News Ambassador - TV (2025)

16/07/2025

မြန်မာ-ထိုင်း နယ်စပ်ရှိ နတ်အိမ်တောင်စခန်းသို့ စစ်ကူလာသော စကစ စစ်ကြောင်းနှင့် တိုက်ပွဲ ၄ ကြိမ် ဖြစ်ပွားပြီး သုံ့ပန်း ၄ ဉီး ဖမ်းမိ

ရေဖြူ၊ ဇူလိုင် ၁၆
News Ambassador

တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ် ၊ ကလိန်အောင်မြို့ အရှေ့ဘက်ခြမ်း ထိုင်း - မြန်မာ နယ်စပ်ရှိ နတ်အိမ်တောင်စခန်းသို့ အင်အားဖြည့်တင်းရန် စစ်ကြောင်းထိုးလာသော စစ်ကောင်စီတပ်နှင့် တိုက်ပွဲ ၄ ကြိမ်ဖြစ်ပွားခဲ့ပြီး သုံ့ပန်း ၄ ဉီးဖမ်းမိထားကြောင်း တော်လှန်ရေးတပ်များဘက်မှ သတင်းထုတ်ပြန်လာသည်။

ဗျူဟာ၃၃၊ KNLA ပူးပေါင်းတပ်များနှင့် စစ်ကောင်စီတပ်တို့သည် ဂျူလိုင်လ ၁၁ ရက်၊ ၁၂ရက်၊ ၁၄ရက်၊ ၁၅ရက် လေးရက်အတွင်း တိုက်ပွဲ ၄ ကြိမ်ဖြစ်ပွားခဲ့ပြီး စစ်ကောင်စီတပ်သား ‌၄ ဦး အရှင်ဖမ်းဆီးရမိကာ လက်နက်ခဲယမ်းနှင့် ဆက်စပ်ပစ္စည်းများ သိမ်းဆည်းရမိထားသည်ဟု ထုတ်ပြန်ထားခြင်းဖြစ်သည်။

အဆိုပါ တိုက်ပွဲများအတွင်း စစ်ကောင်စီတပ်ဘက်က ဗိုလ်မှူး‌အောင်ဘိုဟိန်းအပါအဝင် စစ်ကောင်စီတပ်သား (၄)ဦးထက်မနည်း သေဆုံးခဲ့ကြောင်းလည်း တော်လှန်ရေးတပ်များဘက်က ခန့်မှန်းထားကြသည်။

တိုက်ပွဲအတွင်း လက်နက်ငယ် (‌၉) လက် ၊ RPG (၁) လက် ၊ ၆၀ မမ (၁) လက် နှင့် ခဲယမ်းများစွာသိမ်းဆည်းရရှိခဲ့သည်ဟု ဆိုသည်။
အဆိုပါတိုက်ပွဲဖော်ဆောင်မှုကို ဗျူဟာ၃၃၏ ဒေါနစစ်ကြောင်း-၂ ၊ ဒေါနစစ်ကြောင်း-၃၊ KNLA တပ်မဟာ-၄ ပူးပေါင်းတပ်များ၊ တပ်မဟာ-၆ တပ်ရင်း ၂၇ ပူးပေါင်းတပ်များ၊ NMSP(AD)R.M.A ၊မွန်ပြည်‌တော်လှန်ရေးတပ် MSRF ၊ KTLA ၊ Nonentity Coach လေ့ကျင့်ရေးတပ်ဖွဲ့တို့ ပါဝင်တိုက်ခိုက်ခဲ့ခြင်းဖြစ်ကြောင်း ဆိုသည်

ဒဏ်ရာရရှိနေသော စစ်ကောင်စီတပ်သားများကို ကရင်အမျိုးသားအစည်းအရုံး KNU မှ ကောင်းမွန်စွာ ကျန်းမာရေးစောင့်ရှောက်မှုပေးထားပြီး စစ်သုံ့ပန်းကျင့်ဝတ်များနှင့်အညီ ထိန်းသိမ်းထားကြောင်းလည်း ထုတ်ပြန်ချက်အတွင်း ထည့်သွင်ဖော်ပြထားသည်။

16/07/2025

အခွန်မကောက်ရန် ကန့်ကွက်ပြောဆိုသည့် မြစ်ခြေဒေသခံ ၈ ဉီးကို ပခုက္ကူ (ဇုန် ၁) ပကဖ က ဖမ်းဆီးထားသဖြင့် ပြန်လွှတ်ပေးရန် မိသားစုဝင်များ တောင်းဆို
ပခုက္ကူ၊ ဇူလှိုင် ၁၆
News Ambassador
မကွေးတိုင်း ၊ ပခုက္ကူမြို့နယ်၊ မြစ်ခြေမြို့တွင် အခွန်မကောက်ရန် ကန့်ကွက်တောင်းဆိုခဲ့သည့် ဒေသခံပြည်သူ ၈ ဉီးကို ပခုက္ကူမြို့နယ် ၊ စက်မှုဇုန် ၁ ပကဖ အဖွဲ့က ရိုက်နှက်၍ ဖမ်းဆီးထားသဖြင့် ပြန်လွှတ်ပေးရန် မိသားစုဝင်များက တောင်းဆိုကြသည်။
ပခုက္ကူမြို့ ၊ စက်မှုဇုန် ၁ ပကဖ အဖွဲ့က မြစ်ခြေမြို့ ၊ အင်ဝိုင်းရွာတွင် လာရောက် အထိုင်ချပြီး ဖြတ်သန်းသွားလာသော ဒေသခံပြည်သူများထံမှ ကုန်ပစ္စည်းအခွန်ကောက်ခံနေသဖြင့် မကောက်ခံရန် ၊ ဂိတ်ပိတ်၍ထွက်သွားရန် တောင်းဆိုခဲ့ကြောင်း၊ ယင်းနောက် ဇွန် ၂၀ ရက်နေ့တွင် ကန့်ကွက်တောင်းဆိုသူ ဒေသခံပြည်သူများအထဲမှ ၁၀ ဉီးကို အဆိုပါ စက်မှုဇုန် ၁ ပကဖ အဖွဲ့က ၎င်းတို့၏ ရုံးအတွင်းသို့ ခေါ်ယူတွေ့ဆုံပြီး ရိုက်နှက်ကာ ၂ ဉီးကိုသာ ပြန်လွှတ်ပေးပြီး ၈ ဉီးကို ယနေ့အထိ ဖမ်းဆီးထားကြောင်း နစ်နာသူ ဒေသခံအချို့က News Ambassador သို့ သတင်းပေးပို့လာသည်။
“အကုန်လုံးကို ပါးတွေနားတွေရိုက်ပြီး ခေါင်းဆောင်လို့ ထင်တဲ့ သူတွေကို ဖမ်းထားတာ။ ပြန်လွှတ်လာတဲ့ ၂ ယောက်ကလည်း ဒဏ်ရာတွေချည်းပဲ။ ကျန်တဲ့ ၈ ဉီးမှာ အမျိုးသမီးက ၆ ဉီး ၊ အမျိုးသားက ၂ ဉီးပါတယ်။ သူတို့အဖမ်းခံထားရတာ ကြာပြီဆိုတော့ မိသားစုဝင်တွေက စိတ်ပူနေကြပြီ။ အခုထိ ပြန်မလွှတ်ပေးကြသေးဘူး။ ဒီကောင်တွေ အခွန်ကောက်တာက ဘိလပ်မြေတောင် တစ်အိတ်ချင်းစီအပေါ်မှာ လိုက်ပြီးတော့ အခွန်ကောက်တယ်”ဟု ဒေသခံ ပြည်သူတစ်ဉီးက ပြောပြသည်။
ဇွန် ၂၂ ရက်နေ့တွင် ဖမ်းဆီးခံပြည်သူများအတွက် ဒေသခံပြည်သူအချို့က ကန့်ကွက်ဆန္ဒထုတ်ဖော်ခဲ့ကြပြီး သက်ဆိုင်ရာ မြို့နယ်အဆင့် ပြည်သူ့အုပ်ချုပ်ရေး ပအဖ နှင့် ပြည်သူ့ကာကွယ်ရေး ပကဖ အဖွဲ့များသို့ တိုင်ကြားစာများ ပေးပို့ခဲ့သော်လည်း မည်သည့်အဖွဲ့အစည်းကမှ ကြားဝင်ပြီး တာဝန်ယူဖြေရှင်းပေးလိုခြင်း မရှိကြကြောင်း ဒေသခံက ဆိုသည်။
“သွားတိုင်တော့ သူတို့ ကြားမဝင်ချင်ဘူးပေါ့။ NUG ကို တိုင်ဖို့ ပြီးတော့ သတင်းမီဒီယာတွေကိုပဲ သတင်းလှမ်းပို့ပြီး သတင်းထုတ်လိုက်ဖို့ ပြောကြတယ်” ဟု အဆိုပါ ဖြစ်စဉ်ကို သိရှိထားသူ ဒေသခံ က ဆိုသည်။
ဇွန် ၂၀ ရက်နေ့က ဇုန် ၁ ပကဖ အဖွဲ့နှင့် ဒေသခံပြည်သူများ တွေ့ဆုံစဉ် ငြင်းခုန်ပြောဆိုခဲ့ကြသည့် စကားပြောခန်း အသံဖိုင်ကိုလည်း News Ambassador က ရရှိထားပြီး အဆိုပါ အသံဖိုင်အရ ဒေသခံများက ၎င်းတို့နယ်မြေအတွင်း ဂိတ်စခန်းချလာရောက် နေသော ဇုန် ၁ ပကဖ အဖွဲ့ကို ကန့်ကွက်ကြောင်း သိရသည်။ ပကဖ အဖွဲ့ဘက်ကလည်း ည ၉ နာရီနောက်ပိုင်း အပြင်ထွက်ခြင်းပြုလုပ်သည့် ကိစ္စနှင့်ပတ်သက်၍ “ဒလန်” ခေါင်းစဉ်တပ်ကာ ကန့်ကွက်တန်ပြန် ကန့်ကွက်ပြောဆိုခဲ့ကြောင်း တွေ့ရသည်။
အဆိုပါ ကိစ္စနှင့်ပတ်သက်၍ ဇုန် ၁ ပကဖ ၏ အထက်အဖွဲ့အစည်းဖြစ်သော မြို့နယ် ပကဖ အဖွဲ့ကို ဆက်သွယ်မေးမြန်းရန် ကြိုးစားခဲ့သော်လည်း ဖြေဆိုရန်ခေါင်းရှောင်နေကြသည်။
ဗီဒီယို - ဇွန် ၂၀ ရက်နေ့က ဒေသခံပြည်သူများ ဆန္ဒထုတ်ဖော်စဉ်

12/07/2025

စစ်ကောင်စီတပ်ဖွဲ့ဝင် ၁၀၀ ကျော် ထိုင်းဘက်သို့ ထွက်ပြေးပြီး ဉကရစ်ထ စခန်းကို တော်လှန်ရေးတပ်များ သိမ်းပိုက်

မြဝတီ၊ ဇူလိုင် ၁၂
News Ambassador

ကရင်ပြည်နယ် မြဝတီမြို့တောင်ဘက်၊ မြန်မာ-ထိုင်းနယ်စပ်ရှိ စစ်ကောင်စီတပ်အထိုင် ဉကရစ်ထစခန်းကို ယနေ့တွင် တော်လှန်ရေးတပ်များက သိမ်းပိုက်လိုက်ပြီဖြစ်ကြောင်း Venom စစ်ကြောင်းက ကနဉီး သတင်းထုတ်ပြန်လာသည်။

မြဝတီမြို့တောင်ဘက်၊ မြဝတီ-ဝေါ်လေ ကားလမ်းဘေးရှိ စစ်ကောင်စီ၏ ဥကရစ်ထစခန်းကို ယနေ့နေ့လယ်တွင် KNU နှင့် PDF တပ်ပေါင်းစုတို့က တိုက်ခိုက်သိမ်းပိုက်ခဲ့ခြင်းဖြစ်သည်။

ဥကရစ်ထ ကို အခြေပြု၍ စစ်ကောင်စီသည် သက်ရှိစည်းရိုးအမည်ရ ဝါဒဖြန့်စစ်ကားတစ်ကား ရိုက်ကူးထားပြီး ယနေ့တွင် အဆိုပါ စခန်းမှ စစ်ကောင်စီတပ်ဖွဲ့ဝင် ၁၀၀ ကျော်သည် ထိုင်းဘက်သို့ ထွက်ပြေးတိမ်းရှောင်သွားခဲ့သည်။

စခန်းအတွင်းမှ လက်နက်အများအပြားသိမ်းဆည်းရရှိခဲ့ပြီး စကစအလောင်းအချို့ကိုလည်း သိမ်းဆည်းရမိခဲ့ကြောင်း သိရသည်။

ဗီဒီယို- Venom စစ်ကြောင်း

10/07/2025

မြိုင်ရှိ စစ်ကောင်စီအထိုင် စီမံကိန်းရုံးကို တော်လှန်ရေးတပ်များ တိုက်ခိုက်၊ သုံ့ပန်း ၁၂ ဉီး နှင့် လက်နက်ခဲယမ်းများ သိမ်းဆည်းရမိ

မြိုင်၊ ဇူလိုင် ၁၀
News Ambassador

မကွေးတိုင်း ၊ မြိုင်မြို့ အရှေ့ဖျားရှိ စစ်ကောင်စီတပ်အထိုင် စီမံကိန်းရုံး တပ်စခန်းကို တော်လှန်ရေးတပ်များက ဝင်ရောက်တိုက်ခိုက်ရာ သုံ့ပန်း ၁၂ ဉီးနှင့် လက်နက်ခဲယမ်းများ သိမ်းဆည်းရမိခဲ့ကြောင်း မြိုင် ပကဖ က သတင်းထုတ်ပြန်လာသည်။

ဇူလိုင် ၉ ရက်နေ့ မနက် ၄ နာရီခွဲမှစတင်၍ မြိုင်-ပခုက္ကူလမ်းပေါ်၊ မြိုင်မြို့ အရှေ့ဖျားရှိ စစ်ကောင်စီတပ် အထိုင်ချရာ စီမံကိန်းရုံးတပ်စခန်းကို တော်လှန်ရေးတပ်များက ဝင်ရောက်တိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

တိုက်ပွဲဖြစ်ပွားနေစဉ် စစ်ကူပေးရန် ၃ ကြိမ်တိုင် ကြိုးစား၍ ထွက်ခွာလာသော မြိုင်မြို့မရဲစခန်းမှ စကစ စစ်ကြောင်းကိုလည်း ၃ ကြိမ်စလုံး ဟန့်တား တိုက်ခိုက်ခဲ့ကြောင်း၊ လေကြောင်းတိုက်ခိုက်မှုလည်း ၂ ကြိမ် တိုင်ရှိခဲ့ပြီး စစ်ကောင်စီအထိုင်စခန်း စီမံကိန်းရုံးကို ညနေ ၅ အချိန်၌ အပြီးတိုင် သိမ်းပိုက်ရရှိခဲ့ကြောင်း မြိုင် ပကဖ ၏ သတင်းထုတ်ပြန်ချက်တွင် ဖော်ပြထားသည်။

အဆိုပါ တိုက်ပွဲအတွင်း တော်လှန်ရေးရဲဘော် ၁ ဉီး ကျဆုံး ၊ ၆ ဉီး ဒဏ်ရာရခဲ့ပြီး စစ်ကောင်စီတပ်ဘက်မှ ရဲအုပ် သောင်းထွေးစိုး၊ ရဲအရာခံ ထွန်းမင်းဇော်၊ ရဲတပ်ကြပ် ဇော်ဝင်းနိုင်၊ ရဲဒုတပ်ကြပ် တင်မျိုးထွန်း၊ ရဲတပ်သား ဇော်နိုင်၊ ရဲတပ်သား ရဲရင့်အောင်၊ ရဲတပ်သား သန်းတိုးအောင်၊ ရဲဒုတပ်ကြပ် မင်းမင်းထွန်း၊ ရဲတပ်သား မင်းမင်းဇော်၊ ရဲဒုတပ်ကြပ် သက်ကိုကို၊ တပ်ကြပ် ဦးထွန်း၊ တပ်သား မျိုးနိုင်ဝင်း စသဖြင့် သုံ့ပန်း ၁၂ ဉီး ကို ဖမ်းဆီးရမိကာ ဒဏ်ရာရသူများကိုလည်း ဆေးဝါးကုသမှုပေးနေကြောင်း ထုတ်ပြန်ချက်အတွင်း ဖော်ပြထားသည်။

ယင်းအပြင် စစ်ကောင်စီတပ်ထံမှ G3 သေနတ် ၁၀ လက်၊ MA3 သေနတ် ၁ လက်၊ MA4 သေနတ် ၁ လက်၊ 79 သေနတ် ၁ လက်၊ G3 ဘောက် ၁၅ ဘောက်၊ MA ဘောက် ၂ ဘောက်၊ G3 ကျည် ၁၃၆ တောင့်၊ ၅.၅၆ ကျည် ၃၇ တောင့်၊ လက်ပစ်‌ဗုံး ၉ လုံး၊ 79 အဖူး ၆ ဖူး၊ ဦးထုပ် ၅ လုံး၊ ဖုန်း ၃ လုံး၊ အီကွက်မန့် ၇ ခု၊ ငွေသား ၂၂ သိန်း တို့ကို သိမ်းဆည်းရမိခဲ့ကြောင်း သိရသည်။

စစ်ကောင်စီတပ်က ၎င်းတို့ စခန်းအသိမ်းခံရသည့် ယင်းနေ့ ည ၈ နာရီ ၁၀ မိနစ်အချိန်ခန့်တွင် မြိုင်မြို့နယ် သနပ်ရင်းကျေးရွာသို့ လေကြောင်းတိုက်ခိုက်မှု ပြုလုပ်ခဲ့ရာ ပြည်သူ ‌၁ ဦး နှင့် လသားအရွယ် ကလေးငယ် ၁ ဦး သေဆုံးခဲ့ပြီး ပြည်သူ ၄ ဦး မစိုးရိမ်ရ ထိခိုက်ဒဏ်ရာ ရရှိခဲ့ကြောင်း သိရသည်။

ယနေ့ ဇူလိုင် ၁၀ ရက်နေ့ မနက် ၇ နာရီခန့်တွင် အဆိုပါ စီမံကိန်းရုံးစခန်းအား ရှင်းလင်းရေးဆောင်ရွက်ရာ စစ်ကောင်စီတပ်ဖွဲ့နှင့် ပစ်ခတ်မှုထပ်မံဖြစ်ပွားပြီး တော်လှန်ရေးရဲဘော် ၁ ဉီး ဒဏ်ရာရခဲ့ကြောင်း သိရသည်။

စခန်းသိမ်းတိုက်ပွဲအတွင်း မြိုင်ညီညွတ်ရေးတပ်ပေါင်းစု (9+) ၊ ဇာမဏီပြောက်ကြားတပ်ဖွဲ့၊ ညီနောင်သုံးဖော် (YSO) ၊ တပ်ပေါင်းစု (Good Brother) ၊ အညာဟီးရိုး လက်နက်ကြီးအဖွဲ့၊ ဂျော်ကာပြောက်ကြားတပ်ဖွဲ့ (ဒရုန်း)၊ ကင်ဒို (ဒရုန်း) ပေါက်၊ အညာမြေပြောက်ကြားတပ်ဖွဲ့ (ဒရုန်း)၊ Burma Revolution Ranger (BRR)၊ NFTA၊ Scorpion People Denfece Force တို့ ပါဝင်တိုက်ခိုက်ခဲ့ကြောင်း သိရသည်။

ပခုက္ကူမြို့ အခြေစိုက် တပ်မ ၁၀၁ မှ ပေါက်မြို့ဘက်သို့ ဦးတည်ထွက်ခွာလာသော ယာဉ်အစီးရေ ၁၄၀ ကျော်၊ အင်အား ၁၀၀၀ ကျော်ပါ စစ်ကောင်စီစစ်ကြောင်းသည်လည်း တရွေ့ရွေ့နှင့် စစ်ကြောင်းထိုးနေပြီး တိုက်ပွဲများ ဆက်တိုက်ဖြစ်ပွားလျက်ရှိကြောင်း၊ အဆိုပါ တိုက်ပွဲများတွင် မြိုင်နှင့် ပေါက်မှ တော်လှန်ရေးရဲဘော်များ ကျဆုံးခြင်း၊ ထိခိုက်ဒဏ်ရာရခြင်း၊ လက်နက်များဆုံးရှုံးခြင်းတို့ ဖြစ်ပေါ်ခဲ့ကြောင်း မြိုင်ပကဖက ဆိုထားသည်။

10/07/2025

ယင်းမာပင်ခရိုင် PDF တပ်ရင်း ၁၅ တပ်ရင်းမှူး ၏ ထောက်ခံစာဖြင့် သယ်သော စိတ်ကြွဆေးပြား ၃ သန်းခန့်ကို CDF-ဟားခါးက ဖမ်းဆီးရမိ၊ တပ်ရင်းမှူး နှင့် တာဝန်ရှိသူအချို့ကို ဖမ်းဆီး စစ်ဆေးနေ

ယင်းမာပင်၊ ဇူလိုင် ၁၀
News Ambassador

ယင်းမာပင်ခရိုင် PDF တပ်ရင်း ၁၅ တပ်ရင်းမှူး ၏ ထောက်ခံစာဖြင့် သယ်ဆောင်လာသော စိတ်ကြွဆေးပြား ၃ သန်းခန့်နှင့် မူးယစ်ဆေးဝါးများကို ချင်းပြည်နယ်တွင် CDF-ဟားခါးက ဖမ်းဆီးရမိလိုက်ကြောင်း သိရသည်။

ဇူလိုင်လ(၈)ရက်နေ့က ချင်းပြည်ကာကွယ်ရေးတပ် Chinland Defense Force- Hakha အဖွဲ့သည် ယင်းမာပင်ခရိုင် PDF တပ်ရင်း ၁၅ တပ်ရင်းမှူး ၏ထောက်ခံစာဖြင့် သယ်ဆောင်လာသော စိတ်ကြွဆေးပြား ၃ သန်းခန့်နှင့် ဘိန်းဖြူ ၁၁၀ ကီလိုဂရမ်ခန့်၊ မောင်းပြန် သေနတ် ၂ လက်၊ စတားလင့် အင်တာနက် ၂ လုံး၊ PDF ရဲဘော် ၃ ဉီး ၊ ယာဉ်မောင်း နှင့် စပယ်ယာ ၂ ဉီးတို့ကို ဖလမ်းမြို့နယ် ဗားရ်တံတား၌ ဖမ်းဆီးရမိခဲ့ခြင်းဖြစ်ကြောင်း ယနေ့တွင် ရုပ်သံဗီဒီယိုနှင့်တကွ ထုတ်ပြန်လာခြင်းဖြစ်သည်။

အဆိုပါ ကိစ္စနှင့်ပတ်သက်၍ ဆားလင်းကြီးမြို့နယ် အခြေစိုက်၊ ယင်းမာပင်ခရိုင် PDF တပ်ရင်း ၁၄ ၏ တပ်ရင်းမှူး ဖိုးဇေ (ခ) ဇေယျာဌေး ၊ ယင်းမာပင်ခရိုင် PDF တပ်ရင်း ၁၅ ၏ တပ်ရင်းမှူး ဖိုးသောင်း တို့ကို NUG ဘက်က ဖမ်းဆီး စစ်ဆေးနေကြောင်း News Ambassador ၏ သတင်းရင်းမြစ်က ပြောသည်။

“တပ်ရင်း ၁၅ ရဲ့ တပ်ခွဲမှူး ပုတီး ကတော့ ထွက်ပြေးနေတယ်။ ကျန်တဲ့ တပ်ရင်းမှူး ၂ ဉီးကိုတော့ စစ်ဆေးနေတုန်းပဲ” ဟု သတင်းရင်းမြစ်က ပြောသည်။

CDF-ဟားခါး ၏ ထုတ်ပြန်ချက်တွင် မူးယစ်ဆေးဝါးများ သယ်ဆောင်မှု၏ တာဝန်ခံဖြစ်သော မောင်ဇော်လတ် (အမည်ရင်း ဉီးဝင်းမော်)နှင့် ကိုပုတီး (တပ်ရင်း ၁၅ တပ်ခွဲမှူး) တို့မှာ ထွက်ပြေးတိမ်းရှောင်နေသည်ဟုလည်း ဖော်ပြထားသည်။

အဆိုပါ မူးယစ်ဆေးဝါးကိစ္စများနှင့်ပတ်သက်၍ ဆားလင်းကြီးမြို့နယ်ရှိ ဒေသခံ ပြည်သူတစ်ဉီးက “ချင်းပြည်က မူးယစ်ဆေးဝါးတင် မဟုတ်ဘူးဗျ။ သူက နောက်ကွယ်မှာ နောက်ကွယ်ကနေလုပ်နေတဲ့ ဆားလင်းကြီးမြို့နယ် NLD ပြည်သူ့လွှတ်တော်ကိုယ်စားလှယ်ဟောင်း တစ်ယောက် စောမောင် တဲ့။ မျက်နှာမဲကြီးနဲ့။ အဲ့ဒီလူကြီးက ဒီလူတွေကို သူမွေးထုတ်ပြီး သူလေ့ကျင့်ပြီးတော့ သူ့အောက်က သူ့စကားကို နာခံနေလျက်နဲ့ အလုပ်လုပ်နေတဲ့သူတွေဖြစ်ပါတယ်။ အခု မူးယစ်ဆေးဝါးနဲ့ပတ်သက်ပြီး ဖမ်းဆီးခံရတဲ့သူတွေ အားလုံးက ။ စောမောင်ရဲ့ တပည့်တွေပါဗျာ။ စောမောင်က နောက်ကွယ်က လက်မဲကြီးပါ” ဟု ပြောပြသည်။

နွေဉီးတော်လှန်ရေး ၄ နှစ်ကျော်အတွင်း PDF တပ်ရင်းမှူး ၏ ထောက်ခံစာဖြင့် သယ်သော မူးယစ်ဆေးများကို ဖမ်းဆီးရမိသည့် ဖြစ်စဉ်သည် ယခု ပထမဆုံးဖြစ်စဉ် ဖြစ်သည်။

02/07/2025

ဖမ်းဆီးခံထားရသော နိုင်ငံရေးအကျဉ်း သား တစ်ဦးကို ရဲလက်မှ ပစ်ခတ်ကယ်ထုတ်ခဲ့သူများ ပြန်လည် အဖမ်းခံရ

ရန်ကုန် ၊ ဇူလိုင် ၂
Newsambassador

ရန်ကုန်တိုင်း လှိုင်သာယာမြို့နယ် တွင် နိုင်ငံ ရေးပုဒ်မဖြင့် ဖမ်းဆီးခံထားရသော မဇွန်ပွင့်လှိုင်ကို ရဲအစောင်အကြပ် များကြားမှ ကယ်ထုတ်ခဲ့သူများ သန်လျင်တွင် လက် နက် နှင့်တကွ ပြန်လည် ဖမ်းဆီးမိကြောင်း စစ်ကောင်စီ၏ ဝါဒဖြန့် ချန်နယ်များတွင် ဖော်ပြထားသည်။

မဇွန်ပွင့်လှိုင်ကို ဆေးကုပေးရန်လှိုင်သာယာမြို့နယ်ဆေးရုံကို စစ်ကောင်စီရဲတပ်ဖွဲ့ဝင်တွေခေါ်ထုတ်လာစဉ် ပစ်ခတ်ကယ်ထုတ်နိုင်ခဲ့သော်လည်း ယနေ့ မနက်မှာမဇွန်ပွင့်လှိုင်နဲ့ အမျိုးသားငါးဦးကို လက်နက် များ နှင့်အတူသန်လျင်မြို့နယ်၊ ဘောသပြေကန်ရွာအနီးမှာ ပြန်မိထားကြောင်း စစ်ကောင်စီ၏ ဝါဒဖြန့် တယ်လီဂရမ်ချန်နယ်တွေမှာ ဖော်ပြကြသည်။

ဇူလိုင်လ ၁ ရက်နေ့ ည ၇ နာရီခွဲကအကြမ်း ဖက်တိုက်ဖျက်ရေးဥပဒေ ပုဒ်မ ၅၀ (ည)ဖြင့် ဖမ်းဆီးထားသော မဇွန်ပွင့်လှိုင် အရေးပေါ် နာမကျန်းဖြစ်၍ လှိုင်သာယာမြို့နယ်ဆေးရုံသို့ ဒုရဲအုပ် ၂ ဦးက ခေါ် ဆောင် လာကြောင်း၊ ထိုသို့ ခေါ်ဆောင်လာစဉ် လှိုင်သာယာမြို့နယ်၊ စက်မှုဇုန် ၂ ၊ မင်းကြီးမဟာမင်းခေါင်လမ်းထိပ်အရောက်တွင် လူ ၂ ဦးကို ဒုရဲအုပ် ၂ ဦးကို ပစ်ခတ်ခဲ့ပြီး ဖမ်းဆီးခံထားရသော မဇွန်ပွင့်လှိုင်ကို ကယ်ထုတ်သွားခဲ့ကြောင်း သိရှိရသည်။

မဇွန်ပွင့်လှိုင်ကို ကယ်ထုတ်စဉ် ပစ်ခတ်ခံခဲ့ရသော ဒုရဲအုပ် ၁ ဦးမှာ သေနတ်ဒဏ်ရာဖြင့် သေဆုံးခဲ့ပြီး အမျိုးသမီး ဒုရဲအုပ်မှာမူ အမျိုးသမီးဒုရဲအုပ်မှာ ပုခုံးကျည်ဖောက် ဝင်ဒဏ်ရာရရှိခဲ့ကြောင်းသိရှိရသည်။

26/06/2025

ကျောက်ကြီးမြို့နယ်အတွင်း တိုက်ပွဲ စစ်ကောင်စီတပ်ဖွဲ့ဝင် ၂၂ ဉီးကို အရှင်ဖမ်းမိကြောင်း NUG ကြေညာ

ကျောက်ကြီး၊ ဇွန် ၂၆
News Ambassador

ပဲခူးတိုင်း၊ ကျောက်ကြီးမြို့နယ်အတွင်းရှိ စစ်ကောင်စီတပ်ဖွဲ့ဝင်များကို ယနေ့တွင် KNU နှင့် PDF ပူးပေါင်းတပ်ဖွဲ့များက ဝင်ရောက်တိုက်ခိုက်ရာ သုံ့ပန်း ၂၂ ဉီး ဖမ်းဆီးရမိခဲ့ကြောင်း NUG က ကြေညာလာသည်။

စစ်တောင်းမြစ်ဝှမ်းစစ်ဆင်ရေးအဖြစ် ကျောက်ကြီးမြို့နယ်အတွင်းရှိ စစ်ကောင်စီတပ်များကို ပြည်သူ့ကာကွယ်ရေးတပ်မတော်၊ အမှတ်(၂)စစ်ဆင်ရေးနယ်မြေ ပဲခူးတိုင်းစစ်ဌာန ၊ ဗျူဟာ(၂၅) တပ်ရင်း ၃၇၀၂၊ အထူးကွန်မန်ဒိုတပ်ရင်း၊ Spring Warrior Column နှင့် ကရင်အမျိုးသားလွတ်မြောက်ရေးတပ်မတော်(KNLA)၊ တပ်ရင်း(၈)၊တပ်ရင်း(၉)တို့ပူးပေါင်း၍ တိုက်ခိုက်ခဲ့ကြခြင်းဖြစ်ကြောင်း ဆိုသည်။

အဆိုပါ စစ်ဆင်ရေးအတွင်း စစ်ကောင်စီတပ်ဖွဲ့ဝင်( ၇ )ဦးထက်မနည်းသေဆုံးခဲ့ပြီး (၂၂)ဦးကိုလည်း စစ်သုံ့ပန်းအဖြစ် ဖမ်းဆီးရရှိခဲ့သည်ဟု ဆိုသည်။

ယင်းအပြင် လက်နက်မျိုးစုံ (၂၈)လက်နှင့်ခဲယမ်းများ၊ အခြားစစ်သုံးပစ္စည်း အမြောက်အများကိုလည်း သိမ်းဆည်းရရှိခဲ့သည်ဟု ထုတ်ပြန်ချက်အတွင်း ဖော်ပြထားသည်။

မဟာမိတ်ပူးပေါင်းတပ်ဖွဲ့များအနေဖြင့် ဖမ်းဆီးရမိသော စစ်သုံ့ပန်းများကို ဂျနီဗာကွန်ဗန်းရှင်း (Geneva Conventions) နှင့်အညီ စနစ်တကျ ထိန်းသိမ်းထားကြောင်း ဖော်ပြထားသည်။

26/06/2025

“အဖေ က စစ်တပ်ကို ထောက်ခံလို့ CDM မလုပ်တာ မဟုတ်ဘူး။ ဆင်တွေကို သံယောဇဉ်ကြီး လို့”

ပုလဲ၊ ဇွန် ၂၆
Newsambassador

အသက် ၂၃ နှစ်အရွယ် အဲအဲ တစ်ယောက်သည် ငယ်စဉ်ကတည်းကပင် ဆင်များအကြား ကြီးပြင်းလာခဲ့ရသူဖြစ်သည်။

ဖခင်ဖြစ်သူကား စစ်ကိုင်းတိုင်း၊ မော်လိုက်မြို့နယ်အတွင်းရှိ ဆင်စခန်းတစ်ခုမှ ဆင်ဉီးစီးတစ်ဉီးဖြစ်သည့် အလျောက် အဲအဲမှာ ငယ်စဉ်ကတည်းက ဆင်ဝိုင်းများတွင် နေထိုင်ကြီးပြင်းခဲ့ပြီး သားအဖ နှစ်ဉီးစလုံး ဆင်များအပေါ် သံယောဇဉ်ခိုင်မာသူများ ဖြစ်ကြသည်။

အဲအဲ သည် ပညာရေးတွင် ၆ တန်းအထိသာ ကျောင်းနေဖူးသည်။ စစ်တပ်က အာဏာသိမ်းပြီးနောက်ပိုင်း အရပ်သား ပစ်မှတ်များမကျန် စာသင်းကျောင်း ၊ ဆေးရုံတို့ကို ဗုံးကြဲတိုက်ခိုက်မှုများကြောင့် အဲအဲ ၏ ပညာရေးမှာလည်း ရပ်တန့်သွားခဲ့ရသည်။

“ အာဏာသိမ်းတော့ တော်လှန်ရေးတပ်ဖွဲ့တွေထဲ ဝင်ချင်လို့ တဖွဲ့ပြီးတဖွဲ့ လိုက်ချိတ်ခဲ့ရတယ်။ ကျွန်တော့် အဖေ နဲ့ အမေ က ကွဲနေတာ။ အမေ ကတော့ နိုင်ငံခြားမှာ အလုပ်ထွက်လုပ်နေတယ်။ ကျွန်တော်က ငယ်ငယ်လေးကတည်းက ဆင်လည်း ကိုယ်တိုင်မောင်းခဲ့တယ်။ ယောကျာ်းလေး လုပ်တဲ့အလုပ်ဆို အကုန်လုပ်တယ်။ မိန်းကလေးလုပ်တဲ့ အလုပ်ဆို ဝါသနာမကပ်ဘူး။ ဒီတော်လှန်ရေးထဲ ရောက်ကတည်းက အဖေနဲ့က အဆက်အသွယ် မရတော့ဘူး။ အဖေကလည်း နယ်စပ်မှာဆိုတော့ ဆက်သွယ်ဖို့ခက်တယ်။ ကျနော့ဘက်မှာလည်း ဖုန်းလိုင်းတွေက ဖြတ်ခံထားရတော့ ဆက်သွယ်လို့မရတော့ဘူး။ အဖေ့ကိုတော့ သတိရတယ်။ အမေ့ကိုလည်း သတိရပါတယ်“ ဟု အဲအဲ က ပြောသည်။

တော်လှန်ရေးတပ်ထဲ ဝင်ရောက်လို့သည့် သမီးဖြစ်သူ၏ဆန္ဒကို ဆင်ဉီးစီးဖြစ်သူ ဖခင်က ဖြည့်ဆည်းပေးခဲ့သည်။ ဖခင်ဖြစ်သူ၏ ချိတ်ဆက်ပို့ဆောင်ပေးမှုနှင့်ပင် အဲအဲ တစ်ယောက် ချင်းပြည်နယ်အခြေစိုက် ချင်းအမျိုးသားတပ်ဉီး CNF သို့ စစ်သင်တန်းတက်ရောက်ခွင့် ရရှိခဲ့သည်။

စစ်သင်တန်းပြီးဆုံးချိန်တွင် အဲအဲ သည် ပြည်သူ့တော်လှန်ရေးလက်ရုံးတပ်ဖွဲ့ (PRAF) ၌ ရဲမေ တစ်ယောက်အဖြစ် တာဝန်ထမ်းဆောင်ခဲ့သည်။

“အဖေက စစ်တပ်ကိုထောက်ခံလို့ CDM မလုပ်တာ မဟုတ်ဘူး။ ဆင်တွေကို သံယောဇဉ်ကြီးလို့။ ဆင်ဦးစီးတွေက သူတို့ရဲ့ဆင်တွေကို သားသမီးလို သဘောထားကြတာပါ။ ဆင်ဦးစီးတွေမရှိရင် ဆင်တွေမှာ စားဖို့ကအစ အခက်တွေ့တယ်။ အဖေ့မှာ ဆင် ၆ ကောင်ရှိတယ်။ ဆင်ကတော့ အစိုးရ ဆင်တွေပါ။ ဒါပေမယ့် အဖေတို့က PDF စိုးမိုးတဲ့နေရာမှာပဲ နေရတာပါ။ လစာကတော့ ပုံမှန်ရတယ်ပြောတယ်။ အဖေ့လစာကလည်း ၂ သိန်းခွဲရတယ်။ ဆင်ခေါင်းအလုပ်က အစိုးရအလုပ်ဆိုပေမယ့် တော်လှန်ရေးအဖွဲ့တွေ လက်နက်သယ်တဲ့အခါ ဆင်တွေနဲ့ကူညီ ပေးကြတာတွေလည်း ရှိကြပါတယ်” ဟု အဲအဲ က ဖခင်ဖြစ်သူအကြောင်း ပြောပြသည်။

အဲအဲ ၏ ဖခင်ဖြစ်သူမှာ ဆင်များနှင့်အတူ ယှဉ်သန်နေထိုင်ရခြင်းကို ပျော်မွေ့သူဖြစ်သကဲ့သို့ အဲအဲမှာလည်း တိုက်ပွဲများအကြား လိုက်ပါရင်း ဗုံးသံယမ်းငွေ့များအကြား ပျော်မွေ့နေသူဖြစ်သည်။

“ကန့်ဒေါင့် စခန်းသိမ်းတိုက်ပွဲမှာ လေကြောင်းတိုက်ခိုက်တာ အတော်ခံရတယ်။ နေ့ရော ညပါ ဗုံးကြဲတာ။ ကျနော့ရှေ့မှာတင် ရဲဘော်တယောက်ကျသွားတယ်။ နှစ်ယောက် ဗုံးစ မှန်တာ။ တစ်ယောက်က လက်မောင်းနဲ့ ဗိုက်ကိုထိပြီး ကျသွားတယ်။ ကျနော်ကိုယ်တိုင်လည်း ဆေးကုသမှုတွေ လုပ်ပေးခဲ့ပါတယ်။ ကိုယ့်မျက်စိရှေ့မှာတင် ရဲဘော်တွေကျသွားတာ မြင်ရတော့ စိတ်မကောင်းဘူး၊ ခံပြင်းမိတယ်။ ကိုယ်တိုင် GUN ကိုင်ပြီး ရှေ့ဆုံးပွိုင့်အထိ တက်တိုက်ချင်တယ်” ဟု အဲအဲ ပြောဆိုချိန်တွင် ဝမ်းနည်းမှုအရိပ်အကဲများကို မျက်နှာထက်တွင် တွေ့ရသည်။

ပြည်သူ့လွတ်မြောက်ရေးတပ်မတော် (PLA) ဦးဆောင်သော ပုလဲမြို့နယ် ကန့်ဒေါင့်ရဲစခန်း သိမ်းတိုက်ပွဲတွင် PRAF လည်း ပါဝင်တိုက်ခိုက်ခဲ့ခြင်းဖြစ်သည်။

သီတင်း ၂ ပတ် ကျော်ကြာ တိုက်ခိုက်ခဲ့သည့် ကန့်ဒေါင့်စခန်းသိမ်းတိုက်ပွဲအတွင်း တော်လှန်ရေးပူးပေါင်းတပ်များဘက်မှလည်း ရဲဘော် ၅ ဉီး အထိ ကျဆုံးခဲ့ရသည်။

စခန်းသိမ်းတိုက်ပွဲတွင် အဲအဲ က တပ်စုမှုးအဖြစ် ကင်းထောက်တာဝန် ယူခဲ့ရပြီး ဆေးတပ်သားအဖြစ်လည်း လိုက်ပါခဲ့ရသည်။

ရှေ့တန်းတွင် ကင်းထောက်တာဝန်ကို ယူထားရသော်လည်း အဲအဲ ဖြစ်ချင်သော အရာကား အကောင်းဆုံး တိုက်ခိုက်ရေးသမား တစ်ဦးဖြစ်သည်။

ပုံစာ- အဲအဲ

21/06/2025

ကန့်ဒေါင့်စခန်းသိမ်းတိုက်ပွဲ နယ်မြေ ရှင်းလင်း (ရုပ်သံ)

ရန်ကုန် ၊ ဇွန် ၂၁
Newsambassador

စစ်ကိုင်းတိုင်း ၊ ပုလဲမြို့နယ် ကန့်ဒေါင့်စခန်းသိမ်း တိုက်ပွဲကို ဇွန် ၁၉ရက် က အပြီးသတ်သိမ်းပိုက်နိုင်ခဲ့ပြီး နယ်မြေရှင်းလင်းရေး ရုပ်သံဖြစ်ပါသည်။

တကျော့ပြန် ကန့်ဒေါင့်စခန်းတိုက်ပွဲကိုပြည်သူ့ လွတ်မြောက်ရေးတပ်မ တော် (PLA) နှင့် ဒေသအခြေ စိုက်ကာကွယ် ရေးအဖွဲ့များက ပူးပေါင်းပြီးဇွန် ၂ရက်နေ့မှစပြီး ၁၈ရက်ကြာထိုး စစ် ဆင် တိုက်ခိုက်ခဲ့ခြင်းဖြစ်သည်။

ဇွန် ၁၀ရက်နေ့က ကန်ဒေါင့်ရွာစခန်းသိမ်းတိုက်ပွဲမှာ လေကြောင်းပစ်ကူလာပေးသည့်စစ်လေယာဉ်ကို PLAမှ ပစ်ချလိုက်ပြီး အဆိုပါ လေယာဉ်သည် ပုလဲမြို့နယ် ၊စပါးစေ့ကျေးရွာအတွင်းပျက်ကျ ပေါက်ကွဲသည်ဟု PLA က ထုတ်ပြန်ခဲ့ပါသည် ။

ပုလဲမြို့နယ်တွင် စစ်ကောင်စီအခြေ စိုက်စခန်း ၄ ခုရှိသည့်အနက် ကန့်ဒေါင့်စခန်း၊အင်မထီးပျူရွာ နှင့် ဇီးဖြူကုန်းပျူရွာ များတွင် တိုက်ပွဲမျာပြင်း ထန်နေပြီး နေ့စဉ်ရက်ဆက်လေ ကြောင်း တိုက်ခိုက်နေမှုကြားမှ ကန့်ဒေါင့်စခန်းကို သိမ်းပိုက်နိုင်ခြင်းဖြစ် သည်ဟုသိရသည်။

အဆိုပါတိုက်ပွဲတွင် ပြည်သူ့လွတ်မြောက်ရေးတပ်မတော် (PLA) နှင့်အတူ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (ABSDF)၊ ယင်းမာပင်ခရိုင် အမှတ် ၁၁ တပ်ရင်း (ကျားသစ်နက်တပ်မတော်)၊ ဗမာလွတ်မြောက်ရေးဒီမိုကရက်တစ်တပ်ဦး (BLDF)၊ ဒေါင်းနက် နယ်စည်းမခြားပြောက်ကျားတပ်ဖွဲ့နှင့် အညာမြေတပ်ပေါင်းစုတို့လည်း ပါဝင်ခဲ့ကြောင်း သိရသည်။

၂၀၂၃ ခုနှစ် ဒီဇင်ဘာလအတွင်းကလည်း ကန့်ဒေါင့်ရွာ ရဲစခန်းကို ဒေသကာကွယ်ရေးတပ်များက ဝင်ရောက် တိုက်ခိုက်ခဲ့ပြီး စစ်ကောင်စီတပ်၏ လေကြောင်းတိုက်ခိုက်မှုများကြောင့်ပြန်လည်ဆုတ်ခွါခဲ့ရကြောင်း ၊ယခုအခါ တနှစ်ကျော်ကြာ ပြီးမှ ပြန်လည် သိမ်းယူနိုင်ခဲ့သည်။

ပြည်သူလွတ်မြောက် ရေး တပ်မတော် PLA သည် ပြည်ကွန်မြူနစ်ပါတီ၏ တပ်တစ်ခုဖြစ်သည် ။

20/06/2025

တကျော့ပြန် ကန့်ဒေါင့်စခန်းသိမ်းတိုက်ပွဲ စကစမှ ဗုံးအလုံး ၅၀၀ကျော်ကြဲချ ခုခံသော်လည်း အပြီးသတ်သိမ်းပိုက်ရရှိ

ရန်ကုန်၊ ဇွန် ၂၀
News Ambassador

စစ်ကိုင်းတိုင်း၊ ပုလဲမြို့နယ်ရှိ ကန့်ဒေါင့်ရဲစခန်းသိမ်းတိုက်ပွဲ နှစ်ပတ်တာအတွင်း စစ်ကောင်စီတပ်ဘက်က ဗုံးအလုံးရေ ၅၀၀ ကျော် ကြဲချခုခံခဲ့သော်လည်း ပြည်သူ့လွတ်မြောက်ရေးတပ်မတော် - PLA ဦးဆောင်သည့် မဟာမိတ်တပ်ပေါင်းစုသည် ဇွန် ၁၉ ရက်၊ မနက် ၆ နာရီ ၄၀ မိနစ်အချိန်တွင် အောင်မြင်စွာ သိမ်းပိုက်နိုင်ခဲ့သည်ဟု PLA ၏ ပြန်ကြားရေးတာဝန်ခံက ပြောသည်။

ကန့်ဒေါင့်ရဲစခန်းကို ပြည်သူ့လွတ်မြောက်ရေးတပ်မတော်က ဇွန်လ ၂ ရက်နေ့တွင် စတင်ထိုးစစ်ဆင်တိုက်ခိုက်ခဲ့ပြီး ရက်သတ္တပတ် နှစ်ပတ်ကျော်အကြာ ဇွန်လ ၁၉ ရက်နေ့တွင် အောင်မြင်စွာ သိမ်းပိုက်နိုင်ခဲ့ခြင်းဖြစ်သည် ။

စခန်းသိမ်းတိုက်ပွဲအတွင်း စစ်ကောင်စီတပ်က စခန်းမကျစေရေးအတွက် လေကြောင်းပစ်ကူ တရစပ်ပေးခဲ့ပြီး အပြင်းအထန်ခုခံခဲ့ကြောင်း၊ ဇွန်လ ၂ ရက်နေ့မှစပြီး စခန်းသိမ်းနိုင်သည့် ဇွန်လ ၁၉ ရက်နေ့အထိ လေကြောင်းတိုက်ခိုက်မှု အကြိမ် (၂၀၀) ကျော် ပြုလုပ်ခဲ့ကာ ဗုံးသီးအလုံးရေ (၅၀၀) ကျော် ကြဲချခဲ့ကြောင်း သိရသည်။

ယင်း လေကြောင်းတိုက်ခိုက်မှုများအတွင်း ဂျက်ဖိုက်တာများ၊ Y12 ဗုံးကြဲလေယာဉ်များအပါအဝင် Mi35 တိုက်ခိုက်ရေးရဟတ်ယာဉ်နှင့် စက်တပ်လေထီးများ အသုံးပြုခဲ့သည်ဟု သိရသည်။

ဇွန်လ ၁၀ ရက်နေ့ နေ့လယ် ၁၂ နာရီ ၁၅ မိနစ်အချိန်တွင် တိုက်ပွဲသို့ လေကြောင်းပစ်ကူ လာပေးသော စစ်ကောင်စီ၏ F7 (Chengdu J-7) အမျိုးအစား တိုက်လေယာဉ်တစီးကို ပြည်သူ့လွတ်မြောက်ရေးတပ်မတော် - PLA က ပစ်ချနိုင်ခဲ့သည်။ ပစ်ချလိုက်သော လေယာဉ်သည် ကျေးရွာတရွာအတွင်းသို့ ထိုးစိုက်ပျက်ကျသွားပြီး လေယာဉ်မှူးလည်း ‌သေဆုံးသွားခဲ့ကြောင်း၊ စစ်ကောင်စီသည် အဆိုပါစခန်းမကျရေးအတွက် လေကြောင်းပစ်ကူ အမြောက်အမြားအပြင် မြေပြင်စစ်ကူစစ်ကြောင်းများ၊ လက်နက်ခဲယမ်းများ၊ ရိက္ခာများလည်းပေးပို့ခဲ့ကြောင်း သိရသည်။

ကန့်ဒေါင့်ကျေးရွာနှင့် ၃ မိုင်ခွဲခန့်ကွာဝေးသော စစ်ကောင်စီပြည်သူ့စစ် (ပျူစောထီး) များ အခြေစိုက်ရာ အင်မထီးရွာသို့ Mi17 ရဟတ်ယာဉ်ဖြင့် အကြိမ်ကြိမ် စစ်ကူပို့ခဲ့သော်လည်း အင်မထီးရွာမှ ထွက်လာသော ပျူစောထီးနှင့် စစ်ကောင်စီပူးပေါင်း စစ်ကူစစ်ကြောင်းများကို တော်လှန်ရေးပေါင်းစုက စစ်ကြောင်းပျက်သည်အထိ အောင်မြင်စွာ တိုက်ခိုက်ဖြတ်တောက်ထားနိုင်သဖြင့် ကန့်ဒေါင့်သို့ စစ်ကူများမရောက်နိုင်ဘဲ ရှိခဲ့သည်။

စစ်ကောင်စီသည် လေကြောင်းမှ Y12 ဖြင့် ကန့်ဒေါင့်ရဲစခန်းသို့ ရိက္ခာထုတ်များ၊ ခဲယမ်းများ ချပေးခဲ့ပြီး ရွာအတွင်းကျနေသော ရိက္ခာထုပ်များနှင့် ခဲယမ်းထုပ်များကို စခန်းတွင်းမှ စစ်ကောင်စီစစ်သားများ လာရောက်ယူဆောင်ချိန်တွင် ပြည်သူ့လွတ်မြောက်ရေးတပ်မတော်ရဲဘော်များက ပစ်ခတ်ဟန့်တားသဖြင့် ရိက္ခာထုပ်များ၊ ခဲယမ်းထုပ်များ စခန်းထဲသို့ မရောက်နိုင်ဘဲ ရှိနေခဲ့သည်ဟု PLA က ဆိုသည်။

ကန့်ဒေါင့်ရဲစခန်းသည် အချက်အချာကျသော အာဆီယံလမ်းမကြီး (ပုလဲ -ဂန့်ဂေါ) လမ်းပိုင်းပေါ်တွင် တည်ရှိသည်။ အဆိုပါလမ်းသည် အိန္ဒိယနိုင်ငံအထိ သွားလာနိုင်သဖြင့် မဟာဗျူဟာအရ အလွန်အရေးပါသောနေရာ ဖြစ်သည်။ ထို့အပြင် ကန့်ဒေါင့်မှ အနောက်မြောက်ဖက် မိုင် ၃၀ ကျော်အကွာတွင် စစ်ကောင်စီ၏ ကာကွယ်ရေးပစ္စည်းစက်ရုံ (ကပစ ၂၃) တည်ရှိပြီး အနောက်တောင်ဖက် ၃၅ မိုင်ခန့်တွင် (ကပစ ၂၄) တည်ရှိသည်။ ကန့်ဒေါင့်ရဲစခန်းသည် ပုလဲမြို့မရဲစခန်းပြီးလျှင် ဒုတိယအကြီးဆုံး ရဲစခန်းဖြစ်ပြီး ဘန်ကာများ၊ မိုင်းကွင်းများ၊ ကတုပ်ကျင်းများဖြင့် ခံစစ်အထပ်ထပ်ပြင်ထားသော တပ်စခန်းတခု ဖြစ်ပါသည်။

ကန့်ဒေါင့်စခန်းသိမ်းတိုက်ပွဲတွင် ပြည်သူ့လွတ်မြောက်ရေးတပ်မတော်မှ အမျိုးသမီးရဲဘော်များလည်း ပါဝင်တိုက်ခိုက်ခဲ့ကြောင်း သိရသည်။

အဆိုပါတိုက်ပွဲတွင် ပြည်သူ့လွတ်မြောက်ရေးတပ်မတော် (PLA) နှင့်အတူ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (ABSDF)၊ ယင်းမာပင်ခရိုင် အမှတ် ၁၁ တပ်ရင်း (ကျားသစ်နက်တပ်မတော်)၊ ဗမာလွတ်မြောက်ရေးဒီမိုကရက်တစ်တပ်ဦး (BLDF)၊ ဒေါင်းနက် နယ်စည်းမခြားပြောက်ကျားတပ်ဖွဲ့နှင့် အညာမြေတပ်ပေါင်းစုတို့လည်း ပါဝင်ခဲ့ကြောင်း သိရသည်။

20/06/2025

ဝမ်ပေါင်ကုမ္ပဏီမှ ပစ္စည်းသယ် ယာဉ်တန်းကို လုံခြုံရေးယူပေးသော စစ်သားများ မိုင်းဆွဲတိုက်ခိုက်ခံရ၊ ၄ဦးသေဆုံး (ရုပ်
သံ)

ရန်ကုန် ၊ ဇွန် ၂၀
Newsambassador

စစ်ကိုင်းတိုင်း ဒေသကြီး၊ယင်းမာပင်ခရိုင်၊ယင်းမာပင်မြို့နယ်၊ရဲတပ်ရင်း(၂၈)မှ ယန်စီ၊ဝမ်ပေါင် ကုမ္မဏီ မှပစ္စည်းသယ် ယာဉ်တန်းနှင့် လုံခြုံရေး ယူထားသော စစ်ကောင် စီ စစ်သားများအား ဇွန်လ ၁၉ရက်နေ့က မိုင်းဆွဲတိုက်ခိုက်ခဲ့ပြီး စစ်ကောင်စီတပ်သား ၄ဦး သေဆုံးပြီး တစ်ဦးအပြင်းအထန် ဒဏ်ရာရရှိခဲ့သည်ဟု ယင်းမာပင်ပြည်သူ့ကာကွယ်ရေးတပ်ဖွဲ့က ပြောကြားသည်။

20/06/2025

ကန့်ဒေါင့်စခန်းကို အပြီးသတ်သိမ်းပိုက်နိုင်

ရန်ကုန် ၊ ဇွန် ၂၀
Newsambassador

စစ်ကိုင်းတိုင်း ၊ ပုလဲမြို့နယ် ကန့်ဒေါင့်စခန်းသိမ်း တိုက်ပွဲကို ဇွန် ၁၉ရက် က အောင်မြင်စွာ သိမ်းပိုက်နိုင်ခဲ့ကြောင်း ပြည်သူ့လွတ်မြောက်ရေးတပ်မတော် PLA က ထုတ်ပြန်ခဲ့သည်။

" လက်ရှိ အခြေနေမှာ နယ်မြေရှင်းလင်းရေး လုပ်နေပါတယ် ။လေကြောင်းကလည်း ပစ်နေတာတွေတော့ရှိတယ် ။အသေးစိတ်ကိုတော့ ထပ်မံ ထုတ်ပြန်ပါလိမ့်မယ်” ဒေသကာကွယ်ရေးအဖွဲ့မှ တာဝန်ရှိသူတစ်ဦး ကဆိုသည်။

တကျော့ပြန် ကန့်ဒေါင့်စခန်းတိုက်ပွဲကိုပြည်သူ့ လွတ်မြောက်ရေးတပ်မ တော် (PLA) နှင့် ဒေသအခြေ စိုက်ကာကွယ် ရေးအဖွဲ့များက ပူးပေါင်းပြီးဇွန် ၂ရက်နေ့မှစပြီး ၁၈ရက်ကြာထိုး စစ် ဆင် တိုက်ခိုက်ခဲ့ခြင်းဖြစ်သည်။

ဇွန် ၁၀ရက်နေ့က ကန်ဒေါင့်ရွာစခန်းသိမ်းတိုက်ပွဲမှာ လေကြောင်းပစ်ကူလာပေးသည့်စစ်လေယာဉ်ကို PLAမှ ပစ်ချလိုက်ပြီး အဆိုပါ လေယာဉ်သည် ပုလဲမြို့နယ် ၊စပါးစေ့ကျေးရွာအတွင်းပျက်ကျ ပေါက်ကွဲသည်ဟု PLA က ထုတ်ပြန်ခဲ့ပါသည် ။

ပုလဲမြို့နယ်တွင် စစ်ကောင်စီအခြေ စိုက်စခန်း ၄ ခုရှိသည့်အနက် ကန့်ဒေါင့်စခန်း၊အင်မထီးပျူရွာ နှင့် ဇီးဖြူကုန်းပျူရွာ များတွင် တိုက်ပွဲမျာပြင်း ထန်နေပြီး နေ့စဉ်ရက်ဆက်လေ ကြောင်း တိုက်ခိုက်နေမှုကြားမှ ကန့်ဒေါင့်စခန်းကို သိမ်းပိုက်နိုင်ခြင်းဖြစ် သည်ဟုသိရသည်။

ကန့်ဒေါင့်စခန်းသိမ်းတိုက်ပွဲတွင် စစ် တပ်က ပုလဲနယ်ကို နေ့ရော ညပါ ဗုံးကြဲချနေခြင်းကြောင့် ပြည်သူ ၅ဦး သေဆုံးပြီး ၁၀ဦး ထိခိုက်ဒဏ်ရာရရှိခဲ့ကြောင်း ၊ လေကြောင်းတိုက်ခိုက်မှုများကြောင့် ကျေးရွာပေါင်း ၂၀ကျော် က စစ်ရှောင်နေရခြင်းဖြစ်သည် ဟု မြေပြင်သတင်းထောက်က ဆိုသည် ။

၂၀၂၃ ခုနှစ် ဒီဇင်ဘာလအတွင်းကလည်း ကန့်ဒေါင့်ရွာ ရဲစခန်းကို ဒေသကာကွယ်ရေးတပ်များက ဝင်ရောက် တိုက်ခိုက်ခဲ့ပြီး စစ်ကောင်စီတပ်၏ လေကြောင်းတိုက်ခိုက်မှုများကြောင့်ပြန်လည်ဆုတ်ခွါခဲ့ရကြောင်း ၊ယခုအခါ တနှစ်ကျော်ကြာ ပြီးမှ ပြန်လည် သိမ်းယူနိုင်ခဲ့သည်။

ပြည်သူလွတ်မြောက် ရေး တပ်မတော် PLA သည် ပြည်ကွန်မြူနစ်ပါတီ၏ တပ်တစ်ခုဖြစ်သည် ။

News Ambassador - TV

16/07/2025

16/07/2025

12/07/2025

10/07/2025

10/07/2025

02/07/2025

26/06/2025

26/06/2025

21/06/2025

20/06/2025

20/06/2025

20/06/2025

Address

Telephone

Website

Alerts

Contact The Business

Shortcuts

Share