The Standard Time Daily (2025)

25/09/2025

◾️မင်းဘူးရှိအောက်စက်တော်ရာဘုရားဝင်းနှင့် မင်းဘူး-စကုကားလမ်းရေဖုံးလွှမ်းနေ

မကွေးတိုင်း၊ မင်းဘူးမြို့နယ်၌ ယနေ့(စက်တင်ဘာ ၂၅ ရက်) နံနက် ၇ နာရီခန့်မှစတင်ကာမန်းချောင်းရေလျှံခြင်းကြောင့် အောက်စက်တော်ရာဘုရားဝင်းနှင့် မင်းဘူး-စကုကားလမ်းရေဖုံးလွှမ်းကာ လမ်းပိတ်ဆို့မှုများဖြစ်ပေါ်ခဲ့ကြောင်း မီးသတ်တပ်ဖွဲ့ထံမှသိရသည်။

မင်းဘူးမြို့နယ်၌ စက်တင်ဘာ ၂၄ ရက်မှစတင်ကာ မိုးသည်းထန်စွာရွာသွန်းခြင်းကြောင့် မန်းချောင်း အတွင်းရေလျှံခဲ့ပြီး ချောင်းရိုးတစ်လျှောက်ရပ်ကွက်များရှိနေအိမ်များနှင့် လမ်းများတွင် ရေကြီးရေလျှံ ခြင်းများဖြစ်ပေါ်နေခြင်းဖြစ်သည်။

"မနေ့ကတစ်နေ့လုံးမိုးရွာတာ ဒီနေ့မနက်အထိလည်းရွာနေတာ။ မနက် ၇ နာရီကျော်လောက်ကစပြီး အောက်စက်တော်ရာဘုရားအတွင်းနဲ့ မန်းချောင်းတစ်လျှောက်နေအိမ်တွေကို ရေစဝင်လို့ချက်ခြင်း ရေလွတ်ရာကိုကူညီရွှေ့ပြောင်းပေးခဲ့တယ်။ မနက် ၈ နာရီလောက်မှာတော့ မင်းဘူး-စကုကားလမ်းမှာ ရေကြီးနေလို့ ကားသွားလာမှုတွေခက်ခဲပြီး လမ်းပိတ်တာတွေဖြစ်တယ်။ အခုလမ်းရှင်းပေးနေပါတယ်" ဟု ဒေသခံလူမှုကူညီရေးအသင်းမှတာဝန်ရှိသူတစ်ဦးကပြောသည်။

မင်းဘူး-စကုကားလမ်းရေဖုံးလွှမ်းနေသည့်အတွက် မော်တော်ယာဉ်သွားလာမှုများခက်ခဲပြီး လမ်းပိတ် နေသည့်အတွက် ဒေသခံမီးသတ်တပ်ဖွဲ့ဝင်များ၊ လူမှုကူညီရေးအသင်းများပူပေါင်းပြီး ယာဉ်ကြော ရှင်းလင်းရေးများလုပ်ဆောင်ပေးသည့်အပြင် ယာဉ်များအန္တရာယ်မဖြစ်အောင်လည်း လမ်းပြမှုများ လုပ်ဆောင်ပေးနေကြောင်းသိရသည်။

သတင်း - ပိုင်လေး
ဓာတ်ပုံ - MFSD
#ပြည်တွင်းသတင်း

25/09/2025

◾️ဝါရင့်တေးသံရှင်ဗစ်တာခင်ညိုကွယ်လွန်

မြန်မာ့တေးဂီတလောက၏စတီရီယိုခေတ်ဦးတွင် ကျော်ကြားထင်ရှားခဲ့သည့် တေးသံရှင် ဗစ်တာခင်ညို သည်ယနေ့ (စက်တင်ဘာ ၂၅ ရက်) နံနက်ပိုင်းကကွယ်လွန်ခဲ့ကြောင်း ဂီတအသိုင်းအဝိုင်းထံမှသိရသည်။

''ဒီမနက် ၄ နာရီခွဲနဲ့ ၅ နာရီ ကြားလောက်မှာ ဆုံးသွားတာပါ။ နှလုံးရောဂါအခံရှိတယ်။ နောက် လေဖြန်းသလို ဖြစ်ထားတော့ မိသားစုက ဂရုစိုက်ကုသပေးနေတာပါ'' ဟု မိသားစုနှင့်နီးစပ်သူတစ်ဦးက စံတော်ချိန်ဒစ်ဂျစ်တယ် သို့ပြောသည်။

ဗစ်တာခင်ညို ကွယ်လွန်ချိန်တွင် အသက် (၈၀) ရှိပြီ ဖြစ်ပြီး ဈာပနအခမ်းအနားကို စက်တင်ဘာ ၂၇ ရက်တွင် ပြုလုပ်မည်ဖြစ်ကြောင်းသိရသည်။

ဗစ်တာခင်ညိုတေးသီချင်းများထဲတွင်နွေ၊ မြခွာညို၊ ဒီဇင်ဘာနံနက်ခင်း၊ ကြွေရုပ်ကလေးနဲ့ ဒုတိယလူ၊ ငွေတောင်ပြည်ပြန်ခန်း စသည့်သီချင်းများမှာ လူကြိုက်များထင်ရှားသည့်သီချင်းများဖြစ်သည်။

သတင်း - ပိုင်လေး
ဓာတ်ပုံ - ဗစ်တာခင်ညို (fb)
#ပြည်တွင်းသတင်း

25/09/2025

◼ မြန်မာ့တေးဂီတ၏ဂီတရေစီးကြောင်းသဏ္ဌာန် ဂီတအခြေခံတေးဖွဲ့ မှုများ

မြန်မာ့ရုပ်ရှင်ခေတ်ဦးပိုင်း

အသံတိတ်ရုပ်ရှင်ဇာတ်ကားများသာ ထွန်းကားသေးချိန်မှာ လိုအပ်တဲ့ နောက်ခံအသံထွက်တီးလုံးများနဲ့ ဇာတ်ကွက်ဝင်သီချင်းတွေကို သံစုံသွင်းတီးဝိုင်းကြီးများနှင့် သရုပ်ဖော်ပေးခဲ့ရတာပါ။ ထိတ်လန့်ကြောက်ရွံ့ဖွယ်အသံမျိုး၊ အံ့ဩမှင်တက်ဖြစ်ရတဲ့အသံမျိုး၊ တစ်ယောက်နဲ့တစ်ယောက် သတ်ပုတ်တဲ့အခါ ဗိန်းဗောင်းသံမျိုး၊ ချွတ်နင်းသံဆိုတာလည်း ရှိသေးတယ် စသည် စသည်ဖြင့် နောက်ခံတေးဂီတအဖွဲ့က ဇာတ်ကွက်အလိုက် တီးမှုတ်ပေးကြရပါတယ်။

ထိုမှတစ်ဆင့် အသံထွက်ရုပ်ရှင်တွေ ထွန်းကားလာတဲ့အခါ တစ်ခါတည်း အသံဖမ်းပြီးနောက်ခံတီးလုံးများ၊ ပလေးဘက်ခေါ် သရုပ်ပြတေးသီချင်းများ၊ ရုပ်ရှင်ပဏာမတေးများ၊ ဇာတ်သိမ်းသီချင်းများ စသည်ဖြင့် ဂီတမှူးတာဝန်ယူထားသူက စီစဉ်အသံဖမ်းယူကြရပါတယ်။

ရှေးခေတ်ကာလ အသံသွင်းတီးဝိုင်းများနဲ့ တာဝန်ယူတီးခတ်ပေးကြသူ အနုပညာရှင်တွေအကြောင်း လက်လှမ်းမမီပေမယ့် ဆရာရွှေပြည်အေး၊ ဆရာအေဝမ်းခင်မောင်တို့ နောက်ပိုင်း ဂီတမှူးဦးရဲအောင်(တယောဦးဒီပိုး)၊ ဆရာချိုတေးဆက် ကိုအောင်ကိုး၊ ဂီတလုလင်မောင်ကိုကိုတူရိယာအဖွဲ့များက တီးမှုတ်သီဆိုခဲ့ကြကြောင်းတော့ မှတ်သားမိဖူးပါတယ်။

ဂီတလုလင်မောင်ကိုကိုတူရိယာအဖွဲ့ သက်တမ်းရှည်ကြာစွာ ဆောင်ရွက်ခဲ့ဖူးတယ်ဆိုတာကိုလည်း သိမှတ်ရဖူးပါတယ်။ အဲဒီနောက်ပိုင်းမှာတော့ စန္ဒရား ချစ်ဆွေ၊ စန္ဒရားလှထွတ်၊ စန္ဒရားတင်ဝင်းလှိုင်၊ ထရမ်းပက်ဝင်းဦး၊ အကော်ဒီယံ လှဆန်းဦး၊ သိန်းလွင်(ဓနမိုး) စသည်စသည်ဖြင့် အဖွဲ့ပေါင်းများစွာ ပံ့ပိုး တီးခတ် ပေးခဲ့ကြပါတယ်။

ရုပ်ရှင်တေးဂီတဘက်တွင်မက မြန်မာ့အသံနှင့်ရုပ်မြင်သံကြား တေးဂီတ အဖွဲ့တွေမှာလည်း အခြားအဖွဲ့တွေ များပြားလှစွာ တင် ဆက်ကြပါတယ်။ စန္ဒရား ကွန်းမောင်၊ စန္ဒရားကွန်းဇော်၊ စန္ဒရားမောင်သိန်း စသည်ဖြင့်ကျွန်တော် မမှတ်မိနိုင်သော ဂီတမှူးများရဲ့ လက်ရာတေးသံသာများကိုလည်း နားဆင်ခဲ့ရပါတယ်။

ရုပ်ရှင်နောက်ခံတေးများလည်း တီးခတ်ရင်း ဂီတအလုပ်များနှင့် အဆက် မပြတ်အောင် ဖန်တီးဖွဲ့စည်းရင်း တေးစီးရီးများကိုပါ တီးမှုတ်ပေးကြတဲ့ ဝါရင့် တေးဂီတမှူးများ ဖြစ်လာကြပါတယ်။ ဆရာဂီတလုလင်မောင်ကိုကိုရဲ့ ဂီတဝိုင်းနဲ့ ရုပ်ရှင်သီချင်းအသံသွင်းချိန် တချို့ကိုတော့ ကိုယ်တိုင်သွားပြီး နားထောင်ဖူး ပါတယ်။

ဆရာဂီတလုလင်မောင်ကိုကိုရဲ့ ဂီတဝိုင်းမှာ မြန်မာ့ဆိုင်းဝိုင်းနဲ့ဆက်စပ်ရာ တူရိယာတွေအပြင် အနောက်တိုင်းတူရိယာပစ္စည်းတွေဖြစ်တဲ့ လိဒ်ဂီတာ၊ ဘေ့စ်ဂီတာ Rythm ဂီတာ၊ Drum set, Violin, Clarinet, Saxophone စတာတွေလည်း အပြည့်အစုံ ပါဝင်ပါတယ်။

တစ်ခါက ရုပ်ရှင်နောက်ခံအသံသွင်း (Dubbing) လုပ်နေရင်း တီးဝိုင်းကို ဗြုန်းခနဲ တိခနဲ ရပ်ချလိုက်လို့ ဘာများလဲဆိုပြီး အားလုံး ကျီးကြည့်ကြောင်ကြည့် ဖြစ်ကုန်ကြပါတယ်။ နောက်မှ ဆရာဦးကိုကိုက Musician တစ်ယောက်ရဲ့ အသံတစ်သံလိုနေလို့ ဂီတဝိုင်းကို အစက ပြန်တီးခိုင်းပြီး အသံပြန်သွင်းတာလို့ သိလိုက်ရပါတယ်။

သူကိုယ်တိုင်လည်း စန္ဒရားတီးခတ်နေပါလျက်က အသံတစ်သံလျော့နေတာကို ထပ်ခနဲ အချိန်မီသိလိုက်တာ တခြားဘာမှမငဲ့ဘဲ တီးဝိုင်းကိုရပ်ခိုင်းပြီး အစကပြန်စခိုင်းတာ နည်းတဲ့သမ္ဘာမဟုတ်ပါလား။

တူရိယာပညာရှင်အများစုကတော့ ဆရာမောင်ကိုကိုလိုပဲ “နားစောင့်’ အလွန်ကောင်းကြသလား မသိ။ ကျွန်တော့်အဖို့တော့ အံ့ဩတကြီး ဖြစ်ခဲ့ရတာပါ။

ကျွန်တော်နားလည်တတ်ကျွမ်းသမျှလေးနှင့် ဖော်ထုတ်တင်ပြရတာဟာ ဂီတသမားများအတွက် ရယ်စရာဖြစ်ကောင်းဖြစ်နေပေမယ့် တစ်ခေတ် တစ်ခါက အနုပညာရှင်ကြီးများရဲ့ ဝမ်းစာသန္ဓေပြည့်ဝပုံကို အများသိစေလိုတာကြောင့်ဖြစ်ပါတယ်။ မြန်မာ့ဂီတအခြေခံကလေးကိုပဲ မည်မျှခက်ခဲ နူးညံ့သိမ်မွေ့တယ်ဆိုတာ ဆရာဘဘဗိုလ်ကလေးတင့်အောင်နှင့် ဆရာဂီတလုလင်မောင် ကိုကိုတို့နှစ်ဦး ရေးစပ်သီကုံးထားတဲ့ “ဂီတအခြေခံ” သီချင်းကို နားဆင်ကြည့်ရင် သိနိုင်မှာပါ။

ဂီတအခြေခံ
တေးရေး- ဗိုလ်ကလေးတင့်အောင်
တေးသံစဉ်- ဂီတလုလင်မောင်ကိုကို
တေးဆို - ဂီတလုလင်မောင်ကိုကိုအဖွဲ့
### ဂီတအခြေခံသံစဉ်ခုနစ်ပါး လှုပ်ရှားတို့မြူ ××× ကလူကျီစယ်ကာ ခြယ် လှယ် ကွန့်နှော တြောတေတျာနားမှာ စိမ့်စိမ့်ငြိမ့်ငြိမ့်ညောင်းညောင်း ### ပျောင်းနွဲ့ ချိုသံသာ သီချင်းခန့်ကြိုးဘွဲ့တစ်မျိုး နွဲ့တဲ့သံရိုး အကိုးအကားနဲ့ ခိုင်မာစွာ ### တီးကာပြတော်မူစမ်းပါဆရာ
(ပန်တျာကိုကျော်ညွန့်)
စုံသာမြိုင်လယ် လွမ်းဖွယ်တစ်ခန်း ယဉ်ဘုံဗွေထွေ ဆန်းလှသလေး
(မာမာအေး)
လောက နတ်သံပတ်ပျိုးနတ်ဒိုး
တစ်မျိုးစုံစွာ ××× လေးထွေသံကပ် ကိုသာ အောက်ပြန်ညှိ ပြီး ဆိုတီးရမည်သာ
(အေးအေးသွယ်)
ရွေညီတာ ကြာယွန်းဝယ်ပ ရွှေဖီညှာခါ ကျွန်းနယ်က ဆက်ပါ့မယ်လေ သာ ညွှန်းလွယ်ရလေး
(မာမာအေး)
ယိုးဒယားနဲ့ မရိုးရန် တစ်မျိုးအသံထွင်ကာ သဘင်မှာ ယဉ်ရာ တီးမှုတ်ခဲ့ကြတာ တစ်မျိုးတစ်ဖုံသာ ဆန်းတာ ညွန့်တာ ကွန့်တာရွေးလို့ တေးသွား ××× နှဲသွားများနဲ့ ဖွဲ့နွဲ့ သည်တေးရွှင်အေး ကျွန်မတို့ ဆရာ ဦးဗေဒါက အထူးဖွေရှာသမျှ သင်ကြားခဲ့ပေတာ လွမ်းနိုင်ဖွယ်ဆန်း လှိုင်ကြွယ် လွမ်းနိုင်ဖွယ် ဆန်းလှိုင်ကြွယ် ပန်းမြိုင်လယ်ဆိုတဲ့သီချင်းက
(တင်တင်မြ)
ပန်းမြိုင်လယ် သာနယ်ဗွေမျှော်လေတိုင်း ပြာခြေဆိုင်း ဝေမှိုင်းမြူမှုန်ခြယ် အိုဘယ်ဝယ် တောင်စွယ်မှော်ရုံတော လွန်သာမောဖွယ် တောစုံယံမှာ ရွှေ လျှံဝင်းမည့်ထုံမှုန် ခြွေရီဝေရီဝေပြာပြာ လွမ်းဖွယ်စေ
(မာမာအေး)
ရေကင်းသံနဲ့ ဒိန်းသံ,သံတေးထပ်သံများကိုတော့ ငါးပေါက်ညှိပြီး တီးကြ လေရာ
(ကိုမင်းနောင်)
ဆယ်ဆယ်ရောင်ဖြာသည်နှင့်သာ ပယ်မှားပေါင်ခွာ
(တင်တင်မြ)
ဂီတဥပဒေ အထွေထွေများစွာ စည်းကမ်းကလနား လေးစားမှသာ ဂီတ ပညာရှင် ခေါ်တွင်နိုင်တာ တေးတစ်ပုဒ်ကို ရေးထုတ်လိုက်သောအခါ ### စည်းရယ်ဝါးရယ် မမှား ဖွယ်တိကျ သိရပေမှာ
(ကိုမင်းနောင်)
တေးကိုဆိုသူ မှတ်ယူတွေးအပ် လေးရပ်သော××× အကြောင်းအရာ ကာရန်အက္ခရာ မှန်ကန်စွာ ကျက်မှတ်ခါပေးတဲ့အဓိပ္ပာယ် ရေလည်စွာ သိသင့်တာ စည်းဝါးခိုင်မာ ဒီဃရသ မျှတညီ ညွတ်စွာ အသံနေအသံထား ဟန်နေဟန်ထား လှုပ်ရှားယူငင် ဆင်ခြင်တိုင်းထွာ
(မာမာအေး၊ တင်တင်မြ၊ ကိုမင်းနောင်)
ဂီတပ ညာလေ့လာလိုက်စား ထိုသူများဟာ
ပေါ့လျော့စည်းကမ်း စိတ်မှန်းသေချာ
ပရမ်းပတာမဟုတ်ကြောင်း
သိကောင်းစရာ
သင်တိုင်းမတတ်တဲ့ ဒီပညာ ပါရမီရှိမှသာ
လေ့လာကာမှတ်သားသမျှ ဂီတစည်းမျဉ်းသီချင်းပဒေသာ ###

ဝါရင့်အနုပညာရှင်များရဲ့ ပြောင်မြောက်တဲ့သီဆိုမှုများနဲ့ တန်ဆာဆင်ထားတဲ့ ဂီတအခြေခံသီချင်းဟာ စံနမူနာထားစရာ သီချင်းကောင်းတစ်ပုဒ်ဖြစ်ခဲ့ပါတယ်။

အရေး၊ အဆို၊ အတီး ဂီတနယ်ပယ်သားတွေအတွက်လေ့လာနည်းယူစရာ သီချင်းတစ်ပုဒ်ဖြစ်တယ်ဆိုရင် ငြင်းကြလိမ့်မည်မထင်ပါ။ ကျွန်တော်ကတော့ ငယ်စဉ်ကတည်းက မြတ်နိုးတန်ဖိုးထားလေ့လာခဲ့ရတဲ့ သီချင်းတစ်ပုဒ်ပဲ ဖြစ်ပါတယ်။

အလားတူပဲ လေ့လာနည်းယူစရာ နောက်ထပ်တေးသီချင်းတစ်ပုဒ်ကို တင်ပြချင်ပါသေးတယ်။ ဂီတစာဆိုစန္ဒရားလှထွတ်ရဲ့ ဂီတရေစီးကြောင်း အမည်ရတေးပဲဖြစ်ပါတယ်။ ဒီသီချင်းကလည်း ထံတျာကစပြီး သီချင်းတစ်ပုဒ်ဖြစ်လာတဲ့အထိ ရှေးရှေးက ဂီတပညာရှင်ကြီးများက အကြောင်းအကျိုးခိုင်မာစွာ ဖွဲ့စပ်ထားပုံဟာ ငြိမ့်ညောင်းသာယာလှပြီး နားဆင်သူပရိသတ်ရဲ့နားထဲ လျှောခနဲ ဝင်သွားစေပါတယ်။ သီဆိုထားတဲ့သူကလည်း ဂန္ထဝင်တေးသံရှင်ကြီး ရီရီသန့်ဆိုတော့ အထူးပြောစရာ မလိုတော့ပါ။

အဆိုတော်ကြီးရီရီသန့်က ဇာတိ ဝက်လက်မြို့ငယ်ကလေးမှာ တီးဝိုင်းတွေနဲ့ သီချင်းတွေဆိုရင်းနဲ့ ရွှေဘိုနယ်တစ်ကြော မကြီးတင်နာမည်နဲ့ အောင်မြင် လာခဲ့သူဖြစ်ပါတယ်။ ထိုမှ မန္တလေးအနုပညာရွှေမြို့တော်ကြီးကိုရောက်ပြီး စောင်းပညာရှင်ကြီး အင်လေးဦး မြင့်မောင်ထံမှာ ပညာသင်ယူရာမှ မဟာဂီတ သီချင်းကြီး သီချင်းခံများကို ပိုင်ပိုင်နိုင်နိုင် တတ်ကျွမ်းနားလည်သီဆိုအောင်မြင် ခဲ့သူ အနုပညာရှင်ကြီးတစ်ဦးဖြစ်ပါတယ်။ ထိုမှတစ်ဆင့်မြန်မာ့တေးဂီတနယ်ပယ် မှာ ထင်ပေါ်၍ စင်တော်ကောက်ခံရပြီး ဂီတတေးရေးဆရာများရဲ့ တေးလက်ရာ မွန်များဖြင့် မြန်ပြည်အနှံ့ ကျော်ကြားထင်ရှားလာခဲ့သူဖြစ်ပါတယ်။ ဆရာ ဗိုလ် ကလေးတင့်အောင်ရဲ့ “စကားဝါမြေ၊ ဆရာစန္ဒရားလှထွတ်ရဲ့ ‘ဇေယျာကမ်းအလှ ပန်းချီ’ ဆရာကိုသက်ဦးရဲ့ ‘သဲကြီးမဲကြီး၊ ဆရာရွှေပြည်အေးရဲ့ “ချစ်စရာ့ ကိုရွှေတမာ”စသည်ဖြင့် များပြားလှသလို လူကြိုက်များတဲ့ တေးသီချင်းတွေရဲ့ မူရင်းအဆိုရှင်တစ်ယောက်ဖြစ်လာပါတယ်။ မြန်မာသံတေးဂီတလောကအတွက် လည်း အထောက်အကူပြုတေးတစ်ပုဒ်ဖြစ်တဲ့ ဂီတရေစီးကြောင်းသီချင်းကို တင်ပြပေးလိုက်ပါတယ်။

ဂီတရေစီးကြောင်း

တေးရေး - စန္ဒရားလှထွတ်
တေးဆို - ရီရီသန့်
ထံတျာတေတော အခြေခံ ရှေးရှေးတုန်းခေတ်က က ### နန်းဆန်ဆန် မြန်မာမူဟန် တေးဖွဲ့ကြ အမှန်××× ကြားရစေရန် နားဝ ဧကန် နဲ ငြိမ့်ညောင်း လှတဲ့အသံ###
သံရိုးခေတ်မှ ဆန်းရန်ညွန့်ရန် အသံဆန်းတီထွင်ပြန် ဦးဗေဒါဉာဏ် “ထူးပေတာအမှန်’အရိုးကိုခံ ဆန်းသစ်ဖို့ကြံ အရွက်မဖုံးပြန် တစ်သက်လုံး သုံးရန် မြန်မာမူမှန် ဦးလူကလေးရဲ့ ရေးဟန် တကယ်ခေတ်ဆန်းအသံ ××× နန်းတော်ရှေ့ မှန်းမျှော်၍ အသစ်ကိုထွင်ပြန် မြို့မငြိမ်းရဲ့ တေးသီချင်း သံ နားဝင် ငြိမ့်ညောင်း ###
မြို့မငြိမ်းရဲ့ တေးသီချင်းသံ နားဝင်ငြိမ့်ညောင်း မဟောင်းနိုင်ပြန် ဆရာရွှေတိုင်ညွန့်ကျတော့ ### တစ်မျိုးသစ်ဆန်းပြန် တိုးတက်တဲ့ဟန် မျိုးဆက်လည်း မှန်
ဂီတရေစီးကြောင်း ရှင်သန်###
ဆရာရွှေပြည်အေးရဲ့ခေတ်က တေးဂီတသဏ္ဌာန် ###
မြူးမြူးကြွားကြွား တေးသံ ထူးထူးခြားခြားရေးဟန် တီးလုံးတီးကွက် သဏ္ဌာန် ###
အရိုးသံ အဆန်းသံခေတ်ရှေ့ကပြေးတဲ့ အသံ ###
မြန်မာမှုမြန်မာဟန်အရေး နဲ့တေးသီဖွဲ့ဟန် အနောက်တိုင်းဆန်ဆန် အရှေ့တိုင်းဆန်ဆန်ရှင့် ဘယ်လိုပင်ဆန်သော်လည်း ဆရာအေးရေးတဲ့ တေးသံ မြန်မာ့မူဟန် ###
ထူးထူးခြားခြားဆန်းသစ်နေပြန် အမျိုးသားဟန် တိုးပွားရန် တစ်ဖက်မှာ ရွှင်လို့ တစ်ဖက်က ထိန်းရန် မြန်မာ့ဂီတ ညီမျှတဲ့ပုံသဏ္ဌာန် ဆရာရွှေပြည်အေးရဲ့ခေတ်က တေးဂီတသဏ္ဌာန်×××
မြူးမြူးကြွားကြွားတေးသံ ထူးထူးခြားခြား ရေးဟန် တီးလုံးတီးကွက် သဏ္ဌာန်အရိုးသံအဆန်းသံခေတ်ရှေ့ကပြေးတဲ့အသံမြန်မာမှုမြန်မာဟန် အရေးနဲ့တေးသီဖွဲ့ဟန် အနောက်တိုင်းဆန်ဆန် အရှေ့တိုင်း ဆန်ဆန်ရှင့် ဘယ်လိုပင်ဆန်သော်လည်း ဆရာအေးရေးတဲ့တေးသံ မြန်မာ့မူဟန် ထူးထူးခြားခြားဆန်းသစ်နေပြန် အမျိုးသားဟန် တိုးပွားရန် တစ်ဖက်မှာ ရွှင်လို့ တစ်ဖက်က ထိန်းရန် မြန်မာ့ဂီတညီမျှတဲ့ ပုံသဏ္ဍာန် ခေတ်ရဲ့ရေစီးကြောင်းသဏ္ဌာန် အသစ်တွေထွင်ပြန် အကြိုက်နဲ့ စရိုက် လိုက်ဖက်ညီရန် အနှစ်သာရက ပီပြင်စေရန် မြန်မာ့ဂီတသစ် သရုပ် သဏ္ဌာန်ပုံမှန်စေရန် ပြုစုကြ ရေးသားကြ သီဆိုကြမှ တာဝန်ကျေမယ် အမှန်###

သီချင်းတစ်ပုဒ်လုံး အဆုံးသတ်သွားချိန်မှာ တေးသရုပ်ဖော်ကကွက်တစ်ခု ကို ကြည့်ပြီး ကျေနပ်သွားရသလိုမျိုး ခံစားရပြီး အတီးပိုင်းကလည်း မြန်မာဆန် လွန်းလှပါ တယ်။ ရှေးရှေးက ဂီတပညာရှင်ကြီးတွေရဲ့ မြန်မာ့ရိုးရာဂီတအမွေကို မပျောက်ပျက်စေရန် တတ်အားသမျှ ထိန်းသိမ်းကြပါစို့လို့ဂီတ လောကသားများ ကိုယ်စား ဆန္ဒမွန်ပြုလိုက်ရပါတယ်။

ရေးသူ - မောင်ဟံသာ

25/09/2025

◼ အလုပ်သမားသမဂ္ဂများ အားကောင်းလာမှုကြောင့် အမေရိကန်စီးပွားရေးနှင့် နိုင်ငံခြားရေးမူဝါဒအပေါ် သက်ရောက်မှုရှိလာ

အလုပ်သမားသမဂ္ဂများ ပြန်လည်အားကောင်းလာမှုကြောင့် အမေရိကန်ပြည်ထောင်စု၏စီးပွားရေးနှင့် နိုင်ငံခြားရေးမူဝါဒတို့အပေါ် အကျိုးသက်ရောက်မှုများရှိလာနိုင်ကြောင်း အမေရိကန်ပြည်ပဆက်ဆံ ရေးကောင်စီ (စီအက်ဖ်အာရ်) က ထုတ်ပြန်သည့် အစီရင်ခံစာ၌ သုံးသပ်ထားသည်။

၂၀၂၃ ခုနှစ်အတွင်း အမေရိကန်ပြည်ထောင်စုသည် နှစ်ပေါင်းများစွာအတွင်း အပြင်းထန်ဆုံး အလုပ်သမားဆန္ဒပြပွဲများနှင့် ရင်ဆိုင်ခဲ့ရသည်။ အလုပ်သမားသမဂ္ဂများ၌ အဖွဲ့ဝင်အင်အားကာလရှည်ကျဆင်းခဲ့ပြီး လုပ်ခလစာဆိုင်ရာတောင်းဆို ချက်များ ကာလအတန်ကြာ ငြိမ်သက်နေခဲ့ပြီးနောက် ၂၀၂၃ ခုနှစ်မှစ၍ အမေရိကန်ပြည်ထောင်စု၌ အလုပ်သမားသမဂ္ဂများ ပြန်လည်အင်အား ကောင်းလာခဲ့သည်။

ယင်းကဲ့သို့ အလုပ်သမားသမဂ္ဂများ၌လုပ်သားများအားကောင်းလာခြင်းသည် အလုပ်သမားတို့၏ ဩဇာပြန်လည်ဆင်းသက်လာမှု၏ လက္ခဏာဖြစ်ကြောင်း အချို့ပညာရှင်များက သုံးသပ်ထားသည်။

သို့ရာတွင် အလုပ်သမားသမဂ္ဂများဆန္ဒပြလှုပ်ရှားမှုများ မြင့်တက်လာမှုကြောင့် အမေရိကန်ပြည်ထောင်စု၏ ကုန်စည်စီးဆင်းမှု ကွင်းဆက်ခိုင်မာမှု စီးပွားရေးအရ ယှဉ်ပြိုင်နိုင်စွမ်းတို့ ထိခိုက်သွားနိုင်ကြောင်း အချို့စီးပွားပညာရှင်များက သတိပေးထားသည်။ အလားတူ အလုပ်သမားသမဂ္ဂများအား ကောင်းလာမှုသည် အမေရိကန်အစိုးရ၏ နိုင်ငံခြားရေးမူဝါဒအပေါ်တွင်လည်း ပိုမိုဩဇာညောင်းလာနိုင်ကြောင်း ပြည်ပဆက်ဆံရေးကောင်စီအစီရင်ခံစာ၌ ဖော်ပြထားသည်။

လူလတ်တန်းစားအခြေပြု နိုင်ငံခြားရေးမူဝါဒအရ သမ္မတဟောင်းဂျိုးဘိုင်ဒင်သည် ၂၀၂၃ ခုနှစ်အတွင်း ပစ္စဘတ်အခြေစိုက် အမေရိကန်သံမဏိစက်ရုံတစ်ရုံအား ဂျပန်အခြေစိုက် နီပွန်သံမဏိလုပ်ငန်းက ဝယ်ယူရေးအစီအစဉ်ကို အမေရိကန်သံမဏိလုပ်သားများသမဂ္ဂ၏ ကန့်ကွက်မှုကြောင့် ပယ်ဖျက်ပေးခဲ့ရသည်ကို သာဓကအဖြစ်ကျွမ်းကျင်သူများက ထောက်ပြထားသည်။

အလုပ်သမားသမဂ္ဂများ အင်အားကောင်းလာမှုကြောင့် သမ္မတဟောင်း ဂျိုးဘိုင်ဒင်လက်ထက်၌ အလုပ်သမားများကို ဦးစားပေးခဲ့သလို လက်ရှိအမေရိကန်သမ္မတဒေါ်နယ်ထရန့်လက်ထက်တွင်လည်း အလုပ်သမားများကို ဆက်လက်ဦးစားပေးနေဆဲဖြစ်ကြောင်း စီးပွားရေးပညာရှင်များက သုံးသပ်ထားသည်။ အလုပ်သမားသမဂ္ဂများ ကြောင့် အဖွဲ့ဝင်အလုပ်သမားများ အကျိုးကျေးဇူးရှိသော်လည်းစားသုံးသူများ နစ်နာနိုင်ကြောင်း ငြင်းချက် ထုတ်မှုများရှိနေသည့်တိုင် လက်ရှိ အချိန်တွင် အမေရိကန်ပြည်သူများကလည်း အလုပ်သမားများကို မျက်နှာသာ ပိုပေးလာကြောင်း သိရသည်။

ကိုးကား - စီအက်ဖ်အာရ်
ရေး - ကြည်လှ
#နိုင်ငံတကာသတင်း

25/09/2025

#ယနေ့ထုတ်သတင်းစာ_နိုင်ငံတကာသတင်း
◼ ငြိမ်းချမ်းရေးနိုဘယ်ဆုရလိုပါက ဂါဇာစစ်ပွဲကို ဒေါ်နယ်ထရန့် အဆုံးသတ်ပေးရန်လို

အမေရိကန်သမ္မတ ဒေါ်နယ်ထရန့်အနေဖြင့် ငြိမ်းချမ်းရေးနိုဘယ်ဆု ရယူလိုပါက ဂါဇာစစ်ပွဲကိုအဆုံးသတ်ပေးရန်လိုကြောင်း ပြင်သစ်သမ္မတ အီမန်နျူရယ်မက်ခရွန်က စက်တင်ဘာ ၂၃ ရက်တွင် ထုတ်ဖော်ပြောကြားလိုက်သည်။

ဂါဇာစစ်ပွဲကို အဆုံးသတ်ပေးရေးအတွက် အစ္စရေးနိုင်ငံကို ဖိအားပေးနိုင်သောသူမှာ အမေရိကန်သမ္မတ ဒေါ်နယ်ထရန့် တစ်ဦးတည်းသာရှိကြောင်း ပြင်သစ်အခြေစိုက်ရုပ်သံဌာနတစ်ခုနှင့်ပြု လုပ်ခဲ့သော တွေ့ဆုံမေးမြန်းခန်း၌ သမ္မတမက်ခရွန်က ထုတ်ဖော်ပြောကြားခဲ့သည်။

သမ္မတဒေါ်နယ်ထရန့်အနေဖြင့် ယခုနှစ်ငြိမ်းချမ်းရေး နိုဘယ်ဆုကိုရယူလိုပါက ဂါဇာစစ်ပွဲကိုအဆုံးသတ်ပေးနိုင်မှသာလျှင် ရယူနိုင်လိမ့်မည်ဖြစ်ကြောင်း သမ္မတမက်ခရွန်ကသုံးသပ်ထားသည်။

ကမ္ဘောဒီးယား၊ အစ္စရေးနှင့်ပါကစ္စတန်ကဲ့သို့ နိုင်ငံများသည် အမေရိကန်သမ္မတဒေါ်နယ်ထရန့် ကိုယခုနှစ်ငြိမ်းချမ်းရေး နိုဘယ်ဆုရှင်အဖြစ် အမည်စာရင်းတင်သွင်းထားသည်။

၎င်းအနေဖြင့် ယခုနှစ်ငြိမ်းချမ်းရေးနိုဘယ်ဆုဖြင့် ထိုက်တန်သူဖြစ်ကြောင်း သမ္မတဒေါ်နယ်ထရန့်ကိုယ်တိုင်ကလည်း ပြောကြားထားသည်။

ကုလသမဂ္ဂအထွေထွေညီလာခံ၌ စက်တင်ဘာ ၂၃ ရက်က မိန့်ခွန်းပြောကြားရာတွင် ဂါဇာစစ်ပွဲကို အမြန်ဆုံးအဆုံးသတ်နိုင်ရေးအတွက် ကြိုးပမ်းရမည်ဖြစ်ကြောင်း သမ္မတဒေါ်နယ်ထရန့်က ပြောကြားခဲ့သော်လည်း ပါလက်စတိုင်းကို လွတ်လပ်သည့်နိုင်ငံအဖြစ် အနောက်အုပ်စုမဟာမိတ်များက အသိအမှတ်ပြုလာမှုကို ပြင်းပြင်းထန်ထန် ကန့်ကွက်ခဲ့သည်။

အမေရိကန်သမ္မတ ဒေါ်နယ်ထရန့်သည် ကမ္ဘောဒီးယားနှင့် ထိုင်းနယ်စပ် စစ်ရေးပဋိပက္ခအပါအဝင် နိုင်ငံတကာပဋိပက္ခအချို့ ပြီးဆုံးရေးအတွက် ယခုနှစ်အတွင်းကြားဝင်ညှိနှိုင်းပေးခဲ့ ဖူးသည်။

ရိုက်တာ

25/09/2025

#ယနေ့ထုတ်သတင်းစာ_သတင်း
◼ ထိုင်းတွင် ပြစ်ဒဏ်ကျခံပြီး မြန်မာ ၁၄၀ ကျော် ပြန်လည်ပို့ဆောင်

ထိုင်းနိုင်ငံတွင် အကြောင်းအမျိုးမျိုးကြောင့် ပြစ်ဒဏ်ကျခံပြီး လွတ်ရက်စေ့ မြန်မာနိုင်ငံသား ၁၄ဝ ကျော်ကိုစက်တင်ဘာ ၂၃ ရက် နံနက်ပိုင်းက ရေကြောင်းမှတစ်ဆင့် ပြန်လည်လွှဲပြောင်းခဲ့ကြောင်း သိရသည်။

ထိုင်းနိုင်ငံတောင်ပိုင်းရှိရနောင်း လူဝင်မှုကြီးကြပ်ရေးဌာန အနေဖြင့် လွတ်ရက်စေ့မြန်မာနိုင်ငံသား ၁၄ဝ ကျော်ကို ကော့သောင်းမြို့သို့ ရေကြောင်းမှတစ်ဆင့် လွှဲပြောင်းပေးခဲ့ခြင်းဖြစ်ပြီးယင်းကဲ့သို့ ပြန်လည်လွှဲပြောင်းပေးသူများထဲတွင် အမျိုးသား ၁၂၂ ဦး၊ အမျိုးသမီး ၁၈ ဦးနှင့်ကလေးငယ်လေးဦး ပါဝင်ကြောင်း သိရသည်။

ပြီးခဲ့သည့် စက်တင်ဘာ ပထမပတ်အတွင်းကလည်း မြန်မာနိုင်ငံသား ၁၅၀ ကျော်ကိုရနောင်း-ကော့သောင်း ရေလမ်းကြောင်းမှတစ်ဆင့် ပြည်နှင်ဒဏ်လွတ်ငြိမ်းချမ်းသာခွင့်ဖြင့် ပြန်လည်ပို့ဆောင်ခဲ့ကြောင်း သိရသည်။

25/09/2025

#ယနေ့ထုတ်သတင်းစာ_နိုင်ငံတကာသတင်း
◼ အသက်ကယ် အေအိုင် Air Bag စနစ် ဒူဘိုင်းမှ အင်ဂျင်နီယာကျောင်းသားနှစ်ဦး အကောင်အထည်ဖော်နေ

ခရီးသည်လေယာဉ်တစ်စင်း ပျက်ကျချိန်တွင် လူ့အသက်ပေါင်းများစွာကို ကယ်တင်နိုင်မည့် AI Air Bag စနစ်တစ်ခုကို အကောင်အထည်ဖော်နေကြောင်း သိရသည်။

လေယာဉ်တစ်စင်း ပျက်ကျတော့မည့်အချိန်တွင် လေယာဉ်ကိုယ်ထည်အပြင်ဘက်မှ Air Bag ကြီးများ ထွက်လာပြီး လူ့အသက်ပေါင်းများစွာကိုကယ်တင်နိုင်မည်ဖြစ်ပြီး ယင်းမှာ စိတ်ကူးယဉ်ဆန်သည့် သိပ္ပံဇာတ်ကားတစ်ကားကဲ့သို့ အထင်ရှိရသော်လည်း ယခုအချိန်တွင် ဒူဘိုင်းမှအင်ဂျင်နီယာ ကျောင်းသားနှစ်ဦးက 'Project REBIRTH' ဆိုသည့်အမည်ဖြင့် ၎င်းတို့၏ စိတ်ကူးကို လက်တွေ့အကောင်အထည်ဖော်နေကြောင်း သိရသည်။

BITS Pilani Dubai မှ အဆိုပါ အင်ဂျင်နီယာ ကျောင်းသားနှစ်ဦးဖြစ်သည့် Eshel Wasim နှင့် Dharsan Srinivasan တို့သည် လေယာဉ်စီးခရီးသည်ပေါင်းများစွာ၏ အသက်ကို ကယ်တင်နိုင်ရန် ရည်ရွယ်ပြီး Air Bag ကြီးများကို တီထွင်ခြင်းဖြစ်သည်။ ယင်းစနစ်တွင် ပါဝင်သည့် AI သည်လေယာဉ်ပေ ၃ဝဝဝ အောက်သို့ ရောက်ရှိလာပြီး အန္တရာယ်ရှိတော့မည်ဆိုသည်နှင့် နှစ်စက္ကန့်အတွင်း၌ပင် လေယာဉ်အပြင်ဘက်မှ Air Bag ကြီးများက အလိုအလျောက် ဖွင့်ပေးမည်ဖြစ်သည်။

ယခု တီထွင်နေသည့် Air Bag ကြီးများသည် သေနတ်ဒဏ်ကိုပင် ခံနိုင်သည့် Kevlar ကဲ့သို့ အကြမ်းခံပစ္စည်းများဖြင့် ပြုလုပ်ထားပြီး ကွန်ပျူတာစမ်းသပ်ချက်များအရ ပျက်စီးမှုကို ၆၀ ရာခိုင်နှုန်းအထိ လျှော့ချပေးနိုင်ကြောင်း၊ ပျက်ကျပြီးနောက်တွင်လည်း ကယ်ဆယ်ရေးအဖွဲ့များက အလွယ်တကူ ရှာဖွေတွေ့ရှိနိုင်ရန် GPS၊ အနီအောက်ရောင်ခြည်အချက်ပြမီးနှင့် ဆေးရောင်တောက် တောက်လို နည်းပညာများလည်းထည့်သွင်းထားကြောင်း သိရသည်။

လက်ရှိအချိန်တွင် အဆိုပါစီမံကိန်းသည် ရှေ့ပြေးပုံစံငယ်အဆင့်၌သာ ရှိနေသေးပြီးကမ္ဘာကျော် James Dyson Award ပြိုင်ပွဲတွင် ဝင်ရောက်ယှဉ်ပြိုင်နေကြောင်း နှင့် 'ProjectREBIRTH' သာ အောင်မြင်သွားမည်ဆိုပါက လေယာဉ်ပျက်ကျမှုများကို ကြောက်စရာမလိုတော့ကြောင်း သတင်းတွင် ဖော်ပြထားသည်။

Source; Fossbytes

25/09/2025

#ယနေ့ထုတ်သတင်းစာ_ကာတွန်း

25/09/2025

#ယနေ့ထုတ်သတင်းစာ_ဓမ္မစကား

24/09/2025

#မနက်ဖြန်ထွက်မယ့်သတင်းစာမှာ_ဒါတွေပါမယ်
မနက်ဖြန်ထွက်မယ့် စံတော်ချိန်သတင်းစာမှာ နောက်ဆုံးရ နိုင်ငံတကာသတင်း၊ ပြည်တွင်းသတင်းနဲ့ အားကစားသတင်းတွေအပြင် ဒီဆရာတွေရဲ့ ဒီဆောင်းပါးတွေ ဒီကဏ္ဍတွေ ပါပါမယ်။

24/09/2025

#ယနေ့ထုတ်သတင်းစာ_ရသဝတ္ထုတို
◼ စက်ရပ်နေတဲ့ နာရီ

သူ့အိမ်မှာ တိုင်ကပ်နာရီတစ်လုံးရှိ၏။ ထိုနာရီက MPT ဆိုင်က လက်ဆောင်ရထားသော နာရီအဝိုင်းကြီးတစ်လုံးဖြစ်သည်။ ထိုနာရီက ဓာတ်ခဲတစ်လုံးသာထည့်ရသော နာရီဖြစ်ပြီး အချိန်သိချင်သည့်အခါ ထိုနာရီကိုသာကြည့်ပြီး လုပ်စရာတွေကို အချိန်နှင့် တစ်ပြေးညီ လုပ်နေရသည်။ မနက်လင်းလို့ အိပ်ရာထသည့်အခါ ဘုရားရှိခိုးချိန်ကို နာရီမှာကြည့်သည်။ အပြင်ထွက်ဖို့ ကိစ္စရှိသည့်အခါ အချိန်ကိုက်ရောက်ဖို့ ထိုနာရီကို လှမ်းကြည့်ရသည်။ ဖုန်းမှာ အချိန်ကိုကြည့်၍ ရသည့်တိုင်နာရီကိုကြည့်သည့် အလေ့အထက ရှေးခေတ်လူကြီးတွေမို့ အကျင့်ပါနေခဲ့သည်။

တစ်လောကတော့ ထိုနာရီရပ်သွားခဲ့သည်။ ဓာတ်ခဲအားနည်းနေသည်အထင်နှင့် ဓာတ်ခဲကိုလဲပေမယ့် နာရီကမသွားတော့ပါ။ လက်တံလှည့်သည့် ခလုတ်တွေကိုလှည့်ကာ ကြည့်သော်လည်း နာရီက မသွားတော့ပါ။ ပထမနာရီကို အမှိုက်ခြင်းထဲထည့်ပစ်ဖို့လုပ်ခဲ့သေးပေမယ့် နောက်တော့လည်း နာရီကြီးက လှနေသည့်အတွက် မထည့်ဖြစ်တော့ပါ။

ခက်တာက နေ့တိုင်းလို နာရီကိုကြည့်မိနေခြင်းဖြစ်သည်။ ကြည့်လိုက်တိုင်း နာရီက ညနေ ၄ နာရီခွဲမှာ ရပ်နေသည်။ အချိန်ကို သိချင်သဖြင့် ကြည့်လိုက်တိုင်း ၄ နာရီခွဲမှာ ရပ်နေသော နာရီကိုကြည့်ပြီး သူ့စိတ်ထဲက ကျိန်ဆဲမိပြန်သည်။

တစ်ညနေမှာတော့ နာရီနှင့်သူ စကား ပြောဖြစ်ကြသည်။ ထိုညက မီးတွေပျက်နေပြီး အားသွင်းသည့် မီးလုံးတစ်လုံးကို ထွန်းထားရ သောအချိန်။ သူက အားသွင်းမီးအလင်းရောင် အောက် ကုလားထိုင်တစ်လုံးပေါ် ထိုင်နေပြီး မဲခေါင်ပုလင်းပြားလေးနှင့် နှစ်ပါးသွားနေစဉ် မှာပဲ နာရီက သူ့ကို စကားလာပြောခြင်းဖြစ် သည်။

“ဘယ်နှနာရီရှိပြီလဲဗျ”
ပထမ အသံတစ်သံကို ကြားလိုက်ပေမယ့် ဘယ်ကအသံမှန်း မသိသည့်အတွက် သူလန့်သွားမိခဲ့သည်။ နောက်တော့မှ ထိုအသံ ဟာ နာရီထံမှလာသောအသံဖြစ်မှန်း သူသိသွားသည်။

“ဘယ်နှနာရီ ရှိပြီလဲဗျ”

နာရီကနေ သူ့ကို ထပ်မေးနေသည်။

“ခင်ဗျား သရဲပူးနေတာလား”

နာရီကို သူပြန်မေးရင်း နာရီဘက်ကို သူ့ကုလားထိုင် လှည့်လိုက်သည်။ နာရီက ခဏမျှ ငြိမ်သွားချိန်၊ အိမ်မြှောင်တစ်ကောင်၏ စုတ်ထိုးသံက တကျွတ်ကျွတ်နှင့် ထွက်ပေါ် လာခဲ့သည်။

နောက်တော့မှ နာရီက စကား ပြောလာသည်။

“ပေါက်ပေါက်ရှာရှာဗျာ၊ ကျုပ်က နာရီ ပါ။ ဘယ်က သရဲပူးရမှာလဲ။ ဘယ်နှနာရီရှိပြီလဲ သိချင်လို့ မေးတာပါ”

“ဘယ်နှနာရီဟုတ်လား၊ နာရီက ဘယ် နှနာရီရှိပြီလဲ မေးရတယ်လို့။ . ဘယ်နှနာရီ ရှိတော့ရော ခင်ဗျားက ဘာလုပ်မှာမို့လဲ”

“ကျုပ်စက်ရပ်သွားတာ ဘယ်လောက် ကြာပြီလဲ သိချင်လို့ပါ”

“ခင်ဗျား စက်ရပ်သွားတာ သုံးလကျော် ပြီဗျ။ ဒါကြောင့်မို့အချိန်သိချင်တဲ့အခါ ခင်ဗျား ကိုလှမ်းကြည့်ရပေမယ့် အလကားအချိန်သာ ကုန်တာပေါ့ဗျာ”

“ဆောရီးပါဗျာ၊ ကျုပ်က ဒေးဗစ်ဝေါ်လ်တာရဲ့ နာရီမှ မဟုတ်တာ။ ဒီလိုပဲ ကာစတန်မာတွေကို လက်ဆောင်ပေးဖို့ လုပ်ထားတဲ့ နာရီထဲက တစ်လုံးဆိုတော့ အကြာကြီးတော့ဘယ်ခံမှာလဲ။ စက်ပျက်သွားတဲ့အခါတော့ ကျုပ်လည်း ရပ်သွားရတာပေါ့”

“ဘာလဲဗျ၊ ဒေးဗစ်ဝေါ်လ်တာက”

“ဒေးဗစ်ဝေါ်လ်တာက ဆွစ်ဇာလန်က နာရီလုပ်တဲ့လူပါ။ သူ့လက်လုပ်နာရီတွေက တစ်စက္ကန့်တောင်မလွဲဘူးတဲ့။ ပြီးတော့ နာရီကြီးတွေက ဒီဇိုင်းအမျိုးမျိုးရှိပြီး ဈေးကလည်းဒေါ်လာထောင်ပိုင်းကနေ လေးငါးသောင်း လောက်ကိုရှိတယ်။ ကျုပ်တို့နဲ့တော့ ဘယ်တူ ပါ့မလဲဗျာ”

“အေးပါဗျာ၊ ခင်ဗျားသာ ဒီလိုပဲ ကျုပ်ကို စကားပြောပေးနေရင်တော့ စက်ပျက်နေ လည်း ဘာအရေးလဲ။ တစ်ခါတစ်ခါတော့ လည်း အချိန်တွေ ပျောက်နေတာကပဲ လူတစ် ယောက်အတွက် ပိုကောင်းတယ်ဗျ။ ကျုပ်တို့ မှာ အချိန်တွေရှိခဲ့တယ်။ မျှော်လင့်ချက်ရဲ့ အချိန်တွေ၊ ပျော်ရွှင်ရခြင်းအချိန်တွေပေါ့ဗျာ။ ခုတော့လည်း ဒါတွေက မရှိဖူးခဲ့သလိုပဲ ပျောက်လွင့်သွားခဲ့ပါပြီ”

“တောင်ပေါ်မှာ အလုပ်လုပ်ကြတုန်းက ကျုပ်က နှစ်ပတ်တစ်ခါ ဂျူတီဝင်ရတယ်။ မိုးကုတ်ဆောင်းတွေက တအားအေးတယ်။ ဒီတုန်းက တောင်တွေဆိုတာတောင် နေကြာ တွေနဲ့ကို ဝါဝါထိန်နေတာ။ တစ်ခါ တစ်ခါ လည်း နှင်းမှုန်တွေက တောင်တွေကို ဇာပဝါ ပါးနဲ့ အုပ်ထားသလို ပါးပါးလျလျ အုပ်မိုးလို့။ မိုးဆိုရင်တော့ တောင်ကြားက မြူတွေက အလိပ်လိုက် အလိပ်လိုက် တက်လာပြီး တိမ်တွေလို အယောင်ဆောင်ကြသေး။ ဒီတုန်း က ကျုပ်တို့မှာ သမီးလေးတစ်ယောက်ရှိနေပြီ။ သူက သမီးလေးကို ကျောပိုးရင်း တောင်ပေါ် စခန်းကို ထမင်းလာလာပို့တာ”

“ပျော်စရာကြီး နေမှာပဲနော်။ ကြည်နူးဖို့လည်း ကောင်းမှာဗျ”

နာရီက သူပြောတာကို နားထောင်ရင်း သူပြောပြတာတွေကို သဘောကျနေသည်။ အိမ်မြှောင်ကတော့ ကျွတ် ကျွတ်... ကျွတ် ကျွတ်နှင့် စုတ်ထိုးနေခဲ့ပြန်ပါသည်။

“ဒီတုန်းကသူက (၂၆)နှစ်လောက်ရှိပြီး ကျုပ်က (၃၁)နှစ်လောက်ရှိပြီ။ အနာဂတ်မှာ ဘာတွေဖြစ်လာမယ် မသိပေမယ့် ပစ္စုပ္ပန်က တော့ ကြည်နူးစရာပေါ့ဗျာ။ ကျုပ်တို့က ကျုပ်တို့နေတဲ့အိမ်လေးရှေ့မှာ အာလူးတွေ၊ ကြက်သွန်ဖြူတွေ စိုက်ကြတယ်။ နောက်ဘက်မှာ ခရမ်းချဉ်သီးတွေ၊ ဂေါ်ရခါးသီးတွေ စိုက်ကြတယ်။ အာလူးနဲ့ ကြက်သွန်ဖြူတွေဖော်ရင် သိပ်ပျော်ဖို့ကောင်းတာ”

“အားကျလိုက်တာဗျာ၊ ကျုပ်ကတော့ နာရီတစ်လုံးသာ ဖြစ်နေလို့ ဒါမျိုး တွေ ဖြစ်ခွင့် မရှိတော့ပါဘူး။ ဓာတ်ခဲထည့်ထားရင် ချက်ချက်. . . ချက်ချက်နဲ့ လက်တံတွေ ရွေ့နေရပြီး ကိုယ်ကိုယ်တိုင်တောင် ဘယ်နှနာရီ ရောက်နေမှန်း မသိတဲ့ဘဝပေါ့”

###

နောက်နေ့မှာတော့ သူက မဲခေါင်တစ်ပြားကိုဖောက်ပြီး မနေ့ကလိုပဲ ကုလားထိုင်ဘေးက ခုံလေးပေါ်မှာတင်ကာ ကြက်ဥကြော် အမြည်းနှင့် သောက် နေခဲ့သည်။ ဒီနေ့က မီးလာရက်မို့မနေ့ညကလိုမီးလုံးထွန်းစရာမလိုပါ။ အပြင်မှာ တော့ဆောင်းဦးပေါက်စမို့နေစောင်းသည်နှင့် အမှောင်ရိပ်က ကျနေပြီဖြစ်သည်။

ထိုအချိန်မှာပဲ အိမ်မြှောင်က တကျွတ်ကျွတ် စုတ်ထိုးနေပြီး နာရီက သူ့ကို စကားပြောလာသည်။

“မနေ့က ဇာတ်လမ်းလေးဆက်ပါဦး။ တောင်ပေါ်မှာ ခင်ဗျားတို့နေကြ တယ်။ သမီးလေးတစ်ယောက်ရတော့ သမီးလေး ကျောပိုးပြီး မိန်းမက ခင်ဗျားအလုပ်ရှိရာကို ထမင်းလာလာပို့တယ်။ နောက်တော့ရော”

ညနေစောင်းရင်တော့တောင်ပေါ်ကျောက်စခန်းမှာ တာဝန်ကျတဲ့လုံခြုံရေးဝန်ထမ်းတစ်ယောက်နဲ့ ဂစ်တာတီးပြီး သီချင်းတွေဆိုကြတယ်ဗျ။ “ချစ်ပြီးမှ ခွဲရမယ်၊ ကိုယ်တို့ကို ညှာတာပါ ဆောင်းဆိုတဲ့ သီချင်းတွေ”။ ပြီးတော့“လူဆိုတာ အနိစ္စနဲ့သာဝေးကြရရင် ဘယ်ဆီကိုသွားကြရမှာလဲ အချစ်ရယ်” ဆိုတဲ့ သီချင်းတွေ။ ကျောက်တောင်ကြီးပေါ်ထိုင်ပြီး ကျောက်တူးနေရတဲ့ ဝန်ထမ်းဘဝဟာ လောဘမရှိဘဲ ငြိမ်းချမ်းတဲ့ဘဝလေးပေါ့ဗျာ။ ကျုပ်တို့မချမ်းသာခဲ့ပါဘူး။ လစာနဲ့ မလောက် လို့ဆိုင်းဘုတ်တွေတောင် ရေးခဲ့ရတယ်။ မိန်းမနားမှာ နားကပ်တစ်ရန် တောင် မရှိခဲ့ဘူး။ ဒီတုန်းက ဘဝဟာ ပျော်စရာလည်းကောင်း၊ ဝမ်းနည်းစရာ လည်းကောင်းပေါ့။ သူက စကားပြောတာကိုရပ်ပြီး မဲခေါင်အရက်ကို တစ်ချက် မော့လိုက်သည်။ အိမ်မြှောင်ကတော့ သူပြောတာတွေ နားလည်၍ လားမသိ။

တကျွတ်ကျွတ်နှင့် စုတ်သပ်ရင်း သူ့ကိုသနားနေပုံရသည်။

“ဒီတုန်းက ဘဝကိုပြန်တွေးမိတိုင်း ကျုပ်မိန်းမကို ကျုပ်လွမ်းမိတယ်”

“ခုရော ခင်ဗျားမိန်းမ မရှိတော့လို့လား”

“ပြောရရင်တော့ အရှည်ကြီးပါဗျာ။ ဝတ္ထုစာအုပ်ထူထူကြီး တစ်ပုဒ်တောင် ရေးလို့ရမယ်။ နောက်တော့ တောင်ပေါ်ကနေမြို့ကိုပြန်ပြောင်းလာပြီး ရုံးချုပ်မှာ တာဝန်ထမ်းဆောင်ရတယ်။ ကံကောင်းချင်တော့ နိုင်ငံခြားပညာတော်သင်သွားပြီးအပြန် အိမ်လေးတစ်လုံးပါ ဝယ်နိုင်ခဲ့တယ်။ နို့မို့ဆိုကျုပ်ဘဝမှာ နေစရာအိမ်တောင်ရှိမှာ မဟုတ်ဘူး။ ဝန်ထမ်းဘဝမှာ ဟောက်စားတာရော၊ တောင်းစားတာပါ မလုပ်ချင်လို့ ကျုပ်အလုပ်ထွက်လိုက်တယ်”

“နောက်တော့ အပြင်အလုပ်လေးစလုပ်ရာက အဆင်ပြေလာတယ်။ သမီးတစ်ယောက်နဲ့ သားတစ်ယောက် ထပ်မွေးခဲ့တယ်။ ဒီကလေးတွေ ကျောင်းပြီးဖို့ ကျုပ်တအားရုန်းကန်ခဲ့ရတယ်။ ဒါပေမဲ့ကလေးတွေက အမေနဲ့ပဲ လက်ပွန်းတတီးနေတော့ ရုန်းကန်နေရတဲ့ အဖေ့အဖြစ်ကိုသိပ်မသိကြဘူး။ ခုတော့လည်း အားလုံးဘွဲ့တွေရ၊ သူ့အလုပ်နဲ့သူ၊ သူ့မိသားစုနဲ့သူမို့ အိမ်ထောင်ကွဲတွေဖြစ်ကုန် ပါပြီ။ ကျုပ်ဘဝ အစကထက်တော့ သူတို့ပိုပြီးအဆင်ပြေပါတယ်။ သမီးအလတ်မဆို အခုနော်ဝေကို ရောက်နေပြီ”

“ကောင်းတာပေါ့ဗျာ။ သားသမီးတွေ အဆင်ပြေတော့ မိဘတွေလည်း စိတ်ချမ်းသာရတာပေါ့။ ဒါဆိုအိမ်မှာ ခင်ဗျားနဲ့ မိန်းမပဲ ကျန်ခဲ့မှာပေါ့။ ဒါပေမဲ့ ခင်ဗျားမိန်းမရော မတွေ့ပါလား”

နာရီက သူ့မိန်းမကိုမေးနေချိန် အိမ်မြှောင်က ကျွတ်ကျွတ်. . . ကျွတ် ကျွတ် ဆိုပြီး စုတ်ထိုးနေခဲ့သည်။ အိမ်မြှောင်က သူ့အကြောင်းကို သိထားသူမို့ သူ့ကို နောက်နေတာများလား။

“ဒါကြောင့် ညားခါစက ကျုပ်မိန်းမကို ကျုပ်ပြန်သတိရတယ်ပြောတာ။ အခုမိန်းမက အဲဒီတုန်းကမိန်းမ မဟုတ်တော့ဘူးဗျ။ အသက်တွေ ရလာလေ လင်မယားနှစ်ယောက်ပိုပြီးနီးကပ်ရမှာဖြစ်ပေမယ့် သူက ကျုပ်နဲ့ ဝေးသွားခဲ့တယ်။ တစ်ခါ တစ်ခါ တစ်အိမ်တည်းမှာနေပေမယ့် သူစိမ်းတွေလိုပဲ။ တစ်ခါ တစ်ခါ တစ်နေ့လုံးနေလို့ စကားတစ်ခွန်းမှ မပြောဖြစ်ကြဘူး။ ဒီခေတ်ကြီးက အင်တာ နက်ခေတ်ဆိုတော့ သူက အမြဲလို ဖုန်းနဲ့ပဲ မျက်နှာချင်းဆိုင်နေတာ။ တစ်ခုခု ပြောရင်လည်း အထိမခံတော့ဘဲ ရန်ဖြစ်တာနဲ့ အဆုံးသတ်သွားတာ။ ကျုပ်အဖို့ တော့ ညားခါစက တောင်ပေါ်ကို သမီးလေးကျောပိုးရင်း ထမင်းလာပို့တဲ့ မိန်းမ ပျောက်ခဲ့တာ ကြာပါပြီဗျာ”

“ဖြစ်မှဖြစ်ရလေဗျာ။ ဒါနဲ့ အခုမိန်းမက အိမ်မှာဘာလို့မရှိရတာလဲ”

သူက မဲခေါင်တစ်ခွက်ကို ပါးစပ်ထဲ လောင်းထည့်၊ ကြက်ဥကြော်ကို စား လိုက်ပြီးမှ စကားကို ဆက်ပြောလိုက်သည်။

“ပထမ ကျုပ်သမက်က နော်ဝေကုမ္ပဏီတစ်ခုမှာ အလုပ်ရတယ်။ သူက အင်ဂျင်နီယာဆိုတော့လစာလည်းကောင်းတယ်။ နောက်တော့ သမီးအငယ်က ပါ လိုက်သွားတယ်။ အခြေအနေအရ ဟိုမှာ နိုင်ငံသားခံယူလိုက်ကြတယ်။ လွယ် လွယ်ကူကူတော့ မဟုတ်ဘူးပေါ့။ နောက်တော့ သမီးက ကျုပ်တို့ကို လှမ်းခေါ် တယ်။ကျုပ်က အသက်ကြီးလာလို့လား မသိဘူး။ ဘယ်နိုင်ငံမှ မသွားချင်ဘူး။ ပြီးတော့ ကျုပ်အိမ်ကနေ ဘယ်ကိုမှ မခွာချင်ဘူး။ ဒါနဲ့ပဲ ထိုင်းကနေ သူ့အမေကိုပဲ လာခေါ်သွားကြတယ်။ ပြန်လာ၊ မလာတော့ မသိပေမယ့် သုံးနှစ်လောက်တော့ ကြာသွားပြီ”

“မက်ဆင်ဂျာကနေ ဗီဒီယိုကောလ်တွေ မခေါ်ဘူးလား။ ဒီခေတ်ကြီးက လွယ်တဲ့ဟာကို”

“အစကခေါ်ပါတယ်။ နောက်တော့ အဆင်ပြေသလိုနေ၊ မခေါ်နဲ့တော့လို့ ကျုပ် ပြောလိုက်တယ်။ လူအိုဘဝ ဆိုတာကလည်း ခင်ဗျားလိုပဲ စက်ရပ်သွားတဲ့ နာရီတစ်လုံးနဲ့ ခပ်ဆင်ဆင်ပေါ့။ ကျုပ်ကတော့ မနက် ဘုရား ရှိခိုးလိုက်၊ ညနေ အရက်သောက်လိုက်နဲ့ပဲ ဘဝမှာ အချိန်တွေက သေသွားခဲ့ပါပြီ။ သမီးကတော့ သူ့အစ်မကတစ်ဆင့် လစဉ် ငွေလှမ်းပို့ပါတယ်။ ကျုပ်ကလည်း ကျုပ်ရှာနိုင် သလောက် ရှာတယ်။ အခုတော့ ကျုပ်လည်း ကျုပ်နာရီလက်တံနဲ့ ကျုပ်သွားနေရ တာပေါ့။ ခင်ဗျားပြောသလိုဘယ်အချိန်ရောက်ပြီလဲ ကိုယ့်ဘာသာတောင် ကိုယ် မကြည့်ခဲ့တာ ကြာပြီ။ ဒါပေမဲ့ ဘဝဆိုတာ ဘာမှမဟုတ်ဘူး ဆိုတာ ပိုသိလာလေ၊ ကျုပ်နေရတာ အထီးကျန်လေပဲ။ တစ်ချိန်ချိန် ခင်ဗျားလို စက်ရပ်သွားမှပဲ...”

နာရီက ဘာစကားမျှမပြောတော့ဘဲ တိတ်သွားခဲ့သည်။ အိမ်မြှောင်ကတော့ ကျွတ်ကျွတ်. . . ကျွတ်ကျွတ်နှင့် စုတ်သပ်ရင်း မျက်နှာကြက်ပေါ်မှာ ငြိမ်သက်နေခဲ့သည်။ သူကလည်း လက်ကျန်မဲခေါင်တစ်ခွက်ကို ခပ်မြန်မြန်မော့ချရင်း ... ။

ရေးသူ - မောင်ကျော်သာ(ပဲခူး)

24/09/2025

◾️မြန်မာနိုင်ငံ၌နေရပ်စွန့်ခွာသူ ၃ ဒသမ ၆ သန်းကျော်အထိရှိဟု UNOCHA ထုတ်ပြန်

မြန်မာနိုင်ငံအတွင်းဖြစ်ပွားနေသည့်ပဋိပက္ခများကြောင့် နေရပ်စွန့်ခွာသူ ၃ ဒသမ ၆ သန်းကျော်အထိ ရှိလာပြီ ဖြစ်ကြောင်း ကုလသမဂ္ဂလူသားချင်းစာနာမှုဆိုင်ရာပေါင်းစပ်ညှိနှိုင်းရေးရုံး (UNOCHA) က ယနေ့(စက်တင်ဘာ ၂၄ ရက်) တွင်ထုတ်ပြန်သည်။

တပ်မတော်နှင့်လက်နက်ကိုင်အဖွဲ့အစည်းများကြား နေရာအနှံ့ဖြစ်ပွားနေသည့် ပဋိပက္ခကြောင့် နေ့စဉ်နီးပါး အရပ်သားထိခိုက်သေဆုံးမှုများရှိနေပြီး အရပ်သားစောင့်ရှောက်ကာကွယ်ရေးဆိုင်ရာ ကိစ္စများပိုမိုဆိုးရွားလာလျက်ရှိကာ နိုင်ငံတဝန်းလူဦးရေ ၃ ဒသမ ၆ သန်းနီးပါးခန့်သည် နေရပ်စွန့်ခွာ နေထိုင်လျက်ရှိကြောင်း ယင်းထုတ်ပြန်ချက်အရသိရသည်။

ယခုစက်တင်ဘာလအတွင်း ဆက်လက်ဖြစ်ပွားနေသည့် ပဋိပက္ခများကြောင့် အိုးအိမ်စွန့်ခွာထွက်ပြေး ရမှုများ ပိုမိုများပြားလာကာ၊ ပြည်နယ်နှင့်တိုင်းဒေသကြီးများရှိစာသင်ကျောင်းများကို ထိခိုက်စေသည့် ဖြစ်ရပ်များကြောင့် ပညာရေးအဆောက်အဦများကိုတိုက်ခိုက်ခြင်းမှကာကွယ်စောင့်ရှောက်ပေးရန် အရေးတကြီးလိုအပ်လျက်ရှိကြောင်း ထုတ်ပြန်ချက်တွင်ဖော်ပြထားသည်။

မြန်မာနိုင်ငံအနောက်မြောက်ပိုင်းနှင့် အရှေ့တောင်ပိုင်းတို့တွင်လည်း အကူအညီများဖြန့်ဖြူးခြင်း အတွက် ကန့်သတ်မှုများရှိနေသကဲ့သို့ အဓိကအရေးပါသည့်ဝန်ဆောင်မှုများလိုအပ်နေသည့် လူထုအတွက်လည်း ဘေးကင်းလုံခြုံစွာသွားလာနိုင်ခွင့်လည်းဆုံးရှုံးလျက်ရှိကြောင်းသိရသည်။

မြန်မာနိုင်ငံသည် လူသားချင်းစာနာမှုဆိုင်ရာရန်ပုံငွေလိုအပ်ချက်ပြည့်မီမှု အနည်းဆုံး ကမ္ဘာ့နိုင်ငံများ ထဲမှတစ်နိုင်ငံဖြစ်ပြီး ယခုနှစ်လူသားချင်းစာနာမှုဆိုင်ရာလိုအပ်ချက်များနှင့် တုံ့ပြန်ရေးအစီအစဉ် (HNRP) အတွက် ယနေ့အချိန်ထိ ရန်ပုံငွေ ၁၂ ရာခိုင်နှုန်းသာ ရရှိထားကြောင်း ထုတ်ပြန်ချက်တွင် ဖော်ပြထားသည်။

သတင်း - အင်ကြင်း
ဓာတ်ပုံ - UNOCHA
#ပြည်တွင်းသတင်း

The Standard Time Daily

25/09/2025

25/09/2025

25/09/2025

25/09/2025

25/09/2025

25/09/2025

25/09/2025

25/09/2025

25/09/2025

24/09/2025

24/09/2025

24/09/2025

Address

Telephone

Website

Alerts

Contact The Business

Shortcuts

Share

Our Story