06/09/2025
ပရိဘောဂသုံး ပတ္တာတွေအကြောင်း
------------------------------------
ဟိုတစ်ချိန်တုံးက သုံးခဲ့တဲ့ ပတ္တာတွေဆိုရင် ခုထိ အေးဆေးသုံးနေရဆဲပဲမလား။ ကြေးပတ္တာတွေ၊ သံအထူသားနဲ့ ပတ္တာတွေ၊ ခုနောက်ပိုင်းဆို အလူမီနီယံပတ္တာတွေ စုံလို့ပေါ့။ ဒါတွေက ပုံမှန်ပတ္တာအပြားတွေပေါ့နော်။
ပရိဘောဂမှာတောင် ပတ္တာက မတူပြန်ပါဘူး။ Solid ပိုင်းနဲ့လုပ်တဲ့ ပရိဘောဂတွေအတွက်ဆို ရိုးရိုး လိပ်ပြာပတ္တာတွေကအသင့်တော်ဆုံးပါပဲ။ ဒါကို ခုခေတ်ပေါ် Overlay hinges ဒါမှမဟုတ် Concealed hinges ဒါမှမဟုတ် လူသိများဆုံးအလွယ်ခေါ် မြုတ်ပတ္တာ ဒါမှမဟုတ် C1, C2, C3 ဆိုပြီးရွေးချယ်စရာတွေနဲ C ပတ္တာတွေပေါ့ဗျာ။
Solid ပိုင်းအတွက်ဆို သတိထားစရာက Weight ပါ။ ဝိတ်များတာကို အကြာပြီးမသယ်ထားနိုင်ပါဘူး။ ဒါကြောင့် တံခါးအကြီးတွေမှာ အကောင်းဆုံးက လိပ်ပြာပတ္တာလို့ခေါ်တဲ့ ရှေးရိုးပတ္တာအကောင်းစားတွေသုံးပေါ့ဗျာ။
ခုက ပရိဘောဂပိုင်းပြောချင်တာမို့ C ပတ္တာတွေအကြောင်းပြောပြပါ့မယ်။
C ပတ္တာလို့အဓိကခေါ်လာရတာက သူ့မူလအမည်က Cabinet Hinges ပါ။
C1-2-3 ဆိုပြီး တံခါးတွေပေါ်မူတည်တတ်ဖို့ ပုံစံသုံးမျိုးထုတ်တယ်ပေါ့ဗျာ။ ဒါတောင် နိုင်ငံတကာစျေးကွက်မှာ ပုံစံကပိုများစွာရှိပါသေးတယ်။
C1 ကအတော့အသုံးဆုံးပါပဲ။ တပ်ရလွယ်တာလည်းပါတာပေါ့နော်။ ပုံတွေပါတွဲထည့်ပေးထားပါတယ်နော်။ တွဲကြည့်ပေါ့။ C1 ကို Full overlay မြန်မာလိုတော့ တံခါးတစ်ချပ်လုံးဘောင်တင်တာမျိုးပေါ့နော်။
C2 ကိုတော့ Half overlay ဘောင်တစ်ဝက်တင်ပေါ့။ C3 ကတော့ Embed ဒါမှမဟုတ် Inset ပေါ့နော်။ တံခါးကဘောင်အတွင်းထဲနေတာမျိုးပေါ့။
ဘာကွာလဲ
ကွာတာက သုံးမယ့်လက်သမားဆရာရဲ့ ပရိဘောဂဆရာရဲ့ အတွေးနဲ့ လုပ်သင့်တာကို လုပ်ပေးတာကွာပါတယ်။
အများစုကတော့ အလွယ်လုပ်နိုင်တဲ့ C1 ကိုသုံးပေးတာများပါတယ်။ C3 ကိုတော့ အသုံးအနည်းဆုံးပါ။ သူကလက်ဝင်လို့ပါ။ အတွင်း Frame ထဲမှာ တံခါးဂွင်ကျဝင်ဖို့ ပထမဆုံး ကျင်တွယ်မှန်ရမယ်။ ကွာဟချက် Gap မျှတဖို့လည်း လိုတယ်ဗျ။
အလိုအပ်ဆုံးက တံခါးရိုက်လို့ အလွယ်ခေါ်တဲ့ Door Stopper ။ သစ်သားလေးနဲ့ ခံတုံးလေးပေါ့။ ခံတုံးလေးကို တစ်ဖက်ထဲထည့်တာမျိုး၊ အပေါ်တစ်ခုထဲ ဒါမှမဟုတ် အောက်တစ်ခုထဲ ထည့်တာမျိုးဆိုတံခါးကွေးလွယ်ကော့လွယ်ပါတယ်။
C1 နဲ့ C2 ကအဲ့ပြသနာတော့ ကင်းတယ်ဗျ။ ဘောင်ကို တံခါးရိုက်လုပ်ထားတော့။
နောက်တစ်ခုက C ပတ္တာတွေအများစုဟာ Soft close type တွေများပါတယ်။ ဒါတောင် Hydraulic မပါတဲ့ အလွတ်တွေလည်း ရောင်းနေတာတော့ တွေ့မိတယ်ဗျ။ ကျတော်တော့ မသုံးပါ။
ပြီးတော့ တံခါးကို ဖွင့်တဲ့အခါ လှန်ထားစေလိုတဲ့ ဒီဂရီပေါ်လည်း ရွေးချယ်ဝယ်ယူနိုင်တယ်ဗျ။ ဒီမှာတော့ အဲ့ဒါမျိုးက EcoWARE နဲ့ Hettich တွေကတော့ ထုတ်ထားတာတွေ တင်ရောင်းပါတယ်ဗျ။
၁၀၅ ဒီဂရီ၊ ၁၆၅ ဒီဂရီ စသဖြင့် တံခါးလှန်နေမယ့် ဒီဂရီကိုရွေးနိင်ပါသေးတယ်။
လာပါပြီ ကွာလတီ
ဘရန့်ထုတ်နဲ့ တရုတ်စျေးပေါထုတ်ဘာကွာသလဲဆိုတာပေါ့။ ကွာလတီကွာပါတယ်။ တရုတ်စာသားနဲ့ အကောင်းစားတွေလည်း လာတယ်နော်။ တရုတ်ထုတ်တိုင်း ညံ့တာမဟုတ်ပါဘူး။ ရှယ်ကောင်းတာတွေ သုံးဖူးပါတယ်ဗျ။
စျေးတောင် တစ်စုံ ၃၅၀၀ ဝန်းကျင်ပါပဲ။
ကွာလတီရဲ့အသက်က 3D လို့ခေါ်တဲ့ တံခါးချိန်တဲ့ စကူလေးတွေအရည်အသွေး၊ ပြီးတော့ Hydraulic ကောင်းတာမကောင်းတာ။ အရေးတကာ အရေးပါဆုံးက စတီးသားပါဝင်မှုပါ။
EcoWARE ဆိုရင် မီးဖိုခန်းသုံးဖို့ SUS 304 ဆိုပြီးတစ်ခုတင် လက်ရှိစျေး ၆ထောင် ၇ထောင်နီးပါးတန်တဲ့ ရှယ်ကွာလတီနဲ့ လာတာတွေရှိတယ်ဗျ။
စည်းကမ်းတကျသုံးတဲ့အခါ လေးငါးဆယ်နှစ်မကခံပါတယ်။ ဖြစ်သလို ဆီတွေ အငံရည်တွေထိနေရင်တော့ သူလည်း သက်တမ်းတိုမှာပါ။ ပုံမှန် 304 ဆိုတဲ့ စတီးသားပါဆိုတဲ့ ဟာတွေထက်တော့ သက်တမ်းပိုနေမှာပါ။
ကြားဖြတ်ပြောရရင် စတီးမှာ ကွာလတီအတွက် စတီးသားအမှတ်အဖြစ် 304 နဲ့ 302, 303 တွေ ဆိုပြီး ဖော်ပြကြတယ်ဗျ။ သူတို့ရဲ့ စတီးသား Resistance ပေါ်မူတည်ပေးတဲ့ ကုတ်တွေပေါ့နော်။316 ကတော့ လုံး၀အသန့် Stainless Steelပေါ့။ စတီးတောင် Mild Steel , Alloy steel, carbon steel စသဖြင့်အမျိုးတွေလည်း ကွဲတယ်ဗျ။ သံကို စတီးရည်စိမ်ထားတာမျိုးတွေနဲ့ စတီးသားစစ်စစ်တွေက တန်ဖိုးဘယ်တူမလဲဗျ။
ကွာလတီနဲ့ ကြာရှည်လည်း ဘယ်တူမလဲပေါ့နော်။
အမယ် သူလည်း အမည်ခွဲတွေများသဗျ။ မာကြောမှုပေါ်မူတည်ထားတဲ့ Tool Steel ၊ Tools တွေအတွက်ထုတ်တဲ့စတီးပေါ့နော်။ ပြီးတော့ Stainless Steel ဆိုပြီး ရှယ်စတီးလည်း ရှိသေးတယ်ဗျ။
ထားပါတော့ လိုရင်းက စတီးဘက်ခရီးထွက်နေပြန်ပြီ။
C ပတ္တာတွေသုံးတဲ့အခါ တံခါးရဲ့အရှည်ပေါ်မူတည်ပြီး ပတ္တာအခုရေကို တိုးပေးရပါတယ်။ ခိုင်မာတောင့်တင်းအားထိန်းနိုင်ဖို့အတွက်ပေါ့။
မိတ်ဆွေတို့ အပ်နှံတဲ့ ပရိဘောဂတွေမှာ စျေးတွေကွာနေရခြင်းရဲ့ အထဲကတစ်ခုအဖြစ် Hardware တွေရဲ့စျေးတွေပေါ်လည်း မူတည်တာသိရင်ကျေနပ်ပါပြီဗျာ။ EcoWARE မှာဆို တစ်ခု ၁၅၀၀ ဝန်းကျင်ကနေ ၃ထောင်ဝန်းကျင် ၆ထောင် ၇ထောင် ဝန်းကျင်ထိရှိပါတယ်။ Hettich ဘရန့်မှာဆိုရင်တော့ တစ်ခုတစ်သောင်းဝန်းကျင်ကနေ ၂သောင်းဝန်းကျင်လောက်ထိ ဂျာမနီရှယ်တွေ ရနိုင်ပါတယ်လို့။
ဘာပဲဖြစ်ဖြစ် ပတ္တာဟာလည်း ထို ပရိဘောရရဲ့ အလှကို အဖော်ဆုံးထဲကတစ်ခုပါပဲလို့သာ။ တံခါးမညီတဲ့ပရိဘောဂ၊ တံခါးမခိုင်မလှ မသေသပ်တဲ့ ပရိဘောဂ..... ဘယ်နဲ့ ထိုအိမ်တွင်အလှဝင်နေပါမည်နည်း။
နတ်သား
