Drops Of Light

Drops Of Light Contact information, map and directions, contact form, opening hours, services, ratings, photos, videos and announcements from Drops Of Light, Digital creator, Yangon.

နေ့စဉ်ဘဝရဲ့ ရုန်းကန်မှုတွေကြားမှာ ခဏတာနားခိုပြီး စိတ်ခွန်အားဖြည့်ဖို့ 'အလင်းစက်' ဆိုတဲ့ နေရာလေးတစ်ခု ဖန်တီးထားပါတယ်။ စိတ်အေးချမ်းစေမယ့် စာစုလေးတွေကို နေ့စဉ် တင်ဆက်ပေးသွားမှာမို့လို့ ကျွန်တော်တို့နဲ့အတူ လက်တွဲဖို့ ဖိတ်ခေါ်ပါတယ်။" ✨🕯️

14/02/2026

ချစ်သူများနေ့မှာ
ပန်းစည်းမရှိ၊ လက်ဆောင်မရှိ၊
ရိုမန်တစ်မရှိ၊ အံ့အားသင့်စရာ မရှိလည်း
ကိုယ့်ကိုယ်ကိုယ် မှန်ကြည့်ပြီး ဦးညွှတ်မယ်။

"ဒီလမ်းတစ်လျှောက်
ကြိုးစားအားထုတ်မှုတွေအတွက်
ကျေးဇူးတင်တယ်" လို့ ပြောမယ်။

💌
ချစ်ရပါသော ကိုယ် ( Dear me)

မိသားစု တာဝန်ဝတ္တရားက သိပ်လေးတယ်။
မျှဝေသူ မရှိတာကို ကျင့်သားရနေပါပြီ။
စိတ်ခံစားချက်က အတော် ခံရခက်တယ်။
ဒါကို တစ်ယောက်တည်း မျိုချတတ်လာတယ်။

ကိုယ်ဟာ သန်မာအောင် အမြဲကြိုးစားနေလိုက်တာ
ဂရုမစိုက်သူ မရှိလို့
ကိုယ့်ကိုယ်ကိုယ် ဂရုစိုက်ရပါတယ်။
ပင်ပန်းတဲ့အခါ အနားယူရပါတယ်။

💌
ချစ်ရပါသော ကိုယ်...

ဆူးတွေ သိပ်များလည်း အားတင်းထားရတယ်၊
ဒုက္ခများလည်း ဘယ်တော့မှ မညည်းဘူး။
မျက်ရည်အကြိမ်ကြိမ် ဝဲလည်း
လူတွေရှေ့မှာ သန်မာနေတယ်။

ဒီလောကမှာ ကိုယ့်ကို တကယ်ဂရုစိုက်တဲ့သူ သိပ်မများဘူး၊ ကိုယ့်ကို လှောင်ရယ်မယ့်သူ သိပ်များတယ်ဆိုတာ ကိုယ်သိတယ်။

ကိုယ် မသန်မာရင်
ကိုယ့်ဝန်ထုပ်ဝန်ပိုးကို
ဘယ်သူ လာထမ်းပေးမှာလဲ။

💌
ချစ်ရပါသော ကိုယ်...

ကျေးဇူးပြုပြီး ကိုယ့်ကိုယ်ကိုယ် ကြင်နာပါ။
ကလေးအတွက် အနစ်နာခံဖို့ အမြဲ မတွေးပါနဲ့။
ကိုယ့်လက်တွဲဖော်အတွက် ကောင်းဖို့ အမြဲ မစိုးရိမ်ပါနဲ့။

ကိုယ်က ဒီမိသားစုရဲ့ ကောင်းကင်တစ်ဝက်ပါ။
ဒီမိသားစုရဲ့ ထောက်တိုင်ပါ။
ကိုယ့်ကိုယ်ကိုယ် ပိုပျော်ရအောင်နေရတယ်၊
ကိုယ့်ကိုယ်ကိုယ် ကျေနပ်အောင်နေရတယ်။
ဒါမှ ဒီမိသားစုက ပျော်ရွှင်နိုင်၊ သင့်မြတ်နိုင်မှာမို့ပါ။

💌
ချစ်ရပါသော ကိုယ်...

တချို့က ကိုယ့်ကို မကြိုက်လည်း ကိစ္စမရှိဘူး။
တချို့က ကိုယ့်ကို ကြည့်မရလည်း အရေးမကြီးဘူး။

ကိုယ့်ကို တကယ်အလေးထားသူက
ကိုယ့်ကို ကြီးပွား တိုးတက်စေချင်တယ်။
ကိုယ့်ကို ကြည့်မရသူတွေ ဘာထင်ထင် အရေးမကြီးပါဘူး။

ဒါကို သဘောပေါက် နားလည်ပါ။

မထိုက်တန်သူတွေအတွက်
နာကျင်၊ စိတ်ဆင်းရဲစေတာမျိုး မဖြစ်ပါနဲ့။

💌
ချစ်ရပါသော ကိုယ်....

ကိုယ်ချစ်တဲ့သူက ကိုယ့်ကမ္ဘာရဲ့ ရှုခင်းပါ။
ကိုယ့်ကိုချစ်တဲ့သူက ကိုယ့်အတွက်
အကောင်းဆုံး အဖော်ပြုမှုကို ပေးပါတယ်။

ကျန်တဲ့
ကိုယ့်ကို ဒဏ်ရာ အမာရွတ် ကျန်စေခဲ့တဲ့ သူက
အမှားတွေကနေ ကိုယ် သင်ခန်းစာ ယူဖို့ပါ။
စိတ်ထဲ ထည့်မထားပါနဲ့။
အလေးအနက် မထားပါနဲ့။
တသသတမ်းတဖို့ ထိုက်တန်မနေပါဘူး။


💌
ချစ်ရပါသော ကိုယ်....

ကိုယ်ဟာ ဘယ်သူ့အတွက်မှ အသက်ရှင်နေတာ မဟုတ်ဘူးဆိုတာ မှတ်ထားပါ။

ဒီလောကထဲ ရောက်လာပြီး
ဒီခရီးကို လျှောက်ခဲ့တဲ့နောက်
ကိုယ်တို့လုပ်သင့်တဲ့ အရေးကြီးဆုံး အရာက ...

စေတနာထားပြီး တာဝန်ယူတတ်ဖို့၊
လုံလောက်တဲ့ တာဝန်ခံမှု ရှိဖို့၊
မိသားစုကို အခြားအရာအားလုံးထက်
ပိုတန်ဖိုးထားဖို့၊
ကိုယ့်အပေါ် ကောင်းသူကို ဆတိုးကောင်းဖို့၊
ကိုယ့်ကို ကူညီသူကို ဘယ်တော့မှ မမေ့ဖို့ပါ။


💌
ချစ်ရပါသော ကိုယ်...

လူ့ဘဝ ဒီတစ်သက်ကို
နေ့စဉ်နဲ့အမျှ ဖြတ်သန်းနေရလို့
ရင်ဆိုင်ရတဲ့ အသေးအဖွဲကိစ္စတချို့လည်း ရှိတယ်။
စဉ်းစားတွေးတောရတဲ့ စိုးရိမ်ပူပန်မှုတချို့လည်း ရှိတယ်။

တချို့ကိစ္စကို နားမလည်ရင် လွှတ်ချထားလိုက်ပါ။ ကိုယ့်ကိုယ်ကိုယ် အတင်းအကျပ် မလုပ်ပါနဲ့။
မလုပ်နိုင်ရင် စိတ်ထဲ ထည့်မထားပါနဲ့။
ကိုယ့်ကိုယ်ကိုယ် လွတ်လမ်းတစ်ခုပေးပါ။

ကိုယ်တို့က ဥုံဖွဆရာ မဟုတ်ပါဘူး... သာမန်လူသားပါ။

အချို့ကိစ္စကို တာဝန်ယူမှု အပြည့်အဝ ထားပြီး
တချို့ကိစ္စကိုတော့ သဘာဝအတိုင်း ဖြစ်ပျက်ပါစေ။


💌
ချစ်ရပါသော ကိုယ်...

ကိုယ့်ကိုယ်ကိုယ် ဂရုစိုက်ဖို့ကို လျစ်လျူရှုပြီး
ကြိုးစားဖို့ပဲ တုံးတုံးအအ အာရုံမစိုက်ပါနဲ့။

ဒီကမ္ဘာမှာ ကိုယ်ဟာ အတုမရှိပါ။
ကိုယ်ဟာ ချို့ယွင်းချက်ရှိလည်း နှစ်ယောက် မရှိနိုင်ပါဘူး။

တခြားသူ အပြောကြောင့်
ကိုယ့်ကိုယ်ကိုယ် သံသယမဝင်ပါနဲ့။

ကိုယ့်ကို လူတချို့ မကြိုက် မနှစ်သက်လည်း ဘာအရေးလဲ...
နေ့တိုင်း အပြုံးနဲ့ ဖြတ်သန်းနေထိုင်ပါ။
ဒီဘဝမှာ လှလှပပ ရှင်သန်နေဖို့ လိုပါတယ်။

💌
ချစ်ရပါသော ကိုယ်...

ဘဝခရီးက ရှည်လျားတယ်၊
အခက်အခဲကို ကိုယ်တိုင်ထမ်းပိုးတယ်။
ဘဝက အတက်အကျနဲ့ ပြည့်နေလည်း
ရင်ဘတ်ကျယ်ကျယ်နဲ့ ရင်ဆိုင်ရတယ်။

ပြီးခဲ့တဲ့နှစ်တွေမှာ
ကိုယ့်ကိုယ်ကိုယ် ဘယ်လောက် အလေးမထားခဲ့မိလဲ...

ကိုယ့်ကိုယ်ကိုယ် ဂရုမစိုက်ခဲ့ဘူး၊
ကိုယ့်ကိုယ်ကိုယ် နှစ်သိမ့်ဖို့ မေ့ခဲ့တယ်၊
ကိုယ့်ကိုယ်ကိုယ် တန်ဖိုးထားဖို့ လျစ်လျူရှုခဲ့တယ်။
ကိုယ့်ကျန်းမာရေးကို ပေါ့ပေါ့တန်တန် ထားခဲ့တယ်။

အခု ချစ်သူများနေ့မှာ
ကိုယ့်ကိုယ်ကိုယ် ဆောရီးလို့ တစ်ခွန်းပြောပါ။
ဒီနေ့ကစ ကိုယ့်ကိုယ်ကိုယ် ဆတိုး ကောင်းပါမယ်လို့ ကတိပေးပါ။


💌
#နိုင်းနိုင်းစနေ

10/02/2026

ပိုက်ဆံမရှိလို့ ဗိုက်ဟောင်းလောင်းနဲ့ ငိုရတာထက်၊ ပိုက်ဆံတွေပုံနေလို့ ဘယ်ကျွန်းမှာ သွားအပန်းဖြေရမလဲဆိုတာကို မျက်မှောင်ကြုတ်ပြီး စဉ်းစားရတာက ပိုပြီး "Classy" ဖြစ်တာတော့ အမှန်ပဲ။

အပူချင်းတူရင်တောင်မှ "High-class ဒုက္ခ" က ပိုပြီး ခံသာတယ်လေ။

မင်းတို့က "ပိုက်ဆံရှိရင်လည်း အပူရှိတာပါပဲ" ဆိုတဲ့ စကားကို သွားမယုံနဲ့။ အဲဒါ ပိုက်ဆံမရှာချင်တဲ့သူတွေ ပေးတဲ့ ဆင်ခြေ။ ပိုက်ဆံမရှိတဲ့ ဒုက္ခက မင်းရဲ့ "သိက္ခာ" ကိုပါ ဝါးမြိုတာ။ ပိုက်ဆံရှိတဲ့ ဒုက္ခကတော့ မင်းရဲ့ "ဦးနှောက်" ကိုပဲ အလုပ်ပေးတာ။

ဒဲ့ပြောရရင် "မင်းက အိတ်ကပ်ထဲမှာ တစ်ကျပ်မှမရှိဘဲ 'ဒီနေ့ ဘာစားရမလဲ' လို့ ပူနေရတာဟာ ငရဲကျနေတာနဲ့ တူတူပဲ။ အိတ်ကပ်ထဲမှာ သိန်းတစ်သောင်းရှိလို့ 'ဒီပိုက်ဆံကို ဘယ်လုပ်ငန်းထဲ ထည့်ရင် ကောင်းမလဲ' လို့ ပူနေရတာကတော့ ချမ်းသာတဲ့ ဝေဒနာကွ။ အဲဒီ ဒုက္ခမျိုးကိုတော့ လူတိုင်း လိုချင်ကြတာပဲ။

ပိုက်ဆံဆိုတာ Dettol လိုပဲလို့ ငါပြောခဲ့ဖူးတယ်မဟုတ်လား။ ၉၉ ရာခိုင်နှုန်းသော ပြဿနာတွေကို အဲဒီဒုက္ခက ဖြေရှင်းပေးသွားလိမ့်မယ်။ မင်းလိုချင်တဲ့ အဲဒီ 'ချမ်းသာတဲ့ဒုက္ခ' ရောက်ဖို့ဆိုရင်တော့ အခုကတည်းက ပိုက်ဆံကို နွားလိုရှာပြီး လူလိုသုံးနိုင်အောင် ကြိုးစားစမ်းပါ"။

"ချမ်းသာတဲ့ဒုက္ခ" ရဲ့ အားသာချက်တွေကို ကြည့်လိုက်ဦး။

ရွေးချယ်ခွင့်ရှိတဲ့ ဒုက္ခ (Luxury Problems)

"ငါ ဒီနေ့ ထမင်းငတ်မလား" ဆိုတဲ့ ဒုက္ခမှာ ရွေးချယ်ခွင့်မရှိဘူး။ "ငါ ဒီနေ့ Japan သွားမလား၊ Europe သွားမလား" ဆိုတဲ့ ဒုက္ခမှာတော့ မင်းစိတ်ကြိုက် ရွေးလို့ရတယ်။ ရွေးချယ်ခွင့်ရှိတဲ့ ဒုက္ခဟာ တကယ်တော့ ဒုက္ခမဟုတ်ဘူး၊ အဲဒါ "အခွင့်ထူးခံ" ဖြစ်တာ။

သူတစ်ပါးကို ကူညီနိုင်တဲ့ ဒုက္ခ

မင်းမှာ ပိုက်ဆံရှိလို့ ဘာသုံးရမလဲ စဉ်းစားရခက်နေရင် သူများတွေကို ပေးကမ်းကူညီလိုက်လို့ ရသေးတယ်။ ပိုက်ဆံမရှိတဲ့သူကတော့ ကိုယ့်ဗိုက်ကိုယ်တောင် မဖြည့်နိုင်လို့ သူများကို ကူညီဖို့ဆိုတာ အဝေးကြီး။ သူတစ်ပါးကို ပေးကမ်းရတဲ့ ဒုက္ခဟာ အင်မတန် မင်္ဂလာရှိတဲ့ ဒုက္ခကွ။

အဆင့်မြင့်တဲ့ စိုးရိမ်မှု (Higher Level Concerns)

ပိုက်ဆံရှိလာတဲ့အခါ မင်းရဲ့ စိုးရိမ်မှုတွေက "ဝမ်းစာရေး" ကနေ "အဓိပ္ပာယ်ရှိတဲ့ ရှင်သန်မှု" ဘက်ကို ပြောင်းသွားမယ်။ "ငါ့ရဲ့ Brand ကို ဘယ်လိုမြှင့်မလဲ၊ ငါ့ရဲ့ အင်ဂလိပ်စာကျောင်းကို ဘယ်လိုတိုးချဲ့မလဲ"ဒါတွေက ခေါင်းစားပေမဲ့ မင်းကို တိုးတက်စေတဲ့ ဒုက္ခတွေပဲ။

ဒါ့ကြောင့် "ပိုက်ဆံရှိရင် အေးဆေးမနေရဘူး" ဆိုတဲ့ အတွေးအဟောင်းတွေကို အမှိုက်ပုံးထဲ ထည့်လိုက်ပါ။အဲဒီ "ချမ်းသာတဲ့ဒုက္ခ" ရောက်ဖို့အတွက် ဝင်ငွေလမ်းကြောင်း (Assets) တွေကို အပတ်တကုတ် တည်ဆောက်ပါ။

ပိုက်ဆံရှိလာတဲ့အခါမှာလည်း "ဘာသုံးရမလဲ" ဆိုတဲ့နေရာမှာ ကိုယ့်အတွက်တင်မကဘဲ ပတ်ဝန်းကျင်အတွက်ပါ အသုံးချဖို့ ကြိုတင်ပြင်ဆင်ထားပါ။

မင်းရဲ့ "ဘဝ" မှာ "မရှိလို့ ငိုရတဲ့ မျက်ရည်" ထက် "ရှိလွန်းလို့ စဉ်းစားရတဲ့ ချွေး" ကိုပဲ "ရွေးချယ်လိုက်စမ်းပါ"။ အဲဒီ ဒုက္ခမျိုးကမှ "မင်းကို လူတင့်တယ်စေမှာပါ"။ "ပိုက်ဆံရှိတဲ့ ဒုက္ခကို ရှာဖွေသူကမှ လောကရဲ့ အရသာကို အပြည့်အဝ ခံစားရမှာပါ" မိတ်ဆွေ။

07/02/2026

ဆင်ကြီးတစ်ကောင်ကို သံကြိုးနဲ့ မချည်ဘဲ
ကြိုးသေးသေးလေးနဲ့ပဲ ချည်ထားတာ မြင်ဖူးလား? 🐘🔗

အဲ့ဒီဆင်ကြီးက ကြိုးကို ရုန်းလိုက်တာနဲ့ ပြတ်သွားမှာ သေချာတယ်။
ဒါပေမဲ့ သူ ဘယ်တော့မှ မရုန်းဘူး။ ဘာလို့လဲ?
ဘာလို့လဲဆိုတော့... သူ ငယ်ငယ်တုန်းက အဲ့ဒီကြိုးနဲ့ ချည်ခံခဲ့ရလို့ပါ။
"ငါ ငယ်ငယ်က ရုန်းမရခဲ့ဘူး၊ အခုလည်း ရုန်းမရလောက်ပါဘူး" ဆိုတဲ့
အစွဲ က သူ့စိတ်ကို ချည်နှောင်ထားလို့ပါပဲ။ 🧠🚫

တကယ်တော့ ကြိုးက ခိုင်တာ မဟုတ်ပါဘူး။
သူ့ရဲ့ ယုံကြည်မှုအမှားက ခိုင်နေတာပါ။

မိတ်ဆွေကော...
"ငါ မလုပ်နိုင်ပါဘူး"၊ "ငါ မအောင်မြင်နိုင်ပါဘူး" ဆိုတဲ့
အတိတ်က အတွေးဟောင်းတွေနဲ့ ကိုယ့်ကိုယ်ကို ချည်နှောင်ထားမိလား?

အဲ့ဒီကြိုးကို ဖြတ်ဖို့ အချိန်တန်ပါပြီ။
သင် ထင်ထားတာထက် သင် ပိုသန်မာပါတယ်။ 💪✨

ကိုယ့်ကို ဆွဲထားတဲ့ ကြိုးတွေကို ဒီနေ့ပဲ ဖြတ်တောက်လိုက်ကြစို့!

28/01/2026

လူတစ်ယောက်က ကိုယ့်ကို ဆက်ဆံချင်တဲ့ပုံစံအတိုင်း ဆက်ဆံခွင့်မပေးတာဟာ ကိုယ့်ရဲ့တန်ဖိုးအဆင့်အတန်းကို သိသူတွေရဲ့ သင်္ကေတပဲဖြစ်ပါတယ်..။ အဆင့်အတန်းလို့ ဆိုလိုက်တာနဲ့ ပစ္စည်းဥစ္စာပြည့်စုံချမ်းသာမှ.. ပညာတွေတတ်မှ… ရာထူးဂုဏ်ဒြပ်ကြီးမြတ်မှ အဆင့်အတန်းမြင့်သူရယ်လို့ သတ်မှတ်လို့ မရနိုင်ပါဘူး…။

ပစ္စည်းဥစ္စာတွေပြည့်စုံပြီး… အသိဥာဏ်ပညာ မပြည့်စုံရင်..အဆင့်အတန်းမရှိနိုင်ပါဘူး..။ ပညာတွေတတ်ပြီး စိတ်ဓါတ်အဆင့်အတန်းမရှိသူတွေလည်း ရှိနေနိုင်တာပါပဲဲ..။ ရာထူးဂုဏ်ဒြပ်မြင့်မားပြီး ကိုယ်ချင်းစာနာစိတ်မရှိသူ.. မာန်မာနကြီးပြီး မောက်မာသူ..အဆင့်အတန်းခွဲခြားတတ်သူဟာ… စိတ်ဓါတ်အဆင့်အတန်းနိမ့်ကျသူသာ ဖြစ်ပါတယ်..။

အဆင့်အတန်းဆိုတဲ့အရာကို တိုင်းတာဖို့အတွက် အပေါ်ယံ စည်းစိမ်ချမ်းသာဂုဏ်ဒြပ်တွေနဲ့ တိုင်းတာရမှာမဟုတ်ဘဲ သူ့ရဲ့လူလူချင်းအပေါ် ထားတဲ့စိတ်…စာနာနားလည်တတ်တဲ့စိတ်.. ယဉ်ကျေးမှုရှိတဲ့စိတ်နဲ့သာ တိုင်းတာရမှာဖြစ်ပါတယ်…။

လူအချို့က သူ့လောက် ပစ္စည်းဥစ္စာမပြည့်စုံတဲ့သူ..သူ့လောက် ပညာမတတ်တဲ့သူ… သူ့လောက် ရာထူးဂုဏ်ရှိန်မရှိတဲ့သူဆို ကြည့်တဲ့အကြည့်ကအစ… ပြောဆိုဆက်ဆံတဲ့လေသံအသုံးအနှုန်းအဆုံး.. နှိမ်ချစွာ ပြောဆိုဆက်ဆံတတ်ပါတယ်..။ အဲ့ဒိလိုအခါမျိုးမှာ သူနှိမ်ချလိုက်တဲ့အဆင့်အတန်းမျိုးဆီ ကိုယ့်ကိုယ်ကိုယ် မသက်ဆင်းမိဖို့ လိုပါတယ်..။ ကိုယ့်ရဲ့ကိုယ်ကျင့်သီလ.. ဂုဏ်သိက္ခာ.. စိတ်ဓါတ်အဆင့်အတန်းဆိုတာတစ်ပါးသူက သတ်မှတ်ဖို့အခွင့်အရေးပေးစရာမလိုဘဲ ကိုယ်တိုင်တန်ဖိုးထား အသိအမှတ်ပြုထားရမယ့်အရာသာဖြစ်ပါတယ်..။ ဘယ်လောက်
ပြင်းထန်တဲ့ ရေလှိုင်းတွေ ပုတ်ခတ်ပါစေ… ကျောက်ဆောင်ကျောက်သားတွေက အရည်ပျော်ကျမသွားဘဲ မာကျောမြဲမြံစွာ မတ်မတ်ရပ်တည်နိုင်သလိုမျိုးပါပဲ…။ ဘယ်သူကပဲ ကိုယ့်ရဲ့အရည်အသွေးကို နှိမ့်ချဖို့ကြိုးစားပါစေ… ကိုယ့်ရဲ့စိတ်ခံစားမှုတွေ လိုက်ပြီးနိမ့်ကျမသွားစေရပါဘူး…။

တစ်ချို့သူတွေကတော့ ကိုယ့်ရဲ့အဆင့်အတန်းကို နှိမ့်ချချင်တဲ့အခါ ကိုယ့်ကို နာကျင်ထိခိုက်စေတဲ့… သွေးဆူပေါက်ကွဲစေတဲ့ ထိုးနှက်စော်ကားမှုတွေနဲ့ ရန်စတိုက်ခိုက်တတ်ပါတယ်..။ အဲ့ဒိလိုအခါမျိုးမှာ ကိုယ်က သူဆွဲချလိုက်တဲ့ နေရာထိရောက်သွားအောင်… ဒေါသတကြီးပေါက်ကွဲစွာတုံ့ပြန်ခြင်းမပြုဘဲ…ကိုယ့်ရဲ့စိတ်နှလုံးကို တည်ငြိမ်အေးချမ်းစွာရှိစေပြီး အလုပ်အကိုင်မပျက်… အောင်မြင်မှုမပျက်…အကြည်ဓါတ်မပျက်စေဘဲ…အေးအေးဆေးဆေး လျစ်လျူရှုထားနိုင်တာဟာ… ကိုယ့်ရဲ့အဆင့်အတန်းကို ထိန်းသိမ်းစောင့်ရှောက်ရာရောက်ပါတယ်…။ ကိုယ့်ကို ရန်လိုထိုးနှက်တိုက်ခိုက်နေသူကို တစ်ချက်ကလေးမှ ဂရုမစိုက်ဘဲ ကိုယ့်လမ်းကိုယ် တည်တည်ငြိမ်ငြိမ် ဆက်လျှောက်နေနိုင်တာဟာ…သူ့ကို ကိုယ်နဲ့တန်းညီသွားအောင် ဆွဲမခေါ်ဘဲ သူ့ရဲ့နေရာမှာသာ ရှိစေလိုက်တာဖြစ်ပါတယ်…။

#လွန်းထားထား
#အဆင့်အတန်း
#ပိုကောင်းဖို့ဖြစ်တာပါ

28/01/2026

ချစ်ခြင်းမေတ္တာကိုစော်ကားရင်
ကံကြီးထိုက်တတ်တယ်ဆိုတာကို ကိုယ်ကတော့ ယုံတယ်။
လက်တွေ့လည်း ခံစားဖူးတယ်။
အဲဒါကြောင့် အခုနောက်ပိုင်းဆို ကိုယ့်ကို ချစ်ခင်စိတ်နဲ့ ဖေးမပေးတဲ့သူတွေ၊ အားပေးတဲ့သူတွေ၊ စောင့်ရှောက်ပေးတဲ့သူတွေရဲ့ ကျေးဇူးကို ပိုပြီး အသိအမှတ်ပြုဖြစ်တယ်။
ကိုယ် အခက်အခဲကြုံနေတုန်းမှာ ရှိနေပေးတဲ့သူတွေကို မစော်ကားမိအောင် ဆင်ခြင်သတိနဲ့နေဖြစ်တယ်။

နောက်တစ်ခုက မိမိအပေါ်ကျေးဇူးရှိဖူးတဲ့ လူတစ်ယောက်ကို
သွားပုပ်လေလွင့်ပြောတာတို့၊
မိမိအပေါ် ဘာမှ မယုတ်မာဖူးတဲ့ လူတစ်ယောက်ကို
နောက်ကွယ်ကနေ တိတ်တိတ်ကလေး တိုက်ခိုက်တာ၊
အကျိုးတစ်စုံတရာပျက်စီးအောင် ကြံစည်တာတို့
စတဲ့ အပြုအမူတွေက တော်တော်လေး ကံအကျိုးပေးမကောင်းစေတတ်တဲ့ အပြုအမူတွေပဲ။ 🖤🍀

28/01/2026

◻️ “ဒီနှစ်မှာ ပိုကောင်းချင်တယ်”
◻️“စိတ်ကျန်းမာရေးကို ဂရုစိုက်ချင်တယ်”
◻️“ကိုယ့်ရဲ့နာကျင်ခဲ့ရတဲ့အတိတ်ကို ကုစားချင်တယ်”
◻️“ဒီနှစ်မှာ အားကစားကို အချိန်ပေးလုပ်ချင်တယ်” စတဲ့ စတဲ့ ရည်မှန်းချက်တွေကို လူတိုင်းထားရှိတတ်ကြပါတယ်။ နှစ်သစ်အတွက် ရည်မှန်းချက်တွေလည်း ထားခဲ့ဖူးမယ်။ ကျန်းမာရေးအတွက်၊ တိုးတက်မှုအတွက်၊ career အတွက်…စသဖြင့်ပေါ့။

ဒါပေမယ့် ရည်မှန်းချက်တစ်ခုရှိရုံနဲ့ပဲ ကိုယ်လိုချင်တဲ့ အရာအားလုံးဟာ သဘာဝအလျောက် ပြောင်းလဲသွားမသွားဘူးလို့ ဆိုရမှာပါပဲ။

ဥပမာ ကိုယ့်ရည်မှန်းချက်က နေ့စဉ် ၅ မိနစ်လောက် ကိုယ့်စိတ်လေးကို သတိထားကြည့်မိတဲ့အကျင့်လေး လုပ်မယ်ဆိုကြပါစို့။

ဒီရည်မှန်းချက်လေးအတိုင်း ပြည့်မြောက်ဖို့ဆိုရာမှာ နေ့စဉ်နေ့တိုင်း ဒီအလေ့အကျင့်လေးကို ထပ်ခါထပ်ခါ စွဲမြဲအကျင့်ပါအောင် လုပ်နေဖို့လိုပါတယ်။ ကိုယ့်ကိုယ်ကို ခွင့်ပြုနိုင်ဖို့လိုပါတယ်။ စည်းကမ်းလေးထားဖို့လိုပါတယ်။ ကတိပေးဖို့သာမက ကိုယ့်ကိုယ်ကို တည်ဖို့ လိုပါတယ်။ ဒါဟာ ကိုယ် မလုပ်ချင်တဲ့နေ့တွေမှာတောင် ကိုယ့်ကိုယ်ကို သတိလေးပေးပြီး ဆက်လက်လုပ်ဆောင်နိုင်မှု ပါပဲ။

လုပ်ချင်တယ်ဆိုတဲ့ Intention တွေ၊ ချမှတ်လိုက်တဲ့ Goal တွေက လမ်းကြောင်းတစ်ခုကို ပုံဖော်ပေးနိုင်ပေမယ့် ဒီလမ်းကြောင်းပေါ်မှာပဲ ဆက်လျှောက်နိုင်အောင် မြဲမြံစွာ ထိန်းထားပေးနိုင်တာက “Discipline” ပါပဲ။

Psychology အရ ပြောရရင်လည်း အလေ့အကျင့်တွေက တည်မြဲလာပြီး sustainable ဖြစ်လာတဲ့အခါ ကိုယ်လိုချင်တဲ့ အပြောင်းအလဲတွေဟာ ကိုယ်နဲ့အတူ တဖြည်းဖြည်း ထပ်တူကျလာပါတယ်။ အချိန်ကြာလာတာနဲ့အမျှ အားထုတ်ရတာ မလိုတော့ဘဲ default အဖြစ် လုပ်ဆောင်နိုင်လာတတ်ပါတယ်။

ထပ်ခါတလဲလဲ လုပ်နေတတ်တဲ့ အလေ့အကျင့်တိုင်းက အနာဂတ်ကို တိတ်တိတ်လေး ပုံဖော်နေတာပါပဲ။

🌱ဒါကြောင့် ကိုယ့်ရဲ့ ရည်မှန်းချက်တွေကို အလေ့အကျင့်တွေနဲ့အတူ ကိုယ့်ကိုယ်ကို ကတိတည်ရင်း တဖြည်းဖြည်း ပုံဖော်နိုင်ပါစေရှင်။

မေတ္တာဖြင့်
Andrea

✅ လွတ်လပ်စွာ Share နိုင်ပါသည်။
⚠️ Copy ကူး၍ နာမည်ပြောင်းခြင်း ခွင့်မပြုပါ။

28/01/2026

"ရိုးသားမှုကို အခွင့်ကောင်းမယူပါနဲ့"

လူတွေအကြောင်းကို ပိုသိလာလေလေ ဘာမှဝင်မပြောဘဲ ငြိမ်ငြိမ်လေးပဲ နေလိုက်ရတာကို ပိုသဘောကျလာတယ်။ ကိုယ့်ဘက်က အမြဲတမ်း ရိုးရိုးသားသားပဲ ဆက်ဆံခဲ့တာဟာ တစ်ဖက်လူကို မသိလို့မဟုတ်ဘူး။ လူတစ်ယောက်နဲ့တစ်ယောက်ကြားမှာ "ရိုးသားမှု" ဆိုတာက အဓိကပဲလို့ ယုံကြည်လို့ပါ။ ဒါပေမဲ့ ကိုယ့်ရဲ့ အေးဆေးတဲ့အချက်ကိုပဲ အခွင့်ကောင်းယူဖို့ ကြိုးစားကြတဲ့အခါမှာတော့ စိတ်နာတာထက် ပိုပြီး စိတ်ကုန်သွားတာမျိုးပဲ ရှိတော့တယ်။

တကယ်တော့ လူမှုရေးမှာ ကိုယ့်အပေါ် ရိုးသားတဲ့သူတစ်ယောက် ရှိနေဖို့က သိပ်အရေးကြီးတာ။ အဲ့ဒီလို ရိုးသားမှုကိုမှ အလေးမထားဘဲ ကိုယ့်အကျိုးအတွက်ပဲ ကြည့်တတ်တဲ့ လူတွေအကြောင်းကို မြင်လာရတဲ့အခါ ကိုယ်ဘာရန်မှ မလုပ်ချင်တော့ဘူး။ ရန်ဖြစ်ပြီး စကားတွေ အများကြီး ပြောနေရမှာထက် အဲ့ဒီလိုလူတွေနဲ့ ဝေးဝေးမှာ နေတာကပဲ ကိုယ့်အတွက် ပိုပြီး စိတ်အေးချမ်းမယ်ဆိုတာ သိသွားလို့ပါ။ ကိုယ့်စေတနာကို တန်ဖိုးမထားတတ်တဲ့သူတွေအတွက် ကိုယ့်အချိန်တွေ ထပ်မဖြုန်းချင်တော့ဘူး။

ခေတ်ကာလအရ လူတွေက တစ်ယောက်ကိုတစ်ယောက် အသုံးချဖို့ပဲ ကြည့်နေကြတဲ့ကြားမှာ ကိုယ့်ဘက်က ရိုးသားဖို့ ကြိုးစားခဲ့တာက မမှားပါဘူး။ ဒါပေမဲ့ အဲ့ဒီရိုးသားမှုကို အသုံးချသွားတဲ့သူတွေအကြောင်း သိလိုက်ရတဲ့နေ့မှာ ကိုယ့်ဘက်ကတော့ ဘယ်သူ့ကိုမှ စိတ်မဆိုးသလို ဘာမှလည်း ပြန်မပြောချင်တော့ဘူး။ ကိုယ့်စေတနာကို အလေးမထားတဲ့ နေရာကနေ အေးအေးဆေးဆေးပဲ ထွက်လာခဲ့လိုက်တာက ကိုယ့်ကိုယ်ကိုယ် ပြန်တန်ဖိုးထားတာပါပဲ။

အခုတော့ ဘယ်သူတွေ ဘာပြောပြော၊ ဘယ်သူတွေ ဘယ်လိုပဲ လုပ်လုပ် ကိုယ့်ဘက်ကတော့ အေးအေးဆေးဆေးပဲ စောင့်ကြည့်နေပါတော့မယ်။ လူတွေရဲ့ သဘာဝကို နားလည်သွားတဲ့နေ့မှာ ဘာစကားမှ အများကြီး မပြောဘဲ ကျောခိုင်းလိုက်တာက အကောင်းဆုံး တုံ့ပြန်မှုပဲလို့ ကိုယ်ယုံကြည်တယ်။ မရိုးသားတဲ့သူတွေကတော့ သူတို့ဘာသာ သူတို့လည်ပတ်နေပါစေ၊ ကိုယ်ကတော့ သူတို့ဘဝထဲကနေ အသံတိတ်ပဲ ထွက်လာခဲ့လိုက်ပြီ။

28/01/2026

“လူတွေက ပျော်ရွှင်မှုကို တကယ်လိုချင်တာ ဟုတ်ရဲ့လား” (The Paradox of Happiness)

🔳 လူတိုင်းကို မေးကြည့်ရင်တော့ "ငါ ပျော်ချင်တာပေါ့" လို့ပဲ ဖြေကြမှာပါ။ ဒါပေမဲ့ လူ့အပြုအမူတွေကို သေချာလိုက်ကြည့်ရင် လူတွေဟာ ပျော်ရွှင်ခြင်း (Happiness) ထက် မွန်းကြပ်မှု၊ ဒုက္ခနဲ့ ရုန်းကန်နေရမှုတွေကို မသိစိတ်ကနေ ပိုနှစ်သက်နေသလားလို့ သံသယဖြစ်စရာ ရှိတယ်။

Slavoj Žižek က ပြောဖူးတယ်။ "ကျွန်တော်တို့တွေ တကယ်လိုချင်တာက ပျော်ရွှင်မှု မဟုတ်ဘူး။ ကျွန်တော်တို့ လိုချင်တာက 'လိုချင်နေရခြင်း' (Desire) ကိုသာ ဖြစ်တယ်" တဲ့..။

🔳 ခွေးတစ်ကောင်ဟာ ကားတစ်စီးမောင်းသွားရင် အနောက်ကနေဟောင်ပြီး အတင်းပြေးလိုက်တယ်။ ဒါပေမဲ့ တကယ်လို့ ကားရပ်ပေးလိုက်ရင် အဲဒီခွေး ဘာဆက်လုပ်မလဲ။ ဘာလုပ်ရမှန်းမသိဘဲ ကြောင်သွားလိမ့်မယ်။ သူလိုချင်တာ ကားကို ဖမ်းမိဖို့ မဟုတ်ဘူး။ "လိုက်ဖမ်းနေရတဲ့ အရသာ" (The thrill of the chase) ကို လိုချင်တာ။

လူတွေလည်း ဒီအတိုင်းပဲ..။

ငါသာ ထီပေါက်ရင်၊ ငါသာ ရာထူးတိုးရင်၊ ငါသာ ဒီကောင်မလေးကို ရရင်... ဆိုပြီး မျှော်လင့်ချက်တွေနဲ့ ရှင်သန်ကြတယ်။ တကယ်ရသွားတဲ့အခါ ခဏပဲ ပျော်ပြီး နောက်ထပ် လိုချင်စရာ အသစ်တစ်ခုကို ရှာဖွေပြီး ဒုက္ခခံကြပြန်ရော။

ဆိုလိုတာက ကျွန်မတို့ဟာ "ရည်မှန်းချက် ပြည့်ဝသွားခြင်း" (Satisfaction) ကို မလိုချင်ဘူး။ "တောင့်တနေရတဲ့ အခြေအနေ" (State of Desiring) ကိုပဲ စွဲလမ်းနေကြတာ။ ပန်းတိုင်ရောက်သွားရင် ပျင်းစရာကြီး ဖြစ်သွားမှာကို မသိစိတ်က ကြောက်နေကြတာ။

🔳 နောက်တစ်ခုက Self-Sabotage (ကိုယ့်လမ်းကိုယ်ဖျက်ခြင်း)။

ဘဝမှာ အရာရာ အဆင်ပြေနေပြီ၊ ငြိမ်းချမ်းနေပြီဆိုရင် လူတွေက မနေတတ်ကြတော့ဘူး။ ပြဿနာ မရှိမရှိအောင် ရှာကြတော့တယ်။

• အိမ်ထောင်ရေး သာယာနေရင် ရန်ဖြစ်စရာ အကြောင်းရှာလာတယ်။
• အလုပ်အဆင်ပြေနေရင် အလုပ်ထွက်ချင်စိတ် ပေါက်လာတယ်။

ဘာလို့လဲဆိုတော့ လူသားတွေဟာ "ငြိမ်းချမ်းခြင်း" နဲ့ မတည့်ဘူး။ ကျွန်မတို့ရဲ့ ဦးနှောက်က ပြဿနာဖြေရှင်းဖို့ (Problem Solving) ဒီဇိုင်းလုပ်ထားတာ။ ဖြေရှင်းစရာ ပြဿနာမရှိရင် ဘဝက အဓိပ္ပာယ်မဲ့သလို ခံစားလာရလို့ ဒုက္ခကို ဖိတ်ခေါ်တတ်ကြတယ်။

ဒါကြောင့် "ငါ အေးအေးဆေးဆေး နေချင်တယ်" ဆိုတာ လိမ်ညာမှုတစ်ခုပဲ။ တကယ် အေးဆေးသွားရင် လူတွေက "Drama" တစ်ခုခုကို ပြန်တောင့်တလာကြစမြဲပဲ။

🔳 Happiness (ပျော်ရွှင်မှု) ဆိုတာ ဈေးကွက်စီးပွားရေးရဲ့ အကြီးမားဆုံး လိမ်ညာမှု (Marketing Gimmick) တစ်ခုလို့တောင် ပြောလို့ရတယ်။

လူတွေကို မပျော်အောင် လုပ်ထားမှ ပစ္စည်းတွေ ရောင်းရမှာလေ..။

"မင်း ဒါမရှိသေးလို့ မပျော်တာ၊ ဝယ်လိုက်ရင် ပျော်သွားမယ်" ဆိုပြီး ဆွဲဆောင်တယ်။ တကယ်တမ်း ဝယ်ပြီးရင် မပျော်ဘူးဆိုတာ သူတို့သိသလို ကိုယ်လည်း သိတယ်။ ဒါပေမဲ့ ကျွန်တော်တို့က အဲဒီ "မျှော်လင့်ချက်" ကို ဝယ်နေကြတာ။

Schopenhauer ရဲ့ Pessimism အလိုအရဆိုရင် "Life is a pendulum swinging between pain and boredom" (ဘဝဆိုတာ နာကျင်မှုနဲ့ ပျင်းရိမှုကြား ယိမ်းထိုးနေတဲ့ နာရီချိန်သီးပဲ) တဲ့။

တစ်ခုခုကို လိုချင်နေတုန်းက မရလို့ နာကျင်ရတယ်။ ရပြီးသွားပြန်တော့လည်း ပျင်းရိလာပြန်ရော။ ဒီနှစ်ခုကြားမှာပဲ သံသရာလည်နေတာ။ ပျော်ရွှင်မှုဆိုတာ အဲဒီ ဒုက္ခနှစ်ခုကြားက ခဏတာ အနားယူချိန် (Brief pause) လေးပဲ ဖြစ်တယ်။

🔳 ဒါဆို ဘာဆက်လုပ်မလဲ။ ပျော်ရွှင်မှုကို လိုက်ရှာနေတာ ရပ်လိုက်ဖို့ပါပဲ။

Fyodor Dostoevsky ပြောသလို "လူသားတွေဟာ ပျော်ရွှင်မှုလောက်ပဲ လိုအပ်တာ မဟုတ်ဘူး။ တူညီတဲ့ ပမာဏလောက်ပဲရှိတဲ့ ဒုက္ခဆင်းရဲကိုလည်း လိုအပ်တယ်" ဆိုတာကို လက်ခံလိုက်ပါ။

ဘဝရဲ့ ရည်ရွယ်ချက်က "ပျော်ရွှင်ဖို့" (To be happy) မဟုတ်ပါဘူး။ "အဓိပ္ပာယ်ရှိဖို့" (To be meaningful) ပါ။
အဓိပ္ပာယ်ရှိဖို့အတွက်ဆိုရင် ပျော်စရာတွေရော၊ နာကျင်စရာတွေရော၊ ရုန်းကန်ရတာတွေကိုရော ပွေ့ဖက်ထားနိုင်ရပါမယ်။

🔳 နိဂုံးချုပ်ရရင်...
သင် အခု မပျော်ဘူးဆိုရင် ဝမ်းမနည်းပါနဲ့။ သင့်ရဲ့ မသိစိတ်က အဲဒီ မပြည့်စုံမှုကို လိုအပ်နေလို့ ဖန်တီးထားတာ ဖြစ်နိုင်တယ်။

ပြည့်စုံခြင်းဆိုတာ နိဂုံးပဲ။ မပြည့်စုံခြင်းကမှ ဆက်လက်ရှင်သန်ဖို့ တွန်းအား (Drive) တစ်ခု ဖြစ်နေတတ်လို့ပါပဲ။

ဒါကြောင့် "ပျော်ရွှင်သော ဘဝ" ကို မရှာပါနဲ့။
အခက်အခဲတွေ၊ ဒုက္ခတွေ ကြုံလာရင်တောင် ကြံ့ကြံ့ခံပြီး ရှေ့ဆက်ချင်စိတ် ဖြစ်ပေါ်စေမယ့် "အကြောင်းပြချက် ခိုင်ခိုင်လုံလုံရှိသော ဘဝ" ကိုသာ တည်ဆောက်ပါ။

#ဉာဏ

January 28, 2026

_________________________________________
ဆရာမဉာဏ၏စာအုပ်များကို City Mart စင်တာများနဲ့ အမြို့မြို့အနယ်နယ် စာအုပ်ဆိုင်များမှာ ဝယ်ယူရရှိနိုင်ပါတယ်။ Online က မှာယူလိုပါလျှင် Page Messenger ကနေ လာရောက်မှာယူနိုင်ပါတယ်။

27/01/2026

"အားနည်းချက်ရှိတာဟာ ပျော့ညံ့တာလား.."

🔳 လူတော်တော်များများက မျက်ရည်ကျတာ၊ ကြောက်လန့်တာ၊ မသိနားမလည်တာကို ဝန်ခံရမှာ ရှက်ကြတယ်။ ဒါတွေက "ပျော့ညံ့မှု" (Weakness) လို့ သတ်မှတ်ထားကြတယ်။

"လူကြီးဖြစ်နေပြီ၊ မငိုရဘူး"၊ "ခေါင်းဆောင်ပဲ၊ အားလုံးသိနေရမယ်" ဆိုတဲ့ ဖိအားတွေနဲ့ ကြီးပြင်းလာကြတယ်။

ဒါပေမဲ့ Brene Brown က နှစ်ပေါင်းများစွာ သုတေသနလုပ်ပြီးနောက်မှာ ဆန့်ကျင်ဘက် အဖြေတစ်ခုကို တွေ့ရှိခဲ့တယ်။

"Vulnerability is not weakness; it’s our greatest measure of courage." (ထိခိုက်လွယ်ခြင်း/ဖွင့်ဟခြင်းဟာ ပျော့ညံ့တာ မဟုတ်ဘူး။ သတ္တိရှိခြင်းရဲ့ အကောင်းဆုံး အတိုင်းအတာ တစ်ခုဖြစ်တယ်) တဲ့။

🔳 Vulnerability ဆိုတာ ဘာလဲ..?

Brene Brown ရဲ့ အဓိပ္ပာယ်ဖွင့်ဆိုချက်အရ "မသေချာမှု၊ စွန့်စားရမှု နဲ့ စိတ်ခံစားချက်ကို ဖွင့်ထုတ်ပြသမှု" (Uncertainty, Risk, and Emotional Exposure) ဖြစ်တယ်။

ဥပမာ ...

ကိုယ့်ကို ပြန်ချစ်ပါ့မလား မသေချာတဲ့ သူတစ်ယောက်ကို "ချစ်တယ်" လို့ အရင်စပြောလိုက်တာဟာ Vulnerability ပါ။

အစည်းအဝေးခန်းထဲမှာ လူကြီးတွေ ဝိုင်းနေတဲ့ကြားက "ကျွန်တော် ဒါကို နားမလည်ဘူးဗျ၊ ရှင်းပြပေးပါ" လို့ မေးလိုက်တာဟာ Vulnerability ပါ။

ကိုယ့်အမှားတစ်ခုအတွက် "ငါမှားသွားတယ်၊ တောင်းပန်ပါတယ်" လို့ ဝန်ခံလိုက်တာဟာ Vulnerability ပါ။

ဒါတွေလုပ်ဖို့ "ပျော့ညံ့" လို့ ရပါသလား။ လုံးဝမရပါဘူး။ အင်မတန် "သတ္တိရှိ" မှ လုပ်လို့ရတဲ့ ကိစ္စတွေပါ။

🔳 ကျွန်မတို့မှာ ထူးဆန်းတဲ့ အမြင်တစ်ခု ရှိတယ်။
သူများတွေက သူတို့အမှားကို ဝန်ခံရင်၊ သူတို့ရဲ့ ခံစားချက်ကို ရိုးသားစွာ ဖွင့်ပြောရင် "ဟာ.. ဒီလူ ရိုးသားလိုက်တာ၊ သတ္တိရှိလိုက်တာ" လို့ ကျွန်မတို့ မြင်တယ်။

ဒါပေမဲ့ ကိုယ်ကိုယ်တိုင် အဲဒီလို လုပ်ရမှာကျတော့ "ငါ့ကို အထင်သေးသွားမလား၊ ငါ့ကို သနားသွားမလား" ဆိုပြီး ကြောက်ကြတယ်။

Brene Brown ပြောသလိုပါပဲ။
"Vulnerability is the first thing I look for in you and the last thing I want to show you in me."
(မင်းဆီမှာတော့ အဲဒီရိုးသားမှုကို ငါလိုချင်တယ်။ ငါ့ဆီမှာကျတော့ အဲဒါကို မင်းမြင်မှာ ငါကြောက်တယ်)။

🔳 "Cool" ဖြစ်ချင်တဲ့ ယဉ်ကျေးမှုက ကျွန်မတို့ကို ဒုက္ခပေးတယ်။

ဘာမှ မဖြစ်သလို နေပြတာ၊ စိတ်မဝင်စားသလို နေပြတာ၊ ခံစားချက်မရှိသလို နေပြတာကို ခေတ်မီတယ်၊ ရင့်ကျက်တယ်လို့ ထင်နေကြတယ်။
တကယ်တမ်းကျတော့ အဲဒါဟာ သံချပ်ကာဝတ်စုံ (Armor) ဝတ်ထားတာပါပဲ။ ကိုယ်မထိခိုက်အောင် ကာကွယ်ထားတာ။

ပြဿနာက ဘာလဲဆိုတော့ ခံစားချက်တွေကို ထုံဆေးထိုးလိုက်သလို (Numb) လုပ်လိုက်တဲ့အခါ...
အဆိုးတွေ (ကြောက်စိတ်၊ ဝမ်းနည်းစိတ်၊ ရှက်စိတ်) ကို မခံစားရအောင် ပိတ်ပင်လိုက်ရင်၊ အကောင်းတွေ (ပျော်ရွှင်မှု၊ ကျေးဇူးတင်မှု၊ ချစ်ခင်မှု) ကိုပါ ခံစားလို့ မရတော့တာပါပဲ။

စိတ်ခံစားချက်ကို Select လုပ်ပြီး ပိတ်လို့ မရပါဘူး။ ပိတ်ရင် အကုန်ပိတ်သွားတာပါ။ ဒါကြောင့် ဘာမှမဖြစ်သလို နေတတ်သူတွေရဲ့ ဘဝဟာ ခြောက်ကပ်ကပ် ဖြစ်နေတတ်တယ်။

🔳 ခေါင်းဆောင်မှုအပိုင်းမှာလည်း ဒီလိုပါပဲ။
အရာရာ ငါသိတယ်၊ ငါမှန်တယ် ဆိုတဲ့ ခေါင်းဆောင်ကို နောက်လိုက်တွေက မယုံကြည်ကြဘူး။ ဟန်ဆောင်နေမှန်း သိလို့ပါ။

"ဒီကိစ္စကို ငါအဖြေမသိဘူး၊ ဒါပေမဲ့ ငါတို့ အတူတူ ရှာဖွေကြမယ်" လို့ ပြောရဲတဲ့ ခေါင်းဆောင်ကိုသာ လူတွေက ယုံကြည်လေးစားကြတာပါ။

ကိုယ့်ရဲ့ မပြည့်စုံမှု (Imperfection) ကို လက်ခံလိုက်ခြင်းက လူတွေနဲ့ ပိုပြီး ရင်းနှီးကျွမ်းဝင်စေတယ်။
"ငါလည်း လူပါကွာ၊ ငါလည်း မှားတတ်တာပါပဲ" ဆိုတဲ့ သဘောထားက ဆက်ဆံရေး (Connection) ကို တည်ဆောက်ပေးတယ်။ ပြီးပြည့်စုံနေတဲ့ စက်ရုပ်ကြီးနဲ့ ဘယ်သူမှ မိတ်ဆွေမဖြစ်ချင်ပါဘူး။

🔳 ဒါကြောင့် ကိုယ့်ကိုယ်ကိုယ် ကာကွယ်ဖို့ တည်ဆောက်ထားတဲ့ တံတိုင်းတွေကို နည်းနည်းချင်း ဖြိုချကြည့်ပါ။

အကူအညီ လိုတဲ့အခါ "ကူညီပါ" လို့ ပြောကြည့်ပါ။
အဆင်မပြေတဲ့အခါ "ငါ အဆင်မပြေဘူး" လို့ ဝန်ခံကြည့်ပါ။
အမှားလုပ်မိတဲ့အခါ ဆင်ခြေမပေးဘဲ တောင်းပန်ကြည့်ပါ။

ဒါဟာ ကိုယ့်ရဲ့ အားနည်းချက်ကို ပြတာ မဟုတ်ပါဘူး။ ကိုယ့်ရဲ့ လူသားဆန်မှု (Humanity) နဲ့ ကိုယ့်ရဲ့ ယုံကြည်မှု (Confidence) ကို ပြသတာပါ။

🔳 နိဂုံးချုပ်အနေနဲ့ Theodore Roosevelt ရဲ့ မိန့်ခွန်းတစ်ခုနဲ့ အဆုံးသတ်ချင်တယ်။

"ပွဲကြည့်စင်ပေါ်ကနေ ဝေဖန်နေတဲ့သူတွေက အရေးမပါဘူး။ သွေးတွေ၊ ချွေးတွေ၊ ဖုန်တွေ ပေကျံပြီး ကွင်းထဲမှာ ကိုယ်တိုင်ဆင်းတိုက်ခိုက်နေတဲ့ လူကသာ အရေးကြီးတယ်။ သူဟာ မှားကောင်း မှားမယ်။ လဲကောင်း လဲမယ်။ ဒါပေမဲ့ သူကမှ တကယ့် ရှင်သန်နေသူ ဖြစ်တယ်" တဲ့။

Vulnerability ဆိုတာ အဲဒီ ကွင်းလယ်ခေါင်ကို ဝင်ရဲတဲ့ သတ္တိပါပဲ။ ထိခိုက်မှာ ကြောက်ပြီး ပွဲကြည့်စင်ပေါ်မှာပဲ နေမလား၊ ထိခိုက်ခံပြီး ကွင်းထဲ ဝင်မလား ဆိုတာ ကိုယ်တိုင် ရွေးချယ်ရမှာ ဖြစ်ပါတယ်။

#ဉာဏ

January 27

_________________________________________
ဆရာမဉာဏ၏ စာအုပ်များကို City Mart စင်တာများနဲ့ အမြို့မြို့အနယ်နယ် စာအုပ်ဆိုင်များမှာ ဝယ်ယူရရှိနိုင်ပါတယ်။ Online က မှာယူလိုပါလျှင် Page Messenger ကနေ လာရောက်မှာယူနိုင်ပါတယ်။

Address

Yangon
00001

Website

Alerts

Be the first to know and let us send you an email when Drops Of Light posts news and promotions. Your email address will not be used for any other purpose, and you can unsubscribe at any time.

Shortcuts

Share

Category