http://kyawnyothway.blogspot.com/

Kyaw Nyo Thway, Yagon (2025)

20/07/2025

မပျော်တဲ့ အကြောင်းပြချက်က..
ဘယ်ကိုမှ ခရီးမသွားရလို့လေ
_________________________
ရေရေရာရာတွေးကြည့်တော့..
လတ်ဆတ်တဲ့မျှော်လင့်ချက်ဆိုတာ
မရှိတော့သလိုပါပဲ။
တနေကုန်..
သစ်သီးဝလံစျေးတွေထဲပဲ
လျှောက်သွားနေချင်တယ်။
နေ့ရော၊ ညရော..
ထောပတ်သီးတွေအဝစားချင်တယ်။
အသက်ဓါတ်အပြည့်ပါတဲ့ လေနုအေးကို
ရှုရှိုက်ချင်တယ်။
သေချာမယ်ဆို..
Timberland Boots ဝယ်ထားချင်တယ်။
ဂျာကင်တွေဝယ်ထားချင်တယ်။
Jeans ဘောင်းဘီတွေဝယ်ထားချင်တယ်။
သေချာတာက..
ဘာကိုမှ မမျှော်လင့်ချင်တော့တာပါပဲ။
ကိုယ့် Inner Child ကို တာဝန်မကျေနိုင်ဘူး
သူ့ကို မျက်နှာမပြရဲဘူး
ဘယ်လိုမှ စိတ်ချလက်ချမပျော်နိုင်ဘူး
တိတ်ဆိတ်တဲ့ အခန်းလေးတစ်ခန်းရချင်တယ်
ထိုင်ငေးစရာ ပြတင်းပေါက်ကလေးရှိချင်တယ်
ကော်ဖီရယ်၊ ဝိုင်ရယ်
ဂစ်တာရယ်၊ ယူကလီလီရယ်
စာအုပ်ရယ်၊ ဘောလ်ပန်ရယ်၊ ကင်မရာရယ်
ဖုန်းရယ်၊ တက်ဘ်လက်ရယ်
နောက်ဆံမတင်းရတဲ့စိတ်နဲ့..
သီချင်းတစ်ပုဒ်ဆိုနေချင်တယ်။
ကျော်ညိုသွေး

20/07/2025

လူတစ်ယောက်ကို လေးစားပါတယ်..လေးစားပါတယ်..ဆိုပြီး တဖွဖွပြောနေတာထက် အပြုအမူနဲ့ လေးစားရတယ်။ ရှေ့တင်မှာ ဦးလေးညွှတ်၊ ဟုတ်ကဲ့ပါခင်ဗျ..တွေလုပ်၊ ဆရာ..ဆရာတွေခေါ်..ဒါ တို့ အစ်ကိုကြီး..ဆိုပြီး တော်ကီတွေမှည့်၊ အရမ်းတွေဖော်ရွေပြ၊ Humble တွေဖြစ်ပြနေတာထက်..နောက်ကွယ်မှာ စကားမရှုပ်ဖို့၊ အတင်းမတုပ်ဖို့၊ ပြိုင်ဆိုင်နေတာမျိုးတွေမလုပ်ဖို့၊ သက်ဆိုင်သူ ချစ်သူရည်းစား၊ ဇနီးမယား၊ လင်ယောက်ျား ကို ကြာကူလီမရိုက်ဖို့၊ မတည့်တဲ့သူနဲ့ သွားပြီး လုံးထွေးပတ်သက်ပေါင်းသင်းမနေဖို့ က ပိုအရေးကြီးတယ်။
လူတစ်ဘက်သားကို တကယ်လေးစားတယ်ဆိုတာ Ethic(လူ့ကျင့်ဝတ်) ရှိ/သိတာမျိုးကို အခြေခံတယ်။ ကျင့်ဝတ်မရှိ/မသိ ဘဲ လေးစားတယ်..လေးစားတယ် ပြောနေတာဟာ အောက်တန်းကျခြင်းတမျိုးပဲ။
ကိုယ့်အဆင့်အတန်းကို သိချင်ရင် ကိုယ့်ကိုယ်ကိုယ် ပြန်ဆန်းစစ်သင့်တယ်။ မိမိက အထက်ပါ ကိစ္စမျိုးတွေလူတစ်ဘက်သားကို လုပ်နေတဲ့သူလားဆိုတာကိုပေါ့။
လူတစ်ယောက်က မိမိကို ချေပြီ၊ မိုးပြီ၊ မတူသလို မတန်သလို ဆက်ဆံတာခံရတာမျိုး၊ မိမိဖော်ရွေသလို
တစ်ဘက်လူက တဖန်ပြန်ပြီးမဖော်ရွေဘူး ဆိုတာမျိုးကလည်း မိမိကိုယ်တိုင်က ကျင့်ဝတ်မဲ့တဲ့ ကိစ္စမျိုးတွေလုပ်မိခဲ့တာကို သူ့ဘက်ကသိထားလို့လည်း ဖြစ်နိုင်ပါတယ်။ မိမိက ရှေ့တင်မှာ ဖော်ရွေပြနေပြီး နောက်ကွယ်မှာ အဲဒီလိုမဟုတ်ဘဲ မျက်နှာနှစ်ဘက်နဲ့ သူဖြစ်နေမှတော့ တစ်ဘက်လူက ဘယ်လိုလုပ်ပြီး မိမိကို ဖော်ရွေနိုင်မလဲ။ စဥ်းစားပေါ့။
ဒီခေတ်မှာ လူတိုင်းက Authentically ဖြစ်မှုကိုပဲ လိုလားကြတာ။ အနှစ်သာရမဲ့တဲ့ အပေါ်ယံ Humble လာလုပ်တာမျိုးထက် Secured ဖြစ်တဲ့ Relation ကိုပဲ ပိုလိုလားကြတာ။ တကယ်လည်း စိတ်ထဲကမပါဘဲ..လာမြှောက်နေတာတွေ၊ တကယ်လေးစားတာလည်း မဟုတ်ဘဲ လာ Humble ပြနေတာတွေ၊ လိုချင်တာတစ်ခုခုရှိလို့ လာပြီး Cheerful ပြနေတာတွေကို ဘယ်သူမှ မနှစ်သက်ဘူး။
Humble ဖြစ်တာက ကောင်းတယ်ဆိုတာ သိတာပေါ့။ ဇွတ် Humble ပြနေတာကိုပဲ မကြိုက်တာ။ လက်အုပ်ချီ၊ ဦးညွှတ်တာမျိုးကတော့ လူတိုင်းလုပ်တတ်ပါတယ်။ အစစ်တွေလိုချင်ရင် အစစ်တွေပဲပေးရတယ်။ လူတစ်ယောက်ရဲ့ နှလုံးသားကိုရဖို့က အဲဒီလောက်ရိုးရှင်းတယ်။

19/07/2025

သီချင်းနားထောင်ကြပါဦး

18/07/2025

❝ကြောင်ပျောက်နေရင် ဖတ်ဖို့ကဗျာ❞
⠀⠀⠀⠀⠀⠀⠀⠀⠀⠀⠀⠀
တလောတုန်းက..
သတင်းတစ်ပုဒ်ဖတ်လိုက်ရတယ်။
ကြောင်တစ်ကောင်ပျောက်သွားလို့တဲ့
ပိုင်ရှင်ဟာ ကြောင်ကို သိပ်ချစ်တော့
မအိပ်နိုင်၊ မစားနိုင်၊ မလုပ်နိုင်၊ မကိုင်နိုင်
တငူငူ တငိုင်ငိုင်နဲ့ တွေတွေဝေဝေကြီးပေါ့။
အကြောင်းမသိတဲ့ တစ်ယောက်ကမေးတယ်..
သူကဘာဖြစ်နေတာလဲ..တဲ့။
အကြောင်းသိတဲ့တစ်ယောက်က ဖြေတယ်
❝ကြောင်ပျောက်နေတာ..❞ တဲ့။
❝ဘယ်လိုတွေဖြစ်ရတာလဲ❞ တဲ့။
❝ကြောင်ပျောက်သွားလို့ပေါ့❞ တဲ့။
❝ငါ ဘာကူညီပေးနိုင်မလဲ❞ တဲ့။
❝ကျွန်တော့်ကြောင်လေး ကူရှာပေးပါလား❞ တဲ့။
❝သြော်..လက်စသတ်တော့
ကြောင်ပျောက်သွားတာကိုး❞ တဲ့။
❝ဟုတ်တယ်လေ..ကြောင်ပျောက်နေတာ❞ တဲ့။
❝မသိပါဘူး..ငါက ကြောင်ပျောက်နေတယ်ထင်နေတာ❞ တဲ့။
ကြောင်ပျောက်တာနဲ့ တင်
ကြောင်ပျောက်နေတော့တယ်။
ကြောင်ပျောက်သွားပြီဆို..
စားလည်းမဝင်၊ အိပ်လည်းမပျော်
ဘာလုပ်လို့ ဘာကိုင်ရမှန်းမသိ နှေးတိနှေးကွေးနဲ့။
နံရံမှာကပ်ထားတဲ့ကြော်ငြာစာရွက်ကို
ရပ်ကြည့်နေတာ အကြာကြီး
ကျေးဇူးဆပ်ပါမည် တဲ့။
❝ခွေးဖိုးတစ်ထောင်
ကြောင်ဖိုးတစ်သိန်း❞ ဆိုတဲ့စကားပုံကို
သတိရသွားတဲ့ အကြံသမားဟာ
ကြောင်တွေကိုပဲ ရွေးပြီးခိုးတယ်။
ပြီးရင်..
ကြောင်ပျောက်ရှာပေးတဲ့ ဝန်ဆောင်မှုကို
သူကိုယ်တိုင် ပေးတယ်။
နေ့စဥ်ဘဝမှာ..
ကြောင်ပျောက်နေတဲ့သူတွေ ပိုပိုများလာတယ်။
ကြောင်ပျောက်ရှာပေးတဲ့သူကလည်း
အလုပ်တွေ ဇယ်ဆက်အောင် လုပ်နေရတယ်။
❝မိတ်ဆွေ ကြောင်ပျောက်နေပါသလား
ကျွန်တော်တို့..
အကောင်းဆုံးကူညီရှာဖွေပေးနိုင်ပါတယ်❞
တခါတလေလည်း..
ဘယ်လိုမှ ပြနရှာမတွေ့တော့တဲ့အထိ
ကြောင်ပျောက်တတ်တယ်။
ဒါဆိုရင်တော့သေချာပြီ..
ကြောင်ဟာ သူ့စိတ်နဲ့သူ ထွက်သွားတာပဲ။
❝ပွတ်သီးပွတ်သပ်နေတတ်ပေမဲ့
မလွမ်းတတ်တာဟာ..
ကြောင်တစ်ကောင်ရဲ့ အရည်အချင်းပဲ❞ လေ။
ကြောင်ဟာ..
ဘားအံ ကိုပဲ ရောက်နေပြီလား
ပုဂံကိုပဲ ရောက်သွားသလား
ကြောင်ပျောက်နေရင်..
အတွေးဟာ တောင်စဥ်ရေမရ။
ကြောင်ပျောက်နေရင်..
ဘယ်လိုခံစားရလဲ
ကြောင်မွေးမိလို့..
ကြောင်ချေးကြုံးရတယ်
ကြောင်သေးနံ့နံတဲ့ အဝတ်တွေ လျှော်ရတယ်။
ကြောင်ပျောက်နေရင်..
ခံစားချက်တွေ ဆားပေါ့လွန်းတယ်
မြင်ကွင်းတွေ ပေါ့ပျက်လွန်းတယ်
ကြောင်ဟာ ကော်ဖီမသောက်ဘူး
လူပဲ ကော်ဖီသောက်တယ်။
ကြောင်ပျောက်နေရင်..
ကော်ဖီလည်းမသောက်ချင်
ကဗျာလည်းမရေးချင်
ကြောင်ပျောက်နေရင်..
အိပ်စက်ခြင်းတွေလည်း အထစ်ထစ်အငေါ့ငေါ့
မျက်ခွံတွေထဲ အရည်ခမ်းလို့
ခြောက်ခြောက်ကပ်ကပ် ဖန်သလပ်လပ်။
ကျော်ညိုသွေး

17/07/2025

ကြယ်ကလေးရေ..
_____________________
ကိုယ်ကတော့..
ကြယ်တွေကိုပဲသနားတယ်။
သူတို့က အမြဲတမ်းမအိပ်စက်ရတော့..
အိပ်မက်လည်း မက်ခွင့်မရကြဘူးလေ။
မင်းမျက်ဝန်းတွေကို
ကြယ်တွေလို တင်စားမိတဲ့အခါ
အားနာမိပါရဲ့။
မင်းကိုလည်း..
ကောင်းကောင်းအိပ်ပျော်စေချင်တယ်။
ဒီလိုဖြစ်တည်မှုကို..
ဆက်လက်ရွေ့လျား ပြောင်းလဲစေချင်တယ်။
ချစ်တဲ့ကြယ်ကလေးကို ကြွေစေချင်ပါတယ်။
ကမ္ဘာမြေပေါ်ခုန်ဆင်းခဲ့ကွယ်။
ညလူဟာ အမြဲတမ်း..
မင်းမျက်ဝန်းကို ခိုး ခိုးပြီးငေးလို့
မင်းကြွေလာမှာကို..
ရင်ခွင်တံခါးဖွင့်ပြီး စောင့်မျှော်လို့။
ကျော်ညိုသွေး

17/07/2025

လူတိုင်း..လူတိုင်း ကိုယ့်ကိုယ်ကိုယ် ဘယ်နေရာမှာတော့ တော်ပြီး၊ ဘယ်နေရာမှာ သိပ်ကို ညံ့လွန်းတယ်လို့ သတိပြုမိတာတော့ ရှိမှာပဲ။ လူဆိုတာ ကိုယ့်ကိုယ်ကိုယ် တော်တယ်လို့ ဘဝင်ကိုင်တတ်ကြတယ်ဆိုပေမဲ့၊ ကိုယ်ညံ့တာကိုလည်း သိနေမှာပဲ။ အထူးသဖြင့်တော့ ကိုယ်ဘယ်နေရာမှာ ညံ့တယ်ဆိုတာက ပိုသိသာတယ်လေ။ လူတိုင်းက သူတို့ဘဝမှာ အနည်းဆုံး တစ်နေရာတော့ ညံ့တယ်ဆိုတာရှိမှာ အသေအချာပဲပေါ့။ ကျနော့်ဘဝမှာလည်း ဘယ်နေရာမှာမှ သေချာ ထူးချွန်ပြီးတော်နေတယ်ဆိုတာ မရှိပေမဲ့၊ ညံ့တဲ့ ကိစ္စတွေကတော့ အများကြီးရယ်။ အဲဒီ အညံံ့များစွာထဲမှာမှ အညံ့တကာ့ အညံ့ဆုံး ဖြစ်နေတဲ့အရည်အသွေးကတော့ အရောင်း Skill ပဲ။ စျေးရောင်းရတာလောက် ကိုယ့်မှာ ညံ့တာ မရှိတော့ဘူး။ ပစ္စည်းလည်း မရောင်းတတ်သလို၊ ကိုယ့်ကိုယ်ကိုယ်လည်း မရောင်းတတ်ဘူး။ အရောင်းလည်း ညံ့သလို၊ ရောင်းရတာကိုလည်း မကြိုက်ဘူး။ ဝယ်ချင်ဝယ် မဝယ်ချင်နေဆိုတာမျိုးပဲ။ လူတစ်ယောက်က ကိုယ့်ဆီက တစ်ခုခုဝယ်ဖို့ ဆွဲဆောင်ရတာကလည်း ကိုယ်အပျင်းဆုံး၊ စိတ်မပါဆုံး ကိစ္စတစ်ခုပဲ။ စျေးရောင်းတယ်ဆိုတာ ပလီတတ်ရတယ်၊ Flirting Skills ကလည်း မွှတ်ထွတ်နေရသေးတယ်။ ပလီတိချောက်ချက်လေးတွေလည်းပြော၊ အပိုဆာဒါးဟင်းရည်လေးတွေလည်း ကျို၊ အဲဒီလို မုန့် အီကလဲဆန်ပြီး ချိုပျစ် တတ်ရသေးတယ်။
"လူတွေက သူတို့လိုအပ်နေတာကို ဝယ်ကြတာမဟုတ်ဘူး..သူတို့လိုချင်တာကို ဝယ်ကြတာတဲ့..။ သူတို့လိုချင်တဲ့ပစ္စည်းကို လိုအပ်တယ်လို့ ထင်အောင် ဆွဲဆောင်ပြောပြီး ရောင်းရတာ..တဲ့။"
ဒါပေမဲ့..
သူက ကျနော့်ကို လိုချင်လာပြီး...သူ့ဘဝထဲမှာ ကျနော်လိုအပ်တယ်လို့ ထင်လာအောင်..ကျနော်ကမှ မပြောတတ်တာလေ။ ကျနော် ပြောတတ်တာက.."ညဥ့်မနက်စေနဲ့နော်...စောစောအိပ်..အာရုံကြောထိမယ်" တို့၊ "အခုတလော မျက်နှာချောင်သွားတယ်နော်..အလုပ်တွေ ပင်ပန်းလို့လား..၊ အအိပ်အစား မှန်ပါစေနော်..ရေများများသောက်.." တို့ ဆိုတာမျိုးတွေပဲပြောတတ်တာ။
ကျနော်က ကဗျာပဲရေးတတ်တာ။ Flirting Text တွေ မရေးတတ်ဘူး။ ကျနော်က စျေးပဲ လျှော့ပေးတတ်တာ။ ငယ်ငယ်တုန်းက အိမ်မှာစျေးဆိုင်လေးဖွင့်တော့ အိမ်နားက အမျိုးသမီးတစ်ယောက် ခဲတံလာဝယ်တယ်။ ခွေးတံဆိပ်ခဲတံ ကို ဆိုင်မှာရောင်းတဲ့စျေးက နည်းနေတော့ သူက မေးတယ်။ "အစစ်ရော ဟုတ်ရဲ့လား" တဲ့။ စျေးသိပ်လျော့ထားရင် ချစ်ခြင်းမေတ္တာကိုလည်း အတုလို့ ထင်သွားတတ်ကြ တယ်မဟုတ်လား။
#ကျော်ညိုသွေး
#စျေးမရောင်းတတ်သူ

12/07/2025

သူ့ကိုယ်သူ စာရေးဆရာပါ..ပေါ့
___________________________
သူ့ကိုယ်သူ..
စာရေးဆရာပါ..ပေါ့။
သူ့ကိုယ်သူ..
အနုပညာသမားပါ..ပေါ့။
သူ့ကိုယ်သူ..
ကဗျာဆရာပါ..ပေါ့။
သူ့ကိုယ်သူ..
လူယဥ်ကျေးကလေးပါ...ပေါ့။
သူ့ကိုယ်သူ..
ချစ်ခြင်းမေတ္တာအရာမှာ ကျမ်းပြုနေသူပါ..ပေါ့။
သူ့ကိုယ်သူ..
သန့်သန့်ခန့်ခန့်လေးပါ..ပေါ့။
သူ့ကိုယ်သူ..
စာတတ်၊ ပေတတ်၊
ဗုဒ္ဓဝင်တွေ ကျေညက်ပါတယ်..ပေါ့။
သူ့ကိုယ်သူ..
ကိုသိမ့်မွေ့ပါ..ပေါ့။
သူ့ကိုယ်သူ..
အချစ်ကို ရိုးသားစွာ စစ်ယူ
ခံစားသက်ဝင်သူတစ်ယောက်ပါ.. ပေါ့..။
တကယ့်ကို..
ဂန္ထဝင်တင်မြှောက်ချင်စရာ
လှပသောပြည်မြန်မာက..
စာပေအနုပညာသမားလေး။
စာဖတ်ကြပါ..စာများများဖတ်ကြပါ
စာဖတ်ရင် ဗဟုသုတတွေတိုးမယ်..
မှားရင် တောင်းပန်ရကောင်းမှန်းသိမယ်။
ကိုယ့်အမှားကိုယ် ဝန်ခံရဲတဲ့ သတ္တိရှိမယ်
စာဖတ်ရင်..
ဘယ်အရာက လုပ်သင့်၊
ဘယ်အရာက မလုပ်သင့်
ဆင်ခြင်နိုင်တဲ့ဥာဏ်ရှိမယ်..
ဥပမာ။
သူတပါး ချစ်ခြင်းကို မဖျက်ဆီးရဘူး
သူတပါး ချစ်သူ၊ ရည်းစား၊ ဇနီးမယားကို
ကြောင်တောင်မနှိုက်ရဘူး
ကြာကူလီမရိုက်ရဘူး ဆိုတဲ့ လူ့ကျင့်ဝတ်တွေကို
နားလည်မယ်
သူ့ကိုယ်သူ စာပေသမားလေးပါ..ပေါ့။
အွန်လိုင်းပေါ်က အကြောင်းအရာတွေ
မျက်စိသိပ်ရှုပ်တယ်..ပေါ့။
လူတွေဟာ..
အရေးမပါတာတွေကိုပဲ
ဆိုရှယ်မီဒီယာပေါ်တင်နေကြတယ်..ပေါ့။
သူ့ကိုယ်သူတော့..
ဆိုရှယ်မီဒီယာကို စမတ်ကျကျ
သုံးတတ်သူလေးတစ်ယောက်ပါ..ပေါ့။
တင်သမျှကလည်း..
စာပေ၊ အနုပညာ၊ ပန်းချီ၊ ဂီတ နဲ့ သက်ဆိုင်တဲ့
အကြောင်းအရာတွေ မဟုတ်တော့
သိပ်ကို စိတ်ရှုပ်နေရပါတယ်ပေါ့။
သူ့ကိုယ်သူ..
ပထမတန်းစား အနုပညာသမားပါပေါ့။
သူ့စာ၊ ကဗျာ ဖတ်တဲ့သူတွေကမှ
ဂျီးနီးရပ်စ်တွေပါ..ပေါ့။
သူ့စာမဖတ်တဲ့သူတွေကိုတော့..
ဥာဏ်ရည်မြင့်မားစေချင်တယ်...ပေါ့။
ကျနော်က စာရေးကောင်းတယ်လေ..
အဲဒီတော့ ကျနော့်ကို စော်လေးတွေက
ကြည်တာပေါ့
ကျနော့်အရေးအသားတွေက
တစ်လမ်းဝင် တစ်လမ်းထွက်
ရောင်းရှာတဲ့ ပန်းသည်ကလေးရဲ့
လမ်းတလျှောက်က လေပြေလို မွှေးလို့
သူ့ကိုယ်သူ စာရေးဆရာပါ..ပေါ့
အရင်ဘဝကတည်းက စာ စရေးလာခဲ့တာပေါ့။
သူ့ကိုယ်သူ အနုပညာသမားပါ..ပေါ့..
ကျနော့်နာမည်ကို မကြားဖူးဘူးလား..ပေါ့။
ကျနော်က စာရေးဆရာ ဘယ်သူလေ..
ကျနော့်နာမည်ကို..
ကြားဖူးတယ်မလား..ကြားဖူးသင့်တာပေါ့
ကြားဖူးတယ်တော့ လုပ်လိုက်ဗျာ။
ကျော်ညိုသွေး

11/07/2025

ထမင်းအများကြီးစားတာမကောင်းဘူး
ထမင်းအများကြီးစားရင်..
ဥာဏ်ထိုင်းတတ်တယ်။
ဒီနေ့လည်း ထမင်းအများကြီး စားမိပြန်တယ်
ထမင်းအများကြီးစားတာ မကောင်းဘူး
ထမင်းအများကြီးစားမိလို့..
အခုဆို..
ကျနော် ချစ်နေတဲ့ မိန်းကလေးရဲ့နာမည်ကို
မမှတ်မိတော့ဘူး။
ကျနော်ချစ်နေတဲ့မိန်းကလေးအနေနဲ့
ကျေးဇူးပြုပြီး..
"ရှင်ချစ်နေတဲ့သူက ကျမလေ.." လို့
လာပြောပေးရင်ကောင်းမှာ..။
အဲဒီလိုလေး လာပြောပေးပါလား။
ထမင်းအများကြီးစားတာ မကောင်းဘူး
ထမင်းအများကြီးစားရင် ဥာဏ်ထိုင်းတတ်တယ်
ထမင်းအများကြီးစားတာ မကောင်းတဲ့အကြောင်း
ခင်ဗျားလည်းသိမှာပါပဲ။
ထမင်းအများကြီးစားလို့..
တချို့က ကိုယ့်သူငယ်ချင်းကိုတောင် မမှတ်မိတော့ဘူး
ထမင်းအများကြီးစားလို့..
တချို့က ကိုယ်ဘယ်ဘဝကလာခဲ့သလဲ
ဆိုတာတောင် မမှတ်မိတော့ဘူး။
ထမင်းအများကြီးစားလို့..
တချို့က လီစယ်တတ်သူတွေကို
ရှုတ်ချရကောင်းမှန်းမသိတော့ဘူး
ထမင်းအများကြီးစားလို့..
တချို့က သူတပါးသက်ဆိုင်သူ၊ ဇနီးမယားကို
စည်းစောင့်ရမယ်ဆိုတာ မသိတော့ဘူး။
ထမင်းအများကြီးပြောရင်
စကားအများကြီး ပြောချင်လာတတ်တယ်။
ပြောပြီးသားဆိုတာကို မေ့ပြီး
ပေးပြီးသားကတိတွေ အထပ်ထပ်ပေးတယ်။
ကိုယ်ကိုယ်တိုင်က လိမ်နေတာကို
အတည်လိုဟန်ဆောင်ထားရမယ်ဆိုတာ မေ့ပြီး
အိုဗာတွေ လုပ်တာ..လုပ်တာ..ဆိုတာ..
ရုပ်တွေ ပေါက်လွန်းတယ်။
ထမင်းအများကြီး စားရင်
စားရင်..စားသလောက် ဥာဏ်ထိုင်းမှာပဲ
ဒါက..
"The More, The less" grammar pattern ပဲ။
ထမင်းအများကြီး စားရင်..
ဥာဏ်တွေထိုင်းသွားပြီး..
ထမင်းကလွဲရင် ကျန်တဲ့အရာတွေကို
စားစရာလို့ မမြင်တော့ဘူး။
ထမင်းမှ...ထမင်း..ဆိုပြီး
ထမင်းမှ မစားရရင်..
ဘာကိုသွားစားရမှာလဲ..ဆိုပြီး
မေးနေတတ်တယ်။
ထမင်းအများကြီးစားရင်..
ထမင်းစားရတာကိုပဲ ကြီးကျယ်မြင့်မြတ်နေသလို
ထမင်းစားမှ တွေးခေါ်တတ်သလိုလို
ထမင်းစားမှ အနုပညာအစစ်တွေဖြစ်လာသလိုလို
ထင်နေလိမ့်မယ်။
ဒီနေ့တော့..
ကျနော်လည်း ထမင်းအများကြီးစားမိပြီး
ဥာဏ်ထိုင်းသွားတယ်၊
ဆင်ခြင်တုံတရားတွေ မဲ့သွားတယ်၊
တစ်ဘက်သတ် တစ်ဇောက်ကန်း တွေးခေါ်မိတယ်
စိတ်ထဲ ချစ်ရတဲ့ မိန်းကလေးကိုလည်း
နာမည်မမှတ်မိတော့ဘူး။
သူမနဲ့ ကျနော့်ဆက်ဆံရေးက ကောင်းမွန်နေရဲ့လား။
သူမက ကျနော့်ကို..
ဘယ်လိုနာမ်စားသုံးပြီး အခေါ်အပြော လုပ်သလဲ။
အရပ်ထဲက ဆိုရိုးတစ်ခုက..
"ထမင်းစားပြီး လူလို နားမလည်" တဲ့။
တကယ်က..
ထမင်းစားတာ များသွားလို့ပေါ့။
ကျော်ညိုသွေး

09/07/2025

လိပ်ပြာ
______________________
ချစ်တယ်ဆိုတာ..
"မကောင်းမြစ်တာ ကောင်းရာညွှန်လတ်
မဟုတ်ဘူးလား" လို့..
မေးမိတဲ့ ကိုယ့်အသံတွေ
ကောင်းကင်ထဲ ပဲ့တင်အထပ်ထပ်။
ဟုတ်တယ် မလား..၊ မဟုတ်ဘူးလားဟင်..
ဒါမှမဟုတ်..
အချစ်ဟာ..
ပဲခူးငါးချဥ်လား၊ ကြက်သွန်နီလား
ကိုယ့်ရင်ကိုခွဲတယ်..
ပြီးတော့..သူက ငိုသေးသတဲ့။
အချစ်ဆိုတာ..
တစ်ရွာတစ်ပုဒ်ဆန်းလား
တစ်ကျောင်းတစ်ဂါထာလား
ဒါမှမဟုတ်..
ဒေသန္တရဆိုင်ရာမသိကိန်းအမျိုးမျိုး
ထည့်သွင်းထားတဲ့ လူမှုရေးသင်္ချာလား။
အချစ်ဆိုတာ ဘာလဲ..
ငါနားမလည်
အချစ်ဆိုတာ ငါနားလည်သလောက်
ပိတောက်ပင်လို..
ကျိုးသွားတဲ့ကိုင်းကို ဆွေးမသွားခင်
ပြန်စိုက်လို့ရတယ်။
ပြန်ပေါက်တဲ့အပင်ကနေ..
အချိန်တန်ရင် ဒီပန်းပိတောက်ပဲ ပွင့်လာမယ်။
အချစ်ဟာ ပိတောက်ပန်းလို
လူတိုင်းမက်မောကြတယ်။
ပန်းတွေပွင့်လာဖို့..
ကြိုးစားရှင်သန်ခဲ့ရတဲ့ ပိတောက်ပင်ကို
လူတွေ ဘယ်အချိန်မှာ ရေစင်လောင်းခဲ့ဖူးသလဲ။
ပန်းတွေခူးတိုင်း..
ပန်းပင်တွေကို ကျေးဇူးတင်စကား
ပြောဖူးကြရဲ့လား။
အချစ်ဆိုတာ ဘာလဲ..
ငါလည်း တကယ်မသိတော့ပါ။
အချစ်ဆိုတာ..
ဘယ်လောက်တောင်များ ခက်ခဲနက်နဲနေသလဲ
အချစ်ဟာ မရိုးရှင်းသော အရာလား
တစ်ယောက်ယောက်က..
ကိုယ့်ကို ကောင်းစေချင်လို့ပြောရင်
နားထောင်ဖို့ အသင့်ပါပဲ။
ကိုယ့်ကိုရွေးချယ်တယ်ဆိုတာလည်း
ချစ်လို့ပဲ ဖြစ်စေချင်တယ်။
လက်ချောင်းထိပ်တွေ
အသားမာတက်တဲ့အထိ လေ့ကျင့်ပြီးမှ
မွေးဖွားခဲ့ရတဲ့ သီချင်းပါ..
သံစဥ်တေးလိပ်ပြာလေးတွေဟာ
စာအုပ်ကြားထဲ ညှပ်ဖို့ မဟုတ်ဘူး။
ကျော်ညိုသွေး

07/07/2025

Public မှာ ဖွင့်ပြော
________________________
Ro ရတာတွေကြိုက်တယ်၊ ပေါ်ပင်လုပ်ရတာတွေကြိုက်တယ်၊ ဂုဏ်တွေ၊ ငွေတွေ၊ ပကာသနတွေကြိုက်တယ်၊ ကျော်ကြားမှုကို ကြိုက်တယ်။ အကောင်းဆုံးဘဝကို ကြိုက်တယ်။ နောက်ဆုံးပေါ်နည်းပညာ ထုတ်ကုန်တွေကို ကြိုက်တယ်၊ ရေညှိကြိုက်တယ်၊ ငှက်သိုက်ကြိုက်တယ်။ ရွှေပန်းကန်နဲ့ ထမင်းစားရတာကြိုက်တယ်။ ချိစ်ကြိုက်တယ်။ မိန်းမဆို တစ်ကိုယ်လုံး တောင့်တင်းကျစ်လစ်သွယ်လျ အဆီမမြင်ရတဲ့ မိန်းမကိုမှ ကြိုက်တယ်။ မျက်နှာသွယ်သွယ်၊ မျက်ခုံးမျက်လုံးကောင်းကောင်း၊ နှာတံပေါ်ပေါ်၊ မျက်ဝန်းကျယ်ကျယ်၊ အပြုံးလှလှ မိန်းမချောကို ကြိုက်တယ်။ ဟိုတယ် facilities နဲ့ အိမ်ကိုကြိုက်တယ်။ ဟိုတယ်စာ ကြိုက်တယ်။ Beer ဆို Carlsberg ကြိုက်တယ်။ မာတိနီကြိုက်တယ်။ ရေဂါမိုက်စတာကြိုက်တယ်။ ဝိုင်နီကြိုက်တယ်။ ဆိတ်ဘီယာကင်ကြိုက်တယ်။ ကြက်ရင်ပုံသားကင် ကြိုက်တယ်။ စောက်ပိုလုပ်ရတာ ကြိုက်တယ်။ စားကောင်းသောက်ဖွယ်ကို Vlog ရိုက်ပြီး ဆိုရှယ်မီဒီယာပေါ်တင်ရတာ ကြိုက်တယ်။ မွေးနေ့ဆို ပါတီပေးရတာ ကြိုက်တယ်။ အပေါ်ယံပါကင်လှလှပပ ထုပ်ပိုးထားတဲ့ ပြင်သစ်ရေမွှေး လက်ဆောင်ကို ကြိုက်တယ်။ Branded ကြိုက်တယ်။ Airforce 1 ကြိုက်တယ်။ BALENCIAGA ကြိုက်တယ်။ iPhone ကြိုက်တယ်။ iMac ကြိုက်တယ်။ မနက်စာကို ပဲခူးထိ မုန့်ဟင်းခါးသွားစားရတာမျိုး ကြိုက်တယ်။ ကိုယ်ပိုင်စားဖိုမှူးကို ဆူရှီလိပ်ခိုင်းပြီး Dragon Roll ကို Netflix ကြည့်ရင်း စားရတာ ကြိုက်တယ်။ လူတွေကို ငုံ့ကြည့်ပြီး ရွှေမိုး ငွေမိုး ရွာချရတာ ကြိုက်တယ်။ ရည်းစားအတွက် ကဗျာရေးပြီး စာအုပ်ထုတ်ရတာကြိုက်တယ်။ ချစ်ရသူ သောက်ဖို့ ရေကြည်ရေသန့်ကို နိုင်ငံခြားက အထူးသီးသန့်လှမ်းမှာပြီး တိုက်ရတာကြိုက်တယ်။ မိုးရာသီမှာ ရည်းစားနဲ့အတူ မိုးရွာနေတဲ့ မြင်ကွင်းတွေ ကြည့်ရင်းစားဖို့ ကားတစ်စီး ရှိနေတာကို ကြိုက်တယ်။ ညနေစာကို အရွက်ကြော်သုပ်နဲ့ အသားကင်နဲ့ ဘီယာနဲ့ Enjoy ရတာကို ကြိုက်တယ်။ ကြည် ကဗျာစာအုပ်ကို အရသာခံဖတ်ဖို့ ပြင်ဦးလွင်မှာ လသာဆောင်ပါတဲ့ တိုက်တစ်လုံး ရှိနေရတာကို ကြိုက်တယ်။ ကိုကာကိုလာနဲ့ ပလုတ်ကျင်းရတာကို ကြိုက်တယ်။ Wet Tissue နဲ့ ရှူးဖိနပ်ကို သန့်ရှင်းရေးလုပ်ရတာကို ကြိုက်တယ်။ Make Love Story ကို ပြဇာတ်သွင်းပြီး တကယ် သရုပ်ဆောင်ပြတာကို ကြည့်ရတာ ကြိုက်တယ်။ အချစ်နဲ့ ကိုယ်လက်နှီးနှောခါနီး သူ့တစ်ကိုယ်လုံးကို ပေါင်းတင်ပေးရတာကို ကြိုက်တယ်။ သံလွင်ဆီ ကြိုက်တယ်။ ချောကလက်ကြိုက်တယ်။ စတော်ဘယ်ရီနံ့ကြိုက်တယ်။ အတူနေရင် စကားလုံးတွေ ပစ်ပေါက်ကြဲရတာကြိုက်တယ်။ အသံလုံတဲ့ အခန်းကို ကြိုက်တယ်။ ရေချိုးပေးရတာကို ကြိုက်တယ်။ ညဘက်ဆို ဗီရိုထဲက အဝတ်အစားတွေ ထုတ်ဝတ်ပြီး မှန်ရှေ့မှာ ဆယ်လ်ဖီဆွဲတဲ့ မိန်းမမျိုးကို ကြိုက်တယ်။ Matt Lipsticks နီရဲရဲ ဆိုးထားတဲ့ နှုတ်ခမ်းမျိုးကို နမ်းရတာကြိုက်တယ်။ Season က American Cheese Cake ကြိုက်တယ်။ အကြောစိမ်းစိမ်းတွေ မြင်ရင် စိတ်လှုပ်ရှားတတ်တဲ့ သူ့ညီမလေးကို ကြိုက်တယ်။
ကျော်ညိုသွေး

07/07/2025

ဒါက ကျနော်သီချင်းလေး ၂ ပုဒ်လုပ်ပြီး Online Streaming လုပ်ထားတာကနေ ဝင်တဲ့ ပိုက်ဆံပါ။ ပထမဆုံး သီချင်း "ဟိုကောင်မလေးအတွက်" က Released လုပ်တာ တစ်နှစ်ကျော်သွားပြီဖြစ်ပြီး၊ ဒုတိယသီချင်း "လွမ်းနေတဲ့အဝါ" ကတော့ Released လုပ်တာ ၄ လ ကျော်သွားပါပြီ။ ဒီအချိန်ကာလ အတောအတွင်းမှာ သီချင်း ၂ ပုဒ်စလုံးကို အားပေးသူများက နားဆင်တဲ့အခါ Online ကြော်ငြာတွေ ဝင်လို့ရယ်၊ တခြား Service တွေကနေတဆင့် ဒီလိုမျိုး ပိုက်ဆံတွေဝင်တာဖြစ်ပါတယ်။ အဲဒီအတွက်လည်း နားဆင်ပေးခဲ့ကြသူများကို ကျေးဇူးတင်ပါတယ်။ ဒီလောက်ပိုက်ဆံက နည်းလွန်းတယ်ဆိုပေမဲ့လည်း ဆန်တစ်ပြည်ဖိုးလောက်တော့ရှိတယ်ဆိုတော့ ဆန်ဝယ်ပြီး ဆွမ်းအလှူကုသိုလ်လုပ်ဖို့ စဉ်းစားထားပါတယ်။ ဒီထက်လည်း များများ လှူဒါန်းချင်ပါသေးတယ်။
ကျနော် ထွက်ရှိပြီးတဲ့ သီချင်းတွေကို နားဆင်ခံစားချင်တယ်ဆိုရင် YouTube ကနေလည်း နားဆင်ခံစားအားပေးနိုင်သလို၊ International Music Platform တွေဖြစ်တဲ့..

Spotify
https://open.spotify.com/album/0U2faBYoTfgIp###D5qZyj
Apple Music
https://music.apple.com/mm/album/lwan-nay-tae-a-war-single/1800659065
Amazon
https://www.amazon.com/music/player/albums/B0DZH5W6VQ
Tidal
https://listen.tidal.com/album/422172842/track/422172843
တို့ကနေတဆင့်လည်း အားပေးလို့ရပါတယ်။
သီချင်းကို ဖုန်း Ringtune အနေနဲ့ အသုံးပြုချင်တယ်ဆိုရင်တော့
Flow Music Application ကနေတဆင့် မိမိတို့ အသုံးပြုတဲ့ Operator အလိုက်ဝယ်ယူအသုံးပြုလို့ရပါတယ်။
နားဆင်ခံစား အားပေးသူများအားလုံးကို ကျေးဇူးတင်ပါတယ်နော်။

06/07/2025

Self_Love
________________________
အရောင်မှိန်တဲ့ကြယ်တွေပဲဝယ်စုမယ်။
တချိန်မှာ အရေအတွက်များလာရင်
အားကျတဲ့မျက်လုံးတွေ..
ထိန်ထိန်လင်းလာမှာပဲမဟုတ်လား။
ဘဝထဲ..
သုညတွေနဲ့ အလှဆင်ထားတယ်။
လေပွေရူးတွေနဲ့ တွေ့တိုင်း..
အဲဒီသုညတွေနဲ့ မြှောက်ပေးလိုက်တယ်။
လက်ဖက်ရည်ရမယ်၊ ကွမ်းယာရမယ်
လူမသိသူမသိ အိပ်မက်တွေရမယ်
စီးကရက်ရမယ်၊ အချဥ်ပေါင်းရမယ်
Ukulele ရမယ်၊ လေကောင်းလေသန့်ရမယ်
ကိုယ့်ကြောင့်..
ဘယ်သူမှ နောက်မကျဖူးတဲ့ တန်ဖိုးရမယ်
အတွေးရှင်း၊ အရေးရှင်း၊ စကားလုံးတွေရိုးရှင်း
ပဟေဠိကင်းတဲ့ ဆက်ဆံရေးတွေရမယ်
ဝိုင်နီနီရမယ်၊ မာယာကင်းတဲ့ရယ်သံရမယ်
လူမှုရေးသင်္ချာမပါတဲ့..
ပျော်ရွှင်ခြင်းသင်ခန်းစာတွေရမယ်။
"ဤကဗျာသည်..
ချစ်ခြင်းမေတ္တာ၏အရိပ်အောက်တွင်
တည်ရှိပါသောကြောင့်
ဖတ်ရှုသူအားလုံး နှလုံးစိတ်ဝမ်းငြိမ်းချမ်းကြပါစေ"
အစရှိတဲ့..
ဆုတောင်းစကားလေးလည်း ရမယ်။
ခြေသည်းလေးဂရုစိုက်
လက်သည်းလေးဂရုစိုက်
ညနေ အိမ်ပြန်ရောက်ရင်..
ခြေဖဝါး၊ ခြေဖမိုးကို ဆားရေစိမ်ပြီး
ပြုစုလိုက်။
ညက အိပ်မက်အကြောင်း
နားထောင်မယ့်သူဟာ ဘယ်မှာမှ မရှိဘူး။
လူဟာ ပြဿနာရှိလာခဲ့ရင်..
အဲဒါစာမေးပွဲပဲ။
အဲဒါဟာ..
ယုံကြည်ရသူတွေကို စစ်ချနိုင်တဲ့ ဇကာပဲ။
ထမင်းငတ်နေတဲ့အခါ
လူငတ်ခြင်းပါဖြစ်တတ်တယ်။
တနေ့..တနေ့...
အရောင်မှိန်တဲ့ကြယ်ကလေးတွေကိုပဲ
ကိုယ်ပိုင်အလင်းကို ဂုဏ်ယူဖို့ သင်ပေး
"ပြုပြင်ရေးသမားမလုပ်နဲ့တော့..
ကိုယ့်ကိုယ်ကိုယ်ချစ်ရမယ်"
ငှက်ပျောရွက်တွေလို
ထိခိုက်လွယ်တာမျိုး မဖြစ်စေနဲ့။
ကိုယ့်ရဲ့ညနဲ့ ကိုယ့်ရဲ့အလင်း
ကိုယ့်ရဲ့သတ်ပုံနဲ့ ကိုယ့်ဘဝအဓိပ္ပါယ်
ကိုယ့် ကိုယ်ပိုင်သီချင်းနဲ့ လှပသောနွေရာသီများ
မမျှော်နဲ့။ မစောင့်နဲ့။ မမှီခိုနဲ့။
ဘဝရဲ့အသီးအနှံတွေ ခူးဆွတ်စားသုံးလိုက်။
အတွေးမများနဲ့..
နှလုံးသားကလေးကို ပေး မဖျားနဲ့
ကော်ဖီလေးတစ်ခွက်ကို ဖျော် မော့
ဝိုင်နီလေးတစ်ခွက်ကို ငှဲ့ မော့
ခံစားချက်ကို အကြွေးမထားနဲ့။
ခြေဖဝါးတော်နုနုကလေးအက်ဖ်အမ်မှာ
ခရောင်းလမ်းဂီတတွေ မထုတ်လွှင့်နဲ့။
ကျော်ညိုသွေး

Kyaw Nyo Thway

20/07/2025

20/07/2025

19/07/2025

18/07/2025

17/07/2025

17/07/2025

12/07/2025

11/07/2025

09/07/2025

07/07/2025

07/07/2025

06/07/2025

Address

Website

Alerts

Shortcuts

Share

Our Story