30/11/2025
ငြိမ်သက်နေခြင်းက အငြိမ်ခံနေခြင်း မဟုတ်ပါ။
လူတစ်ယောက်က အသက်အရွယ်တစ်ခု ရောက်လာတဲ့အခါ သို့မဟုတ် ကိုယ့်အရွယ်နှင့်မမျှသော အတွေ့အကြုံတွေ ရရှိလာတဲ့အခါ ပုံမှန်လူများနှင့် မတူဘဲ ကွဲထွက်လာတတ်သည်။ ထိုကွဲထွက်မှုတွေထဲကမှ အကောင်းရော အဆိုးပါပြောနိုင်သည့် စကားလုံးတစ်ခုမှာ ရင့်ကျက်မှု (Mature) ပင်ဖြစ်သည်။ ဤစကားလုံးသည် ရိုးရှင်းသော်လည်း တကယ်တမ်းတွင် အနှစ်သာရ တော်တော်လေးကိုရှိတယ်ပေါ့။
ရင့်ကျက်လာသူတစ်ဦးအနေဖြင့် တစ်စုံတစ်ယောက်က ကိုယ့်ကို ငြင်းခုံလာသည့်တိုင် ဘာမှပြန်မပြောဘဲ နေတတ်လာကြတယ်။
အဲ့ဒီလို ငြိမ်သက်နေခြင်းက ဘာမှပြန်မပြောတတ်၊ အငြိမ်ခံနေသည် ဟု တွေးထင်ပါက၊ သင်က ရင့်ကျက်သူတစ်ဦး ဖြစ်လာရန် ခြေလှမ်းတစ်လှမ်း နောက်ကျနေပါသေးတယ်။
ရင့်ကျက်သူတွေက ဘာလို့ ခြေတစ်လှမ်း သာရတာလဲ?
အထူးသဖြင့် မြန်မာနိုင်ငံ၌ ပြဿနာ အများဆုံးဖြစ်လေ့ရှိသည်မှာ မိဘနှင့် သားသမီးအကြား ကိစ္စရပ်တွေဖြစ်တယ်။
အခုလို အခြေအနေမျိုးတွေမှာရော အလွယ်တကူ ပြေလည်နိုင်မယ်ထင်ကြလား? မိဘကလည်း အလျှော့မပေး၊ သားသမီးကလည်း မခံမရပ်နိုင် ပြန်ပြောဆိုခြင်းတို့ဖြင့်သာ အချိန်ကုန်ဆုံးနေကြရသည်။ “ကျောင်းတက်မှ စာတတ်မယ်၊ ပညာတတ်မယ်” ဟု ပြောလေ့ရှိကြသော်လည်း ကျောင်းမပြီးဘဲ ကျောင်းပြီးသူများထက် အဆပေါင်းများစွာ သာလွန်အောင်မြင်နေသူများလည်း အများအပြားရှိသည်။
ဒါကြောင့် စဉ်းစားကြည့်ပါ။ မိသားစုနှင့်နေစဉ်အတွင်း "အမေက ဒီလိုဖြစ်စေချင်လို့ လိုက်လုပ်ရတယ်၊ အဖေက ဒီလိုလုပ်ခိုင်းလို့ လိုက်လုပ်ရတယ်" ဟု လုပ်နေရသော်လည်း၊
- အမေနှင့် အဖေ မရှိတော့လျှင်ရော ကိုယ့်ကိုယ်ကိုယ် ဘာလုပ်နိုင်မလဲဟူသော မေးခွန်းကို မေးဖူးပါသလား။
- မိဘများ မရှိတော့လျှင် မိမိ၏မိသားစုကို မည်သို့ ပြန်ရှာကျွေးရမည်ကို တွေးဖူးပါသလား။
- ယခုလို စာဖတ်နေစဉ်ပင် ရုတ်တရက် မိဘများ မရှိတော့ပါက သင်သည် မည်သို့ လုပ်ဆောင်မည်နည်း။
- ကိုယ်ကိုတိုင်တော့ နေထိုင်နိုင်တဲ့ အစွမ်းအစရှိတဲ့သူ တစ်ယောက်ဖြစ်နေပြီ ဆိုပေမယ့် အခုလိုမျိုး အခြေအနေမျိုးနဲ့ တွေ့ဆုံကြရတဲ့အခါ ကိုင်တွယ်နိုင်မယ်လို့ရော ထင်လား။
အစရှိသော မေးခွန်းများစွာ ပေါ်လာရခြင်း၏ အကြောင်းရင်းက ဘာဖြစ်မယ်လို့ ထင်ပါသလဲ။
အဖြေက ရိုးရှင်းပါတယ်။
သင့်အနေဖြင့် ရင့်ကျက်မှု လုံလုံလောက်လောက် မရှိသေးသည့်သူ တစ်ဦး အခုအချိန်ထိ ဖြစ်နေသေးသောကြောင့်ဖြစ်သည်။ မိသားစုတစ်ခုရှိခြင်းသည် ကောင်းမွန်သော်လည်း ကိုယ်တိုင်ဆုံးဖြတ်ခွင့် မပေးနိုင်၊ သူတို့မရှိသည့်အခါ ကိုယ်တိုင်ရပ်တည်နိုင်ရန် လမ်းမပြပေးနိုင်သော ပတ်ဝန်းကျင် သို့မဟုတ် မိသားစုထဲတွင် နေထိုင်နေရလျှင် ဘယ်လိုမျိုး အရာတွေ ဆက်ဖြစ်လာနိုင်မလဲဆိုတာကို ယခုလောက်ဆို သင်တွေးမိလောက်မှာပါ။
လူတိုင်းဟာ ငြင်းခုံတတ်ကြတယ်၊ ရန်ဖြစ်တတ်ကြတယ်၊ လူတွေ မလုပ်နိုင်တဲ့အရာ မရှိသလောက်ပဲ။ ဒါပေမယ့် လူတစ်ယောက်က သာမန်ထက်ပိုပြီး ငြိမ်သက်နေရင်တော့ သူများနဲ့မတူတဲ့ လမ်းကြောင်း ဒါမှမဟုတ် ခြေတစ်လှမ်းသာနေတဲ့သူတစ်ယောက်ဖြစ်နေလို့ပဲ ဖြစ်ပါတယ်။
