01/07/2026
အေးချမ်းချင်ရင် ပွဲတွေရှောင်
အခုနောက်ပိုင်း Social Media မှာ ပွဲတွေ သိပ်များတယ်နော်။ “ဟိုမင်းသားက ဘာဖြစ်လို့၊ ဟိုမင်းသမီးက ဘာဖြစ်လို့“ “ဘယ်သူက ဘယ်သူနဲ့ အိမ်ထောင်ရေး ဖောက်ပြန်လို့“ “ဘယ်သူက ဘယ်သူ့ရည်းစားကို စနိုက်ကျော်လို့” စသဖြင့် ပွဲတွေ သိပ်များ၊ ပြဿနာတွေ သိပ်များပါတယ်။လူတွေကလည်း ပွဲဟေ့ဆိုရင် သိပ်ကို စိတ်ဝင်စားကြပါတယ်။ ကိုယ်နဲ့ မဆိုင်တဲ့ သူများပြဿနာတွေကို ရှေ့ဆုံးကနေကို ဖျာခင်းပြီး ထိုင်ကြည့်ကြတယ်။ စပ်စုတတ်ကြပါတယ်။ ပြီးရင် ကိုယ့်ပြဿနာလည်း မဟုတ်၊ ကိုယ်နဲ့ လည်း မသိတဲ့သူတွေရဲ့ ပြဿနာကို ကိုယ့်ပြဿနာကြီး တစ်ခုလို ဝင်ပါတတ်ကြပါတယ်။ Comment တွေအောက်မှာ ဝင်ဆဲ လိုက်ကြ၊ share ပြီး ဆဲလိုက်ကြနဲ့ သူများအပူကို ကိုယ့်အပူလုပ်တတ်ကြ ပါတယ်။Energy ရဲ့ သဘောဟာ စီးကူးပါတယ်။ အကြည်ဓာတ်ဆိုလည်းအကြည်ဓာတ်ဟာ ကူးစက်စေသလို မကောင်းတဲ့ Negative Energy တွေကလည်း ပိုလို့တောင် ကူးစက်လွယ်ပါသေးတယ်။ အဲ့လိုမျိုး ပွဲတွေ ဝင်ပါတော့ ဘာဖြစ်လဲ။ ကာယကံရှင်တွေနဲ့အတူ ကိုယ်ပါ လိုက်လောင်ရ တယ် မဟုတ်လား။ တစ်ခါတလေ ကာယကံရှင်ထက်ကို ပိုပြီး အဖြစ် သည်းကြတဲ့ လူတွေလည်း ရှိသေးတယ်။ ဘာလုပ်တော့မလဲ။ နေရင်း ထိုင်ရင်းတောင် တိုင်းရေးပြည်ရေးက မကောင်း၊ စီးပွားရှာရခက်၊ ကိုယ့်ရဲ့ ကိုယ်ရေးကိုယ်တာ ကိစ္စတွေနဲ့တောင် လောင်မြိုက်နေရတာ လောင်လို့ မဝသေးဘူးလား။ ဘာအတွက်ကြောင့်နဲ့ ကိုယ်နဲ့ မသိတဲ့ သူများကိစ္စတွေ ဝင်ပါနေတော့မလဲ။အခုနောက်ပိုင်း အေးချမ်းမှု၊ စိတ်ငြိမ်းချမ်းမှုဆိုတာ ပိုက်ဆံနဲ့ပါ ဝယ်ပြီး ဖြည့်တင်းနေကြရတာပါ။ အဲ့ဒါကြောင့် ကိုယ့်ဒုက္ခကိုယ်ရှာပြီး သူများပွဲတွေ ဝင်ပါပြီး စိတ်ဆင်းရဲ မခံပါနဲ့။ လူဆိုတာ သိချင်၊ စူးစမ်း ချင်စိတ်ရှိတာ သဘာဝပါ။ သိပ်ကို သိချင်သပါ့ဆိုလည်း ဝင်ဖတ်လိုက်ပါ။ ဒါပေမဲ့ ဝင်မပါပါနဲ့။ “သူများ ကိစ္စ၊ ကိုယ့်ကိစ္စ မဟုတ်ဘူး။ ကိုယ်နဲ့ လည်း မသိဘူး။ ဒါသူတို့ရဲ့ ကိုယ်ရေးကိုယ်တာ ကိစ္စ ကိုယ်နဲ့ ဘာမှမဆိုင် ဘူး။ သူများအပူ ကိုယ်မယူဘူး´´ ဆိုပြီး ကိုယ့်ကိုယ်ကိုယ် သတိလေး ပြန်ပေးပြီးပဲ နောက်ဆုတ်လိုက်ပါ။အေးချမ်းချင်ရင် ကိုယ်နဲ့ မဆိုင်တဲ့ ပွဲတွေရှောင်ပါ။ Negative Energy များလွန်းတဲ့ သူတွေကို ရှောင်ပါ။ ပတ်ဝန်းကျင်ဆိုတာ ကိုယ်တိုင် ရွေးချယ်ရတာပါ။ ဆူညံတဲ့ ပတ်ဝန်းကျင်ကို ရွေးချယ်ရင် ဘယ်တော့မှ အေးချမ်းမှာ မဟုတ်ဘူး။ တိတ်ဆိတ်ငြိမ်သက်တဲ့ ပတ်ဝန်းကျင်၊ ပညာ ပြည့်ဝတဲ့ ပတ်ဝန်းကျင်ကို ရွေးချယ်မှသာ တိတ်ဆိတ်ငြိမ်သက်ပြီး အေးချမ်းမှုကို ခံစားရမှာပါ။
#အေးချမ်းချင်ရင်ပွဲေတွရှောင်
#ငြိမ်သက်ခြင်းမှာအေးချမ်းပါစေ
#စူးရှမေ
