချက်လေးတွေကို ကျွန်တော်တို့မြန်မာတွေကိုလည်း အဲလိုမျိုးခရီးသွားစေချင်တဲ့စိတ်နဲ့ရေးပါတယ်။

အရင်ဆုံးတစ်ခုပြောချင်တာကတော့ ခရီးသွားရင်းအလုပ်လုပ်ဖို့အတွက် ကိုယ်က Digital Industry (အွန်လိုင်းအလုပ်) လုပ်နေမှမဟုတ်ပါဘူး၊ တခြားကျွမ်းကျင်တဲ့ အလုပ်တွေနဲ့ခရီးသွားကြသူတွေလည်းရှိပါတယ်။

အသေးစိတ်ကို Category ခွဲပြီး ပုံလေးတွေနဲ့ရှင်းပြထားပါတယ်
သိချင်တာတွေရှိရင်လည်း Comment မှာမေးခဲ့လို့ရပါတယ်

Yours in Adventure
Saw Ko Oo (Backpacker’s Notes)
#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

04/03/2025

🛖ခရီးသွားမယ်ဆို တောင်ပေါ်ဒေသနဲ့
တိုင်းရင်းသားလူမျိုးစုတွေရှိတဲ့ဘက်ကို
သွားဖို့ ပိုအားပေးတယ်။
ဘာကြောင့်လည်းဆိုတော့
နောက် (၁၀) နှစ်ဆိုရင် အဲဒီတောင်တွေကော ၊
တိုင်းရင်းသားလူမျိုးစုတွေကော ရှိနေဖို့ မြင်ရဖို့မသေချာတော့ဘူး။

နောက်ဆုံးရှိနေသေးတယ်ထား
တကယ်အစစ်အမှန်ဖြစ်ချင်မှဖြစ်တော့မယ်။
ခုလို အရာရာတိုးတက်လာပြီး Globalisation ဖြစ်နေတဲ့ကာလမှာ
ခုကျန်ရှိနေတဲ့ တိုင်းရင်းသားမျိုးဆက်တွေဆီမှာသာ ရှေးမူမပျက်နေထိုင်တဲ့ တကယ်စစ်မှန်တဲ့ အလေ့အထတွေကိုမြင်နိုင်တော့တာမျိုး။

အရှင်းဆုံးဥပမာပေးရရင် :
နောက်ပိုင်းမှာ ကယန်းအမျိုးသမီးတွေ ကြေးကွင်းတွေမဝတ်ကြတော့ဘူး ၊
သွားမဲတဲ့လူမျိုးတွေမှာလည်းအလေ့အထနည်းလာကြသလို ၊ ပါးမည်းထိုးတဲ့ အလေ့အထလည်းပျောက်ဆုံးသလောက်ဖြစ်နေပြီ။ Culture ကတဖြည်းဖြည်းနဲ့ တစ်သားတည်းဖြစ်လာနေတာ ဒါဟာ မြန်မာတစ်ခုတည်းမဟုတ် တစ်ကမ္ဘာလုံးဒီအတိုင်းပါပဲ။ တချို့နိုင်ငံတွေမှာဆို အထိမ်းအမှတ်နေ့တွေလောက်မှသာ ရိုးရာဝတ်စုံဝတ်ကြတာမျိုးပဲရှိတော့တယ် ၊ ကျန်တဲ့အချိန်တွေဆို သူလိုကိုယ်လိုဝတ်စားနေထိုင်တဲ့ပုံစံဖြစ်သွားပြီ။

ဒါကြောင့် ဒီစစ်မှန်ခြင်းတွေ လုံးလုံးမပျောက်ကွယ်သွားခင်လေးမှာ ကိုယ်လည်းအရွယ်ကောင်းတုန်းလေး ရိုးရာဓလေ့စစ်စစ်တွေကိုမြင်သွားချင်တယ်။ မြင်လည်းမြင်ခဲ့တယ် ဒီထက်ပိုမြင်နိုင်ဖို့လည်းကြိုးစားနေတယ်။

ဒီစာဖတ်နေသူတွေကိုလည်း
မြင်စေချင်တယ် . . .
ကြည့်စေချင်တယ် . . .
တန်ဘိုးထားစေချင်တယ်

ဝေးလံခေါင်ဖျားတဲ့ ဗီယက်နမ်မြောက်ဖက်စွန်း တရုတ်နယ်စပ်နားက Hmong ဘွားဘွားတစ်ယောက်ရဲ့ မြေကြီးနဲ့ဆောက်တဲ့အိမ်နားကိုအလည်ရောက်ရင်း ရေးမိသည်။
(Hmong က မြန်မာပြည်မှာလည်းရှိပါတယ် ၊ မြောင်ဇီးလို့ခေါ်ပါတယ်)

Yours in Adventure
Saw Ko Oo (Backpacker’s Notes)
#မသေခင်ကမ္ဘာကြီးကိုကြည့်သွားမယ်_ကျောပိုးအိတ်လေးလွယ်ပြီးတော့

Backpacker's Notes - ကျောပိုးအိတ်ခရီးသည်

11/07/2025

10/07/2025

27/06/2025

27/06/2025

20/06/2025

19/06/2025

17/06/2025

16/06/2025

14/06/2025

09/03/2025

08/03/2025

04/03/2025

Address

Telephone

Website

Alerts

Contact The Business

Shortcuts

Share

Category