13/09/2025
“ရသစာအုပ်များကို နှစ်ခြိုက်တတ်သော နှလုံးသားလှတဲ့ သီလရှင်လေးများ”
သုတ၊ ရသ နဲ့ ရုပ်ပြစာအုပ် အစုံတင်ဆောင်လာတဲ့ Walking Book ရွေ့လျားစာကြည့်တိုက်ရဲ့ စာအုပ်စက်ဘီးလေးရောက်လာတိုင်း ဖတ်ချင်တဲ့ စာအုပ်တွေကို စိတ်တိုင်းကျ ရွေးချယ်ခွင့်ရတဲ့ သီလရှင်ဆရာလေးတွေရဲ့ အပျော်ဟာ တပါးသူကို ကူးစက်စေပါတယ်။
သီလရှင်အပါး၃၀ ဝန်းကျင်ခန့် သတင်းသုံးနေတဲ့ စစ်ကိုင်းတိုင်း၊ ရေဦးမြို့က အောင်ဇမ္ဗူကျော် သီလရှင်စာသင်တိုက်ကို Walking Book ရွေ့လျားစာကြည့်တိုက်လေးဟာ အပတ်စဉ်ဥပုသ်နေ့တိုင်း စာအုပ်တွေ သွားရောက် ငှားရမ်းပေးနေတာပါ။
Walking Book ရွေ့လျားစာကြည့်တိုက်ကို စာပေအကျိုးသယ်ပိုးလိုတဲ့ ရေဦးမြို့ခံ ဦးစိုးဝေဟန်က ပျိုးထောင်ထားတာဖြစ်ပြီး အိမ်မှာနေရင်း စာအုပ်တွေဖတ်နိုင်ဖို့ ရပ်ကွက်တွေထဲအထိ စာအုပ်များစွာကို စက်ဘီးနဲ့ အပတ်စဉ် ငှားရမ်းပေးနေတာ ဖြစ်ပါတယ်။ သီလရှင်စာသင်တိုက်ထိ စာအုပ်တွေငှားရမ်းပေးဖို့ အကြောင်းဖန်လာပုံက ရပ်ကွက်ထဲမှာ ဆွမ်းဆန်စိမ်း အလှူခံကြွလာတဲ့ စာဂျပိုးသီလရှင်လေးတစ်ပါးကနေ အစပြုခဲ့တာပဲ ဖြစ်ပါတယ်။
“လွန်ခဲ့တဲ့ နှစ်နှစ်ကျော်လောက်က ရပ်ကွက်ထဲကို ရွေးလျားစာကြည့်တိုက်က စက်ဘီးတစ်စီးနဲ့ လှည့်နေတုန်း ဆွမ်းဆန်စိမ်းအလှူခံကြွလာတဲ့ ဆရာလေးတစ်ပါးက မြင်သွားတယ်။ ဆရာလေးက အသက်အရွယ်အားဖြင့် ၂၀ ကျော် ပတ်ဝန်းကျင်လောက်ရှိပါပြီ။ စာလည်းတော်တော်ဖတ်တယ်။ ပညာတတ်လေးလည်း ဖြစ်တယ်။ သူလည်း စာဖတ်တဲ့အကြောင်း၊ စာအုပ်တွေငှားဖတ်ချင်ကြောင်း ပြောရာကနေ ဆန်ခံရင်း စာအုပ်ငှားဖို့ မလွယ်တာကြောင့် သူနေတဲ့ သီလင်ရှင်စာသင်တိုက်ထိ စာအုပ်တွေကို အပတ်စဉ် ငှားပေးဖြစ်သွားတာပါ” လို့ ရေဦးမြို့မှာ Walking Book ရွေ့လျားစာကြည့်တိုက်ကို တည်ထောင်ထားတဲ့ ဦးစိုးဝေဟန်က ပြောပါတယ်။
စာဖတ်ဝါသနာပါတဲ့ သီလရှင်လေးဟာ Walking Book ရွေ့လျားစာကြည့်တိုက်နဲ့ သိပ်မဝေးလှတဲ့ အောင်ဇမ္ဗူကျော်သီလရှင်စာသင်တိုက်က ဖြစ်ပါတယ်။ စာကြည့်တိုက် တည်ထောင်သူ ဦးစိုးဝေဟန်ဟာ သီလရှင်ဆရာလေးတွေ သတင်းသုံးရာနေရာမှာ စာအုပ်တွေ မငှားပေးခင် စာသင်တိုက်က သီလရှင်ဆရာကြီးနဲ့ အရင်တွေ့ပြီး လျောက်ထားတဲ့အခါမှာတော့ ဝမ်းပန်းတသာပဲ ခွင့်ပြုခဲ့ပါတယ်။
“သီလရှင် စာသင်တိုက်ကိုသွားပြီး ဆရာလေးတစ်ပါးရဲ့တောင်းဆိုချက်ကြောင့် တပည့်တော် ဒီမှာလာပြီး စာအုပ်လေးတွေ ငှားပေးချင်တယ်၊ ခွင့်ပြုနိုင်မလားလို့ မေးကြည့်တယ်။ ဆရာလေးက နည်းနည်းစဉ်းစားပြီး စာဝါလည်းမပျက်ဘူး၊ ကျန်တဲ့အလုပ်ကိုင်လည်း မပျက်ရင် ဖတ်ခွင့်ပြုပါတယ်လို့ ပြောပါတယ်။ အဲဒီအချိန်က သီလရှင်ဆရာကြီး ပြောတဲ့စကားတစ်ခွန်း ကျွန်တော်မှတ်မိလိုက်သေးတယ်။ သီလရှင်လေးတွေကို ခေတ်နဲ့အညီ သိစေချင်တယ်။ ကျောင်းတွင်းမှာ ပိတ်မိမနေစေချင်ဘူး။ ဒီလိုသိဖို့ဆို ဖုန်းတွေနဲ့ပဲ အချိန်ကုန်မနေစေဘဲ စာအုပ်တွေ ဖတ်ဖို့လိုကြောင်းပြောတော့ ကျွန်တော်လည်း ပီတိဖြစ်သွားတယ်။ ဒီလိုနဲ့ပဲ သူတို့တွေအားတဲ့ဥပုသ်နေ့တိုင်း တစ်ပတ်တစ်ခါ သူတို့ကြိုက်တဲ့ စာအုပ်တွေ သွားငှားပေးဖြစ်ခဲ့ပါတယ်” လို့ ဦးစိုးဝေဟန်က ပြောပါတယ်။
Walking Book ရွေ့လျားစာကြည့်တိုက်ကို၂၀၂၁ခုနှစ်
နိုဝင်ဘာလမှာ ရေဦးမြို့၊ အောင်မင်္ဂလာရပ်ကွက်က ဦးစိုးဝေဟန်ရဲ့ အိမ်မှာပဲ
ကိုယ်ထူကိုယ်ထဖွင့်ထားတာ ဖြစ်ပါတယ်။ ကလေးတွေကို စာဖတ်စေချင်တဲ့ ဆန္ဒတစ်ခုတည်းနဲ့ သူ့အိမ်ကစာအုပ်တွေကို ငှားရမ်းဖတ်ရှုစေရာကနေ လေးနှစ်အတွင်းမှာ စာဖတ်သူတွေ အားထားရတဲ့ အောင်မြင်သော စာကြည့်တိုက်လေး ဖြစ်တည်လာခဲ့တာပါ။ ခုဆိုရင် စာကြည့်တိုက်မှာ စာအုပ် ၅၀၀၀ ကျော်ထိ တိုးပွားလာခဲ့ပါပြီ။
အောင်ဇမ္ဗူကျော်သီလရှင်စာသင်တိုက်က သီလရှင်ငယ်လေးတွေဟာ ရုပ်ပြစာအုပ်တွေကို နှစ်ခြိုက်ကြပြီး၊ စာဖတ်အားကောင်းတဲ့ ဆယ်ကျော်သက်အရွယ် သီလရှင်လေးတွေကတော့ မိုးမိုး (အင်းလျား)၊ မင်းလူ၊ စိုးထိုက် (ဖဒို) အပါအဝင် နာမည်ကျော် စာရေးဆရာတွေရဲ့ စာအုပ်ကောင်းတွေကို ငှားရမ်းဖတ်ရှုကြပါတယ်။ စာချ သီလရှင်ဆရာကြီးတွေကတော့ ပါချုပ်ဆရာတော်ကြီးနဲ့ ဆရာတော်ဦးဇောတိကတို့ရဲ့စာအုပ်တွေကို ဖတ်ရှုကြပါတယ်။
“စာအုပ်တွေဖတ်ကြတော့ ဆရာလေးတို့မှာ ဖုန်းကိုင်ချိန် နည်းသွားတယ်။ စာအုပ်ကိုယ်စီနဲ့ဆိုတော့ ဆရာကြီးတွေက ထိန်းရတာ လွယ်ကူသွားတယ်။ စာသင်ကြားရေးကအစ ချောမွေ့လာတယ်လို့ သိရပါတယ်” လို့ ဦးစိုးဝေဟန်က ပြောပါတယ်။
တစ်ပတ်တစ်မျိုး မရိုးရအောင် ဖတ်ချင်စရာ စာအုပ်တွေနဲ့ ရုပ်ပြအသစ်တွေပါလာတတ်တဲ့ စာအုပ်စက်ဘီးလေး အလာကို မျှော်ရတာကိုလည်း သီလရှင်လေးတွေက သဘောကျ နှစ်ခြိုက်လို့နေပါပြီ။
(ပုံစာ- ရေဦးမြို့က အောင်ဇမ္ဗူကျော်သီလရှင်စာသင်တိုက်ကို စာအုပ်စက်ဘီးလေးရောက်လာတဲ့အချိန် သီလရှင်လေးများ တိုးဝှေ့ငှားရမ်းနေကြပုံ။ ဓာတ်ပုံများကို Walking Book ရွေ့လျားစာကြည့်တိုက်က ကျေးဇူးပြုပါတယ်။)
